رواية موعد مع السعادة للكاتبه العيناويه

----------------------------------
اليوم: الاثنين..
المكان: غرفة كنة ..
الوقت: الساعه العاشره والنصف بتوقيت الامارات مساءا
-------------------------------------
( كنة)..


كنة: شوفي شوفي هذا..يجننننننننننننن..!!!
اشرت للشاشه لمنى عشان تشوف الفساتين اللي قاعدين نطلعها من النت..
منى: لالا ابوي اخويه مايووزله هالفساتين بيطره لج طر..!
كنة: لييييييييش...والله حلووو!!
منى: لا منى هذا فيه فتحه عند الريول وظهره عاري شوي..!
كنه: وانا وين بلبسه الا عند الحريم..وبعدين الفتحه عادي بنحط شيفونات تحت بنغطيها والظهر برايه !
منى: انا بريت ذمتي وقلت لج ..لا تين تشتكين خلاف..!

تاففت وغيرت من قعدتي وجابلت منى..
كنة: اما انه الرياييل قهر... حق قمصان النوم قالوه هيييه قصري واكشفي ولا تطولين...واذا بغينا نتعدل لعمارنا وبين الحريم وقفوا لنا عظم في البلعوم..!!! هذا عيب وهذا كشف وهذا وهذا.. شو هالغصه !
منى: هههههههههههه هي عيل شو اتحسبين..هذا العرس من بدوي عاد يالله تحملي..
كنة: اقول ترا مايخص البدو والحظر حد من البدو متفتح وحد من الحظر منغلق اشد عن البدو..كل واحد وتفكيره بس اذا معقد او لا..
منى: قصدج يعني اخوي معقد.!
كنة: هــيـــه !
منى: الحمد لله انج ماملجتي..خلاص بقول لاخويه البنت غيرت رايها فيك وفجوا الخطبه وبنحصل له غيرج..

شهقت وحطيت ايدي على صدري..وحسيت بالرعب من الفكره هاي..
جان اظرب منى على ايدها..
كنة: يا ام كرشه لا تفاولين علي !!!!!! حرام عليج انا ماصدقت..
منى: هههههههه كرشتي بعدها ماطلعت وايد..وبعدين محد قالج اتنقدين من الصبح على اخوي.. عبالج برضى عليه يعني عشانج ربيعتي..

ابتسمت ورديت اجلب في صفحات النت..
من المغرب انا ومنى نفتش في هالمواقع عن تجهيززات العرس وغيره..خايفين انه نسينا شي ماحطيناه في الخطه...
لانه عندنا وقت ظيق نستغله...
عشان جي نص طلباتنا طلبناها عن طريق النت والدفع عند الاستلام..

كنة: خايفه يا منى..
منى: من شوو حبيبتي..
كنة: باقي شهرين واخلص جامعه.. وانتي تعرفين كورس التخرج وايد شغل فيه..وعقب مابيتم لي غير شهر ... شو بسوي يا منى فهالشهر مايمديني!!
منى: انتي لازم تروحين قريب دبي او بوظبي عشان نفصل لج فستان العرس وباقي الفساتين..لانه هذا اللي ياخذ شهور..اما الباقي مقدور عليه..
كنة: لازم تروحين معاي.. انا بروحي ماعرف اتصرف..وطبعا ماريد نوره تي معاي..
منى: بشاور راشد..بتعلث بقوله بروح افصل فستان عرس اخويه والخ..
كنة: شو رايج نسير الخميس الياي..مب هذا الاسبوع..اللي بعده.. بختار لي موديلات من هني وبطبعهن.. ويوم بنسير هناك بنتطالع موديلاتهم اذا ماعيبنا شي بنطلع اللي عندنا..وبنشتري القطع من هناك بعد..يعني يوم يومين قعده هناك اعتقد يكفي نخلص ونرجع..
منى: امييه..حطي حسابج على سيره ورده فيوم واحد راشد مستحيل يخليني ابات..

انتهى الوضع اني طلعت ورقه اكتب فيها كل اللي احتاجه ووبمساعده منى قسمناه على حسب الاولوية..
شي منهن اجلناه لقبل العرس وشي استعجلناه لانه محتاج وقت..
تركت القلم فوق الورقه وقعدت فوق الشبريه اضم ريولي بايدي في قعده مريحه..
كنة: اهم من هذا كله يا منى.... ظنج الله بيوفقنا؟.
منى: وليش لا؟ ان شاء الله الله بيوفقكم يا كنه...انتي شارتنه وهو شارنج ..
كنة: وايدين حبوا بعض وما اتفقوا في النهاية..ونحن دوم نتظارب..
منى: على اشياء تافهه..بعد الزواج فيه امور اهم الواحد يراعيها..مب مشاعره وبس
كنة: تخيلي يتردد يوسف فآخر لحظه ويقرر انه مايباني..
منى: يوسف مب خبله شراتج..ولو سواها نحن ماعندنا نظام اجانب يشرد من الكنيسه ويتكنسل العرس.. شوابنا بيسحبونه من اذنيه لا تحاتين..
كنة: هههههههه حرام مايهون علي..

صاح تيلفون منى وطلع راشد.. ارتبشت بنت عمي وسلمت علي بالسريع وراحت..وصلتها للباب ورجعت غرفتي ...
وسكرت الباب وراي وانا اتامل غرفتي..
معقوله بعد ثلاث شهور بودع هالمكان وهالبيت..!
وفجاه خطرت فبالي غرفة يوسف وانعفس ويهي..
كنة: وييييييع...اثاثها بني لا يكون بيسكني فيها يوسف !!!!!!!!!...لالا اكيد بيغيرونها ماتصلح لمعاريس..

وحسيت بحراره فويهي وحطيت ايدي على خدي ..."معاريس !"..
ضحكت على عمري وانا ارجع للكمبيوتر ...افتش في النت والمواقع عن اشياء يديده ممكن تعجبني وتريحني من حواطه السوق..
-------------------------------------
اليوم: الاثنين..
المكان: احد فنادق سوريا/ حلب..
الوقت: الحادية عشره مساءا بتوقيت سوريا..
-------------------------------------
( مهرة)..

طلعت من الحمام بعد مابدلت ملابسي ولبست بيجاما قطنية سودا عليها نقش رفيع احمر ..وكانت بدون اكمام والجو شوي بارد...
رحت اقصر عالمكيف المركزي وانا افكر بانه ناصر تاخر..
لكن ماكملت تساؤلاتي الا وناصر داخل ومعاه مايد..ابتسمت على طول..
مهرة: هلا والله ..ييتووا اخيرا..!
ناصر: سلموا عليج وايد..وكانوا يبون يشوفونج..
مهرة: مره ثانيه ان شاء الله.. تعال حبيبييييي..
كان الكلام لمايد..شليته من ايد ناصر وظميته...حسيت اني اشتقت له .. هالولد صار جزء مني..
لاحظت ناصر يتاملني بدقه...
بادلته النظره بنظره تساؤل ثانيه..
ناصر: توج متسبحه؟..
مهرة: لا من شويه..بس شعري مانشف بعده..
ناصر: الجو بارد بتمرضين..!
مهرة: لا ماعليه توني قصرت عالمكيف.. ليش واقف عند الباب؟؟
يلست عالكرسي وقعدت مايد على ريولي..
ناصر: هممممم بصراحه انا برد اشل مايد..
مهرة: وين بتشله؟!!!شوفيه مايد؟؟
كنت مستغربه من التغيير المفاجئ للخطط.. وعيوني متعلقه بناصر اتريا اجوبه..!
ناصر: هناك لقيت خاله مايد اللي هي حرمه علي ربيعي..ويالسه عند اهلها حوالي شهر..وانتي تعرفين مايد كان عندها لين ماخبرتج انتي بموضوعه..

ماعجبني مسار الكلام..!! لكن صبرت وترييته يكمل..
مهرة: اوكييه !!!وبعدين؟
ناصر: بو احمد يد مايد قال خل مايد عندنا وبتعتنيبه خالته مثل ماكنت تعتنيبه من اول .. بالمره يشوفونه ويشبعون منه ويقعد عندهم...وبالمره بعد انا وانتي ناخذ حريتنا اكثر..
مهرة: لا..!
كان رفضي قاطع !!..
ناصر: مهرة !!
كانت لهجته عتاب لتسرعي..
مهرة: ناصر ماتخيل احين عقب ماتعلقت بالولد بتشله عني..
يا ناصر وقعد عدالي عالكرسي..
ناصر: ياعمري وقلبي مابشله عنج.. كل المسأله انها حجه وحاجه.. اهله يبون يشوفونه وساعتين زياره ماتكفي.. ولا تنسين انهم ماشافوه كل هالشهور هاي..وبعدهم مابيشوفونه لوقت طويل يوم بنرجع الامارات.. يعني لهم حق نخلي الولد عندهم كم يوم..وبالمره انا وانتي لا تنسين وضعنا ..نحن ماتهنينا و مب محتاجين ياهل بينا يشغلنا عن بعض هالفتره..
احمر ويهي على طول ونزلت عيني..
مهرة: شو هالكلام يا ناصر..!
ناصر: انا اتكلم بصراحه..
مهرة: شو بتسوي عيل في المستقبل يوم بيكون عندنا عيال ان شاء الله؟؟
ابتسم ناصر بتسامح..
ناصر: لا تستهبلين علي الوضع مختلف..
برطمت وظميت مايد لحظني اكثر...
مهرة: بس يا ناصر ..حرام نخليه جي بروحه...
ناصر: لا تنسين انه مايد متعود على خالته .. اكثر من اعتياده علي وعليج.. وهم مابيسرقون الولد تراه الا بيرد عندنا.. مهرة انا لي حق بعد اني اقعد معاج بروحنا ..
مهرة: ادري والله..بس...بس..!
ناصر: لا بس ولا شي..قومي جهزي شنطة مايد لانه احمد يتريا تحت...
شهقت انا..
مهرة: احين امرره بيشلونه؟..
ناصر: هيه وبقولج ليش بعد ما ارجع..عندي لج مفاجأة..
مهرة: بعد مفاجأة..!!!
ناصر: بتعيبج..يالله قومي..
بعد عشر دقايق من تجهيز شنطه مايد... رجعت اظمه بقوو..
ناصر: ياااااااااااااااالله هالكثر بتتولهين عليه؟؟؟ بسير اقولهم خلوني انا عندكم شهر..يمكن تتولهين علي شوي..!
مهرة: لا تتمصخر.. فديته والله بتوله عليه وايد..
ناصر: لا تحاتين..بتنشغلين عن التفكير..
خذ مايد من حظني وهو يظحك علي وانا امسح دمعه خاينه نزلت من عيني...ورجعت افج غيظي فناصر وعطيته بكس خفيف على كتفه..
مهرة: دب..ثاني مره لا تخطط بدون ماتقول لي ...
ناصر: ان شااااااء الله..

طلع مايد مع ناصر ..يلست عالكرسي مره ثانيه وانا احس بتثاقل... شلوا مايد عني... بشو بشغل نفسي الحين.!! ياترا الوضع بيني وبين ناصر بيكون مستقر مثل ماهو يوم كان مايد بينا؟ والا بيعتفس حالنا مثل ماكان قبل مايدخل مايد حياتنا؟..
خوفي اني انقلب عليه ويتبدل موقفي يوم احس اني بروحي معاه..!
فيه خوف داخلي بعده ملازمني...غصبن عني ماقدرت اتخلص منه.. الله يستر بس... انا ماريد اجرح ناصر بتصرفات لا ارادية..
هو حاط آمال كبيره على هالرحله.. ماريد اخيب ظنه..

بعد حوالي ربع ساعه رجع ناصر بابتسامه حزينه...
مهرة: توك حسيت هاااه..!!
ناصر: فديته والله.. صاح.. مايعرف احمد ولا عماد...تمت عيونه فيني يتحسبني عطيته ناس غرب..
مهرة: فديييييت قلبه..حرااااااام..
ناصر: ماعليه يوم بيشوف خالته هناك بيسكت ان شاء الله..
تنهدت ...
مهرة: ان شاء الله...
ناصر: تعشيتي؟
مهرة: هيه تعشيت..طلبت ويابولي..
ناصر: انزين..انا يوم كنت فبيت عمي سويت ترتيبات بدون ماقولج..
مهرة: شو ترتيباته؟..
ناصر: انه نحن مابنقعد هني.. باجر بنسافر تركيا..بنقعد فيها يومين جي وعقب بنسير ايطاليا..
بطلت عيني على هالتغييرات..
مهرة: شو شو شو...وين نروح؟؟ ومايد؟..
ناصر: مايد علي بيرده وياهم يوم بيردون الامارات..وهم بيردون فنفس الفتره اللي نحن بنرد فيها..يعني مايحتاج نرجع سوريا..
مهرة: من صدقك انته؟
ناصر: هيه..انتي لا تحاتين انا رتبت كل الامور..
مهرة: اللي تشوفه يا ناصر..

اسند ناصر ظهرة على الكرسي شوي بعيد عني وهو يتامل شكلي...
ناصر: ليش احس انج متوتره وخايفه؟.
مهرة: لاني متوتره وخايفه..
ناصر: انتي تعرفين انه ماله داعي الخوف والتوتر..
مهرة: ادري..بس فيه اشياء ماقدر اتحكم بها..
ناصر: بعدج تتذكرين اللي سويته فيج صح؟
هزيت راسي بصمت..
خايفه وزعلانه..احس انه ناصر احين بيقوم وبيطلع من الغرفه معصب...احين بيبدا يصارخ بزعل وظيق..
وانا ماريد اكدره...ماريد..
لكن كل مخاوفي اختفت.. فلحظه ناصر مد ايده وحظني بحنان... اسند راسي على كتفه..واسند هو راسه على راسي... بدون ضغط بدون أي طلبات مبطنه.. حظني وسكت.. ولا قال شي..
مهرة: سامحني ناصر.. انا..انا اعرف انك تغيرت..وانك احين غير عن قبل..وانك ماكنت فوعيك يوم سويت اللي سويته... بس ارجوك لا تلومني هذا شي ماينمحي بسهوله..
ناصر: لا تقولين جي مهرة..انتي اللي سامحيني.. اوعدج انج بتنسين اللي صار فيوم من الايام.. بس اباج تحطين فبالج شي واحد..انج معاي في امان اكثر مما انج في امان مع أي شخص ثاني حتى لو ابوج.. انتي فعيوني يا مهرة.. لا تخافين مني..خوفج مني والله يقطعني ويعذبني..

رفعت راسي وشفت فعيونه معنى كل كلمه قالها.. الالم والحزن والحب فنفس الوقت..
مهرة: سلامتك يا ناصر.. انا ماخاف منك .. وان شاء الله كل الامور بينا بتتصلح مع الوقت.. لا تكدر خاطرك ترا ماتهون علي..
ناصر: ولا انتي تهونين علي.. بس ماعرف شو الحل لمشكلتنا ..اللي اقدر اسويه سويته ماعرف شو اسوي اكثر من جذي..
مهرة: الوقت... كل اللي نحن محتاجينه هو الوقت.. ناصر ترا ما مر شهرين من زواجنا لا تستعيل.. جدامنا الحياة بطولها وان شاء الله الله بيساعدنا نتخطى هالظرف..
ناصر: ان شاء الله..

ليلتنا كانت غريبه انا وناصر... كنا متسدحين عالشبريه ...
وكل واحد يرمس الثاني عن ماضيه واهم مواقف حياته...
شي حزن وشي ضحك... شي اهبل وشي معيب..
شي من المواقف غريبه وشي محرجه..
حسيت اني فتحت قلبي لناصر في هالليله اكثر مما فتحت قلبي لاي شخص ثاني..
وحسيت اني عرفت عنه امور اقرب الناس له مايعرفونها...
خبرته عن كل شي...الا عن حبي المراهق لمبارك..
وهو خبرني بكل شي... الا عن علاقاته الفاسده اللي ماكان لها داعي تنطرى..!
وعلى كثر تراكم التعب اللي فينا...ما رقدنا الا ويه الصبح..!
--------------------------------
اليوم: الثلاثاء..
المكان: سيارة سيف..
الوقت: الحادية عشره صباحا..
--------------------------------
(سيف)...

حطيت اوراقي على السيت اللي عدالي بقهر...
ركبت السياره وشغلتها ومشيت متجه لبيتنا...
وقمت مثل المينون ارمس عمري.. وانا ماسك السكان بالقو..
سيف: ويلومونك ليش تدرس في الخارج !!!.. في الخارج ماعندهم التعقيدات البايخه الموجوده فبلادنا.. حرااااااام عندهم يمشون امورك لازم يعطلونك ... استغفر الله..!!

انتبهت اني اخفف سرعة السياره فالوقت اللي اتصل فيه مبارك..
سيف: ها مبارك..
مبارك: وين انته؟
سيف: ساير البيت..
مبارك: شبلاه صوتك؟ What's wrong?
سيف: في البيت بقولك...
مبارك: بيتكم..؟
سيف: لا بيتكم..
مبارك: يعني بيتكم..
سيف: ما اطنز يا اهبل صدق اقعد فبيتكم انا عفت بيتنا ..بييك البيت...
مبارك: اووكييه اوكييه..اترياك..

في بيت خالي يابر يلسنا انا ومبارك في الصالة..
مبارك: خبرني عاد شصار..
سيف: الجامعه ماطاعوا يقبلون اوراقي..!!!!!
مبارك: what!!!!!!!! .. انته يايب نسبه فوق التسعين كيف مايقبلونك؟؟
سيف: المسالة مب النسبه.. قالوا تبا تسجل سجل على السنه اليديده يعني انطر يا حمار لين شهر سبعه عشان تسجل وتبدا تداوم شهر تسعه ..
مبارك: ليش؟ والسيمستر الياي؟؟؟ بعده باقي عليه شهرين وشي...
سيف: جامعة الامارات المحترمة ماعندهم نظام فصلين.. نظام طرح مواد التاسيسي مايسمح ... يا تبدا معاهم من اول السنه يا تتريا السنه اليديده... يعني هالسنه تظيع علي بلاش..
مبارك: خلهم يولون ..روح الجامعه الامريكية...
سيف: مابغيها... مب في العين...انا شارد عن لندن عسب مافارق اهلي...
مبارك: احين انته تقارن بين السكن فلندن والسكن فاماره ثانيه ماتاخذ غير ساعه ونص وانته واصل بيتكم..!!
ــــــــــــــــــــــــــــــــــــــــــــــــــ ـــــــــــــــــــــــــــــــــــ
سيف: مابغيها..
مبارك: احين انته شو تباها جامعه الامارات جامعه جديمه ومهملينها مب مهتمين فيها مثل باقي الجامعات..
سيف: قصدك جامعه عريقه ...لا تقارن جامعات ماكملت عشر سنين من طلعت بمبانيها اليديده والكشخه بجامعه عمرها من عمر الدوله..!!..
مبارك: هذا انت قلتها...عمرها من عمر الدوله يعني نظامها قديم...
سيف: ماعليك من الخرط مبارك والله شهادتها قويه .. بس فيه بعض القوانين عليها غبار محتاجين يغيرون شوي... اخ يالقهر جانهم بيظيعون علي نص سنه كامله...شو بقعد اسوي؟؟
مبارك: والله اذا انته مصر على جامعه الامارات..انا عندي لك شور..
سيف: اللي هو..؟
مبارك: خذ لك دورات..
اعتفس ويهي على طول..
سيف: دورات؟ لايكون تطري دوره جيش مافينا دخيلك..!
مبارك: لا اشوو...اقصد خذ دوره لغة .. جهز نفسك.. خذ شهادة توفل..خذ شهادةاICDL ..خذ دوره شبكات ..خذ دوره جرافكس ..فيه وايد دورات تقدر تاخذها...
سيف: الدورات مب ببلاش ابويه يبن فلوووس...
مبارك: عنلاتك يالزطي حسابك في البنك متروس فلوس..!!!!
سيف: والله انه شورك طيب بس كنت ناوي انا اشتري سياره يديده بصراحه..
مبارك: عن الخرط سيف...سيارتك هذي ماكملت سنه حرام عليك... عن البطره عاد...
سيف: اوكيه اوكيه... جذي يعني ظنك؟..
مبارك: اسمع شوري..تكون غلطان اذا تحسبت انه الوظيفه هالايام تي بس من مجرد شهادة باكلريوس.. لازم السي في مالتك تكون متروسه دورات وشهادات وخبره عشان يوظفونك.. ليش تظيع وقتك بعد التخرج عالدورات؟ خذهن من الحين عشان بعد التخرج تروح تدرب فاي مكان بالتالي تحصل خبره ..
سيف: والله انه صدقك... الوظايف هالايام بطلوع الروح خصوووووووووصا العين عاد..
مبارك: شمعنى؟
سيف: العين مب نشيطه مثل بوظبي ودبي.. مخلينها جي عالبركه اونها منطقه استجمام وراحه حتى المباني ممنوع نسوي مباني مرتفعه .. بصراحه هالوضع ممل ولازم يتغير .. لين متى شباب العين كلهم موزعين اللي يشتغل في دبي واللي فبوظبي واللي في الشارجه ..
مبارك: هذا الحين الوضع جذي...عيل كيف كان قبل حوالي 25 سنه..وتلومون ابويه يوم انه سافر يدور مستقبله...
سيف: والله انه صادق..لو انا فوادي شديد شويه شراته جان مارديت من لندن بعد الا بشهادتي..
مبارك: قصدك ابويه يعني قلبه قاسي..!
سيف: مبارك.. ابوك مسافر عن اختين وام.. لا تنسى هالشي..

سكت عني مبارك وماحب يناقش الموضوع اكثر..
ورجعت انا افكر بوضعي ... هالسنه صارت امور وايد.. عسى ان تكرهوا شيئا وهو خير لكم.. يمكن الله مايبالي ابدا في هالوقت بالدراسه وعفستها... يمكن لازم اهدي السرعه وارتاح شوي...
صدقه مبارك..خلني اخلص من الدورات الحين.. عشان اتفرغ للدراسه بعدين..!
-----------------------------------
-----------------------------------
اليوم: الثلاثاء..
المكان: بيت بو محمد..
الوقت: السادسة مساءا..
-----------------------------------
(يوسف)...

دخلنا انا وامي للصالة ... اللي كانت خاليه ومافيها حد..
كانت امي متنرفزه ومب رايقه...
ام محمد: انا مب مرتاحه من هالتاريخ...
يوسف: يا امي قولي الحمد لله انتي بس...
يلست امي عالكرسي وعقت عباتها وبرقعها...
ام محمد: الحمد لله يابويه.. لكن عاد غربل الله عدوهم عطونا في نص الاسبوع..شقايل جذه!!!

كانت امي تتحظى على الحجز الوحيد اللي حصلناه للخيمه ..واللي يحدد طبعا تاريخ العرس..
يوسف: يا اميه زين انه حصلنا في اجازه الربيع.. ترا اروحج سمعتيه امس واحد مكنسل عن هالتاريخ بالذات والا الحجوزات فوول لين شهر تسعه... يعني نحن حظنا من السما..
ام محمد: انزين يابويه في نص الاسبوع...منو بيينا في نص الاسبوع..!!! دوامات وغيره..
يوسف: اللي يبانا بيينا.. ومدارس ماشي..اجازه الربيع.. والدوامات ظنتي للرياييل بس.. لا تكبرينها عاد يا اميه..
ام محمد: الحمد لله على كل حال...
يوسف: تبيني اجرب الفنادق؟
ام محمد: لالا حشى مانبا فنادق ولا يسدن عربنا..!
يوسف: مب لازم تدعين امة محمد كلها انتي..!
ام محمد: قول ماشاء الله عنبو ماجنا نرمس عن عرسك عنبو ماتبا الناس تفرح فيك..!!
يوسف: اهم شي عندي انتي ماريدج اتمين متظايقه من التاريخ..
ام محمد: الله بييسر ان شاء الله فديتك..نحن وصيناه اذا حد كنسل شي من التواريخ القريبه يخبرنا وان شاء الله خير...
يوسف: اذا لي نصيب باخذه بس انتي لا تظايقين..
ام محمد: صح فديتك..اذا لك نصيب باخذه.. نحن زين بعد يوم حصلنا حجز قريب..
ــــــــــــــــــــــــــــــــــــــــــــــــــ ـــــــــــــ
اعتدلت في قعدتي وصبيت لي شاي ...
يوسف: امايه..دام تاريخ العرس وحددناه.. ليش مانحدد تاريخ الملجه؟
ام محمد: يابويه صدعت روسنا بهالملجه...مالك حايه بها..
يوسف: اشووو!!..كيف بعد مالي حايه بها.. امايه لا تغيرون رايكم احين..!
ام محمد: يعني اخوك ناصر اللي كان بحاجه انه يعرف حرمته اللي ماكد شافها ولا يعرف عنها ..ماملج الا قبل العرس باسبوع..وشافها فليله العرس.. وانته بنت عمك تعرفها وتعرفك من انته صغير محتاي ملجه؟ خل عنك الخريط يالله..!
يوسف: امييه..شو يعني؟ ماشي ملجه؟..
ام محمد: اكيد شي..بس انته لا تكظ البنت.. مسكينه تراها شهرين في الجامعه وشهر العرس يادوبها تخلص شغلها وتهتم بنفسها وين بتحصل وقت تجابلك..
يوسف: احين انتوا ليش ماخذين هالفكره عني اني بروح اتسنتر جدامها فبيتهم..! فيه شي اسمه تيلفون..
ام محمد: اخس بعد..رقاد مابتخليها ترقد..جي اعرفها سوالفكم انا..
يوسف: انتي حاطه علي اليوم...!!!..
ام محمد: لا يابويه مب حاطه عليك ولا شي..بس ماباج جذه ..ماباهم يقولون ولدهم مستلغث على بنتنا..!
يوسف: اماااااياااه...بنت عمي هاي شو بعد مستلغث والله شكلج تتكلمين عن ناس غرب.!!
ام محمد: مايخالف حتى لو..وانته تعرفها رمسه الحريم..مافينا..خلك ثقيل..كلهن ثلاث شهور وبيخطفن..مايحتاج ملجه الحين..لا تصدع روسنا.. خل البنت تتجهز على راحتها..وعقب العرس اشبع بها..!

نشيت وانا معصب ..
يوسف: مبونه انا حظي نحس...المنحوس منحووس..

رحت غرفتي وانا اتحرطم .. اسميها امايه غير شكل يوم تتنيحس بخصوص موضوع.. خلاص ماتقتنع موليه لازم تطلع لك الشيب..!!! ..

بدون حاسية فتحت الكمبيوتر وطرشت رساله لكنه " ماشي ملجة.. عمتج تنيحست... استانستي؟"

كنت مقهور وابا افج غيظي بحد.. قمت اتصلت بخالد اطفربه عشان يقوم من رقاده..
ويلاقيني عقب صلاة المغرب..
من يوم العيد ماشفته الخام..!!!
-----------------------------------
اليوم: الاربعاء..
المكان: سيارة راشد..
الوقت: السابعه والنصف مساءا..
-----------------------------------
(سهيل)...

خذت الورقه عن راشد وحطيتها فمخباي..
سهيل: والله ماظنتي سيف يفهم بهالسوالف...
راشد: اذا مايعرف انا بعلمه.. حرام يفسفس فلوسه على شي مايسوى..
سهيل: انا بقوله عن فكرتك.. وبنشوفه..
راشد: سيف بعده طايش انا اعرف بيقول بشتري دراجه والا سياره والا مادري اشو من هالخرابيط.. انته فهمه .. انه يستثمرهن احسن.. سيف ناوي يكمل دراسه وماظني يتوقع اهله يصرفون عليه طول خمس او ست سنين دراسه لين يشتغل.. لو يستثمرهن او يستثمر نصهن عالاقل بيدخلن له فلوس عالاقل يمشي بهن حاله..
سهيل: والله صادق يا راشد.. ماعليه انا بعطيه الورقه هاي وبشرح له..
راشد: تمام عيل انا بسير عنك بقضي كم شغله وعقب برد البيت تعبان..
سهيل: خلاص عيل.. سلم عالاهل.. فمان الله..

نزلني راشد.. عند بيتنا وراح..
في ميلسنا حصلت سيف ومبارك يالسين كالمعتاد..
سهيل: زين انك هني...قبل ما انسى..
سيف: خير؟؟
سهيل: الخير بويهك..
وخبرته بكل اللي قاله راشد...
سيف: استثمرهن؟؟؟؟ كلهن؟؟؟
سهيل: عالاقل نصهن.. المبلغ مب هين يا سيف..
مبارك: والله راشد صادق..
سيف: انزين انا ماعرف بهالسوالف..!
سهيل: راشد يقول مستعد يعلمك .. وعطاني ورقه بعد كاتب فيها احسن الشركات اللي تقدر تستثمر فيهن وقاللي اعطيك اياها..
وعطيته الورقه..
سهيل: وغير جذي ماعرف انا روح اتفاهم معاه..
قعد سيف يتطالع الورقه ويفكر في الموضوع...
سهيل: متى السفر يا مبارك؟
مبارك: باجر ان شاء الله..عاد تولهوا علي..!!!
سهيل: مال غصب! يمكن مانتوله..!
مبارك: لا غصب تتولهون علي...
سهيل: ههههههه ان شاء الله توصل بالسلامه..مره انته من تحصل اجازه تعال..
مبارك: ان شاء الله قد ما اقدر بييكم..
سهيل: بالتوفيق ان شاء الله..

وخليتهم ورحت داخل البيت..
حصلت عليا موجوده بس في الصالة..
سهيل: عيل وين شيخه؟..
عليا: راحت فوق..
في الحجره.. حصلت شيخه قاعده تطلع لها ملابس من الكبت.. التفتت لي مستغربه..
شيخه: سهيل!!.ماتوقعتك ترد البيت بهالسرعه..
تقربت منها وانا ابتسم...
سهيل: ارد اطلع يعني؟..
شيخه: هههه لالا.. حياك.. مافيني على ظلمه الحجره اذا طلعت..
سهيل: ياويل حالي انا... النور نورج والله .. شو اشوف تطلعين ثياب..!
شيخه: هيه مبوني بتسبح.. هاه شو علومك؟
سهيل: طيبه طاب حالك... هاه جهزتي اوراقج.. ترا بشلهن باجر رواحنا متاخرين ..المفروض يقابلونج هالاسبوع بس شكلهم بياجلونج للاسبوع الياي..
شيخه: هي مجهزتنهم..
راحت شيخه ويابت لي ظرف كبير فيه كل اوراقها وعطتني اياه..
شيخه: ان شاء الله يقبلووووني..
سهيل: ان شاء الله.. احتمال يسوون لج امتحان..
شيخه: عااادي بمتحن.. كتبي مال الجامعه بعدهن عندي فبيتنا..
سهيل: ماعليه ان شاء الله خير.. بس بعد ما اعتقد يكون الامتحان بذاك العمق ماعتقد تحتاجين كتبج..
شيخه: هي بس اذا شافوني جي تفلسفت زياده في الامتحان بيقولون اووووووه هاي فاهمه وحافظه خل نشغلهااااا...
سهيل: هههههههه والله انج يا شيخه...خقاااااااااااقه..!
شيخه: براااااااااايني هههههه...

سكت عنها وانا امسك تيلفوني واتصل بابويه..من طلع العصر مارجع...هالشايب صرنا لازم كل شوي نتصل فيه نشوف وين هو...معيشننا فرعب الله يهديه...
لاهو طايع يخلينا نسير وياه وين يسير ولا هو طايع يرتاح ويريحنا في البيت..
الله يحفظه لنا بس...
--------------------------------------
اليوم: الاربعاء..
المكان: بيت بو راشد..
الوقت: الحادية عشره مساءا..
--------------------------------------
(منى)...

غطيت علبة الجبن بالزعتر اللي يابها لي راشد قبل العيد.. بعد ماحطيت لي كم قطعه منه في صحن صغير ورجعت لصالة قسمنا..
وقفت اتطالع راشد وهو يتابع فلم على التلفزيون..
هذي فرصه مناسبه عشان اكلمه..
رحت وقعدت عداله...
منى: تبا جبن؟
التفت لي وتطالع صحن الجبن ورد رفع عينه لي..
راشد: انتي وهالجبن مالج...ماخلص عنج ماشاء الله؟؟؟
منى: ههههه لا ماخلص..وان خلص ريلي حبيبي بيشتريلي غيره ..
راشد: يابوج عزر علينا.. الحمد لله بعد يوم توحمتي على شي ينقدر عليه ..
منى: هههه لا ماتهون علي اتعبك حتى فهالشي ..
راشد: انا احس انه وحام الحريم هذا نصب واحتيال..! ومب صدق..هن يتخيل لهن هالشي بس..مكر حريم يعني..
منى: لااااااااااا والله!! لا تقعد تتفلسف.. شو بعد نصب؟
راشد: لا صدق.. مافي شي اسمه وحام هذي بس هرمونات متخربطه شي زايد وشي ناقص ..
منى: وكيف تفسر بالله العلامات اللي تطلع على اليهال اذا امهم توحمت على شي وماحصلته.. انا وايد شفت من ربعي حد فيه علامه مثل الفراوله وحد مثل الزيتون الاسود ووايد غيره..
راشد: هذي علامات خلقية عادية ويوم تشوفها الام قالت هيييييييي اانا متوحمه على كذا وماحصلته.. وكله من خيالها..
منى: اوييه راشد انته معقد بصراحه لا تخلي عموه تسمعك..
راشد: ههههههههه..
منى: هممم اقول راشد.. ممكن استئذنك بشغله..
راشد: آمري منى..
منى: مايامر عليك عدو الغالي...همم كنه بنت عمي تباني اخاويها وين بتسير دبي والا بوظبي عشان تفصل فستان عرسها وجي..
راشد: شو يوديج منى ..مالج حايه..
منى: ترا انا بعد ابا افصل فستان حق عرس يوسف.. ماباقي غير ثلاث شهوور..
راشد: حددوا الموعد هم؟
منى: هيه امايه اليوم تخبرني..!
راشد: وليش ماتفصلون هني..
منى: شو هني راشد هناك احسن.. وهي يوم عرست انا ماقصرت معاي مع انها كانت بنت ومايخلونها بس عشاني خلوها..يالله عاد راشد لا تقول لا..
راشد: بس انتي حامل وبتتعبين من الدواره في الاسواق..
منى: لا ان شا الله ماعليه شر وبلبس نعال مريح وكل شي بقعد بس لا تقول لا بليز بليز..
حاس راشد بوزه مب راضي كليا..
راشد: ومتى تبا تسير هيه.؟
منى: الاسبوع الياي..على اخر الاسبوع..
راشد: ومنو بيسير وياكم؟..
منى: اكيد خالتي ام مايد بتسير..والدريول بيوديهم..
راشد: بعد دريول!!..
منى: شو تبانا نسوي؟ محد يتبرغ يفرغ لنا يومه كامل ... وتفصيل الفساتين خصوصا فستان العرس يباله صبر لين تحصل الشي المناسب..
راشد: همممم خلاص اوكيه بس توعديني مااتعبين نفسج..
منى: خايف علي والا على البيبي؟..
راشد: عالاثنين.. لا تستهبلين..
منى: هههههههه فديتك والله..
بسته على خده اليمين..
منى: مشكوور مشكوور يا احلى زوج...
راشد : يعني البوسات ماتوصلنا الا يوم نوافق عالطلعات؟؟
منى: الله واكبر احين صرنا مول مانعطي بوسات زين زين ماعليه.. بتعرف الفرق من اليوم ورايح..
راشد: ايوااااا بدينا بشغل المذله.. ماعليه منج انا اعرف اخذ الشي بالغصب..
منى: هههههه راشد!!..خلاص لا تغايظني.. خلني مستانسه...

حطيت راسي على ريوله وقعدت اتابع الفلم معاه.. وانا احس بداخلي استقرار نفسي وعاطفي..
حلو هالاحساس..!
حلو وايد...
----------------------------
اليوم: الخميس..
المكان: غرفة ناصر ومهرة في احد فنادق تركيا/اسطنبول..
الوقت: العاشره صباحا بتوقيت تركيا..
----------------------------
(مهرة)..

غريب رقاد ناصر اليوم...
مب عادته يطول بالرقاد من عقبي...!..
او يمكن انا اللي نشيت من وقت وايد؟؟؟
مسكين يمكن هو تعبان وما ارتاح وايد الفتره الاخيره...
رجعت احوص بالغرفه ..وكل شوي اوايج من البلكونه...المناظر كانت حلوه فتركيا..وجوها وايد حلو..
حتى الفندق هذا وايد حلو.. على قولة ناصر هذا الفندق اللي وصانا به علي ربيعه.. يوم عرف انه ناصر مايدل شي بتركيا تبرع انه يعطيه اسامي فنادق واماكن واشخاص ممكن انه يحتاجهم..مسكين..ماقصر معانا لا هو ولا زوجته..

رجعت التفت لناصر اللي نايم على بطنه كالمعتاد..
وريله اليمين طالعه من تحت الفراش..كالمعتاد بعد...
لازم يطلع هالريل والا مايرتاح..!..
رجعت لشنطتي وطلعت منها بدله خفيفه ..قميص ابيض عليه تطريزات ناعمه بالابيض وتخريمات بسيطه صغيره..مع تنوره سماويه مخططه بالابيض..
خلني اتسلى لين يقرر ناصر انه شبع رقاد...
لكني لبست وسحيت شعري حتى اني حطيت ميك اب خفيف وبعده ناصر ماقام..
ياربي مليت ماقدر خلني ازعجه شوي...
صح..
خلني انتقم منه عاللي سواه فيني امس الصبح..ماخلاني ارقد وهو مستانس ويضحك علي...

ركبت على الشبريه وعلى ويهي ابتسامه شيطانية..
انسدحت على بطني واستندت بايدي على المخدات الصغار..
تاملت فويهه..
وحسيت بقلبي يذوب..
مديت ايدي وقعدت اتلمس ملامحه شوي شوي...
لين فتح عيونه...
مهرة: صباح الخير يالرقاد..
ابتسم بتكاسل ورد غمض عينه..
ناصر: صباح النور..
مهرة: مب بسك رقاد؟..امس راقد الساعه 11..والحين الساعه 10..بتكمل 12 ساعه تراك..
ناصر: ياعيني عاللي يرافسون ولا يحسون.. انتي لين 3 ما استقر رقادج..
كتمت ضحكتي ومثلت اني متولمه..
مهرة: اويييه..رافستك؟؟؟ انا اسفه...
شك ناصر بالموضوع ورجع يفتح عينه ويتطالعني بتشكك..ماقدرت اسكت وانفجرت بالضحك...
ناصر: خايسه !!..
وفر علي المخده الصغيره..
مهرة: هههههههه انا اعاقبك في الليل على اللي تسويه فيني طول اليوم..
ناصر: مب ناصر انا اذا مابديت من الليله اربط ريولج عن المرافس.. صدق والله مهرة انتي وايد ترافسين ..
ضحكت .. عادي ما انحرجت لانه يوميا يعلق على طريقة رقادي ويشتكي اني ارافسه..بس انا ما احس بعمري.. برايه..هو يبا يرقد معاي يتحملني..
مهرة: هههههههه انزين مابتقوم يعني؟
ناصر: خليني بعد ساعه ارقد..
مهرة: بتطلعنا يعني بعد صلاة الظهر جي..
ناصر: وشوفيها..بنتغدا وبنطلع نحوط ومابردج الا في الليل..
مهرة: وشو اسوي انا لين تنش انته..
حط ايده ناصر عالمخده الللي حذاله ودق عليها ..عزومه صامته يباني ارقد حذاله..
مهرة: لا شكرا مافيني نوم ..عقب ماتلبست وكل شي تباني ارقد..برايك ارقد بترياك..

طنشني ناصر ورقد... ولا عالبال...
رجعت احوص في الغرفه..اتطالع التلفزيون.. حصلت بروشور فيه فيه اهم المناطق السياحية والمطاعم في تركيا.. كدليل للسياح يوزعونه عالغرف.. والله زين..
قعدت اتفرج مره عليه ومره على التلفزيون لين قام ناصر بعد ساعه ومن الكسل اللي فيه ماراح للحمام على طول...يا عندي وانسدح على الكرسي وحط راسه على ريولي..
مهرة: هااه شكلك ماشبعت..
ومسحت على شعره بحنان وانا ابتسم على حركاته وتصرفاته...
احيانا احسه خبيث واحيانا احسه بريء.. وهالمزيج هو اللي جاذبني له...
ناصر: شو رايج اليوم مانطلع..
مهرة: لا بنطلع..
ناصر: مااااااااااااافيج رومانسية انتي..!!
نش عن الكرسي ودخل الحمام وانا ابتسم واضحك فخاطري...
مسكين ناصر.. عذبته من كثر ماهو صابر علي...
بس شو اسوي.. كل ما اشوف تساهله معاي اتمادى اكثر...
بصراحه انا ما انعطى ويه..
انا زوجته ... وهذا حقه...!
وانا اصلا تعبت من الترقب والحيره والتوتر..خاطري انام واقوم وانا منتهية من هالمشكله..
لين متى؟؟؟
طلع ناصر من الحمام وعلى كتفه فوطه ..
ناصر: شو هذا اللي فايدج؟
مهرة: اااه..هذا دليل سياحي حق تركيا...
ناصر: اشوف..
تقرب ناصر وخذ البروشور من ايدي وقعد يجلب فيه ..وانا اتامل فناصر وادور الشجاعه..
مهرة: آآه..ناصر.. اذا تبا...مابنطلع اليوم..
رفع ناصر نظرة لي وابتسم..
ناصر: لا بنطلع..
مهرة: لا تغايظ..
ناصر: ما اغايظ.. بس لا ترضخين لشي انتي ماتبينه او مب مستعده له حتى لو كانت رغبه مني انا.. انا ماريد اغصبج..
مهرة: انته ماغصبتني..حتى انا تعبت .. انا اللي اماطل واماطل بصراحه مصختها...وانته وايد صابر علي..
ناصر: وبصبر عليج اكثر.. لا تحاتين..
مهرة: لا تدلعني وايد ناصر...
ناصر: انا ماريد اخطط لموضوع مثل هذا..متى ماصار تراه صار.. لا تحطينه فبالج وماعليج من تلميحاتي..

تركني ناصر بعد ما طيب خاطري وهدى بالي كعادته وراح يبدل ملابسه..
كنت اتامله واحس انه حبي له يتضاعف ويزيد...
ابتسمت وانا اوعده في نفسي..بانه صبره مابيطول..
-------------------------------------
-------------------------------------------------
الجزء الواحد والستون [الأخير]..
-------------------------------
اليوم: الخميس..
المكان: مطار دبي الدولي..
الوقت: السابعه والنصف مساءا..
-------------------------------
(مبارك) ..

حطيت شنطتي الرياضية عالارض وانا امسك جوازي وتذكرتي بايدي وتطالعت سيف..
اللي كان متبرع يوصلني للمطار بنفسه كالعاده..
ورفض انه يخلي ابوي يودر مرضاه ومواعيده عشاني..
مبارك: ماوصيك عاد يا سيف.. لا تظيع وقتك كله باللعب..
سيف: لا تحاتي .. وانا بعد ماوصيك لا تظيع وقتك كله بالدراسه وتصير ممل..!!!
مبارك: هههههههههههههه امحق توصية مادرابك ابويه والا مابيخليك توصلني.
سيف: لا صدق والله عيش حياتك ياخي..
مبارك: ومنو قالك اني كله دراسه؟ انا اطلع وماخلي شي ماسويه واجربه ...... الا الحرامof course ..
سيف: عيل يوم انا كنت هناك كنت كادني دراسه..!!!
مبارك: No ..انته حسيت جي..لانك مب متعود انه دايما وراك دراسه لازم اتابعها.. انته كان عندك وقت فراغ وايد بس كنت تقضيه كله تقريبا بحل الواجبات لانك بطيء ماتخلص بسرعه وكله تتشكى..
سيف: وبعد شو خليت فيني ؟..
مبارك: هههههههه its ok بتتعود وبتعرف كيف ترتب وقتك..any way انا لازم اروح الحين.. ماتامرنا بشي سيف؟

سلم علي سيف بالايد ورجع حظني ..
سيف: سلامتك مبارك تحمل على عمرك ولا تقاطعنا عاد بالتيلفون.. او حتى انترنيت عالاقل..
مبارك: هههههههه يوم بتركب فبيتكم انترنيت تعال كلمني..
سيف: خبرك عتيج انا طلبت انترنيت وبيركبونه الاسبوع الياي..
مبارك: تعودت عليه فبريطانيا واحين حسيت باهميته هاه.!
سيف: صدقك..بيوفر علينا خساير المكالمات.. ومتى بتي الامارات مره ثانيه عاد؟
مبارك: ماعندي اجازات قريبه يا سيف..الله بيسهل وبخبركم ان شاء الله...

بعد السلامات للمرة الثانيه مع سيف.. توادعنا وافترقنا...
وبعد ماخلصت ترتيبات السفر..يلست عالكرسي اتريا طيارتي..
وانا ماقدر افكر الا بالحزن..والاكتئاب..
ليش احس فجأة اني صرت وحيد؟...
وانه الكل انشغل عني..
ليت امي عايشه..
ليت ابوي يقرر يستقر فبريطانيا مره ثانيه..
There is nothing wrong with that...نقدر نزور اهلنا بالامارات في المناسبات والاجازات..
لكن ابوي عنده جذور هناك..وصارت له جذور يديده بزواجه من خالتي آمنة..
اللي ماقدر اقول عنها غير انها مريحتنه...وحسسته بالاستقرار..

فلييش بيخلي هالاحساس وبيتحمل الغربه مره ثانيه عشاني؟..
كيف بتحمل السنوات اليايه وحيد..!.
صحيح انا متعود عالاستقلالية طول عمري لكن عالاقل كنت ارجع البيت احصل حد اكلمه..
وهل انا صدق برجع استقر في الامارات ؟ رغم علمي باني بحصل في بريطانيا مستقبل وظيفي ودراسي احسن؟
الله يعلم..
احس اني محتاج لشخص... حد يخليني اتحمل جو الوحده...
خطرت فبالي فجاة مهرة...
اللي عرفت انها سافرت مع زوجها ..في (شهر عسل) متاخر...
غصبن عني احس بالغيره..
خصوصا انها راحت ولا سلمت علي رغم انها سلمت على اهلها كلهم..
ومنو اكون انا عشان تسلم علي؟..
وهي عندها زوج مثل ناصر مهتم فيها وحاطنها بعيونه..!
ليش بتفكر فيني انا؟..
لا تنسى يا مبارك انك رفضت حبها البريء لك بقسوه وغباء..
وانك ماتستاهل منها أي اهتمام الحين..
صارت على ذمة ريال ثاني..
وانته خارج نطاق اهتماماتها...
ــــــــــــــــــــــــــــــــــــــــــــــــــ ـ

تنهدت وانا اسمع نداء الطايره.. قمت شليت شنطتي وركبت الطايره وانا بالي مب عندي..
That’s it then? Back to UK
---------------------------------------
اليوم: الخميس..
المكان: تركيا/اسطنبول.
الوقت: التاسعه مساءا
---------------------------------------
(ناصر)...


مهرة: لحظه لحظه.. خلني اعدل شيلتي انزين..!!
ابتسمت وانا امد بتيلفوني جدامي شوي واحاول اصورها ...
ناصر: حلوه مثل ما انتي..
مهرة: اووه من هالمهب.. هي انته مرتاح مافيك شي يتحرك لا شعر ولا شيله ولا سفره انا حليلي متلعوزه..
ناصر: هههههههه ..
صورت مهرة كذا صوره وكلهن في نظري حلوات..
يازينها وهي مرتاحه نفسيا تضحك وتسولف ولا شي في بالها ولا شي موترنها ومخوفنها..

مهرة: بسك من التصوير انا يعت اطلب لنا عشا..
ناصر: ان شاااااااء الله من عيوني..

كنا انا ومهرة يالسين في مطعم قريب من الفندق..وكان المطعم نظامه خارجي يعني في الهواء الطلق..
طلبت من النادل اييبلنا المانيو واخترنا عشا ..اول ماراح الريال طبت علينا وحده تركية عيوز..
ملابسها غير متناسقة ولابسه حجاب..
شكلها فقيره ..
قعدت تكلمني بالتركي جني افهم عليها..
ومهرة تتبسم..
ناصر: what do you want?
والتركية ترمس..بالتركي طبعا..وانا مب فاهم شو تبا.. كان موقف بايخ..
ناصر: هاي كيف اكلمها احين؟... no speaking turkey…no turkey!!!!
مهرة: ههههههههههه ناصر يمكن تبا فلوس!..
ناصر: شو فلوسه اكد عليها انا...!
فجاة مدت التركية اللي ماسكتت عن الرمسة ..ايدها لتيلفوني المحطوط عالطاوله.. ومازالت تسالني عن شي ماعرفه..وتاشر لي بايدها بحركات مب مفهومه..
ناصر: حووه..خليه...!..
وسحبت تيلفوني من ايدها...
مهرة: يمكن تبا تتصل..!
ناصر: no sorry!!

مهرة كل شوي تطلع لي بتفسير وانا اجاوب للتركية مباشره...
مهرة: يمكن تظايقت لانك صورتني؟
ناصر: شخصها هيه؟..لاحول ياهي ورطه.. please go..
مهرة: وحليلها ناصر ..
ناصر: لا والله؟ تعالي انتي تفاهمي وياها... المشكله مب طايعه تسكت عن الرمسه التركية وهي تعرف انه مب فاهمين عليها..
ورديت اتطالع التركية بظيق واضح واستغراب..
ومهرة فاطسه من الظحك..لدرجه انها ويهها استوى احمر..
حتى انا شاركتها الضحك عالتركية..
ليين يانا النادل وانقذنا..
سالته وقلت له يترجم لنا شو تقول هالحرمه وشو تبا بما انه يفهم شوي انغليزي..
وفي الاخير طلعت تسال عن تيلفوني كم سعره ومن وين شارنه..!!
مهرة: وحليييييييييييلها ..
ويوم جاوبناها التركية ابتسمت لي ولمهرة وراحت تمسح على راس مهرة وتقولها كلام بالتركي..ومهرة تبتسم لها بهباله..
في النهاية راحت التركية واعتذر النادل عن هالموقف ..اللي ماله ذنب فيه..
لكن دام هالموقف خلا مهرة تظحك جي وتستانس..انا ماعندي مانع اتعرض لهالمواقف يوميا..
كان العشا لذيذ..
والجو حلو ..والمكان حلو..بعد ما تعشينا رجعنا انا ومهرة نتمشى لين الفندق..
مهرة: ليش مانحوط بعدنا شوي..؟
ناصر: لا اسف ما اضمن شوارعهم في الليل خصوصا حق سياح مثلنا.. انا ماكد ييت تركيا..بسج من الحواطه طول النهار تحوطين.!! ماتعبتي..؟

خشت مهرة ايدها حوالين ايدي ولصقت فيني ونحن نمشي..
مهرة: دامني وياك ما اتعب..
ناصر: انتي سدتج التركية اليوم من الظحك...
ردت مهرة تظحك وتظحك...
مهرة: تعرف؟؟ انا كنت اظحك على شكلك مب عليها..والله ليتك شفت عمرك..متوهق من قلب.!
ناصر: ههههههههه ابلشتنا بالتركي..
مهرة: شو بتسوي عيل يوم بتسير عند الايطاليين؟..
ناصر: بخليج انتي تتفاهمين وياهم..بالايطالي..
مهرة: هيه مايحتاي ترا الايطالية لغتي الثانية.. الا صدق متى بنسير ايطاليا؟
ناصر: ورا باجر ان شاء الله..
مهرة: وشو الترتيب يوم نوصل هناك؟
ناصر: هممم بنوصل روما بالطياره وبنقعد فيها يومين وعقب بالقطار بنسير فينيسيا وبنقعد فيها يومين جي وعقب بعد بالقطار بنسير فلورنس وبنقعد فيها يومين وعقب بالقطار بنرد روما ومن روما بنركب الطياره وبنرد البلاد ان شاء الله...
مهرة: ماشاء الله جدول مسوي..وشمعنى هالمدن الثلاث..؟
ناصر: تقريبا احلى شي هذيل..نبا نشوف شي يستاهل الشوف مب شي عادي..
مهرة: اللي تشوفه ناصر..

وصلنا الفندق ونحن ماوقفنا من السوالف والخطط ..
مزاج مهرة كان وايد حلو بصراحه.. انتقلت راحتها وفرحتها لي انا وانعكست على تصرفاتي وياها ..
الله يكمل علينا بس..
---------------------------
---------------------------
اليوم: الجمعة
المكان: بيت ام سلطان..
الوقت: العاشره صباحا..
---------------------------
(كنة)..

مسكت تيلفون الصاله واتصلت على رقم منى وانا منحرجه من الوقت..
فظيحه اكيد راقده وريلها عندها واليوم الجمعه...
شو ابا احشرهم ..!
بس مضطره..
بعد كم رنه ردت علي منى اللي من صوتها عرفت انها ماكانت نايمه..
منى: مرحبا..
كنة: هلا منووه..صباح الخير..شحالج؟
منى: هلا كنوه..صباح الورد انا بخير انتي شحالج وشحال اهلج..؟
كنة: كلنا بخير..سمحيلي داقتلج في هالوقت صدق ماستحي على ويهي..
منى: ههههههههههه عنبو يا كنوه لا عادي اصلا انا ماكنت راقده والتيلفون محطوط صامت يعني راشد ماقام من صوته لا تحاتين..
كنة: صدق والله؟
منى: هي فديتج..شو بلاج شكلج متوهقة.!
كنة: هي والله ..اكتشفت انه الاسبوع اللي بعد الياي..عندي امتحانين..وابا ادرس لهم في اخر الاسبوع الياي..يعني الاسبوع الياي مابقدر اسير دبي عشان افصل..
منى: عيل متى بتسيرين جي وايد بتتاخرين..
كنة: انا اتفقت ويا امايه بنسير اليوم اذا تقدرين.. واذا ماتقدرين عادي عاذرتنج منى صح اني مابعرف اتصرف ولا اختار شي وانتي مب وياي بس ماقدر اضغط عليج..
منى: اليوووم؟؟؟.. اويه ما استعديت نفسيا !!!
كنة: ههههههه لازم تستعدين نفسيا.. شاوري ريلج اذا وافق تسيرين اليوم تعالي بيتنا على طول..واذا ماوافق خبريني عشان اروح انا وامي..شو نسوي بعد..
منى: خلاص عيل حبيبتي بسكر عنج احينه وبشاوره..
كنة: انا اعرف راشد بيعصب انج بتوعينه عشان هالسبب..! والله اني متلوووومه..!!
منى: لا تحاتين يا كنه اصلا هو بروحه بينش بعد ساعه جي لانه قال انه عنده شغل يخلصه..
كنة: اوكيه عيل..ان شاء الله يوافق..
منى: ان شاء الله.. برايج عيل الحينه وبدقلج خلاف..
كنة: اوكييه..مع السلامه..

خليت التيلفون ورحت الصاله...كانت يدوه يالسه هناك مع امي..
ام سلطان: ها خبرتي بنت عمج؟
كنة: هيه يدوه..بتشاور راشد وبترد علينا خبر..
ام مايد: وانتي لازم تلعوزين بنت عمج وياج الحرمه حامل بتعبينها من كثر المشاوير..!!
كنة: امايه انتي تعرفين اني ماعرف اختار شي بدون منى..وهي بعد اصلا تبا تفصل فستان حق العرس..وان شاء الله مابنتعبها وين مانروح بنحط لها كرسي..
ام مايد: الله يعينها عليج المسكينه...
ام سلطان: ماعليها منى هبة ريح ماشاء الله عليها..

خليتهم ورحت غرفتي وجمعت الموديلات اللي طبعتها وحطيتهم في شنطتي مع مستلزماتي واي شي احتاجه لانه الظاهر انه بنقضي طول اليوم هناك...

----------------------------------------
اليوم: الجمعة..
المكان: سيارة راشد..
الوقت: الحادية عشره صباحا..
---------------------------------------
( راشد)..

اصبحنا واصبح الملك لله..
هذي كنة بنت عم منى مسويه لي ازمة..
من صباح الله خير وعوني عشان هالمشوار..
راشد: وليش ماتفصلن في العين؟؟
منى: راشد نحن رمسنا في هالسالفه اكثر من مره..
راشد: والله انا خايف عليج يا منى..
منى: حبيبي لا تحاتيني مابيصيرلي شي ان شاء الله..
راشد: ومتى بتردون؟
منى: متى ماخلصنا بنرد مابنقعد هناك بلا حايه..
راشد: ماظني تخلصن قبل الليل..
منى: انا بعد ما اتوقع نخلص بسرعه..بس ان شاء الله ..الله بيسهل..يالله عاد راشد لا اتم متظايق هو يوم واحد وبيخطف..
راشد: احين امرره بتسيرون؟..
منى : على حسب كلام كنة... بس مادري احتمال نتغدى من وقت ونروح..
راشد: يكون احسن بعد ...ديري بالج على نفسج ماوصيج..
وقفت جدام بيت يدة منى.. فنفس الوقت تقربت منى مني وباستني على خدي وهي تبتسم..
منى: فديت اللي يحاتيني جني ياهل.. لا تخاف علي كل شوي بطمنك بالتيلفون...مع السلامه

نزلت منى من صوب...وتراجعت انا بالسياره ورحت لمشاويري من صوب ثاني..
بعد صلاة الجمعه رجعت البيت..
اتصلبي سهيل يسال عن مكاني...
راشد: انا في البيت.. تعال انته وشيخه تغدوا عندنا.. ترا الحرمه محد سارت دبي..
سهيل: والله؟..خلاص عيل بنيكم..
راشد: نترياكم..

التفت لامي اللي كانت تطالعني بنظره عتب..
ام راشد: ليش تخلي منى تروح بروحها دبي...حرمتك توها باول حملها وماتروم عالدواره..!
راشد: شو اسويبها امايه قلت لها ..بس هي تقول عادي وبعد تبا تفصل فستان ومادري اشو حق عرس اخوها..
ام راشد: وصيتها على عمرها عاد..
راشد: هيه..لا تحاتين..منى قد المسؤولية وما بتعب عمرها على كثر ماوصيتها...المهم ترا سهيل وشيخه بيتغدون عندنا..
ام راشد: حياهم الله...

عالغدا..كلنا كنا نتغدا رباعه..انا وابويه وامي وسهيل وشيخه..

شيخة: امايه دعييلي تراني بقدم على وظيفه الاسبوع الياي..
ام راشد: ويدي..!! ونحن شو قايلين عن هالموضوع..!
شيخه: هذاك قبل فديت روحج قبل ماعرس لكن عقب العرس رأف بحالي سهيل ووافق..
بو راشد: رأف بحالج والا حنيتي على راسه؟؟؟
سهيل: برايها عمي.. ملانه من قعدة البيت خلها تشغل نفسها لين تحصل شي ثاني يشغلها..
ام راشد: قصدك عيال؟
رفعت عيني بصمت لشيخه وسهيل وحسيت انه ويوههم اعتفست...
وفهمت حالتهم زين لانه انا ومنى مرينا بنفس الحاله لين الله رزقنا ..
سهيل: يوم الله بيكتب لنا خالوه بنيب عيال ان شاء الله..
ام راشد: ان شاء الله فديتك..بس اياني واياج يا شويخ ان قصرتي فريلج عسب الشغل تسمعين؟
سهيل: ههههههههههه فديتج يا خالوه..
شيخه: امايه لا تحاتين..خلهم يقبلوني اول...
راشد: والله انا اشوف مالج حايه بالشغل سهيل مب مقصر فيج..
تنرفزت شيخه ...
شيخه: راشد...مب سالفه مادة وسهيل صدق مب مقصر فيني مول..بس تعال اقعد في البيت 24 ساعه مافي شي يشغلك ولا تسوي أي شي.. عقب تعال قول لي مالي حايه..!
سهيل: لا تنرفزونها خلوها تتهنى بغداها... والمكان اللي بتقدم فيه ..كله حريم ..عادي راشد مافيها شي اذا اشتغلت شيخه.. لا تعقدون الامور..
راشد: كيفكم والله..

راقبت شيخه والابتسامه تتسلل لشفايفها بابتسامه نصر..
ابتسمت انا بعد..
حليلج يا شيخه...
الله وفقها بواحد يناسبها..ومايعقد عليها حياتها ..
الله يرزقهم بذرية مثل ما الله رزقني انا ومنى ان شاء الله..

-----------------------------
اليوم: الجمعه..
المكان: بيت بو محمد..
الوقت: الواحدة ظهرا..
---------------------------
(يوسف)...

سمعت صوت امي من الطابق التحتي..
ام محمد: يابويه يالله يهديك والا بنسير ويا محمد ترانا..!
يوسف: ياي ياي...

خذت بوكي وتيلفوني ومفاتيحي من على الطاوله وخشيتهم فمخباي عالسريع.. وطلعت من الغرفه ونزلت..

شفت امي في الصالة لابسه عباتها مستعده وابوي يالس عالكرسي يشرب قهوه..
مسكت سفرتي ويلست اتسفر..
يوسف: يعني ليش تهددين يوم محمد اصلا مب هني..!
ام محمد: احين بيطلع من الحجره هو وحرمته..
بو محمد: يالله بسرعه لا تحتشر يدتك..
نش ابويه من الكرسي وطلع من البيت وطلعنا انا وامي وراه ..

كنت انا اسوق وابويه يالس عدالي وامي يلست ورا.. سايرين صوب بيت يدوه..
هناك انصدمنا بمنى يالسه في الصالة مع يدوه وام مايد..
وبعد السلامات..
ام محمد: ماقلتيلنا بنتي انج هنيه..!
منى: ييت الضحى ..بنسير انا وكنه وخالتي ام مايد دبي..
يوسف: شوو؟..شو تسوون في دبي؟ وليش محد قال لي؟؟
بطلت منى عيونها..
منى: وليش نقول لك؟؟؟ مشوار عادي..يعني بتقول لا..
يلست عالكرسي...
يوسف: عالاقل يكون عندي خبر.. والا شو رايج انتي يدوه !!..
ام سلطان: رايي في شو؟؟
يوسف: سايرات دبي وماحد خبرني..!
ام سلطان: جانك بتوديهن زين احسن من دوارتهن ويا الدريول وهن كلهن حريم..
يوسف: هاه..!
منى: ههههههههههه اوييييه توهق..محد قال لك تتخقق.. يالله تعال ودنا دبي..
يوسف: لا مافيني عليكن انا عندي شغل..

قطعت كلامي وانا ارفع نظري واشوف كنة وهي نازله من الدري بعباتها وتدخل الصالة..
تلاقت عيني بعينها وابتسمت شوي ونزلت عينها ..
تقربت تسلم على ابوي وامي..
حسيت انها سوت لي طاف لين التفتت لي اخيرا وابتسمت..
يوسف: شحالج كنه.؟
كنة: الحمد لله ..انته شحالك؟..
يوسف: بخير الله يسلمج.. ..

ومازاد حوارنا اكثر من جذي بسبب وصول محمد وميثا حرمته ..وماتجرأنا حتى على النظرات لشدة المراقبة علينا..
ياشينه من وضع...!

بعد دقايق نزل مايد وسرنا نحن الرياييل كلنا للميلس عشان نتغدا وخلينا الحريم يتغدن براحتهم..
وبعد حوالي ساعه طلعت برا الميلس اكلم واحد من ربعي نتفق مشوار بنروح له المسا..
وكنت اتكلم وانا عيني على باب البيت يوم شفت كنه ومنى طالعات بعبيهن .. ووقفن عدال السياره يسولفن..
الظاهر انهن يترين عموه ام مايد..
تلفت حوالي اتاكد انه محد بيشوفني..
واستغليت الفرصه ورحت لهن عند السياره..
منى: هلا يوسف..!
يوسف: هلا..
وقفت جدامهن وعقدت ايدي جدامي صدري.. وتطالعت كنة..
يوسف: وصلج ايميلي؟
ابتسمت كنة وهي متسانده عالسياره ونزلت راسها..
كنة: هيه وصلتني..
منى: أي رساله؟؟
يوسف: وانتي مستانسه طبعا..!
كنة: وانته ليش وايد محتر..!
منى: حووه اكلمكم انا ...اي رساله؟؟؟
يوسف: امايه ماوافقت عالملجه..تحاتي الشيخه كنه عن اشغلها بالزيارات والتيلفونات..
منى: وهي صاااادقه امايه..!!!
يوسف: انتي بعد اتحسبين اني باذيهم؟.. مشكوره يا ختيه..!
منى: لا اللي اعرفه انه كنه هي اللي بتاذيك..
التفت كنة لمنى مقهوره وظربتها..
كنة: سباله..!!! انا قلت بتوقفين وياي..
منى: هههههههههه.. عالعموم كلها ثلاث شهور وبيمرن بلمح البصر..
يوسف: اصلا انا الملجه خلاص طابت من نفسي مابغيها... المهم انتن شو بتسون في دبي؟
منى: بنسير نفصل ..كنة تبا تفصل فستان العرس وباقي الفساتين لانهن ياخذن وقت لين يجهزن..
كانت عيني على كنه اللي احمر ويهها من طاري فستان العرس..
ابتسمت وانا احس بشعور غريب..
يوسف: اذا محتايه شي خبريني بزيدج..
كنة: لا مشكور يوسف اللي يبتوه يكفي وايد وزياده بعد..مب قاصرني شي ..
يوسف: اكيد؟..
كنة: هيه اكيد..لا تحاتي..
يوسف: خلاص عيل انا بخليكم قبل ماتطلع عموه.. تحملوا على عماركم..

خليتهم ورجعت الميلس لانه وقفتي معاهم ماكانت حلوه.. لو طلع حد وشافنا شو بيقول؟..
والا انا ودي اقعد مع كنة ..خصوصا لاني احس اني الفتره الاخيره ابتعدت عنها وهي ابتعدت عني..
ماقمت اعرف شو اللي فخاطرها وشو تفكر فيه ...
ماقمت اكلمها...
اااخ بس متى بيخلصن هالثلاث شهور..!
-----------------------------------
اليوم: السبت..
المكان: احد المقاهي المفتوحه في لندن..
الوقت: الخامسة والنصف مساءا
----------------------------------
(مبارك)...


حطيت ايدي في جيبي وطلعت تيلفوني ومفاتيحي وحطيتهم عالطاوله المدوره قبل ما اقعد..
كنت انا وشلة من الطلاب العرب من ربعي يايين الكوفي نغير عن جو الدراسه بما انه وييك ايند..
وماحبينا نطلع مع ربعنا الاجانب لانه بنضطر نتكلم انغليزي.. عشان يفهمون علينا ..من الوقاحه نتكلم عربي وهم موجودين بينا..
وكانت هذي الطلعات مع الطلاب العرب المتنفس الوحيد لنا تقريبا عشان ناخذ راحتنا ونتواصل مع اصلنا العربي على قولتهم..
محمد: strange .. المكان مو زحمه كالعاده.!.
مبارك: احسن.. احس اني مختنق...
محمد كان من الكويت ..كان هو وفيصل اللي من البحرين اكثر شابين اطلع معاهم ...
فيصل: شفيك مبارك؟.. صاير مكتئب الفتره الاخيره..
مبارك: انا؟؟ لالا مافيني شي..
محمد: الا تعال صج .. شفيه عليك بو كشه بيظا..!
محمد كان يقصد بروفيسور كارلو اللي يدرسنا رياضيات...
فيصل: يووه لا تقعد تزيده ...!
مبارك: يعني انته لاحظت بعد؟؟... يوم اقول لفيصل قال لا انته بس حساس...الشيبه حاط علي بس لاني تاخرت في اول كلاس..
محمد: بس جذي .!
مبارك: هيه.. من يومها وهو حاط دوبه من دوبي.. بس يخسي يرسبني انا اراويه ..الا هو رياضيات بيس اوف كيك..
فيصل: فكونا عاد من طاري الكوليج..
مبارك: صدقك والله.. حد بيروح النادي اليوم..
محمد: im in..
فيصل: me too

بس ماكانت اجابتهم محور اهتمامي في هاللحظه...لاني يوم التفت شفت مها مع 4 بنات ثانيات من ربعها ..
شو هالصدف الغريبه..
اخر شخص توقعت اشوفه هني ...
بس طالع عليها الوردي حلو بصراحه..
فجاة تذكرت سيف وكلامه عنها " بنت المطاعم" .. وتلميحاته عنها..
ماقدرت امسك ظحكتي من تذكرته ...ضحكت ضحكة خفيفه وهزيت راسي على خبال سيف..
ويوم رفعت عيني مره ثانيه شفت مها تطالعني بنظره ماقول عنها غير " ســــم"..
اعوذ بالله شفيها؟!!
شفتها تطالعني وهي رافعه حاجب واحد باستنكار وتطالعتني من فوق لتحت بعصبية والتفتت عني..!!!
مبارك: شفيها هذي .!
محمد: منو ؟..
ما انتبهت على نفسي اني تكلمت بصوت عالي الا يوم رد علي محمد..رديت التفت له متفاجئ...
مبارك: ااااااه ..شي بس شفت بنت عندنا في الكولج..وسرحت فويهها تذكرت سيف ولد عمتي.. وضحكت والظاهر تتحسبني اضحك عليها او شي....
فيصل: خلها تولي..
ابتسمت... ومديت ايدي العب بمفاتيح دراجتي..
مبارك: you're right

بس ماقدرت امنع نفسي اني اتسائل ...
كيف اصلح الموقف معاها... ظروري يعني اسرح فويهها انا بعد ماقدرت التفت؟؟
احين زين جي البنت تاخذ عني فكره مب زينه..!
والله حاله..!
بعد ربع ساعه من السوالف ويا الشباب.. شفت بطرف عيني مها تقوم مع وحده ثانيه من ربيعاتها ويدخلون المطعم الداخلي ..
الظاهر بيطلبون شي..
استغليت الفرصه وقمت انا بعد بدون تفكير..
مبارك: تشربون شي؟..
محمد: كابتشينو...
فيصل: نفس الشي... بس هاتلنا doughnuts وياك..
مبارك: اوكي..
دخلت المطعم عالسريع ..شفت مها هناك هي وربيعتها يتشاورن عالطلبية..
وقفت على بعد خطوتين منهم وطلبت انا بعد طلبية الشباب..
توترت...
انا قمت بدون تفكير وما اعرف اصلا شو بقولها ..وكيف ببدا معاها..
بس مستحيل اخلي الموقف يمر والسلام..
التفتت لي مها تطالعتني بدون اهتمام وردت تصد ..
شكلي مب حلو واقف..
تحرك يا مبارك....قول شي..اي شي..!
مبارك: آآه...Excuse me..
التفتت مها مره ثانيه مستغربه وربيعتها كانت لهم نفس الملامح..
مها: yes?
مبارك: مها..ممكن اكلمج شوي...
عقدت مها حواجبها ..
مها: من وين عرفت اسمي؟..
ابتسمت بتوتر...
مبارك: is it secret?.. We're in same collage, remember?
مها: right.
نزلت مها عيونها ..
مبارك: هممم اسف وقفتج بس ماحبيت الموقف اللي صار من شوي يمر بسوء فهم..
سالتني مها باستهبال واضح..
مها: أي موقف..!
مبارك: انتي تعرفين أي موقف... انا سرحت بويهج بدون قصد ..ويوم ضحكت والله ماكنت اضحك عليج ..كنت اتذكر ولد عمتي وتذكرت تعليق قاله لي مره وظحكت هذي كل السالفه..
مها: آآه.. Don’t worry. It's ok
مبارك: اكيد ؟ يعني مب حاطه فخاطرج وفاهمتني غلط؟..
مها: هههههه لا عادي..بس حتى لو كنت.. Why you care any way?
مبارك: I just do..
طلعت مني الكلمه بعفويه...
يعني شو تتوقع..
اوفكورس اهتم بسمعتي وبنظره الناس لي...
بس خوفي احين تجلب الموضوع تحرش وتتحسبني اقصد انه رايها هي بالخصوص يهمني..!
مب مهم..
ومابطول الموضوع.. حاولت ابتسم وانا اقول..
مبارك: اوكي عيل... See you around.
خذت الطلبية ودفعت عنها ومشيت وانا منتبه على ويه مها اللي كان منحرج شوي..
ورجعت عند الشباب وحاولت قد ما اقدر ما التفت جهة مها وربعها طول القعده..
كانت محاولات صعبه بس اعتبر نفسي نجحت...
-----------------------------------
اليوم: الاحد..
المكان: ايطاليا/روما..
الوقت: الخامسة والنصف مساءا..
--------------------------------
(مهرة)...

ماتوقعت ايطاليا تكون بهالروعه.. خصوصا هالوقت من السنه اللي يعتبر ربيع بالنسبه لايطاليا..
وكل مكان تلتفت له تشوف ورد اشكال وانواع..والجو حلو ومنعش..
صحيح تعب السفر مازال فينا انا وناصر...
لكن انتعشنا يوم شفنا المناظر هني وقررنا نتمشى على ريولنا في شوارع روما ..
روما اللي مليانه شواهد تاريخية.. من شتى الانواع..
واكثر شي لفت انتباهنا انا وناصر كانت التماثيل..
حدث ولا حرج...كلها تماثيل مفاصيخ..
كنا كل ما نمر عدال نافوره او تمثال ما ادرى بعمري الا وبايد ناصر على عيوني...
وهذي يمكن سادس مره يسويها...!
مهرة: ناصر..!!!
ناصر: عيب عيب عيب..!
مهرة: شمعنى يعني انته تشوف وانا لا...
ناصر: انا ريال ..انتي بريئه زياده عن اللزوم ماريد عيونج تتفتح على هالمناظر..!
مهرة: ياسلام عالمنطق..شو نسوي يعني يوم روما كلها جذي..!
ومسكت ايده وسحبتها عن عيني...
وبدال ما التفت للتماثيل التفت لويه ناصر وانا ابتسم..
مهرة: يعني ليش ما اغطي عينك انا يوم نمر على تماثيل حريم؟؟
ابتسم ناصر وصد بعينه صوب ثاني..
ناصر: انا هالمناظر مب يديده علي ..
فتحت حلجي وانا اشهق من جرأة اللي قاله ناصر لي...
مهرة: والله بكل جرأة قاعد تعترف.!!!
ناصر: ههههههههههههههه..
مهرة: جب انزين... طفس..!

كان ناصر مسند ايده على كتوفي بعفويه.. قربني منه يوم حس اني ببتعد عنه...
ناصر: مهرووه..!
جاوبته بدلع..
مهرة: هاااااه..!
ناصر: تحبيني؟..
ابتسمت..
مهرة: مايخصك..!
ابتعدت عنه وتجدمت شوي بالخطوات ورجعت اصد صوبه ...
كان شكل ناصر يشرح صدري..
وينعش حواسي..
هو صحيح مب جميل ... لكن فيه نوع من الوسامه والرزة الملفتة للنظر..
كان ملاحظ اني قاعده اتامل فيه وهو ساكت عني ويبتسم لي ابتسامه بريئه ممزوجه بخبث ومكر..
دايما نظرته تحسسني انه يعرف عني شي انا نفسي ما اعرفه..!!!
يوترني..!

مهرة: شوفيك؟
ناصر: انتي شوفيج؟.
ابتسمت...
مهرة: حلو شكلك بالجاكيت الطويل..
ناصر: عيونج الحلوه ..
مهرة: شمعنى في تركيا ماكشخت جذي؟..والا كاشخ للايطاليات؟..
وغمزت له ...
ناصر: هههههههه دام عيبتج انتي كفاية علي..!
مهرة: لاااااه..علينا هالكلاااااااام..
ناصر: المشكله انج فاهمتني.. دامج كاشفتني عيل خلاص اختاريلي وحده..
مهرة: هممممم المشكله ما شفتهن حلوات احسهن دفشات..!
ناصر: هههههههه اشتغلت الغيره..
مهرة: ناصر بشوتك..ترا انا من طيبي مب قاعده اغايظك والا اعرف بغيرتك كيف..
ناصر: جربي وشوفي..
رد ناصر سحبني من ايدي عشان ارجع امشي عداله.. وتم ماسك ايدي طوال الفتره..

في الكوفي شوب كنا قاعدين نشرب عصير ...
حسيت بنفسي اسال ناصر بدون تفكير..
مهرة: ناصر انت مستانس؟
ناصر: وايد مهرة... وانتي؟
مهرة: انا عمري ماحسيت بهالسعاده من قبل..
ابتسم ناصر وهو يطالع فعيوني...
ناصر: اوعدج باكثر واكثر يا مهرة...
مهرة: الله لا يحرمني منك ان شاء الله..
ناصر: ولا منج غناتي..!

ابتسمت وانا اصد بعيني واتامل الناس..
غصبن عني افكر بنفسي مب باي حد ثاني...
اخيرا بديت احس بالسعاده اللي يتكلمون عنها الناس ..واشوفها فعيونهم..وابتساماتهم..
حب..استقرار عاطفي..نفسي.. اجتماعي..
هذي نعمة من رب العالمين..قليل من يحصلها..
احس بكل شي فنفسي تغير..
معقول الانسان اللي خربط لي حياتي فيوم من الايام ..يكون هو نفس الانسان اللي يرتبها لي ويبعث فيني مشاعر عمري ماحسيت فيها فحياتي؟
معقول اللي كنت اكرهه كره ماتخيلت نفسي اني قادره عليه...صرت احبه اكثر من أي شخص ثاني؟
اللي كنت اخاف منه...هو الوحيد اللي حسسني بالامان..!

ناصر: بشو تفكرين مهاري.!! مخلنج من عشر دقايق تفكرين بس ماقدر اصبر اكثر لين اعرف..!
رجعت اصد صوب ناصر وعطيته احلى ابتساماتي...
مهرة: كنت افكر شكثر صرت احبك وما اتخيل حياتي بدونك ..!

هاليوم كان احلى الايام من بداية زواجنا... وكان بدون شك نقطة تحول بعلاقتي مع ناصر..!

-------------------------------------------

بعد مرور ثلاثة اشهر..

-------------------------------------------
اليوم: الخميس..
المكان: سيارة يوسف..
الوقت: السابعة مساءا..
-------------------------------------------
(يوسف)...


يوسف: وشوو بالضبط هذا المكسار؟؟؟
ام محمد: ماشي..هذا احتفال بسيط للعايله والقرايب يسوونه هل العروس.. يعرضون فيه زهاب بنتهم وتجهيزاتها وبالمره يكون عزومه عشا.. والعروس ماتطلع فيه..
يوسف: بس؟؟؟ دام العروس مابتطلع فيه عيل مايسوى تحظرونه..!
وقعدت اضحك على نظره امي بسبب تعليقي...
يلوموني؟.. ماحد يقدر يمنعني من الاحساس بالفرح...
كنة صارت حرمتي ابتداءا من امس..
صحيح الملجه كانت سكاتي حالي حال ناصر لكن المهم انها صارت حرمتي وانتهينا..
ومحد يقدر يحرمني من هالشعور..
نقزت شما اختي من وراي تقول..
شما: يوم يقولون العروس ماتطلع معناته ماتنزل بس محد يقول انه مانقدر نسيرلها فوق..
يوسف: عادي احضر..!!
منى: ههههههههههههههههههههه والله عرفت انك بتقول جي !!
ام محمد: ويدي يا ولدي شبلاك.!!. شو مسوتبك بنت عمك هالكثر مب رايم تصبر حاشرنا من ثلاث شهور !
منى: مسوتله عمل اامايه..!
ام محمد: حشى عليها ماظنتي..الا هذا اخوج اروحه متخبل..
شما: شمعنى انا ريلي عقل يوم عرس وماتخبل شرات يوسف.!!
منى: حتى راشد كان وايد عاقل..!!
يوسف: قل اعوذ برب الفلق..!!!!.. قولن ماشاء الله يالحاسدات..!

وصلنا بيت يدوه اللي كان واضح عليه حتى في الحوش انهم مرتبينه ترتيب معين ومستغلين الجو الحلو في هالوقت من السنه..
خارجيا كانوا حاطين الطاولات والبوفيه وكل شي مرتب ...
الظاهر الصالة الداخلية مستغلينها لعرض الزهاب...
ااخ خاطري لو ادخل اشوف كنه..!
مب حرام؟ ملجت عليها ولا شفتها ولا كلمتها مثل الاوادم؟؟؟
قسسسسسم بالله اني مظلوووم ومأكول حقي !!

نزلت امايه وشما ..اما انا زقرت منى ..
منى: آمر يالمعرس..!
يوسف: منى..دخييييييييييييييييييييل والديج صوريها لي..!
منى: شو شو شو؟؟؟..
يوسف: منى عن النحاسه وتذكري شكثر انا ساعدتج يوم عرستي براشد..انا اخوج!!
منى: بس كنه يمكن ماتطيع..!
يوسف: ماعليج منها..انا احين ريلها .. وسوي عمرج انتي تصورين العزيمه وجي بس لا تقصرين بتصوير كنه ..بترياج في الليل وماريد نقاش..!
منى : همممم اووكيه كسرت خاطري.. يالله روح هذي مهرة يت ويا ناصر..روح روح روح..!
التفت وانا اشوف ناصر وقف سيارته عدال سيارتي ومهرة تنزل منها..
وسمعتها تطلب من ناصر انها تشل مايد معاها بس هو رفض ..
ناصر: خليه عندي انتي ..بيلعوزج داخل وانا ماعندي شغل برايه عندي..!!
مهرة: على راحتك..
ناصر: اتصلوبي يوم تبون تون..
مهرة: ان شاء الله..مع السلامه..
دخلت مهرة مع منى للبيت ..وانا تقربت من ناصر وهو فسيارته..
يوسف: وين بتسير؟..
ناصر: ابويه قال فضوا بيت يدتك للحريم وتعالوا بيتنا.. يعني اظني عشا الرياييل عندنا في البيت..
يوسف: خلاص عيل بنسير هناك.. تباني اركب لك كرسي مايد جدام؟

كان ناصر متوهق ومب قادر يركب كرسي مايد ....

ناصر: بتسوي خير فيني...

بعد ما انتهينا رجعت لسيارتي..وبدون احساس مني رفعت عيني لدريشه كنه في الطابق الفوقي..
تنهدت وانا خاطري اكون هناك...
بس الصبر يمدحونه..
باقي كم يوم بس...وتكون عندي للابد..
---------------------------------
اليوم: الخميس..
المكان: غرفة كنة ..
الوقت: الثامنة والنصف مساءا..
---------------------------------
(كنة)...


مسكت منى ايدي الثنتين وبعدتهم عن جسمي وهي تتامل بشكل يضحك...
منى: واو كنووه..! اللبس الهندي فظيع عليج يجنن..
كنة: هههههه عيونج الفظيعه ..اوه اقصد..عيونج الحلوه حبيبتي...
تقربت مني مهرة وباستني...
مهرة: مبروك يا كنة ..الف مبروك عالملجه..وان شاء الله نفرح فيج يوم الثلاثا..
كنة: الله يبارك فحياتج ان شاء الله... وينج عنا من الصبح؟
مهرة: كنت تحت عند الحريم.. توهن بس اطلقن سراحي..!
كنة: بعدج انتي عروس يديده حتى عقب اربع شهور !!..شكلي مول مابغطي عليج...
مهرة: هههههههههه لا حبيبتي غطيتي من الحين لا تحاتين..
كنة: انتي شو تصورين؟...
التفت لمنى اللي حاطه كاميرا الفيديو فويهي ..
كنة: والله شكلج حشرية..بنديها والا روحي صوري شي ثاني..!
منى: ماشي يستاهل التصوير حبيبتي كثرج..جييييييييييز!!!
كنة: شو جيز بعد لا يكون بعدج تتوحمين عالجبن وبطنج جدامج؟..
منى: شكلي انا غلطت مب انتي العروس..صراحه تصرفاتج ماتدل لا على مستحى عروس ولا على انوثه..
كنة: خليت المستحى جدام العيايز..عندكن عادي..
مهرة: ههههههه يعني؟؟؟..وجدام يوسف ماشي مستحى؟..
على طول حسيت بويهي ولع..
يلست عالشبريه وانا العب بطرف فستاني بتصنع...
كنة: عاااااااااد لا تحرجوووووني ..!!!..
منى: كنة شو كان شعورج في المحكمة امس.!!.
ابتسمت وانا اتنهد واذكر امس بكل مشاعر الخوف اللي حسيت فيها..
كنة: بندي الكاميرا بعدين بقولج...

كانت غرفتي مثل بيت النمل...حد داخل وحد طالع.. بنات عمي وبنات خالي وخالاتي وحد من حريم العايله يروح ويرد علي... وعلى ما اعتقد انه الكل سلم علي ماعدا الغرب..
هذا اذا كان فيه غرب..
اصلا زين حصلت وقت اتعدل كنت طول اليوم مشغوله بتجهيز قاعة الزهاب...
التنسيق بروحه كان يباله وقت طويل..
واضطرينا نطلب مساعده من محل الورد عشان يرتبون معانا ..
والكل في البيت كان يشتغل حتى يدوه عطت رايها الحكيم في بعض السوالف...
لكن رغم الانشغال التام..
كان فكري مشغول لدرجه اني ماكنت اسمع اصوات اللي حوالي...
معقوله؟..
خلاص يعني صرت زوجه يوسف شرعا .!!
حلم الطفوله والمراهقة والشباب صار واقع...
بس اللي خوفني..
معظم القصص اللي سمعتها..
عن حالات مشابهه... حب لسنوات وتكلل بالزواج واخرتها ما اتوفقوا مثل ماكانوا متوقعين..
ياما سمعت عن زواج ثاني..او هجر..او طلاق...
انقبض قلبي وانا اتذكر...
خايفه..!!
ليتني اشوفه ...ليتني اقدر اكلمه عشان يطمني..
ويقول لي انه بنتوفق وانه ماشي بيفرق بينا غير الموت...
ليش كثرت الحواجز بينا بعد شرعية العلاقه؟
شو هالتخلف؟ انا احين زوجته وحتى مايسمحون لي اشوفه واكلمه على انفراد..
امس..
كل اللي قلناه لبعض هو كلمه "مبروك" ..
وبعدها اسحبوني انا لسياره..ولبيت ثاني..ويوسف راح مكان ثاني..
ليش مايحسون..بالمخاوف اللي احس فيها..
ليش ما يفهمون بانه محد يقدر يطمني غير يوسف نفسه...
يعني لازم اصبر لين يوم الثلاثاء... عشان انفرد به ويطمني..
ويزيح عني مخاوفي..

الله يصبرني لين يوم الثلاثاء...
-----------------------------------
اليوم: الجمعة..
المكان: بيت بو حمد..
الوقت: الثانية عشره والنصف ظهرا..
------------------------------------
(مهرة)...

ركبت درج البيت بحذر وانا اسمع كلام شيخه عن دوامها وعن نقلها لقسم يديد المديره المباشره لها كانت حرمه..
مهرة: يعني انتي مرتاحه معاها؟..مادري احس المواطنات يوم يستون مسؤولات وماسكات منصب يستون نحيسات وماينطاقن..!!
شيخه: لا حليلها بالعكس وايد زينه .. واحسها توكلني بامور ماتأمن عليها باقي الموظفات..يعني وايد مرتاحه معاها..
مهرة: الحمد لله.. المهم انتي مرتاحه..
شيخه: انتي خلج من خرابيط دوامي وتعالي براويج كيف رتبنا الاقسام فوق...
مهرة: التوسعة اللي بنوها ورا البيت حق حمد وعفرا طلعت وايد مرتبه.. غلبوكم..
شيخه: حلال عليهم.. هم احوج منا.. عندهم بنت ماشاء الله ...
مهرة: الله بيرزقكم انتوا بعد يا شيخه..لا تستعيلين بعدج عروس حبيبتي..
شيخه: وييييين بكمل سنه وتقولين عروس..!
مهرة: وييه لا يكون يأستي ويا ويهج؟..شوفي غيرج يكملن بالسنوات الخمس والعشر والله يرزقهن بالاخير.. كل شي فوقته حلو شويخ..
شيخه: ونعم بالله وانا مب مستعيله الحمد لله.. ادري انه الله بيرزقني متى مانكون انا وسهيل مستعدين لهالشي..
مهرة: ان شاء الله.. يعني انتوا ضميتوا غرفة قوم حمد لغرفتكم وسويتوها صاله؟..
شيخه: هيه تعالي شوفي.. طبعا باقي شوي ازيد عليها اثاث..

دخلت قسم شيخه وسهيل اليديد..وبصراحه كان حلو ومرتب.. ماتوقعت انه البيت بيتغير جذي للاحسن..كنت اتحسب ترتيبنا الاولي هو احسن ترتيب.. لكن حمد اخوي الظاهر عنده خبره بهالسوالف..!
مهرة: وايد حلوووو...
شيخه: عيونج الحلوه..تعالي شوفي قسم سيف كيف سووه..
مهرة: استحوذ على حجرتي الحرامي .!!
شيخه: هههههه هيه.. لو تشوفينه شو مسوي فيها ..تعالي تعالي...
دخلت غرفتي اللي تحولت لصالة عزوبي كاملة التأثيث من حيث نظام دي في دي السينمائي والتلفزيون البلازما اللي شكبره والسماعات والاثاث الجلدي الرجالي الغريب...
مهرة: شو هذا؟؟؟
شيخه: ذوق سيف.. وهو دافع طبعا من فلوسه... صار يقعد في البيت اكثر احينه ...مستانس بالصاله.. والحمام الله يعزج خلاه مطبخ تحضيري..!! ثلاجه وماكرويف وكل انواع المعلبات وعين الغاز ..تعالي شوفي...!
مهرة: وااااعليه عليج يا حجرتي البنوتية الحبيبه رااااااحت خلاص بححح...حسبي الله عليك يا سواف !
شيخه:.. نحن الحريم نقول جي...سهيل وحمد وايد عيبتهم صالته..حتى انهم سهروا عنده كم من مره...
مهرة: شو هالتطورات هاي..!! اتطورت العزبه والله..!! وسيفوه صار له مطبخ تحضيري بعد؟؟.. شعنده بو هناد حاط عينه على بنت بيعرس والا شو سالفته..!!!
شيخه: مايندرابه اخوج ....وانتي محد قال لج ماتزورينا من ثلاث اسابيع..!!
مهرة: ناصر كان مشغول فبوظبي ماقدرنا ني العين..
تقربت ودخلت الصالة اكثر (حجرتي سابقا)..وقعدت على واحد من الكراسي الجلدية مالت سيف ..واول ماقعدت عليه (اختفيت) فيه...!!
مهرة: سرطني الكرسي..!!! كيف يقعدون عليه هذا.!!
قعدت شيخه على كرسي ثاني...
شيخة: شو امورج مع ناصر؟
مهرة: كل شي زين الحمد لله.. مرتاحه اخر راحه..!
رفعت عيني يوم انتبهت لحركه عند الباب...وتصادمت نظرتي مع نظرة حمد اخوي..
حمد: هاه انتي هني .!!
قمت من الكرسي ورحت وايهت حمد..
قلت له ببرود..
مهرة: شحالك حمد..؟
حمد: بخير انتي شحالج؟.
مهرة: الحمد لله..مرتاحه..
حمد: وين ريلج؟
مهرة: وصلني وراح..مشغول ويا اهلة..
حمد: عشان عرس اخوه..!
مهرة: اكيد..
تقرب حمد وقال..
حمد: دامج عندنا عيل زين ابا ارمسج فموضوع..
غصبن عني حسيت بقلبي تتسارع دقاته..
حمد يباني فموضوع؟
شو يبا مني الحين ؟؟؟
شيخه: عن اذنكم..
طلعت شيخه وخلتنا بروحنا..
مهرة: تفضل حمد..عسى ماشر..
حمد: مامن شر.. بس انا فكرت وايد بالحساسيات اللي بينا وشفت انه الموضوع يحتاج نتكلم فيه..
مهرة: حساسيات.. قصدك سوء ظنك الدايم بي..!
غصبن عني حسيت بحرقه بعيني..بس ماسمحت لنفسي باني اصيح جدامه..
نزلت عيني لحظني وسكت..
حمد: ماكان سوء ظن كثر ماكان خوف عليج... يمكن اساليبي كانت غلط بس كل شي كان نابع من خوفي عليج..
مهرة: حتى يوم طلعتني من الجامعه وحرمتني من اني اكمل دراستي..
حمد: كنت خايف لا تنخرطين مع بنات شواذ يخربنج ...
مهرة: حمد انا متربية فنفس البيت اللي انته متربي فيه .. لكن انته فضلت تصدق كلام وحده صايعه كانت تلعب بمشاعرك وتحاول تخرب بينك وبين زوجتك على انك تصدقني انا اختك..!!!
حمد: وانتي شو دراج بهالشي؟؟؟؟
مهرة: سالفه طويله مايحتاج اقولها... بس صدقني انت كنت منعمي..
سكت حمد شوي.. وتنفس بحدّة..
حمد: ادري اني كنت منعمي.. بس العصبية احيانا تعمي.. تخيلي موقفي يوم سمعت هالشي عنج ..امي الله يرحمها موصتنا عليج وعلى سيف..
مهرة: ويوم غصبتني عالعرس؟ وظربتني..
حمد: كنت اشوفه مناسب لج بالنسبه للظروف اللي كنتي تمرين فيها...
مهرة: ويوم اكتشفت عنه شي مايسرك...ييت تبا تفرقني عنه بالغصب...
حمد: بس انتي ماطعتي.. لا يكون بتلوميني بعد..!
مهرة: طبعا مابطيع.. يوم ارتحت له وحسيت بقيمتي وذاتي بزواجي منه ..ييت تبا تفرقني عنه بكل بساطه؟..حمد ... انا مش لعبه فايدك..!
حمد: محد قال انج لعبه بايدي.. بس انا كنت ابا مصلحتج على حسب وجهة نظري..
مهرة: نظرك انت مب نظري انا...
حمد: وهني صار بينا الاختلاف..انا كنت متسلط وماشاورتج فشي ولا سمعت رايج.. كنت ومازلت اظن انه رايي انا هو الاصح والانسب... لكن حياتج وقراراتج طلعت من ايدي حتى لو انا اخوج العود بس انتي ماسويتيلي أي حشمه واحترام وفضلتيه عليه ...
مهرة: حمد..!..لين متى بسويلك حشمه واحترام على حساب راحتي وسعادتي انا.؟؟.
حمد: حتى انا كنت ابا سعادتج وراحتج..
مهرة: لا..انته كان همك الناس وكلام الناس وكيف الامور طالعه جدام الناس "ظاهريا"..ماهمك اللي فخاطر اختك .. بشو تحس وبشو تفكر..
حمد: ماكنت اتوقع انه بيكون لج راي وشور غير عن رايي وشوري انا... عالعموم.. انا يمكن كنت متسلط شوي.. كنت ومازلت اشوفج اختي الصغيره اللي اخاف عليها وفنظري انتي ماكبرتي ابدا حتى لو كان عمرج 30 .. وانا ماريد الحساسيات تستمر.. لانه هالوضع مضايق ابويه واخواني وايد..

سكت شوي وانا اتامل فويه حمد..
انا اعرف كبرياء حمد زين مازين.. اعرف انه نادر مايطلع اللي فخاطره ..
تعود حمد انه يأمر بدون مايفسر..
في النهاية هو الاخو العود وله مكانه ماياخذها الا الاخو العود.. وتربى عالحزم والشدة..
وانا مقدره صعوبه قعدته معاي هني واعترافه باخطاءه ولو كان اعترافه هذا مغلف بكبرياء ماينكسر..

مهرة: حمد... انته اخويه العود وانا احبك واحترمك.. وماكان ودي كل هالحساسيات تصير بينا ..لكن تقدر تقول اني وصلت مرحلة ماقدر اتحمل فيها اكثر دور المغلوب على امرها.. كلكم تحكمتوا فحياتي وبقراراتي لين زهقت... انا اسفه اذا جرحت كبرياءك او حسستك بعدم اهميتك عندي لانه هالشي مب صحيح انته وايد عزيز علي... بس انته يوزتني ريال وانا على ذمته الحين...خل المحبة والاحترام بينا بدون ماتدخلون فحياتي.. الله يخليك... انا وايد مرتاحه مع ناصر... وهو وايد يعزكم.. ويتريا اليوم اللي تتصلح فيه العلاقه بينا..

ابتسم حمد ابتسامه غريبه... فيها حزن وندم وظيق..
حمد: ان شاء الله مابيصير الا اللي فيه الخير.. خلي ناصر ايي يتعشى عندنا اذا يقدر..
ابتسمت انا بعد براحه..
مهرة: ان شاء الله بقوله..
قام حمد من الكرسي وقال بطريقه مازحه..
حمد: وهاتي ولدج اللي ماشفناه..
بدل ما اتظايق واتحسس...ظحكت...
مهرة: ههههه ان شاء الله بييبه..

طلع حمد من صالة سيف اليديده.. وخلاني بروحي اراجع اللي انقال..
ياترى قسيت عليه؟
والا كان ظروري اذكره بكل اللي صار..! وبظلمه لي..!
بس بغض النظر..
اللي صار خطوه كبيره لحمد..
مابيخطيها الا بعد احساسه بالذنب وهذا شي اكيد..

تساندت عالكرسي وانا اتنهد وابتسم..
احس بحمل ثقيل انزاح عن ظهري..
والا سيف صار عنده مطبخ تحضيري..!!!.. خل اشوف شو عنده هالتعبان..!
نقزت من الكرسي وكملت استكشافي لقسم "المثقف" سيف..!
-----------------------------------
اليوم: الجمعة..
المكان: شقة مبارك..
الوقت: السابعة والنصف بتوقيت بريطانيا..
---------------------------------------
(مبارك)..

يلست عالكرسي اللي في الصاله وانا اخش ريولي في جوتي الرياضه..
ابتسمت وانا اسمع سيف من السماعه...
سيف: بفتك من ويهه الخايس يوم الثلاثا...
مبارك: اخر امتحان؟..
كان سيف يتحرطم على استاذ الـ ICDL في المعهد... اللي ماكان سيف يطيقه..لكن متحمل عشان الشهادة..
سيف: هيه ..بيكون امتحان اكسيس... بخلص الامتحان من صوب وبسير عرس يوسف من صوب ثاني..
مبارك: حليله يوسف..يستاهل مسكين..
سيف: بعدك ماحصلت اجازه عشان تينا؟..
مبارك: لا والله سيف...I have exams.. وهذيلا ماشي تفاهم عندهم ومايتساهلون مع حد..
سيف: خساره يعني مابتحظر العرس..
مبارك: استسمح لي من يوسف وبارك له بالنيابه عني..
سيف: خير ان شاء الله... على فكره تسلم عليك مهروه..
ابتسمت...
مبارك: الله يسلمك وياها من الشر...شو اخبارها العيوز..!
سيف: تشقح.. اقولك بخليك احينه ..وادخل النت اكثر دومك تخليني اتصلبك..!
مبارك: هههههه ادخل وماحصلك..!
سيف: ادخل اوقات معقوله انزين..
مبارك: والله اني مشغول الفتره الاخيره بس ان شاء الله بدخل فالك طيب...سلم على الاهل كلهم..
سيف: ان شاء الله..وانته سلم على ريتشارد وربعه ..
مبارك: هههههههه ان شاء الله...مع السلامه

سكرت عن سيف وانا اضحك.. يلست اربط احزمه الجوتي..
عقب ثلاث شهور فراق...توها افتكرت ترسل لي سلام؟؟؟؟
ياترى مشغوله بحياتها لهالدرجه؟؟؟ والا ماعدت مهم خلاص؟..
اختفت ابتسامتي وانا افكر بهالافكار السوداوية..
مقهور من نفسي..
انا اعرف اني مب في حاله حب مع مهرة...
كل الموضوع هو اني احس بالفقد..احس اني فقدتها..وفقدت معزتها لي..
احس انه حبها واحلامها كانت لي ...وفقدتهم..
متى بتقبل هالخساره.؟ الله اعلم...

انتبهت على صوت المسج من تيلفوني..رفعته وفتحت المسج حصلت مها مطرشه لي صوره ايدها الملفوفه بالشاش... وكاتبه تحتها تعليق " look what I've done to my hand.. I'm so stupid "

عقدت حواجبي وتظايقت من شوفة ايد مها بهالحالة..! رديت ارسلت لها مسج..
مبارك: "How?"
مها: " I was playing volleyball with my father hehehe"
ابتسمت على خبال هالبنت..
مبارك: " I will kill you.. Take care next time please"
مها:" will you write my homework's again?"
غصبن عني ضحكت بروحي بصوت عالي...
مبارك: " ahaaa, so that's what it's all about.. No. mob kel yoom al3aid, ana ****r alnadi now"
مها: " I hate you"
مبارك: " you broke my heart!"

حطيت تيلفوني فمخباي وانا اضحك وشليت شنطتي الرياضية وطلعت من الشقة...
الحمد لله انه مها ارسلت لي رساله...
لو ما اشغلت عقلي عن مهرة...جان مابقدر العب رياضه بمزاج..
ركبت دراجتي ورحت صوب النادي والابتسامه ماتفارق ويهي...
من بعد اعتذاري لمها ذاك اليوم في المطعم والعلاقه بينا تتحسن يوم عن يوم..
نتلاقى في الجامعه بشكل شبه يومي...
ونسلم على بعض..
لين وصلنا لدرجه اني عطيتها رقمي وعطتني رقمها...
لو يسمعني سيف احين بيقول اني طيحت البنت...
لكن في الحقيقه كل اللي بينا هو صداقه لا اكثر ولا اقل...
وماكد صار بينا كلام اعمق من مجرد صداقه..
هني المجتمع اللي عايشين فيه مختلف...
و الزماله الدراسية بين العرب في الغربه مقبوله عندنا وشي عادي..
وهذا حال العلاقه بيني وبين مها... صداقه وزماله لا اكثر ولا اقل...
صحيح انه مانسولف دايما عن الدراسه... بس ماتخطينا حدود الادب..
وما اتوقع الحال بينا بيتغير.. لانه هالوضع مريحني ومريحها.. صارت اشاعات وتلميحات بين ربعها وربعي لكن تغلبنا على هالموضوع بتجاهلنا له..وصداقتنا صارت شي عادي بالنسبه للجميع..
عالاقل خبالها وخراشها وسوالفها الهبلا اللي ابدا شكلها البريء والطفولي مايعبر عنها...صارت تساعدني بانه يومي يمر بشكل اسرع..
واحساسي بالوقت الثقيل صار اخف وارحم علي من اول...
------------------------------------
بعد ثلاثة ايام..
------------------------------------
اليوم: الثلاثاء..
المكان: صالة الافراح/العين..
الوقت: الحادية عشره مساءا..
-----------------------------------
(منى)...


مشيت بخطوات سريعه متجهة للغرفة الصغيره المخصصة للعروس في الصالة...
فتحت الباب وانا اشوف كنه معاها ميثا حرمه محمد اخوي وهي توها تعدل طرحتها...
منى: تاخرتوا وايد يا ميثا..شو صار عليكم؟؟
ميثا: بنت عمج كل شوي وسيحت المكياج من كثر ماعينها تدمع...انا بخليكن بسير اشوف امايه..يلسي عندها...
التفت لكنة اللي برغم جمال طلتها فهالليله ..الا انه القلق بادي عليها...
منى: كنة حبيبتي..شفيج؟..
كنة: خايفه يا منى...وايد خايفه احس اني بموت..
منى: بسم الله عليج ..اذكري الله حبيبتي مابيصير الا كل خير انتي عروس وهذي ليلتج لا تخلين شي يخرب عليج فرحتج...
كنة: احاول... بس ماقدر.

دخلت مهرة بفستانها السماوي المدموج مع بيج وبشعرها المفتوح...
مهرة: اللــــــــه يا كنه ربي يحفظج من العين شو هالزين شو هالزين..!
كنة: يعلني ماخلى يا مهرة تسلمين فديتج..
مهرة: هاااه شو النفسية؟ (تقربت مهرة ومسكت ايد كنه)...واااي عليج يا كنه شفيج تتنافظين.!!
منى: تقول خايفه..!
ابتسمت مهرة لكنة بتعاطف...
مهرة: ماظني بتخافين الخوف اللي انا خفته فعرسي بس عدت الحمد لله..عالاقل انتي تعرفين يوسف زين مازين الحمد لله.. ليش الخوف.!
كنة: مادري والله..
مهرة: يابنت الحلال لا تحاتين... شفتي بنت عمج كيف طلع فستانها مال الحوامل؟..وتقول مقهوره مني لاني لابسه مخصر.!
منى: خلي هالليله تعدي على خير يا مهره.. الوحيده اللي احوط بكرشتي في العرس..!!
كنة: وهذا اللي يخليج مميزه...فديتج والله شكلج وايد كيوت بفستان حوامل..!
منى: هيه جاملي..
مهرة: مب قاعدين نجامل يابنت الحلال..

حاولنا انا ومهرة نرفع معنويات كنه بسوالفنا.
بس الظاهر انها كانت ظاهريا تسولف معانا لكنها من داخل خايفه ومرعوبه..!..
من شو بس يا كنة خايفه؟..
هذا يوسف!!! والا نسيتي؟..

ماقدرنا نقضي مع كنه وقت طويل.. على طول يتها امها واختها يجهزونها للزفه..

كنا واقفين عدال الشاشه اللي تنقل الاحداث الخارجية في عرس الرياييل وكنت ابتسم واحيانا اضحك بروحي ومهرة تطالعني باستغراب..
مهرة: ليش تضحكين؟..
منى: اتذكر... مامر علينا عرس وحطينا فيه شاشه الا وارتزت كنه جدامها عشان تشوف يوسف وهو مايدري..والحين الشاشه مرتزه ولا حد قاعد يتطالعها...محد حاس بقيمتها الا كنه...
مهرة: هههههههههه شكلي ببدا احس بقيمتها..شوفي شوفي هالمزيون..
التفت للشاشه وشفت ناصر اخوي يسولف ويضحك مع واحد من الشواب..
منى: ايواااااااااااا زين عيل ماراحت موضة الشاشات بعدهن لهن فايده..
مهرة: هههههههههه.. بدت الزفه...ويييه تذكرت زفتي شكثر كنت خايفه لا اطيح على ويهي..!!
منى: نفس االاحساس.. فديتج يا كنوه شوفي محلاها طالعها..!
مهرة: ماشاء الله عليها... الله يهدي بالها بس...
منى: آمييين..

مشت كنه بكل ثقة بابتسامه هادية.. اللي يشوفها يقول هذي واثقة من نفسها وبشدة..
لكن انا اعرفها زين هذي ابتسامه خوف...
لكن دام انه محد يعرف بهالحقيقه فلا باس...
المهم انه كنه قدرت تخلص الجزء الاكثر صعوبه بنجاح تام...
ركبت عندها عالكوشه...
منى: كنتي تجننييين رهيييبه...
كنة: ..........
منى: على فكرة.. صارلهم ساعه حاطين الكاميرا على يوسف في الشاشه...
هالمره حصلت تجاوب..
رفعت كنه عينها لي بلهفة..
كنة: قولي والله؟؟؟ ااخ يالقهر حيسوا الشاشه هالصووب ابا اشوف..
منى: هههههههههههههههه توني يالسه اقول حق مهرة..محد حاس بقيمه الشاشه غير كنه..
كنة: وكيف كان شكله؟.
منى: شاق الحلج مستانس...معرس شعليه.. حد يعرس بكنييييييييينه ولا يستانس ويشق الحلج؟؟؟
ابتسمت كنه وهزت راسها..
كنة: والله انج يا منى..!..
منى: انتي خايفه لانج ماكلمتيه من فتره طويله صح؟
هزت راسها كنه بصمت علامة موافقة..
منى: هانت حبيبتي.... انا مقدره خوفج لكن صدقيني..يوسف بيحطج بعيونه ولا بيفرط فيج ابد.. وانتي تعرفين يوسف عاقل .. لا تخافين وتكدرين ليلتج...
ابتسمت كنه بارتياح...
كنة: ان شاء الله..

بعدها ماقدرت اختلي بكنه لنفسي..الكل يبا يسلم عليها والكل يبا يكلمها..
اكتفيت بمراقبتها...
الحمد لله شوي شوي بدت تبتسم اكثر وتسترخي..
كنة تستاهل كل خير... الله يسعدها مع اخوي ان شاء الله
---------------------------------
اليوم: الثلاثاء..
المكان: صالة الافراح/ العين..
الوقت: الثانية عشره مساءا..
---------------------------------
(يوسف) ..


حطيت ايدي فمخباي وانا احس بالبرد يتسلل لاطرافي..وبالايد الثانيه كنت ماسك التيلفون بشده غير مطلوبه..!
لكن من زود توتري..
يوسف: اكيد يا منى؟..
منى: انته ليش تحاتي..انا كلمتها والحمد لله شوي هدت وخف عنها الخوف...
يوسف: منى يمكن غيرت رايها وماتباني..!
منى: يوسف انته لو شفت عيونها يوم طريتك لها.جان ماقلت هالكلام..!
حسيت بقلبي يذوب..
يوسف: ظنج؟..
منى: انا متاكده من هالشي... هي بس خايفه لانها ماكلمتك من زمان وتحس انها مبتعده عنك .. تبا تطمن منك انته مب منا نحن هذي كل السالفه...
يوسف: شو اسوي باهلج يوم انهم واقفين بينا وحارميني من شوفتها والكلام معااها..!
منى: مب مشكله يا يوسف هانت ماباقي غير ساعه او ساعتين وينتهي كل شي.. طول بالك على كنه وحاول تهديها ولا تعصب من شكوكها.. هي بس بحاجه انك تطمنها...
تنهدت..
يوسف: ان شاء الله...

انهيت المكالمه مع منى وانا افكر برساله كنه اللي طرشتها لي على ايميلي امس...
كانت تقول فيها انها خايفه وساورتها شكوك مالها عدد..وسالتني اذا كنت مازلت ابا اتزوجها واكون معاها او لا...
طبعا باطباعي المعتاده قابلت رسالتها هذي بالتجاهل التام جني ما استلمتها...
عيل شو تقصد بالله برساله مثل هذي ترسلها لي قبل زواجنا بيوم؟؟؟
لكن من راحت عني العصبية... تلبسني هم كنة ومحاتاة وضعها النفسي..
ليش هالشكوك بعد كل هالحب وهالصبر؟..
ليش يا كنه؟..
احس انه حد سمم لها افكارها...
لا يكون نوره؟؟؟؟؟
صدقوني ارتكب جريمه اذا كانت هيه السبب..!!
بس ما اعتقد..لانها من ذاك اليوم وهي ماتدخل ابدا بامور كنه...

بس ماعليه..ان شاء الله من اختلي بكنه بكلمها وبهدي بالها...
وكل شي بيمر على خير...

رجعت لخالد وانشغلت معاه لين نهاية العرس..
اللي اقل شي اقدر اقوله عنه انه كان ناجح ومشرف بمعنى الكلمه...
حسيت انه الكل مستانس ... والكل استمتع بوقته...
بعد ساعتين
انتهى العرس وماتم حد موجود غير العايلتين... انا واخواني وابوي ومايد ولد عمي والحريم..

مايد: يالله يوسف ..ادخل سلم على حرمتك...
يوسف: يالله...
خليت ابوي ومايد يتجدموني للغرفه الصغيره اللي فيها كنه ..
دخلت وانا احس قلبي يسبقني لداخل الغرفه..
دخلت وشفت كنه يلفها البياض السكري..
ملت عيني لدرجه انه اللي في الغرفه من حريم كلهم كانوا ضباب..!
وقفت عدالها على مسافه بسيطه ... وحسيت رغم انه ماتلامسنا..بارتجافها..
تعالت الاصوات حوالينا من ضحك وتباريك ...
اصوات بعيده..
رفعت ايدي..وباطراف صبوعي رفعت ويه كنه لي..وبستها بين عيونها...

غمضت عينها والمستحى يطغى عليها..
وهم يضحكون... علينا..
ومحد حاس فيها غيري...
يوسف: مبروك يا كنه.. والله وتوهقتي وصرتي حرمتي !!!!
نجحت الخطه يوم ضحكت كنه وهي تنزل راسها وتبتعد عني شوي خطوات لورا..!

بعد جلسات التصوير المملة اللي خذت حوالي ساعه ونص...
ام مايد: عاد نحن مجهزين غرفة المعاريس عندنا في البيت.. بدل ماتتلعوزون بالفنادق..ليلتكم عندنا ان شاء الله..
انا كنت اعرف بهالمعلومه من قبل...خبرتني امي.. بالتالي شنطتي كانت موجوده في السياره ..
غرفة المعاريس على قولتهم كانت غرفة الضيوف في بيت يدوه.. وهي نوعا ما بعيده عن غرف اهل البيت وفيها خصوصية تامه....

بالتالي تحركنا كلنا للسيارات.. العروس شلها اخوها للبيت مع امه ويدوه .. وانا رديت خواتي البيت..منى وشما... امي راحت مع ابوي..وناصر شل حرمته وراحوا البيت.. ومحمد شل حرمته وخوات حرمته (بنات عمي) ووداهم كلهم بيت يدوه...
انا وصلت خواتي البيت ورجعت اروح بيت يدوه..لانهم يتريوني هناك..
كان ترتيب غريب بس الليله عدت على خير...
القهر انهم كانوا يقدرون يبسطونها اكثر بانهم يخلوني اشل حرمتي واتوكل ...
لكن طبعا حبوا يقهروني... وامنعوني عنها حتى في التوصيله..!!!...
لكني ماحبيت اناقش...

بعد حوالي اربعين دقيقه اتركوني اخيرا على انفراد مع كنه...
اول شي سويته اني قفلت الباب...
رفعت عينها كنه لي باستغراب...
يوسف: أي حد يدق الباب...نحن مب هني!!!
كنة: هههههه مطفريبك اهلي لهالدرجه..
تقربت ويلست عدالها عالكرسي..
اتامل فيها وبنعومتها...
فكره انها حلالي خلتها تحلى بعيني اكثر واكثر واكثر...
يوسف: احس اني ماشفتج ولا كلمتج من زمان... اشتقت لج كنه..
نزلت كنه عيونها..وتوترت ملامحها..
يوسف:انا وايد فرحان اليوم.. بس اللي مكدرني هو خوفج...
كنة: ........... غصبن عني يوسف..
يوسف: عمرها المسافات مابتبعدني عنج كنه...حتى لو امنعوني عنج وامنعوج عني... انتي تعرفين انج دايما موجوده فقلبي وفبالي..
رفعت عينها لي...تتامل بعيوني واسكتت..
يوسف: صارحيني كنه... من شو خايفه؟
كنة: اوعدني انه مهما صار بينا ...مابنفترق..
ابتسمت ومسكت على ايدها..
يوسف: اوعدج... انا ثلاث شهور مارمت اصبر ...فكره الفراق غير واردة ولا تفكرين فيها..
كنة: اكيد يوسف؟.. انا وايد خايفه انه مانتوفق..
يوسف: كنه حبيبتي..خلي باجر لباجر...وعيشي اليوم... وبعدين ليش مانتوفق؟.. الايام بتثبت لج انه زواجنا بيكون احسن زواج ان شاء الله..
ابتسمت كنه..
كنة: صدق؟
يوسف: هيه..وبذكرج بعد.. انتي يا كنه وايد غاليه عندي.. انتي من دمي... ومستحيل افرط فيج حتى لو انتي طلبتي فراقي...
كنة: ههههههه لا تتامل وايد...هاليوم مابيي..!
يوسف: ههههههه هيه هاي كنوه اللي اعرفها...
حطيت ايدي حوالي رقبتها وسحبتها صوبي وبست خدها بقوو وتعرفون انتو سوالف اللخ
تمت كنه تضحك وتصارخ ...
وانا اغلس عليها اكثر...
احبها يا ناس..!
واخيرا صارت حرمتي..!


--------------------------------
اليوم: الاربعاء..
المكان: غرفة ناصر ومهرة/بيت بو محمد..
الوقت: الحادية عشره صباحا..
--------------------------------
(مهرة)...

طلعت من الحمام بهدوء وانا انشف شعري بالفوطه...
وقفت عدال الشبريه اتامل بويه ناصر اللي نايم بعمق..
ابتسمت وانا امشي صوب منز مايد و أوايج عليه واتطمن انه نايم هو الثاني..!
ابتسمت ابتسامه اوسع وانا اشوف مايد نايم نفس ابوه...على بطنه..
سبحان الله..!
حطيت ايدي على بطني والابتسامه مافارقتني..
ياترى..
اللي فبطني بعد بيشبه ناصر؟؟؟؟

صديت صوب ناصر.. وتمددت عداله عالشبريه بهدوء..
متى بيقوم.؟
ابا اخبره...ماصدقت اتاكد من الخبر..
مافيني صبر ابا اخبره...!

مديت ايدي وقعدت العب بشعر ناصر اللي بدا يطول شوي ويباله قص..
مهرة: ناصر حبيبي..
ناصر: همممم.!
مهرة: قوم الغالي.. اليوم صباحية اخوك ومايصير تتخلف..
ناصر: كم الساعه؟..
مهرة: همم 11..
ناصر: على بالج بينشون هذيلا قبل 12...
انجلب ناصر اللي كان عاطني ظهره..وجابلني.. حط راسه على بطني وهو يحظني كعادته يوم يتدلع...
ناصر: خليني ارقد شويه..!

بعد حوالي نص ساعه... طلع ناصر من الحمام والفوطه على كتفه ويفرك بطرفها شعره عشان ينشفه..
وقف جدام الكبت يطلع له ملابس...
وقفت انا بينه وبين الكبت بدلع...
مهرة: مستعيل عالطلعه؟؟؟
تقرب مني ناصر وهو يبتسم...
ناصر: الا جان عندج خطط ثانيه...
مهرة: ههههه عندي...ابا اقول لك شي مهم..اجلته يوم كامل بس عشان ما اسرق الاضواء في عرس اخوك..
ناصر: ول ول ول...تسرقين الاضواء عن معاريس مره وحده ...قولي... شو هالشي الخطير..

حسيت بايدي تلتف حوالي بطني بدون احساس...
تاملني ناصر للحظه وتغيرت ملامحه...
كأنه حس باللي بقوله...
ناصر:.. مهرة .!!
مهرة:.. انا حامل..

مرت دقيقه بدون ماينطق ناصر بشي..
كانت عيونه تلمع كانها احتوت كل نجوم السما...
ناصر: صدق؟...صدق مهرة؟
هزيت راسي وانا ابتسم ..واحاول قد ما اقدر اني امنع دموعي الخاينه دايما بالنزول..
ضحك ناصر..
ناصر: من متى؟
مهرة: شهر واسبوعين..
حظني ناصر بكل قوته وبكل حبه ومشاعره ..وفرحته...
حسيت بقلبه يضرب بقوه ... وانفاسه المتلاحقه.. وارتجاف ايده...
ناصر: اباها بنت... دخيلج قولي انج بتيبين بنت...
مهرة: ههههههههه ناصر شدراني انا... اللي ايي من عند الله حياه الله...
ناصر: مالي خص اباها بنت...بروح اخبر امايه..!!!

تركني وركظ للباب..
مهرة: ناصر.!!!.تلبس اول..!
رد ناصر من عند الباب يدور كندوره عالسريع..
ناصر: هي صح...
مهرة: وبعدين لا تخبر حد احين .. تريا شويه..
لبس ناصر كندورته عالسريع ..
ناصر: والله بخبرهم الحين مالي خص..
طلع ناصر من الغرفه بشكل خلاني اضحك.. اضحك مع دموع فعيني...
ناصر فرحان وايد..!!
الحمد لله اني قدرت احسسه بهالسعاده...
ابتسمت ومسحت دموعي وسكرت الباب اللي تركه ناصر مفتوح من كثر وناسته واستعجاله انه يبشر الكل..
وصلت لمنز مايد اللي كان فاتح عيونه وبعده متكاسل عن النشـّـة..
مهرة: صباح الخير حبيبي... تبا اخت والا اخو؟.
مديت ايدي لمايد وخذته بحظني...
ورحت للدريشه اوايج منها للحوش...
اراقب السيايير اللي بدت توصل ... من خوات ناصر وعيال عمه وبنات عمه ..واخر سياره وصلت سيارة المعاريس..
التفت لمايد اللي بدا يلعب باذني كعادته بصبعه الصغير...
كانت نظرته لي حلوه.. والحلو اللي فيه انه يرد لي ابتسامتي بابتسامه احلى منها...
مهرة: حبيبي... لا تخاف انته دايما بتم ولدي العود..!

خذت ولدي العود وتجهزنا عشان ننزل وننضم لباقي العايله...
بنشوف منو بياكل الجو.. انا وولدي العود والا المعاريس..!!






»•¤©§| ( النـــهايـــــة ) |§©¤•«