حسني مبارك مابين مؤيد ومعارض

السوق واقف .. والشلايا كثيرة = واللي بغى البيعة.. رفض يفرق السوم
كلاً على الماشي .. يحاذر نظيره = يخاف من درباً محصّّن ومشؤوم
حتى العيون السود... صارت ضريره = تبغى ظلام الليل مع لذة النوم
والوضع محزن والمواقف خطيرة = والدرب واضح .. باكبر الخط مرسوم
هب الهبوب اللي تزايد صفيره = مع مزنة(ن) صفراء بها العج مردوم
دام الشوارع في بلدنا صغيرة =باكر على الله ..يصبح السر معلوم
(حسني مبارك) مايعوض ابغيره =الظابط اللي بالنياشين موسوم
تشهد له الجيزة وشبه الجزيرة = والحاجز اللي بالصواريخ ملغوم
في (ستة اكتوبر) جموعاً غفيرة = بيّـــن نهار العيد في لحظة الصوم
سجل له التاريخ بصمة وسيرة=يفداه منهو بالتفاكير مسموم
(بردوع) صب الكاز وسط السعيرة= باذانك اللي تشتهي حزة الحوم
كنك على ماقيل سلطة كبيرة= فرقت شمل الناس واصبحت مذموم
اقهرك باللي مايحكّم ضميره = يقطع وريد القلب.. وتصير مرحوم
بعض البشر تملك عقولاً بصيره = وبعض البشر مع لمة الناس ملزوم
القول واضح مثل شمس الظهيره= والدرس بّيــــن ...للبشر صار مفهوم
عسى نهاية ماجرى فيه خيره= حيث القدر سيفاً على الناس محتوم