|
روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا |
|
LinkBack | أدوات الموضوع | انواع عرض الموضوع |
#13
|
||
|
||
رد: رواية رواية سهام الأيام للكاتبة رشا
/ في حارة سهام القديمه... وقفت سيارة لكزس ... سهام/عمتي انزلي معي نوره ببتسامه/فديتك اخذي راحتك مابي احرج الناس سهام/تراهم طيبين وحبوبين بعد انزلي نوره/ادري دامهم جيرانك ويعزون عليك،،بس اخذي راحتك ومتى ما انتهت سهرتك اتصلي بالسايق يجي يرجعك سهام وهي نازله/طيب..سلام نوره/سلام ..الله يحفظك... / / #بيت سحاب... دخلت سهام وهي تنادي/عزوووز...مجووود سسحااب مجود كان جالس ويتفرج على قناة "mbc3" التفت على الصوت وشق الابتسامه وانطلق لها يركض/سهاااام. سهام ضمته/مجوووود هههههههه مجود/سهام وين رحتي سهام/مارحت مكان كنت عند اهلي وهذاني عندك سيد مجود..وين سحاب وعزوز مجود/فووق سهام/اجل تعااال نروح لهم ونفاجأهم شرااايك مجود تحمس/يللااا .،.،.، / / / جالسات ام زيد ومنال ويطالعون سهام ومستغربات ستايلها الجديد باللبس والميك اب و تصفيفة الشعر!! سهام ملاحظه نظراتهم،ابتسمت/جماااعه انا بنت جيرانكم ماغيرها ام زيد/ماشاء الله،مورده... منال/غريبه،اللي سمعته انك كنتي موب راضيه تروحين وسمعوا صوتك الجيران سهام ببتسامه/صحيح ماكنت راضيه بس شسوي مضطره،انا بنت وحدانيه ولازم لي ولي،بس ابشركم،وضعي هناك ممتاز،واحسهم ناس عاديين مثلنا..يعني مو مثلنا بالضبط هههه،يعني احس براحه،خصوصا ان عمتي نوره معتبرتني مثل بنتها.. منال/الحمدلله،حلو الله يسعدك يارب سهام/امين ام زيد/قومي يامنال سويلنا كنافه اللي تحبها سهام سهام/اي والله ترااني مشتهيتها تكفين منال/هههه من عيوني تامروون أمر انتم. سهام/الا وين زيود...مشتاقتله ام زيد/راح مشوار مع واحد من خوياه وبيجي اكيد سهام/اها / / / / / / / في المشغل~ سحاب تستعد للخروج علشان تتمشى مع اخوانها،وتكلم المديره/اوكي انا طالعه منيره المديره/اوكي الله معك بس في وحده عروس تبيك...ودها تستشثرك انتي سحاب بمزاج عالي بعدما تطمنت على سهام/اوكي ليش لا..انا رايحه عشان ما اتأخر ع اخواني مواعدتهم اطلعهم الليله المديره/بالتوفيق... طلعت سحاب من المكتب ومتجهه لغرفة الميك اب.. في وحده منظرها مرريب لابسه برمودا جينز وبدي احمر، جالسه وحاطه رجل ع رجل وتناظر في سحاب بنظرات مشبوهه!! سحاب وهي تكلم العروس/هلا عروستنا سمعت انك طالبتني العروس بابتسامه/هلا بك......سحااب ماعرفتيني انا فاتن سحاب شهقت اول ماتذكرتها/لاااا راعية البيض هههههههه فاتن/يب هههههههههه للحين تتذكرين هههه سحاب/هههههه اصص قسم كل ما اشوف البيض اتذكرك فاتن/امحق ذكررى هههههههههههه سحاب/بالعكس،ههههه من يخطر بباله يجيب بيض ويحطه على كراسي المعلمات في غرفتهم يا مجرمه ههههه والا يرجمهم به ..انتي كنتي فضيعه.. *البنت المشبوهه تناظر في سحاب وتتفصل ملامحها وجسمها،وتسمع سوالفهم بسكاات/... سحاب/ هو صحيح يا بنت؟؟..يقال انك عروس وتبين رايي هههه فاتن بحماس/ييس واخيرآ ابتسم الحظ بوجهي وبعرس هههه عقبالك سحاب/ههههههه جاتني عقده من هالكلمه..من كثر ماتنقال لي.. فاتن/هههه اجل مستعجله والا قد تزوجتي وخلصتي ههه سحاب بغروور/انااا اتزووج....هزززلت فاتن/انتي للحين ماغيرتي رايك..علبالي تصدقين انك تزوجتي اذكر ان ولد عمك يبيك ومبهذل الدنيا عشانك سحاب/يبيني بس مابيه...ولا ابي الزواج اصلن فاتن/اها...خبله وش عليك سحاب شدت شعرها بمزح/اقوول بس لا يكثر ووريني وش ناويه تسوين بعمرك ههههه فاتن/شوفي بكره عرسي ومحتاره اقص شعري واصبغه والا لا شراايك سحاب/هو ..اقصد العريس قد شاف شعرك الطبيعي؟؟ فاتن/نو سحاب/اجل لا تسوين به شي..خليه كذا واذا حابه تغيرين تعاليني بعد زواجك بستة اشهر اغيره لك..هذا رأيي فاتن بعد تفكير بسيط/هذا رايك سحاب/يب..اي سؤال ثاني...تراني مشغوله فاتن/لا مشكووره سحاب سحاب/اوكي باي طلعت سحاب وهي تاخذ شنطتها وعبايتها وتفاجأت بالبنت المشبوهه/ البنت/هاي انا بدور سحاب بحسن نيه/هلا بدور..تبين شيء؟ بدور وهي تتمقل عيون سحاب وجسمها/لا ..بس سمعت عنك وحبيت اشوفك، مسمينك كارهه الرجال سحاب ابتسمت من الكلمه/صدق؟!! بدور/البنات وسوالفهم..تعرفين يعني سحاب باستغراب/اها..مجرد سوالف لا اكثر مافي كره ولا شيء هههههه بدور ونظراتها مشبوهه/اها اتمنى تلاقين اللي يريحك ويسعدك..انا واثقه انه حولك وقريب منك بس انتي فتحي عيونك وبتحصلينه سحاب بحسن نيه/مشكوره على هالامنيات يلا سلام مشغوله.. طلعت سحاب وظلت البنت تراقبها لين طلعت وهي تعض الطرف الايسر لشفتها السفليه.. / / / / / في السياره وطالع يتمشى مع اخته وآخر وناسه/ها من وين تبينا نبدأ؟ ريم/شووف بالاول نبي نروح الملاهي طلال استغررب/ملاهي؟!!!!!!...انهبلتي انتي ريم/ههههههه طــــلآل بلا ثقل زااايد ...ترى البنات يحبون الرجال الحيوي الكوول مو جااامد وماخذ الحياه مثل وظيفته العسكريه..كلها نظام وجديه ومادري وشو..خلك فري طلال بشخصيته الواثقه/ومن قال اني ادور بنات ريم نغزته/كل الشباب يحبون البنات،يلا بس لا تسويلي فيها مثالي طلال/شوفي انا بقولك حاجه،صحيح مافي شاب الا ووده انه على قولتهم مطيح بنات وكذا بس...مافيه شاااب يحترم اي وحده تكلمه من وراء اهلها حتى لو بين لها عكس هالشيء..وشي ثاني احب اقوله،يمكن انا اتمنى اني اكون علاقات واجد وكذا بس في شيء يمنعني وهالشيء اقدسه ريم تحب كلامه/وش هو هالشيء يا فيلسوف طلال/الله..ورغبتي في الجنه..واحترامي للدين اللي شرعه الله لنا سبيل للجنه..وسن القوانين لكبح جماح رغباتنا وكرمنا بها عن الحيوانات... ريم صفقت له/اعترف اني فخووره فيك ..و احبك طلال ابتسم وهو يسوق/شرايك بعصير فرش،،وتمشيه على مزاجي وشررط اوديك للملاهي عقبها ريم/اووكي ليش لا.. / / / / / ~بيت خالد~ واقف عند المرايه ويتعطر ويستعد للخروج.. ساره جالسه على طرف السرير،وتخزه/على وين هالاسبوع خالد بنبرة حب/مشغول ياعمري.. ساره وقفت وبنبرة زعل/خالد مو كل ويك اند برا ولا اشوفك حتى بالنوم خالد قرب منها وحضنها/حبيبتي ليش متضايقه انتي...والله ملزووم اطلع..علشان الشغل ساره تذوب من كلمتين ساحرات منه/بس بشتاق لك، خالد قرب خده منها/يلا عطيني بوسه علشان اطلع وانا مبسوط ساره باسته وطولت شوي وتعمدت تخلي باقي من روجها تحت اذنه وسوت نفسها تنظفه/لحظه انظف الروج حبيبي خالد/اي تكفين امسحيه زين ساره حطت عينها بعينه وهي شاكه/احبك خالد/وانا بعد...يلا سلام ساره/سلام طلع خالد.... جطلعت ساره تشوف اشغالها بالبيت وتفاجأت بجوالها يرن وابتسمت وهي ترد/هلا حور.... حور بالجوال/اهلين فيك ساره..شخبارك؟! ساره/تمام انتي شلونك ووشلون الكتكوت حور كانت متردده تسألها/تمام ...انتي كيف ووش مسويه هالاسبوع..طالعه مع زوجك؟ ساره استغربت سؤالها/لا...ليش حور/يعني حابه اعرف اذا تقدرين تجيني وكذا ساره/لا ماقدر والله وبروح لامي حور بفضول/من بيوديك ؟..زوجك؟ ساره استغربت هالسؤال/لا السايق..بغيتي شيء حور/لا مجرد دردشه...تعرفين زوجي طالع من بدرري ولسى مارجع وفااضيه...الا ماقلتيلي متى طلع من عندك زوجك ساره بحسن نيه/من تقريبا ربع ساعه حور وهي تسمع صوت الباب وعرفت ان خالد وصل/مجرد دردشه..... يلا سارونه باي زوجي وصل.. ساره/باي.. / / / #بيت حور~ استقبلته بالاحضان/هلا بك نووورت خالد بابتسامه باسها/كيفك حور/مشتاقه لك.. خالد جلس وطلع سيجاره/تبين نطلع والا نجلس حور جلست بحضنه وسحبت منه السيجاره وطفتها/الليله انت لي..لاتنسى انت تغيب اسبوع عني علشان الهانم...وبكره خلينا نطلع خالد/اوووكي مثلما تبين حور لاحظت الروج على رقبته وولعت غيره وقامت من حضنه/قوم حبيبي غسل ..محضرتك عشاء يحبه قلبك خالد قام/ادري فديتك... راح خالد يغسل حور صارت تغلي من داخلها..(طييب يا سـآره...أن ماقهررتك ماكون حور ) / / / #في غرناطه مول~ سحاب/عزوز شرايك بهالتيشرت عزوز بتردد/حلو...بس سحاب حطته بالعربه/وش بسه؟.. عزوز/العيال في الحاره يقولون عني بنت وتلبسني اختي البدل على كيفها سحاب كتمت ضحكتها/وانت متفشل مني يعني هااه؟! عزوز/لا ما اقصد كذا..سحاب انا احبك بس تراني كبرت..خلصت 10سنوات وبدخل11 وللحين تلبسيني شورت وكات والوان مدري كيف..!! سحاب/اللحين وش عليك من كلام هالقراوه عيال حارتنا..غيرانين منك لانك اكشخ منهم عزوز ما اقتنع/سحاب تكفين افهمي سحاب/ههههه اووكي بنغير ستايلك وبنخليك كوول ماان شرايك عزوز ابتسم/يييسس مجود واقف بينهم/سحااب متى بنروح الملاهي زهقت من السووق سحاب/اوكي حبيبي بس شويات ونطلع. / / / / / جالسين على عشاهم كلهم راكان مستغرب عدم وجود سهام بس ماسأل..! بوراكان/اقول نوره وانا خوتس نوره/سم بوراكان/شلون بنتك مشاعل وبزرانها معاد شفناها نوره/ههه ياحليلها ماتفضي ياخوي مع هالبزران وبعد احمد صار يدرس ومشغلها راكان/حمود يدرس هههههه ياحليله توه مولود ذا ههه ام راكان/الناس كلها تزوجت وعيالهم يدرسون الا انت ياحظي راكان باحباط/انا لله بوراكان/نوره متى بترجع سهام نوره/كلمتني قبل شوي وقالت ان ام زيد أصررت الا تسهر معهم واستأذنت يجيبونها لا خلصت وقلت خذي راحتك راكان عصب لانها قالتله ان زيد خطيبها بس مابين..، ام راكان بسخريه/رايحه تسهر مع الخطيب وتتعذر بأهله هااه بوراكان عصصب منها/هيااء ما اسمحلك تتكلمين بهالطريقه عن بنت اخوي نوره/عيييب عليك يا هياء ام راكان/خلاص سكتنا راكان قام معصب وطلع/عن اذنكم.. نوره خاافت(الله يستر„شكله زعل). / / / / / في مدنية الملاهي...، سحاب جالسه وتناظر خوانها يلعبون من لعبه للعبه ومبسوطه بشوفتهم مبسوطين،وتناظر بالسماء وتشوف البرق/يا رب تمطر الليله..والله اشتقت للمطر لفت نظرها شخص تعرفه عز المعرفه،فز قلبها له وهي تشوفه يمر من قدام كرسيها وما انتبه لها..كان معه وحده،بلعة ريقها بصعوبه،ونطقت اسمه بألم بصوت مبحوح وماينسمع اصلن/طلال شافته ماسك البنت بيده وكأنه خايف لا تضيع منه،ركبو لعبه وكانوا جنب بعض ومايفترقون،والبسمه ماتفارق وجهه!!/... استفاقت على همزات مجود على كتفها/سحاب خلصنامن هالالعاب نبي نروح غيرها سحاب مسحت دمعتها/يلا نروح نلعب حبايبي.. كانت طول الليل تتابعه بنظراتها له(طلعت مثلك مثل غيرك..كنت تبي تخطبني للمتعه !!مثلك مثل خالد ..انتم كذا يا عيال العز..كثرة المال خلتكم تشوفون الناس ادوات لتلبية رغباتكم).. / / / / كشك لعبة تصويب الهدف ريم بتحدي/طلال ابي تجيب لي هالدب الكبير هذاك طلال فهم قصدها/نطلع ونشتريلك واحد..مالي خلق العب.. ريم/ايه تعذر مابيك تشتري ابيك تكسبها لي سحاب وقفت عند الكشك وكانت لحالها وتدري ان طلال ما عرفها مدت التذكره/لو سمحت بلعب هاللعبه.. العامل"مصري"/اوكي حضرتك تفضلي البندقيه اهيه ريم/طلال شوف البنت احسن منك سحاب تنرفزها هالجمله ثبتت البندقيه وسمت بالله وبدأت وهي تتخيل طلال في كل شاره رمتها...وصوبت كل الاهداف/.. الكل حولها انبهر وصفق بقوه خصوصا انها بنت/كفووو طلال وكأن حركات هالبنت ذكرته بـ سحاب بس مو متأكد/.. ريم/روووعه سحاب اتجهة لريم ومدت واحد من الدببه عليها/هذي مني لك هديه ريم تحمست/مشكووره يا بطله سحاب/ولو طلال عرفها من الصوت وبريق عيونها،نبض قلبه بسرعه/.. سحاب التفتت على طلال وعينها بعينه وكأنها تستفسر عن شيء/عن اذنك ريم وهي مبهوره/حررريفه ،ماشاء الله عليها، طلال اكتفى بانه يناظرها مقفيه بشموخ بعدما فهم نظراتها،وتأكد انها هنا مع اخوانها...، [وبدأت تمطر السماء بشكل خفيييف] ولسان حال "طلال" [[ أدريَ وحشـتك لـو تكإبـر بصـدك و ٱدري خيآلي مآ يفآرق خيآلك وآدري ( حنينك ) صوبَ قلبيّ يحدّك حتى فَ بعآديَ مَ تركتـك لـ حآلك]] / / / / / #فلسفه**** عندما يكون من غير المسموح ان ترتبط بمن تحب..، فإن ذلك يزيدك ولعآ وعشقآ وتعلقآ به!!!! فتبآ لتلك العادات السقيمه التي جعلتنا ادوات تنفيذ لرغبات الاكبر سنآ..ليحددوا لنا من سنتزوج ومع من سنعيش بقية حياتنا.!!!!**** الساعه12~ طالعه سهام ومعها منال واخوها زيد بيوديها.. سهام/اسفه زيد خليتك تسهر وتوديني ترى كله من خالتي ومنال هههه زيد ببتسامه/هههه عادي احب ما على قلبي يا سهام،بنت جيراننا انتي منال/قضوها مجاملات ترى بردت بالشارع وبرق واصوات رعد والمطر يرش خفيف،بعد شوي بنتغررق وانتم هذرره زيد وسهام/هههههه بهالاثناء وقفت سياره بنتلي2013 زيد استغرب/بسم الله منال بانبهار/واااو وش ذالسياره الكشخه سهام خافت من حركات راكان لا يحرجها قدامهم/هذا راكان ولد عمي زيد عقد حواجبه.. منال مو مصدقه/بذمتتكك راكان نزل قزازة السياره وهو بقمة عصبيته وتكلم بنبرة إستعلاء وأمر/يا بنت..تعالي اركبي منال/كذا من الباب للطاقه مافيه سلام ولا شيء شدعوه مايعتبرنا بشر زيد/منال اصص سهام ماتبي تسوي مشاكل/اوكي زيد ومنال انا بروح مع ابن عمي مايبيني اعطلكم.. زيد شك في الوضع وهمس لها وهي ماشيه جنبه/سهام اذا فيه مشكله انتي تعرفين رقمي اوكي سهام التفتت عليه/تطمن مافي مشاكل. راكان رفع صوته/يللاااا وش تنتظرين انتي سهام جات وركبت وراء وسكرت الباب بقوه بدون سلام..، زيد حس بحرقه في صدره عليها/.... منال/والله صدق عيال عز...زيد وش نوع هالسياره. زيد تركها ومشى وهو معصب/.... منال رحمته/يا عززتي لك يا خوي... / / بالسياره~ راكان يسوق وهو معصصب/زعلانه انك ماركبتي مع زيد هاااه... سهام ماردت عليه/.... راكان ضرب بيده الدركسيون/حنيتي له،هااه منتي قادره تصبرين سهام ماتررد/... راكان انقهر من سكوتها/ليش ماتكلمين انتي هاااه!!! سهام رن جوالها وردت/هلا منال حبيبتي،كل شيء تمام لا تخافين تطمني وطمني زيد....باي اكلمك بعدين راكان وقف ونزل معصب ولف على وراء وفتح الباب عليها/انتي ليش سافهتني هاااه سهام خافت منه هالمره وابعدت عنه/انت شتبي مني بالضبط؟..ليش تصرخ علي؟! راكان وهو يقرب/وش بينك وبين زيد ولد جيرانكم هااه سهام/هذاك قلتها ولد جيراننا من وانا صغيره عشنا سوى وتربينا سوا وعارفين بعض وخاطبني بعد،بس انا رفضته، راكان جلس جنبها وبينهم مسافه كبيره وكأنه ارتاح/وليه رفضتيه؟! سهام لاحظته هدأ/احسه مثل اخوي،ماحسيت تجاهه غير احاسيس اخوه ، راكان بنص عين/اهااه يعني ببالك واحد ثاني سهام سكتت وصدت عنه.وش ترد عليه????، [بيني وبينكم صصعبه تقوله ”انت اللي كنت ومازلت ببالي”وهي توها تعرفهم] راكان استحى من حركته البايخه وطلع/سهام انا اسف،ضايقتك وجرحتك وانتي ماراددتيني بكلمه سهام بلعة ريقها ودمعتها تلمع/مشكور على الندم راكان ركب السياره ومشى بهدوء ووقف عند محل عصيرات ونزل/ثواني بس سهام تناظر فيه وهو نازل من السياره وتبسم”كله هيبه” زادت حبات المطر وصار غزيرر،، سهام خافت/الله يسترر شلون بنرجع البيت وهي تمطر بهالشكل..! رجع راكان ومعه كوبين عصير فرش/اححح بررررد من جد سهام/احسن راكان ببتسامه على صوتها/افاا بدت الشماته سهام/تستاهل حريتني ههههههههه راكان اوول مره يسمع صوت ضحكتها الساحره!!/اضحكي وش عليه سهام/هههه راكان نشف شعرك لا يصيبك برد راكان حب اسمه من فمها لف عليها ومد عليها كوب العصير/سمي يابنت عمي،هذا ستروبري فرش عربون اعتذار ولد عمك الدفش سهام اخذته منه وتمازحه/يعني ترشيني علشان ما افتن عليك هاه!! راكان/وش نسوي صاحبة الحلال،مانبي نخسرك طال عمرك سهام/ههههههههههههه راكان هبلته من صوت ضحكتها الساحره، اكتفى بسماعها.. / / / / بعدما تأكدت انها نومت اخوانها راحت سحاب لغرفتها وهي تحس باحباط العالم!! جلست على طرف سريرها وهي تحس باحاسيس مختلطه وحاسه نفسها مشتته..، حاولت تستلقي وتنام ..،ماقدرت وهي تحس قد ايش هي غبيه لأن طلال قدر يعرف شخصية صقر/يــآ الله.. / / يتبع |
#14
|
||
|
||
رد: رواية رواية سهام الأيام للكاتبة رشا
#السهم الرابع عشر.... <<<صدمة...أو..دمعة سحاب أميركا~ جالس راشد يذاكر وينادي/خلووووود جيبيلنا قهوه خلود/طييييب تركي مندمج ويطالع جواله،وشايف البنت اللي لقبها”الريم” ممنشنته[ اقعد معه في الناس مااقدر احاكيه اخشي لساني يختلف في مقوله . يغلي الحكي في خاطري ماقدر احكيه يصرخ بصدري قد طال طوله ] استغرب هالمنشن منها لانها كاتبه في البايو(كل ما اكتب لحبيبي فقط وممنوع الخاص) رد عليها بالمنشن[عديت الايام في فرقاك واشقني~~ وعنيت الاقدام من غره ليا غره~~ في كل يوم وانا فالدرب متعني ~~ واشوف بيتك ولا اقدر أمره~~ عن لذة الشوف ليت الصوت ياصلني~~ المشكله ماش لا عين ولا جره~] راشد شاف تركي سرحاان/ألوووه يا ولد وين روووحت تركي ابتسم له وسكر الجوال/ابد هنيا راشد/ههههه ياكذبك تركي/هههههه خلود جات ومعها القهوه/ضحكوني معكم وش عندكم راشد/هههه اخوتس بديره وحنا بديره وكششفته تركي/هههههه خلود تكفين فكيني من شر زوجك خلود/ههههه والله انكم مبزره اقول تقهووا وبسرعه ترى ابيكم تمشوني ترى حدي طفششانه،كلكم تطلعون وتروحون وانا مغير جالسه في ذا راشد ببتسامه/من عيوني افا عليك بس تركي نقز حواجبه/تامرين أمر خلود/عز الله ماطلعتوني راشد وتركي/هههههههه خلود/تركي يا بعد قلب أمي وابوي شرايك تتزوج وتجيب زوجتك علشان اتونس انا وياها تركي تلعثم/... راشد/اي والله،ليه ماتعرس يا ولد. تركي قام/انا عندي شغله مهمه في الجامعه عن اذنكم طلع وسكر الباب~ خلود/جامعه هالوقت!!! راشد/يصررفنا يابنت الحلال خلود باحباط/يوووه،شكل اخوي متعقد من الزواج راشد/والا يحب له وحده خلود/ياعمري ياخوووي، راشد/حبيب الاخ بس بعرف من يحب ومجننته / / / / / / السعوديه; ندى في زياره لاهلها بعد سفره قصيره... ام راكان وهي لاويه بوزها/ووين المحروس زوجك ماجاء يسلم،والا شايف نفسه ولد منيره ندى انحرجت خصوصا ان سهام موجوده/مشغول يمه ام راكان/اي هين مشغول سهام تبي تغير هالجو/حيالله ندوووش شتشربين؟؟ ندى ببتسامه/اي شيء فديتك سهام قامت/اجل اسويلك فرش جوس ام راكان بنص عين/مسويه فيها ذربه هاااه سهام ببتسامه/ولك كاس عصير بعد انتي يا خالتي ام راكان رفعت صوتها/انا مابي منك شيء ولا تناديني خالتي ثاني مره ترى رفعتي ضغطي ندى/يمااااه وش هالكلام سهام ببتسامه/عاادي يا ندوش تعودت،يلا انا رايحه المطبخ ام راكان عصبت/شقصدك هااه..قصدك اني ماعلي شرهه هاااه ندى/يمه اذكري الله سهام/اروح المطبخ ازين لي.. راحت سهام... ام راكان/روحه بلا رجعه ياقليلة الادب ندى/يمااه ترى ما قالت فيك شيء غلط،علامك على البنت ام راكان/انتم مخدوعين بهالبنت..لكن بيجي اليوم اللي تنكشف فيه قدامكم ندى قامت وراحت/طول عمرك عكس الناس وتبين كل شيء يصير مثلما تبينه ام راكان/اقوول اصص يالخبله عالاقل زوجي يقدرني ورازني عند اهلي والناس موب حاقرني ندى ألتفتت على امها مقهوره والدمعه بعينها ومشت لانها تقصدها...، / / / / بالمطبخ ~ واقفه سهام وتقطع الفواكه و تسوي العصير..متناسيه كل كلام أم راكان..! ندى دخلت وجلست على كرسي وتكت بيديها على الطاوله وتحاول تتناسى كلام امها/شكلك وانتي تشتغلين بالمطبخ يقول ماهره في الطبخ سهام تقطع بمهاره/والله تقدرين تقولين كذا،او يمكن لاني اطبخ من وانا صغيره..تعودت يعني ندى استغربت/من وانتي صغيره!! سهام ببتسامه/ايوه من وانا صغيره كنت ادخل مع أمي الله يرحمها المطبخ واطلبها تعلمني وهي ماقصرت ..يعني مثلك عارفه عشنا انا وياها لوحدنا سنوات وكانت تعلمني كل شيء بالمطبخ والبيت وبعدها بشوي صرت ما اخليها تطبخ وصرت انا اطبخ بدالها وكانت مبسوطه الله يرحمها ندى ابتسمت/الله يرحمها،مبين كانت طيبه من تربيتك سهام ابتسمت بعيون لامعه وهي تجهز الاكواب وتصب العصير/شرايك كل وحده تاخذ كاس العصير حقها ونطلع نتمشى بالحوش نسولف زي بنات العم ونتعرف على بعض اكثر ندى/ههههه يلا موافقه سهام/هههه وناسه يلا / / / / / / بالليل~ راكان مع خوياه بالاستراحه حقتهم..وطقت ورق ولعب واللي ماسك لاب توبه واللي بلايستيشن واللي يتابع قنوات الرياضه...جوهم وناسه..، راكان مد الورقه/صكينا عليكم هههههههاااي احمد خوي راكان باللعبه/كفك يابو سعد ههههههههه عبد العزيز خويهم/العبره في النهايه راكان/اي هين ههههههههه عبدالعزيز/العب العب بس راكان/هههه اللحين بخليك تتوب ماتلعب ورقه.هههه احمد رن جواله وشافه وكلم/..ومايدري وش يلعب وخسرهم.. راكان عصصب/احمممممددد علامك عبدالعزيز قام يرقص مع خويه سالم/غلبناااهم غلبناااهم ههههههه راكان/قطع الله ذالوجه...كذا فرحتهم عبدالعزيز/هههههههههههههااااااي اجل تبي تخليني اكره الورقه هااه اقوول اعتزززلوووا بس اعتزلوا هههههه احمد وهو يهدي راكان/اسف..بس زوجتي كانت تكلمني واحد من الصغار فيه حراره وارتبكت وماركزت..عن أذنكم يا عيال راكان/الله معك وطمنا .. احمد وهو طالع/طيب....يلا تصبحون على خير شباب. قاموا الشباب اغلبيتهم متزوجين وطلعوا لبيوتهم..! راكان شاف عبدالعزيز جالس/غريبه مارحت للبيت هههه عبدالعزيز/ههههه ناسي اني تووني جايني مولود يعني زوجتي تعبانه و عند اهلها يالذكي راكان/اييييه صح تذكرت.. عبدالعزيز ببتسامه/الحمدلله انك تذكرت... راكان/ههههههه عبدالعزيز/متى زواجك راكان تردد/مادري....ماحددته عبدالعزيز/متى ناوي تحدده راكان/والله يابوسعود مالي بهالزواج... عبدالعزيز/افاا ليه!! راكان سكت...،وده يفضفض بس صعبه..مع أن عبدالعزيز صديقه المقررب!! عبدالعزيز ببتسامه/دامك منت متحمس لهالزواج على قولتك...ببالك وحده ثانيه صحح؟ راكان تلعثم/هااه..من قال؟..لـ.. عبدالعزيز فااهم راكان عددل،قاطعه/من هي بس؟؟ راكان بلع ريقه ووقف على حيله بيمشي،حس بدوخه/انا نعست وبنام عن اذنك عبدالعزيز،مسك يده/اذا كنت تبي وحده غير اللي خطبوها لك تكلم، راكان اللي انت خاطبها بنت عمك يعني صععبه تفصخ الخطبه.الوضع حساس..راح يتفرقون عايلتكم وانت السبب.. راكان،عطاه نظره ناريه ومشى وتركه.... طلع راكان وركب سيارته ومشى مسرع لبيته... عبدالعزيز طلع وركب سيارته وباله مشغول على راكان/ياخوفي لا يكون تولع ببنت عمه الجديده اللي جابها البيت!!. / / / سهام وصلت ندى للباب وودعتها وهي رايحه لبيتها...ارتااحوا لبعض وكأنهم يعرفون بعض من زمان..، سهام شافت الملحق شكله يفتح النفس وتصميمه خيالي..وراحت تستكشفه..فرصتها محد صاحي غيرها.. ودخلت وقامت تفرج ومبهووره بالملحق تصميم مجلس شبابي مودرن ازرق ملكي على ابيض ناصع..وشاشة عرض بلازما كبيره! انبهررت وشغلت التلفزيون وراحت تشوف رفوف السيديات وتتفرج عليه/شكله ثري دي. سمعت صوت سياره وخافت/من جاي هالوقت....!! الكل موجود ونايم!! خلني اشوف من الشباك بعدما طلت خاافت/راكاان.هذي سياره غير البنتلي وانا علبالي انه نايم يوووه..خلني اطفي النور لا ينتبه لي. نزل راكان واتجه للمجلس بعدما حس بالشك..، دخل راكان الملحق وأضاء الانوار وتلفت/غريبه...كأني شفت زول احد هنا.....شكلي اتخيل.. جاء بيطلع..وانتبه لصوت حركه وراء الدولاب..واتجه له بسكات/من هنااا؟؟؟!!!! سهام رفعت طرحتها وتلثمت وطلعت قبل لا يجيها/أناا راكان تفاجأ/سهام!! سهام/ايه سهام وش فيك راكان ببتسامه/وليش طفيتي النور اول ما شفتيني جيت سهام ببراءه وهي منحررجه/مادري..مابيك تدخل وتشوفني،،بس كشفتني.. راكان/اهاا وش كنتي تسوين هنا؟!. سهام تتنرفز من اسلوب اسئلته/انت تحقق معي؟!!!...عاادي فااضيه وجايه اتفرج بالملحق..فيها شيء!! راكان/لا مافيها شيء..خذي راحتك.. قرر راكان يطلع...مع ان قلبه معها/يلا تصبحين ع خير سهام/وانت من هله.. راكان كان يحس بدوخه وعدم تركيز..!! سهام/راكان فيك شيء!! راكان أأشر بيده/لا لا سهام/بس شكلك فيك دوخه راكان/لاا..مافيني الا العافيه..بس ابي انام عن اذنك..، سهام شكت بوضعه/اخذ لك حبتين تمر قبل تنام شكل عندك انخفاض سكر.. راكان وقف والتفت عليها/شدراك؟ سهام/عليك الاعراض الاوليه لانخفاض السكر... راكان/ووش عرفك باعراضه سهام/قريت عنه...يا حضرة المحقق راكان ابتسم/اووكي لاتطولين برا ترى برد... راح راكان وتركها...، سهام وقفت تناظر فيه وهو مقفي،وتبسم وساكته وتأشر على راسها(شيليه من هنا يا سهام لا تفكرين حتى مجرد التفكير بزوج بنت عمك) / / / / / / في الحاره... عزوز يلعب كوره مع عيال الحي.. ومجود جالس عند الباب ويتفرج... جاءت سياره ددسن 2009 متهووره وانتم تعرفون راعيها..ايووه هو”أبو حبتين” حاس لعبهم وكان بيدعسهم.. العيال صرخوا عليه/ عبود صديق عزوز/ياكلب ماتشوف بغيت تدعسنا بو حبتين وهو يكلم خويه/اححللى الورعان يعرفون يتكلمون هههههه عزوز عصصب/ماورع الا انت يالكمخه بو حبتين مسوي نفسه ماسمع/منهو الكمخه عزوز بثقه/انت...وش في راسك؟ بو حبتين نزل من السياره واتجه له/انت تكلمني يا ورع عزوز/اقول انقلع ازين لك بوحبتين/يا عيااال..اللي اخته تطلع مع الرجال ويخلي الرجال يدخلون على اخته..وش رايكم فيه؟ رخمه الكل/هههههههههه عزوز غلي دمه واخذ اقرب حجر ورماه على جبهته، وهرب بوحبتين لحقه ، مجود دخل ينادي سحاب بسرعه...وجاءت ومعها ذيك العصى الضخمه وطلعت..وتفاجأت بعزوز جاي ركض/سحااب ادخلي سحاب دخلت اخوها وطلعت وشافت بوحبتين واقف/اطلع يالرخمه سحاب ناظرته بقرف/نعم نعم وش هالزباله اللي عند بابنا.. بوحبتين/اقووول يالواطيه خلي اخوك يطلع لي سحاب عصبت/انا بنت ابوي...هالكلام هذا لي أنا؟!! بو حبتين بتحدي/ايه لك انتي...وش في راسك يا حلوه؟! سحاب وهي تتحين الفرصه المناسبه/أنا مافي راسي شيء بس انت اللي في راسك حبتين للحين ما انطحنوا زين...وانا اللي بطحنهم لك..... وقربت منه وبدأت بضربه/اجل انا واطيه...ياحثالة المجتمع..يا عاله على اهلك... العيال يضحكون عليه... بوحبتين حاول يهرب وقدر/هييين انا مارديت لانك حرمه سحاب وهي تضحك/لا والله فيك مروه..اقول انقلع بس،و لا عاد تحط مراجلك على بزران...يلا انتوا وياه انقلعوا......واللي يقرب من اخوان سحاب بيشوف الويل دخلت وسكرت الباب.. / عزوز جالس بغرفته ومقهور من كلام عيال الحاره بحق اخته/.. سحاب دخلت وهي عاقده حواجبها وجلست قباله/شصار يا عزوز...ماقلتلك لا تسوي مشاكل بالحاره عزوز ما طالع فيها وما رد/... سحاب/عزوز شفيك صاد بوجهك عني؟! عزوز مارد عليها/..... سحاب مسحت على راسه وباسته- وقامت تبي تطلع..ووصلت للباب.. عزوز والعبره تخنقه/معاد لي وجه اطلع و اواجه اصدقاي..اهل الحاره يقولون عنك واطيه وتطلعين مع رجال....فشلتيني سحاب كانت مقفيه،ووقفت وحست رجلينها تنشل وما عاد تشيلها..،بلحظه انعقد لسانها وفقدت القدره على الكلام وامتلت عيونها بالدموع...، عزوز قام وطلع من الغرفه وتركها وهو معصب/...... سحاب طاحت مكانها وهي محبطه وتبكي بدون صوت..، مجود جاء وشافها تبكي واتجه لها وضمها وهي جالسه على الارض/سحاب انا احبك لا تبكين انتي كبيره... سحاب ضمته بقوه وبكت اكثر/... مجود بكى معها......، / / / / / / / وبأحدى الليالي.. رجع بجاد من العمل لقى كل شيء رااايق ومررتب..كالعاده..طاولة عشاء من اللي يحب ..جاء وجلس ومد يده واكل.. ندى اقبلت من المطبخ وبيدها صحن الحلى/مساء الحب حبيبي بجاد وهو ياكل/هلا .. ندى انقهررت من اسلوبه،على كثر ماتسويله وتعلمه وش تحب ولا يهتممم،ولابسه فستان وحاطه ميك اب... وشموع وكيكه ..عليها شموع!! جلست وهي مقهوره،حاولت تلمح/حبيبي بجاد/ايوه ندى،تغلي من داخلها(مايهون عليه يقول كلمه حلووه على كثر ما علمته ودلعته!!)/حبيبي كم التاريخ اليوم!! بجاد وهو ياكل/9 ليش وش عندك ندى،انقهررت،هذا وهي مبلغته بموعد عيد ميلادها!!/عيد ميلادي اليوم بجاد/صدق والله..وانا اقول وش هالهدايا اللي في الصاله اول مادخلت.. ندى/صديقاتي وبنات عمي كانوا عندي العصر واحتفلوا معي...علبالهم انك بتعزمني بالليل..!! بجاد بلا مبالاة/هههههه حركات كفااار، ندى بحرقه/حركات كفار!!!!!! وليش ما رفضت هديتي لك بعيدميلادك،ليش تقبل دعوتي بفندق الفور سيزون يومين احتفال بك..!!..والا انت مايهمك الا نفسك! بجاد/هههههه يابنت الحلال لا تتابعين مسلسلات واجد بس.. ندى/اللحين احاول ادلعك واعبرلك عن حبي باهتمامي فيك..وانت تضحك بلا مبالاة...حتى كلمة شكر مافيه..ياخي حتى ابتسامة رضا مافيه،زياراتك لأهلي معدوومه..وتطالبني ما اقاطع أهلك مع ان امك وابوك اللي انا ملزومه فيهم متوفين ولا ني ملزومه في غيرهم بس اروح لخالاتك علشانك. ولا القى أي تقدير.. بجاد،شبع من الاكل واكل حلى وقام/الحمدلله.. قام وراح لغرفته ينام..، ندى جلست تبكي بقهرها ونادت الشغاله تلم العشاء...، اتجه بجاد لجناحهم وبدل ملابسه و ولقى روب الاستحمام حقه جاهز..والحمام وكل شيء والغرفه تفتح النفس كالعاده وهالمره مغيره المفرش وحاطه عليه باقه كبيرره ورد جوري احمر طبيعي..متعود على حركات ندى! تروش وطلع يتنشف وشاف ندى داخله بلانجري حلو وجديييد ومغري،.. ندى مقهووره منه بس ماتقدر تهمله ولا تجرحه لأنها ببساطه تحبه،جلست على طرف السرير تنتظر منه كلمة اطراء والا شكر،لكن مافيه..رمت نفسها ع السرير وقررت تنام، بجاد استاانس عليها..وقررب منها.......،،،، / / // / / / / / اليوم الثاني بالمركز~ سهام جالسه ع المكتب/ايوه ياندوش اسمعك،ايش صايرلك..... ندى بالجوال/سهاام حبيبتي ابيك ضروري انا متضايقه حيل سهام/طيب تعالي البيت انا بطلع بعد نص ساعه ندى/لا لا أبيك حالا في اي مكان ثاني.. سهام/اوكي حددي المكان واجيك ندى/بمرك مع سايق اهلي اتصلت عليه سهام/ززين انتظرك باي جلست سهام(غريبه شعندها ندى؟!!) دخلت نوره وشافتها مسررحه/سهااام وين وصلتي سهام/هنا ياعمه.. نوره/من كان يكلمك..كنتي متحمسه شوي سهام/هذي ندوش بنت عمو تبيني ضروري،وقالت بتمرني ونروح كافيه وكذا اذا ما عندك مانع يا عمتي نوره ببتسامه/لا طبعا ماعندي ماانع سهام باسة عمتها على راسها/تسلمين نوره/حبيبتي انتي..سلمي على ندوش سهام وهي طالعه/يوصل فمان الله نوره/فمان الكريم / / / / في المؤسسه~ مكتب راكان خالد وهو متردد/راكان راكان وهو مشغول بالكمبيوتر/نعم خالد/انت شقايل لبتال راكان وهو مشغول بالكمبيوتر/يعني ماتعرف؟! خالد/شالسالفه..لا ماعرف راكان التفت عليه/بالله ماتعرف ان بنت عمك محمد ظهرت خالد بلع ريقه/وشوو راكان/اي نعم لقيتها ورجعتها للبيت..معززه مكرمه،وبما ان نص هالثروه ملك لابوها فهي تعود لها لأنها الوريثه الوحيده له... خالد/شلون لقيتها وليه تاخذ كل شيء بكل برود راكان استغرب رده/شقى ابوها اللي انت اللحين عايش بنعيمه..لا تنسى لو ان الدعوه موقفه على ابوك كان انت مفلس من زمان خالد عصب/راكان انت تهيني راكان/حشى...انا بس اذكرك...خلك رجال وخل عنك هالخرابيط خالد مسوي هادي وقبل بالوضع/طيب..طيب تامر على شيء راكان/لا ..روح لشغلك. خالد طلع وهو معصب (اللي خفت منه صار يا خالد...اورريك يا سهام) / / / [[أنتهى الجزء الأول من (سهام الأيام)]] مرت الايام وكل من هالابطال عايش حياته.... همومه وطموحه وتفكيره....وامنياته... سهام وحياتها الجديده.... سحاب ...وترددها الدايم وتعصبها لافكارها ...! ندى الزوجه المهتمه بزوجها وبجاد الزوج البارد...؟!!! طلال الملتزم جدآ يبدو لي فقد الامل وعاش روتين حياته..بعد اختفاء شخصية صقر ورفض سحاب له !! ريم وتركي<<<الحب المقتول قبل ولادته راكان الشاب البار بوالديه واللي يسمع كلامهم..وينفذ باحترام..رغم ميلانه للوافده الجديده في منزل العايله"سهام"<لكن لا يفصح عن مشاعره ابد ساره البريــئه...وخبث زوجها ”خالد” ...وتلك الدخيله”حور” وماسيحدث.. عزام وسديم والحرب المنتظره؟!!!!!!!! كلها احداث ستعرفونها بالجزء الثاااني من الـــروايه...... /////////////////////////// |
#15
|
||
|
||
رد: رواية رواية سهام الأيام للكاتبة رشا
رواية سهام الأيام €€€الجزء الثاني€€€. مجريات الاحداث لا تنتهي وهناك حكايات قد بدأناها،و لابد لها من نهايه إما سعيده او بائسه... #السهم الخامس عشر.. <<<<<<<< / ندى بنت عمي اللي حسيتها طيوبه وعلى نياتها..احساسي طلع بمحله..وهي بنت بسيطه وبريئه..تحاول جاهده تكون زوجه مثاليه وبنفس الوقت تدور على الحب اللي كلنا ندور عليه..حاولت بحكمتي البسيطه وهنا ما امدح نفسي بس للأمانه أنا بالنسبه لندوش طلعت ^حكيمه^ وبساعدها والله يقدرني اخلي عايلة عمو سعد مترابطه لأن بصراحه احبه..هو وألطف أعمامي "ابو طلال"..اللي ما ينسمع عنه الا كل شيء طيب..لذلك ترابط هالعايلتين يهمني.. #الأحداث السرديه" في الكافيه~ ندى بتوتر/تعبت يا سهام تعبت منه... سهام/من خلال كلامك واللي شفته بنفسي ببيتك ان المشكله سببها انتي ندى استغربت/انا!!!..حرام عليك انا سهام قاطعتها/حبيبتي اسمعيني للاخير بدون مقاطعه،انتي بالغتي باهتمامك في زوجك لدرجة انه يزعلك وانتي تراضينه!!!..عمررك ماعبرتي له انك زعلانه،عمرك مابينتي له الامور اللي تزعجك منه..دااايم تراعين مشاعره وناااسيه مشاعرك،ترى الانسان اذا ما احترم نفسه محد بيحترمه...انتي لك حقوق مثلما له حقوق..لا تصيرين سلبيه بحق نفسك ندى فهمت/طيب والحل سهام ببتسامه/الحل بسسييط بس يبي عزيمه منك ندى/العزيمه موجوده انا مليت من تهميش بجاد لي.. بس وشو الحل سهام/حبي نفسك،طوري من نفسك ادخلي دورات لغه او تطوير ذات او اي دوره..ثاني شيء غيري ستايلك في اللبس وخليك جريئه شوي ندى تسمع ومستغربه/... سهام بحماس/من اليوم وطالع كل شيء كنتي تسوينه لعيون بجاد لا تسوووينه..عطيه مثلما يعطيك... ندى بتردد/بس سهام/بدوون بسبسه،والكلام الزايد مابيه ،اسئلتك الدائمه عن احواله اذا جاء من العمل انسيها،كلمة احبك واشتقتلك انسيها،اهتمامك به انسيه،خلي الشغاله تجهزله الفطور بدالك لا تقومين علشانه ولاتسولفين وتضحكين معه مثل قبل،خليك رسميه واحقريه بنفس طريقته وخليه يحس انك غاامضه،والاهم خليك واااثقه من نفسك،وانا اوعدك انه بينجن عليك وبيقعد يتساءل ليش تغيرتي، بس احقريه لا تكثرين معه حكي،خليه يحس بالفرق ندى تفكر بكلام سهام/انا موافقه اسوي مثلما قلتي،لازم يحس بجاد فيني لازم سهام ببتسامه/حلو،،اجل تعالي اول شيء اغير لوكك نقص شعرك ونشتريلك كم بدله ندى/يلا مشينا...، / / / بالليل راجعه سهام من برا،شافت عمها جالس وراحت له/مساء الخير عمو بو راكان ببتسامه عريضه/مسااااء النووور والسروور،هلا ببنتي سهام سهام حبت على راسه وجلست جنبه/شلونك عمو..ماشفتك البارح واليوم بو راكان/اي والله البارح رحت الطبيب علشان ظهري ووصف لي دواء جديد..وراكان مالقاه..وسأل عنه لقاه بالدمام وسافر يجيبه سهام/راكان سافر لحاله يجيبه بو راكان/ههههه ايه لحاله.اجل تحسبينه بزر ترى عمره32سنه سهام ابتسمت/الله يرده بالسلامه بو راكان/اميين..يله وانا عمك بروح انام دااايخ تصبحين على خير سهام/وانت من هله عمو.. جلست سهام شوي تتفرج ع التلفزيون... وقامت واتجهت لجناح عمتها نوره... راكان دخل مستعجل وينادي/يمااااه سهام مابعد تطلع رجعت مستعجله/اشششش قصر صوووتك العالم نايمين راكان/انا جايب دواء ابوي ولازم ياخذه سهام/ادرري..بس تووه داخل ويقول انه داايخ المسكين بينام،ناظر ساعتك بالله كم،داخل على العالم تصرخ راكان ناظر ساعته/اي والله..حتى انا دايخ وبنام..تعبت من السياره سهام ناظرته بنص عين وتبسم/تعبت من السياره.!!!.صدق انك شاايب، هههههه الله يعينك ياريم هههه راكان خزها/لا والله..شاايب!..مشكووره يا بنت عمي لي ثلاث ايام مانمت علشان كذا تعبان سهام وهي ماشيه عطته نظرة شماته ماازحه/ششااايب ههههه راكان/بنت تعااالي وين رايحه اكلمك سهام وهي طالعه التفتت عليه/مالك دخل يالشاايب هههه راكان ابتسم على تصرفاتها وراح لغرفته..، / / / الساعه وحده،.. وبحزم وجديّه قررت "ندى" انها تطبق خطة سهام..وبدأت من الليله.... ندى مستلقيه على سريرها لابسه بجامه قطنيه وتنتظر بجاد.،وتناظر الساعه/كالعااده الباشا متأخر،ولا يتصل يتعذر هيين.. فتح الباب ودخل ولقى هدوووء/يا ندى..ندى دخل بجاد وهو مستغررب لانه ماشافها تنتظره في الصاله كالعاده..، اتجه للغرفه،..وفتحها/ندى ندى سوت نفسها ناااايمه/... بجاد قررب منها وهزها/ندى ندى ألتفتت عليه بكسل/يوووه..شتبي بجااد بجاد/انتي تعبانه ندى/اف..مصحيني من احلى نومه علشان تسأل هالسؤال،مافيني شي بس خلني اكمل نومي.. بجاد استغررب اسلوبها/اوكي اوكي نامي ندى سحبت الغطاء ونامت..وهي مبسوطه..، بجاد راح ونزل ملابس وبدلها ورجع للسرير ونام وهو يقول بخاطره اكيد انها تعبانه!! / / / "بيت بو طلال" رن جوالها~وهي سهرانه على تويتر كعادتها..، استغربت ريم لأن الرقم دولي ومفتاح اميركا بعد لان اخوها راشد هناك وعارفه هالشيء بس ردت/ألوه.. تركي ع الخط/صباح الخير ريم استااانست بالصوت/صباح النور، تركي/كيفك ريم ريم قلبها بيطير..أستقعدت وهي تلفت خايفه احد يشوفها/تمام وانت كيفك تركي في خاطره يقول(ماني بخير)،تنهد/بخير.. ريم حاسه انه وراه شيء/تركي راشد وخلود فيهم شيء؟! تركي/لا تطمني مافيهم شيء بس انا دقيت على أمي وردت علي بس حاس انها تعبانه وتخبي علي،ماني متطمن، ريم/تطمن يا تركي الوالده بخير ،بكره احنا رايحين لهم وبطمنك تركي/مشكوره يا ريم ريم/شدعوه، تركي/آسف اني دقيت وازعجتك، ريم بسعاده/خذ راحتك واتصل وقت ماتبي تركي/اوكي يلا تصبحين ع خير ريم/ وانت من اهله سكرت الخط وهي مصدومه من نفسها وشهقت/جالسه اقوله خذ راتك ودقت ماتبي...ريم هذي مغازله عيني عينك..شفيني هبله ما امسك نفسي شووي لا سمعت صوته„آآآه شبيقول عني هاللحين؟!!.. / / / / / تركي استرخى على كرسيه وهو يتنفس بعمق(ياحلو بحة الصوت يا ريم).. (أأأخ منك يا تركي شلون طرى عليك وقدرت تدق عليها يامجرم ههه). / / / / بعد يومين ع الاحداث السابقه~ ع الفطور..، سحاب وبالها مشغول/مجود..وين عزوز مجود/طلع برا سحاب بحرقه/شلون يطلع هالوقت ولا افطر مجود/يقول بيفطر مع عبود في الكافتيريا سحاب/بعد معاد يبي الاكل اللي اسويه!! مجود/هااه سحاب مسكت جوالها/اقول كمل فطورك يا حبيبي مجود/سحاب وين سهام سحاب وهي تقلب الأرقام بجوالها بملل/عند اهلها مجود/خلينا نروح لها سحاب اعجبتها الفكره/تصددق انها فكره.بس شلون مجود/ع السياره سحاب وهي تتذكر كلام عزوز لها/لا لا..سياره ماعادني سايقه سياره ابدآ. مجود/خلينا نروح اللحين سحاب/هههههههه خف علينا تبينانروح للناس هالوقت علبالك سهام مثل اول ساكنه لحالها هههههه...اص خلني ادق واشوف وين ساكنه خلنا نزورها..وبالمره نغير جو.. مجود استانس/وناااسساااا / / / / #بعد العصر~ طالعه سهام من غرفتها ومتجهه لغرفة عمتها/عمتي نوره كانت تتجهز/هلا سهام سهام ببتسامه/الله الله وش هالكشخه نوره/صدق؟ سهام/تهبليين،على وين رايحه نوره/قهوه عند رفيقتي ام عبدالكريم. كان ودي اخذك..بس القعده كلها عجايز و بتزهقين ههههههه سهام/لا انا بتجيني سحاب بعد شوي نوره/ هذيك البنت اللي كلمتيني عنها... سهام/ايووه هي نوره/حساافه كان ودي اقابلها سهام/لا تخافين ان شااء الله بتشوفينها وكثيير بعد.. نوره وهي تاخذ عبايتها/ان شاء الله..يلا يا بنتي مع السلامه سهام/مع السلامه.. طلعت سهام واخذت (الطرحه)تبي تروح للمطبخ..، وعند مدخل الجناح صدمت فيه/آآآه راكان مسوي ماكان قاصد/اسسف ماشفتك.. سهام وهي ماسكه كتفها/انتبه ثاني مره،بعدين وش جابك هنا راكان/كنت ابي اشوف عمتي سهام/شدعووه ماشفتها وهي توها طالعه راكان تلفت يعنني ماشفتها/.صدق طلعت؟..تصدقين ماشفتها سهام فهمت انه مستقصد..وهي تتأمل حركات وطريقة كلامه اللي تعجبها وتصد بعينها عنه/اوكي حصل خير عن اذنك، راكان/سهام لحظه سهام تنهدت وهي تقول بخاطرها(بليييززز يا راكان)التفتت عليه/نعم راكان قرب ومسك طرف شعرها من اسفل وسحب منه خيوط متعلقه فيه بفعل الجاذبيه ومده عليها/هذي كانت بشعرك سهام عصبت بس مابينت/مشكور.. راكان ببتسامه/عن اذنك سهام وهي تحاول تسيطر على نفسها/راكاان..لحظه بس راكان وقف ورجع لها/سمي سهام وهي تخزه/انتظر هنا شوي ...ابي اعطيك شيء راكان وقف وهو متكتف وينتظر بشغف/امررك..انا منتظر.. دخلت سهام واتجهت بدون تفكير للشوفنيرا واخذت منها مقص..وطلعت بدون تفكير... واتجهت لراكان اللي مستغرب/بتعطيني مقص؟ سهام وقفت قباله واخذت طرف شعرها اللي مسكه راكان وقصته وهو يطالع وتقدمت له/افتح يدك بسررعه راكان بصدمه/سهام انتي انهبلتي ليش سهام قاطعته وسحبت يده وحطت شعرها فيها/حلفت لأمي لو لمس طرف شعري رجال من دون رضاي ولا حق...لا اقصه وارميه بوجهه...ووفيت لها بوعدي..ثاني مره لا تتمادى وتسوي فيها تمون، فااهم طلعت واتجهت للطبخ..، راكان مو مصدق ماقدر يرد وطلع متجه للبيت/.... رن جواله وهو ماشي ورد/هلا طلال....ايه بالبيت..حياك..انتظرك انا والوالد.. / / عند بوابة الفيلا...وقفت سيارة الليموزين ونزلت منها سحاب ومعها مجود.... بهاللحظات...، وصل طلال وانتبه لمجود واخته وماصدق(سحااب هنا)..!!! دخلت سحاب وهي متجهه للجناح الخلفي للفيلا حسب توصيف سهام بس في مسافه(وش هالبيت...وانا علبالي بيتنا كبير ههههه والله اني على نيااتي هههه) مجود التفت على صوت السياره اللي دخلت ماصدق/طــلآل سحاب التفتت وشافته وخافت/مجوود اص لا تفضحنا طلال نزل بابتسامه ونزل نظارته الشمسيه،وأشر لمجود/ مجود فك يد سحاب و اتجه له ركض/طـــلال سحاب وقفت متردده بين انها تدخل او تنتظر مجود(عز الله انفضحت...الله يصلحك يا مجود) قررت تدخل وتخليهم..، , طلال شال مجود وعينه على سحاب من بعيييد وهي مقفيه/هلا مجود هلا باخو المتغليه مجود مافهم/طلال ليش ماعاد تجينا طلال/كنت مشغول يا عسول...الا وين عزوز مجود/عزوز في البيت طلال/ليش ماجاء معكم مجود/عزوز مزعل سحاب ومايكلمها..وهذاك اليووم خلاها تبكي بعد طلال استغرررب/معقوله؟؟؟ سحاب تبكي من عزوز!!!...ماصدق. مجود اخذ نظارة طلال/باخذ هذي يا طلال ههههه طلال/فداك...يلا روح الحق اختك مجود وهو يلبس نظارت طلال/بااي طلال طلال/باي... دخل وهو مبسووط،بمجرد وجوده معها بنفس المكان يريحه..، / / / / سهام طلعت عند باب الجناح الخارجي وتنتظر لان سحاب طلبت منها تطلع لها/هلا وغلا سحاب/السلام عليكم سهام/وعليكم السلام والرحمه والاكرام..هلا بالسحاب سحاب/هههه هلابك سهام/تفضلي حياك...وين اخوانك سحاب/مجود وقف يسلم على طلال برا....الا تعالي بسألك سهام،مستغربه/انااللي بسألك لا يكون طلالك هو نفسه طلال ولد عمي؟! سحاب،متفاجأه/طلال اللي واجهته ببيتكم هو نفسه طلال اللي اعرفه! سهام/هههههههه سحاب جلست/غرررريبه..!!ماصدق انه من عيال عمك سهام خزتها/وليش حياااتي؟! سحاب وهي تتذكر طلال/سهام انتي ماتعرفين طلال مثلما عرفته انا...طلال شهم نبيل كريم...وراعي فزعات وملتزززم،يعني عكس خويلد والباقين سهام ابتسمت/كلامك صحيح،اصلن شباب العايله كلها كوم وطلال وراكان كوم ثاني، سحاب ابتسمت لها ونغزتها/اجل طلعتي بنت عمه؟هااه! سهام/هههههه لا يروح فكرك بعيد ماراح اقرب منه ابدددآ سحاب مصطنعه اللامبالاة/اصلن طلال مايهمني ابدآ...ولو ابيه وافقت على عرضه للزواج سهام شهقت/خطططببكك!!!؟؟!!!! وليه ماقلتيلي وكيف ومتى ووين و.... سحاب/حيلك حيلك انا جاااايه افضفضلك كل شيء من طقطق لسلام عليكم بس شوي شوي بالاسئله سهام بحماس/اجل انتظري لحظه اجيب القهوه والحلى ونضبط امورنا ونسولف سحاب/اوووكي طلعت سهام وتركتها في غرفتها...، شوي ودخلت خادمه ومعها مجود/مدام ذس از يور بيبي مجود جاء وجلس بحضنها... سحاب،ضمته/هلا بماي بيبي هههه..وش معك مجوودي مجود/نظارات طلال اخذتها منه سحاب اخذتها منه وتتأملها/مجود ليش كذا حبيبي،مايصلح مجود ببراءه/عادي برجعها له اذا جانا بالبيت.. سحاب وهي تمسح على راسه/الله يصلحك يا مجودي. وصلها مسج واتساب على جوالها وفتحته لقتها من طلال وقرأته [[لك الله يالوليف ان الغياب اللي بلا تبرير،، طعني طعنتين وذقت من لفحة زمهريره.. علامك كل ماقلت اللقاء اتقول على خير وانا صابر على قول المثل ياعلها خيره]] سحاب تنهدت وهي تتخيل طلال(ليش ما تخليني بحالي يا طلال..خليني اكلمه لين تجي سهام).. سحاب ردت عليه; [شوف...ترى ..ماكنت ادري انك تكون ولد عم صديقتي سهام] طلال; [آجل يازينها صدفه...] سحاب; [اوكي،سلام] طلال; [أنتي ليش تتهربين مني؟!] سحاب; [انا ما اتهرب....طلال طبيعي اني ما اكلمك،مابينا اي شيء،واللي اعرفه انك انسان ملتزم،شلون تطلب مني ما اتحاشاك] طلال; [لأني ملتزم،انا طلبت اتزوجك من البدايه،رفضك غير مبرر،وعندي امل ] سحاب; [اوكي سلام....لازم اسكر الواتساب حاليا] طلال; [سلام] / / / / في مجلس الرجال... راكان لاحظ "طلال" مشغول بالجوال/وش عندك بالجواال طلال انهى محادثته وسكر الجوال/ولا شيء. راكان مد عليه فنجان القهوه/تقهوى.،وعلمنا وش علومك طلال اخذ الفنجان ببتسامه/علومي تسرك، بو راكان/اقول يا طلال وين ابوك معاد شفناه طلال/انت خابر عافيته ماعاد تسمح..،بس لا تخاف بيزورك قريب. بو راكان/زين..اجل وين خالد وعزام وبجاد..ماشوفهم راكان/هذاك اليوم فالشركه،خالد أول مادري اننا اعطينا سهام حصتها كأنه زعل وعصب وماكان راضي طلال استغرب/اما عااد...ليه؟ راكان/مادري عنه بو راكان/ماعليك منه مابيده شيء..خويلد نفس ابوه مايختلفون عن بعض...الله يهديه بس / / / / اليوم الثاني~ ام راشد/شووف يابو راشد.. بوراشد/شفيك ام راشد/ريم جالها خطاب..وانا اشوف انه مناسب لها..دام ان راكان باشا ماعنده نيه يتزوج بو راشد/انهبلتي انتي..هذا ولد عمها والكل يدري بخطبتهم ام راشد/طيب متى العرس ان شاء الله ماتقولي،اشووف بنتي تذبل قدام عيني واسكت..كل البنات تزوجوا واستقروا الا هي،بعد لو عندها وظيفه ماقلنا شيء ،بس التفكير ذبحها،حتى لو انها ماتبين بو راشد/خلاص انا بفاتح بو راكان بالموضوع بس صبي قهوه ام راشد/امرري لله / / / / جلسه بالحديقه وع الزرع..، سهام سرحاانه في الجو الحلو..، نوره/اقول ابو راكان بو راكان/سمي نوره/انا ناويه اسافر لباريس ام راكان/وش عندك بعد نوره/شغل كالعاده يعني بوراكان/خذي راحتك وانا اخوك نوره/وباخذ سهام معي هالمره سهام استانست/صدق يا عمتي نوره/هههه ايه ام راكان/شكلك ماعمرك سافرتي سهام ببتسامه/لا ماعمري سافرت ام راكان/يوووه نوره/احتمال نطول هالمره عاد اسبوعين ثلاثه على حسب الشغل بو راكان/الله يعينك..تروحون وتجون بالسلامه نوره/مشكور اخوي.. راكان وقف سيارته وشافهم جالسين بالحديقه وجلستهم حلوه..،واتجه لهم.. سهام انتبهت له وتلثمت تعدلت جلستها..وهي تناظره من بعيد وبقلبها تقول بتنهيده(ياحلو طلته.....عيييب يا سهام هذا خطيب بنت عمك..لا تفكرين فيه حتى،”ايه مايصلح”).. وصل راكان/مساء الخيييرر ياحلووين الكل/مساء النور.. ام راكان/هلا بالغااالي راكان/هلابك يمه نوره/اقعد تقهوى وذوق من حلى سهام اللي مسويته سهام لاحظت انه تووه محلق ومحدد السكسوكه لأنها بالصباح شافته ماكان كذا،تبسمت وهي تغوص بملامحه... راكان جلس/يا سلام عندكم حلى..ذوقوني بو راكان/قومي يا سهام قهوي ولد عمك سهام قامت/يبشر ولد عمي راكان يشوف طولها ويروح وطي/تبشرين بالجنه ان شاء الله نوره تلاحظ نظراتهم لبعض وتسوي نفسها مو منتبهه وتطقطق بالأيباد حقها وتطنش/.... بوراكان انشغل بسالفه مع ام راكان...، سهام حطت قطعة حلى بصحن وراحت به لراكان وعينها تراعيه/سم يـ..<<تلعثمت وفضلت تسكت راكان،منزل راسه لانها قريبه منه/تسلم هاليدين سهام وعينها عليه لاحظت وجهه/نعيمآ.. راكان رفع عيونه وألتقت بعيونها/الله ينعم عليك سهام وفيها الضحكه من ردة فعله وهمست/السكسوكه المخنجره عليك تجنن راكان بلع ريقه،من سحرها اللي يجذبه/.. رجعت سهام لمكانها بعدما اربكته،وهزت مشاعره..., سهام جلست بمكانها وهي تصد وتحاول تنشغل عنه بأي شيء,وهي مستغربه نفسها(سهام وش هالجرئه..عييب عليك هذي مغازله صريحه,ياررب ثبتني إذا شفته..مادري كيف اتصرف بغرابه) نوره/اقول ركون حبيبي راكان التفت على عمته/سمي نوره/ابيك بكره تاخذنا علشان نسوي جواز سفر لسهام راكان/ليش نوره/ابي اطلع لها فيزه ناويه نسافر باريس راكان ما استوعب/هااه نوره وسهام/هههههههه ام راكان مقهووره من نوره وسهام/بس انا وراي مشوار للمستشفى راكان/يمه موعدك الاسبوع الجاي فديتك ام راكان تفششلت وقامت ودخلت/اروح الحق بو راكان ازين لي نوره/ههههه حاااره امك يا راكان سهام/والله انها طيوبه..واللي بقلبها على لسانها راكان متعجب منها/هذا وهي ماتبيك عندها بالبيت سهام/وهي معذوره.. ام نوره وراكان بنفس واحد/شلون سهام/بنت تطلع لها فجأه.وماتدري لو هي شريره.وتتوقع انها بتاخذ الثروه وبتجحد اهلها،وبتستفرد بعمها وبتتزوج ولدها وبتصير سيده بالبيت اللي هي حاليا سيده فيه،وكبر السن له دور بعد انا مقدره مشاعرها تجاهي ولا ألومها ابد.. نوره وراكان مندهشين من لباقتها واسلوبها.. نوره/بصراحه مادري شقول،عسى الله يعطيك كل خير راكان ببتسامة رضى/كبيره يا بنت عمي سهام انبسطت من ابتسامته/.. نوره رن جوالها وقامت/اعذرووني هذي بنتي شعوله بروح اكلمها .. راحت نوره وتركتهم..، راكان خز سهام/شدراك اني حلقت سهام/هههه ليه قالوا لك اني عمياء ماشوف، راكان/ههههه سهام سكتت شوي.. راكان/بصراحه الحلى رووعه تسلم يديك عليه سهام/الله يسلمك.. راكان/من متى حاطه وشم بيدك..؟ سهام استغرربت منه „شهقت بخفييف/راكاان انت جالس تقززني!!.. راكان بلع ريقه/لا بس ابي اقول ان الوشم حرام بس سهام/اهااه..هذ مو وشم..لصقة تااتووه .. راكان بيستفزها/كذاابه بهالاثناء دخلت سيارات البناات بيسهرون عند سهام..، نزلت من سياراتها واتجهت للحديقه علشان جناح نوره وتفاجأت ريم!!! „ سهام ويدها بيد راكان/ششفت تأكدت انه مو تاتوه حقيقي.. راكان لمس على الرسمه/اي والله موحقيقي،اشووى لانه حرام سهام انتبهت للبنت اللي واقفه هناك وشهقت وسحبت يدها/يووه يوووه مصيبه،قوووم هذي ريم راكان فز واقف/اوكي عن اذنك سهام/بتخليني بالورطه راكان هرب/... ريم قربت والدم يغلي فيها وباين التوتر عليها/مساء الخير سهام بابتسامه مرتبكه/هلا مساء النور ريميه تفضلي ريم وهي تخزها/مابي اجلس هنا،خلينا ندخل احسن سهام لاحظت الزعل بعيون ريم/اوكي خلينا ندخل.. #بالصاله~ سهام ما اصبرت مسكت ريم على جنب/شووفي ياريم بالنسبه للموقف اللي قبل شوي مع راكان،تكفيين لا تفهمينا غلط ريم ماتكلمت من الزعل/.. سهام مدت يدها قدام ريم/ورب المصحف اني كنت ابيه يتأكد ان اللي في ظهر كفي مو تاتوه حقيقي لأنه جالس يحلف ويتهمني يقول حرام وبالاخير قلت تأكد بنفسك اذا منت مصدقني ريم ابتسمت على تفاعلها/بس! سهام/اقسسم بالله هذا اللي صار،اصلن انا اعتبره اخووي فققط.. ريم عجبها تفاعلها/ههههههه يلا وريني وش مسويه لنا من حلى هالمره.. سهام نغزتها بكتفها/حلى يحبه قلبك..وسويت بعد لقيمات ريم شهقت/بالله علييييك سهام/قسم..شفيك ريم طبعت بوسه على خد سهام/اعسشق اللقيمات..تعاااالي نروح المطبخ.. سهام لحقتها وتحلطم/يالبطينيه انتي تسيرين علي علشان طبخي بس ريم/ههههههههه اجل من زينك هههه سهام راحت تركض وراها/هييين..بنزوج ولدنا راكان احسن منك ريم/هههههههه / / / / / راكان بسيارته ويتذكرها وهي تمد يدها له ببراءه علشان يلمسها ويتأكد انه مو تاتوه،ابتسم وهو يتحسس ملمس يدينها ويتذكر عيونها ونظراتها،ولثامها اللي يحلم انه ينزعه منها ويشوف صاحبة العيون اللي سحرته والصوت الانثوي والاسلوب الذوق..، ويتذكر في عزيمة الاستقبال حقتها شاف مقفاها وهي رايحه لغرفتها حافيه ولابسه قصير وتمشي على مهل() / / / ؛جالس عند باب بيتهم وسرحان في ملكوت الله... هذا عزوز من فتره وهو زعلان وما يحاكي اخته..شايل بقلبه كلام عيال الحاره ومتناسي انها اخته لأنه طفل..، كعادته مر من حارتها وهالمره لمح عزوز جالس عند الباب لحاله وباين انه سرحاان وتذكر كلام مجود عنه اتجه له بالسياره ووقف واشر له يركب/يا عبدالعزيز عزوز ناظره بنص عين وصد/... طلال قرر ينزل له/السلام عليكم عزوز وهو كاتم زعله/وعليكم السلام طلال/شخبارك عزوز عزوز/بخير... طلال ببتسامه/مافيه اقلط ولا قهوه عزوز التفت عليه بنص عين/اعذرني البيت مافيه احد طلال فهم/اووكي قووم معي خلنا نتمشى ونسولف ابيك بموضوع عزوز/انا تبيني في موضوع طلال/إيهه يلا قوم معي عزوز قام وركب معه/ طلال مو مصددق من فرحته/ / / / سحاب واقفه بتوتر وتحاتي غياب عزوز،وعزلته عنها،خنقتها العبره وهي تحس انها بتفقد اخوها،.. ديم جابت لها كاس ماء/سحاب روقي واشربي ماء مايصير سحاب/شلون مايصير يا ديم وانا اخوي الصغير يتجاهلني،ويعيش حياته ولا كأني موجوده..ياكل برا يسهر برا ويطلع مع مين ما كان،واللحين له سااعه برااا مدري مع من... ديم/ادعي ربي يرجعه بالسلامه،كذا الاولاد بهالسن تربيتهم صعبه.. سحاب جلست وهي تحاول تهدئ/....... / / / / في مقهى كوستا~ طلال/لنا ساعه نتمشى شرايك بحلبة الريم عزوز بحماس/روووووعه بصرااحه ..ياليت اقدر اجيها دوم طلال/ههههههه عزوز ابتسم/ما اقصد انت اللي تجيبني طلال وهو يشرب قهوته/اجل تقصد صقر عزوز عقد حواجبه وصد،بسكات/... طلال/افا يا عبدالعزيز علامك زعلت عزوز/مازعلت من قال؟ طلال/اسمع ياعزوز انا بقولك حاجه يمكن تتفاجأ بها... عزوز التفت عليه باهتمام/... طلال/انا دريت ان اخوك صقر متوفي من ثلاث سنوات عزوز خاف وماعلق/.... طلال/اي عرفت وكشفت اختك سحاب وهي تتقمص دور اخوك،ولو تتذكر اخر مره طلعت فيها للاستراحه...اكتشفتها بهذاك اليوم،وبهذيك الليله انفجرت كفرات السياره وهي تسوقها وكانت بتروح فيها لولا لطف ربي.... عزوز استغررب/اجل من جابها للبيت طلال ببتسامه/أنا جبتها وكانت حيل تعبانه وخايفه عليك انت ومجود، عزوز ماعلق/... طلال/انا جيتكم كذا مره ورفضت تقابلني،لاني عرفتها وبعد اتصالاتي ماقامت ترد عليها..وكله علشانها تحبك انت واخوك عزوز/شلون يعني طلال/انا خطبت اختك يعني قلتلها بجيب اهلي واتزوجك وكذا،بس هي رفضت تقول بعيش كل حياتي مع عزوز ومجود عزوز/هي قالت كذا طلال/ايه...تقول انها تحبكم وماتقدر تستغني عنكم. عزوز لمعت عينه ونزل راسه علشان مايبينها/... طلال/عزوز شرايك انت تقنعها تتزوجني واوعدك ماخليها تبعد عنكم عزوز/لا طلال/افااا ليش عزوز/سحاب ماراح تتزوج ابد طلال انصدم/... عزوز،كمل/سحاب ماراح تتزوج غيرك انت يا طلال. طلال ارتااح/هههههههه ياخي خوفتني عزوز/هههه طلال وهو يطالع ساعته/قوم بسرعه خلني ارجعك البيت اللحين تلقى اختك ميته من الخوف عليك.. / / / / / السهره في جناح نوره~ ندى و ريم يرقصون باستهبال ونوره معاهم... سهام تتفرج وتضحك/عااااشوا.. نوره جلست شوي/وي وي وي تعععبت، ريم/هههههه والله وعجزتي يا عمتي هههههه ندى/الظاهر كذا هههههههه سهام/ههههههههه نوره/اقووول مالت عليكم سهرانه معكم وتتريقون علي!!..أمحق بنات خوان...وينك يا عروبه ومشاعل عني تشوفون هالشينات اللي يضحكون علي البنات/ههههههههه ريم/احم احم قصدك ندى وسهام الشينات ..صادقه هههه ندى/لا والله احلفي بس ريم حطت يدينها على خصرها وميلت نفسها شوي/اي نعم عندك اعتراااض مدام ندى سهام/مو بس هي يالشششينه انتي...ندووش خلينا نوريها شغلها ندى بنظرات شريره/يلااااا ريم ناظرتهم بخوف/وش ناويات عليه هيييه سهام وندى اتجهوا نحوها يركضون.. ريم هربت/اتحدااااكم تمسكوني يالشينات البنات صاروا يتراكضون كأنهم بزارين .. نوره/هههههههه الحمدلله والشكر...والله انكن مبزره..الوحده وش طولها وتركضن البنات مروا من عندها وبهذلوها ونحاشوا/عمتتتي ابعدي عن طريقنا نوره قامت/حسبي على بليسكم اروح انام ابركلي،قلبتوها مبزره. / / / ودعت سحاب ديم عند الباب ودخلت وهي مشغول بالها على عزوز اللي للحين ماتدري وينه!!..معاد بقى شوي على دموعها وتطيح،ولحظات ورن الجرس،استغربت ان عزوز يرن الجرس لأن معه مفتاح/اكيد ضيعه اكييد..حبيبي ياخوي
طلعت تفتح بسرعه/عزوز.....انتم من ووش تبون دخلوا ثلاثه متلثمين ولابسين اسبورتات غامقه ولها اغطية رأس.. سحاب بلعة ريقها من الخوف/اطلعوا برا احسن لكم تراكم ماتعرفوني.. واحد منهم فك لثامهوبين وجهه/اكيد نعرفك ياسحاب سحاب شهقت/هذا انت يالرخمه..جايني مع ربعك..ماقدرت تجيني لحالك يالزلابه بوحبتين/ههههه ماعليك منهم هذولي جايين فضول لكن انا اللي بتصرف معك لا تخافين سحاب وهي تتراجع على وراء/اصلن ماينخاف من مثلك بوحبتين/صدق والله؟!!!..أجل وقفي ليش تبعدين عني، خلينا نتفاهم بهدوء..ورومانسيه سحاب لوت بوزها وهي تقرف/يععع ياشينها بفمك،اقول اطلع برااا بس انت وقشك بوحبتين اشر لخوياه يحدونها من جهتين وهو من جهه وفعلآ حدوها... سحاب وهي تحاول تتخلص منهم/ابعدوا عني يا حمير... بوحبتين مسكها غصب عنها بعدما ثبتوها له/يبيلك ترويض يا قطوه..وانا اللي بروضك ان شاء الله سحاب تفلت بوجهه/تخسي تمسني بوحبتين وهو يمسح وجهه/يعجبني عنادك يابنت،مسويه انك صعبة منال هاااه هههههه هذا انا كتفتك بثواني سحاب بكت/فكني يا وصخ انت وياه بوحبتين/عيال دخلوها المجلس علشان محدةمن الجيران يسمع وش بنسوي بها هههههه. سحاب بدأت تصرخ وترفس برجلينها بقوه وتشوتهم ومع ذالك هم مثبتينها لابوحبتين اللي بدأ شغله وصار يمزق ملابسها..........# بهاللحظات وصلوا عزوز وطلال... طلال استغرب/عزوز هذي من سيارته عزوز مستغرب/سيارة بوحبتين راعي المشكله اللي قلتها لك طلال بدأ يشك/عزوز خلني ادخلك واتطمن على الوضع عزوز/يلا دخل عزوز ومعه طلال واول شيء سمعوه "صرختهااا" عزوز خاف/هذا صوت اختي من المجلس طلال رمى شماغه واخذ معه عقاله واتجه للمجلس بسرعه/.. عزوز اتجه لغرفة اخته بسرعه واخذ الشوزن ونزل بسرعه/.. طلال دخل وعيونه ترسل شرار/وقف ياووررع انت وياااه العيال تجبسوا مكانهم سحاب ماحبت هالموقف ابد،من خوفها اتجهت ركض لطلال وضمته بقوه وهي تحس بالأمان و تنهد وتتنفس بسرعه وصوتها مبحوح/الحقني تكفى...كانوا يبون يغتصبوني..خذ حقي منهم ياطلال طلال حضنها مع كلامها هذا زادت قوته ورغبته في الانتقام/ بوحبتين خاف/ياعيال انحشنا طلال فك سحاب على جنب واتجه لهم وضربهم ضرب عمرهم ما حلموا فيه ،وكتفهم وخلاهم بالمجلس، عزوز واقف عندهم بالشوزن/اشوف معاد في حبتين يا ورع بوحبتين متدشدش وساكت/... طلال بابتسامه/عزوز خلك عندهم اللحين يجون الشرطه.. سحاب واقفه برا بالحوش وملتفه بشماغ طلال على كتوفها وساكته/... طلال وهو يتأملها بحب/وش هالصدفه الحلوه اللي خلتني اشوفك...تدرين شلوون حبيييت ابو حبتين هذا سحاب التفتت عليه بنص عين وذابله/ طلال ذبحه برودها/شفيييك تناظريني كذا...لا يكون انا اللي حاولت اغتصبك سحاب تركته ومشت/.... طلال انقهر من تصرفها/ترى فيه كلمات حلوه يقولونها الناس علشان يجاملون بها بعض..جااملي ع الاقل سحاب وقفت والتفتت وعطته نظره ناريه وكملت طريقها لداخل وسكرت الباب..، طلال ،حس بإحباط العالم كله يسري في وريده من برودها تجاهه،توقعها هالليله غير خصوصا بعدما ضمته،.. لكنه تفاجأ ببرودها وعدم مبالاتها باللي سواه علشانها!!!!!/... / ### انتهى الجزء الخامس عشر / / |
مواقع النشر (المفضلة) |
أدوات الموضوع | |
انواع عرض الموضوع | |
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
رواية رواية للجرأه طعم للكاتبة Angel sinless | Yaqot | روايات و قصص منشورة ومنقولة | 9 | April 26, 2015 06:23 PM |
رواية رواية بعثرت أرواح عاشقة للكاتبة إكراموا | Yaqot | روايات و قصص منشورة ومنقولة | 31 | March 30, 2015 05:47 PM |
رواية بعد الغياب للكاتبة أنفاس قطر | Yaqot | روايات و قصص منشورة ومنقولة | 64 | March 18, 2015 03:15 PM |
رواية روان للكاتبة كول 2009 | Yaqot | روايات و قصص منشورة ومنقولة | 10 | March 14, 2015 12:31 PM |
ملخص رواية سلالم النهار -رواية للكاتبة فوزية شويس السالم | Yaqot | روايات و قصص منشورة ومنقولة | 0 | May 8, 2014 10:41 AM |