فيسبوك تويتر RSS



العودة   مجلة الإبتسامة > الروايات والقصص > روايات و قصص منشورة ومنقولة

روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا



إضافة رد
 
LinkBack أدوات الموضوع انواع عرض الموضوع
  #4  
قديم December 2, 2008, 06:41 PM
 
رد: ودك تنامين ؟ نامي .. روايه رومانسيه رهييبه

سمر : مشكلة اللي فاقدين الحناااان ..
قعد احمد يمسح بيده على شعر غادة بحنية : شعرك طول
غادة ابتسمت : حلو صح..؟؟
احمد : يجنن!!!

دق جوال غادة وقامت بدلع يخلي الواحد يشتهي يذبحها عليه : الووو
بابا حراام عليك .. والله تونا .. بليز!!!!!!

احمد اخذ التليفون منها : الوو .. هلا والله .. هلا بشيخ الكل .. شخبارك ..؟؟ وش علومك..؟؟ وينك يا رجال ..؟؟ ماتنشاف... ها..؟؟ حرام عليك خليهم ..تونا واصلين من السوق ... ما امداني اقعد معاهم شوي .. اشتقت لهم مررة .. تعال انت واقعد معانا ... اي خلاص .. لا خلصوا انا برجعهم.. لا لا لا .. ما بخليهم يرجعون مع السواق آخر الليل لا تخاف .. خلاص انشالله .. لا توصي حريص ...مع السلامة

احمد : احم احم .. رضى لكم تقعدون بشرط انا اللي ارجعكم البيت
من الفرح نقزة غادة على عمها وباسته على خده ..
احمد : ما اقدر عليك يالدلوووعة .. والله انك عسل ..
سمر : لاتنخدع هالاسلوب ما يطلع الا قدامك .. شوفها بالبيت دومها مكشرة ومو عاجبها شي .. واذا احد كلمها تخمش وجهه لين ما يطلع الدم
احمد : قولي والله
سمر : اسالني انا اللي عايشة معاها ..
غادة : كذااابة .. والله شلاخة يا عمي ..
دانة : ههههه ويويوووو فشلوها فشلووها ..

ام ثامر : يللا تصبحون على خير انا رايحة انام .. خذوا راحتكم ..
احمد باحترام : وانتي من اهله يا ام ثامر ..

وقعدوا على السوالف والضحك ...

( بعد ساعة )

دخل عليهم وهو تعبان والشماغ على كتفه وكان منزل راسه ..
بندر : السلااااااااااااااام ..
احمد : اطلع اطلع .. بنات محمد هنا ..
تراجع بندر بسرعة وعلى طول دار وجهه : آسف ما دريت انكم موجودين ..
سمر وهي تطلع الدرج : لا عادي .. خذ راحتك ..

المهم طلعوا البنات وطلعت وراهم دانة ..
وبندر دخل وقعد ف الصالة : السلاااااااام
احمد : وعليكم السلام ...
بندر : سوري ما ادري انهم كانوا موجودين
احمد : انتبه مرة ثانية .. شفيك تعبان..؟؟
بندر : لا بس وقفت علينا سيارة خويي .. ونزلنا دفيناها طول الطريق واحنا ندفها .. وانكسر ظهري ..
احمد : يوووه .. مساكين .. من هذا ..؟؟
بندر : سلطان .. مسكين مدري وش صار ع البطارية ووقفت فينا السيارة .. بس اشوه ما كنا بعيدين مرة ..
احمد : وين رحتوا ...؟
بندر : رحنا ستاربكس على كورنيش الخبر .. وزححححمة ..
احمد : اكيد اول يوم اجازة كل الناس برى ..
بندر : أي .. الا وين ثامر .. ؟؟
احمد : ف غرفته .. انتبه لاتروح فوق لايكون وحدة من بنات عمك موجودات..
بندر : تراهم بنات عمي .. مو بنات احد غريب ..
احمد : ادري .. حتى لو .. تراهم كبااار ..
بندر : الحين سمر هذي تعتبرها كبيرة .. ترى صوتها واصل لبرى وانا جاي .. بس حسبتها دانة ..
احمد : ههه .. حليلها .. المهم بتروح تنام الحين ...؟؟
بندر : أي والله .. تعبان مرة ..
احمد قام وقال بصوت عالي : بنااات .. طريق ترى بندر بيمر
دانة من فوق : خليه يمر محد ...

بندر : يللا تصبح على خير .. تآمر على شي احمد ؟؟
احمد : سلامتك روح ارتاح .. وانت من اهله

طلع بندر الدرج وراح غرفته .. وبعدها كملوا البنات سوالفهم مع عمهم شوي وبعدها رجعوا البيت معاه ..


@@@@@@@@@@@@@@@@@@@@@@@@@@@@@@@@@@@@@

(( اليوم الثاني .. الخميس .. 18 شعبان ))

( الساعة 7 الصباح )

وقف احمد سيارته ولمح واحد برى السيارة ينتظره .. ابتسم .. يا حليله عوض .. يخلي الواحد مستانس حتى لو ما شبع نوووم ...

وقف السيارة ف الموقف ونزل يسلم عليه ..

عوض : صباح الخير يا نوّاااااااام ...؟؟ ما شبعت نوم كالعادة ..
احمد : وش نسوي .. امس بنات اخوي سهروا ف بيتنا ونمت متأخر ..
عوض : اهاااا .. حلت لك السهرة وانت مو مداوم ...
احمد : ههه .. احسك كرفت امس لين قلت بس ..
عوض : معليه تعوضني بعدين ..
احمد : ولا يهمك .. طلعة للبحرين على كيف كيفك ..
عوض يرفع يده للسما : يا كريم انتا ... الله لايحرمنا منك ..
احمد : ههه .. وش فيها العجوز تدعي ...؟؟

عوض : امشي ندخل لا يسجلنا السيكيوريتي تأخير ... بعدين بابا عبدالله سوي جنجاال ..
احمد : خخخخخخخ جاكم الهندي وما شي يعيقه .. عوضوو اليووم وخر عن طريقه

دخلوا الشركة .. وتوجهوا لقسم الاعلانات ف الدور الثاني ...

ولما وصلوا راح عوض وقعد على مكتبه يشوف الحوسة اللي عليه ..
عوض : يوووه .. وش هالحوووسة؟؟!! من وين جات هالاوراق ..؟؟!
واحد من الموظفين : ههااي .. الدور عليك اليوم ... شد حيلك يا بطل ..
عوض باستغراب : ليش..؟؟
الموظف : لانه الحبيب سعود ما داوم ولازم واحد يستلم شغله .. واليوم دورك ...
عوض : خير..؟؟ على كيفه هذا ..؟؟؟
الموظف : مو على كيفه .. على كيف ابوووه!!
احمد كان قاعدعلى مكتبه ويسمع اللي يصير : كاااااااك ... شكلك اليوم بعد بتداوم بالليل ...
عوض : لا تقول!! .. حرام وعدت اختي اوديها تتسوق للعيد .. ما بعد اشترت شي .. امسك مكاني احمد ..
احمد : مين انا ..؟؟!! لا لا لا لا انا مالي دخل ..

عوض قام وراح لمكتب احمد وتسند عليه : يللا عاااااااد ... (وطى صوته ) امس انا مسكت مكانك .. وحدة بوحدة .. محد بيدري ..
احمد بعد تفكير : خلاص طيب .. امرنا لله ..
عوض : احبك احبك احبك ..
رفع احمد حواجبه متنرفز : انقلع لمكتبك وكمل شغلك لا بالدباسة هذي بوجهك .....

___________________________________


(( ف بيت محمد .. ابو بندر ))

( الساعة 11 الصباح )

دخلت الغرفة وهي معصبة .. صارلها ساعة وهي تدق على الباب .. ومحد رضى يفتح .. فقررت تجيب المفتاح السبير اللي بغرفتها وتدخل تهزئهم ..... واول ما فتحت الباب .. شافت الملابس مرمية ف كل مكان .. والريحة حقت التشيبس والبوب كورن والاكل .. فايحة بشكل قوي .....

ام بندر وهي مصبة : بنننننندر .... ثااااااااامر .... قوموا اشوف حسبي الله عليكم على هالمزبلة .....!!!

راحت عند بندر واخذت كاسة الماي اللي على الكومادينا وكبتها عليه .... قام وهو خايف ....

بندر وهو يلتفت مرتعب : ها...؟؟ وش صار ....
ام بندر بعصبية : قم جعلك ما تفيق انشالله

تنهد بندر ومسح وجهه باللحاف وقال وهو يحاول يبتسم : فديتك يالمعصبة .. صباح الخير
ام بندر : أي صباح؟؟؟ الساعة 11 .. قوموا اشوف انت وياااه ..... ثاااامر ... قوووم يللا!!!

ثامر:....................نايم ولا عطاها وجه ....

راحت ام بندر معصبة وشالت اللحاف ودفته بقوة لين ما قام .....

ثامر وهو مسكر عين وفاتح عين : ها.....؟؟؟ شفيكم بعد ...؟؟
ام بندر : وش فينا يعني...؟؟ مابقى كم يوم للعيد وورانا شغل قد الدنيا ....قوم اشوووف
بندر وهو طالع ينشف وجهه بالمنشفة : شغل.....؟؟ أي شغل...؟؟
ام بندر : ومن اللي بينظف هالحوووش الوصخ ...؟؟ الجني...؟؟

ثامر وبندر متفاجئين: هاا....؟؟
ام بندر : لا تطالعوني كذا ...!! أي بتنظفون الحوش بين ما انا اروح انقي مع ابوكم الستاير حقت مجلس الرجال الجديد .. ولما ارجع ابغى اشوف الحوش يلمع ...

بندر وهو يتمطط : يصير خير ...
ام بندر : والله ترى ابوكم بيذبحكم لو ما نظفتوه ... نظفوا الجدران .. والارضية .. وقصقصوا الاشجار .. وغسلوا السياراة .. فاهمين ...؟؟
ثامر : هادر ماما في شي تاني...؟؟
ام بندر وهي طالعة : لا مافي ...

وتركتهم وطلعت من البيت ........

بندر وهو يقعد على السرير : من جدها هذي ولا تمزح؟؟؟
ثامر وهو يفرك وجهه ويحك شعره : ما تعرف امك يعني...؟؟ قوووم بس خلينا نخلص شغل ..... ونرجع ننام

بندر بعد تفكير رسم على وجهه ضحكة واسعة .....

ثامر مستغرب : شفيك انت بعد ...؟؟ لا يكون ملبووووس .....!!
بندر : لا يالغبي .. جاتني فكرة ..... رهيييييييييييييبة
ثامر : وايش هي... يا ابو الافكار ...
بندر قام : سوي اللي اقول لك عليه ووالله لا نستانس بغسيل هالحوووش ...
ثامر : ماني فاهم عليك ....
بندر : البس وخلص والحقني ...
ثامر : طيب ...

طلع بندر من الغرفة ودخل المطبخ .. يشرب له كاسة كابتشينو ...

( بندر .. انسان دلخ بس كووول مرة ... ذوقه اجنبي .. الا اذا كان الموضوع لفنان العرب .. متحرر ومواكب العصر .. كل يوم له جوال وموضة شعر وملابس .. ويهتم بشكله مرة .. هاليومين عنده شنب بدون لحية .. وزلفه مرسوووم بطريقة دقيقة .. والشعر قصير ومرتب .. وللمعلومية .. مرقم نص بنات الشرقية .. وهو اخو ثامر التوأم .. وهو اكبر طبعا من ثامر ..بدقيقة ولا ثنتين .. وعلى فكرة .. تراه من عشااق الكابتشينو )

وبعد شوي نزل ثامر ...

بندر : وين وين وين بتروح انت ...؟؟ ليش لابس الثوب ...؟؟ اقولك بننظف الحووووش ... ما بنروح نهايط .....!!
ثامر : مالك دخل انا متعود البس كذا .. حتى ف البيت ..
بندر وهو يبوس يده : الحمدلله والشكر .... امشي يللا
ثامر : وانت وين رايح كذا...؟؟ لايكون المسبح...!!!
بندر يقلده : مالك دخل انا متعود البس كذا ...
ثامر رفع حاجب : قصدك متعود تتفصخ وتطلع بدون فنيلة مع ذا البرمودا ... !!!!
بندر : وش عرفك انت بالموووضة امشي بس ياخي ..

طلعوا برى والشمس كانت حااارة مرة ...

ثامر : اوووف ... وش هالحر ....!!!
بندر : قلت لك .. البس زيي ما رضيت ...
ثامر : اموت ولا اسوي استعراض البحر حقك هذا .....!!
بندر : كيفك .. المهم .. جيب المسجل بسررررررعة مع الاشرطة ....
ثامر : طيب ...

راح ثامر يجيب المسجل اما بندر .. فراح وفتح البوابتين حقت البيت .. وصار الحوش مكشوف للشارع .. وفتح بعد الكاراج حق السيارات الثلاث الموجودة ... وصار البيت مكشوووف مرة .. يعني كل من يمر يشوف اللي داخله ...

رجع ثامر ومعاه المسجل والاشرطة وشاف البوابات والكاراج مفتوحن ع الاخير ....

ثامر : هذا المسجل ... ليش فتحت كل شي....؟؟؟ ناوي تفضحنا .....!!
بندر : اصبر علي شوي .. وبتعرف ليش كل هالاشياء ... اشوف وش جبت ....؟؟
ثامر وهو يعطيه الاشرطة : هذا المسجل .. وهذي الاشرطة ....

بندر قعد يشوف الاشرطة اللي جابهم ثامر .. محمد عبده .. رابح صقر .. خالد عبدالرحمن .. وغيرها الكثير من الاشرطة ...

بندر : ما قلت لك ابغى شريط قروي!! قلت أشرطة زي العالم والناس ..
ثامر وهو يرفع ثوبه ويربطه على خصره زي الهنود : والله هذا اللي عندي ..
بندر : طيب لحظة ...

راح بندر .. فتح سيارته وجاب منها شي .. ورجع ...........

ثامر : وش جبت..؟؟

بندر شبك المسجل باقرب فتحة كهربا ف الصالة .. وعلا الصوت ...
وطلع وقف جنب ثامر ...

وبعد كم ثانية من الصمت .. ارتفع الصوت ...

سوي كنك ما دريت وبوسني ...
وسوها ثاني على انك تعتذر ..
وقول آآآآآآآآسف ما انتبهت وضمني ...
والعذر مقبول ولك مني شكر ...

فتح ثامر عيونه ع الاخير وقال : يالكلب !!.. نزل الشريط ..؟؟ ورى ما قلت لي..؟؟
بندر بخقة : حلو صح ....؟؟ ادري ... ههههه

وقعدوا الاثنين المهبل يرقصون ف الحوش قدام الرايح والجاي .. وكلن يطالع فيهم ويضحك ...

كرر الغلطة معايا وخلني..
انتظر عذرك بكل فارغ صبر..
جيبني ثم ودني ثم جيبني..
من حدوود الشمس لحدوود القمر..

من الحماس مسك بندر الهووز حق الماي وفتحه على اقوى شي وقعد يرش كل شي ف الحوش بشكل عشوائي.. واللي يطالع البيت من فوق يعتقد انه حاطين نافورة جدة فيه ...

وبعد كم دقيقة لحقه وثامر ومسك هوووز ثاني وقعدوا يرشون بعض .. وسووا فيها بحيرة مائية ..... غرقوا فيها البيت .. وبعدها جلسوا يتزحلقون ع الارض ..

وين ماتبغى فديتك ودني...
خادمك يا سيدي تحت الامر....
وهد حيييييييييلي بالغرام وهدني...
والله اني ناذر لحبك نذر ....

ثامر وهو يصارخ : اقووول .. خلينا نشتغل لا تجي العجوووز وتذبحنا
بندر : أي صدق يللا

وقعدوا ينظفون وهم يستانسوون بالاغنية ويميلون معاها يمين يسااااار ...

تكفى بعثرني شظايا ولمني..
في كفوووفك يا بعد كل البشر ..
وراح اسوييي كني دخت وضمني ..
وراح اقووول امزح وابوسك واعتذر ..

بندر وثامر : سوي كنك ما دريت
بندر : وبوسني ...
ثامر : عاشوووووووووووا .... ونااااااااااسة ... ووووووووووووووووووو
بندر : ههههه حماس هالاغنية .. يللا حط لنا شريط راشد وعلي الصوت ع الاخير ..

___________________________________

(( بيت ابو سعود ))

( الساعة 12 الظهر ))

كانوا لينا ودلع ف الصالة .. ومعاهم سعود اللي كان ماسك جواله وشكله يدل على انه يسوي شي مهم .....
لينا لدلع بصوت واطي : شوفي هذا .. تلاقين قاعد يراسل خويته اللي ف عرعر ..
دلع : هههههههه ..

رفع راسه سعود وطالع دلع بنظرة ما تنفهم وبعدين رجع نزله وقال : دلع .. قومي جيبيلي ماي ...

لينا : لاوالله ... ما عندك رجووول ..؟؟
سعود : من كلمك يالملقووفة .. قومي عدلي كشتك بس ... تخرع بلد !!

على طول لينا قامت تركض لغرفتها لانه اكره ما عندها احد يتطنز على شكلها ... فقامت تتاكد ..

سعود : وانتي .. انا ما قلت ابي ماي ... ؟؟

تنهدت دلع وقامت ..

سعود : ههههه والله مسخرة هالبنت .. !!

رجعت دلع ماسكة كاسة ماي .. وجات بتعطيها سعود .. بس سعود كان حاط رجله ف طريقها .. عشان كذا جات بتطيح بس مسكت عمرها .. اما الماي فانكب نصه على جوال سعود ..

سعود معصب وهو يقوم : انتي ما تطالعين ..؟؟ عميا !!
دلع بانفعال : انت اللي حاط رجولك ف الطريق ..
سعود : يعني مري من فوقها .. فتحي عيونك انتي وتمشي ...


سعود : والله الاعمى يعرف يجيب ماي احسن منك ..

تركها وطلع على غرفته على طول .... اما هي فقعدت ع الكنبة والصيحة بحلقها ..

دخل سالم ....
سالم : السلاااااااااااااااااااام ..
دلع تبتسم مجاملة : وعليكم السلام .. تقبل الله ..
سالم وهو يجلس ع الكنبة اللي قدامها : منا ومنكم .. سعود هنا...؟
دلع : أي ..

شاف سالم انف دلع احمر والكلام بالغصب يطلع ...

سالم بشك : قال لك شي صح ...؟؟
دلع :...............سكتت .. اكتفت بدمعة ..
سالم قام معصب : انا اوريه هالحيوان .. والله ما يصير له خير اليوم ..
دلع بانفعال :والله العظيم ان كلمته لا تكلمني بعدها ولا اكلمك ..
سالم : بس..
قاطعته : لا بس ولا شي .. المشكلة بيني وبين اخوك جاء لا تتدخل يا سالم .. ما ابغاك تتهاوش مع اخوك الكبير عشاني .. خليه على قد عقله ..
سالم : طيب خلاص ..
دلع : مو طيب وتروح تتهاوش معاه ...
سالم : خلاص انشالله ما يصير خاطرك الا طيب ...

___________________________________

(( بيت ابو بندر ))

( بعد ساعة )

لا ينشغل بالك
وش قالوا عذالك
لاتتعب تدور
مين اللي قال لمين
حنا كذا "حلويييييييييييييييييييييييييييييييين"

وعلى انغام وكلمات اغنية حلوين لرابح صقر .. خلصوا بندر وثامر تنظيف السيارات على الشارع برى البيت .. وطبعا خلوا الشارع يفيض بالماي ..

بندر وهو ينشف سيارته : اخييييييييييييرا .. ما بغيت اخلص ... ثامر خلصت ..؟
ثامر يعدل شكله على مرايا السيارة : انا خلصت قبلك .. فديتني وفديت الانفينيتي حقتي ..

بندر وهو يرمي المنشفة على الارض ويحرك حواجبه : هههه ... تراها انفينيتي .. ما تجي نص اللكزس اللي عندي ..

مرت بنت منقبة وضعيفة تتمخطر من قدامهم على الرصيف ....

ثامر لبندر : اللللللللللللللحق ....
بندر انهبل وقال وهو يصارخ : يا حلو يا ثامر .. يا قمر انت ..
ثامر يصارخ : هلا والله .. آمر انت يا عمري
بندر يطالع البنت اللي تمشي وبياكلها بعيونه وهو يقول بصوت عالي : ثامر يا حلو .. سجل عندك رقمي .. صفر .. خمسة .. خمسة .. *******
ثامر : وصل .... ابشر بعزك .. انتظر مني مكالمة طيب...؟؟
بندر : على احر من الجمر يالحبيييييييييب ...

التفتت البنت عليهم وعطتهم نظرة غرور ومشت ...

بندر لثامر : فدييييييتهاااا .. شفت شلون تجنن ... عيونها ذباااحة .. تقول سهااام ..
ثامر : خخخخ .. شفت شكلها وهي معصبة .. كانت بتكفخك ..
بندر بحالمية : ظرب الحبيب .. زي اكل الزبييييييييب ..
ثامر : روووح يللا عاااد ..

مرت بنت مبرقعة على الرصيف تمشي بدلع ..

بندر لثامر : الللللللللحق .. دورك يا بطل ..
ثامر يطالع البنت ويقول لبندر : حبيبي يا بعد جبدي يا بندر .. يا عين ابوي اانت .. سجل عندك ..
بندر : كااااااااااك .. عطيني حبيبي .. كم رقمك ...؟؟
ثامر بصوت عالي : اكتب عندك .. صفر .. خمسة .. ستة .. ******
بندر : خلاص حبيبي استنى مني اتصال ف اقرب وقت ..

لفت البنت عليهم تتطنز : ههههههههههههههههاااااي .. موبااااااايلي،،،،...

بندر فقع ضحك .. اما ثامر فطاح وجهه من الفشلة ....
بندر : هذا اللي ياخذ موبايلي وش يصير فيه .. كااااااااااااااااااك .. فشلوووووه فشلوووه
ثامر : مالت عليها هالخايسة .. من زينها .. ما شافت عمرها مع هذا البرقع .. كانها من سلاحف النينجا ....!!!
بندر : هههههههههههههه ... امش بس الله يخسك .. خلينا نكمل شغل ..

دخل ثامر الحوش اما بندر فقعد يتمطط ف الشارع ويحرك عضلاته ... ولمح واحد ف سيارته من الصباح وهو موجود ويطالعهم ما تحرك ..
طلع فيه بندر باستفهام .. اما الرجال فابتسم ونزل من السيارة : ماشالله .. شكلك مداوم ف الجيم .....
بندر بابتسامة : ها..؟؟ أي والله .. لا زم الواحد يهتم بشكله شوي .. وش عندك من الصباح هنا...؟؟
فصخ الرجال نظارته وقال وهو يبتسم : ماعندي سالفة .. تعرف .. عزوبي .. وما اشتغل .. وزهقااان ... وش بسوي غير الهيااااتة ف هالشوارع .. ؟؟؟
بندر : أي والله وانت صااادق .. زهق هالايام .. بس يالله العيد جاي .. ع الاقل فيه اكشن شوي ...
الرجال : أي والله .. وش تسوون انتوا ..؟؟
بندر : والله تعرف ما عندنا سواق .. والوالدة تبغى البيت نظيف قبل ما يجي العيد ب 3 ايام ع الاقل .. وتبغانا ننظف الحوش والسيارات حقتنا .. تعرف الحريم بعد ....الا تعال .. ما تعرفنا ...؟؟
الرجال وهو يمد يده : أي صح .. انا رائد ..
بندر مد يده يسلم عليه : والنعم يا رائد .. معاك بندر ..
رائد : يا هلا بك يا بندر .. تحتاجون مساعدة ..؟؟

جا ثامر ......

ثامر : يللا ما بتجي..؟؟
بندر : ثامر .. هذا رائد .. عرفته اللي من الصباح ف السيارة ..
ثامر وهو يسلم على رائد : هلا والله .. انا ثامر .. اخو هذا التوام
رائد : ماشالله توام ..؟؟
بندر : أي والله .. بس غير عن بعض ..
رائد : ما تبغون اساعدكم ..؟؟
بندر : لا والله مشكوووور
ثامر : ما تقصر ..
رائد : والله خلون اساعدكم .. زهقان حدي مدري وين ارووح .. ع الاقل اتسلى معاكم ..
ثامر : انا ما عندي مانع .. بس بنتعبك معانا .. ماله داعي ..
رائد : يا رجال لا تعب ولاشي .. ما صدقت على الله احصل لي شي اسويه ..
بندر : خلاص طيب .. حياك .. بس ها .. تشتغل زينا .. مو اقل ..
رائد : خخخخ ولا يهمك ..

دخلوا الثلاثة الحوش .. بندر وثامر ومعاهم رائد اللي كان لابس بنطلون جينز وفنيلة بيضا ..

ثامر مسك الهوز : بندر ننظف الارض اول ...؟؟
بندر : لا خلينا نخلص من الاشجار هذي ..
رائد : وش بتسوون فيها ..
بندر : بنقصقص فروعها واوراقها شوي .. شكلها مرة خايس كذا ..
رائد : اوكي .. ثامر عطني مقص لو سمحت ..

راح ثامر وجاب واحد زيادة لرائد .. وبدوا الكل يشتغل .. كل واحد مسك له شجرة يقصقص فيها على كيفه .. وبالشكل اللي يعجبه ..

التفت ثامر على رائد وشاف فنيلته انشقت بسبب الاشواك اللي ف الشجرة ..
ثامر : ما قلنا لك لا تشتغل .. ما تسمع الكلام ..
رائد : الا هي فنيلة .. مانيب ميت اذا انشقت ..
بندر : سوي زيي .. والله ما بتندم .. خصوصا مع هالجو ..

فكر رائد شوي .. وبعدها وقف وفصخ فنيلته ..
بندر : ماشالله .. وتقول ما عندك عضلات ...؟؟
رائد : هههه .. كنت ارفع اثقال من كم شهر .. والحين وقفت ..
بندر : جيب فنيلتك .. احطها لك ف البيت لا تتوصخ ..
رائد : لا خلاص بوديها السيارة .. ماله داعي
بندر وهو ياخذ الفنيلة : يا شيخ جيبها .. محد ف البيت .. البيت فاضي ..

اخذ بندر الفنيلة ووداها البيت .. ورجعوا يشتغلوا ...

يتبع...


__________________
تعبت اساير ، ناس .. و أحيا بلا ناس ..
و أبكي على {صورة} و هي ما بكتني .. !



...................



.. اللهم الهمني المزيد من الصبر ،، فلم اعد قادره على اكمال دربي ..
رد مع اقتباس
  #5  
قديم December 3, 2008, 12:49 AM
 
رد: ودك تنامين ؟ نامي .. روايه رومانسيه رهييبه

( بعد ربع ساعة )

اذن الظهر وراحوا الكل يصلون الظهر ف البيت .. وبعدها رجعوا لاشغالهم .. وما كان باقي لهم غير الجدران والارضية ..

رائد : يللا اذا شدينا حيلنا .. نخلص الارضية والجدران ف نص ساعة
بندر : خلاص .. رائد انت خذ الهوز ورش الجدران بشكل عشوائي .. مو لازم تتنظف مررة .. وانا وثامر بننظف الارض ونشطفها بالموية ..
رائد : خلاص اوكي ...

ومع الهمة العالية اللي عند الشباب .. خلصوا اشغالهم .. بس بعدها طبعا وقفوا ف الزاوية وقعدوا يرشون بعض موية .. لين ما تغرقوا كلهم .. حتى رائد بنطلونه صار يكب موية وهو يمشي ...

بندر : خخخخ .. الحين انت وشلون بتمشي مع هالبنطلون ...؟؟
رائد : ههههههه مدري والله .. عادي ينشف الحين ..
ثامر : تشربون شاهي ..؟؟
بندر : لا نبغى شي باااارد يبرد ع القلب..
ثامر : بروح اشوف لنا شي ..

وبعد كم دقيقة رجع .. رجع ثامر ومعاه علب بيبسي ...

رائد وهو ياخذ العلبة : جات فوقتها ..

قعدوا الشباب على العتبة حقت الباب وقعدوا يشربون ويسولفون ...
بندر : كم عمرك يا رائد .؟؟
رائد : 26 سنة
ثامر : مو مبين عليك .. محشش ..
رائد : خخخ .. ابوي يقول انه لا يمكن يشغلني معاه ف الشركة حقته .. يقول اني مو قد المسؤولية ...
بندر : افاااا .... دايم كذا الاباء .. حتى ابوي .. يقول احنا ما مننا فايدة ..


( ف نفس الوقت )

قامت من النوم .. اليوم نامت زين وشبعت .. راحت الحمام .. غسلت وجهها وغيرت ملابسها .. لبست بنطلون جينز وبلوزة فوشي بدون اكمام .. وقعدت ترتب شعرها ع المرايا ...

دانة : آآآآآآآآآآه يا حلو الويك اند بدون جامعة .... وناااسة

سوت تسريحات كثيرة بس كلهم ما عجبوها .. وآخرتها استسلمت وخلته مفتووح ...

طلعت من غرفتها ومشت ف الممر ...

دانة : غريبة ... ما في صوت .. اول مرة الهدوووء كذا ف البيت ..

فتحت الباب حق غرفة بندر وثامر شوي شوي عشان ما تقومهم ... بس ... ما حصلت احد

دانة : لا لا لا اكيد في إن ف السالفة .. اجل قايمين من الظهر ...؟؟ هذولي ما يقومون قبل اذان العصر ....

طلعت من الغرفة لغرفة امها ونفس الشي ما حصلت احد .. فقررت تنزل تحت ..

لما نزلت من على الدرج .. شافت الباب حق البيت مفتوح واصوات اخوانها برى ....
دانة : شيسوون هذولي من الصباح .....؟؟

دارت بعيونها على الصالة وطاح نظرها على فنيلة بيضا
دانة : حتى الفنايل بيرمونها ف الصالة .. حشى !! محد يبغى يتحرك ويحطها ف سلة الغسيل ... ؟؟؟

اخذت الفنيلة وودتها لغرفة الغسيل وحطتها ف الغسالة ....
دانة : الله يعين زوجتك عليك يا بندر ... والله انها تكسر خاطري ..

طلعت من غرفة الغسيل متوجهة لباب البيت المفتوح ..

ويوم قربت من الباب شافت واحد واقف بدون فنيل ولابس نظارة شمسية .. ويوم قربت اكثر من الباب .. انتبه رائد لها والتفت ... وطاحت عينه بعينها ... بس اللي يشوفه يقول انه ماصار شي .. لانه رائد كان واقف ويطالع البيت وملامحه هادية .. اما دانة فشهقت يوم عرفته وراحت تركض بسرعة على الدرج لغرفتها ...

بندر : شفيك يا رجال ...؟؟
رائد : لا ولاشي .. بس اثاث الصالة حقكم ماشالله حلو ..
ثامر : الله يهديك احسب عندك سالفة .. واقول انا ليش الاخ سرحااان .. اثره الاثاث عاجبك خخخخخ
رائد : ههههه الله يخس ابليسك .. دايم فكرك يروح بعيد ... ( شاف ساعته ) يللا شباب انا استأذن .. فرصة سعيدة اني تعرفت عليكم
بندر : وين يا شيخ .. اقعد شوي ...
رائد : لا والله خلاص .. الحين الوالدة اللي عندي تبدا تدقدق علي ..
ثامر : هههه احس بشعووورك ...
بندر : طيب بس لحظة .. اجيب لك ملابس زي الناس تلبسها ..
رائد : ما يحتاج يا شيخ .. والله انها الحين بدت تنشف .. بعدين انا رايح البيت الحين .. وبغيرها ..
بندر : ما يصير توصخت وتغرقت ماي ..
رائد : معليش .... كلها خمس دقايق وانا ف البيت .. لا تخاف انت بس عطيني الفنيلة .. و مشكووور ما تقصر .. كفيت ووفيت
ثامر : احنا اللي ما ندري وشلون نشكرك يا رائد .. والله تعبناك معانا ..
رائد : افاا عليك .. احنا ربع واخوان ..

دخل ثامر يده ف جيبه وطلع ورقة بيضا صغيرة وعطاها رائد ..
رائد : ايش هذي ..
ثامر : رقمي ورقم بندر .. وآسف ع الورقة الصغيرة .. تعرف لزوووم الترقيم ..
رائد : خخخخخخ اما انك زااااحف ..

طلع بندر من الصالة : اقول ثامر .. شفت فنيلة الرجال ... ؟
ثامر : لأ
رائد : شصار ...؟؟
بندر : لحظة بس ..

رجع دخل بندر البيت من جديد وراح للمطبخ اللي فيه الشغالة ..
بندر : هي .. راااني .. مافي شوف فنيلة ف الصالة ...؟
الشغالة تهز راسها : نووو بابا .. مافي شوووف ..
بندر : انتي وش شفتي اصلا ؟؟

طلع من المطبخ معصب للدور اللي فوق .. ودق الباب على دانة اللي كانت قاعدة على السرير خايفة من الموقف اللي صار قبل شوي ...

دانة : مين ...؟؟
بندر : انا بندر افتحي الباب ..
خافت دانة " ياويلييييييي ... اكيد قال له .. والله بروح فيها " : أ.. ط.. طيب طيب ..

فتحت الباب بهدوووء ويدها ترتجف : هلا بندر ..

بندر : اقول دانة .. انتي نزلتي تحت ..؟؟
دانة " اقول له او ما اقول ..؟؟ بس اكيد هذاك قال له واذا كذبت بيعرف " : إ... إلا
بندر : طيب شفتي فنيلة موجودة على الكنبة ....؟؟ لونها ابيض ..
دانة بدت تتنفس براحة وهدت : أي ... ليش...؟؟
بندر : وينها ..؟؟
دانة:حطيتها ف الغسالة اغسلها لك ...
بندر فتح عيونه ع الاخير : يا فضيحتنا.................!!!!!
دانة : ليش...؟؟
بندر : الفنيلة فنيلة الرجال ... وشلون الحين يروح البيت ...؟؟
دانة : أي رجال...؟
بندر : واحد بن حلال ساعدنا ف تنظيف الحوش ....
دانة " الحماااار .. قاعد يتقرب من اخواناي هااا....؟؟ ما يستحي .. احسن يستاهل .. مافي فنيلة " : طيب عادي .. خليه يروح بدونها
بندر : شتقولين انتي ..؟؟ والله عيب .. الرجال ساعدنا وتعب .. وآخرتها يطلع بدون فنيلته .......؟!؟!؟!
دانة : طيب عطيه وحدة من فنايلك يعني .. وش اسوي ...؟؟
بندر : اففففف .. خلاص طيب .. لاتنزلين تحت تراه موجود ...
دانة : طيب ..

طلع بندر من الغرفة وراح لغرفة الغسيل .. طفا الغسالة وطلع الفنيلة اللي مغرقة ماي وصابون ...
بندر : يووووه ... هذي ما تنلبس كذا ... الله يهديك يا دانة ...

حط الفنيلة بكيس وطلع لغرفته .. وجاب فنيلة واسعة من عنده لونها اسود .. ورجع لبرا ..

رائد : وينك يا رجال طولت ....
بندر وهو مستحي : والله مدري وش اقولك يا رائد .. بصراحة متفشل منك ..
رائد : ليش...؟
بندر متلوم : والله انا حطيت الفنيلة بالصالة .. واختي الله يهديها ... بالغلط حسبتها فنيلتي .. وراحت حطتها بالغسالة ... وتغرقت ماس وصابون ..
رائد " فديييييييتهااا .. غسلت لي ملابسي " : لا عادي افا عليك ... اروح كذا مسوي اكشن ف الحي .. والله يخقون علي البنات ... ههههه
ثامر : هذا اكشن...؟؟؟!؟؟! والله ماعندكم سالفة .. تطلعون مفاصيخ وتقولون اكشن ..
رائد : هدي هدي يالشيخ .. آسفين .. اعصابك ..
بندر : بس انا جبت لك فنيل واسعة عندي ...
رائد : تسلم ما تقصر .. بس ماله داعي والله ..
بندر : رائد خذها الله يخليك .. حدني متفشل منك .. سامحنا على هالموقف البايخ ..
رائد : ياخوي لاتعقد الموضوع .. خلاص ابشر .. جيب الفنيلة عشان ضميرك يرتاح ..
اخذ رائد الفنيلة حقت بندر ولبسها ...

رائد وهو يسلم على بندر وثامر : انشالله بيننا اتصال قريب ..
ثامر : لاتقطعنا ...
رائد : لا انشالله .. فرصة سعيدة اني تعرفت عليكم ..
بندر : حياك الله ف أي وقت ..
رائد : الله يحييك .. يللا ف امان الله ..

___________________________________
(( بيت ابو عوض ))

( الساعة 6 المغرب )

رجع عوض من الصلاة ودخل البيت .. وقف عند الدرج وقال وهو يصارخ : يا ام كششششششششششششششششششششة ...!!! ما خلصتي.....؟؟

اروى تصارخ من غرفتها وهي طالعة : الا خلصت ... لاتصارخ .... كسرت الدرايش ..
عوض : كيفي مو انتي اللي مشتريتهم .. انزلي يللا خلصينا ...
اروى وهو تنزل : مالت عليك ... بتذلنا على هالمشواااااار ....
عوض وهو يدفها : اقول امشي بس .. لا تاخرينا ..
اروى : اقول من الحين شووووف .. لا تكرفتني وتقول بسرعة بسرعة .. ترى امس صديقتي غادة راحت كذا .. وطلع البنطلون ما يناسب البلوووزة .. خليني اشتري على راحتي .. ولا ترى بتوديني مشوار ثاني ...
عوض وهو شوي ويموتها : طيب خلاص خلاص .. انطمي وامشي .. حشى ..!! محد يقدر يقول لك كلمة ....!!!!؟؟

ركبوا السيارة وكالعادة تهاوشوا على الاغاني .. اروى تبغى البانوراما .. وعوض الام بي سي الخليجية ..... وخذوا من السب والصراخ اللي ف السيارة ....

أروى : اصلا انت واحد قوري .. ما تعرف التحظر والرووومنسية ... حدك هالطير المخنوق والعجيز حق العرب هذا ....!!..!.!
عوض : جيبي صوته بعدين تعالي تكلمي يا ست هيفاااا ... والله انتي اللي ما تفهمين شي بالفن ... حدك هالمسخرة اللي تطلع بالتلفزيوونات ..
اروى : انت وش فهمك ...؟؟ هذا تطور ... مو زيك للحين قاعد لي على الحفلات .. يا بابا اخترعوا فيديو كليبات ... ارتقي شوي .. كم مرة بعلمك ...؟؟!؟!
عوض : لاعطيني كف احسن .. ولا ورى ما تصيرين اكبر مني وتفلعيني ببلوك ....؟!؟!
اروى : يكون احسن والله

وعلى هذا الموال .. كملوا طريقهم ...

___________________________________
__________________
تعبت اساير ، ناس .. و أحيا بلا ناس ..
و أبكي على {صورة} و هي ما بكتني .. !



...................



.. اللهم الهمني المزيد من الصبر ،، فلم اعد قادره على اكمال دربي ..
رد مع اقتباس
  #6  
قديم December 3, 2008, 12:51 AM
 
رد: ودك تنامين ؟ نامي .. روايه رومانسيه رهييبه

(( ف بيت ابو سعود ))

( ف نفس الوقت )

نزلت على الدرج وهي تسمع اصواتهم موجودة وشكلهم مجتمعين .. راحت للصالة وحصلت سعود وسالم موجودين .. وقاعدين يطالعون تلفزيووون ...
دلع : مسا الخير ...
سالم : مسا النور ...
سعود وهو يخزها : مسا الانوار والسرووور والورد والريحان ..
ابتسمت دلع غصبا عنها وجلست ع الكنبة بعيد عنهم شوي ....

وبعد شوي.....

دلع : اقول سالم صليت ....؟؟
سالم : أي قبل شوي رجعت ..
دلع : طيب يعني نلبس ...؟؟
سالم : ليش ...؟؟

لينا وهي نازلة من الدرج : يعني ليش سلوووومي ما قلت بتروح معانا السوق ...؟؟

سالم : يووووه .. والله نسيت .. وبعدين بيمرني فيصل بعد ساعة .. ما اقدر .. روحوا لوحدكم ....
دلع : تدري خالتي ما ترضى ...
سالم : وش اسوي انا يعني ...؟؟ خلاص اجلوها
لينا : حرااااااام عليكم .. والله ما اشتريت ولا شي للحين .. ما بيكفيني الوقت ..
سعود : حشى شهر كامل مايكفيكم..؟؟!
لينا مادة البوز شبرين : أي ما يكفي ...
سالم : خلاص خذوا السواق وروحوا بروحكم وانا بقول لامي اني وصلتكم ورجعت ...
سعود : لاوالله .. وين قاعدين احنا..؟؟ يابابا ماعندنا حريم يطلون بدون رجال ... خلاص انا بوديهم ..
دلع رفعت حاجب وسكتت ...
سعود يطالعها : شفيك آنسة دلع .. لا يكون مو عاجبك الوضع ....؟؟
دلع : انا اقول اننا مو مستعجلين .. نقدر ناجل الموضوع .. ما بنموت لو اجلناها يوووم ..
لينا باصرار : الا والله ... تكفى سعود .. عفيه عليك .. ودينا ..
دلع : لينا...!.!.!
لينا : دلع بليز ...
دلع : اوووف .. طيب ..
سعود ابتسم بنصر : خلصوا بسرعة وانا بكون برا ...

دلع " الحين من طلب منه يتليقف ... والله حالة "

___________________________________

(( ف السوووق ..))

( بعد حوالي ساعة ونص )

اروى : وججججججججججع ... ما تطالعين ....؟؟ حشى !!! تمشين وتدفدفين يمين يسار ... فتحي عيونك جعلك العمى ....!..!.!.
الحرمة : انا قلت آسفة ..
اروى : آسفة وش تسوي ؟؟ مالت عليك وعلى اللي قال لك امشي بالسووووق ..

طلعت اروى من المحل معصبة ......
عوض : هي انتي ... صوتك واصل لين برى ... وش فيك ....؟؟ فضحتيناااا ...!
اروى : ماتشوف هالخبلة صدمت فيني وطاحت الاكياس من يدي...؟؟ بغيت اذبحها ...
عوذ يهمس وهو معصب : قصري صوتك لا اقص لسانك .. فاهمة ....؟؟ وامشي بس يللا ... حصلتي شي ف هالمحل....؟؟
اروى مبرطمة : لأ
عوض : اجل امشي يللا نشوف محل ثاني .. خلصينا ..

دخلت اروى كم محل .. وكل شوي تطلع وتقول ما عجبها شي .. لين ما تعبوا ...
عوض بضيق : الحين ابغى افهم .. ف هالمجمع الكبير ... ما حصلتي ولا شي يعجبك ....؟؟؟ ولا حتى بنطلون او بلوزة .......؟؟ او جزمة ع الاقل .....؟؟
اروى وهي ترفع كيس : غير هالحلق .. والاسوارة ... نوووووو
عوض راح صبره : اسمعي يا بنت الناس .. انا عطيتك فرصة وشكلك ما تنعطين وجه .. انا الحين بدخل المحلات وبشتريلك وانتي منطمة وساكتة ... كيفي .. آاخذ اللي آخذه .. وانتي ا ابغى اسمع منك حرف واحد ....
اروى فتحت عيونها ع الاخير : لااااااا .... بليز عوض لا بشتري خلااااص ...
عوض : ولا كلللللللللمة ... امشي قدامي اشوف ..

مشى معاها ودخلوا محل .. وهناك .. دار شوي عوض وقعد يطالع الملابس .. وبعدها ..
عوض : امشي مافي هنا شي حلوووو ... كلها قراااوة ...
اروى تعاند : لأ فيه .. من قالك مافي ....؟؟ كل الاغراض حلوة .. مو على كيفك ..
عوض : اعتقد انا اللي بشتري مو انتي ... قدامي يللا ..

مسكها من يدها وسحبها برى المحل ....

وحدة من اللي كانوا ف المحل تقول لصديقتها : وااااي ... شفتيه شلون يخقق وهو يختار لزوجته ملابس.....؟؟؟
صديقتها : اي والله ... الله يرزقنا ... ولا مسكة اليد صراااحة تذووووووووووب
الاولى : يا حظهاااا.....

___________________________________

(( ف مكان ثاني ))

( نفس الوقت )

الهندي : يللا مدام ... سكر صلااااة .....
لينا : طيب لحظة .... أ .... لوسمحت ......
قرب منها موظف سعودي : آمري ...
لينا استحت : ا .... ا ... عندك مقاس اصغر ...
السعودي وهو ياخذ التنورة اللي مقاسها ميديام : اصغر من كذا ...؟؟ والله مخلص ..
لينا بدلع طبيعي : يوووووه ... خساااارة ... والله انها تززززززززنننن ...
الموظف : في فرع ثاني بالدمام ...
لينا : والله ...
الموظف : أي
لينا : بس يوووه ... اخوي بالموووت جابنا .. ما اعتقد بيودينا مكان ثاني ... خلاص مشكوووور

جات بتطلع بس ناداها الموظف : احم .. اقول اختي ..
لفت لينا برقة وقالت : نعم .... ؟؟
الموظف خق : أ ... انتي بتقعدين لين متى ف المجمع ...؟
لينا : لين ما احصل شي اشتريه
الموظف : طيب .. يعني بعد الصلاة تكونين موجودة ...؟؟
لينا : اي اكيد ..
الموظف بابتسامة تخقق : خلاص مو مشكلة .. انا الحين بروح للفرع الثاني واجيب لك اللي تبغيه .. بس انتي ما يصير خاطرك الا طيب ..
لينا استحت وفرحت : والله ؟؟؟؟ ماله داعي اتعبك .. خلاص بشوف لي شي ثاني ..
الموظف : والله العظيم انه مافي تعب .. تعبك راحة .. انتي تبغي مقاس سمووول صح؟
لينا : اي ..
الموظف : ابشري بعزك .. بعد الصلاة بربع ساعة بكون موجود هنا انشالله .. تعالي وباذن الله تكون موجودة ..
لينا : ثانك يووووو مرررة ... صراحة مدري وشلون اشكرك ...؟
الموظف : افاااا علييييك ... حاظرين للطيبين ....

طلعت لينا من المحل فرحاااانة وشافت سعود واقف ....
سعود : حصلتي...؟؟
لينا شاقة الحلق : أي بس ماحصلت المقاس .. وقال لي امره بعد الصلاة ويجيبون لي اياه ... وين دلع ....؟
سعود وهو يطالع المحل اللي قدامه وياشر بعيونه عليه : هناك ..
وبعد كم دقيقة طلعت دلع وبيدها اكياس ....
دلع : ها...؟؟ حصلتي شي ....؟؟
لينا :أي .. بس بيجيبون المقاس بعد الصلاة ...؟؟ ايش اخذتي ...؟
دلع وهي شايلة الاكياس الثقيلة : اووووف .. ياثقلها هالاكياس .. اصبري نجلس واوريك..
سعود مد يده واخذ الاكياس من يد دلع بدون ولا كلمة .... بس لمسة يده وحركته الحلوة خلت دلع تسكت فجاة ولا تنطق ولا حرف لين ما وصلوا للكراسي ... وكان فيه ثنتين قاعدات فقعدت لينا جنبهم بعدين دلع ... وبقى مكان فاضي ..
دلع " !!!! بيقعد جنبي ....؟؟ وش هالحظ ....!!"
لينا : اقعد سعود ليش واقف ....؟
سعود : لا ماله داعي .. اقعدوا انتوا انا ابغى اوقف ...

سعود " خلينا نشوف الحين يا ست دلع ايش الشي الغلط اللي بتحاسبيني عليه "

___________________________________

(( من جهة عوض واروى ))

عوض : افففففف
اروى : شفيييييييييييييك ...؟؟
عوض يطالعها بنص عين : ابغى اصلي بس مافي احد يقعد معاك بين ما اجي ....
اروى : روح صلي بسرعة وارجع
خزها عوض بقوووووووووووة
اروى : خلاص خلاص خلاااااااااص .... يا كلمة ردي مكااااااااااانك ... خلك واقف جنبي .. طيب.....؟؟
ما رد عليها عوض وسكت ......
التفتت اروى تطالع الرايح والجاي .. لين ما طاحت عينها على وحدة تعرفها زيييييين .. ولا يمكن تغلط او تشبه عليها احد ....
اروى : لحظة
عوض : تعالي هنا وين رايحة ....؟؟

مشت اروى ولاسمعت كلام عوض .. وراحت للبنت وقربت منها وفجاة .. ضربتها بالخفيف على كتفها .. ونقزت البنت من الخوف مع صرخة خفيفة

غادة : !!!!! يا حمااااارة يا اروى خرعتيني ....
اروى : خخخخخخ ... مسكتك ... مع مين جاية ...؟؟
غادة : مع ابوووي ..
اروى : يوووه حسااافة .. حسبت عيال عمك الفلة .. الحلوين ..
غادة :شششش ... ترى اخوك وراك يا حمااارة وشكله معصب ...
اروى : ما عليك منه .. احقريه ... اكرههه ... فشلني قدام الناس ..

سحب عوض اروى من عبايتها لجنبه : انا ما قلت لك وقفي....؟؟
اروى : عوضووو وخر عني ..
عوض :ششش لا اقص لسانك الحين .. من هذي ....؟؟
اروى بضيق وهي توخر يده عنها : يعني مين غير غادوووو ... هذي اللي كل يوم توقف معاي برا ... اللي مرة سيارتهم تعطلت وركبت معانا ...
عوض تذكر : اييييي .... هذا ابوها ....؟؟
اروى : اي ...

راح عوض وسلم على ابو غادة ..... وبعدها رجع ..
عوض: اقوووول .. انا بروح اصلي .. خليك عند صديقتك .. لاتتحركين منا ولا منا ....!!
اروى : واااااااااو ... وناااااااااااسة ...
عوض : لا يا حلوة ... بصلي وبرجعلك .. لاتخافين ما نسيتك ..
اروى : ترى الخشوع زين ف الصلاة ... يرفع الدرجات ويمحي الذنوب ..
عوض بابتسامة مكر : بارك الله فيك يا اختي .. يا م كشة ..

راح عنها عوض يصلي .. اما غادة واروى فقعدوا يدورون ويسولفون تحت نظر ابو غادة اللي كان معاهم ...

___________________________________

(( من جهة سعود والبنات ))


فتحت المحلات .. ورجعوا البنات يلفون ويدورون وطبعا الاكياس ف يد الحمال سعود..

دلع كانت مستانسة مرة لدرجة انها كانت احيان تسولف مع سعود وتمزح ...
دلع : سعود
سعود : ها ....؟؟
دلع : بدخل هالمحل انا ولينا ...
سعود : طيب لا تتاخرون ..

دخلوا البنات ودلع اخذت لها صندل حلو ... يناسب التنورة اللي اخذتها .. ولينا اخذت لها نظارة شمسية بنية ....
بعدها طلعوا وراحوا الحل حق تنورة لينا ...

دخلت لينا المحل مع دلع ... وكان الموظف موجود .. واو ما شاف لينا .. طلع الكيس وابتسم ..
تقدمت لينا للمحاسبة وقالت : السلام
الموظف : وعليكم السلام ...
لينا : جبتها ....؟؟
الموظف : أي افا عليك .. ما قلت لك خلاص عيني خير .. وجبت لك معاها البلوزة حقتها..
فتحت لينا الكيس وشافت التنورة ومعاها بلوزة تناسبها تماما ...
دلع : حلوة .... مررررة حلوة
الموظف ابتسم : اي ماشالله ذوقها حلووو ...
لينا استحت مررررررررررة : شكرا .. مرة حلوة ... آسفة والله تعبتك معاي...
الموظف : لا مافي تعب ولاشي .. بالعكس .. خليتيلي حجة اطع من الدوام ..
لينا : ههههه

حاسبوا على التنورة وطلعوا من المحل ...

لينا وهي ترمي الاكياس على سعود : تعبت .. واخيرا خلصت
سعود : ليش...؟؟ كان اشتريتوا زيادة .. عندكم سواق يشيل الاكياس ....
لينا : صدقت .. بس رجولي تعورني .. خصوصا هالكعب مرة يتعب ..
دلع : ههههه آسفين سعود .. بس احنا بنات ما نشيل اكياس .. الاولاد هم اللي يشيلون..
سعود : طيب يللا نمشي ....؟؟
دلع ولينا : اي
سعود : يللا عازمكم على آيس كريم باسكن روبنز على حسابي..

___________________________________
(( عند عوض واروى ))

( الساعة 8 ونص )

عوض : شرايك .....؟؟

كان خاطرها تقول حلوة .. بس .... لاااا .. عشان يخق علينا الحين ... والله ما اقول حلوة .. مع انها حلوة
اروى بقرف :وععععععععععع
عوض : ما طلبت رايك ..... بناخذها ...
اروى : افففف .. ياخي انا اللي بلبس ولا انت ....؟؟
عوض : كيفي .. مالك دخل .. اووووش ولا كلمة ..
راح للكاشير وحاسب وطلع ....

عوض وهو يعطيها الكيس : خذي ...
لروى : انت مشتريه انت امسكه .. ولا اقولك .. البسه بعد واتهنى فيه ... ما ابغاااه خاااااااااايس ....
عوض : ههههههه وانشالله محسبة اني بقعد ارضي فيك الحين ....؟؟ بتلبسيه غصبا عنك .. يكفي اني انا اللي مختاره ...
اروى : وهذا اكبر سبب يخليني ما البسه ...

شافوا ف طريقهم غادة وابوها يتمشون ....

اروى : خلصتي ....؟؟
غادة : أي الحمدلله ... وانتي ...؟؟
اروى : اففف ما خلصت .. اصلا ما اشتريت شي ... عوضووو اخذلي فستان على كيفه .. بس والله ما بلبسه لو يمووووت
غادة : اشوووف
فتحت اروى الكيس وشافته غادة ....
غادة : واااااااااي .... يجنننن .... حتى اللون راااااااااايق مرررة ...
اروى : وعععع ... يلوع الكبد ... ما اتحمل اطالع فليه حتى .. مقرررررررف
غادة : والله انه عاجبك بس انتي قاعدة تعاندين ف اخوك .. والله انه ذوقه احلى من ذوقك ... وناعم مرة الفستان صراااحة ...
اروى : هه .. وينك يا عوضوو تسمع المدح .. والله تخق علينا ..

ابو غادة ناداها شوي ..

راحت كلمته ورجعت ...

اروى : ها شقااال ...؟؟
غادة : يقول انه بيروح محل الجزم هذا الشوي .. ويبغاني اوقف معاك لين ما يخلص ويرجع ..
اروى : اكيد الحين عوض بيراقبنا وبيسمع كل كلمة نقولها ..
عوض من وراها : هذي مهنتي ...
اروى كانها عجوز : بسم الله ... جني جني .. مب بني آدم ... تف تف تف
غادة كتمت ضحكتها على اروى وعوض وهواشاتهم اللي ما تخلص ..
عوض : اسكتي لا الحين افلع راسك بالعقال ..
اروى : انت ما عندك غير العنف ...؟؟ شفت شلون قروي ...؟؟ !!!!
عوض : خلينا الذوق لك يا ام الذوق .. ساعتين ما تعرفين تختارين ملابس زي الناس .. لو ما انا اخترت لك .. كان الله يستر وش اخذتي .. حتى اسالي صديقتك .. توها تقول حلوووو
اروى : وانت ماشالله ... شابك معانا ع الخط .....؟؟!!؟؟!
عوض : كيفي .. مالك دخل ..
اروى وقفت متنرفزة من اخوها : وانتي على وشو تضحكين بعد ...؟؟
غادة : ولا شي ..
اروى : لا قولي على وشو ....؟؟
غادة : والله ولا شي .. بس اشكالكم تضحك ..
اروى بدن نفس : أي مرة تضحك ...

وفجاة جات خطة براس اروى تنتقم فيها من عوض ....
اروى : هع هع هع
غادة : شفيك ....؟؟
اروى : ولاشي .. ههاهاهاهاها ..
قربت اروى من عوض ولفت وراه ... ودفته على غادة ...
بس عوض كان اذكى منها .. وبحركة سريعة بيده سحب اروى ورماها على غادة ...
وطاحوا الثنتين بالارض .. الكل وقف يطالع الموقف ... والكل قعد يضحك ..

عوض : ويوووووووو ... فشلوووها فشلوووووها ... كاااااااااك ... تستاهلين والله ..
اروى وهي بالارض : يا حمااار .. يا كلب ... يا ثووور .. يا بقققققققققققر .. يا كل شي شين بالدنيا ... اكرررررررررهك ...
عوض من الضحك مد يده وسحب اروى بكل سهولة من ع الارض ووقفها ....

اروى : ياهوووو ... ترانا هنا ...نسيتونا... قومني ع الاقل....!!!!!!!!

وقف عوض ضحك والتفت على اللي ماسكها من يدها وكانت غادة ... تركها بسرعة ووخر ...
عوض :ا ....ا .... آسف والله ما دريت انك صديقتها ... حسبتك اروى ..
غادة مستحية لدرجة عينها ما انرفعت من ع الارض ...

ولحسن حظها طلع ابوها من المحل ... واستغل عوض الموقف فسحب اروى وقومها وطلعوا من المجمع على السيارة على طول .......

اروى : واك وااااااك .. واااااك ...
عوض : ولا كلمة .. ترى واصلة معاي ....
اروى تطلع لسانها : تستااااهل .. هذا اللي يرمي اخته ف الارض وش يصير فيه ..
عوض : اروى .. كلمة ثانية وبرميك ف الشااارع فاهمة ...
اروى خافت : يما يما يما ... خلاااص .... سكتنا ...

___________________________________

يتبع
__________________
تعبت اساير ، ناس .. و أحيا بلا ناس ..
و أبكي على {صورة} و هي ما بكتني .. !



...................



.. اللهم الهمني المزيد من الصبر ،، فلم اعد قادره على اكمال دربي ..
رد مع اقتباس
إضافة رد

مواقع النشر (المفضلة)

الكلمات الدلالية (Tags)
تنامين, رهييبه, رومانسيه, روايه, والد, ودك

أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
روايه للحلم وجه اخر الفراشة الورديه روايات و قصص منشورة ومنقولة 7 February 27, 2009 08:01 AM
روايه رومانسيه روعه (قسوه حب) حامل الصبر m روايات و قصص منشورة ومنقولة 4 November 26, 2008 09:34 PM
*** روايه الذكريات *** nadjibeg روايات و قصص منشورة ومنقولة 0 November 23, 2008 06:40 PM


الساعة الآن 06:50 PM


Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر