|
|||||||
| روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا |
 |
|
|
LinkBack | أدوات الموضوع | انواع عرض الموضوع |
|
#1
March 3, 2015, 11:16 AM
|
||
|
|
||
|
رواية من متى والغصن يختار الطيور؟ للكاتب شخصيه خياليه
رواية: من متى والغـصن يختـار الطيـور؟!  1))من متى و الغصـن يختـار الطيـور..!! ،،،،،، تساؤل واقعي مكتوب من خيال كاتبه، رسمت احداثها في قمم جبال الجنوب السعودي البارده..حياه اخرى عادات باقيه منذ مئات السنين لم تغيرها دواليب المدنيه الحديثه.. تتضمن قصة حرب عشاق*غير معلنه* ، عندما يسوق القدر فتاه عصريه طموحه من *جدّه* إلى تلك الجبال الشامخه.ليسوقها إلى حياه غامضه.. .!! ، #الكاتبه/شخصيه خياليه* ،، ، مدخل:: في مكان ما....بعيد جداً عن صخب المدن..في أقاصي الجنوب،قريه ساحره تبعد عن ابها قرابة الخمس والعشرون ميلا. تزيد او تنقص قليلا...هناك بين الغيوم وتحت زخات المطر الغزيره"صوت هرولة فتاه هاربه". تركض تريد الهرب من واقعها المرير...وهي تنزف دموع الخوف ورهبة ظلام الليل.. تتعثر وتقف من جديد لتكمل الطريق بين المزارع...تكاد تسمع صوت انفاسها وضربات قلبها،من شدة رعبها.. عقلها يقول لها "هي ميته لا محاله" خلفها الكثير يلحقون بها...الجميع يريد قتلها..!! اخوها ذو الملامح العربيه الحاده والعينان الحاداتان والحاجبين المعقودين من شدّة غضبه،كان من بينهم... تعثرت الفتاه في مكانها ولم تستطيع معاودة النهوض مجدداً..ضلت تتألم بشده من إلتواء في قدمها ..أحسّت لوهله أنها فقدت الأمل في النجاه... واستسلمت قسرياً لواقعها..، وقفت خلفها سياره جيب مفتوحه ..وخلفها سياراتين محمله باربعة رجال!!! نزل شاب وهو بالثلاثين من عمره تقريباً وكان يربط شماغه على راسه وبيده سلاحه ويبدو منزعج من خروج السياره الأخرى خلفه ...<<<هذا الشاب يكون اخوها الشباب سبقوه للبنت وصوبوا اسلحتهم عليها بدون تردد!! بكت البنت من شدة خوفها وهي ترجف من البرد وتنادي سندها/اخوووي تكفى انا وش سويت علشان كل هذا.. واحد من عيال عمها كان مقهور منها/تهربين من بيت اهلك علشانك معارضه ع الزواج من ولد عمك!!!...ليه من متى البنت عندنا تعارض كلام اهلها والتقاليد يا ساره!! ساره وهي تمسح دموعها،نطقت من خوفها/مهما حكيت يا علي مستحيل اتزوجك،لا اعرافك ولا تقاليدك يهموني..اذا صرت منت كفو للزواج ليه اتزوجك.. علي انقهر/ان ما ذبحتك ساره وهي تحاول تثبت حجابها ولثامها بيدينها المرتجفه/الموت اهون ولا العيشه معك..ياخي اكرهك و مافي شي بالدنيا بيجبرني عليك حتى لو دفعت عمري علي عصب ورفع سلاحه باتجاهها/يا خااااينه صوت عالي من وراه يزجره/وقف يا علي..نزل سلاحك علي استغررررب والكل/!!!!! اقبل اخوها "مشعل" بطبعه الرجولي الهادي ورزانته،ووقف قبالهم/نزلوا اسلحتكم يلا علي بطيشه وأنانيته/انت انهبلت...اتركني عليها اذبحها قبل لا تخلينا سالفه بين الناس مشعل وهو يخزه بنظرات ناريه وبصوت حااد/ علي ان مانزلت سلاحك،ذبحتك انت بهالسلاح اللي بيدك علي تنفس حقد/وقفت السالفه يا مشعل لأنها اختك هااه!!،ماني مصدق انك انت اللي بتصير شيخنا بعد عمي.. مشعل للحين يمسك اعصابه،ويتكلم بثقة حكيم/يلا كلكم توكلوا على الله.. ساره مو مصدقه اللي صار قدامها،ابتسامتها اختلطت بدموعها/.. الكل راح وظل اخوها،ومعه شاب اسمه"عزيز" واقف وعينه عليها من بعيد..وقلبه معها،"عزيز"كان جاي و ناوي يفديها بروحه،لعيون اختها الاصغر منها"زينه"ما كان ضمن اللي بيقتلونها!! مشعل اتجه لها وجلس عندها على ركبه،وهو يناظر رجلها الملتويه/شفيها رجلك ساره وهي ترجف من البرد والخوف/وانا أركض تعثرت وطحت والظاهر صار لها إلتواء مشعل بهدوءه مسك قدمها ولفها وعدلها/هاه كيفها اللحين ساره بعد صياح/الحمدلله.. رجعت طبيعيه مشككور اخوي مشعل وهو للحين عاقد حواحبه/يلا قومي خلينا نرجع للبيت ساره بخوف/بس يا خوي مشعل قاطعها/قلتلك قوومي وولا كلمه.. ساره تترجاه بدموعها/بس ياخوي ابوي بيذبحني والجماعه بعد.. مشعل بثقه/لا تخافين انتي بحمايتي،ما احد بيمس شعره منك ومحد بيزوجك غصب..اصلاً علي مو كفو يتزوجك،انا ما رضيت بالخطبه بالبدايه وسكتت لكن دامك تكلمتي واعلنتي رفضك فأنا معك يا اختي ساره/بس يا مشعل لازم تسمعني مشعل/بسمعك لكن مو اللحين،يلا مشينا... ساره ابتسمت وهي تناظره بفخر،وقامت معه/... مشعل/يا عزيز شغل قرب السياره هنا عزيز ما صدق خبر/ابشر / / / / من جهه ثانيه وبنفس الليله... جالس عند ابوه وهو مزعوج..ويسب ويشتم/شفت يبه وش سوااا ششفت...وقف مع اخته..هذا اللي انتم بتسلمونه امور الشيخه في هالقريه،والله هزلت...هزززلت بكرا الناس كلها بتقعد تتكلم عننا..ماحنا قادرين نسيطر على بناتنا ابو علي جالس ويسمع وهو مب مصدق/معقوله مشعل يسوي كذا!! علي بحقد/بتجننووني وانتم تعاملونه معاملة شيخ!!!على اي اساس مدررري... ابو علي/بكره بروح وبشوف وش الموضوع.. علي ودمه يغلي/هييين يا مشيعل.. / / / / صباح اليوم الثاني; اجتماع الكل ما عدا مشعل ...!! كل رجال القريه مجتمعين بقصر الشيخ وكلن يتكلم من عنده... الشيخ بو مشعل ساكت ويسمع كلامهم وشكاويهم وهو معصب من سوات ولده!! بو علي/اشوفك ساكت يابو مشعل. !! بو مشعل/انتم ماخليتوا مجال للحكي... بو مشبب من اعيان الديره/يا بو مشعل سوات بنتك غريبه..واللي سواه الشيخ مشعل غريب..ومب في عاداتنا.نخاف بكره البنات بيسوون سوات ساره،ويعصون كلامنا!! بو مشعل ما علق/.... علي بحقد دفين/اسمح لي يا عمي اللي مايقدر يضبط بنته ما يقدر يضبط عشيره ويحمي شرفها مشعل مب كفو مشعل من بعيد اطلق عيار ناري في الهواء/حدددك يا علي...كلمه ثانيه زياده،والرصاصه الثانيه براسك،لا جيت تكلم الرجال ثمن كلامك الكل وقف له/!!!! ابو مشعل ناظر ولده بفخر/... علي بلع ريقه من الخوف/ مشعل وهو عاقد حواجبه كعادته/شرف قبيلتي من شرفي وشرفي عندي بالدنيا كلها..وماني مستني قليل الناموس يحكم على شرفي بو علي/بس يا مشعل،يرضيك اللي سوته اختك!! مشعل بهدوء يعكس احترامه لعمه/اي نعم يرضيني... الكل عبس/!!!! مشعل رفع صوته علشان كل الحاضرين يسمعونه/تدرون ليه..؟!!..والا بس على عماكم تجون مع الولد ضد البنت!! علي خااف لا ينفضح/انا ماشي مشعل ألتفت عليه بنظرات ناريه/انتظر شوي يا علي...لا تترك مجالس الرجال وتمشي..والا انت منت كفو مجالس رجال علي ارتفع ضغطه/انت مالك شغل فيني ومشيختك ماتمشي علي،و ماني قاعد علشانك مشعل قاطعه و اشهر السلاح بوجهه/وقققف مكااانك.. علي اضطر يوقف وهو يحس بالإهانه/... بوعلي/يا مشعل هدي اعصابك..وانت يا علي اقعد لين نشوف وش تاليتها بو مشعل/تكلم يا مشعل وش عندك مشعل/ابشر..بتكلم يبه..وبضبط الوضع يا علي واول من بيضبط وضعه بهالقريه انت... علي/وش عندك يعني،انا رجال وما يعيبني شي مشعل صفق بيده/نشوف اذا كان يعيبك شي والا لا....يا شباااب تعالوا وجيبوا اللي معكم.. الشباب جو ونزلوا صناديق..مليانه زجاجات بنيه شفافه!! علي فتح عيونه ع الآخر،خاف من الفضيحه/... الكل صار يتساءل/وش هذي مشعل بحكمه/انا بسألكم سؤال واحد بس وجاوبوني بضميركم.،الفضيحه وين؟ "بنت رفضت الزواج من شخص ماتبيه!!..والا شاب مسلم من عايله محترمه يتاجر ويشرب خمور!!""والدليل عمّاله اعترفوا عليه وما يقدر ينكر هالشي.. علي نزل راسه من الفشيله/... الكل سكت!!! مشعل بنظره بانوراميه على الحاضرين/اشوف محد رفع سلاحه عليه،والا لأنه شاب وقفتوا بصفه!!" ونسيتوا عاره!! بو علي تفشششل/سود الله وجهك يا علي.... الكل بدأ يرفض تصرف علي، ويأيد مشعل/.. بو مشعل ارتاح من تصرف ولده الحكيم،اللي طلعه من ورطه،كانت بتلطخ سمعته على حد تفكيره/.. مشعل/علشان تعرفون دوم توزنون الأمور حبوا لغيركم ماتحبون لأنفسكم،بناتكم هديه من الله لاتقهرونهم،لا تضغطون عليهم بعادات ما انزل الله بها من سلطان،عادات تنصف الولد وتهضم حق البنت!!حرام عليكم..وراكم رب راح يحاسبكم. بو مشبب من اعيان القريه/انا اطالب بمعاقبة علي مشعل بيختبرهم/وليه ما نسلمه للشرطه لانه مروج بكره عيالكم كلكم يسوون سواته او يشترون منه!! الكل استغرب... علي/تبي تتخلص مني يا ولد عمي مشعل ناظره بإحتقار/مالي ولد عم مروج .. بو مشعل،تكلم/اسمعوا يالربع....انا لي شور. علي لازم يترك الديره..ولا عاد نشوفه بعد هاللي سواه،قبل ينتشر خبره .. بو علي عقد حواجبه وكأنه ماعجبه هالكلام/بس ياخوي بو مشعل/محد بيعارض كلامي الا اللي يأييد فعلت علي الشينه.. مشعل/مع الأسف يبه اقتراحك تأخر يالغالي..لأن رجال الشرطه عند الباب وبياخذونه،اللي كشف علي بلغ الشرطه قبل لا ندري وحققوا مع العمال بعد..وبالنسبه لي اسمحلي يبهانت على عيني وراسي.. وانتم بعد اسمحولي ياجماعه انا ما اتستر على مجرمين ومروجين علي عصب ونسى نفسه/اقسم اني لا انتقم منك يا مشيعل مشعل التفت لـ عزيز وناداه/يا عزيز تعال انت وصالح وطلعوا هالمجرم للشرطه تنتظره برا.. بو علي قرر يسكت... طلع علي وهو على اعصابه وشياطين العالم تنقر براسه/فكني انت وياااه عزيز مسكه بقوه يبي ينتقم/اقوول اسسسكت بس وقدااامي مشعل انبسط انه انصف اخته وتمنى لو يمحي عادات اهله السيئه ويساهم بأنه ينشر العدل بدل الظلم اللي يشوفه / / / / وقت العصر;; الجو المتكهرب،يفرض نفسه ببيت الشيخ.. وام مشعل على اعصابها.. وتنتظر كيف راح تنحل الأمور في اجتماع العشيره.. زينه جابت القهوه وجلست/تقهووا ام مشعل بتوتر/صبي لي فنجال راسي مصدع زينه/ابشري يمه ساره جالسه وامها عندها وتضمها/يمه تهقين بينتقم مني علي.. ام مشعل/يخسي الا هو...مايقدر ومشعل اخوك موجود ساره/حبيبي يا خوي،فدديت روحه ام مشعل بخوف/بس الله يستر من ابوك دخل بهاللحظات ابو مشعل وتحنحن/يا عرب زينه راحت تستقبله بابتسامتها/هلا بالغااالي بومشعل/هلا بالزين كله زينه ابتسمت ببرائتها/تعال يبه اذوقك قهوتي بو مشعل مسح على راسها/اكيد زينه مثلك زينه/فدديتك ام مشعل راحت واستقبلته/يا هلا بو مشعل/السلام عليكم ام مشعل/وعليكم السلام يا شيخ بو مشعل بصوت مقتضب/وين ساره ساره اقبلت من بعيد/هلا يبه.. بو مشعل خزها بطرف عينه وكأنه بيذبحها بسكات/.. ساره من خوفها جات مسرعه وحبت راس ابوها ويده/شـ شلونك يبه بومشعل وهو يسحب يده منها/خليك ثاني مره تعيدين اللي سويتيه وتهربين..ساعتها ما راح ينفعك تدخل اخوك ..راح اذبحك بيدي هذي.. ساره بلعة ريقها من الخوف ونزلت راسها وعيونها بالأرض/.. بو مشعل/كل هذا بفضل اخوك،فضح ولد عمه قدام اهل القريه علشان يحميك..وما ننفضح..ولو ما سوى كذا كان أنا ذبحتك بنفسي وما استنيت ولا لحظه،يلا انقلعي من وجهي زينه حززنت على اختها،بس ماتقدر تعارض ابوها/.. ساره نزلت دموعها بإنكسار،وراحت لغرفتها مسرعه/... زينه راحت تلحق اختها /… . ام مشعل تبي تحاول تهديه/تعال اشرب فنجان قهوه يا شيخ بو مشعل جلس/صبيلي.....بناات اخر زمن ام مشعل صبت له فنجان ومدته له/سم بو مشعل/سم الله عدوك...الا ماقلتيلي ..وين اخوك مصلح ام مشعل/مصلح اليوم في جده..عنده مراجعه بالمستشفى وراح لولده هناك.. بو مشعل/بكلمه اربه يزور اخوي ماجد ويطمني عنه له. سنين ما زارنا!!! ام مشعل/كلمه وقله وش اللي تبي منه بو مشعل/طييب هاتي جوالي..انا حاطه بالشاحن من الصبح. ام مشعل قامت وراحت تجيب الجوال/... / / / / **في مدينة "جــده" غرب السعوديه...، بو مصلح ومصلح راجعين البيت من المستشفى ..بعدما قابله الدكتور وكشف ع حالته.. وطمنه.. جلسوا بالصاله الاب وابنه.. مصلح/هاه يبه عساك بخير بو مصلح بصوته المجهد/والله يبوك هه هه..لكن الحمدلله مصلح/الله يخليك لنا يبه... بو مصلح/الا وانا ابوك بسألك مصلح/سم يبه بو مصلح/ابسألك وش اخبار ماجد بن عبدالرحمن..سألت عن الرجال مثلما قلت لك،هالرجال كان يجينا كل فتره واللحين له 8سنين ما زار الديره اختفى مره وحده!! اقبلت سلمى زوجة مصلح ومعها القهوه/بشر يا عم كيف صحتك بو مصلح ببتسامه/بخير يا بنتي الحمدلله سلمى/عساه دوم.. بو مصلح/هاه يا مصلح ماقلت لي اخبار ماجد بن عبدالرحمن مصلح تردد وكأنه مايبي يقوله/بخير يا يبه بخير.. بو مصلح/وعياله اللحين كم؟...االرجال له مده منقطع عن الديره.. سلمى/ههههههه اي عيال يا عمي..ماعنده غير بنت وحده وولد صغير تووه بزرر مصلح بصراحه/والرجال مستغني عن اهله وما عاد يبي يرجع هذا اللي فهمته بو مصلح ماعجبه الرد/شلون يستغني عن اهله!!..الواحد بلا عزوه ما يسوى...بس هو من تزوج من برا القبيله وانا كنت عارف انه بيجيب العيد.. سلمى بمكر/اجل وش بتقول لو تشوف بنته.. مصلح ما يبي يقول بس معصب/البنت يبه...ماخذه حريتها ع الكامل...وتسرح وتمرح بدون حسيب ورقيب.. وسلمى شافتها في حفل تخرجها من الثانويه..قبل سنتين..بس ما بغينا نتكلم نحسب ان الشيخ عنده علم بو مصلح مو مصدق/يا ولد انت صادق؟!!! مصلح/وازيدك من الشعر بيت،عرفت انها ناويه تدرس طب في كندا..!! تبي تسافر لحالها بعد بدون محرم يعني بو مصلح استنكر هالشي/وشوو!!! سلمى/ايه يبه صحيح و سمعت انها بتروح بعد شهر. او شهرين مادري بالضبط. بو مصلح انصدم/ابوووك يا صبي!!!..ان دروا ربعنا عز الله اننا انفضحنا مصلح/احسن شي ما تتكلم يبه اسكت عنهم،هذول شيوخ بيحسبونك تقلل منهم بو مصلح/كيف يا ولدي..والرجال مأمن لي اجيب اخبار..وهو بنفسه قال يمكن يجي او يرسل احد من العوال يسأل..يعني حتى لو ماقلتله غيري بيقول وبكون ساعتها كذبت عليه،..يا ولدي هذي فضيحه بحق القريه و القبيله كلها مب بس لهم. مصلح/الله يستر.. / / / / / بالليل** مشعل مع صاحبه عمر..جالسين سهرانين فوق قمة الجبل اللي يطل على قريتهم..وعيونهم تراقب النجوم.. هالاثنين تربطهم صداقه قويه.. عمر لاحظ مشعل سرحان في النجوم وساكت/تناظر للنجوم وكأنك اول مرّه تشوفها مشعل ببتسامه هاديه/احسها توديني لعوالم ثانيه...هالنجوم هذي وهالسماء الواسعه تأكد لي ان الكون اكبر مني ومنك واكبر من مجموعة بشر يتحكمون في بعضهم ويحاربون بعضهم على اشياء تافهه!!. عمر متعجب/ايوه.. مشعل كمل/هالسماء بنجومها بالنسبه لي لوحه جماليه ماتقدر تغمض عيونك وتمشي و انت تتجاهلها.. عمر ببتسامه/الله الله ..وش هالشعر هههه مشعل ابتسم والتفت له/ماقلت لي وين صاحبنا ابراهيم اليوم ما شفناه عمر/اوهوووه ههههه نسييت اقولك..ابراهيم كلمني اليوم وقالي أنه جاله ولد...الرجال مبسوط اليوم ولقى اللي احسن مننا هههه مشعل تذكر جرحه القديم وابتسم ابتسامه باهته/ما شاء الله ..الله يسعده عمر لاحظ صدود مشعل واختفاء ابتسامته فجأه وقرر يتكلم/مشعل... مشعل التفت عليه وهو ساكت/... عمر/مضى وقت كافي....متى بتتزوج مايصير وانت الشيخ مشعل عقد حواجبه وفز واقف/عمرر..لا عاد اسمعك ثاني مره تكلمني عن الزواج او تجيب لي طاريه فااااهم عمر/بس يا مشعل.. مشعل قاطعه و مسكه من ياقة ثوبه/عُمرررر عمر استغرب هالتصرف من واحد عاقل مثل مشعل/اقتلني اذا هالشي بيحل لك مشكلتك اللي لها سنين منت قادر تواجهها ولا تتأقلم مثل العالم مشعل تركه ومشى..وهو يكتم ضيقته بداخله..! عمر انقهر على حال رفيق عمره/متى بيطيب جرحك يا مشعل متى؟!! / / / / يوم من الأيام...بعدما رجع ابو مصلح للديره قرر أنه يحكي كل اللي سمعه وشافه على خوه من اخبار.. *بمجلس الشيخ.. كان جالس ابو مشعل وعنده بو مشبب وبو مشهور وهذول من اعيان القريه..ومعهم بو علي اخوه..ومعهم بو مصلح، ويتحدثون بكل الأمور ... بو مصلح كان متردد أنه يتكلم،، ابو مشعل التفت على بو مصلح/هاه يابو مصلح..اشوفك ساكت وما تشاركنا السوالف،عسى ما شر مب من عوايدك هههه بو مصلح/هههه جالس اسمع علوم القريه بغيابي بو مشبب/هههه انت من بديت تروح وتجي لجده وانت متغير علينا الكل/هههههههه بو مشعل/الا على طاري جده،انت ماقلت لي وش جديد اخوي ماجد..شفته؟!!تكلمت معه!!عندك اخبار عنه بو مصلح تغير لون وجهه ونبرته/اي عندي اخبار عنه بو مشعل ببتسامه/ايوه تكلم وش علومه،كيف صار شغله بو مصلح/شغله ممتاز بسس علومه والله ماش،ما تسر،وتفشل بعد الكل صار مشدود!! بو مشعل بلع ريقه/… بو مشبب عقد حواجبه/ابووك يا صبي بو علي/الله يستر بو مشعل رفع حاجب ونزل الثاني وهو معصب/تكلم يا بو مصلح ولا تخفي عننا شي ماتعودنا نخبي شي عن بعضنا بو مصلح بدأ يسرد لهم كل الاخبار والكلام اللي عرفه...، خلص بو مصلح كلامه/وهذا كل شي... بو مشهور التفت على بو مشعل/هالمهزله لازم تتوقف قبل لا تصير بو مشبب/حن ماعندنا بنات يسافرن برا ويدرسن طب بعد!! بو علي/بكره تكون قصة بنت ماجد على كل لسان وننفضح بين القبايل والقرايا....وهالشي عمره ما صار، بو مشهور/يا بو مشعل انت اللحين الشيخ...والمفروض تغسل عار اخوك اللي تناساه والا تأمر ولدك مشعل يغسل عاركم..اللي بيشملنا كلنا... بو مشبب عقد حاجبيه/واذا ما تصرفتوا..ترى اي واحد من عيال هالقريه بيسوي اللي انتم ما تقدرون تسوونه.. بو مشعل وقف على حيله وهو متكي على عصاته المزخرفه بنقوش عثمانيه اسلاميه/لا تخافون،انا اللي بتصرف بس انتم لا تنشرون الخبر...راح امنع هالمهزله قبل لا تصير،. بو علي يبي يلمح/بس يا خووفي يصير معها مثلما صار مع ساره...وتتركونها بدون عقاب بو مشبب/هالاسبوع لازم تحدد موقفك يا بو مشعل لان هالموضوع ما يتعلق بكم وبس..يتعلق فينا كلنا وبسمعتنا.. بو مشعل سكت وهو مقهور من سوايا اخوه ماجد..،!! / / / / / / على الطرف الآخر ..،هناااك.. *جــــــده; جامعة الملك عبدالعزيز..*كلية الطب* بنت طموحه وانسانه جديّه وباين عليها الانضباط بدراستها، طالعه وهي تسرع بخطاويها وتثبت طرحتها على راسها بسرعه وتمسك بيدها اليسرى ملازمها وكتابين كبيرين.. سماتها وصفاتها *عربية الملامح*عيونها عسليه فاتحه طولها 169سم،و تبدو نحيفه.. رن جوالها ووقفت ترد وهي تلتقط انفاسها من التعب/هلا زياد.. زياد بالجوال/كيفك لوجين لوجين وهي تمسك ملازمها لا تطيح/الحمدلله بخير... زياد/اقول لوجين..اختي لمياء ماترد على جوالها ماشفتيها؟ لوجين/لمياء عندها محاضره علشان كذا ماترد عليك زياد/طيب شرايك امرك اوصلك دامني قريب من الجامعه، وبالمره تزورين خالتك وتتغدين معنا لوجين ببتسامه خجوله/لا لا تجي عمر مشكوور..بروح مع السايق سيارتي وصلت....انا خلصت و لسى طلعت من التشريح وقرفانه..برجع للبيت اريح شوي ..لان عندي محاضره المساء.... زياد جاه احباط/اووكي باي لوجين/باي زياد صوت من بعيد يناديها/لوجيييين لوجين وقفت وألتفتت ببتسامه/هلا روبي روبين وقفت عندها وهي تتنفس بسرعه من الركض/ياشييخه تعبت وانا اركض وراكِ لوجين ابتسمت وهي تنزل نظارات حفظ النظر/ايش فيكِ روبي،شكلك عندك حاچه مهمه روبين ابتسمت بسعاده وهي تلتقط انفاسها/ابشررك لوجين توترت/قووولي فرحيني روبين/قبلوني اروح ابتعااااث معك لوجين نطت من فرحتها وضمتها/وااااااووو يعني بتروحين معانا هههههههه مبروووك حبيبتي روبين/الله يبارك فيك مرّه مبسوطه هههههه راح اطلع انا وياكي لكندا ونكمل هناك لوجين بسعاده/الحمدلله،اللحين صرنا ثلاثه انا وانتي ولمياء ههههه روبين بحماس/ايوه وبنروح من بعد اجازة الكريسماس هههههه لوجين بدون تفكير/بهذي المناسبه لازم نحتفل هذا الاسبوع...ايش رايك روبين/اكيد ما راح نمررها بدون حفله..خصوصاً ان احنا مانطلع زي العالم.. كله من الطب هذا لوجين/هههههه ولا يهمك يلا مشينا انا تعبت من كتر المشي والوقوف... روبين/يلا علشان بالمره توصليني البيت ماحصلت سايق لوجين ببتسامه عريضه/اووكي... / / / / / **الجـنــوب.. قصر الشيخ بو مشعل… والوضع متأزم… بو مشعل يخز ولده بنظرات تطلع شرار/خلك رجال، ولا تفشلني مشعل وقف من الدهشه وهو يستنكر كلام ابوه/يبه فديتك..وش هالكلام اللي اسمعه منك ابو مشعل/هذا اللي لازم تسويه انت... مشعل صد بضيق/يعني مافي حل ثاني يبه غير الدم!! ابو مشعل بلا مبالاة/لا مافيه مشعل وهو يحاول يضبط اعصابه ويفهم ابوه/يبه ليش اول شي تفكرون فيه القتل!!!الدنيا مب فوضى يالغالي ابو مشعل/وشرفنا واسمنا مب فوضى يا ولدي علشان تلعب فيه نتفة بنت مشعل بعقلانيه/بس يبه هالسبب مب كافي للقتل انا مستحيل اقتل علشان هالسبب..هاللي انت تطلبه مني حرام ابو مشعل عقد حواجبه/اذا ماتبي تقتلها نجيبها هنا وبتتزوجها غصب مشعل وقف على حيله من طاري الزواج،ماعلق احتراماً لأبوه سكت وما رد/.. ابو مشعل/انت تحسب الدنيا متوقفه على زوجتك المتوفيه من سنين!! مشعل بضيق/لكن يبه فديتك،انا مابي اتزوج ابو مشعل بصرامه/انا خيرتك ..من هنا للصباح اذا منت موافق تتزوجها قول لي ...علشان اكلف واحد كفو غيرك يروح يقتلها بالمطار قبل تركب الطياره..أنت عارف اني لو اعطيهم امر ما قصروا ،هذولا ناس تخاف على سمعتها اكثر منك مشعل نزل راسه وهو مغبون من سيرة زوجته اللي توفت،ناظر ابوه/عن اذنك يبه انا طالع انام ،بس لا تنسى دواك بو مشعل/طيب لا تنسى تفكر باللي قلتلك مشعل هز راسه بالإيجاب وطلع/.... ابو مشعل وهو يرص بيده على العصا/ومن ناحيتي اتمنى انك ما توافق تتزوجها هاللي ما تربت...علشان نقتلها ونرتاح من مصيبتها..وعارها.. / / / / *** هذي عينه من بعض عقول المجتمع المتحجره والمتحيزه ضد المرأه...للأسف هناك فتيات تخلن عن احلامهن وطموحاتهن بسبب هذه العقليات !! تعدي العادات والتقاليد أشد علينا من انتهاك المحرمات... اصبحنا قوم نخاف من المخلوق اكثر من الخالق!!! ،، 
|
|
#2
March 3, 2015, 11:17 AM
|
||
|
|
||
|
رد: رواية من متى والغصن يختار الطيور؟ للكاتب شخصيه خياليه
/(الجـزء الثاني)/
لأن العادات والتقاليد العقيمه تحكمنا بشكل أو بآخر..هناك أناس كثيرون يعانون..بلا ذنب.. ولا سبب!! العقل المتحجر الذي يتملك رؤوس البعض هو أداة تدمير للسعاده..لاغير... / / *جــده* في مؤسسه تملّكها بعدما عمل سنوات طويله مع ابو زوجته وكان انسان طموح..ويكره قيود قبيلته التي منعته من الزواج بغير بنات عمه،،تزوج بأبنة رجل حجازي طيب وامين كان يعمل لديه،احبه مثل ولده لانه لم يكن لديه اولاد..بل فتاتين فقط...اختار لهم ازواج صالحين..مثل ماجد وعبدالكريم"ابو زياد" ماجد انجب "لوجين 20سنه و أحمد 5سنوات زوجة ماجد تحب الاطفال لكنها لا تنجب الا بعد محاولات علاج عديده..ومع احلامها ضاع العمر ولم تنجب سوى لوجين وأحمد الذي حملت به بعد سنين بعملية حقن مجهري..كانت كأي أم حنونه تحبهم وتخاف عليهم من نسمة الهوا... الاحداث السرديه; المؤسسه.. ماجد تلقى اتصال هاتفي بزحمة اتصالاته/الوه ابو مشعل على التلفون/السلام عليكم يا ماجد ماجد/وعليكم السلام..هلا..من معي ابو مشعل/معلوم بتنساني دامك نسيت اصلك ونسيت العادات والتقاليد!! ماجد بلع ريقه من الخوف/اخوي مشعل!!!هـ هلا مرحبا ابو مشعل/لا اهلا ولا مرحبا ماجد/افااا ..طيب ليش..وش مزعلك يالغالي ابو مشعل ما انتظر طويلا وتكلم بغضب مكبوت/انت صدق بنتك بتسافر كندا لحالها تدرس طب!! ماجد خاف/وشو!!.....لا...مع صديقاتها. ابو مشعل/يعني بدون محرم!! ماجد يعرف تفكير اخوه/يا بو مشعل انت عارف انو.... ابو مشعل قاطعه/ان ما منعت بنتك من السفر انا أأكد لك انك بتاخذها جثة هامده من المطار ... ماجد حس بالخوف من جد/انت ما تسويها يا خوي ابو مشعل بتهديد/اسويها ونص..فضيحتها يسولفون بها كل ربعنا والكل يغلي من ناره..ان راحت بنتك بتلقى من يوصلها لقبرها.. ماجد بترجي/لا وانا اخوك..بنتي مثل بنتك ابو مشعل/تخسي،بناتي مايسترجون يسوون سوات بنتك.. ماجد/يابو مشعل انا مقدر امنعها..وعدتها احقق امنيتها في دراسة الطب وين ما كان والبنت متفوقه وطموحه وتحب دراستها..ماظنتي بتقتنع لو امنعها ابو مشعل/انا بقولك طريقه تخليها ماتسافر...بس لك مهله اسبوع تنفذ اللي بقولك عليه...وان ماجيتني خلال هالاسبوع انت عااارف وش بيصير لبنتك.. ماجد وهو مضطر يخضع له وضايق صدره/قول لي كيف. ابومشعل/اسمعني زززين .... وبدأ يكلمه بالموضوع... / / / / الجنوب ..* دخلت زينه بلبسها البنجابي الأزرق و بحيويتها ولقافتها وصوت اساورها الملونه يتبعها وهي تمشي بسرعه.. راحت وترمي نفسها ع سرير اختها وتنغزها في كتفها بأصبعها السبابه/ساااره قوومي ساره بكسل استقعدت/خيير يا زينه شتبييين حفرتي كتفي يا بنت زينه وهي تحرك يدينها بشكل عفوي مع كلامها/انتي نااايمه وماتدرين وش صاير بالديره ساره/وش صاير بععد يا أم اسااور مزعجه ..مكثر سواليفك يالملقوفه زينه بووزت/الشرهه علي اللي ابي اعلمك بالاخبار والمستجدااات ساره استقعدت وهي تربط شعرها المنثور بربطه/تكلمي، وش عندك يا *ام زكي* زينه تربعت قدامها وتسولف بحماس/يقووولك فيه مصيييبه صايره ساره لوت بوزها/مافي جديد كل يوم مصيبه… زينه بحماس طفولي/الجديد ان هالمره بنت عمك ماجد هي الضحيه.. ساره/وشوو.. كيف وليش،وش وداهم لهم هناك زينه فتحت عيونها دلاله على مصيبه/يقوولك انها تبي تسافر برا تدرس طب لحااالهااا.. وابو مصلح علم ابوي في وسط الجماعه يعني السالفه صارت كبيره من بدايتها. عاد اهل القريه مخططين واتفقوا يقتلونها علشان سمعتنا،وابوك اووولهم ساره خافت/انتي من جدك بيقتلونها زينه/اللي يسمعك يقول توها تعرف عادات اهلها،ناسيه والا اذكرك!! ساره فزت من مكانها خايفه/امحق عادات.. الله يعين هالبنات بس زينه وهي خايفه من ردة فعلها/ساره تدرين ابوي ع الفطور وش قال عنك!! ساره وهي موجوعه من تصرفات ابوها تجاهها/وش قال زينه/حلف بالله انه يزوجك اوول واحد يخطبك و مين ما كان يكون. حتى لو ولد راعي على قولته. .! ساره زعلت لأن ابوها أرخصها لهالدرجه،انقهرت (لهالدرجه معاد يحبني ويبي يتخلص مني؟لييه يالغالي؟!) بس فرحت بنفس الوقت وهي تتذكر شيء ،ما كانت بيوم من الايام تتوقعه يصير،تذكرت دعواتها ودموعها[ ان ربي يخلصها من علي ويرزقها بقرب حبيبها اللي يجمعها به حب عذري عفيف وكلن يحب الثاني بالطاري،وصدفه شافها طالعه من عند اخته*سلمى* وكانت ساره بنقابها بعد!!.. كان حب نقي ومبني على الاعجاب بشخصية كل واحد بالطرف الثاني،حب مايعرف المكالمات واللقاءات السريّه!!في زمن فقد الحب معناه الحقيقي]، اتسعت ابتسامتها وهي تحس بالسعاده تغمرها.. زينه كانت تسولف وانتبهت ان اختها مب معها/هيييي شفيك تتبسمين لحالك ساره قامت تدور جوالها بسرعه/وينه ؟… قومي دوريه معي بسرعه.. كان هنا وين راح زينه/انتي تدورين ولد ضايع،وش تبيني ادور لك يالهبله ساره وهي تلفت تدوره/جوالي زينه خزّت ساره/انتي اكيد فيك شي،الجوال هذا هو ع الكومدينه ،وانتي تدورين كنك جراده عند عمود نور ساره/حسبي على تشبيهاتك انقلعي يالجراده انتي بكلم رفيقتي.. زينه وهي قايمه تستهزئ بها/الله اكبر يا سوالفك انتي و صديقتك مندوبة الاتحاد الاوربي للشرق الاوسط ساره وهي كاتمه ضحكتها اخذت الفازه يعنني برميها عليك/زوووينه انقلعي قبل ارتكب فيك جريمه زينه وهي تحرك يدينه حركات العجايز وهي تسولف/والله انتي ينخاف منك تسوينها،عقب ما قد حاولتي تهربين وترمين نفسك في تهامه ساره/زوووووووينااااااااه بررراااااا زينه هربت/يماااااااااااه ساره قامت وسكرت الباب وهي تضحك منها.. وراحت تتصل بـصاحبتها * سلمى* / / / / في حقول الذره... يتمشى *مشعل*ويشرف ع العمال،وباله وفكره مشغول بكلام ابوه ،عن الزواج بوحده غير زوجته المتوفيه..!! ويتذكر سبب وفاتها ويتحسر عليها.. تذكر يوم زواجه منها،يومها كان يحس بسعاده لا توصف، وهو يتذكر احاديثه معها،ابحرت به الذكريات للسنوات مضت..! *فلاش باك* اميره وهي واقفه عند التسريحه و تربط شعرها كانت لابسه فستان ناااعم وميك اب فخم ،عندهم مناسبه،التفتت عليه/مشعل كذا حلو؟ مشعل ببتسامه هاديه/روعه اميره وهي تمد بوزها/احس الفستان مو عاجبني مشعل/يكفي عاجبني عليك،يلا تأخرنا ع التمايم،ترى بتزعل اختي، اميره ابتسمت بحياء/ما قلت لي وش سموا ولد اختك الجديد مشعل/سموه سلطان اميره كشرت/مو حلوو مشعل/هههه ولدهم وهم حرين فيه،اذا جبتي لنا ولد نسميه بكيفنا اميره/ممم راح نسميه يزن مشعل ماعجبه الاسم/وش يعني؟!! اميره/مادري بس عاجبني،راح ادور لك معناه مشعل مسكها من خصرها بنعومه،ويجاريها/شووفي حبيبتي شراايك اذا اول واحد ولد بسميه أنا.. واذا بنت تسمينها انتي اميره/مممم موافقه… يلا قولي وش في بالك تسمي الولد.. لا تقول مافكرت مشعل/عاجبني اسم نايف،شرايك فيه؟ اميره اتسعت ابتسامتها/يجنن مشعل بمزح/يلا عاد شدي حيلك نبي نايف،والا ترى اتزوج اميره بلعة ريقها وماتدري ليش خافت/وانت تسويها فيني!! مشعل لاحظ صوتها تغير وكأنها صدقت ابتسم/حبيبتي انتي بالدنيا كلها،حطي يدك ورجلك بمويه بارده.. جبتي عيال والا ماجبتي لك وعد ما احط ع راسك زوجه ثانيه اميره فرررحت لان مشعل ماعمره اخلف وعده/اوكي يا بو نايف المنتظر،.مايندرى عنك.ياخووفي منكم يالرجال مشينا للناس تأخرنا.. مشعل/ههههه ، اقبل عمر من بعيد وهو يأشر له/مشـــعــل مشعل جلس على صخره مطله على الحقول وهو سرحان في ملكوت الله وصورة اميره ماتفارق عيونه..و ماسمع نداء عمر له/..... اقبل عمر وجلس جنبه/شبلاك ياخي اصقه ماتسمع اناديك مشعل انتبه لنفسه ولف عليه بهدوءه/ اعذرني والله ما سمعتك عمر/شبلاك،شكلك منت طبيعي.. مشعل سكت وصد بوجهه/.. عمر/يا رجال تكلم ،وش صااير مشعل بضيق/الوالد طلب مني اتزوج عمر انبسط/زززين انه طلبك تتزوج..والا انت منت ناوي مشعل خزه/عُمر عمر/ههههه طيب من تعيسة.. اقصدد سعيدة الحظ اللي بتخطبها مشعل/هالزواج مافيه خطبه.ولا ملكه ولا حتى نظره شرعيه..!! .الزواج هذا حكم اعدام واختاروني انا اللي انفذه. عمر استغرب/حكم اعدام!!!..في من مشعل تنفس/ابوي يبيني اتزوج بنت عمي ماجد عم استغرب/بنت عمك الطبيبه اللي يتكلمون عنها!! مشعل هز رأسه بالإيجاب وهو يناظر في الحقول قدامه/تصور!! عمر تضايق دام هالزواج بيتم لهالسبب/طيب انت وش راايك؟ مشعل/تعتقد بيخلي لي رأي في شي زي كذا.. عمر/يعني بتتزوجها! مشعل بقلّة حيله/لازم اتزوجها يا عُمر، مقدر اتسبب في قتل انسانه مالها ذنب.. عمر ابتسمم وفرح من قلبه/طيب خيره يا رجل ،عساه اللف مبرووووك،ماتدري يمكن ربي كاتب لك الاحسن مشعل ما رد،ظل ساكت وسرحان/... عمر تفهم وضع خويّه وسكت،بس مبسوط انه اخيرا بيتزوج وبيستقر بحياته/... / / / / *وقت مابعد العصر... ام مشعل راجعه من زياره.لأحد الجارات.. دخلت وهي تنادي/زززينههه زينه جات ركض وهي خاايفه وكأنها مخبيه شي/لبيه يمه ام مشعل/شفيك متروعه زينه/و..ولا شي ام مشعل/اخوك ما رجع زينه/لا ام مشعل/ووين اختك ما اشوفها زينه خاافت/سـ ساره بغرفتها ام مشعل نزلت عبايتها وجلست/خذي عباتي وديها لغرفتي و رووحي ناديها وتعالوا عندي ابيكم تجلسون معي لو شوي. زينه( الله يسسترر)يماا شرايك نروح هناك بالصاله هذيك ازين ام مشعل خزتها/لا. انا مرتاحه هنا.. روحي سوي اللي قلت لك بسرعه زينه/ان شاء الله يمه ام مشعل وهي مستغربه تصرفات زينه/ششفيها ذالبنت كنها مخبيه عني شي!! / / / الطابق الثاني… ، بغرفتها جالسه مع رفيقة عمرها°سلمى°..ويتبادلون السوالف والاخبار..ويبدو ان بينهم سرّ ..! ساره/ماني مصدقه يا سلمى اني رجعت وشفتك مره ثانيه سلمى ببتسامه هاديه/ولا أنا ...ماني مصدقه..يا بنت بغيت انهبل..ومو بس أنا...انتي عارفه ان فيه ناس ثانيه بغوا يموتون ساره استحت/سلمى خليني اروح اجيب لك حلى مسويته اليوم سلمى/اقوول اقعدي بس...اصلاً انا مستعجله..انا اليوم جايتك وبإلحاح من سالم..حب يتطمن عليك بعد اللي صار وجاب لك هالعلبه..بصراحه مادري وش فيها. انتي شوفيها بعدين.. ساره اخذت العلبه وقلبها يرجف شوق فتحتها وشافت فيها "إيشارب تركي اسود وعليه ورد" ابتسمت وماعلقت/.. سلمى لوت بوزها/والله مدري وش تالية هالحب الصامت بينكم..وانا صايره مرسول الحب...المشكله انتم ماعرفتوا بعض الا عن طريقي...وبالنظرات بس..اجل لو مكلمين بعض وش بتسوون هاااه ههههه ساره/هههه سلمى ماتسوى علينا هالمراسيل سلمى/ههههههه. انا طالعه تامرين على شي..اخاف تجي أمك اللحين وتغسل شراعي..ادري ماتطيقني ساره وهي مستحيه،لكن لازم تقول/سلمى.... سلمى التفتت عليها/وش عندك من رساله بعد.. ساره وهي تتبسم وخجلانه/ابوي حلف يمين ان اول واحد بيخطبني بيوافق عليه لو مين ما كان... سلمى ما صدقت/حتى لو كان مننا ساره هزت راسها بالإيجاب/قولي لأخوك اذا صدق حاب..لا يتأخر...بصراحه انا خايفه يتقدم غيره وانغبن. سلمى /طيرااان...بتشوفينه بكره عندكم...يلا سلام.. ساره/سلام... طلعت سلمى…. ساره ابتسمت بسعااده/يارب محد يسبقه..يارب ما خاب من دعاك سبحانك. ، اقبلت ام مشعل على غرفة ساره وهي معصبه/ساااااره.. ساره خافت وفزت لها/لبيه يمه ..شصاير ام مشعل/انا ماقلت لك بنت ال عبدالهادي هذي تبعدين عنها، ساره/هذي صاحبتي من الابتدائي يمه وجايه تطمن علي ام مشعل بغرور/كل شي وله حدود دراستكم وانتهت..هذول مب من ثوبنا،انتي بنت شيوخ وهم رعيان وفلاحين ساره ضاق صدرها من كلام امها وسكتت ماعلقت/... ام مشعل/تعالي تقهوي معي انتي واختك برا الجو مشمس وحلو ساره/ان شاء الله يمه.. راحت ام مشعل/… . اقبلت زينه/اسسفه تراني احاول اصصرفها من نص ساعه ساره ببتسامه/ ماعليك تعالي نروح لها قبل تعصب اكثر / / / / / **مدينة جــــدّه بالليل... جلستهم العائليه الدائمه بعد العشاء يشربون شاهي... ابو احمد ساكت وهو يفكر ببنته ومستقبلها وكيف بتكون ردة فعلها من اللي راح يسويه،.. ام احمد/لوجين صدق روبين بنت مروه بتروح معكم بعثه لوجين بسعاده وحماس/ايوه... ام احمد/ما شاء الله ربي يوفقكم لوجين/امييين بو احمد/لوجين حبيبتي لوجين/نعم يا بابا بو احمد وبقلبه غصه/متى بعثتكم لوجين/بعد نهاية اجازة الكريسمس بكندا بنكون هناك.. ام احمد/يعني شهرين تقريبا لوجين/ايوه تقريبا بو احمد بعد تردد/الاسبوع الجاي اجازه مني لكم..شرايكم نسافر ام احمد/فين بو احمد وصدره ضايق/اخوي ابو مشعل تعبان ومريض ويقولون حالته صعبه ام احمد خايفه لانها عارفه بماضي اهله معه/الله يشفيه لوجين مستغربه/بابا انتا عندك اخ!! ابو احمد ببتسامه/اي عندي اخوان واهل بعد،اجل كنتي تظنيني مقطوع من شجره لوجين/باااباا مو قصدي.. بس ليه ما سمعنا عنهم وما شفناهم قبل كذا بو احمد/صارت ظروف وكنت اروح لهم لحالي قبل وفاة أمي وانقطعت عنهم ..بس اللحين لازم نسافر ابها هالاسبوع كلنا علشان اشوف اخوي وانتم بعد لازم تروحون معي ،اهلي طالبين يشوفونكم ويتعرفون عليكم لوجين انبسطت وتحمست/يا سلام ابهاا..حلوو وانا بكون فاضيه وبس جالسه انتظر موعد السفر لدراستي.. ام احمد مب مطمنه،بس سكتت لان لوجين موجوده/... لوجين قامت/يلا عن اذنكم حابه انام بدري ابو احمد/اسهري معنا شوي يا بنتي،مو تقولين خلصتي لوجين/ايوا بس بروح بكرا علشان ارجع كتب اخذتها من الدكتوره وبالمره اسلم على صاحباتي. واودعهم.تصبحوا على خير الكل/وانتي من اهله.. راحت لوجين... ام احمد ألتفتت على ابو احمد/مااجد ايش صاير بالضبط ابو احمد ماحب يخوفها/ولا شي..ليش تسألين ام احمد/كيف فجأه بعد كل هالسنوات نسافر لأهلك ابو احمد/قلتلك..اخوي تعبان ولازم نروح له.. ام احمد/طيب ليش اشوفك منت على بعضك وتسرح كثير ابو احمد/ولا شي...انتي تبالغين..يلا خلينا نروح ننام احسن ام احمد/يلا مع اني احسك تحاول تغير الموضوع... ابو احمد ماعلق...ومشى لغرفته... / / / / / # صباح جنوبي جديد.. صحى مشعل بدري كعادته وتجهز بيتجه لعمله... ام مشعل شافته نازل لها/هلا بحبيبي مشعل حب على راسها/اهلين حبيبتي..فطوري جاهز والا امشي ورانا اليوم تحميل بضايع ام مشعل/فطورك جاهز يا ولدي بس اجلس على مهلك الشغل مب طاير مشعل/لازم انزل لابها يمه اروح بدري واشرف ع العمال هم من الفجر طالعين من مزارعنا...يعني يمديهم وصلوا.. جلسوا يفطرون... اقبل ابو مشعل وجلس/السلام عليكم الكل/وعليكم السلام مشعل تذكر كلام ابوه عن الزواج وتضايق... ابو مشعل/هاااه وش صار معك يا مشعل مشعل/الشغل ماشي تمام يبه لا تهتم انت ابو مشعل/انا ماقصدت الشغل.. انت عااارف وش اقصد لا تستعبط مشعل شرب كاس المويه وهو يحس بغصّه/انا موافق وتحت امرك يبه...اللي تبيه راح اسويه بس ليش شرط، لا تغصبون البنت..طلبتك يبه اذا ماتبيني لا تجبرونها. ابو مشعل ابتسم/لا تخاااف عمك يقول ان البنت مواافقه مشعل قام وهو يكبت غضبه/يلا اجل انا ماشي تامرون شي ابو مشعل/سلامتك...بس لا تتأخر الليله جايينا خطاب لاختك ساره..وبنخلي زواجكم بليله وحده. مشعل ما سأل من الخطاب من ضيقته/ماشي عن اذنكم.. طلع وهو مستعجل.. ام مشعل استغربت/من هم هالخطاب اللي يبون ساره ابو مشعل/ممدوح العبدالهادي جاي يخطبها لولده سالم ام مشعل كشرت/بس هذول مب من مواخيذنا..شلون يتجرأون يخطبون بنتنا!! ابو مشعل/انا قلت لك اني حلفت ازوج هالبنت اول واحد يطق الباب،وبس هذا قراري،هالبنت تستاهل الحقران. ام مشعل/بس انت عارف انهم ناس على قد حالهم..كذا بتبهذل بنتك بو مشعل/قلتلك تستااهل....وقفلي ع موضوع هالبنت..انا زوجتها من قبيلتها.. تحمد ربها اني ما زوجتها واحد من عمال المزرعه وخليته يسفرها معه لديرته ام مشعل بضيق/طيب ماقلت لي انت من ناوي تزوج مشعل؟ بو مشعل/بنت اخوي ماجد ام مشعل عفست وجهها وتكلمت باحتقار/بنت الحجازيه!!! بو مشعل/بنت الحجازيه هذي تصير بنت اخوي..احترمي نفسك وخليك بحالك ام مشعل/يا بومشعل هذول عمرهم ما عاشوا هنا ولا يعرفون طبايعنا..بعدين انا مابي ازوج ولدي من برا الديره وحده ماتعرف التقاليد ولا سلوم العرب ابو مشعل بصرامه/اللي صار صار..لازم تتقبلين الوضع...فضيحة بنت ماجد قدام الشيوخ فرضت علي هالشي يعني بتتزوج مشعل وبتقعد هنا طول عمرها..مانبي بكره العالم تفتح فمها علينا بكلمه... ام مشعل لوت بوزها/وش هالبنت اللي نكدت علينا من قبل لا نشوفها بو مشعل/صبي لي كاسة شاي بسرعه خليني اعدل مزاجي ام مشعل/ابشر.. / / / مشعل في طريقه لعمله كان متضايق،وشايل هم هالزواج.. واشياء كثيره مضيقه صدره،وشايلها وساكت.. تذكر وحده ممكن انها تطلعه من ضيقته،ابتسم وهو يطلع جواله ويطلّع أسم(الكادي)ويدق عليها بدون تردد وينتظر ردها/.. ع الطرف الثاني بالجوال صوت باين فيه نعاس/ألوه مشعل/السلام عليكم. الكادي وتحاول تصحصح/وعليكم السلام.. شفيك يا ولد شايفني بمنامك، مشعل/ههههه صباح الخير، الكادي/صباح النور ياخي ما تراعي فروق التوقيت،مصحيني تالي الليل!! الساعه12 نص الليل عندنا شتبي مني في "تيه" الوقت مشعل/ههههه مافيك فايده لو نوديك كندا 100سنه ماتغير نبرتك الكادي بدت تصحصح/ذهب اصلي يا حبيبي.. ذهب مشعل/هههه اي والله ذهب لبى قلبش الكادي/فددديت الوشوشه أنااااا.. والله انك احسن من عزيز هالقاطع هذا .. مشعل/عزيز هالايام مشغول.. بس بذكره فيك الكادي/طيب انا قول يا ولد شعندك انت.. فضفض لي يا الحبيب،مصحيني من عز نومي مشعل وهو يحس بسعاده بصوتها/مادري بس شكلي بهاجر واسكن معك.. تستقبلين زوار؟!! الكادي بإستهبال/شووف انا استقبل زوار يومين ثلاثه بس مهاجرين لا يا حبيبي انسسسسى مشعل يجاريها/أفاا.. هذا وانتي جنوبيه!! الكادي/في نقطة الكرم تغيرت هههههههه مشعل/ههههههه الكادي/صدق مشعل.. قولي وش صاير لك يا روح كادي، صوتك اول ما اتصلت ما عجبني مشعل تردد وبعدها قرر يقول لها/…… / / / جــــده* طالعه من الجامعه بخيويه ونشاط واحساس بالسعاده بعدما خلصت كل شي.. لمياء وهي تنتاظرها/لولو حبيبتي شرايك نطلع هالاسبوع لأبحر .. لوجين بسعاده/ما فيني.. لمياء/ليش،انتي حاليا باجازه لوجين/هالاسبوع طالعه لأبها مع اهلي لمياء/من جدك!!!...ياليت اقدر اروح معكم لوجين/ههههه احنا رايحين نزور اهل أبوي،عمو تعبان وابوي قال لازم نزوره لمياء/ الله يشفيه...طيب كم بتقعدون هناك لوجين/اسبوع او اسبوع ونص بالكثير وراجعين.. لمياء/ههههه اجل راحت على زياد،المسكين كان ناوي يخطبك رسمي هالاسبوع لوجين انحرجت/اخوك هذا مستعجل بدري علي ههههههههه لمياء/تدرين ان الكل عارف ان بين امك وامي خطبه شفهيه ..وهو أصرّ على رحلة ابحر ونحتفل هناك بالملكه وهي فكرته..والله رحمته هههههه لوجين حبت فكرته/ياعمرررري زيزوو..لمووش بسك تريقه لمياء/كلما اتخيل ردة فعله كيف بتصير غصب اضحك هههه لوجين،سكتت لأنها فعلاً انحرجت،لكن حتى لو انها تستلطف زياد.ماتفكر بالزواج اللحين/بااايخهه، بعدين وش طرا عليه الملكه هالوقت الضيق،ورانا دراسه لمياء/الظاهر يبي ياخذ راحته معك الأخ لوجين رفعت حاجب ونزلت الثاني/يحمد ربه اني ارد على رقم تلفونه هالمزعج، الظاهر شكله يبيني اسويله حظر لمياء/هههههههههه الله يعينك يا زياد. / / / / في مؤسسة ابو زياد… رجل في الستين من عمره لكن ما بين عليه العمر!.. جسمه صحي ووجهه بشوش ومبين جنتل مان،كان جالس وينهي اوراق عمله في صمت،ومنزل راسه للورق ونظاراته على طرف أنفه.. زياد جالسه عنده من ربع ساعه وقرر يقطع هالصمت رهيب/ابوي. ابو زياد/نعم.. زياد لك ربع ساعه جالس وساكت.. روح شف شغلك،مو وقت راحه زياد/ابوي اسمعني .. ابو زياد وهو مازال مشغول بالاوراق/تكلم بسرعه وراي شغل زياد بدون مقدمات/ابوي متى ناوي تخطب لي؟! ابو زياد رفع راسه وناظره بنص عين/انت ماطلبت اخطبلك زياد/هذا انا اطلبك اللحين.. ابو زياد ابتسم/اجل الليله اكلم أمك تدور لك على العروس زياد/مايحتاج ..العروس موجوده.. لوجين بنت خالتي ابو زياد اتسعت ابتسامته/زين ما اخترت.. بنت طيبه ومؤدبه واهلها ناس طيبين.. زياد/افهم من كلامك انك موافق.. ابو زياد/ههههه ايوه.. ويلا قوم كمل شغلك،وانت مبسوط بعد مايرجعوا من ابها نروح ونخطبها لك.. زياد قام وهو مبسوط وطبع قبله على راس ابوه/الله يخليك لي يالغالي.. يلا انا طالع بو زياد ببتسامه/هيا رووح.. / / / / / **بعد اسبوع ع الأحداث السابقه**  المكان:أبها .. طلعوا من المطار بعد وصول رحلتهم.. القادمه من جدّه... ركبوا سياره كانت تنتظرهم عند المطار.... لوجين وهي تشوف المطر والغيم/وااااو يا حلات الجو هنا.. ابو احمد/انا هنا ولدت و تربيت، فصل الصيف في ابها هو موسم المطر،يعني تقدرون تقولون اسبوعيا ماطره، ام احمد/فعلا ابها بهيه.. لوجين بحماس/ياليت لو نجي هنا دوم ابو احمد عوره قلبه عليها،ماعلّق/.. احمد/ماما..برررد ام احمد/لوجين اعطي اخوكِ الجاكيت لوجين لبسته الجاكيت/ها كذا حلو ميدو احمد هز راسه/ايوه.. ام احمد/فين قرية اهلك يا ماجد ابو احمد/قريبه من ابها..ما راح نطول بالطريق،بس احسبوا حسابكم تراها ابرد واعلى من ابها ام احمد/الحمدلله ماخذين حسابنا لوجين وهي مستغربه/بابا هذي من سيارته ابو احمد/اخوي بو مشعل مرسلها تستقبلنا مع السايق بس صرفته. علشان تاخذون راحتكم. ام احمد بخاطرها(الله يستر).. ** * . بالقريه الاستعدادات على قدم وساق...تجهيز مكان ساحة الاحتفال الذي ستقام فيها الرقصات الشعبيه للمنطقه امام قصر الشيخ. ..بوجود صفوف العرضه الجنوبيه..واصوات الزير.. في مقدمة المستقبلين ابو مشعل وابو علي...اخوان ماجد.. اقبلت اليوكن سيارة ماجد واهله.. لوجين وام احمد كانوا مبهورين بالمكان والطبيعه وطريقة الاستقبال.. لوجين/رووعه يا بابا،كل هذا ترحيب!! ابو احمد ماعلق من ضيقته/... نزل ابو احمد ودخلت السياره داخل علشان تنزل ام احمد ولوجين واحمد.... / *بالداخل عند الحريم; كانوا ام مشعل وساره وخواتها منيره و زينه بالاستقبال..، نزلوا من السياره'' لوجين تتلفت ببتسامه ومتعجبه من المكان/تصدقين يا أمي المكان مرره يجنن ام احمد/ايوه يا حبيبتي،مرّه حلو لوجين مسكت يد احمد/تعال حبيبي لا تروح بعيد احمد فرح بشوفة اولاد كبره كثير/لولو خليني العب مع الاولاد لوجين تركته وراح.. **عند الباب الداخلي ..كانت واقفه ام مشعل مكشره ،انسانه متغطرسه لأبعد الحدود.. ومعها ساره ومنيره وزينه وهالبنات عكسها/اهلا وسهل نورتوناا ام احمد كانت تلبس عبايه ومتستره كعادتها /السلام عليكم.. الكل/وعليكم السلام.. لوجين عباية كتف ساده واسعه بحيث ماتبين اي تضاريس لجسمها وشيله كبيره تغطي راسها ومتلثمه بطرفها بحكم كثرة الرجال براا ..كانت تناظر المكان بنظره بانوراميه،وبعدين ناظرتهم وشافتهم يحدقون فيها،ونزلت الثام اللي كانت ماسكته بيدها/مساء الخير الكل/مساء النور ساره ببتسامه/هاتوا عباياتكم وتفضلوا جوا ام احمد فصخت عبايتها الواسعه..كانت لابسه بلوزه طوويله للركبه وواسعه مشجره غامقه..ولينقز اسود..وشعرها مرفوع بربطه/تفضلي يا حبيبتي البنات استغربوا لبسها بعد هالعبايه الساتره،بس استانسوا عليها/.. ام مشعل تطالع فيهم بنص عين وهي ناااقده بسكااات/… زينه ببتسامه طفوليه/هاتي عنك عبايتك يا لوجين لوجين فصخت عبايتها ومدتها عليها/تفضلي.. لبس لوجين فستان تركي قصير لتحت الركبه نااعم لونه أحمر. .مع صندل اسود و اكسسوار اسود سيمبل حول عنقها وفاكه شعرها اللي يوص لنص ظهرها بشكل مموج من تحت حلو.. وروج بناتي وكحل داخلي.. البنات اعجبتهم كشختها الناعمه/!!! ساره تهمس لأختها/شوفي الناس الكشخه حتى في البساطه.. مو حن لابسات كلنا جلابيات وكأننا مذيعات في القناة الأولى رايحات الجنادريه!! منيره تحاول ماتضحك/ساره اشش ساره/الله لنا.. ام مشعل لوت بوزها وهي تشوف لبس لوجين و تقول بخاطرها(اللحين هذي اللي بيتزوجها ولدي..امحححق بنت...!!) ساره/حياكم الله تفضلوا جوا...زارتنا البركه... الكل دخل... / / بمجلس الرجال.. التراحيب والقصايد.وأجواء إحتفاليه "رجاليه".وحضور الكثير..علشان يشهدون خطبة مشعل ببنت عمه لوجين اللي الكل تكلم فيها وسبها (لمجرد انها حبت تسافر تكمل دراسة الطب برا)... الكل بارك الخطبه وفرحوا لمشعل اللي الكل ينتظر زواجه وذريته اللي تأخرت.. وصاحبة الشأن ماعندها علم باللي يخططون له..وياغافلين لكم الله!! ابو مشعل ألتفت على مشعل بجنبه/وين الرشاش مشعل بضيق/بغرفتي ابو مشعل خزه/الله يصلحك..قم جيبه واطلق كم رصاصه بهالمناسبه...انت المعرس مشعل يكره هالعاده/يبه ماله داااعي..وممنوع بعد ابو مشعل/لا صار اللي يرمي الشيخ محد بيقول شي يلا قم لا تفشلني قدام الجمااعه مشعل قام ودخل البيت يجيب السلاح وهو مب راضي ع هالعاده اللي توفى بسببها خويه سعد في زواجه.. / / ام احمد التفتت على لوجين/لولو حبيبتي فين اخوكِ لوجين/اكيد يلعب مع البزوره ام احمد/يا بنتي قوومي جيبي لي اخوكِ ..لا يضيع في هذي الجبال والمزارع.. لوجين/حااضر بروح اجيبه بس لا تخافي.. ساره/تبين شي يا لوجين لوجين/لأه..رايحه شوي وراجعه خليكي انتي طلعت لوجين.. زينه لفت على جنبها بلقافه تهمس لساره/يازين حكيهم هههه ساره/اسسكتي لا تفضحينا.. طلعت لوجين بهاللحظات..بالصاله الخارجيه اللي دخلوا منها وهي تتلفت/فين راح هدا يالله..ميدووو يا ميدوو وقفت تطل من الباب وشافته بالحوش ونادته..ووقفت تنتظره.. بهاللحظات نزل مشعل مستعجل ووقف بنص الدرج،متفاجأ بالبنت ولبسها اللي ماتعود يشوفه،*هي ما انتبهت له* ..وقف يناظرها وماقدر يبعد عيونه عنها،وهي تحرك شعرها بيديها..تعوذ من ابليس وصد عنها.. دخل أحمد بهاللحظات وكان معصب/لوجيييين خليني العب معااهم شوويا مشعل عرف انها الزوجه المستقبليه والتفت يكمل شوفته! لوجين/طيب حبيبي بس اللحين روح لماما وطمنها واستاذن منها علشان ماتقلق عليك..اوكي احمد/طيب.. لوجين لفت تبي تدخل وشافت الرجال صاحب العيون الحاده واقف بنص الدرج كاشخ ولا ولاف الشماغ بطريقه حلوه من فوق العقال.ولابس مجند محشي رصاص ومعه سلاح ويناظر فيها،بنظرات ماقدرت تفسرها،تجمدت من الحركه وتذكرت نفسها استحت وغطت وجهها بيدها وهربت لداخل بسرعه تلحق اخوها/ميدوو لحظه دخلت داخل وهي تتساءل/يوووه مين هذا؟!! احمد ببرائه/هذا مشعل ابن عمي فيصل...انا شفته قبل شوي وسلم علي برا .. لوجين وهي محتاره من نظراته،وتتذكر شكله ولبسه!! /اوكي حبيبي ميدو تعال وصلنا الماما. / / / / مشعل طلع برا ومباشره بدون ما ينتظر احد يقوله رفع سلاحه للسماء وبدأ مهرجان الرمي،!!! عمر استغرب حركته و من بعيد يأشر له يهدي... مشعل نزل السلاح والتفت لعزيز اللي واقف جنبه ومد عليه الرشاش/عزيز خذه عزيز اخذه وهو مبسوط من ابتسامة مشعل اللي الكل يستغربها.. لندرتها!! ابو مشعل التفت على ماجد بجانبه/هااه يا ماجد ان شاء الله الامور تمام ماجد وهو مب معجبه الوضع/نقول ان شاء الله.. بومشعل/ترى مانبي مشاااكل وفضايح...ترى مشعل فاهم ان البنت،موافقه على الزواج منه، وع هالاساس اقنعته..مابي شوشره ماجد انقهر من هالكلام *محسسه ان بنته امورته بايره* بس ما بيده حيله،وده ينقذ بنته من موت محقق/لا تخاف ..ماراح يصير شوشره..بس ياليت ماتسوون عرس..خلوه سكيتي احسن بومشعل استنكر هالطلب/افااا يا ذالعلم..شييخ ولد،شيوخ ويتزوج سكيتي!!!..تحسبنا مثل انسابك !! ماجد يكره النظره التعصبيه عند اهل قبيلته وبالذات اخوه/فيصل طلبتك..لا تغلط على انسابي عايله معروفه فيهم خير وبركه. بومشعل بنبرة إزدراء/ايه طيب ..قفل ع هالموضوع والتفت للرجال اللي جايين يرحبون بك. ماجد كبت عصبيته وقرر يقعد يجامل...لين انتهى الاستقبال/.. / / / / /
|
|
#3
March 3, 2015, 11:18 AM
|
||
|
|
||
|
رد: رواية من متى والغصن يختار الطيور؟ للكاتب شخصيه خياليه
الليل..
**داخل عند البنات... بغرفة ساره.. لوجين وساره انبسطوا مع بعض من أول لقاء..وضلوا يسولفون..ولوجين تتفرج باغراض ساره وهداياها..وتجهيزات العرس/كل هذا علشان جوازك..لا يكون نسيتي شي هههه ساره بسعاده/ههههه ايوه باقي اشياء بسيطه..وبكره نازله ابها علشان اشتريها.. لوجين/ربنا يسعدك يا ساره ساره/امييين يا رب...لولو. .شرايك تروحين معاي للسوق بكرا مبين عندك ذوق لوجين/ههههه عن جد!!.. اوكي مو مشكله نروح للسوق ..انا جايه هنا علشان اتفرج ع المنطقه..لان كلها اسبوع وراجعه ساره بهمس/ماظنتي لوجين/الا بسألك..احكي لي عن خطيبك المصون ..واضح من اهتمامك انك تعزينه ساره انحررجت/يوووووه لوجين/مالي شغل..احكيلي كل الحكايه ساره قامت وسكرت باب غرفتها/اشش اسكتي لا يسمعك اخووي ويقتلني لوجين عدلت جلستها/يقتل مين يماما.ايش افلام الهنود اللي براسك.ههههه بعدين زواجك هذا الاسبوع...هيا احكيلي بسورعه ساره/اووكي ..اسمعيني..بس ياويلك ان ضحكتي لوجين/ههههه ليه هي نكته والا قصة حب!!..تكلمي بسررعه يا بنت ساره/طيييب... وبدأت تسرد قصتها....وهي مررره مبسووطه.. لوجين تسمع وهي كاتمه ضحكتها.. ساره بعدما انتهت من القصه/لووجيييين ليش تضحكين لوجين/هههه اللحين انتم ماعمركم حكيتوا مع بعض..ومع هذا تحبون بعض!! احسها قصه مألفتها شهرزاد هههه ساره بحالميه/حبنا عفيف لوجين/ما اختلفنا بس كيف ا...يعني اقصد لازم تعرفين تفكيره ويعرف تفكيرك... ساره/بنظرك هذا هو الحب لوجين/شوفي حبيبتي ساره انا ما أؤمن كثير بالحب لكن احب التوافق الفكري بيني وبين اللي بتزوجه..يعني تكون نقاط الالتقاء اكثر من الاختلاف..وبعدين الحب والزواج مسأله مب في حساباتي حالياً.. ساره وكأنها ماتدري/طيب ليش لوجين بحالميه/انا انسانه طموحه..احلم اكون جرّاحه من وأنا صغيره وبابا حبيبي خلاني اقتنع اكثر بالفكره...كان حاب يشوفني طبيبه،وشجعني..ودخلني مدارس اجنبيه يعني دراستي انجليزيه..علشان اتعود ع اللغه وكذا. ساره مبهوره/وقدرتي تفوقين بالمدارس الاجنبيه ماشاء الله عليك لوجين عجبها تفاعلها/الحمدلله مالقيت اي صعوبه بدراستي كملت سنتين حلوين في كلية الطب بجامعة الملك عبدلةالعزيز...فتحوا باب الابتعاث ورشحوني دكاترتي و حاليا عندي بعثه بعد فتره راح اتخصص في كندا ساره وهي متحسفه ع تعب هالسنوات/انتي روعه يالوجين لوجين ابتسمت والتفتت على الشباك وتسمع صوت/شكلها تمطر ساره/ايوه.. لوجين اتجهت للنافذه وفتحتها/اححح برررد هههه ساره/ههههه تووك مابعد شفتي شي لوجين بسعاده/احب الشتاء ساره/انا احب الصيف ..ذبحنا البرد في هالمنطقه لوجين/هههههههه دخلت زينه/هاااي ساره/جونا البزرااان زينه بوزت بدلع/وانا اللي قلت بجي استانس عندكم لوجين ببتسامه/ تعاالي يا زينه ماعليك منه تمزح زينه/تسلملي بنت عمي العسووله مب اختي الدفشه ساره/ههههه / / / / / / اليوم الثاني... عزيز واقف عند السياره وينتظر مشعل يطلع..سرح شوي وهو مقهور لانه من زمان ما شاف زينه صديقة طفولته ولا سمعها،اخته تزوجت وتركته وحيد في ملحق القصر لحاله وسافرت لكندا مع زوجها طالب موهوب،لكن ما باليد حيله من هالوحده ،ابتسم ابتسامه خفيفه تكتم حسرات قلبه، مشعل وصل/السلام عليكم كيفك عزيز عزيز/وعليكم السلام هلابك شيخنا مشعل خزه/كم مره قلت لك ما تناديني شيخ...انت اخوي متى بتفهم عزيز ببتسامه/ههه تعودت مشعل وقف قدام السياره/خلني اتصل بـ عُمر للحين ما وصل الاخ.. لحظات وشاف البنات نازلات ويسولفون..وشكلهم مبسوطات. ساره/السلام عليكم.. مشعل وعينه تدور لوجين/وعليكم السلام لوجين قررت تسوي مثل ساره وتتنقب افضل ،استحت من مشعل بعدما شافها البارح بدون عبايه وحجاب/صباح الخير مشعل وعينه بعينها ويكلم ساره/صباح النور..ها ساره ع وين ساره وهي ملاحظه نظراته للوجين/على السوق...تعرف ما عاد معي وقت كثير.. مشعل فهمها/الله معك لوجين مشت مستعجله للسياره..وهي محتاره وخايفه من نظراته لها/... ساره راحت/عن اذنك.. مشعل كلم عُمر و سكر جواله واتجه لسيارته وركبها وباله مشغوول/.. عزيز لاحظ تصرفاته/كأن بعض العرب سرحااان مشعل ابتسم بثقل وسكر باب السياره/.. عزيز/ههههههههه مشعل تذكر شي والتفت على عزيز/متى آخر مره دقيت على اختك؟ عزيز،حاول يتذكر/والله مدري تصدق مشعل رفع حاجب وخزه/مالك حق اختك الكبيره،مالها غناة عنك،كلمها الساعه6 او 7المغرب بيكون الوقت عندهم مناسب. عزيز/امرني مشعل التفت عليه/شوف يا عزيز مابيك تشيل علي وانا انصحك، انت بالنسبه لي اخ ما ولدته أمي،افديك بروحي لو لزمك شي عزيز يحترم مشعل ويعتبره مثله الاعلى وهو اللي رباه/لا تقول هالكلام،انا ما زعلت ووالله اني افديك بروحي يا مشعل. مشعل ابتسم برضا/اجل يلا مشينا تأخرنا ع العما عزيز بادله الابتسامه/ابشرر / / / / في غرفتها واقفه أم احمد عند المرايه وتثبت الشيله قبل تطلع تتقهوى مع ام مشعل .. تذكرت شي والتفتت عليه/ماجد.. بو احمد جالس ع طرف السرير ويثبت الكبكات/نعم ام احمد شكت بشيء راحت وجلست عنده/انت فيك شي؟! بو احمد تردد/...لا...ليش تسألين ام احمد/بالعاده ماتقولي نعم إلا تكون متضايق من شي.. بو احمد/شوفي يا هدى ..انا مهما سويت وراح اسوي ابيك تتأكدي من حاجه وحده بس...اني احبك واحب اولادي..ومهما صار انا راح احميهم من اي شي.. ام احمد خافت/ماااجد انت كذا خوفتني...صاير شيء بو احمد كمل/هدى..انتي عارفه قريتي وعارفه كيف اعرافها،اهلها صعب يتنازلون عن موروثاتهم القديمه،ومن ضمنهم اكيد اخواني.. ام احمد/ماجد..انت تلف وتدور...قول بسرعه وش عندك بو احمد جلسها جنبه يفهمها وهو نفسه مخنوق/اسمعيني...ولا تقاطعيني..انا مجبووور ع اللي اسويه يا حبيبتي صدقيني ام احمد لمعة عينها بدموعها/يا ربي سترك تكلللم بو احمد جلس يشرح لها الوضع كله... ام احمد بدأت تبكي ..وهو يهديها... ويكمل لها السالفه.... / / / / / في السوق_ ساره خلصت اغراضها و غصبت لوجين تشتري معاها كم قطعه..وطبعاً ما قالت لها عن زواجها المُدبر لأن ابوها مهددها.. لوجين/ماكان له دااعي هالاشياء يا ساره انا كلها كم يوم و راجعه لجده..وبعدها بسافر كندا يعني ما راح احتاجها ساره/ماعليه انتي اخذيها وبس لا تتكلمين...يوووه تذكررت باقي لي بجامات النوم واللانجريهات لوجين/هههههه هذي سهله ومايبي لها محل واحد ان شاء الله بيكفيك.. ساره/لا تنسين انك بتشاركيني لوجين/مافي احلى من بجامات النوم. هههه مستحيل اتسوق وما اخذ لي كم قطعه. ساره/حلو يعني مهمتنا سهله لوجين/ايه بس خلصي الكوفي حقك بسرعه خلينا نخلص شغلنا و نرجع البيت..تأخرنا. ساره/مو مشكله..اخوي مشعل كلمني و قالي آخذ راحتي لوجين/والله العظيم!!...الباشا مشعل اخوك سمحلك تتأخرين تقومين تزعجيني وتسحبيني بالسوق معاكِ ساره/ ههههههه شدعوووه وش حلات السوق تمشيه وشوبينق لوجين/انا ما اعتبر السوق تمشيه..اعتبرها مهمه ولها وقت يعني احدد لي وقت وميزانيه للشوبينق وما اتعداها ابد.. ساره/ما شاء الله عليك. اما انا اصرف بدون حساب لوجين/مشكلتك.. يلا بس قوومي ..تأخرنا يالعروس ساره/يلا يلا. / / / / / / بالليل... رجعت لوجين لجناحهم..وحطت الاغراض بغرفتها...وطلعت لأن السهره بتكون بغرفة ساره. ام احمد شافتها ونادتها/ لولو حبيبتي لوجين التفتت لها ورجعت/ناديتيني ماما ام احمد باستها على خدها وضمت وجهها بيدينها الثنتين ومسحت على شعرها وكأنها طفله وضمتها/ايوا..تعالي..وينك طول النهار ماشفتك.. لوجين ما استغربت حركات امها لانها حنونه طول عمرها/ماما انتي عارفه اني كنت بالسوق مع ساره..وحبيت اقولك اشتريت معها بعض الحاجات .. ام احمد وهي تتفحص ملامحها/من اول ماجينا هنا ماقعدنا مع بعض لوجين وهي تتبسم/ماااماا...احنا صار لنا يومين بس...انتي تبالغين يا حبيبتي..بس ولا يهمك..بكرا نجلس مع بعض ام احمد/انا بكرا عندي مشوار للسوق لوجين/ليش؟!! انتي توك متسوقه قبل لا نجي... ام احمد/ ماعليه انا حابه اروح واتفرج بالاسواق هنا.. لوجين/تبيني اروح معاكِ ام احمد/لا ...معاي ابوكِ بيوديني...حابه اسويلك مفاجأه واخليك احلى من العروس في زواج بنت عمك. لوجين بمزحه/ههههه يعني بتلبسيني فستان ابيض مثلاً ام احمد/ليش لا...وتاج ألماس بعد...الناس هنا مابعد شافونا..ولازم يشوفوا بنت ماجد و هدى الحجازيه كيف بتكون لوجين باست أمها وضمتها/يسلم لي هالحجازيه يا رررب..اوكي انا تحت أمرك.. ام احمد/يلا روحي لساره ..انا رايحه لأبوكِ بالغرفه لوجين/اوكي تصبحين ع خير ماما ام احمد وهي تناظرها بحب خالص/وانتي من اهله حبيبة ماما.. / / / / / / بغرفة ساره... دخلت لوجين وهي تدورها/ساارااا انا جيييت ووينك؟!! (شكلها نزلت تجيب قهوه او شي نشربه.) جلست لوجين تتفرج بغرفتها...وانتبهت للشرفه المسكره واتجهت لها..فتحتها وتفاجأت انها بلكونه بحجم 3×2 طلعت وهي تحس بالهواء البارد يلفحها اعجبها منظر القريه في الليل والاضواء الخافته والهواء النظيف ..والهدووووء اللي يعم البيوت والأحياء(قد ايش حلوه يالجنوب.. يا ترى وش خلف هالهدوء).. لحظات وتشوف واحد طالع من الجهه اليمين ووواقف بالبلكونه!!! تأكدت انه مشعل براقب النجوم بالتلسكوب المنزلي... وظلت تناظر فيه وهي مستغربه!! صحت على يد تنزل على كتفها وتناديها بهدوء/لوجييين لوجين التفتت وهي خايفه/بسم الله فجعتيني ساره/ههههههه زين لهجتك...ادخلي عن البرد..جمدنا لوجين/يلا.. ساره سكرت البلكونه/الحمدلله انه الوقت متأخر و محد شافك وقت ما فتحتيها والا كان بتصير مصيبه لوجين استغربت/ليش؟ ساره وهي تتبسم/بنت وتوقف ع البلكونه،مايصير !!! لوجين ناظرتها بنص عين/بقريتكم حساسيه من البنات والا ايش!!! ساره/هههههه اتركينا من الحساسيه وتعالي جايبه تشيز كيك يجنن..وفيه فيلم رهيب على اكشن.. لحظات وبتجي زينه لوجين جلست وهي تفكر/ساره اخوك مشعل هو ايش تخصصه؟ ساره/اخوي خريج ادارة اعمال من لندن لوجين اسستغررربت/شفته قبل شوي يطالع بالتلسكوب ساره/هههههه اخوي من عرفته وهو يحب يراقب النجوم والفضاء.. لوجين/اها ..هوايه يعني ساره/قولي شغف،الفلك بالنسبه له عشق حتى كان طموحه يوصل ناسا ويروح للفضاء ورشحوه جامعته يروح ..لكن ابوي رفض وهو سمع كلام ابوي بدون نقاش،ودفنها بقلبه. لوجين رحمته/حراام ليشش ساره/هذا ولده ويحق له يمنعه. لوجين/واذا ابوه.. يتحكم بمستقبله وهواياته!! ساره/ويتحكم بحياته بعد...لا تنسين اخوي ولد شيوخ لوجين/زمن الشيوخ والقبايل انتهى..حاليا فيه دوله وقانون..العالم تغير..وانتم للحين هذا نظامكم!! ساره ماقدرت ترد،هزت كتفها/للأسف ايه. لوجين ماعجبها الوضع ابددد/اللحين عرفت ليه أبوي هاجر من هنا من سنوات.. ساره بخاطرها(لكن للأسف حتى وهو مهاجر من سنين العادات والتقاليد..خلته يخضع لها غصصب ورجعته لها وهو مغصوب وقلبه يحترق عليك...الله يعينك يا لوجين) /
|
|
| مواقع النشر (المفضلة) |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| تحميل الذرة الرفيعة الحمراء , رواية للكاتب الصيني مو يان , رواية رائعة , pdf | معرفتي | الروايات والقصص المترجمة | 4 | May 26, 2014 11:10 PM |
| تحميل رواية من قصص التاريخ للكاتب علي الطنطاوي | Yaqot | روايات و قصص منشورة ومنقولة | 0 | May 22, 2014 02:03 PM |
| اصدار جديد رواية الشيخ .. رواية جديدة تصدر للكاتب السعودي إبراهيم محمد النملة | معرفتي | الأخبار الثقافية وعروض الكتب | 1 | August 14, 2013 01:11 AM |
العرض العادي
