قصائد مختاره من ديواني شروق

يا ربيع النفس شوقي في لقاك



تهتني عيني بشوفك يا كحيل


يرتوي لي قلب ما يسلى بلاك



ينتظر وصلك ولا يرضى بديل


يا خفيف الدم ما يوجد حلاك



وغير حبك ما يلاقى بأي جيل


يا زهر يا ورد مالي في سواك



أي رغبه بس وقتي جاء بخيل


العقل يحتار ما يوصف بهاك



والمدامع عند ذكرك لي تسيل


ارتجي قربك ومطلوبي رضاك



واجتمع واياك لو وقتٍ قليل


انشغل بالي وقلبي في هواك



ما ترك فرصة لغيرك له يميل


اطمئن القلب والله ما نساك



ما رأت عيني بحسنك لك مثيل

انفتح لك باب قلبي للابد



وانشغل فكري بحبك من زمان


انوجد به حب لك ما هو لاحد



بان لك في العين مع شوق وحنان


يا حياتي وسط قلبي لك عهد



يكتبه دمعي على خدي ضمان


لاجل تقرا كل معنى به وعد



وتدري ان القلب لك وحدك مكان


ياحبيبي ما اقدر اعبر واعد



وش بقلبي لك من اسرار وبيان


آه .. لوتدري وش بروحي بعد



وش تخفي لك من حروف ومعان


لا تغيب ارجوك يا خلي ابد



تستريح النفس والفرحه تبان


اطلب الله يبعد بأهل الحسد



واهتني واياك في بر الامان

كنت بخيالي راسمٍ قبل اوافيك



اسمٍ معه صوره اليما القدر راد


اني اصير اليوم انا بين اياديك



واشوف اخيراً حظي اليوم لي جاد


ما جاء على بالي اشوفك واحاكيك



بس الصدف تجمع على غير ميعاد


تخيلي وش كنت انا قبل الاقيك



تصوّري بعدك انا صرت وش عاد


اللي تمنيته لقيته انا فيك



واصبح هو اللي كنت اريده لي مراد


صرتي هوى بالي وروحي تناديك



ترتاح في ذكراك والشوق وقّاد


النفس ذابت فيك والقلب هاويك



واصبح لامرك طايعٍ لك ومنقاد


ما اريد غيرك لي عسى الله يخليك



دام الهوى أنتِ وحبي لك ازداد

تبدا المحبه نظرةٍ بابتسامه



فالموعد بقرب اللقاء والغرام


من حين شفته جت بقلبي سهامه



صار المثل عنده بنفس المقام


اول زياره محتشم في لثامه



مع الحياء طبعاً برد السلام


وكثر التحفظ زود! خوف الملامه



وبعض التمنّع والخجل بالكلام


شال اللثام وباسفل الخد شامه



لمحت بدرٍ بين ذيك الغمام


وجهه قمر خمسة عشر في تمامه



والشعر ليل حالكٍ بالعتام


زودٍ على زينه حسينٍ قوامه



رقيق هادي وادعٍ كالحمام


انا اشهد اني شفت فيه الوسامه



عنده على ما قلت تاج ووسام


طلبني اجلس قلت حب وكرامه



سامرني وكله ادب واحترام


الليل ولى مدبرٍ مع ظلامه



ولا لنا بالصبح أي اهتمام

عجزت اعبر لك انا عن شعوري



في شوفتي لك بالفرح يوم لقياك


انا معك مااقدر اوصف سروري



ما كن به غيرك بشر في حلاياك


دنيا الهوى دارت وانا اليوم دوري



احلى شرابي باخذه من ثناياك


حبي ترى امرك مهم وضروري



ولا احس بطعم حبي بلياك


باكتب لك ايام الفرح في سطوري



تصير ذكرى خالده عند طرياك


يا شوق بامر الله تعدّل اموري



ارتاح يالمحبوب في خير واياك

كن القمر يوم اختفى استحى منك



وكن الهوى وقف على شان ترتاح


حتى السحاب اللي حجب بدرنا عنك



من بينكم وقف تحير ولا راح


يخاف يقصر بالقمر وانت يحزنك



يخطي عليك ويحجب النور لا لاح


يغار حسنك والحلا والبشر منك



حتى الزهر لاقبلت من غيرته فاح


تفتن وغيرك لو بغى صعب يفتنك



ولو اجتمع به ملح زينات الاملاح


يعجز يوصف كل شاعر محاسنك



يصبح بحالة واحدٍ دونه سلاح

العين يكفيها تناظرك بس انت



لأنك احلى شي فيها تشوفه


لو ناظرت غيرك تصوّر لها انت



واسمك برمش العين تلقى حروفه


والقلب والله ما سكن فيه غير انت



يعلن فرح بالحب يضرب دفوفه


لاجلك ترك كل شي ما حب غير انت



مرتاح لو حبك يسبب وقوفه


والروح هامت في غرامك تبيك انت



وحدك امانيها لقربه شغوفه


ملكتها يا شوق صارت فداك انت



نسيتها بهيامها في كلوفه


والنفس ما تشتاق تنسى ما غير انت



انت الذي دايم بنفسي ريوفه


تطيب لك وتشوف فيك السعد انت



بديل ما ترضاه لو هي ظروفه


الذكريات اللي بروحي بها انت



واللي مضى حبك يزيله بشوفه


اسامرك في داخلي ما بقى الا انت



رايع بعيني كاملٍ في وصوفه


مسرور انا والله مبسوط فيك انت



في كل مجلس افتخر فيك نوفه


احس ما يزداد في حبه الا انت



واحس ما يزداد غيري بخوفه

مع ان كلمة احبك فيها جميع المعاني



صارت بحقك شويه ولا توفّي هواك


لكن عيواني بدالي توصف مشاعر حناني



تحكي عن اللي بقلبي في كل نظره تراك


شروق ياللي مكانك قلبي ولا فيه ثاني



لا صرت جنبك نسيتك وان غبت شوقي لقاك


ما فيه مثلك وفى لي ومن المحبة سقاني



هذا اللي خلا ودادي يزيد لك عن سواك


في كل مرة اشوفك حبي يتجدد واعاني



يضيع اكثر كلامي ما يطري الا هواك


شروق حبك شغلني واصبح هو اليوم شاني



موجود باسفل جناني حيّر فؤادي بهاك

اروي إليك حبيبتي فتسمعي



ما قد جرى لي وما أراه لياليا


جاء الظلام مخيماً يا مطمعي



اشكو فراقاً فيه اقسى المئآسيا


قد طال ليلي ما اهتنيت بمهجعي



قضيته ابكي وزاد هياميا


ساد الظلام سكونه في مضجعي



متقلباً ارقب نجوماً سواريا


قد بت مكتئب الفؤاد وادمعي



سالت على خدّيَّ قبل المئآقيا


روحي تئن من الفراق واضلعي



جُرحاً تواري بين جنبيَّ داميا


لا ح الصباح ترددت في مسمعي



كلمات صدقٍ آنستني ثوانيا


ساءلتك بالله ربي لي ترجعي



وتبدلي حزني سروراً باقيا

يا مرةٍ ضاقت علي بعض الاسباب



في حاجةٍ خلّت لي الدرب مسدود


وتسكرت في ناظري كل الابواب



مع قلّة الحيلة لي بشي محدود


نخيت ربعي كلهم وايا الاصحاب



اشرح لهم وضعي وانا واثق بزود


اني ابلقى عندهم كل ما طاب



مثل الذي ما بين الاصحاب معهود


لكن خساره خاب كل الامل خاب



فيمن تخلّوا عن اليوم بصدود


وانا احسب لي عندهم يحسب حساب



اصبحت كني بينهم تقل مطرود


ما عاد باقي لي صديقٍ ولا احباب



هذاك أول! لكن اليوم مفقود


اللي بوقت الضيق مافيه. ينعاب!



ما ينبغى حتى ولو كان موجود

غبتِ وطالت غيبتك ما سألتِ



عني ولا قلت اجي لك اعلمك


ما راح يضرك لو لحيي نزلت



وجيت وقلت لي عن اذنك باكلمك


ما راح اقول لك لا. لكن رحلت



حتى ولا قلت لي الله يسلمك


اول لو اقعد عنك يوم انهبلت



واليوم ذكري لا طرى لك يألمك


سبحان من غيرك كيف اندمرت



سميتي من يبغى يراضيك ظالمك


انا عرفت انك لهذا سعيت



قررت انا ارحل دون رجعه لعالمك

وين الكلام اللي تقوله من ايام



ما صار للي قلت والله ولا سبوع


حتى يتبدّل من حقيقه الى احلام



يمحاه نور الصبح لوكان مطبوع


كل شي عرفته عنك انا بأول العام



يوم استغليت الهوى درب مشروع


يا ما تواعدني وتكتب بالاقلام



وتقول اطيعك كل ما قلت مسموع


تسلي وانا والله لي الطرف مانام



اقضي ليالي ساهرٍ كلي دموع


حلمك خيال وواقعك كله اوهام



اصبحت عارف انني فيك مخدوع

حاسب ضميرك لا تصدد وقدر



اللي يحبك ارخص النفس يغليك


تقسى عليّه ليه ارجوك فكر



باللي اسوي لاجل خاطرك وافديك


وش السبب قل لي علامك تغير



عن قلبي اللي كل لحظه يناديك


شفت التعب منك وانا باتصبر



وش بك على هالحال زدت بتماديك


قصدك تغلي او دلال او تكبر



ارجوك ريح روحي اللي تناجيك


حزين انا والله بس اتعبر



واخفي دموع العين لحظة الاقيك


يكفي عذاب ارجوك لا لا تجبر



على الذي حطك بقلبه يخفيك


قل لي تدلل قول آمر وأشر



لو باصبعك تلقاني جنبك ابيك


انا اشهد اني من عرفتك وانا اسهر



وان نمت لحظه جيت بالنوم احاكيك


والختم قلبي من همومه تأثر



اخفى الم واحزان لاجلك يداريك

ابشتكي لك منك من عدّة شهور



واحاول اشرح كل ما لي من ظروف


لمّحت ابي تفهم وتاخذ لي الشور



تمشي معي ما كن تسمع ولا تشوف


وفيت لك رغم الجفا منك والجور



علّك تحس وترحم الحال وتروف


لاجلك تحمّلت العنا وانت مسرور



والحب له معنى عطيته لك حروف


ذقت الشقاء واصبحت انا منك مقهور



انكرتني وانكرت لي كل معروف


عندك ضمير وعندك احساس وشعور



تقدر اللي في محبتك ملهوف


ما ترحم اللي خاطره منك مكسور



والحزن في قلبه من العين مشيوف


اعماك زود الحب؟ خلاك مغرور!



شايف علي حالك تقل ما لك وصوف

الى متى يعني وانا باتحمّلك



واصبر على صدك وكثرة تغليك


وكل ما غلطتِ اتغاضى واجاملك



ولا احسسك بشعوري. اداريك


وفيما مضى تدرين وشلون اعاملك



واذا تكدّر خاطرك لازم ارضيك


والحين مليتك وصرت اتجاهلك



وكرهت كل شيٍ يجي فيه طاريك


لانك اصلاً ما احترمتِ تعاملك



وهذا يخليني انا اقول ما ابيك


تفكيرك ابعد بك وغرّك تأملك



خلاك تنسين اني ابعد واخليك

اخذت يومك وانتهى راح ما دام



شف وش بقى لك عاد هو صار يكفيك


فكّرت في بكره او انك بالاحلام



عايش ولا تدري عن اللي يماشيك


تركت في روح الذي حبك آلام



ونسيت من هو وفيٍ لك ويغليك


ترى الغرور يضيعك كله اوهام



والله ما تلقى لك اللي يسليك


تبعت من خانك ولو كان نمام



طعته وتدري به من المر يسقيك


تبي تذكر ما مضى لك من اعوام



وتبي تندّم بس ما هو بممديك


عش فرصتك واغنم ولا تنس الايام



اللي تجي وتروح ترجع تربيك

وش كثر احبك تذكرينه من اول



من روحي اكثر كنت احبك واداريك


واغار وازعل لو غيابك يطول



وسهر وافكر وانشغل لين الاقيك


واليوم ذاك الحب راح وتحول



كثره عشر مرات انا اكرهك ما ابيك


من شان شيٍ صار منك يهول



انت تعرفينه ولا هو بخافيك


لعب عليك ابليس غرّك وسول



خدعك قوله ما به احدٍ يساويك


طعتيه وصدقت رسم لك بجدول



دروبك اصبح في عروقك يجاريك


يا جعل رجلك لا مشيت تحرول



لو ان قصدك لي زياره واخاويك

ما دامك اخترت طريقك بكيفك



وضحيت بعشره قديمه من سنين


وضيعت اجمل شي بيني وبينك



وغدرت بحبي مع اللي تحاكين


ما كنت اصدق قبل ما اشوف عيبك



وما كنت اصدق انك انت تخونين


صرت احترق واقول يا ويل ويلك



لو شفتك بذا اليوم والله ان تموتين


كنت افتكر اني لوحدي حيبيك



ولا طرى في بالي انك تغدرين


لكن غدرتيني وبنت بعيبك



تسببين لنفسك بشي وتشكين


تحملي خطاك انت بدينك



اعميتي عيونك وبعدين تبكين


دمع الندم ما ينفعك او يفيدك



غدر الحبايب صعب. لو كان تدرين


ما دام هذي خاتمتك ومصيرك



الله يلعن كل حبٍ تعرفين


وما دامك اخلفت وبعت يمينك



صرت علي اهون ما اردى الشياطين


نسيت انا حبك وقررت ابيعك



يا جعل عينك تنعمي ما تشوفين

ليت الهوى ما صار بينك وبيني



والحظ ما جابك لقلبي وليفه


كان اهتني في الليل وتنوم عيني



وتفارق شهورٍ قضتها ذريفه


وعسى الزمان اللي مضى من سنيني



الروح عاشت به حياةٍ كسيفه


يروح ما ينعاد لي ما يجيني



يروح ما يرجع شتاه وخريفه


وانساه وانسى ما جرى من ظنيني



يرتاح قلبٍ من همومٍ تخيفه


واترك طريق الحب واكتب بديني



اليوم روحي من هواكم عفيفه

يا ليت عن أمر الهوى اقدر اسلي



ولا يجي عندي لذكراه طاري


من عقب من كنت اعشق الحب واغلي



عفته وبعته عقب ما كنت شاري


الروح فيها لاهب الحب يصلي



والعين ماها يجرح الخد جاري


والقلب صار اليوم بالحيل يغلي



على عشيرٍ طال منه انتظاري


مما جرى كرهت انا الحب واللي



اسهر عيوني ليلتي مع نهاري


ما كان بيدي كنت انا فيه مبلي



ما قد سمعت ان الغرام اختياري


ارجي لعل الله من القلب يجلي



همٍ يصيبه صار فيه متواري


يريحني منه ويرتاح عقلي



واصير في ظلٍ عن الناس ذاري

وش حاجتك يا قلب في اللي مجافيك



ما هو بيمك دايمٍ عنك داله


اذا بدا له رغبةٍ جاء يصافيك



وان ما بدا له. عاف ما كان جاء له


وان ادرك اللي راد يصبح معاديك



وان ما حصل. ما جيت والله بباله


وان صرت له محتاج يخشى يلاقيك



وان صادفت شفته تعذّر بخاله


مع انه بحالك درى ما يواسيك



على كبر بلواك همّك بحاله


سهمٍ من سهام الهوى اليوم راميك



نسّاك كل شي غير ما كان قاله


هذا يسمى حب واليوم ناسيك!



كذا يكون الحب وهذي فعاله!


ما اسرع نسى وقتٍ مضى به مخاويك



وان قلت وينك قال ما امداك تاله

ما دام خلي خان عشره طويله



باقي البشر ما اريد منهم حبايب


باع الغرام وباع اشياء جميله



ونسى عهوده يوم سرنا قرايب


اقرب ويبعد كل ما لاح ليله



يصبح ويمسي كل اموره غرايب


بلغ مراده واشترى كل حيله



حيثه قليل اصله وكله معايب


صدقته اول يرفض اللي يجي له



احسبه من شاني وشفت العجايب


اليوم ما به فايده او حصيله



يبغى فراقي عنه لو بالمصايب


باجبر فؤادي عنه بأية وسيله



واخفي جروحٍ منها القلب ذايب


من يدعي بالحب ما ينمشي له



ملزوم عز النفس لو هو تعايب

من زحمة همومي والاحزان هليت



دمع الالم تشكي عيوني لهيبه


على الذي ابعد وانا ما تخليت



نسى العهود وخان ربي حسيبه


خلا بروحي جرح انا منه ونيت



ونة فؤادٍ يشتكي من نصيبه


باحرج ظروفي باعني ما تهقويت



انه بوقت الضيق يظهر بعيبه


كم وقفةٍ وقفت لاجله وضحيت



والله ولا فكرت لحظه! اسيبه


لا شفت زوله مقبلٍ به تحفيت



وعيني تهل الدمع من فرحتي به


لكن نصيبي انكتب ما تهنيت



مع الذي جت كل اموره عجيبه


احسبه اقرب شي من وظنيت



انه لي اقرب من حبيب لحبيبه


واليوم قلبي صد عنّه وصديت



ما باعني بعته انا ويش ابي به


ليت القدر ما جابني له ويا ليت



حظي وقف دونه عجز لا يجي به

بعدك مناي وفرحتي يومي انساك



همي افارق خلقتك ويش ابي بك


دفنت قدرك بالثرى عقب ما شاك



يوم اكشفت لي ليلة الغدر عيبك


عسى عدوك ينطوي حدر ماطاك



يسري مع الشريان سمه يصيبك


من راد قربك بس يبي لين ياطاك



يرميك رمية كلب ثمّن يسيبك


ما اظن من يجفاك يرجع ويبغاك



الا ان حصل رغبه تعبها نصيبك


معرفتي لك عار ما والله اهواك



كلك عيوب ومبعدٍ عنك طيبك


ما همني قربك اهم شي فرقاك



اشوف بك همٍ يحيّر طبيبك


حالتك حاله وارجي الله يبلاك



في علةٍ منها تشقين جيبك


ما انت بقدٍ للتحدي اذا جاك



مني كلامٍ تسمعينه يشيبك


يقضي عليك ويدخل القبر واياك



موتي قهر تستاهلي ما ينيبك


روحي عسى سود الليالي تحداك



الله يلعن كل شيٍ يجي بك


هذا جوابي لك اذا العلم يقراك



توهق اللي طاع يصبح حبيبك

عن خطاها جت تقول الاعتذار



قلت ما عندي لهالغلطه عذر


واسمعي مني كلامي باختصار



انتهينا والسبب منك الغدر


ابعدي ما عندي لك أي اعتبار



وارحلي عني انا اريد الهجر


كثر ما احبك كرهتك باحتقار



وهان نسيانك علي ما ينذكر


ولو سمت لي على صدرك شعار



وقلت ان اسمك بقلبي والفكر


ما اتراجع عن قراري مهما صار



لاجل كل شي بك يذكّر ما يسر

ابحاول ابعد عن طريق الهوى كله



وابحاول ابعد باقي الحب عن بالي


وابصد لاجل القلب يرتاح من غله



وباصبر اليما انساك والجو يصفى لي


وابترك غرامٍ منه الروح معتله



واريح فؤادي منك وترد لي حالي


وابكتم بصدري كل شيٍ على حله



بصبري على نفسي ولا صبر عذالي


انا ودي انسى من نسى بالهوى خِلّه



على شان بعدك فيه تتحقق آمالي


اذا انت ما تقوى طريق الهوى خَلّه



ترى الحب ما يبغى كلامٍ على الخالي

ما اشوف شيٍ تبدّل



صويحبي هو هو


اذا جلسنا تململ



كنه بجمره يكوى


وان غاب عني يطول



واذا حكم ما تروّى


اذا بغى شي قبل



وينسى الذي كان سوى


وان قلت ليه ما تعدل



يفسر القول شكوى


بعدين يبدا يتحول



يرجع مثل اول او اسوا


واصبر عليه واتحمل



ويزيد ظلمه بجفوى


ما يدري انه من اول



هو اللي باليني بلوى


قولوا لخلي تمهل



يا عيال آدم وحواء


الجسم منه تعلعل



هو قاسي مير الله اقوى

ارسل ابياتي لك بصدق الخبر



تنفي اللي قلت وكل شيٍ معه


خلنا نبحث وش اللي بالامر



نجتمع باللي حكى واللي معه


ونعرف اللي صار من حول الشهر



وندري انك مشتريه او بايعه


وتشهد بنفسك ويشهد من حضر



ان ما يحكى اشاعه شايعه


كان صدقته فهو لي ما يضر



يوم انا متأكد انه زوبعه


او سحابة صيف ما فيها مطر



شكلها يوهم بليله رايعه


او يعجعج ينقلب لونه حمر



والعيون تصير منه دامعه


هذا حال اللي يصدق كل شر



تصبح افكاره شتاتٍ ضايعه


الصراحه نورها نور القمر



والحقيقة شمس قيظٍ ساطعه


الخفا والدس يقصر بالعمر



كله عيوب وعلومه لايعه


لا تعجل واحذر لبعض البشر



طبعهم طبع الذياب الجايعه

كلمة انا آسف معك ما توفي



لان انا اخطيت فعلاً حقيقه


لو اعتذر لك ما اظنه يكفي



لو هو بأرق اسلوب واحسن طريقه


كثير انا اهملتك وكنت بصفي



ولا جبرت بخاطرك لو دقيقه


اقسي عليك بظلم وانت تخفي



وش فيك من همٍ انا ما اطيقه


ضحيتِ برغبتك لاجلي تعفي



وانت علي دايم رحوم وشفيقه


وما تقربي شي يجي فيه شفي



لو كان كاس الحب باصفى رحيقه


ما نيب انا يا نفس عنك مقفي



هذا وعد حر يواعد رفيقه

قالت لي ليه اسكت كنك تذكر



وطول سكوتك ليه كنك تغيرت


خلص كلامك او مزاجك تعكر



وش فيك قل لي انا بامرك تحيرت


الجو على كبره احسه تسكر



وضاقت بي الدنيا ولاجلك توترت


وقالت عليك الله قل لا تعذّر



انا معك لا قدر الله قصرت


قلت ما حصل مما ذكرت يعبر



عنه ولكن اسمعي وش تخيرت


ان طال صمتي صرت انا فيك افكر



واذا حكيت اقول وش فيه فكرت


تأسفت فهمي لقصدك تأخر



والعذر مني اقبله لو تعذرت


قلت العذر مقبول بس لا تكرر



من غلطتك هذي تراني تأثرت

كيف مني تطلبين انسى الغرام



الذي ما عاش في قلبي سواه


ليه حرمتيني حنانك والكلام



خلتك نفسك تضيعين بهواه


القساوة ليه منك ذا حرام



تجرحين القلب يوم انك دواه


ليه منك ما يجي رد السلام



صدك اصبح هم في جسمي طواه


في فراقك ما اتهنى بالمنام



بعدكم صعب وفؤادي ما قواه


الالم في نفسي اعدمها عدام



يشتكي لي القلب من حر كواه


يا حياتي يا شبه بدر التمام



وش يفيد القلب حب ما رواه


عشت انا وانت محبه في هيام



لا هجرتي باقي عمري وش ثواه


باجبر النفس الحزينة لو الام



حافظ عهدك بقلبي يا مناه


بعد حبك ما اظن فيه حب دام



شاركوني قولي كتّاب ورواه

يوم انت تغليني وانا منك مرتاح



ويومك تركتيني انا عشت بانكاد


اول معك عشت السعادة والافراح



ومنها حرمتيني وانا لامرك انقاد


حفظت لك عهدك ولا السد ينباح



وارخصت لك نفسي واشوف العنا زاد


ليلي قضيته اذرف الدمع بصياح



سهران لين الصبح والصبر ما فاد


كنت اتوقع اكسب الحب بارباح



عندي امل في ماضي الامس ينعاد


يا بعد روحي فيكم الهم ينزاح



كل ما ذكرتك ينزل الدمع معتاد


حبك سكن قلبي وللروح يجتاح



حبي لك اعمى ما من الناس يرتاد


يطلع علي النور يا زين وضاح



ما نمت من ذكراك يا بنت الاجواد


وش حيلتي لامن تخليتِ وراح



وقت الهوى وبان الجفا منك بعناد


صدق وحقيقه قلت ما ني بمزاح



من كثر حبي صار موروث باحفاد

يا شين شيٍ به تجي منّة الناس



لو هو من اقربهم ولي فيه حاجه


يطيح من عيني ولو انه الماس



والا ذهب صافي من الدر تاجه


يهون ما يسوى من الفكر هوجاس



ولا مجرد ذكر لو هو خراجه


ويصير ما كنّه حصل شي له ساس



ينعاف مثل الماء الى جاء هماجه


ولا يجي له بالنظر وزن وقياس



واللي مدح نفسه يسمى ساجه


الشي اذا ما جاء لك بصدق واحساس



ما يعتبر معروف. يظلم سراجه


لكن ولو جاء كل ما هب نسناس



ما ينبغى لو كان يضحك حجاجه


وما اذل نفسي له ولا انزل الراس



واصبر الين الله يجي بانفراجه

سألت عنك يالغضي قيل تعبان



ضاق الصدر لاجلك عسى الله يشفيك


وش بك عسى ما شر اوانت مرضان



من غيبتك حسيت انا يا لغضي فيك


اليوم من دونك مضى صرت ولهان



خايف عليك من التعب مثّرٍ فيك


دعيت ربي يالغضي لك من الآن



يزيل ما بك من همومٍ تباريك


ويلبسك ثوب العافيه رب الاكوان



اشوفك بتاج السعادة اوافيك


انت الذي عندي من الود لك بان



كل الغلا من كل قلبي انا اغليك


عسى الفرح دايم على العين عنوان



وعسى السعادة لك من الله تخاويك


اختم كلامي بالوفاء زود برهان



والصدق في لفظي من الشعر ياتيك

رادها الله بيننا كلمة وصل



خير صدفه جمعتنا يا عمر


توي القى لي صديقٍ ما يمل



توي القى لي عشيرٍ في البشر


شفت فيك الطيب ايضا والامل



ما يفارق خاطرك طول العمر


لا لقيتك صرت كني في حفل



زودت فيه المباخر بالعطر


زاد فيك اعجابي اكثر واستحل



في مقامي اكبر اركان الفكر


ارجي اللي راد والتم الشمل



يجعله ربي بفضله يستمر


يحفظك لا قلت مع قولك فعل



لين طبعك ما يبي لك تعتذر

صدفه اجتمعنا مرةٍ عند فنان



جلسنا فيها لآخر الليل سمار


وغنى لنا الفنان من عذب الالحان



وبعد الطرب دارت حواليه الافكار


وتخلل الجلسه حديثٍ له اشجان



وزادت حلاوتها القصايد والاشعار


ومن ضمن جلستنا بنا واحدٍ كان



يشوف نفسه غير. في كل الاخبار


اللي حصل انه دنا وقال يا فلان



بحكم اختصاصي في فواصل ابختار


شي من ابياتك بانزل له اعلان



مع صورتك واللي كتبته من احبار


ابخدمك باللي انا قلت مجان



باخلي من هو شاف الاعلان يحتار


خذت العدد باقراه اذا كان به بان



شيٍ من اللي قال لكن ولا صار


غيّر كلامه عقب ما كان له شان



وبعيني اصغير صار من كثر الاعذار


شقّيت كرته بعد كذبه وعلي هان



واللي كذب مره يبي يعيدها مرار


اللي وعد واخلف نسميه خوان



وما نعترف في مكثر الهرج مهذار

يا ليت من هو سكن بلدان



لو بضعة ايام معدوده


يكحل العين بالغزلان



في وصفهم يكتب انشوده


تبرد من اقصى الحشا نيران



والقلب تحيا به وروده


يرتاح لو هو قبل تعبان



الى حصل بعض مقصوده


ويسامر الخود والخلان



ويشوف وش صار مردوده


بعض الحكي ما يجي باعلان



والبعض ما يوفي وعوده

عندي كلامٍ لك اظن موعده حان



الحين جاء وقته باقوله وافيدك


ابيك تفهم شيٍ اليوم لك بان



الصدق واضح والصراحه تجي لك


اللي حصل من بيننا والذي كان



ما فيه داعي اعتقذ صار ودك


ابعتذر منك اذا كنت غلطان



حقك علي ارضيك ما اصير ضدك


وانا بعد لي حق ترضين لو جان



شيٍ جرحتن فيه انا ما جرحتك


اسمع كلامٍ قلت انا فيه برهان



يبين لك وش كثر اودك واعزك


نبني صداقتنا على غير حقران



على الوفاء والصدق عندي وعندك


مع احترامٍ بيننا دون هجران



فوق القدر ويصير سلمي وسلمك

من واجب الواحد اذا شاف بالعين



شيٍ حصل ما يبدي العذل واللوم


واللي حصل مني اذا كان به شين



لولا الخطا ما جاء ترى الصح معدوم


كان الغلط مني ظهر فيه جرحين



لك مني ما قصدي وما قلت معلوم


يومي اشوفك مخفيٍ دمعة العين



لا شك صدري ضايقٍ كلّه ثلوم


يا صاحبي اسمع كلامٍ به اللين



يجيك من قلبٍ يعزك على الدوم


واخر كلامي تقبل العذر من حين



تقرا كتابٍ جاك موقع ومختوم

قلّت خواتم ناس معنا يحسبون



النفس ما تصبر بلاهم دقيقه


ما دريوا انا نقطع الوقت بالهون



نسمع لهم كذبٍ ولو فيه ضيقه


ورتهم انفسهم وصاروا يغلطون



واكثر بعد حطوا لهذا وثيقه


تملهم لا من بدوا لك ينمون



عليك ولك. كذاب! من ذا طريقه


الله يقطع كل من هم يخونون



وتسببوا للقلب شيٍ يعيقه


اريد فرقاهم. ولو كان بالكون



شيٍ يذكرني بهم ما اطيقه

كانك تحسب اني انحني لك واقول سم



واهين نفسي لاجل خاطرك. غلطان!


افهم تعلم لا توهم وشف كم



عطيتك الفرصه ومعه زود برهان


الفايدة ما شفتها منك والهم



شلته بقلبي لين انا اصبحت تعبان


اقول انا ما يعجبن ذا ورح يم



اللي على شانه تركتن ولك خان


ما ابغاك لي ترجع ولو قلت لي تم



اللي تبي وتصير لي انت سلطان


قلها لغيري لا تحسب اني اندم



اية بداية له نهاية ونسيان

لامن لفاني ليل خيّم ظلامه



واخفى نهارٍ خلف سود الستاير


ذكرى بقلبي تبتدي في الامه



وتخلي عيوني تهل العباير


وجروح وسط الروح صارت علامه



تبين ان القلب وسطه عساير


هم والم غم وحزن مع ملامه



من كثر ما شبت بجوفي سعاير


يا ما مليت اوراق جفت قلامه



وصارن عيوني كل ليله سهاير


اول وانا عايش هنا في سلامه



واليوم وقت الحب له حكم جاير

لو قلت لي ليه انت طولت هجرك



وابعدت عني ليه تبعد وتجفان


كان اعترف باللي حصل لي واخبرك



ان الدهر يا بعد روحي تحدان


وابعدني وخلاني محروم منك



غصبٍ ما هو برضاي ما كان لي شان


يا شينها الفرقا ترى الحال بعدك



احس يا حبي بدا فيه نقصان


قلبي وروحي شافن الهم عقبك



والبعد كم سهّر عيوني وبكان


ودي اتصبر لكن الصبر عنك



صعبٍ على قلبٍ غدا كله احزان


اخاف بعدي عنك يثّر بحبك



واخاف كل الخوف يا زين تنسان

ابي احس اني مع الناس عايش



واريد احس بقيمتي مع كياني


ما نيب انا جاهل ولا ني بطايش



ولا صغير ما اقدر اظهر بياني


لكني اخشى شي بالصدر جايش



يطلع ويدري كل واحد بشاني


باخفيه لو هو يجعل الفكر دايش



لو اني اقضي كل وقتي اعاني


لا بد يهدا كل ما كان شايش



مثل العواطف كالعواصف ثواني


ارجي الهٍ للمقادير حايش



يجعله ما كنّه حصل شي جاني

شكت وهي تبكي حزينة تقول آه



عمري بدا ما بين قسوه وحرمان


قصة حياتي ابتدت في معاناه



رحلة طويلة كلها هم واحزان


باول سنيني افتقدت المراعاه



مع الحنان اللي نسيته من ازمان


وفقدت غالي مستحيل اني انساه



ما رق لي من البشر غيره انسان


الوالد المحبوب ما طاع يسلاه



فكري يصوّر صورته وسط الاعيان


حتى عشير الروح مليت ممشاه



زوّد جروح الروح والقلب تعبان


جربت كل اسلوب من شاني اهواه



علّه يحس ويعترف كان غلطان


ويعوّض اللي راح ويعيد مبداه



واحقق احلامي معه باعذب الحان


واسامحه وانسى مواجع ومأساه



واحلف له انه ما يجي يوم ندمان


كنت اتوقع ينتهي الغم وبكاه



واعيش انا جو السعادة من الآن


لكن ظني والامل خاب واياه



قتل طموح النفس يوم الوفاء خان


وصبرت لين الصبر ما عدت انا اقواه



والياس صار اقرب من اوهام حيران


وين الذي لا جاء لي الضيم القاه



ينسيني همومي ولا. كن شي كان


كلٍ تخلّى للأسف عني وتاه



دليل حبي ضاع ما عاد له شان


سمعت قصتها وقلت آه ويلاه



ينعاف وقتٍ ما نفع فيه خلان


قلبي تأثر كاد يطلع من حشاه



وين الاهل وين الحبايب والاخوان


ما فيه منهم منصف اعوذ بالله



يسمع لشكوى اللي تبي جنبها اعوان


لكن ترى كل يغني بليلاه



وغرق سفينه دون دفه وربان