فيسبوك تويتر RSS



العودة   مجلة الإبتسامة > الروايات والقصص > روايات و قصص منشورة ومنقولة

روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا



إضافة رد
 
LinkBack أدوات الموضوع انواع عرض الموضوع
  #10  
قديم April 3, 2015, 02:57 PM
 
رد: رواية غرام و إنتقام للكاتبة نسايم نجد

بعد ساعه
دخل عبدالرحمن مع خوال عياله جلس اول مجت عينه على راشد كل منهم انصدم بالثاني

راشد خاف من عبد الرحمن وراشد جالس جنبه جاسم

اول ماشافه عبدالرحمن ثار جنونه وذكريات الماضي صارت بين عيونه أكل راشد بنظرات كلها حقد وكره ما تكلم ولا كلمه طلع

الكل استغرب طريقة طلعته من المكان بعد دقائق الا عبدالرحمن داخل وبايده مسدس صوبه بوجه راشد كل الرجال الي بالمجلس خافو ان عبدالرحمن يتهور و يذبحه حاولو يمنعونه لكن شكله مصر على ذبحة راشد

عبدالرحمن / جاي يالخسيس بعد كل سواياك

راشد /............

جاسم منصدم من الموقف ومن سكوت عمه ومن النفضه الي جته لما شاف عبدالرحمن

عبدالرحمن / راشد لاتحسبني نسيت سواياك يالجبان تقرص وتنحاش لكن اليوم موتك بيدي برجع الاولي والتالي

قام محمد مسك جواله واتصل على اخته هند لعل وعسى تقدر تتصرف مع عناد ابوه

محمد / الو هند الحقينا

هند خافت / خير وش صاير

محمد / ابوي بالمجلس رفع مسدس بوجه رجال اسمه راشد كل الي بالمجلس ما قدرو عليه اخاف يتهور ويذبحه

هند تروعت وصارت تنتفض عرفت انه راشد ابوها موجود / انا جايه الحين

هند بسرعه لبست عباتها وصارت تركض لان قسم ارجال بعيد عن قسم الحريم

دخلت عليهم هند بصوت عالي / لاااااااا ياخالي

وقفت بوجه خالها صارت بينه وبين راشد الراجيل انصدمو من دخول الحرمه وش علاقتها بالي يصير

هند بالم ووجع وحزن / حطها بصدري ياخالي ولا تلوث يدك بدم راشد

الكل مفجوعين وجاسم عرف انها هند الي با لشركه وعرف ان عمه عامل مصيبه جاسم خجلان منهم

هند ودموعها تنزل / ياخالي لا تخليني ناكره لجميلك انك تنعدم بسبتي ياخالي لو صار لك شي انا اضيع انت عزوتي انت قوتي انت سندي انت اهلي كلهم انت امي ابوي لا تضيع عمرك علشانه اذا بتقتله اقتلني قبله اهون من اني افقدك يالغالي

والتفتت لراشد ناظرته بحقد وكره ورجعت تناظر خالها والله ولي خلقك وخلق غلاك بقلبي لدفعه ثمن سواياه غالي دخيلك ياروح هند ارمي المسدس عنك لا تلوث يدك بدمه

تاثر عبدالرحمن كثير من كلام هند وخنقته العبره

هند / يـ يـ يبه دخيله لاتقتله

اول ما سمعها تناديه يبه الكلمه الي ياما تمنى هند تقولها له نسى الرياجيل الي بالمجلس رمى المسدس وسحب هند وضمها ضمه قويه وصار يبيكي بصوت عالي وهي تبكي وتنتفض

عبدالرحمن / قلتي لي يبه اه لو تدرين ياهند اش كثر فرحتي

هند وهي تشاهق / قلتها وانا كنت اتهرب من قولها ماكنت اتوقع اني اقولها يالغالي وصارت تبكي
كل الي بالمجلس تاثرو وابو بسام وابو نواف تاثرو من بكاء عبد الرحمن لانهم يعرف واش كثر متعلق بهند

جاسم تاثر من الموقف الي صار قدامه و تاكد ان عمه مسوي مصيبه معهم نفسه يعرف وش مسوي ليه يقولون عنه حقير ونذل وعمه ليه مادافع عن نفسه

و زاد اعجابه بهند وقوتها وجرائتها وتعلقها بعبد الرحمن وتعلق عبدالرحمن فيها

مدت هند يدها على دموع خالها ومسحتها بيدها وسحبته بيده وطلعت معه برا الخيمه وقبل ما تطلع التفتت لجاسم

هند بعصبيه وبقوه وقسوة / ياليت تطلعون برا لانكم ضيوف غير مرغوب فيكم مايجي من وراكم الا الشر

وبعد كلمتها طلعت

نواف ركض لجاسم الي لاحظ عليه الانكسار بسبب الي صار وكمل عليه كلام هند

نواف / اعذرها يا خوك ولا تاخذ بخاطرك المقصود عمك ولا انت مالك ذنب

جاسم وهم منفجع من الموقف وخجلان ماله وجه يتكلم ويجلس بعد الي صار طلع مع عمه بدون ولا كلمه

طلعت هند مع خالها يدها بيده وراحت جهة حديقة الورود

هند / خالي اجلس هنا وسع صدرك حقي من راشد باخذه لكن مراح اورط نفسي بدمه والقتل موحل
انا الي مقهوره راشد ذوقني المر وهو سبب ضعفي

عبدالرحمن / هو الي شفتيه بالشركه

هند / ايه ياخال ماقلت لك هو سبب ضعفي

عبدالرحمن / عقب الي شافه الليله مراح يجي له وجه يقابل الرياجيل

هند / فكنا من سيرته متى بنرجع لبيوتنا

عبدالرحمن / بكره بعد صلاة الجمعه

هند / خالي ترى الخميس الجاي فض عمرك على العشاء ضروري

عبدالرحمن / ليه عازمتني

هند بحب / تستاهل من يعزمك لكن عندي عشاء عمل مع عملاء يبون ممولين لشركتهم

عبدالرحمن / ان شاء الله

هند / خالي ابي اقولك شي بيفرحك

عبدالرحمن / قولي

هند / شريت قصر امي الي سرقه راشد كان حاجز عليه البنك وشريته من البنك

قام وباس راسها عبدالرحمن / بعدي بنتي بردتي قلبي براشد سلمت بطنن حملت فيك ولله وثمرة تربيتي فيك الحين بذا الخبر غيرتي مزاجي الي خربه شوفت النذل راشد

هند / الحمد لله اني فرحتك

عبدالرحمن / أي والله فرحتيني انك رجعتي المال المسروق لاهله

وقف / هند تاخرت على الرياجيل انتبهي على نفسك

دخل عبد الرحمن مجلس ارجال تغيرت نفسيته بعد شراء هند للقصر دخل عليهم يضحك ويسولف

ابو بسام / كانك مبدلينك منت الي من شوي

ابو نواف / هذا سحر من اسحار هند

عبدالرحمن / هههههههههه وش تبون مني اقوم اكوفنكم محلكم علشان تنبسطون

ابو نواف / صاير تخوف اهم شي ان محمد شال المسدس واخفاه ولا كان ذبحتنا ما تنتفاهم انا شباب مابي اضيع عمري بصير معك مسالم

الكل / هههههههههههههههههههههههه



في سيارة جاسم

طلع من الاستراحه كلم خالته وقال لها تطلع في السياره جالسين ساكتين جاسم منقهر من عمه

ويفكر في نفسه / اكيد مسوي بلوه كبيره مع هند هذي والا ليش عبد الرحمن بغى يثور فيه بالمسدس لازم اعرف السر الي مخبيه علينا عمي والله ما صار لي وجه اوريه لنواف بعد الي صار اكيد نواف يعرف بس استحي يمكن البلوى الي مسويها عمي تقطع الوجه اكيد خالتي موضي تعرف السالفه لازم بكره اسئلها لازم اعرف

وصلهم البيتهم نزلهم جاسم ماله خلق يقابل عمه بعد الي صار لانه مايضمن اعصابه يخاف ينفجر بعمه

كمل طريقه لبيت امه دخل البيت مافي احد دخل غرفته دخل الحمام اخذ شور لعل وعسى يطفي قهره وحيرته

حط راسه على المخده مستغرب من قوتها كيف تتعامل مع الرجال بقوه تصرفاتها رجوليه ما تميل ابد لصنف لحريم قوتها وشراستها شخصيتها القويه العنيده المسيطره الي تخوف الرجال

ليش عند عمي تضعف وتنهار ياترى ياعمي وش مسوي لها انا متاكد انه شي كبير الي تخليها تبكي وتنهار ويجيها انهيار عصبي حرمه حديديه تنهار بسبتك ياعمي بنجن اذا ماعرفته متى يجي الصبح وتفك خالتي حيرتي

يوم جاء بينام مر طيف حبيبته قدامه خفق قلبه وبتسم من انتي يالي حطمتي قلبي وذوبتيه الاكيد اخت محمد بس منهي وش اسمها طمعان انك تتزوجها عقب الي صار مستحيل تتزوجها وهم طاردينا اليوم بسبب عمي وهو بافكاره من التعب نام



عند الحريم بالاستراحه


دخلت هند عند الحريم وهي منهار بعد الموقف الي صار وهي تكابر عند خالها جلست بمكان منعزل وصارت تشاهق من البكاء دخلت عليها نوره خافت لما شافتها تبكي

