قصيدة تعريف المحال

ألاء ياقوت · #1 November 24, 2010, 12:23 AM

قصيدة تعريف المحال

جاني واحد قال : بسأل كم سؤال
وقبل يسأل قلت : أنا ماني خبير !
قال: جاوب بس , يا ولد الحلال
وكل كلمه حِطَّهَا .. بشطرٍ صغير
قال نبدي : شنهو تعريف المُحال..؟
قلت :
خَل هالكلمه فـ البيت الأخيـر ..!

القهــر : إن شفت دمعـات الرجال
و الوطن : ( إنسان ) .. مِتغيِّر كثير
و الطفل : لعبه على شاطـي الرمال
و الأمل : إحساس في عين الضرير
الوفا : [ قلبين ] .. يجمَعهُم حلال
و الرَجُل : اللـي علـى أهلـه يغير
و الرجا : لا قلت : للواطـي تعال
و الفشل : مدري .. ولكنـه مرير
و الشعر : في وقتنا .. بدر و طلال
زين أوَّل : حيـل يعجبنـي جرير ..!

و الغلا : إحساس إلى حَـد الخيال
و العِشِق : لا شفت مَعشُوقِك تطير
و الجفا : إعكس مفاهيم / الوصال
و الوَصِل : يعنـي تأكَّـد فيك خير
و العقل : تِسْفَـه أقاويـل الجهال
و الجهل : إن قلت عن نفسك كبير
و الخطر : لا صار ما عندك مجال
و البلا : إن صرت معدوم الضمير
و العجب : لا صرت تسأل منهو قال
و التعب : إن كنت تِبْحَثْ عن مصير
الغنى : بالنفس ما هو راس مال
و الفقر : من كان .. بـ أعماله فقير

يكفي يكفي .. أسئله إنهي الجدال
ويـ الله علمني عَن .. السِّر الخطير
ما أبي تضرب لي في غيرك مثال
قول : عنِّك وإعتبر سِرِّك في بير

جات طعنـه مِن جنوبك والشمال
يعني وضعِك بين مِن حُولك خطير

صاحبـي وإن ضاقت بعينك ليال
لك فرشت القلب مفروش الحرير

في [ بلاد الحلم ].. ممنوع العقال
والمصيبه الشعب ما إختار الأمير

وما ألومك .. كان شدِّيت الرحال
دام بيتك جرح / وفراشك حصير

هذا تعريفي إلى كلمة : مُحَال
شيء ودِّك فيه ولا يمكن يصير ..!
:

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصيدة قالتها فتاة في ليلة زفاف حبيبها وهي قصيدة محزنة جداً ..	» ṀЈŋǿňţЌ «	شعر و نثر	7	March 23, 2011 11:25 PM
قصيدة الأيام راح تعـطـيك الأجابه	ألاء ياقوت	شعر و نثر	0	November 22, 2010 03:21 AM
قصيدة الحلم- للشاعر حامد زيد_ قصيدة رائعة جدا	Reem_H	شعر و نثر	5	March 19, 2010 09:04 AM
تعريف	fuadfarea	الترحيب بالاعضاء الجدد ومناسبات أصدقاء المجلة	8	July 12, 2009 10:53 AM

قصيدة تعريف المحال

شعر و نثر