فيسبوك تويتر RSS



العودة   مجلة الإبتسامة > الروايات والقصص > روايات و قصص منشورة ومنقولة

روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا



إضافة رد
 
LinkBack أدوات الموضوع انواع عرض الموضوع
  #31  
قديم March 28, 2015, 12:12 PM
 
رد: رواية رشوا على قبري من دموع عينه للكاتبة علي شاطئ النسيان

((البارت الثاني والعشرون ))


$$$$$$
$$$
$
((طُآريِكَ آرُبكٌنْي / وحّركْ
سُكَونِيْ..... آلله عُليْكَ شّلونْ .. [تسحّرْ]
إذآ (جُيتْ)))

بعد ماخلصت العزيمه وكلا راح لبيته
ببيت لمياء ...
ملاك: حلوه العزيمه ...استانست صراحه
لمياء: قلت لك ينحبون على طول
الجده: ونعم الناس والله
سطام: أي والله صدقتي يا يمه
عبدالله((ياترى ملاك تدري اولا بس لو درت ماتكون تضحك كذا ..لازم استدرجها ))
راحت تبدل ملابسها قبل تقفل الباب
عبدالله: ملاك
ملاك هلا
عبدالله: عرفتي احد بالعزيمه
ملاك: لا بس اهل زوج ملاك اللي شفتهم بالزواج .. وتعرفت على اعمامه
عبدالله: اهاااااا طيب مافي شيء بداخلك قولي لا تخبين علي
ملاك: لا والله مافيني شيء ..ليش احسك مخبي شيء
عبدالله: لا والله
ملاك: لا تحلف وانت كذاب ... قول ...يالله
عبدالله: قلت لك ولا شيء ..
ملاك: انا عارفه ويش مخبي علي ... شفت فيصل صح
عبدالله انصدم: كيف عرفتي
ملاك: عرفت وبس
عبدالله: كلمك صح
ملاك: لا بس اهله كانوا هناك واخته كانت تسولف معي ..وقدرت اعرف انه بقسم الرجال
عبدالله: معقوله ...بس هذي السالفه ...طلت فيه والدمعه بعينها
ملاك: كنت بالمطبخ اشرب مويه ولمحته ....
عبدالله: اهاااااا ...معقوله ما سويتي شيء كذا او كذا
ملاك: تبيني احلف لك على المصحف اني ما كلمته ولا شيء بس شفته
عبدالله: لا خلاص مصدقك ... تدرين انا واثق فيك ....سحبته ملاك وجلسته على السرير
ملاك: عبودي .. قولي ..كيف صاير ويش قال وويش سولف معك ... وين راح ؟؟
عبدالله: صبرك صبرك علي .. الله عليك كل ذا تبيني اقوله لك
ملاك: امانه قولي
عبدالله: صراحه ماسولف معي ..سولف مع سطام ..بس تصدقين
ملاك: ويييييش؟؟؟!!!
عبدالله: باين عليه عاقل .. اصلا لو شفتي كيف يتكلم ..بذوق وادب ...وكلامه يخلي الواحد يحبه
ملاك: طيب ... حكني بالتفصيل ..
عبدالله: اقول تراه ما طول عندنا المتيم طلع برى وانا رحت وشفت جالس لحاله يلعب بالجوال
ملاك: طيب ..قوم اطلع برى ..
عبدالله/: افاااااااا الحين تطرديني
ملاك: على بالي عندك علوم زينه ...يالله بغير ملابسي
عبدالله: هين ترجع لك ....
ببيت ابو فادي ...بعد مارجعوا الكل من العزيمه
فاديا: يمه شفتي ...بنت اخت زوجه ناصر
الام: ايه ماشاء الله تبارك الله ...هذا الزين ...والعقل
فريده: وانتي يالملقوفه ...ويش مجلسك عندها على طول طقيتها تعارف
فاديا: البنت عسسسسسسسسسسسل ...
فريده: على فكره تراني ماسالتك عن اسمها ...
فاديا : اسمهاااااا ملاااااااااااااااااك ....كان فيصل جاي من المطبخ وجايب له قهوه ..اول ما سمع اسمها رجف جسمه ..وطاح الكاس من يده ...ووقف مكانه
امه: فيصل ..علامك ...
فيصل : هاه ..لا ولا شيء ...
فريده: خلاص خله الحين اقول للخدم ينظفونه ....
فيصل : انا بطلع ... وطلع بسرعه بسياره .. مايدري وين يروح ..يحس انه تايه ...راح لمكان فاضي ..مظلم شوي ..جالس على سيارته ..
فيصل ((مرتاح ولا يتصنع قلبك الراحــه
شايل في خاطرك ولا البال متهنــي

مجروح ولا شفى قلبك من جراحــه
زعلان للحين ولا راضي عنــي

شخبار قلبك عسى مافارق أفراحــه
أدري جرحتك وشلت بخاطرك منــي

خسران بعدك وقلبي ضاعت أرباحــه
غلطان أدري وابي فيك تسامحنــي

تدري عيوني بغيابك ماهي مرتاحــه
تبكي على فراق طيفك وانت ذابحنــي

ياللي ذبحني غلا شكرا على رماحــه
اللي طعني بها ومايوم ريحنــي

جيتك من الشوق والأشواق ذباحــه
أسأل عيونك عسى للحين تذكرنــي

راضي بجرحك وانا ماأتصنع الراحــه
تكفى عشاني ابي ترجع وتسمعنــي))
اما بالنسبه لملاك ...كانت جالسه على السرير بعالم ثاني ...تفكر فيه ..
ملاك(( ادق عليه او ...... لالا خلاص يا ملاك ...انسيه ..آآآآآآآآه ويش اسوي محتاره ..شكله كان حزين بس لا باين انه مرتاح ..وعايش بسعاده .. خلاص ويش ابي فيه ..مو عفته ..خلاص ..انساه ياقلبي انساه ))
دخلت عليها لمياء ...
لمياء: ملاك ليش ماجيتي عندنا بالصاله
ملاك: هاه ...الحين اجي ....قامت وراحت عند خوالها يسولفون ويضحكون ..

بعد يومين رجعوا للمدينه ...وباقي اسبوع عن زواج فارس
ابتهال (( ااخ بدأ العد التنازلي ...هين يا فراسوه ..دواك عندي ..والله لاجننك واطلع براسك مزرعه نخل موه نخله وحده ...هين هين ))
وصايف : ابتهال ...قومي قيسي الفستان بشوفه ..عليكي ....طبعا بابتسامه طويله وعريضه ..قاسته وعدلت عليه كم تعديل
اما ببيت ابو محمد
ابومحمد: يا عيااااااااااال ...يا عياااااااااال
جوا كلهم ..على صوت ابوهم
ملاك: خير يبه ...ويش فيه
عبدالله: ويش صاير ...
ابو محمد: باركوا لزوجه ابوكم ..حامل ... انصدمت ملاك ...وبعد عبدالله وثامر
ثامر: مبروك الف مبروك مضاوي ... يعني بتجبين لنا بيبي
مضاوي: ان شاء الله
عبدالله: مبرروك
ملاك الى الان مو مستوعبه : يعني بيصير عندنا اخو صغير
ابوها: ايه يا بنتي ... نزلت وضمت مضاوي ..
ملاك: مبررررررررررروووووووووووووووووك ...
مضاوي تاثرت برده فعلهم اللي ماتوقعتها ونزلت دموعها: الله يبارك فيكم
ثامر: عاد من الحين ما تبذلين أي مجهود نبيك تصيرين دبه من الراحه
مضاوي: حرام عليك ...
انتشر الخبر بسرعه والكل فرح
بالمستشفى ..
كانت تعاين المرضى ..ومنشغله بعملها .....
فراس: منال ..اذا احد جاء وسال عني انا بالمكتب ..اوكي
منال: اوكي ....خير دكتور فيك شيء شكلك تعبان
فراس: لا مافيني شيء ...وراح
منال ((غريبه اليوم شكله مره مرهق ..ومريض ...يؤيؤيؤيؤ لو تدري مشاعل غير تموت من خوفها عليه ))
مشاعل: ماتشوفين شر ياخالتي
المريضه : الله يرزقك يا بنتي بالذريه الصالحه ....انتي متزوجه يا بنتي ؟؟؟
مشاعل: لا والله يا خالتي ماجاء النصيب للحين
المريضه : الله يرزقك بالزوج اللي يسعدك ويهنيك يا حبيبتي
مشاعل: امين ... يالله خالتي الحين بروح اكمل شغلي ...اذا تبين شيء اضغطي الزر اللي فوقك واجيك على طول ...
طلعت من عندها ..وهي ماشيه بالممر الفاضي .. غير هي ...لمحت رجل من بعيد ..مستند على الجدار ..ويحاول يفتح ازارير بلوزته ..قربت شوي .. والرجل طاح على رجوله ..كان معاها جهاز قياس الضغط وعلبه ابر ..وادويه .. لما شافته طاح ...رمت الاعراض ... وصرخت
مشاعل : فراااااااااااااااااااااااااااااااااااااس ... جلست بجنبه تحاول تسنده
فراس : م...مـــ ...مشاعل ... ابي ...مويه ..... جلست تبكي
مشاعل: ويش صار لك ... ويش تحس فيه؟؟
فراس: صدري ...
مشاعل تصارخ : احـــــــــــــــــــد يساااااااااااااااااعدني .....وتطل بفراس... لا تخاف ... جتها قوه فضيعه ..وسندته ..ودخلته الغرفه اللي بجنبه ...وعملت له الاسعافات الاوليه .....وجوا بعض الممرضين وساعدوها
سامي: كيفك الحين .. دكتور فراس
فراس: بخيررررر ...
سلمان: الظاهر انك مرهق نفسك يا دكتور ...
فراس: شكلي ...
سامي : نتركك الحين ترتاح ..اذا احتجت شيء بس اعطينا خبر ..طلعوا ..وبقت هي .. وكانت بتطلع
فراس: مشااااااااعل ...<<مالفت عليه .. حست باحراج فظيع ...موقفها بايخ قدامه
مشاعل: اتركك ترتاح ...جلس..وحاول انه يوقف
مشاعل: دكتور ويش تسوي ... خلك مرتاح ...
فراس: لا ابي اقوم .....جات مشاعل ... ووقفت قدامه
مشاعل: لازم ترتاح .... انت تعبان .. يا دكتور
فراس اول مره يحس بجراءه قام يناظر عيونها اللي تجننه : لا تقولين دكتور .. ناديني فراس حاف
مشاعل: شكلك اليوم ضاربه فيوزك ... او فيك شيء مختل .. اروح اسنع لي ... لفت بتروح مسك يدها ..تجمد الدم بعروقها
فراس: لو الله ثم لولاك ..كان انا الحين بعداد الاموات
مشاعل: بسم الله عليك ... لا تقول كذا ..
فراس: مشكور يا مشاعل ..سحبت يدها .. بهدوء
مشاعل: انت دكتوري .. وهذا اقل شيء اسويه عشانك
فراس: بس دكتورك ... مافي شيء ثاني ..
مشاعل: علامك انت ؟؟؟
فراس: مشاعل ... معقوله طول الفتره اللي راحت ما عرفتي انا ويش اقصد ..
مشاعل تستهبل : لا ما عرفت ولا ابي اعرف ... وشبكت يديها ببعض
فراس: تبيني اقولك ... قصدي
مشاعل : اللي يريحك
فراس : انا احبــــــــــــــــــــــــك ... طلت فيه مشاعل ... وطلعت بسرررررعه
مشاعل(( قالها ... قالها ..ولي انا بعـــد ..هذا يوم سعدي ... أأأأه ياليته من زمان طاح وريحني بكلمته ))
منال: وينك من اليوم انتي قلبت عليك الدنيا قلب
مشاعل: هاه كنت بالكافتيريا ...
منال تطالعها بنص عين: يا كذابه انا كنت توي بالكافتيريا ولا شفتك
مشاعل: منالوه ..لا تعكرين مزاجي .. تراني مستانسه مره ...
منال: ويش سبب الوناسه اللي انتي فيها
مشاعل: قااااااااااالها ..قالها لي يا منال
منال: ويش قال ومين قال
مشاعل: فرااااااااااااااااااس
منال فتحت عيونهها للاخر: ويييييش قال لك
مشاعل: قال احبـــــــــــــــــــك
منال: من جدك يا مشاعل ... تتكلمين او تمزحين
مشاعل: عمري كذبت عليك
منال: لا
مشاعل: اجل صدقي ..ياويلي يا منال لو شفتيه ...يهبل
منال: اقول شكله خرف ...احد تعبان وكل همه يكلم بنت ..الحمدلله والشكر
مشاعل: انتي وش دراك بسوالف الحب انثبري ابرك...راحت هي وبنت عمها
طبعا فراس قدم اجازه اسبوع ..
يوم زواج فارس وابتهال
ملاك: خالتي متى تجي ابتهال
الخاله: بالطريق حبيبتي
ملاك: تاخرت ...مره ..
الخاله: خلاص قالوا بالطريق ..ملاك حبيبتي روحي تاكدي ان تكييف الغرفه بارد ..
ملاك: طيب ...راحت وشيكت على تبريد الغرفه ...وعلى كل شيء ..
لمياء: هااااااااااااااااااااااااااااااااي
ملاك: هاااياااااات بدري ..كانوا جلستوا عند الكوافيره
لمياء: ويش نسوي زحمه ....يالله يا ابتهال ادخلي خلي ملاك تشوفك ..
دخلت ابتهال .. ونزلت العبايه ...
ملاك: مشاء الله تبارك الله .. هذي بهلول..
ابتهال: ايه بهلول ... ليش مستغربه
ملاك: ويش مسويه بمكياجك يادبه ... يهبل
ابتهال: يعني زين ... كانت مسويه مكياج الوان الطاؤؤس ..يتناسب مع مسكت الورد حقتها اللي مخليتها الوان الطاؤوس..وفيها ريش ..
ملاك: يجنن ...
لمياء: يالله البسي الفستان بس لا تخربين مكياجك وتسريحتك
ابتهال: طيب ... بس ساعدوني الفستان ثقيل ...قاموا يساعدونها وجت وصايف تشرف على كل شيء
وصايف : يالله فارس بيدخل يتصور معك .. بان الارتباك على وجه ابتهال ..وقامت ترجف
ابتهال((يووووووة ...يارب ساعدني .. والله اني خايفه منه ..بس لا خلوني اكون قويه ))...قربت منها ملاك
ملاك تهمس باذنها: لاتنسين كلامي لك .. لا تخافين ...تراه وديع ...وابتسمت
ابتهال: بالحيل وديع ... كثري منها بس
وصايف : انا بطلع ..عندك ملاك ولمياء ..والحين تجي امي
ابتهال: طيب خلاص .. بس قولي للمصوره تخلص علي ..تراها واصله معي
لمياء: بهلول روقي اعصابك اول مره اشوف عروس معصبه بالعاده خايفين ومستحين ..وانتي كان داخله مصارعه
ابتهال: لمياء ... اسكتي ماني بناقصه مصخرتك ...كافيني اللي فيني
لمياء: خلاص سكتنا ... دخل فارس بطوله وعضلاته اول مادخل .. خق عند ابتهال ..شايفها ولا السندرلا
فارس((يا حبي .. فديت هالطله اللي تسحر .. اذوب انا عند هالجمال ))
ابتهال((فتح فمه الاخ .. هين .. والاتي اعظم يا فارس ))..جاء ومسك يدها تقشعر جسمها من لمسه بس هي ماتبي تبين شيء فسكتت وكملوا التصوير ...
ملاك: يالله بتبدأ الزفه ..جاهزين
فارس: بالنسبه لي جاهز ..اسئلي ابتهال اذا جهزت ...قهر ملاك ..قربت منه ..قرصته
ملاك: استح على وجهك ماعندك احساس... كيف ترمي هالكلمات صدق انك حجر
فارس: اقول ..تراني مستعجل بروح البيت ..قولي لها يالله
ابتهال ((..والله انه حلال فيك الذبح ..يقهرررررررررر )) ..بدت الزفه ..وانتهت على خير
الخاله : يا فارس لا اوصيك حطها بعيونك .. هذي اخر البنات
فارس: ابشري يا خالتي كم ابتهال عندي
ابتهال ((اخيرا قال كلمه عدله ..اووف منه ))...بعد مار احوا للفندق ...حاول يساعدها برفع فستانها
ابتهال: ماني بصغيره اعرف اشيله
فارس انقهر منها: اجل الحقيني ... وراح لما دخلوا الغرفه
فارس : اتركك تاخذين راحتك .. وراح للصاله .. وجلس يقلب بالقنوات يبي يفرغ قهره باي شيء
ابتهال: يامالك من ذا وازود .. توك ماشفت شيء ...بعد مابدلت ملابسها .. واتكشخت ...
طلعت له بالصاله وجلست على اقرب كنبه ..
فارس: اكيد جوعانه ما اكلتي شيء ...؟؟!!
ابتهال: لا الحمدلله شبعانه ...
فارس: على راحت بس الحين بيوصل العشاء ... قبل يكمل كلامه .. اندق الباب .. وووصل العشاء
فارس: تعالي كلي .. عشان تفتحين نفسي .. بحلاكي ...طلت فيه نظره احتقار ... وحطت رجل على رجل واخذت الريموت كنترول ..وقامت تقلب بالقنوات
فارس ((ياربي من وين جايبه هالقوه ... والثقه .. شكلك يافارس بتغني ياليل مطــــــــولك ..وبتتعب معاها ))
ابتهال ((يجب الملل .. ودي اخنقه وابرد حرتي فيه ))
ببيت ابو محمد
مضاوي: الله يوفقك يافارس ..
الكل: اميييييييييييييين
ابو محمد: البيت بداء يفضى .. هذا محمد وتزوج ولحقه فارس .. وبكره ثامر وعبدالله
ملاك: حشى يا يبه ..مهما صار مالنا غنا عن .. انت تاج راسنا ..وضمة ابوها
ابومحمد: وانتي يا بنتي بكره تتزوجين وتلتهين مع زوجك وعيالك ...نزلت دموعها
ملاك: مالي غنى عن انت الكل بالكل .. وانا ما اقدر اعيش بدون حسك يايبه ....
ابوها: الله يرضى عليك ياحبيبتي ... والله انك اغلي من روحي يالغاليه
ملاك: جعل يومي قبل يومك ..ياتاج راسي
ابوها: اعوذ بالله لا تتفاولين على عمرك ..
ثامر: قلبوها حزن ..وكابه .. ويش بكم فلوها ..
مضاوي: والله ماحد عارف للدنيا غيرك ياثامر
عبدالله: هذا طول عمره مظيع
ثامر: اخص ..يارزين ..اسكت بس لا اكشف اوراقك ...ويغمز له
عبدالله: الحمدلله واثق من نفسي
ثامر: اقول عبيد ... متى ناوي تتزوج .. اخوك فارس اصغر منك وتزوج وانت بعدك ..الظاهر مطول
عبدالله: أي والله بخرب عليك ..يبه لا تزوجه الا بعد ما اتزوج
ابوها: ابشر ماطلبت شيء
ثامر:: لا بالله ضمنت الجلسه عزوبي بقيه حياتي .. ويطالع فيهم .. ويقلب عيونه ...
ثامر ينعم صوته: شكلي بعنس عندكم
الكل: هههههههههههههههههههههههههه
بالفندق ...
جلس بجنبها
فارس: متى ناويه ..تطلقين العنان للابتسامه ..بالانطلاق ؟؟!!
ابتهال: اللي يقابلك .. غصب يكشر ..والابتسامه تفارقه
فارس: ويش تقصدين ..؟؟
ابتهال تطل فيه وتحط عينها بعينه : اقصد اللي فهمته
فارس: امممممممممم طيب ..على راحتك ما اغصبك على شيء
ابتهال تضحك بسخريه: ما تغصبني ... قديمه هذي ..جيب غيرها ..
فارس: وليش قديمه بالله عليك ...
ابتهال: لانك غصبتني على شيء اكبر من الابتسامه
فارس: داري .. ومايحتاج تقولين .. حط يده ورى راسه ...بس اهم شيء .. اللي براسي نفذته
ابتهال: قدرت تاخذني من بيت اهلي .. بس احلم او لا تفكر تاخذ أي شيء ثاني مني ...لان وقتها ..سكتت
ابتهال: والا اقول ... بخليها لك مفاجاءه ....وقفت بتروح للغرفه ..مسك يدها
فارس: ابتهال.. لا تعانديني .. لانك بالاخر بتندمين .. خلك مطيعه معي ..سحبت يدها بقوه
ابتهال: لو على موتي .. وبعدين لا تتجراء وتلمس يدي ... وراحت للغرفه بسرعه .. وسكرت الباب
ابتهال وقلبها ينبض بسرعه من الخوف ((يمه .. يفجع .. شكله اذا عصب .. بس ماعلي منه))..
بعد ساعه ..كانت جالسه على السرير .. وكانت لابسه قميص قصير ابيض .. وعله ستاره طويله .. نزلت الستاره .. وعلقتها .. وهي جالسه طفشانه
ابتهال ((بالله ويش بنستفيد من الزواج غير الطفش ... من اول يوم وطفشت .. كيف باقي العمر ..))
جاء فارس ..وفتح الباب وشافها تلعب بالجوال وشعرها
فارس((والله مشكله الحين كيف احببها فيني .. والله اني احبها ...بس لازم اسايرها .نشوف اخرتها معاك يا ابتهال ))..طلت فيه بعدم اهتمام ..انتبهت لشكلها المغري ..حاولت تنزل من القميص شوي .. تحط شعرها على اكتافها .. بس مافي فايده
فارس يضحك: لا تخافين .. ماني مقرب منك ..بس لو سمحتي انا تعبان لي يومين مانمت ممكن انام على السرير لان ظهري يعورني ((محترف بالكذب ..))..
ابتهال: غريبه تستاذن ...
فارس: صراحه ماني بايع عمري .. خايف منك
ابتهال:طيب على راحتك .. انا بطلع اشوف التلفزيون ..مافيني النوم ..طلعت وتركته ...
جلست على التلفزيون شوي ..وبعدين ماحست على عمرها الا وهي نايمه
****الصباح ****
دق ابو محمد على فارس وقال انهم بيجون العصر .. الظهر الساعه 2
فارس بهدوء : ابتهال ... ابتهال ... قومي يالله ..
ابتهال: يمه خليني نايمه ..ظهري يالمني
فارس بعد شعرها عن وجهها وحط يده علي خدها : ابتهال ..قومي انا فارس ...فتحت عيونها ..وشافته قامت على طول
ابتهال: انت ويش جايبك هنا ؟؟
فارس: زوجك ..يعني ويش جايبني ... طلت ..ولقت نفسها على السرير ..وهي تذكر انها نامت على الكنبه
ابتهال: كيف جيت هنا على السرير ...سكت فارس .. وبعدين قال لها
فارس: انا شلتك وجبتك هنا ...تغير وجهها ..
فارس: يالله قومي ..ترى اهلي بيجون العصر ...قامت واخذت لها شور سريع وطلب لها فارس فطور..واكلت شوي ..معاه ..
فارس: يؤؤؤؤ كملي اكل ..ما اكلتي شيء
ابتهال: الحمدلله شبعت ... وراحت للغرفه تكشخ ..عشان اهل فارس بيجون ..اذن العصر .. ودخل فارس لانه يبي يلبس عشان يروح الصلاه ..شافها تتعطر ..
ابتهال: اظن في شيء اسمه تدق الباب قبل تدخل ...طلع فارس وسكر الباب ..ودقه ..ورجع فتحه
ابتهال: بس ماقلت لك تدخل او لا ..رجع طلع وسكر الباب ودقه ..وماردت عليه ابتهال ودق مره ثانيه وثالثه ..وهي بنفسها فتحت الباب وكانت تضحك على حركته
ابتهال: كسرت خاطري
فارس:واخيرا كسرت خاطرك .. يوم السعد عندي اللي اكسر خاطرك فيه ..
وقام يلبس ثوبه وشماغه ويتعطر
ابتهال((وين بيروح وهو كاشخ كذا ... ))..كأنه حس بسؤالها
فارس: اذا جوا اهلي افتحي لهم ... بروح المسجد أصلي .. وطلع من عندها .. جلست بالصاله تستنى أهل فارس .. بس رجع فارس وأهله لسى ماجوا ..
ابتهال: بروح أسوي قهوه ..
فارس: مايحتاج ..هم بيجبون معاهم كل شيء ..
ابتهال: مايصير كذا ...
فارس: أبوي قال لي هم مجهزين كل شيء ..يعني لا تتعبين عمرك ..جلست ..
جاء ابو محمد وملاك وثامر ..وعبدالله ومضاوي .. وجلسوا للمغرب ..وراحوا
ابتهال : فارس ... طار من الفرح أول مره تناديه .. أو تكلمه من نفسها مو شيء يجبرها على الكلام
فارس: أمري
ابتهال: أبي أروح لامي ...
فارس: طيب يالله البسي عبايتك ... بسرعه جهزت وراحو لامها
مضاوي: مشاء الله ..على ابتهال.. بنت ولا كل البنات بكلامه ..وعقلها
ملاك: أي مشاء الله عليها ..اقول مضاوي ترى مابقى شيء على ررمضان كلها اسبوعين ..
مضاوي: توي بقولك ..خلينا نزبط المخزن عشان لما يجبون الاغراض ..
ملاك: إنا ازبط أنتي ارتاحي
مضاوي: لا ويش دعوه ... ماعجزت
ملاك: لا في كاتي تساعدني ....وراحت للمطبخ عشان ترتبه ..
فراس: كيفك يالمعرس .. اشوفك زينان يا ولد .. هذا وأنت لسى ماكملت 24 ساعه
فارس: هههههههههه أسئل أختك مهبله فيني ... صار وجه ابتهال الوان
فراس: بس عسى ما جننتك ...اعرفها عنيده
فارس: لا والله ((يطالعها )) ..مطيعه ماتقول لا .. تسلم يدك يا خالتي على هالتربيه ...
الخالة: ايه المره ألزم ماعليها طاعة زوجها .... شبت ابتهال ضو .
فراس: لا اواصيك يا ابتهال ... زوجك حطيه بعيونك
ابتهال تبي تقهر فارس: لا توصين .. بحطه داخل عيوني من جوا بعد ..أنا بروح غرفتي بأخذ لي أغراض ..
أول ما دخلت غرفتها جلست تبكي .. وقفلت الباب على نفسها
ابتهال (والله انه طيب معي .. طب ليش يحاول يقهرني ...تذكرت كلام ملاك
ملاك: تراها بس كلام بدون فعل ...ماعنده ماعند جدتي
ابتهال : جد اني غبيه ... ليش اسوي كذا .. طلت بشكلها بالمرايا وعدلت مياجها اللي خرب من الدموع
امها: ابتهال .. يالله فارس يقول بتروحون
ابتهال: طيب الحين اجي ... بسرعه لبست ..وطلعت مع فارس ...
بالسياره
فارس: وين اختفيتي ؟؟؟!!
ابتهال: قلت بروح غرفتي
فارس: وليش ...معقوله وحشتك بهذي السرعه .....نزلت دموعها ..
انصدم فارس اول مره يشوفها تبكي قدامه ...حط يده على يدها
فارس: ابتهال ..فيك شيء ..ليش تبكين ؟؟
ابتهال تمسح دموعها: لا ولا شيء .. بس تاثرت شوي ..كيف اترك البيت اللي عشت فيه طول عمري
فارس: بس عشان كذا تبكين ...
ابتهال: ايه
فارس: ابتهال..اذا متضايقه من شيء قولي ..او اذا ما تبيني قولي انا ما اغصبك ..سكتت ما ردت عليه
رحوا لمطعم ... وجلسوا فيه ..وقرر فارس انه لازم يكون صادق معاها اذا ماتببيه بيطلقها
فارس: ابتهال ..تكلمي .. قولي شيء ..
ابتهال: انا ما افكر بكلامك .. ولا جات على بالي فكرت الطلاق
فارس: اجل .. ليش تسوين حركاتك
ابتهال: انت اللي غصبتني اعاملك كذا ..وبصراحه انت تنرفزني وتقهرني ....ضحك عليها لانها قالتها بحقد
فارس: ياويلي شايله علي ...
ابتهال: بقوه بعد ... لو بيدي ذبحتك كان ذبحتك
فارس: مجرررررررمه ...
ابتهال: اجل تعاندني ..
فارس: تدرين انا احب اعاند وانرفز .. هوايتي العناد
ابتهال: يعني بتقول لي .. انك تحب تعاندني
فارس: انتي عاد دخلتي قلبي وعقلي .. واستمتع اذا جننتك ...قلبت عيونها بدلع
ابتهال: حركاتك بزارين ....مات ضحك على حركتها
ابتهال: اظن ماقلت شيء يضحك
فارس..يمسك يدها: اموووووووت على البزارين
ابتهال: قوم نرجع .. انت ماتنعطي وجه ...
بعد اسبوع
بالمستشفى ..
مشاعل: هدى ماتدرين متى يداوم الدكتور فراس
هدى : لا والله بس يقولون مطول ..بالاجازة
مشاعل: ليـــــــــــــش؟؟!!!
هدى : اسئلي .. سامي ..هو اللي قال انه مطول
مشاعل : طيب شكرا ...وراحت جلست على مكتبها
مشاعل((..ليش ما داوم للحين صار له اسبوع ..وبعد مطول ... ))
بعد يومين ..
ملاك: ياربي ويش ذا الملل .. وربي زهقت
عبدالله: اشغلي نفسك باي شيء
ملاك: والله مليت ...لمياء وابتهال تزوجوا ماعاد عندي احد اروح له او اطلع معه
ثامر: طيب بنات عمي ابو سلطان ..روحي عندهم
ملاك: يووووه كيف راحوا عن بالي ... اجل هالحين بدق عليهم
عبدالله: الله يبلشك على طول قامت تدق
ثامر: حرام عليك شف كيف ميته طفش
عبدالله: غريبه صاير تحس
ثامر: لا يغرك تراني حساس
دقت على عبير... وطبعا طارت عبير من الفرح وراحت على طول عندها
ساره: هلا والله تو مانور البيت ... من متى ماجيتينا
ملاك: وهذا انا جيتكم
ريم: علومك ... والله لك وحشه
ملاك: وانتم اكثر
عبير: هاه ويش جديك
ملاك: ولا شيء غير الطفش ... والزهق .. من بعد ماراحت لمياء وابتهال حسيت بالملل
ساره: ههههههههههههههه بالله ماقلتي بنفسك متى اتزوج ..
ملاك: ههههههههههههه لا والله تحسبيني مثلك ميته على الزواج
عبير: علميها ذي .. ميته وتتزوج
ملاك : عيب استحي اللي اكبر منك ما تزوجوا وانتي تبين تتزوجين ...بنات اخر زمن
الكل: ههههههههههههههههههه
ساره : اقص يدي اذا ما تتمنين تتزوجين
ملاك: تبين الصدق...اتمنى واحد بس .. رغم اني متاكده انه مستحيل اتزوجه
ريم: مين سعيد الحظ اللي ملاك بنت عمي تتمناه
ملاك: امممممممممممممم ماله داعي اقول ..
عبير: لا والله غير تقولين
ملاك: لالا ..قلت لك من سابع المستحيل اني اتزوجه
ريم: لايكون اخوي سلطان
ملاك: لو سلطان كان ضمنته .. افهمي اقولك مستحيل
ساره: امانه ملاك قولي ...
ملاك: لا لا ..ما ابي اقول
عبير: تتغلين انتي ووجهك ..
ملاك: كيفي ...ماني بقايله
ساره: ماحنا ميتين ونعرفه ... يالله بشغل المسجل ..وقومي ارقصي يا فيفي عبده
ملاك: ابشري ماطلبتي شيء
بالمستشفى
سامي: هلا والله دكتور فراس .. كيف حالك .. ويش اخبارك
فراس: الحمدلله بخير ..
سلمان: فقدناك يا دكتور
فراس: افااااااااا عاد تصدق ماودي اداوم ..تعودت على الدلع
سامي: عاد شوف الشغل اللي تراكم عليك ..شغل شهر بحاله
فراس: ربك يعين ...
منال : مشااااااااااعل ...مشااااااااعل
مشاعل: هلا منوله ...ويش فيك ؟؟
منال : فرااااااااااااس جاء
مشاعل: من جدك ... وينه
منال: يعني وين ..بمكتبه ..روحي له
مشاعل: خبله انتي يحسبني ميته عليه ..
منال: هذي الحقيقه ..
مشاعل: انطمي .. انا بخليه هو يموت علي ..وهو يلاحقني ..مو اصير مخفه
منال: حلوو اعجبني تفكيرك
بالنسبه لفراس
فراس ((معقوله مادرت اني داومت ... يمكن ليش لا .. يالله عليك يافراس انت العاقل اللي ما تحب البنات ..الحين مشاعل خلتك ..تركض وراها ..والله دنيا دوراه مالها امان ))
طلع بعد ساعتين من مكتبه وشافها تكتب على الطاوله ..
فراس ((اكلمها او .......... لالا خلوني اكلمها ..اجرب ويش خسران )) وقف وراها وهي منسجمه بشغلها
مشاعل: اوووف الى متى نكتب بالسجلات .. جد تعب ...تنحنح فراس ...لفت بسرعه
مشاعل: دكتور فراس ..(تستعبط )) الحمدلله على سلامتك ..متى داومت ؟؟!!
فراس: الله يسلمك ... اليوم والله مداوم
مشاعل: اهاااااااااا .... سكتت ماعندها كلام تقوله
فراس: اخليك تكملين شغلك .. وراح
مشاعل ((فدييييييييييته يا ناس ..))
جاء رمضان .. باجوائه الايمانيه ... والكل منشغل مع عايلته ..وكل يوم الفطور عند بيت ..والكل مبسوط ومستانس .. من جمعه العايله ..والحب ..والالفه والاستقرار اللي هم عايشين فيه
يوم 18 من رمضان
ثامر: ملااااااااااااااااااااااااااااااااك
ملاك: نعم ثمور
عبدالله: نبي نروح الحرم نصلي التراويح تروحين معانا
ملاك: شوووورررررررررر بس بالبس واتوضى ..
ثامر: اسرعي ....لبست بسررررررعه ..واتوضت ..واخذت جوالها وشنطتها وطلعت..
بالسياره
عبدالله: احفظي رقم البوابه اللي تدخلين معاها عشان تطلعين معاها
ملاك:تراني حافظه الحرم له .. مايحتاج توصيني
ثامر: بس زحمه يمكن تضيعين
ملاك: لا ان شاء الله ..ما راح اضيع ...وصلوا للحرم ..وصلوا التراويح ..وخلصوا ..وكان الحرم مرررررررره زحمه .... دقت على عبدالله بس لا يمكن الاتصال به
ملاك: يوه وقته الحين ..الحين ويش يدريني وين بيستناني ... دقت على ثامر ونفس الشيء
مرت عليها ساعه وهي على هذا الحال ..والساحات مزحومه مره تتامل الناس ..تحاول تلمح اخوانه لكن مافي فايده ....راحت عند عمود رخام وسندت ظهرها عليه ..تحاول تدق على اخوانها ..بعد ماملت من المحاولات ..قامت تطالع الناس ..اشكال والوان وجنسيات مختلفه ...وناس رايحين وناس جايين ..شافت محلات وفنادق للتسوق ..دخلت تتفرج على بال اخوانها يدقون عليها ..بعدين رجعت عند العمود اللي كانت واقفه عنده ...كلت وملت من المحاولات ... سمعت صوت مالوف لها
...: اووف وبعدين معك ... تعبت من اللف معك ..اخلصي علينا
...: ياربي ليش مستعجل .. تونا خلني اشتري على راحتي
...: يا بنت امي رجعت للفندق وحضرت جنابك تتسوقين
..: اقول اسكت ابي اركز وانا اشتري
...: صبر جميل والله المستعان .. يالله بس بسرعه ....بدون شعور راحت ملاك وراهم
فيصل : فاديوه ووجع .. ارحميني انا تعبان
فاديا: مالي خص .. انت اللي قلت بروح معك خايف عليك تحمل ..
فيصل: معك عشر دقايق بس
فاديا: طيب شوف ذا الطقم ويش رايك
فيصل: اممممم حلو بس لونه مايصلح لك خذي لون ثاني ...وقام يشاركها الراي
ملاك((اشتقت لها الصوت ..ولهانه عليك ... بس لهدرجه بعدي عنك زين حالتك ..وصاير بهالشكل ))<<كان جسمه اسمن منه اول ..واسمر شوي بعد ..وزايد حلاه زود ....بدون شعور منها
ملاك: لو سمحت اعطيني ورقه .... اخذت الورقه وكتبت ... ((معقوله ..بعدي عنك عيشك بهناء وسعاده ..ولهدرجه فراقي ما اثر فيك ولا هز كيانك ... حسافه بس هذا كله ..كان على حساب قلبي ...اللي موته بيدك ))
وقفت وراه نفسها تلفت انتباهه لكن قهرها منه وحقدها عليه كان اقوى تضعف لحظة وتقوى لحظة ..نزلت معتها من تحت غطاها ..حطت الورقه بجيبه ..وبعدت عن المحل تراقبه لكن للاسف ماحس فيها منسجم مع اخته ...دق عليها عبدالله ..وطلعت ..وراحت لعبدالله
وهي باالطريق تحس انها ضيعت طريقها ماتدرين من وين تروح او من وين تجي ...
ملاك ((آآآه شوفته لخبطت كياني ..نفسي ..نفسي اعرف ويش مصيري ..لمتى بظل كذا لمتى؟؟؟!!))تمشى ماتدري لوين تروح ودموعها سيول تحت طرحتها
فاديا : يالله حاسبه ...دخل فيصل يده وطلع الفلوس .. وشاف بينها ورقه ...بعد ماحاسب ..فتح الورقه ..وقراء كلامها
فيصل ((ملاك كانت هنا ... ما اصدق كيف ما شفتها او انتبهت لها ))..طلع بسرعه من المحل
فاديا: فيصل اصبر تعال وين رايح .. طلعت وراه واخذت الاغراض ...ولحقتها
فاديا: ويش فيك انت انهبلت ... كيف تطلع وتخليني كذا
فيصل : كانت هنا ..وما انتبهت لها
فاديا: مين اللي كانت هنا؟؟!!!
فيصل : ملاك ... ملاك يا فاديا ((طبعا فاديا ماتدري ان اللي قابلتها بعزيمه خالها هي ملاك اللي يحبها فيصل ))
فاديا: لا والله انت من جد انهبلت
فيصل : اقولك كانت هنا .. وشوفي بعد ...مد لها الورقه

رد مع اقتباس
  #32  
قديم March 28, 2015, 12:12 PM
 
رد: رواية رشوا على قبري من دموع عينه للكاتبة علي شاطئ النسيان

فاديا بعد ماقرت الورقه : انت غبي ..شف كيف هي انانيه ما تبيك تكون باحسن حال ...
فيصل : بروح ادورها اكيد مابعدت عن هالمكان
فاديا: فيصل ..انت صاحي ....ماراح اسمح لك تهدم حياتك كفايه اللي صار
فيصل : مو انا اللي اعرف اليأس ...مشى بيروح يدورها
فاديا تمسكه مع يده: لو على موتي ما تروح
فيصل : فاديا اتركيني ...
فاديا: نسيت ..نسيت كل اللي صار لك ..والحين بعد ماصرت زين ..ومرتاح قايم تسوي هالحركات ..
فيصل: احبها ويش اسوي احبها
فاديا: امش بلا حب بلا كلام فاضي ...يالله امش ...بالنسبه لملاك
ملاك: هلا عبدالله وينك ..
عبدالله : انتي وينك
ملاك: انا بالساحه ...
عبدالله: يووووووه بعيده مره ..روحي عند فندق ال.... تلاقينا هناك
ملاك: عبدالله انتم بعيدين مره راح تتكسر رجولي وانا ماوصلت لكم
عبدالله: بلا دلع نستناك هناك ..... قفلت ..وشالت جوالها رجعت من نفس الطريق اللي جات معاه ..وبالها واحساسها بعالم ثاني ...ما تحس بكل الناس اللي حولها تمشي وتتخبط بالناس ..
ملاك((..ليش ماني قادره انساه ...اخ منك ياقلبي رغم كل اللي اشوفه لسى ما عفته ..))..نزلت دموعها على خدها ...
فاديا: فيصل يالله مشينا
فيصل: قلبي يقول انها قريبه
فاديا: وبعدين معك ....ويش جرالك ...يالله مشينا امي تستنانا ..
فيصل يتامل الناس ومن الزحمه ما قدر يركز : طيب يالله ...وهو لاف بيمشي ... صدم ببنت ..وطاح جوالها وشنطتها ..نزلت تلمها ...ونزل يساعدها ...
ملاك: مشكــــــــ......سكتت
فيصل: ملاك .... سحبت منه الجوال ... وبسرعه مشت ...لحقها
فيصل: ملاك بس اسمعي كلامي ....
ملاك: روح الله يسعدك ويهنيك حياتك بدوني احلى ..
فيصل : انتي تدرين انك معي بكل مكان ... طنشته وقامت تمشي بسرعه ..وفيصل وراها وفاديا ورى فيصل دخلت بين الفنادق ..لان عبدالله ..يستناها ....حست انها ضيعت الطريق ... مسكها مع يدها
فيصل: ردي علي
ملاك: واضح اني معك ..انت ما دريت عني من 9 شهور ويش تبي اكثر من كذا
فاديا بعصبيه: ليش انتي انانيه ...انتي خربتي حياة اخوي ..اخوي لولاك كان الحين متزوج وعنده عيال واب وكان عايش معانا بسعاده وراحه ...طرده ابوي بسببك ...ما كنا ندري وينه ...والحين تقولين له انت مادريت عني ...نزل هذا الكلام على ملاك مثل الصواريخ
ملاك مصدومه : انا ااااا خربت حياتك ... ...
فاديا: أي انتي ...سالتي عنه ..قلتي ويش صار لك ...ليش هذي الانانيه ...؟؟؟!!مستكثره عليه انه مبسوط وسعيد
عصب فيصل: بس ...بس يافاديا
ملاك تناظر فيصل : انا اللي خربت حياتك ...انا السبب انك ما تزوجت ...ويش مانعك ...روح تزوج ..
فيصل: ملااك ..لايهمك كلامها ..انااااااا
ملاك تبكي : انت خليتني بقايا انسانه ..خليت الحياه بعيني سوده ..كرهتني بكل شيء ..موت قلبي بيدك ...((تشهق ))الحين الحق علي انا ...مين اللي خرب حياة الثاني ...حرام عليك ..ترمي كل شيء علي انا ..
ملاك: وانتي ((تقصد فاديا )) هذا اخوك عندك زوجيه اذبحيه افلقيه ..انتي حره ...وراحت
فيصل يشد فاديا مع يدها: ويش سويتي انتي ؟؟؟
فاديا: سويت اللي المفروض من زمان تسويه انت ..
راحوا للفندق ...فتح باب السويت ..ودف فاديا ..وكانت بتطيح من قوة فيصل صرخت عليه
فاديا: ويش فيك علي ..؟؟!!..ماحست الا بكف فيصل على وجهها
فاديا: تضربني
فيصل معصب لاخر درجه: واكسر راسك بعد ....جات امهم على صوت الصراخ
الام: خلاص انت وياها ...ويش فيكم ..ليش هذا الصراخ
فيصل : اسئلي بنتك ....دخل غرفته وقفل الباب بقوه ..فاديا قامت تبكي
فايدا: شفتي يمه ولدك ..يمد يده علي
الام: ليش ويش سوتي عشان يضربك ....وبدت فاديا تقول لامها
بسياره عبدالله
ثامر: ليش تبكين ميمي؟؟؟
ملاك: خفت لما ضعت ..
عبدالله: الحمدلله انتي الحين معانا
ثامر : هذي اللي حافظة الحرم شبر شبر
عبدالله يضحك: دخلت مع باب وطلعت مع ثاني ...
ملاك: المهم اني رجعت لكم ..
بالفندق
ام فادي: تستاهلين ..كيف تقولين لها كذا ..
فاديا: يمه انا ابي فيصل ينساها
الام: اذا هو مو مقتنع ما احد بيقدر يقنعه ...وبعدين حطي نفسك مكانها ويش بتسوين
فاديا: مدري ..مدري
الام: قومي اعتذري من اخوك
فاديا: ما بقى الا هي ...لو على موتي ..هو اللي غلط علي ..انا ماسويت شيء ..وراحت لغرفتها
اما بالنسبه لملاك ..اول ما وصلت البيت على طول دخلت غرفتها وقفلت الباب على نفسها وكلام فاديا يتررد على اذنها ...جلست على الكنبه اللي جنب سريرها ..ودموعها على خدها
ملاك: انا اللي خربت حياتك ..لولاي كان الحين متزوج وعنده عيال ...<هذي الكلمه ذبحتها ..ضمت وسادتها
ملاك: معقوله يتزوج غيري .تتذكر كلامه ..ونبرته((انتي لي يا ملاك ..لي وبس ))..نزلت دموعها ..وبكت
دقت عليها لمياء
ملاك: هلا وغلا بلموش
لمياء: هلا فيك ....لكي عندي خبر بمليون ريال
ملاك: ويش ؟؟؟؟!!!!!!!!
لمياء: اناااااااااااااااااااا حااااااااااااااااااامل
ملاك: مبرررررررررروووووووووووووك ...الف مبرووووك
لمياء: ويش رايك ..عن قريب بصير ام ...
ملاك: واحلى ام بعد ....بس تصدقين ماني متخيله شكلك وكرشتك قدامك
لمياء: الحين بس اللي هامك كرشتي ..مالت عليك أي والله
ملاك: هههههههههههه..ولا تزعلين ..بكل الاحوال تجننين
لمياء: ماينفع معك ...يالله بروح اشوفك نصووورررررررري
ملاك: احلى يا نصوري ....
لمياء: باااااااااااااااايوووو
فرحت لمياء من كل قلبهااااا ....
ملاك: الله يوفقك يالموووووووش تستاهلين كل خير ياقلبي ...
انسدحت على السرير والغرفه ظلام ×ظلام ...ودموعها مبلله وسادتها
ملاك ((كان فيني عيب قلي فيك العيب الفلاني
كان هرجي مزعلك في شي قلي لاتعيده
جيت مابيك تحقرني جيت أبيك تعز شأني
جيت آبي فزعة ضلوعك من مشاعرك البليدة
يعلم الله شفت منك ومن غيابك ماكفاني
كان ماتقدرتخفف هم قلبي "لاتزيده"))..
اما فيصل ..
فيصل (( لازم ادق عليها ..لازم اكلمها ..)) اخذ جواله ..ودق عليها ..ضوا الجوال الغرفه كلها ..لفت على الجهه اللي كان فيها الجوال وسحبته وشافت رقم اشتاقت الشاشه له
ملاك: فييييييصل ....ترددت ترد عليه او تطنشه
فيصل : يارب ترد .....
ملاك((ردي شوفي ويش عنده )) تشجعت وقلبها يرجف بداخلها ويدها بعد ترجف ..من الخوف :الووووو
فيصل: سلاااااااااااااام
ملاك بصوت باين فيه البكا: وعليكم السلام
فيصل: كيف حالك
ملاك:.........................
فيصل: ان شاء الله بخير
ملاك((أي خير وانت بعيد عني ..))
فيصل: ملاك: انتي معاي
ملاك بقوه: ايه معك ...ويش تبي متصل
فيصل: ابي اعتذر عن الكلام اللي قالته فاديا
ملاك: وليش تعتذر ..كلامها صح لو مادخلت حياتك كان الحين انت متزوج وعندك عيال ...قاطعها ..
فيصل: ملاك: لا تصدقين هالكلام ..انتي تدرين اني مستحيل اتزوج غيرك
ملاك: فيصل ارجوك اتركني ..خلاص شوف حياتك ..فرح اهلك خلهم يشوفون احفادهم
فيصل: انا مايهمني غيرك انتي
ملاك((لا تضعفين يا ملاك ..انهي كل شيء ..شوفي انتي بعد حياتك )): وانا ما ابيك افهم ..ما ابيك
فيصل: وليش حطيتي الورقه بجيبي ؟؟؟!!
ملاك تلعثمت : كنت غبيه ..ماحسيت بنفسي ...انقهرت منك ((كله من ورى قلبي ..بس عشانك ..مستعده اضحي بحياتي ..بس اشوفك سعيد ))..ودي تعيش بتعاسه ابي اشوفك تبكي مثل الاطفال ..ابي انتقم منك ..ما ابيك تكون سعيد ابدا ...عرفت ليش الحين حطيت الورقه؟؟؟!!!!!!!!!!..سكت فيصل
ملاك : انساني...او على راحتك سوا اللي تبي ..لانك ماعدت تهمني بس اعرف اني الى الحين حاقده عليك
فيصل مصدوم: لهدرجه شايله علي
ملاك: واكثر ...واكثر ..واكثر ...انا نفسي اشوفك ذليل مريض ..مثل الللي خنتني معاها
فيصل: قصدك ولاء ...
ملاك: ايه ولاء...واحب ازفلك الخبر ..ولاء فيها الايدز ...ويمكن تكون مثلها ومناي اشوفك مثلها عشان يشفي غليلي ..منكم ...
فيصل تقشعر جسمه : أيــــــــــــــــــــدز ...
ملاك: أي ايدز ..الله لايوفقك يافيصل ..ربي يحرق قلبك على اعز ماعندك مثل ماحرقت قلبي ...وقامت تبكي اكثر ...الله لا يسامحك يا فيصل ...اشوف فيك يوم ... وقفلت الخط ...وهي منهاره تماما ...تغطت بالبطانيه ..تبكي بالم ..وحرقه حست ان هذا اخر شيء بينهم
رمى الجوال ...وهو مو مصدق كل اللي سمعه
فيصل: ما اصدق هذي ملاك اللي اعرفها ...كيف تدعي علي ..تذكر كلمتها ((ايدز ...الله لا يوفقك يا فيصل ..,,الله لا يسامحك ,, ربي يحرق قلبك على اعز ما عندك )) بدون شعور ركض لامه
فيصل بخوف: يمممممممممممممممه ....يمممممممممه
الام: بسم الله عليك ..ويش فيك ..فيصل ...علام ..ليش لونك مخطوف ؟؟!!
فيصل يبكي : يمه تدعي علي ..يايمه كرهتني ..حاقده علي ...جات فاديا ..وشافتها وانرعبت عليه لانه صاير كانه طفل ومرعوب من شيء
امه : قوم يمه اجلس بجنبي ..جلس جنبها ...
فيصل: يمه ..تدعي تقول الله لايوفقك ..والله يحرق قلبك ..
امه: هذا من قهرها ..قل لن يصيبنا الا ماكتب الله لنا ..جلس امه تواسيه وتحاول تخفف عنه ..وتنسيه ..
بعد يومين ..
ثامر: يااااااااااااااااا اهل البيت ..هلموا .الي ...يا اهل البيت ...نزلوا الكل
الكل: خيرررررررررررر
ثامر: بشرى ساره ..لاهل ابو محمد ...
عبدالله: ثمور ..خير ..ويش عندك
ثامر:وصاااااااااااااااااايف ..جابت ولد
ملاك...: كلوووووووووووووووووووووووش ....
ابو محمد: الله يبشرك بالخير يا ولدي
مضاوي: متى يا ثامر
ثامر : توه محمد متصل يقول ..قبل الصباح ..
ملاك: يالله بروح اشوف ..ولد اخوي ...
ثامر: وابشركم ... سماه ..مشاري ..
عبدالله: يالله البسوا بوديكم لهم .....
بالمستشفى
فراس: مبروك..وصايف ...
وصايف بتعب: الله يبارك فيك
ابتهال: يتربى بعزكم
محمد: تسلمين ..
ام وصايف: هاه يمه تحسين بتعب
وصايف: ايه.. تكفين يمه ..ابي مويه ..
امها: ابشري يا بنتي ..دخلت ملاك
ملاك: سلااااااااااااااااااام
الكل: وعليكم السلام
فراس: استاذن ..
فارس: وانا بعد اخليكم تاخذون راحتكم
ملاك: كلوووووووووووش ..الف مبروك ..
وصايف ومحمد: الله يبارك فيك
ملاك: يتربى بعز عمته
الكل: ههههههههههههههههههه
ابتهال: غريبه ...جديده ذي بعز عمته
ملاك: بس ويش رايكم ..حلوه صح
محمد: اذا عنده عمه زيك ..لا بالله انك صدقتي
ملاك: وين ميشو ..ابي اكحل عيوني فيه
وصايف : بالحضانه شوي ويجبونه ..بعد ساعه...جابت النيرس مشاري
والكل يبوسونه ..وفرحانين فيه لانه اول حفيد لهم
فارس يهمس لابتهال: حلوين الاطفال ...صح
ابتهال: اكيد حلوين
فارس: اممممممممم ...ويش رايك ..
ابتهال: ههههههههههههه فاهمتك ...مايحتاج تقول ....
ملاك تشيل مشاري: ياناس ..يهبل ... ((يحط يده على وجهه ))..فديتك ياروح عمتك انت ..ضمته لصدرها وباسته
ثامر: هاتي ولد اخوي المحترم ...((اخذه))هلا ..هلا ..بالغلا كله ...ميشو ..ويش رايك نسحب على امك وابوك ..ونروح نفحط بالمدينه ...واعلمك اصول الدشره
وصايف: محمد الحق على ولدنا اخوك ..بيدشره ..من ذحين
ثامر: اقول ...طال الزمن او قصر ...دشرت ولدك على يد ي
الكل:هههههههههههههههههههههه
محمد: زانت علومك..هات ولدي ..
مر اسبوعين ..وجاء العيد ...الكل مبسوط ..والاوضاع مستقره
لمياء: ملاكوه ..كيف قبل الدراسه عساكي مستعده
ملاك: يوه ..مالي خلق ..للدراسه ..خصوصا ان الناس اللي معي بالقسم ما يشجعون
لمياء: افا ليش ؟؟؟
ملاك: باردين .. تصدقين ماعندي صديقات بالقسم ..كلهن يمكن عشرين بنت كل خمسه مع بعض ..
لمياء: والبقيه
ملاك: عيال ...بس طبعا ..هم بركن واحنا بركن ...ما اصدق متى ارجع البيت
لمياء: يالله عدت سنه وهذي ثاني سنه ..
ملاك: هانت باقي سنتين
لمياء: شدي حيلك لا اوصيك
ملاك: احسدك مريحه ومرتاحه
لمياء: اذا تزوجتي سوي زيي اتركي الدراسه
ملاك:ههههههههههههههه تحسبيني خيبانه مثلك ...
لمياء: يووووووه نسيت انك دافور ....
ملاك: تنكتين ...يام كرشه
لمياء: ان شاء الله ياملاك ..تتزوجين ..وتجبين بدل الواحد توأم وبعد ثلاثه مو اثنين
ملاك: حرام عليكي بتذبحيني انتي
لمياء: عشان تعرفين ...الكرشه على اصولها ..
ملاك: خلاص يا رشيقه ...
لمياء: حتى لو قلتي اني مثل انجلينا جولي ..بدعي واقول ان شاء الله تجيبين توأم
دخلت ابتهال: سلام ياحلوين
الكل: وعليكم السلام
ابتهال: اسمع سيرة زواج وحمل ..وخرابيط
ملاك: اسئلي خالتك الداجه ذي
ابتهال: لميوه ويش تقولين ..وقامت لمياء تقول لابتهال السالفه
ابتهال: هههههههههه بس عشانها قالت لك يام كرشه ...
ملاك: شفتي كيف
ابتهال بنذاله: ولا يكون زعلتي عشان قالت تجيبين توأم
لمياء: اسمعي ويش تقول ((تقلد ملاك))..حرام عليكي بتذبحيني
ابتهال:ههههههههههه هي صادقه بعدها ماجربت الزواج ...بدري عليها ..خليها تجرب اول
ملاك: اخص انتم ياللي يسمعكم يقول لكم عشرين سنه متزوجين .ترى لسى ما كملتم سنه
لمياء.: التجربه خير برهان
ملاك: بالله استحوا ..عيب عليكم
ابتهال: ههههههههه حركات مراهقات ..وتستحي بعد ..رمت عليها المخده
لمياء: حرام حزنتني ..خلاص خلينا نسكت احسن ...رجعت للبيت بعد الوناسه مع لمياء وابتهال
بالرياض ..وخصوصا بغرفة فيصل
فيصل : ليش تصديني يا ملاك ... ليش ..؟؟ كتب لها مسج وارسله على جوالها
كانت تفكر فيه ...تفكر بالكلام اللي قالته له ...قاطعها صوت نغمه الرسايل ..اخذت جوالها ,,وقرت الرساله
((روحي وهالمره خــــلاص لاترديــن!!
هذا الفــــــراق وروحــــةدون رده!!
الكذب خيـبــه ما عــرفتي تحبـــين
ما أنتــــي من يســـتحق المـــوده
ماتعرفين الحــــب والعــطف والـين
ولا عاد في قلبي على الحـب شده))....
كلمات هذي الرساله ..اقطعت اخر حبل من حبال الامل عند ملاك ردت عليه بمسج .....
((شوف غيري حتى لو قلبي يبيك
شوف غيري أنا ما أنفع معاك
انت تلقا من يحبك ويشريك
وأنا بلقاء من ينسيني غلاك
ياحرام الوقت ضيعته عليك
ياخساره القلب بحساسه شراك
لاتفكر اني بندم وجيك
قلبي اليوم ما همه رضاك
لاتأثر لو عيوني ترتجيك
لايهمك حتى لو بتعب وراك
ياحسافه وقت ضيعته عليك)) واختمتها بجمله ...(( كانكـُ تبُغيَِ المّوادُع. !! ِ.أبشرُ..تراني بالّهجُِر..فنًــَِـااااااانّ))
*****************************

انطلقت اجراس ساعتنا ...وحانت لحظات ..الصعاب
لكي نعيش ...وبدت الاقدار تلعب لعبتها ....ولا تستطيع اي القوى منعها

زادت احداثنا تشويق ...واصبحت حياه ابطالنا ...اكثر تعقيد

باختصار .....اترك الاجابه ..للاحداث القادمه بكل جديد

تقبلوا مني ارق التحايا واعذبها

لا تبخلوا علي ..بارائكم ...

كل الود لكم

((بقااايااا حطاااااام ))او ((جذابه بطبعي ))


رد مع اقتباس
  #33  
قديم March 28, 2015, 12:20 PM
 
رد: رواية رشوا على قبري من دموع عينه للكاتبة علي شاطئ النسيان


البارت الثالث والعشرون
&&
&
((غًرٍيَبٌ آلليَآليَ خٌذٍَتّْ مًنْيَ غًآليَ ..
{ تّْبٌآعًدًٍ } وٍعًيَنْيَ .. رٍثْتّْ مًنْهٍَ حٍّآليَ
آنْآ مًآنْسٌّيَتّْكَ .. وٍلوٍ بٌيَدًٍيَ جًيَتّْكَ !!
وٍطُيَفْكَ تّْرٍى مًآ "يَفْآرٍقٌ " خٌِيَآليَ))



××××××
بعد شهرين
بالرياض
ماجد: يالله يا فيصل تاخرنا على الطايره
فيصل : خلاص خلصت مشينا ...
بالطريق
ماجد: كم ناوي نجلس هناك
فيصل: والله على حسب الاجتماع ..اول ما اخلص برجع
ماجد: ان شاء الله تكسب المناقصه
فيصل: والله ذي صفقه العمر وابوي موصيني عليها ...ادعيلي
ماجد: عاد البريطانين كل شيء الا الشغل يحبون الاتقان
فيصل: تعلمني فيهم ....ربك يعين ..انا لي شهر اجهز بالاوراق ..والمناقشات
ماجد: الله يوفقك
فيصل: امين
بالمدينه
ملاك: ميشووو...ماني مصدقه ...سلمت على وصايف ومحمد اللي زايرينهم
وصايف: كيفك يا ملاك ..
ملاك: الحمدلله بخير ..بس الدراسه مطلعه لي قرون
محمد: ربك يعين
وصايف: عساكي تساعديني مضاوي
ملاك: والله اني مقصره مافي وقت اساعدها
مضاوي: الحمدلله ..كاتي موجوده ..
وصايف: لو اني منك ..كان اسوي فيها مثل خاله سندرلا
ملاك: محمد ..شف زوجتك تبي تشب النار بيني وبين مضاوي
مضاوي: لا حشى والله ما اسويها
محمد: شكل يا وصوفه مافي امل نخرب بينهم
مضاوي: بسم الله علينا ...
الكل: هههههههههههههههه
ملاك: بس لا تحسدوننا ..
وصايف: من زود الحب نحسدكم
محمد: انا ادري
مضاوي: جايين عندنا بخربون بيتنا ...صدق انكم فتانين
ملاك: وبقووووووووووه
وصايف: ياويلي حاقده علينا اختك ياحمودي
ملاك ومضاوي: هههههههههههههههههههه
ملاك: حمودي ....يا دنيا اخبر ما احد عمره دلع محمد الحين حركات صاير له اسم دلع وحمودي بعد
وصايف: معقوله محمد كان بينكم ..ولا كنتم تدلعونه
ملاك: لا والله بس يالله ربي عوضه فيكي ..يا وصوفه ..
الكل: خخخخخخخخخخخخخخخخخخخخ
ببيت فارس
فارس: ابتهال .......بهلووووووووووووووول
ابتهال: بهلول بعينك ....كم مره قلت لك ما احب هالاسم
فارس: عاد انا عاجبني .. وبناديك فيه
ابتهال: حررراااااااااااام عليك .....الا ويش كنت تبي
فارس: بسك شغل ..تعالي اجلسي معي ابي اسولف معك
ابتهال : صدق انك فاضي ... بروح اكمل الكيكه اللي اسويها ....رجعت للمطبخ
فارس((الحين الكيك هاهم مني ....هييييييييييين يا ابتهال ..)) راح وراها للمطبخ ..ويشوفها منسجمه بين الدقيق والبيض والزيت ...تخلط وتكسر البيض ...جاء بجنبها
فارس: الحين تاركتني ..ولا معبرتني ...عشان كيكه
ابتهال: مشتهيه كيك ..قلت خلوني اسوي كيك
فارس: وانا مشتهي اسولف معك ..وانتي حاطتني بالاحتياط ....
ابتهال: فارس ...روح كمل فلمك خلني اخلص ..وبعدين اجي اسولف معك ...شاف الدقيق واخذ بيده ونثره عليها
ابتهال بصراخ: ويش تسوي ؟؟؟
فارس: خلي الدقيق والبيض ينفعك الحين ...اخذت كوب وملته دقيق ...وكبته على شعر وجه فارس ..جلست تضحك عليه .... لان شكله تحفه
ابتهال: هههههههههههه شكلك يجنن ...بالله روح شوفه بالمريا ذكرتني بكاسبر
فارس: كاسبر هاه ... مسك كوب المويه وكبه على وجهها
ابتهال: حراااااااااااااااااااااااااااااااااام عليك ... طيب الحين اوريك ....راحت للثلاجه ..وسحبت الكاكو اول ما شافها بالكاكو هرب ...
ابتهال: وراك وراك والزمن طويل يا فروووووووووس ....
فارس: اتحداك تلحقيني .... تركض وراه
ابتهال: لا تتحدى وربي لا اخلص العلبه كلها عليك ...
فارس يمد لها لسان :: ياحرام ...سلحفاه ...
ابتهال: طيب ..يا لبزر ...دخل الغرفه ... مافي مكان يهرب منه
فارس: ابتهال ...لولو ..حبيبتي ...قلبي ..روحي انت
ابتهال: والله ما اتركك اردها لك ..قفلت باب الغرفه وحطت المفتاح بجيبها
ابتهال: ورني ويش بتسوي الحين
فارس: والله تندمين ...
ابتهال: قلت العلبه كلها فيك يعني فيك ...ممنوع الجدل ....تحاول تمسكه لكنه اسرع منها ..مسكته مع يده
ابتهال : واخيرا ...دفته على السرير ...ومسكته زين ..
فارس: ابتهال ... لا تعدميني ...
ابتهال: قلت لك لا تناقش ... ((فارس مبسوط ..من عنادها ...
فتحت العلبه ...واخذت من الشوكولا السائله ..وحاست فيها وجهه
ابتهال: ههههههههههههههههههههههههههههههههههههههه
فارس: هين ...اخذ منها ...وحاس بعد وجهها
ابتهال: حوس زي ما تبي اهم شيء نفذت التحدي .... سمع صوت جرس الباب
فارس: كيف افتح الباب وشكلي كذا
ابتهال: قم افتح اجل اروح انا افتح ...
فارس: طيب بروح ....... راح فتح الباب ....
ملاك وعبدالله وثامر : هههههههههههههههههههههههههههههههههههههه
عبدالله ميت ضحك على شكل اخوه المبهذل : ويش فيك كذا
ثامر بصوت مقطع من الضحك : ويش مسوي للمدام اللي .... وماقدر يكمل من شكل فارس
ملاك: ههههههههههههههه مافي تفضلوا
فارس: نسيتوني حسبي الله عليكم ....حياكم
عبدالله: كيفك
فارس: تمام ..
ملاك: وين ابتهال...
فارس: بالغرفه ..... اكيد تاخذ شور
ملاك: ليش ...ويش سالفه هالدقيق والشكولاته
قام فارس يحكيهم .... وهم ميتين ضحك
عبدالله: لو مكانك ..كان خليتها تكمل الكيكه مو اخرب عليها الزم ماعلي بطني
ملاك: احمدربك احد مدلعك ويسويلك كيك
فارس: هههههههههههههه ويش اسوي احب النكد
ثامر: بس بنت خالتي ..ما ينخاف عليها ...جدعه
ملاك: ايه تعجبك ترى ....
فارس: هيه لا تتكلمون عن زوجتي ترى اغار
الكل:هههههههههههههههههههههه
عبدالله: الحمدلله والشكر تغار ..حشى ماهو بصاحي
ثامر:لا تاخذ علينا ترى بس بنشوف تغار على قولتك
ملاك: بروح اشوف ابتهال سيو .... دخلت الغرفه ودقت الباب
ابتهال: مييييييييييييييين
ملاك: ملالالالالالالالالالالالالالالالاك
ابتهال بفرح: ملووووكه ...حياك تفضلي ....
ملاك: كيفك
ابتهال: تماااااااااااااااام واخيرا ..جيتونا
ملاك: ويش اسوي ...الشحوط اللي عندي توهم فضوا
ابتهال : وخان
ملاك: والله عيب اجي لحالي توكم عرسان ...
ابتهال: يا شيخه ما احد غريب
ملاك: الا ماقلتي كيف مع اخوي الوديع ...
ابتهال تضحك: تمااااااااااااااااام
ملاك: عسى مابينكم مشاكل
ابتهال: نوووووووو متل السمنا على العسل
ملاك: منــــــــــــــــيــــــــــــح
جلسوا يسولفون مع بعض
بالمستشفى ...وبالتحديد بمكتب فراس
فراس ((خلاص انا لازم اكلم امي ... بس قبل ..اكلم مشاعل عشان تجس نبض اهلها )) ..مسك سماعه التلفون
فراس: لو سمحت ناد الممرضه مشاعل ..... خمس دقايق ... واندق الباب
فراس: تـــــــــفضل
مشاعل: مساء الخير
فراس بابتسامته الجذابه: مساء النور والسرور ...
مشاعل: خير دكتور فراس ...بغيت مني شيء <<<مسويه رسميه الاخت ))
فراس: ممكن تجلسين بسولف معك
مشاعل : سوري عند شغل .. وبعدين ما اقدر اسولف مع دكتور بالمستشفى وبمكتبه ولوحدنا
فراس: شوي شوي ... اكلتيني ... الموضوع مهم
مشاعل: تقدر تختصره ... ماني فاضيه
فراس ((عارف انها تتغلى )): داري ان ماعندك شيء ... فا اجلسي لان الموضوع يبي له ريلاكس
مشاعل: بس بسررررررعه
فراس: ابشري ماطلبتي شيء .. بس اجلسي ..ماصارت اتراجك لي ساعه .... جلست
مشاعل: تفضل قول ويش عندك ((والله لو يدري ابوي اني اكلمك غير يذبحني لا وبمكتبه ولحالنا ياسلاااااام )
فراس: مشاعل: تعرفيني انسان صريح وما احب المقدمات ..انتي احد خاطبك
مشاعل انذهلت من سؤاله انربط لسانه عن الكلام :..................
فراس: مشاعل ردي علي ...
مشاعل: وليش تسال ؟؟؟!!!!
فراس: لان بصراحه وبكل تواضع ... حاب اتقدم واخطبك ...هذا اذا ماعندك مانع ..وطبعا اهلك
مشاعل بردت اطرافها ما تدري ويش تقول تحس انها راح تدوخ من الكلام اللي سمعته .....
فراس: مشاعل معي .....؟؟!!...هزت راسها بالايجاب
فراس: ..ماسمعت ردك ... او ما سمعت حتى صوتك ... سكت شوي .... عارف انك مصدومه ..بس كلميني ردي علي
مشاعل: مدري ويش اقولك ..بس اذا قلت لاهلي انك دكتور بنفس المستشفى ونفس القسم يمكن يــــ
قاطعها : عارف ويش بتقولين بس انا ابيك تجسين نبضهم يعني ممكن يوافقون او لا .. وبعدها انا اتولى كل شيء ...
مشاعل: فراس ....انت من جدك تبيني زوجه لك .... استغرب سؤالها
فراس: ايه ... ليش تسالين هذا السؤال
مشاعل: انت متاكد
فراس: مشاعل حسستيني ..انك ماتبيني ... اذا ماتبين ما اغصبك
مشاعل: مو قصدي بس ...ويش بتقول لاهلك ...
فراس: ماعليك مني ... اهم شيء تكونين راضيه
مشاعل: اتركني افكر ... واشوف اهلي
فراس: حقك ... فكري و خذي وقتك .. وبعدها اعطيني خبر ...
بعد اسبوع
ملاك نزلت دموعها ... حست انها مشتاقه للمياء ...حست بوحده صحباتها فارقتهم ... ولمياء بديره وهي بديره .. وابتهال مشغوله مع زوجها ....دقت على جود
جود: اهلييييييييييييييييييييين ميمي ...وينك وشو اخبارك ..اشتاقلك
ملاك: وانا اكثر ياقلبي ... وحشتيني .. انتي والبنات ...
جود: طمنيني عنك ..
ملاك: الحمدلله بخير ... انتي شخبارك والبنات ..وينهم لي شهر ما ادري عنهم
جود: بخيرررر كلهم منيحين ... دريتي شوشو انخطبت
ملاك: جــــــــــــد .... متى
جود: الاسبوع اللي فات خطبها ولد عمتها
ملاك: الله يوفقها ... ولوجين
جود: امس كانت عندي مسكينه حالتها صعبه
ملاك: ليش
جود: نفسيتها متازمه شوي
ملاك: الله يعين ...وانتي ياقلبي شمسويه
جود: ولا شيء ....عايشه في الدنيا ...
سولفت معاها تقريبا ساعتين وبعدين قفلت منها وحطت راسها على المخده ...تفكر ..وتفكر ..وتفكر
ملاك: الى متى وانا كذا ... حياتي فراغ عايشه لوحدي الى متى مليت ..نفسي اصارخ ...مليييييييييت
كان ثامر واقف عند باب الغرفه وهي مو حاسه بوجوده ..ويسمعها تكلم نفسها
ثامر: ليش مليتي .... لفت له ...
ملاك: طفشت قرفانه
ثامر: ويش اللي يملئ عليك حياتك
ملاك: مدري ..... ظلت تفكر بسؤاله ...بعد فتره سكوت
ثامر: لا تفكرين انا اقولك ..من اللي يملي حياتك ..
ملاك: ميييييييييين
ثامر: زوج ... وعيال .. وعايله تنشغلين فيها ..سكتت ملاك ماردت عليه
ثامر: مو تفهمين قصدي غلط
ملاك: لاتخاف ماني فاهمك غلط ... بس النصيب ماجاء
ثامر: على قولتك النصيب ماجاء
بعد اسبوع .... ببيت ام فراس ..
ابتهال: ملاك ....بالله جيبي ... من غرفتي الكيس فيه الاغراض ... باشيل هذا
ملاك: طيب بس انتبهي مو تطيحين نبتلش
ابتهال: لاتخافين .... وهي رايحه ... لغرفه ابتهال ....
ام فراس: والله يا يمه هالبنت خايفه عليها
الجده: وبعدين معك انتي
ام فراس: البنات اللي بعمرها كلن مع زوجها وهي ماحد دق بابهم
الجده: لااله الا الله ... علامك انتي ...
ام فارس: انا خايفه عيها اول قلت لك وقلتي اصبري الحين ماعاد فيني صبر
الجده: لا تستعجلين ... وبعدين البنت مالله كاتب لها ..بتعترضين على حكمه الله
ام فراس: انا ماقلت كذا
الجده : اجل لا عاد تفتحين الموضوع
ملاك((..معقوله لهدرجه خايفين علي ... انا ما افكر مثلهم ليش يقارنوني بغيري ليش؟؟؟))رجعت عند ابتهال وماكان شيء صار ....بس اول مارجعت البيت
ملاك: الحمدلله على كل حال انا عند ابوي معززة مكرمه ويش يدريني يمكن اتزوج واحد يقلب حياتي جحيم ... رد عليها صوت من داخلها ((وفيصل ... ))
ملاك: فيـــــصل .. بس هو اكيد بيخطب غيري مستحيل يتزوج وحده تعرف عليها ((وليش مستحيل ))
ملاك تمسك راسها : اووووف ..ويش ذا التفكير لسى انا صغيره بعيش حياتي ...
بالمستشفى ...
منال: مشاعل لازم تقولين له يمكن الرجل يبي يتزوج ومستعجل
مشاعل: بس ما راح اخليه يروح لغيري
منال: الظاهر عمي سوى اللازم معك ..ضرب وضربك ..وحلفان وحلف ..والحين تقولين مايروح لغيري
مشاعل : انا احبه ..
منال: ايه تحبينه ماقلنا شيء .. بس ابوي وابوك .. لو تموتين غير عيال عمي ماتتزوجين
مشاعل: لا انا بوقف بوجههم وباخذ اللي ابيه ويبيني ..ولو يصير اللي يصير
منال: بكيفك بس حطي ببالك .. انك يمكن تاكلين اكثر من الضرب اللي انضربتيه
مشاعل: مايهمني .... جاء فراس ...
فراس: مشاعل ..لو سمحتي دقيقه .... راح للمكتب ولحقته ..
فراس: مشاعل...ومارديتي لي خبر ...
مشاعل دمعت عيونها : مدري ويش اقولك .... بـــــــس
فراس: ما وافقوا صح
مشاعل: ايه ..... وجلست تبكي ...
فراس: اهدي .... اهدي يا مشاعل
مشاعل: اهلي بيذبحوني .. يقولون اني جبت لهم العار عشانك مو من قرايبنا
فراس: لا تخافين
مشاعل: فراس خلاص دور لك وحده غيري ... والله اهلي غير يذبحونك ... او يذبحوني ...
فراس: بس ....
مشاعل: سو اللي قلت لك ..وخلاص انساني ... انــــــ ...فجاءه انفتح الباب ... بقوه فضيعه ..ودخلوا شباب بعمر العشرين ... ويسحبون منال معاهم
منال تبكي : مشـــــــــــــــاعل
مشاعل .انصدمت : مـــــــــــــــتــعب .....
متعب كانه بركان هايج: ايه ... يا فاجرة ... لوثتي سمعتنا بالتراب ...
مشاعل: انــــــــــــــــــــا .... كنـــــــــت
خالد: اسكتي ... ويش تسوين هنا بالغرفه معه ..ياحقيره
مشاعل تبكي: ولا شيء ... ولا شيء
فراس: من انتم ..... طلع متعب من جيبه مسدس ...
مشاعل : متعب ... تكفى لا تسويها ...
متعب : الموت فيه حلال .... وقفت قباله وهي الحاجز بين متعب وفراس
مشاعل: موتني قبل تموته
خالد: وبعد قدامنا
فهد: امشي معانا ..وحسابك بالبيت
وقفهم فراس ..بكلامه اللي ونبرة صوته اللي تهز اركان المستشفى هز
فراس: قبل لا تطلع انت وياه ...اسمعوا اللي عندي
خالد: ولك عين تتكلم بعد
فراس: اول شيء .. انتم اسخف ناس مروا علي ... كيف تشكون باختكم الشريفه ... اللي عايشه طول عمرها معاكم ... بس عشان قالت لكم ان واحد ناوي يخطبها ...قومتوا الدنيا
متعب: وانت ويش خصك ...
فراس: لاني انا اللي قلت لها تكلمكم واذا وافقتم باجي ومعي اهلي واخطبها منكم على سنه الله ورسوله
متعب: انت اخر واحد يتكلم سامع ...وانتي امشي يالله ....سحبوها واخذوها للبيت ..
وفراس جلس..يلوم نفسه ويحمل نفسه كل شيء ..وقرر انه يكلم امه وابوه عشان يوضح لهم صدقه
لما وصل للبيت ...كان واضح عليه الزعل ..والهم
امه: فراس ويش فيك يمه
فراس: ما فيني شيء
امه : علامك زعلان يا ولدي ..قولي ويش فيك
فراس: متضايق شوي
امه: ويش مضايقك
فراس: يمه ارجوك لا تضغطين علي ..ترى اللي فيني كافيني ....
امه: يايمه انت لازم تلقى احد يسمعك ويشاركك همومك ..ومالك الا انك تتزوج ... اللي كبرك متزوجين وعندهم عيال وانت للحين جالس عزابي
فراس: عارف يمه ..داري اني طولت الجلسه بدون زواج
امه بدى الامل ينتعش عندها: انت بس قولي بتزوج والبنت تكون عندك
فراس: حاضر يالغاليه ... ابشري واوعدك قريب ..
امه : فراس.. دام انا نتكلم بالموضوع ... انا خاطري اخطب لك بنت خالتك ملاك ...
فراس انصدم : ملااااااااااااااااااااااااااااااااااك
امه : ايه ملاك .. ويش فيها ... كامله والكامل الله جمال وعلم ودلال .. وغنج ..مانقصها شيء
فراس: انا ماقلت شيء .. بس انا ما افكر فيها
امه بعناد: اذا تبي ترضيني ... ولا ازعل واغضب عليك تتزوجها .. البنت يتيمه محتاجه من يراعها
فراس: بس عشانها يتيمه ..اتزوجها ... الله يرزقها باللي احسن مني ويقدر يسعدها
امه: فراس: ويش قلت لك انا .. اذا رضاي يهمك ... ما تتزوج الا ملاك ... وبس .. ولا تناقشني
فراس: يا يـــــــــــــــــمه
امه: هذا اللي عندي انا تركتك على راحتك ..وخليتك تاجل الزواج لكن انا اللي اختار لك البنت .. وبنت اختي ماعليها قصور مليون واحد يتمنى ظفرها
فراس: انتي قلتيها يايمه .. مليون واحد ..وانا اعزها مثل اختي ..
امه بحده: فراس ... الظاهر انت .. ما عدت توزن الامور صح ... بنت خالتك دانه .. ماتلاقي مثلها اثنين
فراس: يمه اجلي هالموضوع لوقت ثاني انا تعبان ومافيني شده لعوار الراس
امه: الحين الزواج عوار راس .... باس راس امه وراح غرفته ..وهو هلكان من التعب .. جلس على السرير ..وهو يفكر
فراس(( الحين بدل المشكله صارت مشكلتين ..امي تبيني اتزوج ملاك... وانا ابي مشاعل ... يعني لو قلت لاهلي راح يرفضون مثل اهل مشاعل ماهو رافضين ... واتزوج ملاك وانا مغصوب عليها آآآآآآخ والحل ...لازم الاقي الحل المناسب ..ارضى اهلي واتزوج اللي احبها .... )) نام بعد تفكير عميق
ام فراس ((انا وراك يافراس ... وما راح تتزوج غير بنت اختي اللي احبها .. والله ثم والله ملاك مافي زيها ..وان شاء الله ..ماحد بياخذها غيرك يافراس .. طال الزمن او قصر ))
بعد مرور الايام والاسابيع والشهور

ملاك: هلا لمووووووش تو مانورت المدينه ...وتضم لمياء
لمياء: بوجودك ... يا ملوووووكه
ملاك: يؤيؤيؤيؤيؤيؤ ويش ذي البطن يا لمياء
رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
ملخص رواية سلالم النهار -رواية للكاتبة فوزية شويس السالم Yaqot روايات و قصص منشورة ومنقولة 0 May 8, 2014 10:41 AM
تحميل رواية أنا قلبي مثل قبري ما يضم اثنين كاملة SEO روايات و قصص منشورة ومنقولة 0 October 27, 2012 02:08 PM
تحميل روايه رشوا على قبري من دموع عينه SEO روايات و قصص منشورة ومنقولة 0 October 25, 2012 03:23 PM
رواية قلوب محرمه على النسيان كاملة,تحميل رواية قلوب محرمة على النسيان ألاء ياقوت الروايات والقصص العربية 2 February 12, 2011 03:16 PM


الساعة الآن 05:15 PM


Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر