لا أريد وظيفه ولايحزنون

انا كاتبه موضوع في هذا المنتدى عن طلبي للحصول على وظيفه بس انا الحين ما أبغى وظيفه وأفضل الجلسه في البيت من ضياع وقتي مع النصابييين وخرابييين البيوت0
أسباب تغيير نظري عن الوظيفه وهي لسبب اني تعرضت لكثير من النصب وضياع الوقت وانا لا أقصد منتداكم ولكن كل واحد كاتب انه عنده وظيفه ومراسلته على رقم الفاكس والايميل او غير ذلك في جميع المنتديات والاعلانات الوظيفيه0
قصصي مع النصابيين وانا لاأكذب في اي شي سأقوله00
أول واحد كان حاط أعلان في احد المواقع الاعلانيه عن وجود وظائف شاغره وفي جميع المناطق وباي تخصص انت تختاره،وطبعا الاخ واضع الايميل تبعه المهم أنا رسلتله رساله فيها السيره الذاتيه ومعاها رقم الهاتف والايميل تبعي وفي اليوم الثاني اتصل الاخ عليه وقال موجود عندنا الوظيفه الي تبغيها وفي اي شركه او مدرسه انتي تبغيها انتي تحددي قلت له انا ماعندي اي خبرات قال مافي مشكله نحنا نقدر نوظفك في اي مكان تبغيه والوظيفه الي تبغيها قلت له طيب حلو اتفقنا متى اداوم قالي بس ادفعي الجزاء قلت له كم قال 15000ريال قلت له طيب ليه ماتوظفوني وتأخذوها من الراتب قال لا مانقدر هذي شروطنا قلت له طيب لو دفعت راح تكتب ورقه اني اديتك فلوس قال لا نحنا اديناكي كلمه ضماننا كلمتنا أنا ساعتها حسيت ان الموضوع فيه نصب فقلت له خلاص ماأبي أتوظف قال خلاص ادفعي الي تقدري عليه قلت له خلاص ما أبي وظيفه، وصار كل شويه يدخل علي في الماسنجر بدون ما أضيفه ويقولي ما تبغي وظيفه خلاص خلينا نتعرف شايفيين كيف الين في الاخير ما مل وسابني في حالي0
اما النصاب الثاني انا كنت حاطه أعلان في منتدى وواضعه السيره الذاتيه تبعي فالاخ رسلي على الايميل انه عنده وظيفه بالجامعه وهي خدمة عملاء بحيث اشرح للزوار عن الجامعه وافتحهلهم بروجكتر عن الجامعه وهو يقول انها جامعه في التحليه جامعة العلوم هذا الي قاله وكتبلي اضيفيني عندك في الماسنجر عشان نتفق على الموضوع واشرحلك الوظيفه بالضبط انا اضفته عندي وكلمني عن الوظيفه قلت له موافقه وفرحت لقيت وظيفه بسرعه المهم قلت له متى نعمل المقابله الشخصيه قال جيتي للمهم فين تبغي المقابله قلت له في مكان العمل طبعا قال لا أحسن في مطعم قلت له طيب بس بشرط أجيب زوجي معايا طبعا رفض قال كيف نقدر نأكل ونتكلم مع بعض بوجود زوجك قلت له هذا الي عندي تبغى ولا لا قال ايش تبغي بالوظيفه اجلسي في بيتك وانا ارسلك مبلغ كل شهر قلت له بأي صفه قال عربون محبه وطبعا قفلت الموضوع معاه0
اما النصاب الثالث والاخير وهو كان حاط أعلان انه مصمم أزياء ومحتاج فتيات يشتغلوا معاه كموظف أستقبال او مدخلة بيانات وغيرها المهم كان موجود رقم فاكس فانا رسلت فاكس له وبعد كم يوم يتصل الاخ عليه الساعه 8 الصباح (وزوجي كان عامل عمليه وما يداوم في شغله) يقول معاكي محمد العجلان المصمم المعروف وانا مسكينه معاه في هبله المهم قال انتي رسلتي السيره طالبه وظيفه عندنا قلت له ايوه قال طيب صحصحي معيا وعندي كم سؤال وجالس يسأل انتي كم طولك وكم وزنك وايش تحبي تلبسي وكيف مظهرك والشهادات الي معي والخبرات وقوة تحملي للعمل وجرأتي وهنا المهم لماوكانت كل سألته كم في الميه قلت له لو تعملوا مقابله شخصيه أحسن عشان الواحد مايمدح ولايذم قال لا انا أصدق كذا ولا المكان الشغل حيفتح بعد شهر في جده وشهرين في الرياض المهم في سؤال الجرأه قلت له 60% قال اهم شي الجرأه نحنا نطلب 100% قلت ححاول قال أعتبريني زي ابوكي خلاص طيب بعد ساعه حنتصل نعمل انترفيو معاكي بس حتكون أسئله محرجه جداجداجدا قلت طيب اشوف ،(هذا كله يدري به زوجي وزوجي يثق في ومديني الامان لانه واثق فيه وانا اي شي اقول له) ،بعد ساعه اتصل الاخ وكل شويه يدق احد عليه عنده كم رقم المهم قال اني جاهزه حسألك كم سؤال محرج واذا جاوبتي عليهم حديكي رقم الوظيفة والراتب وانشاء الله تجهزي نفسك اما اذا كني مو جريئه فما راح تتوظفي عندنا نحنا نطلب الجرأه وشوفوا ايش كانت اشئله وكيف انا طولت بالي بس مسكين ماأخذ لاحق ولاباطل
1-كم طولك ووزنك؟
2-ايش الالوان الي تحبيها؟
3-ايش احلى فستان طلع عليكي؟
4- ايش احب الالوان لك؟
5-اي الملابس الداخليه تفضلي؟ طبعا انا هنا ماجاوبت وقال شكلك ماتبغي الوظيفه
6-اذا فتحتي النت وطلع لك صور اباحيه تشوقيها؟ انا هنا بدات افلت
وأسئله محرجة كثيره ما أقدر أقولها بس ما جاوبت ابغى اشوف نهايتها معاه المهم قال طيب اني اسئليني اسئله محرجه جدا جدا قلت له انت متزوج قال هذا سؤال محرج قلت له جاوب قال ايوه قلت له طيب ترضى انوا احد يسأل زوجتك هذي الاسئله؟ قال دقيقه وارجع ادق عليكي وبد كذا ماشفت خلقته واذا زوجي رحع يدق عليه مقفل جواله0 تعرفوا بعد التصال جلست كم يوم ما أقدر لاأنام ولاأكل قرفانه من اي أحد صايره أحس الناس نصابييين0
انا عارفه اني طولت عليكم بس عشان ننتبه لبعض ونتعلم من الغلط وما نصدق احد انا عارفه انو الي محتاج شغل يتعلق بأي أحد0

واووو لهذه الدرجة وصلت قيهم السخاقة

يعطيك الف عافية ع التنبيه

والله أكثر من كذا بس انا مو قادره أكتب كل الي صار بس خليها على الله00
ومشكوره على ردك