نوره بخوف / هند وش فيك يوجعك شي

هند من كثر البكاء ماتقدر تتكلم / هزت راسها بلا

راحت نوره المطبخ جابت كاس ماء غسلت وجها وشربتها

نوره بحزن / وغلات امك عندك تقولين

هند بوجع / راشد كان هنا

تروعت نوره / وش جابه هنا متى جاء وش يبي

هند / مدري بس خالي بغى يقتله رفع المسدس بوجهه وكلمني محمد ولحقت عليه قبل لا يتهور بدمه

نوره بصراخ / وشوووو عبد الرحمن رفع المسدس بوجه راشد

هند / ايه وخالي مره متاثر حاولت اغير جووه لكن راشد عكر مزاجه اول مره اشوف خالي يبكي شفت وش سوى فينا راشد

نوره تقطع قليها على زوجها وتعرف دموع الرجال غاليه ما ينزلها الا القهر والي سواه راشد بساره وهند فجر القهر بعبد الرحمن

هند / خاله لا تقولين اني قلت لك انا ماقلت لك الا علشان يصير عندك علم لو عصب عليك ولا شي تعذرينه لانك عرفتي السبب

نوره بحزن / هذا الي جانا من ورى راشد

هند بتغير من الحزن / خاله شخبار العشاء بموت من الجوع

نوره / من اليوم البنات يشون شكلهن اكلن العشاء ونسنا

هند / الظاهر الرجال بياكلون من الشوي

نوره / لا مراح يكفيهم لانه كثرو جو اخواني بعد ما زارو بدر

هند / بشري وش صار لما زاروه

نوره / جو من الزياره متاثرين ولا اخذت اخبارهم

هند / اجل كملنا عليهم بالفلم الي بسبت راشد لانهم كانو موجودين لما صارت المشكله بروح عند البنات

نوره متنكده من الكلام الي قالته هند دخلت عند الحريم

وهند راحت عند البنات الي كانن يشون ويضحكن

نجلاء / وينك هند من اليوم ما جلسنا معك

هند / انشغلت شخبار عشانا ليكون اكلتنه

غاده صديقة هند ملاحظه اثار البكي على وجه هند سحبتها على جنب

غاده / هند وش فيك انتي باكيه لا تقولين لا لاني اعرف انك باكيه ليش

هند / سالفه صارت وانتهت بسلام

غاده / قولي شنهي مراح اتركك لين اتقولين لو اجلس لصبح

هند / قالت كل الي صار لغاده ونبهتها ماتقول لاحد

غاده / كل ذا صار ولا درينا الله يعينك ويصبرك ي وربي بيعوضك على صبرك الحمدلله لحقتي على عمي ابو خالد لا يتورط بدم راشد

هند / الحمد لله خلاص قلت لك خلينا نروح للبنات

راحن للبنات وجلسن سوالف ضحك وتنكيت من غاده لين خلص الشوي جهزن السفره عند الحريم وحطن الشوي والسلطات والمقبلات مع الخبز والببسي

تعشن والحريم الكبار نامن والبنات سهرن سوالف ولعب لين الساعه ثنتين كلهن دخلن غرفه وحده وبسطن فرش على الارض فراش هند بالوسط بين غاده اختها وغاده صديقتها وحاضنه غاده اختها

ام نواف وام بسام ونوره ونجلاء نايمه بغرفه ثانيه وغلاء نايمه بحضن امها



اليوم الثاني بالاستراحه

عن الرجال

صحو على اذان الفجر صلو الشباب رجعو ينامون الشياب فرشو فرشه برا والجو خيال بعد صلاة الفجر جلسو يسولفون

عبد الرحمن يكلم ابو نواف

عبدالرحمن / وش صار بصفقه الي تسربت وخسرتها

ابو نواف / القهر يابو خالد ان فيه موظف خاين بشركتي يسرب معلومات لشركات المنافسه

عبدالرحمن / الله يكفينا الشر صارت الذمه تنشرى بفلوس تلقى شارينه الشركات المنافسه لتهريب المعلومات من شركتك

ابو نواف / على كذا ياخوك بفلس لان الصفقه الي خسرتها كبيره لو بفقد صفقات من هالوزن بتخسر شركتي سمعتها

ابو بسام / مافي حل الا ان تكشف الموظف الخائن وتطرده

ابو نواف / شلو اعرفه كاني ادور ابره بكومة قش

ابو بسام / سهله يبو نواف

ابو نواف / الحقني ياخوك

ابو بسام / ابشر شوف الي دايما تناقشهم بصفقات كل مره اخذ واحد منهم وعطه معلومه مغلوطه ولا اوصيك كثف المراقبه على الموظقين حط كمرات مراقبه بالمكاتب صدقني بسبوع بينكشف

ابو نواف / والله فكره شورك وهداية الله

ابو بسام / نبي على هالجلسه قهوه وفطور تتصل يا بو نواف على ام نواف ولا بتتصل يجبونها

عبدالرحمن / وش لك تتصل فيهم وتقومنهن من نومهن وعده القهوه عندنا الفطور نقوم واحد من الشباب يجيب فطور لنا وللحريم

ابو نواف / والله انك رحوم مع الحريم

عبدالرحمن / وليه ما نرحمهن وهن جابن لنا العيال وماقصرن بحقوقنا

ابو بسام / ابو نواف صدق يويلك لو تسمعتك ام نواف تشيشنا على الحريم

ابو نواف / الله وكبر ماقلنا شي واكلتوني شكلهم معينينكم من انصار حقوق المراه

ابوبسام وعبدالرحمن / ههههههههههه



عند جاسم

جاسم صلى الفجر وبعد الصلاه ركب سيارته بطريقة لبيت عمه وصل البيت فتح الباب بالمفتاح الي معه دخل لقى خالته موضي بالصاله انبسط لماشافها لحالها لقاها فرصه يسالها عن هند وعبد الرحمن مدام عمه للحين ماجاء من الصلاه

جاسم / صباح الخير

موضي / صباح النور وينك مانمت امس هنا

جاسم / نمت في بيتنا

موضي / امكك واخوانك مسافرين وش مجلسك هناك لحالك

جاسم / كنت متضايق

موضي / عسى خير وليش ما تضايق وحنا امس مستانسين بالطلعه

استانس ان خالته سهلة عليه مهمة السؤال

جاسم / خاله ابي اسئلك سؤال وابيك تقولين الصدق

خافت موضي من جديت جاسم قالت / اسئل وليه بكذب

جاسم / تعرفين واحد اسمه عبد الرحمن الفهد بينه وبين عمي مشكله كبيره بسبب بنت اسمها هند تصير بنت اخو عبد الرحمن

صعقت موضي شلون الماضي ظهر لكن مستحيل تقول الصدق لانها بتطلع بعيونهم مجرمه

جاوبت عليه وباين عليها الخوف والارتباك الي ما غاب عن جاسم / وش يعرفني فيه مو كل شي يقوله لي عمك وبذات الي يخص اشغاله

جاسم عرف ان خالته تكذب مستحيل يعرف منها شي ولا من عمه حس بالياس

قام واقف بيطلع لغرفته ماله خلق يشوفهم حس انه عايش بين مجرمين مراح يرتاح لين يعرف لكن كيف وهم مستحيل يقولون

جاسم في نفسه / والحل يا جاسم كيف بتعرف وتبرد نارك ان كان لهم حق عندنا انا بوقف بوجه عمي وارده لهم انا ما حب الظلم مستحيل اوقف مع الظالم لو كان عمي يارب انك تساعدني

طلع لغرفته وهو محمل من الهموم الي تهد جبال دخل غرفته اتصل باخوه فيصل
يرن جوال فيصل من ثالث رنه رد

جاسم / الو فيصل

فيصل / هلا جاسم كيفك وش مصحيك ها لوقت ياخوك

جاسم بضيق / اه يا فيصل الهم والضيق كابس على صدري

فيصل بخوف / سلامتك من الاه ياخوي قول وش مضايقك خوفتني عليك ومشكلتي بعيد

جاسم / الشي كبير يافيصل ما ينقال بالتلفون

فيصل / الحين بنرجع

جاسم / وجداتك بتنكسر فرحتهن

فيصل / لا ابشرك بيجن معنا قدرت فيهن امي بيجلسن اسبوع عندنا وعليك رجعتهن

جاسم / لا تتاخر علي يا خوك محتاج تفك حيرتي

فيصل / ابشر يا خوك انتبه لنفسك يله بنتجهز لرجعه

جاسم / الله يحفضك انتبه لطريقك



في الديره


سكر فيصل من جاسم وهو يغلي من خوفه على اخوه واضح من صوته ان الشي مو سهل يعرف اخوه وحافظه

طلع فيصل لصاله لقى امه مع جداته والجوهره توها قايمه

فيصل / يمه ممكن تجين ابيك بشغله

قامت ام جاسم مع ولدها ودخلت المطبخ

ام جاسم / خير يا فيصل

فيصل / جهزي اغراضكم بنمشي الحين ضروري

ام جاسم / ليه

فيصل / واحد من الربع تعبان وطلبني الشغل عندهم طيران اليوم بعد العصر ولازم اكون بدري برياض علشان يمدي اتجهز لسفره

ام جاسم / خلاص وانا امك نفطر ونكون جاهزين

فيصل / فديتك يا لغاليه حاولو ما طولون وتخلصون بسرعه

ام جاسم / ان شاء الله يوليدي

الاستراحه

عند الحريم

صحتام بسام من نومها بسبب حركات بنتها غلا الي نايمه بحضنها بسبب ترفسها

قامتراحت للمطبخ تجهز الفطور علشان تصحي الحريم لقت ام نواف سابقتها للمطبخ وجهزت كل شي
ام نواف رحمت ام بسام لان الشغل امس كله عليها

ام بسام / صباح الخير

ام نواف / صباح النور وش مصحيك امس تعبناك وقلت اليوم اريحك

ام بسام / لا تعب ولا شي الي يشوفك يقول كل يوم متجمعين

ام نواف / والله انك صادقهماصرنا مثل اول نجتمع كل سبوع كبرو عيالنا وكثرت اشغالهم

ام بسام / أيوالله الا وينها نوره

ام نواف / مدري يمكن عند ابو خالد



عند الرجال

عند نوره وعبدالرحمن


اول ماصحت قلبها ماكلها على زوجها لان البارح طول الليل تحاتيه ومعورها قلبها من الي صاربينه وبين راشد

اول ما قامت اتصلت على عبدالرحمن وقالت تبي تشوفه لانهامشتاقه له ومن يومين ماجلست معه


نوره / حبيبي وينك مشتاقه لك لو ماطلبتاشوفك ماطلبت

عبدالرحمن / تسلمين يالغاليه البارح صار موقف بغيت ارتكبجريمه

نوره حطت نفسها ما تدري عن الي صار تبي يطلع الي بقلبه

نوره / سلامتك وش صاير

عبدالرحمن / قال كل الي صار

نوره / الحمدلله اليمرت على خير والحمدلله تدخلت هند ولا كان تهورت وحرمتنا منك وجلست تبكي ترى واللهيا عبد الرحمن لو صار لك شي يمكن اموت او استخف تكفى يا لغالي حافظ على نفسك علشاني

عبدالرحمن مسح دموعها / ليه البكي يا لغاليه يا رفيقة دربي يا نور دنيتي ياام عيالي ما صار شي كل شي انتهاء

رمت نوره نفسها على صدره وتمسكت بخصره

نوره / جعلني ما ذوق حزنك وجعل يومي قبل يومك



عندالبنات


قامت هند من النوم وكل تفكيرها بخالها راحت ادور عليه شافتههو ونوره جالسين وهو ضامها

هند / احم احم يا عيني على غزل الشياب

نوره ارفعت نفسها عن حضن عبد الرحمن وهي مستحيه

عبدالرحمن / شياببعينك الا شباب واحلى شباب عليك اوقات مدري كيف جايه ما خليتينا نتهنا يحبك لتخريب

استحت نوره وولع وجهها احمر


هند بمزح / خالي شوف وجه خالتي صارطماطه


عبدالرحمن يطالع بنوره بيرفع ضغطها / وش الي ذبح قلب خالك الا ذاالخدود الطماطه

هند / ههههههه حرام عليك خالتي ذابت شكلها بيغمى عليها اهمن الحب وعمايله

نوره مستحيه وبعصبيه / هنددددددددد خلاص

هند / برجع للبنات مابي اصير عزوله

عبدالرحمن / احسن بعد خلينا ناخذ راحتنا

هند / لا تخلوني استنذل معكم وارسل لكم غاده عاد ان شافتكم بتلزقفيكم

عبدالرحمن / لا والي يعافيك كلش ولا غاده مراح نسلم منلسانها


راحت هند عند البنات علشان تقومهن وعلشان يفطرن ويجلسن يسولفن معبعض معاد بقى وقت وكلن بيرجع لبيته




عند جاسم

رجعبيت امه ينتظرهم هناك على الساعه وحده الظهر كان جاسم منسدح على الكنب والتفكيرذابحه وقلبه معذبه على عشقه الي اندفن اول ما نولد جالس على غداه امس بالاستراحهماكل شي وباين على شكله التعب والضيق وهو على حاله دخلت ام جاسم وفيصل والجوهرهوجداته

جاسم لما شاف جداته فز وراح لهن وباس روسهن وراس امه الجوهره سلمتعلى اخوها وطلعت فوق لغرفتها بتكمل نومها

جاسم بحب / حيا لله من جانا تومنور المكان

الجده ام راشد / الله يحيك ويبقيك يوليدي

الجده ام موضي / شلونك يوليدي وجهك ماعجبني تعبان يوجعك شي

جاسم / بخير الله يبقيك مافيني الا العافيه كان راسي يوجعني مدام شفتكم بطيب

الجده ام راشد / دومبخير الله يفرحني فيك وشوف عيالك مالين هالبيت

ام جاسم / جاسم وش جابكوالبيت مافيه احد عمك خالتك فيهم شي

جاسم / جاي استقبلكم وخالتي وعميمعليهم خلاف

فيصل منتبه لحالت جاسم وباين عليه الهم

فيصل / جاسمالله يعافيك ممكن توصلني المطار وغمز له

جاسم عرف ان فيصل يبيه يشكي له

جاسم / طيب

طلعو من البيت ركبو السياره وتوجهو لمطعم

فيصل / قول ما طقيت مشوار ساعات الا علشان تشكي الي مضايقك

جاسم / تسلم يا خويالمشكله بسبت عمك

فيصل / قول انا اسمعك

جاسم / انا قلت لك عن سالفتهند الي بشركه وموقفها مع عمك

فيصل / ايه كمل

جاسم / امس بعزيمهالاستراحه وبالصدفه والقدر ان هند الفهد وعمها فيه

فيصل متحمس سكت يبي جاسميكمل

جاسم / وكنت معهم بدون عمي وكانو ناس قمه بالذوق والاحترام ومنالقراده عزمت عمي وجاء تخيل اول ماشافه عم هند رفع المسدس بوجه عمك ناوي يذبحه

فيصل مصدوم / قول التفاصيل لا تختصر كيف وشلون وعمك صار له شي

جاسم / حكى لفيصل كل شي بالتفصيل

فيصل من الصدمه /...............

جاسم / تكلم وش فيك ساكت

فيصل / الله يعينك كيف تحملت الموقف واضح ان عمك مسويبلوه مع اهند ليكون

جاسم / ليكون شنو

فيصل / مغتصبها

جاسم / فكرت فيها لو مغتصبها كان ما طلع من عندهم حي ولا وقفت بوسطهم بقوتها وجرائتها ولاهمها اكبر شنب

فيصل / وقتك تتغزل ببنت الفهد لازم نعرف وش مهبب عمك لان اليسواه بيلحقنا

جاسم / أي والله

فيصل / مالك الا خالتي موضي اسئلها

جاسم / سئلتها متاكد انها تعرف واضح انها تكذب قالت ماتدري

فيصل / لا حول من الي بيقول لنا وش رايك تروح لهند لمكتبها وتسالها

جاسم / ناويعلي ما شفتها يوم طردتنا ان جيتها يمكن تذبحني

فيصل / اجل انسى

جاسم بحب وهيام / فيصل شفت عندهم حوريه وش حوريه الا ملاك وربي تذبح القلببشوفتها اول ما شفتها كانت مع اخوها محمد والثانيه يويلي على الثانيه تحسب انياخوها سكرت عيوني بيدها لا ومسكت راسي ورفعته يويلي يوم رفعته وجت عيني بعينها وربيبغيت اتهور بس ربك ستر

فيصل / ههههه يعني طحت ومحد سمى عليك زين ما تهورتكان انت المذبوح

جاسم / انا شاك انها غاده بنت هند

فيصل / غاده كبرالجوهره 19 فرق بالعمر بينكم اكثر من 15 سنه

جاسم / لا ماتوقع الي شفتهاعمرها 19 الي شفتها قمه بالانوثه اتوقع بالعشرينات

فيصل / شيلها من راسكمدام عمك راشد

جاسم / يا ليت يا خوي بس ما قدر كل ما حاول انساها القانيمشدود اكثر لها

فيصل / الله يعينك

جاسم / فيه موضوع بشاورك فيه علىاني موافق عليه

فيصل / قول

جاسم / نواف خطب اختك الجوهره

فيصل فرح بالخبر لانه يحب نواف وله معزه بقلبه

فيصل / نواف ما يرفضيا خوك لولا الحياء خطبته للجوهره

جاسم / هذا كلامي باقي راي الجوهره

فيصل / حاول تقنعها اذا ارفضته هي الخسرانه

جاسم / بحاول وانت لاتقصر

فيصل / ان شاء الله




رد مع اقتباس
  #11  
قديم April 3, 2015, 02:58 PM
 
رد: رواية غرام و إنتقام للكاتبة نسايم نجد

في الاستراحه

عند الرجال


ابو بسام / خالد متى قال لكم بيجي

عبدالرحمن / قال اليوم ماحدد الوقت

ابو بسام / الله يجيبهم بسلامه

ابو نواف / متى نرجع لبيوتنا

عبدالرحمن / هههههه مشتاق لعجوزك

ابو بسام / يحليلك يابو نواف منت بقادر تصبر

ابو نواف / ايه مشتاق لها عندكم مانع ولا تقولون انكم منتم مشتاقين لعجايزكم

عبدالرحمن / الله يخليهن لنا

ابو بسام / امين

عبدالرحمن / الرجعه بعد الغداء الغداء علي موصي فيه

ابو يسام / كثر الله خيرك

ابو نواف / امين

دخل محمد ونواف عليهم

محمد ونواف / السلام

الكل / وعليكم السلام

ابو نواف / وينكم من افطرتو ماشفناكم

محمد / طلعنا نتمشى ونطلق رجولنا

نواف / من جينا هنا بس اكل ونوم قلنا نسوي رياضه صباحيه

ابو نواف / والله انك صادق يوليدي

محمد / يبه شفت هند اليوم كيفها عقب البارح

عبدالرحمن / شفتها تعرف اختك وانا ابوك تبين عكس الي داخلها انا حاس ان داخلها بركان لو انفجر دمرها

ابو بسام / البنت هذي من صغرها والهم ملاحقها يوم قلنا نست طلع راشد من جديد

ابو نواف / مع اني اجهل الي سواه راشد لكن مهما كان ابوها يابو خالد لا تقوي بنته عليه وتسبب عقوق الوالدين

عبدالرحمن وهو معصب / وش عقوق الوالدين هو متبري منها وراميها ولا سال عنها وتقول ابوها سواياه في بنته سوايا كافر وحط ببالك هي كارهته وحاقده عليه من فعايله فيها وفي امها قبلها بعمري ماشفت هند تكره احد كثر ابوها

ابو بسام / الله يكون بعونها

عبدالرحمن / هند ماشفتها ضعيفها الا قدام راشد دموعها اخر مره شفتها بموت امها ظهرت بظهور راشد جاها انهيار عصبي بسبته لا بارك الله فيه

ابو بسام / ليكون الي جاها بشركه

عبدالرحمن / ايه

ابو بسام / وش جابه

عبد الرحمن / قال عن سبب جيت راشد

ابو بسام / له وجه بعد الي سواه

عبدالرحمن / والله فرحت قلبي امس لما قالت لي احلى خبر

ابو بسام / عساه خير

عبدالرحمن / شرت قصر ساره

ابو بسام / كفو والله هذي هند الله يرحم بطن حملتها ويدن ربتها

ابو نواف مثل الاطرش بزفه خلصو الغداء وكلن رجع بيته



في بيت عبد الرحمن


وصل خالد من السفر على الساعه 12 الظهر كان تعبان وصل بسام لبيته وبعدها رجع لبيته

اول ماوصل طلع لغرفته حط راسه ونام

على الساعه اربع العصر وصل عبد الرحمن واهله شافو سيارة خالد عرفو انه وصل

هند ماتقدر تصبر على مايقوم مشتاقه تحس شي ناقصها لاغاب عنها

على طول طلعت فوق ودخلت غرفته

هند قربت من سرير خالد طبعت بوسه على خده حس فيها فتح عيونه وابتسم

خالد / انا قايل مستحيل تنظريني لين اقوم

هند / أيه مشتاقه لك كثير يالغالي

خالد / وانتي اكثر بشري وش اخبارك

هند بحزن / اخباري ما تسر ياخوي ما كملت كلامها الا دمعت عيونها

فز خالد من سريره مفجوع على هند واضح عليها الهم

خالد / بدخل الحمام اغسل وجهي ماني بمطول بطلع بسرعه حلفتك ما تتحركين

دخل الحمام وبسرعه طلع و الهواجس ذابحته ذبح

خالد بحب وحنان / افتحي قلبك لاخوك يقلب اخوك انا عونك لاضاقت دنياك وربي ارمي نفسي بالنار وانا فرحان ولا اكتوي بدموعك

هند ضمته وصاحت بوجع / خالد راشد طلع من جديد بحياتي ظهور راشد متعبني لما اشوفه اذكر افعاله راشد بيكون سبب موتي

رفعها خالد وهو موجوع من كلامها طالع بوجهه المتورم من الصياح

خالد / راشد الي قابلتيه بالمكتب

هند / ايه ولحقنا للاستراحه

خالد معصب / كيف وشلون

هند / قالت له كل الي صار وبين كل كلمه تشهق من البكي

خالد / كل هذا صار وانا غايب يا خساره يا ليت كنت موجود كان سويت الي منعتي ابوي يسويه وريحتك من العذاب الي عايشته

هند / فديتك ياخوي الي مرضيته على خالي مستحيل ارضاه عليك

خالد / كل عمري فدوه لك يالغاليه

خالد بيغير جو على هند وبيفتح قلبه لها بسالفت غاده

خالد بتوتر / هنوده اخوك يحب

هند بفرح / عارفه ومن زمان وعارفه حبيبتك بعد

خالد يبتسم / كاشفتني وش رايك

هند / ناسي اني احس فيك وانك توئمي والله ياخوي غاده مافي منها وهي تبادلك الحب

فز قلبه من كلام هند خالد بجديه / وش دراك انها تحبني


هند تبتسم / ادري ومتاكده بعد لا وازيدك من الشعر بيت عشق مو حب

فز وباس راس هند على هالكلام الي رد الحياة لقلبه

خالد / تتوقعين توافق علي

هند تبتسم / يالخبل اقول تعشقك اكيد بتوافق هي تكتوي بحبك

خالد بقلق / وش دراك انها تحبني يمكن تتوهمين

هند بتاكيد / مثل ما انا متاكده انك تحبها متاكده انها تحبك لاتنسى انها صديقتي وكاشفتها مثل ما انا كاشفتك

خالد بستعجال / اجل بفاتح ابوي وامي

هند بحب / ترى هذا يوم المنا لخالي ولابو بسام نفسهم يثبتون علاقتهم مع بعض بنسب كانو يبون يثبتونه فيني مع بسام بس ضيعت املهم البركه فيك
متاكده لما تقول لخالي بينبسط زين ما يشيلك على راسه ويدور فيك من فرحته

خالد / ههههههههههههه لهدرجه

هند / واكثر

خالد بفرح / اجل خير البر عاجله خليني اقوله ابسطه بعد الي صار وضيق خلقه بالاستراحه

هند / ايه

طلعت هند من غرفة خالد نزلت تحت دخلت غرفتها لقت غاده نايمه

خالد دخل الحمام اخذ شور ولبس ملابسه وطلع نزل تحت طلب من الشغاله كبتشينو

خذا الكاس وطلع بالصاله شربه وقرر يطلع لغرف امه وابوه يناقشهم بموضوعه مافيه صبر ينتظر

قام بيطلع الا يسمع صوت ابوه وامه على الدرج
دخل عبد الرحمن ونوره الصاله استقبلهم خالد وباس روسهم

عبدالرحمن / متى جيت يابوك

خالد / على الساعه 12

نوره / تغديت وانا امك

خالد / ايه تغديت مع بسام انا ابيكم بموضوع

عبد الرحمن ونوره جلسو وجلس خالد قدامهم

خالد / يبه قررت اخطب

عبدالرحمن بفرح / الساعه المباركه يبوك

نوره / تختار ولا نختارلك

خالد / لا اخترت

عبدالرحمن / من اخترت

خالد / بنت عمي ابو بسام
عبدالرحمن ونوره فرحو من اختيار خالد وكانو طول عمرهم يتمنونها له

عبدالرحمن / يا زين ما خترت الله يفرح قلبك مثل مافرحت قلبي

نوره / تكلم ابو بسام ولا انا اكلم ام بسام

عبدالرحمن / لا كلمي ام بسام نبي راي البنت ان وافقت تقدمنا اخاف من ابو بسام يغصب عليها لاني اعرف يتمنى نسبنا مثل ما تمنى نسبه

نوره / خير البر عاجله اليوم ازور ام بسام وان شاء الله ماجي الا بالموافقه

خالد / ان شاء الله لاوصيك يالغاليه امدحي فيني تراني ولدك

عبدالرحمن / هههههههه مايحتاج امك تمدحك تراهم يعرفونك اكثر منا

نوره / باذن الله ان غاده تكون من نصيبك لا تحاتي



في بيت ابو نواف


لما طلعو من الاستراحه اصرت عليهم نجلاء يوصلونها لبيتها لانها عارفه ان بسام موجود وهي مشتاقه له موت اول مره من تزوج يسافر ويتركها

وصلها نواف لبيتها ورجع لبيتهم اول مادخل لقى امه وابو جالسين بالصاله يسولفون

نواف / زين انكم متجمعين عندي لكم موضوع مهم

ابو نواف / خير وش الموضوع

نواف / يبه بعد اذنك انا خطبت

ابو نواف عصب / خطبت واخر من يدري انا

نواف / وسع صدرك يالغالي انا كلمت اخوها اجس النبض وبيكم تتقدمون رسمي

ام نواف / من هي بنته وشلون عرفتها

نواف / لايروح تفكيرك بعيد حتى اسمها ماعرفه

ابو نواف / اجل شلون خطبتها

نواف / يبه انا شاري اخوها وشاري نسبه اخوها جاسم صديقي وانت تعرفه ومعجب باخلاقه

ابو نواف / زين ماختر والله ان جاسم والنعم وربي لو ان عندي بنت تمنيتها لها

نواف / طيب متى بتتقدمون تخطبونها الي

ابو نواف / حدد الوقت الي يناسبكم ونروح نخطبها

نواف / اجل بكلم جاسم وشوف الوقت الي يناسبهم لزياره




في بيت بسام


دخلت نجلاء بيتها ودخلت غرفتها شافت بسام نايم واضح عليها التعب
دخلت الحمام خذت شور ولبست قميص نوم احمر يوصل لركبه مفتوح من الجوانب تعطر بعطرها المضل

رفعت الحاف ودخل بسريرها ونامت بقرب بسام
ودفنت وجهها بصدره وهي متلهفه ومشتاقه له حس فيها وضمها اكثر لصدره وهو نايم وكملو نومهم




في بيت راشد


وصل جاسم جداته لبيت عمه بعد مادخلن جداته البيت وصلهن داخل وطلع على طول لانه يكره استقبالهم لجداته يستقبلونهن ببرود وكانهن غير مرغوب فيهن

موضي كارهه وجودهن وتضايقت اكثر انهن بينامن عندها سلمت عليهم ببرود

وراشد من سالفة الاستراحه وهو مو طبيعي كاره عمره وماله خلق لاحد

ام راشد / شلونك يوليد

راشد برود / بخير يمه

ام راشد بزعل / يا دفع البلى ما تفكر تمر تطمن على امك

راشد من غير اهتمام / مشاغل يمه

ام راشد بعتب / الشغل مايشغلك عن امك

راشد سكت ماله خلق يجادل امه

ام موضي بزعل / وينك يا موضي ما كان عندك ام تسالين عنها وتزورينها

موضي ببرود / عارفه انك بخير تجيني اخبارك من جاسم

ام موضي بقهر / وش بيضرك لزرتيني

موضي ببرود / اهم شي انك عندي وشوفك بخير ماله داعي العتاب والزعل

هزت ام موضي راسها من قساوة بنتها




في بيت ام جاسم



جالسه ام جاسم والجوهره وفيصل بالصاله والجدات في بيت راشد بيامن عنده الليلة
دخل جاسم بعد موصل جداته للبيت دق جواله الا المتصل نواف

جاسم / ياهلا ومرحبا

نواف / الهلي مايولي كيفك

جاسم / والله ماني بخير بعد الي صار بالاستراحه

نواف / الله يعين شكلهم حاقدين على عمك

جاسم برجاء / طالبك يا خوي ما تدري وش سبب الحقد والله كرهت عمي بسبتهم وانا مدري عن السالفه

نواف / الي عرفته ان هند بنت عمك وانها تكرهه وتتمنى موته

جاسم / شلون بنته مستحيل عمي عقيم والكل يدري انه عقيم شلون طلعت بنته شكلك غلطان

نواف / مدري يمكن فاهم غلط بس تراها ناويتن بعمك نيه شينه لانها شرت قصره

جاسم بعصبيه / وش ناويه عليه وصلت انها بتطردهم من بيتهم والله انا الي بوقف بوجهها

نواف / فكنا منهم انا مكلم بموضوعنا

جاسم / الاهل ماجو الا اليوم ما كلمتهم

نواف / نبي نزوركم ونخطب رسمي شوف الوقت المناسب

جاسم / بعد اسبوع ان شاء الله

نواف / السبت الجاي

جاسم / على خير ان شاء الله

نواف / يله اشوفك على خير فمان الله

جاسم / فمان الله

لما دخل الصاله وشافهم متجمعين قرر يفااتحهم بالموضوع جلس جنب الجوهر والتفت عليها

جاسم بحب / الجوهره فيه واحد خطبك

الجوهره كانت تشرب عصير وشرقت

ام جاسم بعصبيه / الله يهديك روعت اختك احد يقول الموضوع كذا

جاسم / يمه تراه نواف صديقي

ام جاسم / الشورلاختك انا عني موافقه

الجوهره / ............

فيصل / الولد اخلاق ويشتغل دكتور جراح للقلب صديق اخوك جاسم واخلاقه من اخلاقه اذا عليك اعتراض على اخلاق جاسم

الجوهره / جاسم انا وراي سنه واتخرج والزواج بيشغلني عن دراستي وانت تعرف الطب مو سهل

جاسم / نواف مستعد بالي تبين ولا تنسين انه طبيب ويعرف هالشي

الجوهره / انا مبدئيا موافقه لكن لازم اصلي صلاة استخاره والخيره بالي يختاره الله

جاسم / اجل حاولي لا طولين علينا لانه بعد اسبوع جاين بيتقدمون رسمي

الجوهره / ان شاء الله





في بيت ابو بسام


في بيت ابو بسام جالسين يتقهون قهوة العصر الا دق التلفون ردت غلا

غلاء / ماما خالتي ام خالد على التلفون تبيك ضروري

قامت ام بسام وردت على التلفون

نوره / السلام

ام بسام / وعليكم السلام كيفك وكيف العيال

نوره / كلنا بخير نسال عندكم اليوم فاضيه بجيك ابيك بموضوع ضروري

ام جاسم / لو مشغوله افضي نفسي علشانك تعالي المغرب

نوره / ما تقصرين يام بسام خلاص انتضريني بعد المغرب




في بيت بسام


قامو من النوم ونزلو تحت وكانت نجلاء مجهزه القهوه والحلى

نجلاء بحب / بسومتي ما شتقت الي

بسام بحب / الا ذبحني الشوق ياعيون بسومتك

نجلاء / ما توقع كثري الله يخليك لاعاد تسافر وتخليني حياتي من غيرك ظلام

طالع فيها بسام بعيون كلها عشق وغرام وهيام

بسام بشق / وانتي من غيرك حياتي دمار ربي لا يحرمني منك وباس جبينها





في بيت ابو بسام


بعد المغرب جت نوره على الموعد وكانت ام بسام بنتظارها على نار خايفه وقلقانه من الموضوع الي جايه فيه نوره

دخلها لصاله قهوتها ونوره ساكته الي سبب الرعب لها

ام بسام بقلق / قولي الي عندك وقولي موضوعك

نوره بجديه / من غير مقدمات ولا بينا هالحركات ولدي خالد يبي بنتك غاده

ام بسام بفرح كبير / الساعه المباركه والله

نوره / يهمني راي غاده ويا ليت تردون علي الحين ترى خالد على نار وانا وعدته اجي والرد معي واتمنى تكون الموافقه خالد ولدي وتعرفونه ما يحتاج تسالون عنه

ام بسام / خالد ولدنا مثل ماغاده بنتكم انتظري بروح اسئلها

طلعت ام بسام لغرفة غاده لقتها على الاب توب

قربت من بنتها وقومتها وجلستها على السرير

غاده بخوف / خير يمه شكل عندك موضوع قوليه

ام بسام / خالتك نوره تحت جايه تخطبك لخالد وتبي ردك الحين تقول خالد على نار ينتظر الرد

نزلت راسها من الحياء ووجها وولع من الحراره

غاده / يمه الصراحه انا موافقه وخالد نعرفه مو غريب عنا واشور شوركم

ام بسام باست غاده وضمتها بحب ام بسام / الله يكملك بعقلك خالد ماينرد بنزل اطمن امه الي جالسه على نار

غاده / يمه بس مابي زواج لين اخلص

ام بسام / بقول لها ماضن انهم بيرفضون


نوره جالسه بالصاله ذبحها الانتظار وهي خايفه من رد غاده

نزلت ام بسام لنوره وشافتها متوتره

ام بسام بفرح / ابشرك وافقت روحي طمني ولدك لايحرق البيت عليكم

نوره بفرح وراحه / الله يبشرك بالخير والله يام بسام ما تدرين اش كثر فرحتي بالموافقه

ام بسام / لكن غاده ماتبي زواج الا بعد ماتخلص دراستها

نوره / يصير خير يملكون وان تخرجت سوينا الزواج

ام بسام / هذا شور الرياجيل

طلعت نوره من بيت ابو بسام وهي فرحانه الي كانت تحلم فيه وتتمناه لولدها صار







بيت عبدالرحمن


خالد جالس على نار وهند وغاده جالسين عنده

هند بطمنه / يابن الحلال طمن نفسك الموافقه ضامنتها لك

خالد / اقول هنوده يحلوك ساكته امي تاخرت

غاده بتقهره / ههههههههههههههه اكيد رفضوك و متفشله لا تجي بدري تقولك تنتظرك تنام وتجي

خالد بعصبيه / غدوووويه يا ليت تنقلعين لغرفتك صايره بومه ما تتفاولين بخير

هند / هههههههه حالتك مستعصيه خالد اذا وافقت وش تعطيني

خالد / الي تبين

هند / ا شهدي يا غاده مو يجحدني

غاده / ماماتي انا معك

هند / ولا يهمك انتي مع ماماتك

سمع خالد صوت الباب وسمعو صوت نوره تلولش

نوره / لوووووووووش

فز خالد وركض لامه وضمها

خالد / وافقو

نوره / اجل ليه الولش

خالد / فديتك ياغلى ام قولي وش تبين ثمن البشاره عيوني لك

هند / غاده ما تلاحظين انه جحدني

غاده بتنرفزه / الا اشوف ماماتي وش رايك تكلمين غاده وتخربين عليه

هند / رايك اسويها

خالد / فكينا من شرك يا لوسواس الخناس هند بغديها بكره بعد الشركه على حسابي واي مشوار تبيه من عيوني اسويه

هند / تسلم يالغالي فرحتك بالخبر هي بشارتي

خالد / تسلمين مدري ليه ما طلعت لك ها لعله

غاده بتقهره / ما عله غير غادتك ولا وش عامي عيونها توافق عليك قلو الرياجيلرياجال

خذا خالد كرتون الكلنكس وحذفها فيه

خالد / انقلعي لا ارتكب فيك جريمه

غاده / ههههههههههه يحلوك معصب يا خلود

خالد / خلود بعينك يالبزره

غاده / خالتو ابيك بموضوع ضروري ممكن

قامت نوره ومشت مع غاده لغرفة الجلوس

غاده / خالتو صديقتي الجوهره عزمتني على عشاء وانتي تعرفين راي ماماتي

نوره / قلتي لها

غاده / لا ابيك تساعديني انا مابي اروح الحالي ابيك تروحين معي

نوره / متى العزيمه

غاده / الاربعاء الجاي ابيك تتعرفين على امها

نوره / ان شاء الله بقنعها وبقول لها اني بكون معك وامك ما ترفض اذا بزورهم معك

غاده / قامت وباست راس نوره تسلمين ياخلتو

قامت نوره ومسكت يد غاده وطلعت برى الغرفه دخلن الصاله كانت هند جالسه بالصاله تنتظرهم
تركتهم غاده ودخلت غرفته تبي خالتها تفتح الموضوع مع هند

نوره / هنوده ناس متوسطين فيني علشان اكلمك بموضوع طلبتك لا ترديني

هند / ماعاش من يردك يالغالية

نوره / تسلمين غاده صديقتها عازمتها وخايفة ترفضين وطلبت مني اروح معها

هند بجديه / خاله تعرفين راي بجمعات البنات اخاف عليها تتعرف على شله خربانه وتضيع

نوره / انا معها والله يحميها ويحفظها ترى تسكيرك عليها ومنعك انها تطلع مو حل وانتي تعرفين من مربيه غاده عاقله وهي الي قالت ماتبي تروح لحالها

هند / خالتو متى العزيمه

نوره / الاربعاء

هند / خلاص روحي بشريها عن الموافقه وقولي لها اني ماوافقت الا علشانك وان شفتي صديقتها مو مضبوطه اطلعو على طول

نوره بحب / الله يعلي شانك الي ي كانك تتكلمين عن بنت ام سنتين ان شاء الله مراح يصير الا كل خير

طلعت نوره من الصاله ودخلت غرفة هند شافت غاده جالسه على اعصابها خايفة من رفض هند

نوره / غاده عندك لبس للعزيمه ولا نروح لسوق

ركضت غاده ورمت نفسها بحضن نوره

غاده بحب / ايوه يا خالتو عندي مو من كثر طلعاتي اشتري وخزن انتي الي عندك ابيك احلى وحده بكشخ فيك عند صديقتي

نوره بمزح / عندي وابشري بطلع احلى وحده

غاده / انتي حلوه من غير ما تكشخين ولا ليش ما خذه عقل خالو

ضربتها نوره على راسها نوره / صحيح بنات معاد يستحن

غاده / ههههههه أي عورتيني

نوره / تستاهلين ياله بطلع نامي وراك جامعه


طلعت نوره لغرفتها لقت عبدالرحمن منسدح ينتظرها

عبدالرحمن / بشري وش صار معك في بيت ابو بسام

نوره / كل خير البنت وافقت ولدك من فرحته بالموافقه قال الي تبين اسويه لك

عبدالرحمن بحب / وانا بعد اقول لك الي تبينه بسويه لك ما تدرين اش كثر كنت انتظر هالنسب من زمان

هند / ابي سلامتك يالغالي



رد مع اقتباس
  #12  
قديم April 3, 2015, 03:03 PM
 
رد: رواية غرام و إنتقام للكاتبة نسايم نجد

اليوم الثاني في بيت عبدالرحمن


قامت هند كالعاده بدري اخذت شور قومت غاده وطلعت لغرفة خالد ونزلو تحت افطرو وركبو السياره وصلو غاده لجامعتها وكملو طريقهم لشركه


دخلت لمكتبها ودخل خالد لمكتبه وهو فرحان بموافقة غاده حبيبت عمره




في مكتب هند




دخلت السكرتيره عندها



السكرتيره / استاذه فيه شكاوي على موظف هنا بالشركه


هند بجديه / وش نوع الشكاوي ومن الموظف


السكرتيره / الغياب والتاخير والخروج بدري قبل خروج الموظفين الموظف سعد


هند / موجود الحين


السكرتيره / مدري


هند / اطلبيه وقولي له اني طالبته يحضر عندي


طلعت السكرتير وبعد نص ساعه دخل الموظف بعد ماجلس برا ينتظر هند تتحجب وتنادي خالد لانها ما تختلي بالموظفين


طلبت من السكرتيره تسمح له بدخول عليها سعد جلس على الكرسي المقابل لخالد


هند بجديه / استاذ سعد جتني شكاوي عن تغيبك بدون اذن وخروجك وتاخرك ممكن تقول لي السبب


سعد بحزن / غصب عني والله مو برضاي لو تلاحظين ان ما هملت الا من كم شهر وانا من الموظفين الاكفاء وسيرتي تثبت لك عندي ظروف اجبرتني


هند باصرار / ممكن تقول ظروفك يمكن نقدر نساعدك اذا ماكانت شخصيه


سعد وهو خانق عبرته / الله يساعدني ولدي من كم شهر طلع فيه الخبيث لقينا علاجه برا ومطلوب مبلغ كبير لعلاجه وطلعاتي وغيابي بسبب تعبه واضطر اطلع اوديه للمستشفى


هند حزنت عليه ورحمته / طيب انت ما تدري ان شركتنا مسئوله عن علاج الموظف وعايلته وكل التكاليف عليها


سعد مستغرب / لا ما دري


هند / استاذ سعد عندك اجازه مفتوحه وطيارتي الخاصه تحت امرك تنقل ولدك للمستشفى الي تبي والتكاليف بتتحول على حسابك مصاريف العلاج والسكن الى الترفيه لو اخذت العايله



سعد بفرح / الله يفتحها بوجهك وربي شلتي عن صدري هم الله يرزقك ويكثر خيرك ويبارك بعمرك


هند / امين يله لا تتاخر متى بتبدا باجراءات السفر


ابتسم سعد / الحين ما صدقت انها تنفرج


طلع سعد وخالد طول الجلسه ساكت مستغرب من تصرف هند


خالد / من متى الشركه مسئوله عن علاج الموظفين ومشاكلهم


هند / من اليوم مدام ربي عطانا خلنا نساعد


فرح خالد من تصرف هند خالد / الله يقويك


طلع خالد لمكتبه نادت هند السكرتيره


هند / سوزي عندك رقم جاسم الي من فتره كلمك


السكرتيره / ايه


طيب / هاتي الرقم





في بيت راشد



جاسم نام عند عمه ما يبي يترك جداته الحالهن يتضايقن لانهن مهمشات من راشد وموضي


وهو يسولف مع جداته دق جواله برقم غريب
مارد عليه دق الرقم مره ثانيه يوم عرف ان المتصل مصر رد


هند / الو


جاسم استغرب من الصوت الانثوي


جاسم / هلا


هند / الاخ جاسم


جاسم / ايه نعم أي خدمه


هند / معك هند الفهد


جاسم منصدم من مكالمتها الغريبه الغير متوقعه



قام وطلع بعيد عند جداته وكمل المكالمه
جاسم بعصبيه / خير وش سر المكالمه لا تقولين مكلمه بتكملين اهانتك وتجريحك


هند بجديه وبثقة / اخ جاسم متاكده ان نفسك تعرف علاقتي بعمك والسبب لكل الي صار بينا بكشف لك كل شي لكن بشرط


جاسم من داخله متحمس كثير لمعرفة السبب


جاسم متظاهر البرود/ خير وش شرطك


هند بقوة / العايله كلها تكون موجود ابوك عماتك أي قريب من طرف راشد


جاسم بسخريه / خير اجتماع الامم المتحده


هند / المهم انا جايه بيت راشد الثلاثاء الساعه وحده يا ليت الي قلته يصير


جاسم بعصبيه / الاوامر اصدريها بشركتك مو عندي


هند / مو مشكله مع السلامه


سكرت الخط ما نتظرت رد جاسم


جاسم مبسوط وفرحان ان الاسرار الي معذبته بتنكشف وفي نفس الوقت خايف
ماهتم بتسكيرها الخط بوجهه الي مستغربه ليش طالبتهم كلهم يجتمعون


جاسم في نفسه / يبعدك يا الثلاثاء بجلس على اعصابي لين الموعد


رجع جاسم لجده ولا حب يتركهن اكثر عند راشد وهو يشوف الحزن والضيقه مرسومه على وجيهن اخذهن معه لبيتهم





في بيت ام جاسم



الساعه 10 دخل جاسم وجداته البيت ولقى امه وفيصل والجوهره بالصاله يتقهون


جاسم / معزومين كلكم ببيت عمي يوم الثلاثاء الساعه وحده لبظهر على شرف هند الفهد طالبتكم بالاسم تكونون موجودين


فيصل منصدم / وش عندها


ام جاسم / منهي ذي


الجوهره / بتجي غاده معها لو جت بغيب عن الجامعه


جاسم بحزم / قالو لك مسيار الحرمه تقول عندها كلام بتقوله لنا وشارطه ما تقوله الا بوجودكم ومن ضمنكم راشد وموضي


ام جاسم / وش عندها اصلن ما نعرفها ولا بينا كلام


جاسم / اصبري كل شي بالثلاثاء يطلع


فيصل طلع ولحقه جاسم


جاسم بقلق/ فيصل بنت الفهد بترمي قنبله الله يستر لانها قالت لي بتكشف علاقتها بعمي


فيصل بقلق اكبر/ الله يستر ماني بمرتاح خايف من الكلام الي بتقوله


جاسم بقهر / دريت انها شرت قصر عمي


فيصل بعصبيه / على كيفها تشتريه وش ناويه عليه تطردهم من بيتهم بترضاه لعمك ياجاسم انا بوقف بوجهها


جاسم / محدن راضي كل شي يعتمد على الي بتقوله يوم الثلاثاء


جاسم تذكر هروب عمه من مقابلته يومه عندهم


جاسم / تدري ان عمي من سالفة الاسترحه يتهرب مايبي يقابلني هذ يدل ان فيه شي كبير واكبر من الي متوقعينه


فيصل / تعرفني ماملك اعصابي يمكن اذبحها ان قلت ادبها تعرف لما اعصب ما تفرق لو كانت حرمه


جاسم / لكل حادث حديث يله بطلع انام


فيصل / انا بطلع ماجلست مع جدادتي





في بيت ابو نواف



دخل نواف على اهله في الصاله وقال لهم موعد خطبته بتكون السبت الجاي الي بعد سبوع




في بيت عبدالرحمن


كلم عبدالرحمن ابو بسام وقاله عن خطبتهم لغاده فرح ابو بسام كثير وام بسام قالت له عن موافقت غاده وهذي كانت امنيه يتمناه من زمان انه وعبدالرحمن يتناسبون لانهم اكثر من اخوان وان خالد بمعزة بسام ما ينرد حددوا لملكه بعد شهر


خالد لما عرف انهم حددو الملكة قلبه يرقص من فرح اخيرا بيتوج حبهم بزواج




ليلة الثلاثاء


بيت ام جاسم



جاسم مع فيصل في غرفتهم متوترين خايفين من الموعد الي بتنكشف امور يجهلونها


جاسم / فيصل النوم طار من عيوني


فيصل / والي يسمعك بكره اصعب من يوم نتيجة ثالث ثانوي


جاسم / ماني مرتاح احس بخوف اول مره احس فيه


فيصل / والي يسمعك يقول قلبي طبول من الخوف


جاسم معصب / وانت ماعندك الا هالكلمة والي يسمعك


فيصل / وش تبيني اقول لك وبنت الفهد بكره بترمي قنبلتها يمكن القنبله توصل لنا


جاسم / الله يستر لا تنسى لازم الساعه وحده موجودين


فيصل / وانا قادر انساه شكلي من الفجر ببيت عمك انتظرها


جاسم / امي وجداتي بيكونون فيه والله خايف على جداتي من المصيبه الي بتقولها بنت الفهد
اخاف ما يتحملن


فيصل / لازم يحضرن هي طلبت كل الاهل





في بيت عبدالرحمن


هند بغرفتها سهرانه تفكر باللقاء بتقدر تتحمله من غير ما تنهار
ومن بيكون موجود غير جاسم لازم الحقائق تظهر وتنكشف حقارت راشد


طلعت من غرفتها بتتاكد اذا احد صاحي
ما شافت احد الكل نايم طلعت فوق بتشوف خالد
دخلت غرفته كان نايم اول ما حس بفتحت الباب حس انها هند يوم شافته نايم بتسكر الباب


رفع راسه خالد / هند ادخلي


هند / صاحي و اذا نايم كمل نومك


خالد / تعالي ليه سهرانه


دخلت الغرفه وجلست على سريره


هند بقلق وتوتر / بكره عندي موعد ببيت راشد وعايلته


خالد بعصبيه / انتي مجنونه وش لك فيه


هند بوجع / لازم اداوي جرواحي معاد تنفع المسكنات


خالد باصرار / بروح معك


هند بعصبيه / لا لتخليني اندم اني قلت لك


خالد / بتروحين لحالك


هند / لا باخذ الحارسات والشغاله معي لاني ابيهم بشغله


خالد بخوف / والله ماني بمرتاح لروحتك طيعيني وغيري رايك وتركي عنك الموعد


هند / فات وقت التراجع حددت موعد وتعرفني عند كلمتي


خالد / انتبهي على نفسك وان صار شي اتصلي علي وانا طياران عندك


هند / ان شاء الله حلفتك محد يدري عن الي دار بينا لا مك ولا ابوك ولا غاده


خالد / تامرين امر


هند / يله كمل نومك ورانا يوم شاق الله يعينا


خالد / امين


طلعت من غرفته ونزلت تحت لغرفتها دخلت و انسدحت جنب غاده تتقلب مو راضي النوم يجيها







اليوم الثاني
في بيت عبدالرحمن


كا العاده صحت هند وصحت غاده وخذن شور وبدلنملابسهن ونزلن تحت افطرو ركبن سياره خالد وصلو غاده وكملو طريقهم لشركه

مرالوقت بطيئ على ابطالنا جت ساعة الصفر

رفعت عينها لساعه المعلقة على جدارالمكتب كانت 12 وربع طلعت من الشركه ركبت سيارتها في طريقها لقصر امها طلبت منالسواق جابر ياخذ الحارسات والشغاله ويسبقهم


وصلت لقصر امها شافته و ارجعت لها ذكرياتها الموجعه زاد اصرارها وحماسها لمقابلتة وهي تدعي داخلها تكون قويه للمواجهه



في بيت راشد


الكل موجود ينتظر زيارتها اربعه كانو مرعوبين من اللقاء راشد وموضي وجاسم وفيصل الجوهره بجامعتها امها رفضت انها تغيب

رن جرس الباب طار جاسم بسرعة البرق وفتح الباب كانت هند متغطيه ومعها حارستين سود كاشفات طول بعرض مرعبات ومعها شغالتها ريتا والسواق عمران ينتظرهم بالسياره

جاسم / تفضلو

دخلت هند بدون أي كلمه والحارسات يمشون وراها اشرت لهن يوقفن عند مدخل الصاله ولا يدخلن الا اذا نادتهن

دخلت قبل جاسم ما نتظرت منه يدلها الطريق لانه حافظته عن ظهر قلب دخلت لصاله بحضورها الطاغي وهيبتها الي ملت المكان ومعها شغالتها كان بيدها اكياس دخل بعدها جاسم والكل جالس ينتظرها على اعصابه

جلس جاسم جنب فيصل وهو متخوف من اللقاء هند واقفه عند مدخل الصاله ماتبي تجلس لان النار الي تشتعل بداخلها مانعتها من الجلوس

هند وهي واقفه قدامهم بقوتها وصلابتها / احب اعرفكم بنفسي انا هند الفهد وعيونها تدور بالمكان وحركة اصبعها تاشر للصاله وكملت / وصاحبة هذا القصر شريته من البنك

راشد وموضي تفاجئو من خبر شراها للقصر وتاكدو انها ناويه على شر لكن الزمو الصمت

وكملت بقوه / يمكن محد يعرفني الا جاسم وراشد لان سبق وتقابلنا


كلكم مالي علاقة فيكم ولا تعرفوني من بعيد او قريب الي يعرفني راشد وموضي الكل التفت لراشد وموضي الي باين عليهم الارتباك والخوف

هند وعيونها على راشد تتكلم وهي منفعله وبصوت عالي / احب اذكرهم بنفسي بطريقتي يمكن مع كبر العمر صار لذاكرتهم شي

هند بصراخ / ريتا اطلعي فوق ونفذي الكلام الي قلته

الكل انصدم من جرائتها وتصرفها بحريه كانو مذهولين الكل ساكت وهند ساكته تنتظر شغالتها تنزل وبعد ربع ساعه نزلت باكياس زباله مليانه


هند التفتت لراشد وحرقته بنظرات كلها حقد وكره / راشد الاكياس ما ذكرتك بشي مر بحياتك


راشد / ................ ساكت منزل راسه


هند فتحت واحد من الاكياس ورمت الي فيه وكانت ملابسهم


هند بسخريه / لا تقول ما تذكر انك يوم من الايام اجبرتني احط ملابس اغلى انسانه لي فيها

الكل انفجع من هول الكلام الي تقوله

جاسم يطالع في فيصل وفيصل يبادله النظرات وكل واحد منهم على راسه علامة استفاهم يبونها تكمل

الجدات وام جاسم مفجوعات لانهن ما يدرن عن شي وكانهن بمسرحيه ينتظرن النهايه

موضي وراشد كانو دارين بفعايلهم لكن ما توقعو بيجي اليوم الي ينكشفون فيه


هند تكمل بوجع / تذكر يا راشد البنت ام سبع سنين الي رميتها بالشارع وجنبها كياس الزباله الي فيها ملابسهم ماخفت عليها من عيال الحرام راميها بالليل وين قلبك ياراشد وين

مازالت العيون متعلقه فيها والكل فاتح فمه من قوة الكلام الي قالته

هند بصراخ / راشـــــد انـــت انـــذل واحقــــر رجـــــال شـــــفته بحياتـــــي انـــــت حــــرامي ســــرقت امـــي ســـــاره عــــضيـت اليـــــد الــــي امتـــدت لـــــك حتـــــى الكـلـــــب اوفـــــى منــك يا راشـــــد

الجده ام راشد بعصبيه / احشمي الرياجيل يابنت


هند تضحك بسخريه / هههههه وينهم الرياجيل انا ماشوف موجود رياجيل يمكن اشباه رياجيل وحرام نقول عنهم حريم لان الحريم اكرم منهم


من قو الكلمه فز فيصل بعصبيه ومن غير شعور ركض بيضربها انتبهت له اول ما قرب منها بحركه دفاعيه ما لقى نفسه الا طايح على الارض وصار يمسك يده ويتوجع

هند بعصبيه وبسخريه / انت يالبزر تتطاول علي الثمن المره هذي كسرت ايدك ان عدتها كسرت رقبتك

جاسم فز لما شاف اخوه يتوجع وام جاسم قامت بتشوف ولدها


هند نادت حارستها هنديانا

هند تصرخ / هنديانا

قبل ما تكمل كلمتها الا هي عندها كلمتها باذنها واخذت هنديانا فيصل معها


التفتت هند لام جاسم وجاسم


هند بجديه / اجلسو مكانكم لاتخافون عليه خلوني اكمل كلامي

هند التفتت على موضي وكملت بسخريه وحقد / هذي موضي الي بعت وغدرت بامي علشانها وافق شن طبقه حرامي تزوج حراميه

الكل ساكت ما تكلمو ينتظرون النهايه

هند مشت وقربت من جلستهم كانت شغالتهم حاطه ابريق شاهي حار ضيافه لهند

قربت لين صارت بوجه راشد نست وجودهم ما تشوف قدامها الا راشد الي حطمها وجرح و اهان امها وحرمها منها

قربت منه وجلست على ركبتها وصارت مقابله ضربته بقوة على رجله فز راشد مفزوع من الضربه والكل انفجع من تصرفها الغير مفهوم

هند بصراخ موجع / راشـــــد رجلـــك تشـــــهد علــــى جـــــريمــه ســويتهــا تبينـــي اقـــول شــنهي ولا بتـقـــول انــت

راشد /.............


هند بحزن وحقد / نسيت ان هذي الرجل الي دست فيها وجه احب الناس لقلبي امي ساره

الكل متشوق يعرفون منهي ساره والبنت الي تتكلم جاسم مع كل كلمه تقولها يستحقر عمه اكثر وهو جالس مستمع


قربت هند من وجه راشد وشالت غطاها ونقابها نست تواجد جاسم وانها مو محرم لها

جاسم لما اكشفت انفجع هذي حبيبته الي سهرته ليالي وش علاقتها براشد

هند بضعف / تذكر ذا الوجه ولا نسيته وبدت دموعها تنزل بحراره اشبه امي ساره

هند فكت شعرها الي نزل كانه شلال ومن قرب جاسم من عمه وقربها منه شعرها نزل على رجله

جاسم ذاب وداخ ورجله تلامس شعرها وده يمسكه يشمه يضمه لكن الخوف يمنعه

هند وهي تنتفض من العصبيه وصدرها يرتفع وينزل ووجهها احمر من الضغط النفسي / تمسك شعرها وتحطه قدام عيون راشد امي حالفه علي ماقصه علشانك تحب الشعر الطويل


هند بقوة / والله لو ماحلفت علي حلقته على الصفر لانك تحبه راشد انا كرهي لك كل يوم يكبر عن اليوم الي قبله

تدري من كرهي لك شلت اسمك من جنب اسمي باوراقي الرسميه وحطيت بداله الفهد انا بنت الفهد الي رباني ولده وهتم فيني وخاف علي من الضياع هذا يستحق الابوه راشد تدري اني صرت ام واب وعمري تسع سنين


تدري ان عمري 26 وانا ارفض الزواج تدري ليه لاني قلبي عجز وشاخ وصار عمره مية مابي احب مثل ماحبتك امي

لما قالت هالكلمه فرح جاسم انها ما تزوجت

راشد / ...............

هند بعصبيه ضربت بيدها على الصحن الي فيه ابريق الشاهي الحار وانكب على يدها ونحرقت استغربو انها صامده ما تتوجع

جاسم لحظ ان يدها احترقت من الشاهي وهند حالتها النفسيه دماااااار والدموع شلال

جاسم بنفسه / بكل حالاتها تفتن لو بكيفي خذيتك وضميتك على صدري ولا خليتك تعانين لحالك

ام جاسم حن قلبها عليها معروف انها حنونه

ام جاسم / يدك احترقت يبنتي

هند ضربت على صدرها وبدموع قهر / الي بداخلي نياران تحرقني قولي لي من يطفيها حرقة يدي ولا شي

جاسم تعاطف معها ودي يقوم يمسح دموعها وكره عمه الي سبب عذابها

قربت هند اكثر من راشد

هند بضعف / تدري دموعي مانزلت من وفاة امي الا بشوفتك تدري اني ما ضعفت الا بوجودك

تدري ان امي جابت بنت ثانيه اسمها غاده


التفتت على موضي وقالت لها / هذي بنتي يا موضي بنتي الي تحملت مسئوليتها من كانت رضيعه
لما سافرت اكمل دراستي اخذتها معي غاده بنتي انا ابوها وامها وكل اهلها

الكل ساكت للحين ما يعرفون من هند بنسبه لراشد لكن الكل استحقر راشد وافعاله

ام راشد وام موضي يبكون بصمت ام جاسملا ارادي تبكي من قلب من معاناة البنت وامها


كملت هند بوجع / تدري ليه ياراشد حرمت الحب على نفسي لاني مابي اصير مثل امي ساره واجيب لحياتي راشد ثاني

تتكلم هند وهي منهاره وتشاهق من البكاء راشد بسبتك امي انهانت ونجرجت وتوجعت وهي مدلعه عند اهلها راشد بسبتك امي انجلطت وصارت ما تمشي راشد بسبتك امي ما صارت تتكلم

راشد انت سبب دموع امي كل ليلة قبل لاتنام اسمع بكاها ودموعها اشوف صورتك معها تضمها وتشمها امي حبتك يا راشد حبتك ولا حقدت عليك ذبحها شوقها لك بسبتك ماتت امي حرمتني منها

بسبتك ياراشد تعلقت بكرسي امي المتحرك وثوبها الي نزلته قبل لا تموت

حرمتني منها وصرت اعوض حرماني منها بضمي وشمي لثوبها وكرسيها صاير بديل لحضنها كل ليلة احط راسي على كرسيها اشكي له واضمه ادور حنانها الي بسبتك فقدته بسبتك ياراشد جاني انهيار عصبي وانا عمري تسع سنين تدري ليه

نادت ريتا جيبي الي قلت لك عليه دخلت ريتا كرسي امها وثوبها

هند تبكي بوجع / هذا كرسي امي هذا صار ونيسي اسولف معه واشكي له اقوله الي يضايقني ابكي اله

وهي تحط راسها على كرسي امها / يمه ماقدرت انتقم من راشد ضعفت قدامه ما قدرت اخذ حقك منه وصارت تنوح من البكاء يمه براكين بقلبي من يطفيها وصارت تشاهق


رفعت راسها عن كرسي وافتحت ثوب امها وجلست تشمه وتضمه وهي تبكي بهسترياء وتصارخ / هذا ثوب امي ريحت امي رفضت احد يقرب منه او يغسله لانه ريحة الغاليه الي حرمني منها الظالم راشد

كنت اخذ ثوبها معي بحفلات الامهات كإن امي حاضره معي

بتخرجي من الثانويه الكل استغرب مني وانا القي كلمة الخريجات وانا حاطه ثوبها على صدري استمد منها القوه والتشجيع بسفري برا كان بشنطتي عمره ما فارقني

وانا استلم شهاده تخرجي الجامعي والدكتوراه كان الثوب بيد والشهاده بيد ما همني انتقادات العالم اهم شي امي معي امي وجلست تشاهق من البكاء وتنتفض

ام جاسم وهي تبكي متاثره كثير من وجعها مسحت على ظهرها برقه

ام جاسم بالم / تعوذي من الشيطان يابنتي

طالعت هند في ام جاسم بوجع وقهر والم / اااااااااااه فقدان الام مر والله مر وموجع وجلست تبكي وام جاسم تبكي معها

وكملت بوجع وهي اطالع براشد / قولي لراشد يرجع لي امي وعطيه كل ثروتي والله اعطيها له ابي امي مشتاقه لها وجلست تبكي بقوه ذبحني الشوق لها ياخاله


الكل انفجر من البكاء على حالها وارتباطها بكرسي امها وبشي من ريحتها

جاسم منهار وكل خليه من خلاياه تنزف وجع والم وحرقه على حال حبيبته وهو عاجز عن الوقف معها وتهديتها هو نفسه يبي من يوقف جنبه ويهديه


رفعت راسها منهاره وخلاص بيغمى عليها لاحظ جاسم انهيارها بالموقف هذا لعن عمه بقلبه مليون مره لانه السبب بانهيارها جاسم وقف بيساعدها لكنه عاجز يتحرك لانه مايجوز يمسكها لانها ماهي محرم لها

هند صرخت بالم موجع وباعلى صوتها / اااااااه يا خالد يا خوي

ما كملت كلمتها الا خالد بوسطهم ما همه احد كل الي همه الي منهاره بوسطهم

خالد ضمها لصدره بقوه / لبيه ياقلب اخوك وعمره فديتك يالغالي

جاسم غار من خالد وتمنى نفسه مكانه له الحريه انه يضمها ويواسيها

هند بدت تضعف وتفقد وعيها ولونه بدا يتغير

بصوت ضعيف / طلعني من هنا يا خالد وجود راشد يخنقني وجوده يضعفني وجوده يدمرني وجوده يوجعني

خالد بالم / وجعك وجعي يالغاليه ما عاش من سبب الوجع لك

هند اسودت الدنيا بعيونها وطاحت ايدينها واغمي عليها فز راشد بيقوم

خالد بعصبيه وبصراخ / بعد عنها لا تقرب منها وتنجسها والله والله ياراشد لو جاء لهند شي لخليك تتمنى الموت ما تلقاه

انتبه خالد ليد هند المحروقه من الشاهي

خالد بصراخ وجع / الله يحرقك يا راشد الله يحرقك مثل ما حترقت هند

شالها بيطلع فيها برا البيت بيلحق عليها بيوديها للمستشفى سمع صوت استوقفه

الجده ام راشد بوجع / يوليدي من هي هند

خالد التفت لراشد وبصرخه قهر / بنت راشد بنت ها لنذل بنت ها لحقير

وطلع وهو شايل هند والكل منصدم من القنبله الي قالها شلون وكيف وراشد عقيم

كل العيون على راشد الي على طول انسحب من الجلسه وطلع


جاسم وهو يبكي بداخله حرقه والم وكره حس بخنقه وضيق وحس ان الاكسجين انسحب من المكان ما قدر يقعد دقيقه طلع من الصاله

رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
رواية رواية بعثرت أرواح عاشقة للكاتبة إكراموا Yaqot روايات و قصص منشورة ومنقولة 31 March 30, 2015 05:47 PM
ملخص رواية سلالم النهار -رواية للكاتبة فوزية شويس السالم Yaqot روايات و قصص منشورة ومنقولة 0 May 8, 2014 10:41 AM
رواية غرام و إنتقام / الكاتبة : نسايم نجد SEO روايات و قصص منشورة ومنقولة 0 October 23, 2012 03:57 PM
رواية ملحمة العشاق / للكاتبة سهر SEO الروايات والقصص العربية 0 October 22, 2012 02:05 PM


الساعة الآن 09:36 PM


Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر