فيسبوك تويتر RSS



العودة   مجلة الإبتسامة > الروايات والقصص > روايات و قصص منشورة ومنقولة

روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا



إضافة رد
 
LinkBack أدوات الموضوع انواع عرض الموضوع
  #1  
قديم July 12, 2010, 06:16 PM
 
Love روايه على كيف كيفك والله ما تتحسفون

هاااااااااااااااااااااااي صبايا
جبتلكم اليوم احسن روايا
يحبها قلوبكم

<******>drawGradient()
أحل ى صدفة بحياتي


بقايا شتات

سأطلق لقلمي العنان..وأدعه ينسج الكلمات..وأنده للرياح لتأخذ معها بقايا اشتاتي..لكي يرى من حولي ما ابقى لي الزمن من اوراقي التي سقطت من اغصانها ذابله..تعالي يا رياح وخذي كل ما بقى لي من اشتاتي ودعي الجميع يقرئها ..ويحس بها..ويعيشها..وتجمعني من جديد..بأمال..تعيد لي الحياة بكلمات قد تكون لي الدواء..كلمة اعجاب او جملة نقد قد ترسم على وجهي روح جديده..وتدفق في قلبي مشاعر بهيجه

أحل ى صدفة بحياتي
احب ان اوضح شي للجميع..بأن احداث القصه من نسج خيالي..وابطالها ايضا من اعماق خيالي.. ولا تنتمي لأي مجتمع غير الذي في مخيلتي..قد تكون جريئه بعض الشي ..قد تكون فيها بعض الغرابه..واتمنى من كل قلبي ان تنال اعجاب الجميع..واتقبل النقد الايجابي من الكل.....

الجزء الأول

"" الفصل الاول ""



كانت جالسه هي وأختها يسولفون وقالت : ريم : ياربيه طفشانه وما ودي أداوم بكره مليت
رغد : حتى أنا على بالك ودي أداوم يعني ...
ريم : وهي متحمسه طيب وش رايك نغيب ...
رغد : أحلفي بقووووووووه .... لو نقدر نغيب كان غبنا بس أمي رافضه من كثر غيابنا خصوصا من بعد ما وقعنا على التعهد ...
ريم : ياربيه أقولك بكره من جد مالي خلق أداوم
رغد : أمرنا لله وش نسوي ...
ريم : بتهور : طيب وش رايك ننحاش من المدرسه مثل ما سوينها من زمان
رغد : وين لا مجنونه أنسي مستحيل أعيدها مره ثانيه كفايه المره الأولي بغى يجيني جلطه من الخوف..
ريم: اقول عاد يلا اللي سواها مره يسويها مره ثانيه وياختي خلينا نفلها شوي ... تكفين رغد..
رغد بتردد: من قلبي ودي بس عقلي يقولي لا.. وانا حاسه انو بيصير شي. وخايفه ومدري وشلون وضعي.
ريم حست ان اختها بدت تتقتنع : اقول رغد تكفين وش بيصير يعني.. المره الاولى وعدت وما صار شي .. لاتصرين متشائمه كذا..
رغد: طيب خلاص اقلقتي ام راسي بس وشلون ننحاش..؟؟
ريم تفكر بحماس : شوفي . انحاش انا بوقت الفسحه.. بس اذا صار في وحده من الامهات او المدرسات بتطلع لانو دايما يجون الامهات ياخذون بناتهم وقت الفسحه واطلع معاهم قاطه. وبعد كذا انحاش وامرك واطلعك من مدرستك وانتهينا..شفتي الذكاء..
رغد بإنبهار: يلعنك.. وش هالفكره الجهنميه ولا ولد يسويها .. صحيح انها خطيره بس بنفس الوقت رهيبه وفله .. خلاص طيب اوكي.. بس لاتنسين خذي موبايلك.. وانا باخذ موبايلي عشان نتفق او اذا حصل أي شي نتصل على بعض..
ريم بفرح: اوكيه اتفقنا..
" على فكره اهل ريم رغد شوي فري عشان كذا تجرأو""

&&&&&&&&&&&&&&&&&&&&&&&&&&&&&
اعرفكم على عائلة ""أبو مشاري""

ابو مشاري: رجل اعمال ناجح وكبير وعنده شركه شراكه مع اخوه واخته .. قلبه حنين وطيب واغلى شي عنده عياله..
ام مشاري: مره متفتحه وما عنده قد على قوالة ريم .. حبوبه وطيبه وحنينه بس في نفس الوقت جديه..

مشاري: الولد الكبير عمره(23) سنه يدرس بالجامعه قسم حاسب حبوب وهادي وجميل بمعنى الكلمه من ناحية حدة ملامحه وجذااااااااب بشكل مو طبيعي والبنات يطيرون عيله بس ما يعطي احد وجه..... دايما في حاله..

رغد: عمرها (19) سنه بثالث ثانوي<<<رايحه فيها..حلوه وتشبه اختها ريم جذابه ومره كيوت نحيفه شوي بس مناسبها..عيونها عسليه وسيعه وشعرها لونه بندقي ..

ريم:عمرها (15)سنه بثالث متوسط بمدرسه تختلف عن مدرسه اختها رغد ....حلوه وجذابه ...بالكلام العربي يعني"تخقق" جسمها حلو وشعرها اسود وعيونها وسلع وكحيله وعربجيه وحبوبه..وتحب المغامرات..

&&&&&&&&&&&&&&&&&&&&&&&&&&&&&


رغد:يلا قومي ننام لاني خلاص مليت من وجهك عورني راسي من كثر ماتحنين علي..وبعدين عشان تستعدين لمغامره بكره..
ريم:ايه صح لازم استعد لبكره..لوووووول بروح انام..تصبحين على خير يااحلى واغلى اخت بالدنيا<<<مولله..


رنت ساعتها وصحت وهي مره متحمسه ومستعجله..
ريم: رغد.. رغد.. بسرعه قومي يلا نتأخر على المدرسه..
رغد: اقول اذلفي عن وجهي وش ذا الحماس للمدرسه.. اثرك ما نتي هينه..
ريم: اوووف . اقول قومي بلا كلام فاضي تراني مروقه لاتنكدين علي.
رغد: خلاااص قمنا يكفي حنه فوق راسي والله ذبحتيني..

خلصت ريم بسرعه ونزلت..على الفطور مع امها وابوها واخوانها..
ريم: صباح الخير يا احلى ام واب في الدنيا..
ام مشاري: صباح النور.. وش عندك اليوم مروقه..ولا بعد صاحيه بدري..
ابو مشاري: صباح النور والسرور يا حلى بنت.. بس ما قلتي لنا وش عندك اليوم..
ريم ما ردت على احد ..
مشعل :ملنا سلام..
ريم: اكيد.. صباح الخير ياحلو..
مشعل : لالا البنت صدق فيها شي اليوم ..
ريم في نفسها" عشانكم ما تدرون وش ناويه عليه""
نزل مشاري: لالا اليوم فيه شي ريم صاحيه غريبه..
ريم عصبت: وش فيكم علي.. يعني ما يصير لي اصحى بدري..
مشاري: الا يصير لك بس مو من عوايدك..
ريم ما ردت عليه...


نزلت واخيرا الست رغد وعلى طول نطت في عينها ريم..
ريم: خير ان شا الله كل هالتأخير كان ما نزلتي..
رغد وهي مالها خلق: اقول وخري عن وجهي ترى محد رايق لك..سلمت على امها وابوها واخوانها وافطرت بسرعه.. وطلعت عقب ما شيبت ريم براسها...

في مدرسة ريم


ريم: صباح الخير والفل والورد والياسمين..وش اخباركم بنات؟؟
ساره قامت تلمس حرارة ريم: اليوم وش شاربه .. وش ماكله. وش عندك اليوم مروقه..
ريم: اووووووه وش فيكم اليوم القاها من وين ياربي من البيت ولا المدرسه..
ساره: لا بس كنت مستغربه.مو من عوايدك..
ريم: بلاك ما تدرين وش بسوي..
ساره: وش بتسوين بعد؟؟
ريم: سر... ما راح اقوله..
ساره: اقول ريم بلا سخافه قولي ..
ريم: "نو ..وي.."
سارة بعصبيه: بتقولين ولا شلون..
ريم : خلاص بقولك بس بعدين..
ساره: اوكيه اهم شي تقولين لي..

" في الفصل"

ريم معها الدفتر وتكتب لساره : اسمعي انا اليوم ناويه اهج من المدرسه..... وتعطي الدفتر لساره.
ساره: وش تقولين انتي مجنونه.. اول شي كيف وشلون ومتى .. علميني بسرعه..
ريم:الله كل هالأسئله مره وحده خلاص انا اقولك السالفه..
" وقالت السالفه لها عشان تساعدها "
ساره: طيب تتوقعين خطتك بتنجح؟؟
ريم: ان شا الله ميه بالميه هذي خططي مو حيا الله..
ساره: ايه درينا انها خططك اللي ما ورها الا البلاوي..
ريم ميته ضحك: ليش مره بليتك بخططي؟؟
ساره: يا ما وياما . بس خليني ساكته احسن لي .. عشان ما ابكي عليك..
ريم عصبت: لا يالجاحده مسويه ما قد نفعتك بشي .. انكري بعد..
ساره: انا ما انكر.. هي مره.. او مرتين غيرهم وهقتيني بصراحه..
ريم : اقول ..اقول .. روحي عني زين..
رن جرس الفسحه طلعت ريم اول وحده طبعا مو من عوايدها ونزلت هي وصديقتها ساره ووقفوا عند الباب ينتظرون وحده من الامهات تطلع واشكالهم تحففففففففففففففه......
واخيرا جات وحده من الامهات ومعاها بنتها توها بتطلع.. ريم ما صدقت على الله ولبست العبايه بسرعه.. واطلعت واخيرا..ومن العجله نست الشنطه في المدرسه وطبعا فيها الموبايل ما أنتبهت ..
ريم : واااااااااو وأخيرا طلعت و"مشت شوي وفجأه شهقت" ... وين شنطتي .. لااااااا نسيتها بالمدرسه
ياويلي ... وش بسوي الحين المشكله فيها فلوس وموبايلي .....
وأحتارت ما تدري وش تسوي ... حتى مدرسة رغد ما أعرفها زين يقطع أم الوهقه وش أسوي ...
وكملت مشي ومشت ومشت وهي ميته خوف وقالت في نفسها كاني تذكرت موقع المدرسه من هالطريق
ومشت لحد ماوصلت وقرت على الباب (مدارس ال............الأهليه ) نفس مدرسة رغد... ماقرت
بنين أوبنات سفحت عمتى على الدخول الباب المدرسه ... كان الباب مفتوح وما عنده حارس ودخلت
فتشت على طول كان المدرسه ازعاج وفجأه سكتوا ولا همس ... يوم لفت وجها تناظر المدرسه وتشهق ذيك الشهق
ريم : يمه أنا وين دخلت مدرسة عيال.... هالكلمه صارت تدور في راسها ... فكرت أنها ترجع وبسرعة لفت على الباب إلاجاء الحارس سكره .... وطبعا سوت لثمتها تجمعوا العيال حولها طبعا عيال ما صدقوا على الله
بنت تدخل مدرستهم حتى لوشينه تطلع حلوه بعيونهم ....
ريم في هذي اللحظه كل عظم في جسمها يرجف وعيونها غرقانه دموع من الخوف لإنهم مسوين دائره
حولها ما تسمع إلا تنطيل كلام وحش ومغازل وأي شي يجي على بالك بتسمعه <<<ما ينلامون مساكين ....
قامت تفكر وتكلم نفسها "لازم اطلع من هالورطه يارب ساعدني" .. وهي خايفه يوصل للمدير وتصير
سالفتها فضيحه ......
ريم : وهي تطالهم وبصوت مبحوح قالت :
ممكن تسمعوني شوي <<<<<محد سمعها..
ورفعت صوتها اكثر: ممكن تسمعوني شوي..
اسكتوا فجأه وقالت بدلع: انا ابغى اكبر واعقل واحد فيكم. " طبعا كلهم صاروا كبار وعاقلين " وصارت ما تسمع الا: انا..نا..انا.
ريم تطالعهم بتمعن واختارت ازين واحد فيهم<<فالتها..
ريم: تعال انت يا اللي هنا..
الولد: انا...
ريم: ايه انت ..
وراح وهو ما صدق خبر..
استخدمت ريم اسلوبها وقالت بدلع: مو انت اكبر واقل واحد ... طلعني من هالدائره..
الولد: ابشري...
قام ومسك ايدها وطلعها وريم في نفسها تقول " يمون العم" وهي ميته خوف ومسويه نفسها قويه... ووداها مكان بعيد وصاد عن الطلاب ..
ريم وهي شوي وتصيح: والله واقسم بربي اني داخله المدرسه غلط.. يعني لا تحسبني من هالبنات تراني بنت ناس وعالم وحمايل ومتربيه وانا صدق مدري وشلون جيت هنا..
قام الولد يهديها وهو ولد حبوب..:معليش حصل خير..
ريم تحس انها مرتاحه مو مره بس احسن من غيره: ممكن اطلب طلب.
الولد: اطلبي..
ابي مويه والله ريقي ناشف من الخوف.
الولد وهو متعاطف معها وحاس بالموقف اللي هي فيه: انتظري شوي..
راح الولد واتشرى المويه ورجع..:تفضلي.
ريم: مشكور اخوي وما قصرت تعبتك معاي .. وقامت تدور في جيوبها فلوس عشان تعطيه حق المويه..
الولد: وش تسوين..؟؟
ريم: ادور فلوس عشان اعطيك حق المويه..
الولد بعصبيه: خلي فلوسك لك وماله داعي انا ما سويت الا الواجب..
ريم وهي خاقه معه(خاقه=ذايبه=دايخه):لا .. مو قصدي شي بس حبيت اعطيك حقك..
الولد:اقول خلينا من هالموضوع الحين.. انتي افطرتي.؟؟
ريم: لا..
الولد: اجل استني شوي.. راح واشترى فطور لهم ورجع.. واعطاه ريم..
ريم: ليه كلفت على نفسك والله ماني مشتهيه شي..
الولد: اقول اكلي شي .. لا يغمى عليك..
ريم مازات خاقه وما قدرت تقول له لا.. اخذت السانوتش وفتحت العصير وبدت تاكل مجامله له طبعا بعد ما فكت اللثمه وتغطت بالطرحه...
وصاروا ياكلون وهو يطالعها شوي .. وياكل شوي..
ولما خلصوا ..
الولد: ممكن اعرف اسمك...
ريم وهي مطيره عيونها: خير ان شا الله عسى ما شر.. وش قالولك عني .. تراني بنت ناس ومتربيه وما عندي هالسوالف..
الولد بإرتباك: لاانا مو قصدي شي بس اسأل ...
ريم: مره ثانيه لاتأل..
الولد: طيب خلاص اسفين..
ريم: اقول انا بأي مدرسه الحين..
الولد: مدرسة ال(.........) الاهليه..
ريم وهي مركزه الاسم:نعم.. المدرسة هذي مدارسال(.....)متأكد..؟؟!!
الولد: تستهبلين مدرستي واعرفها ...
ريم تشهق ذيك الشهقه:يا ويلي ..ياويلي وانا ما لقيت ادخل الا هالمدرسه.
الولد: ليه خير وش صاير..
ريم: اخوي الصغير يدرس فيها يا ربيه وش هالمصيبه..
" على فكره ..مدرسة رغد ومشعل تحمل نفس الاسم"
الولد: هدي .. هدي شوي اخوك بأي سنه أ ي صف؟؟!!
ريم: هو بالمتوسط .. هذا أي قسم اللي احنا فيه؟؟!!
الولد: احنا بالثانوي .. وتراه مفصول عن المتوسط بالمرره.. ارتاحي..
ريم:ايه الحمد لله طمنت قلبي ..
الولد: طيب وش اسم اخوك يمكن اعرفه..
ريم: لا . والله تلعب علي .. انسى اني راح اعلمك أي شي..اقول الا انت وش اسمك..
الولد: انا اسمي سليمان
&&&&&&&&&&&&&&&&&&&&&&&&&&&&&



انتضر ردودكم الحلوه
<******>drawGradient()
رد مع اقتباس
  #2  
قديم July 12, 2010, 06:25 PM
 
رد: روايه على كيف كيفك والله ما تتحسفون

تكمله
\
\
\
&&&&&&&&&&&&&&&&&&&&&&&&&&&&&
سليمان عمره (19) سنه بثالث ثانوي\علمي.. وسيم لأبعد درجه مرره يجنن .. عيونه عسليه وناعسه تدوخ خشمه صغير وطويل .. شفايفه صغار بلون التوت.. حواجبه مرسومه رسم .. له سكسوكه هذي بالذات تطيح الطير من السما...وجسمه حلو بتميز بالثقل والرزانه والركاده. حبوب وطيوب.. يعني بإختصار كله على بعضه حلو..

&&&&&&&&&&&&&&&&&&&&&&&&&&&&&

ريم: اهاااوتقول في نفسها" يهبل واسمه سليمان مدري من وين طلع لي"
سليمان: طيب اخوك أي صف..؟؟
ريم: بثاني متوسط..
سليمان: يعني اصغر من اخوي بسنه..
ريم: وش اسم اخوك..
سليمان: محمد..
ريم: عاشت الاسامي..طيب ممكن اسأل عن عائلتك الكريمه..<<<مسويه عندها اسلوب..
سليمان وهو رافع حاجب: ايه ممكن.. اقولك بس بعد ما تقولين اسم اخوك. بون العائله..
ريم: اوكيه موافقه<< والله من اللقافه..
سليمان: انا سليمان ال(..............)
ريم: انت سليمان ال(........) وتشهق ذيك الشهقه اللي بغت تدوخ منها..
سليمان: انتي وش فيك كل شوي مروعتني.. خير وش فيها عائلتي..
ريم: عشانك ما تدري انو اخوي الكبير يعرفك.. اخوي الصغير يعرف اخوك..
سليمان : طيب حرقتي اعصلبي وش اسم اخوك.؟؟
ريم بتردد واضح: اسمه...آآآآآآآآآآآآآآآآ......آآآآآ.... مشعل..
سليمان: اقول احلفي.. واحلفي بقوه بعد.. مشعل ايش..
ريم: لا والله وش شايفني عندك تراني بنت ناس ومتربيه ولا تحسبني من هالبنات <<< هالموال حفظناه..
سليمان: والله دريت انك بنت ناس ومتريه حفظته والله حفظته...
ريم:ايه اخاف انك نسيت..
سليمان وهو يسبل لها بعونه(يرمش): ابد ما عندك نيه تقولين.
ريم وهي خاقه على عيونه: هو مشعل ...آآآآآآا..ال(.........).
سليمان: هذا اخوك عرفته....
ريم بخوف: الله يخليك . طلبتك طلب ما اطلب غيرهلا يدري اخوي اني جيت هنا الله يخليك لاهلك واحبابك.. والله ما ني ناقصه مشاكل كفايه اللي انا فيه الحين..قدروضعي .. انا الحين بمدرسةعيال . ومنحاشه من مدرستي.. عشان انحش اختي<<< ما شالله ونع الاخوه..
وناسيه شنطتي وفيها موبايلي وفلوسي.. ولا ادري كيف بطلع من هنا واهلي لو دروا بذبحوني شويه علي...
فالله يوفقك ويخليك لغاليك...استر علي وتلقى الاجر ان شا الله..
سليمان وهي كاسره خاطره:احاول..
ريموهي تنافخ:خير وش تحاول. اقولك لا تقول لاحد..ما قلت لك حاول.. اقوله ساعه موال وفي النهايه احاول..
سليمان: لا قومي طقيني احسن....كنت ..
ريم:ايه اشوى .. لاتعيدها مره ثانيه<<<تمون العمه..
سليمان وهو يناظر ساعته: اقول ترى ما بقى شي على نهاية الفسحه..وش بتسوين.؟؟
ريم: والله محتاره..
سليمان: طيب فكري بسرعه..
ريم وهي تفكر:.................. جتني فكره<< ام الخطط داهيه..
سليمان: خير وش الفكره..
ريم: فيه ثوب زايد..
سليمان:هههههههههه حلوه هذي فيه ثوب زايد.. من وين اجيب لك..؟
ريم: طيب... معك بدلة رياضه..
سليمان: ليش وش تبين فيها..
ريم : انت جبها وبس..
سليمان راح جاب البدله بسرعه ورجع..: الحمدلله اني جايبها
ريم : زين كذا حلو .... يله..
سليمان: شنو يله..
ريم: يله قدامي.. روح بدل ثوبك والبس البدله وجب الفانيله والسروال<<ياويلي هالبنت فاسخه الحيا مره وحده..
سليمان مطير عيونه: طيب .. ممكن اعرف وش بتسوين انتي...
ريم: انت رح وسو اللي قلت لك عليه وخلصني..
سليمان: بروح وامري لله..
" راح دورة المياه وبدل ملابسه ورجع معاه الثوب..
ريم: طيب وين البس فيه..
سليمان: روحي لدوراة المياه..
ريم وهي مطيره عيةنها: احلف بس.. تبيني ادخل دوراة المياه تستهبل انت.. تخيل لو احد نط علي من فوق الجدار وش بسوي بعمري ذيك الساعه..
سليمان هو يضحك: طيب وين بتلبسين فيه..
ريم: ولا يهمك ام الافكار والخطط معاك <<<<داهيه هالبنت..
سليمان: يله ورينا شطارتك...
ريم: اسمعني زين. انا بأفسخ العبايه وانت بتمسكه وتغطي علي وطبعا وانت برا العبايه وداير وجهك قدام فاهم..
سليمان: فاهم والله فاهم بس اخلصي بتصفر الحين..
ريم لبست السروال بدون ما تفسخ المريول وبعدين فسخت الشيال وباقي بلوزة الي تبع الشيال خلتها ولبست مالثوب عليها وعدلت لثمتها بعد ما تحوست.. وطبعا سليمان حاول يقز(يناظر) شوي بس بعد ما نفخت ريم عليه عقل...
ريم: خلصت .. اقول ما معك شماغ..
سليمان: عاد اليوم بالذات ما جبت..
ريم: طيب جب لي شماغ..
سليمان: من وين اجب لك..
ريم: اسرق لي شماغ أي واحد..
سليمان مبقق عيونه: لا والله وشايفتني..
ريم: انا ما قلت اسرق اسرق.. يعني بالكلام العربي استعاره..
سليمان: طيب بدبرها لك..
" وراح ونادى واحد من بزارين اولى ثانوي وقال له..تعال حبيبي اسحب لي شماغ أي ولد وانحاش"
الولد:خبر وش قالوا لك عني ..
سليمان:بعطيك اللي تبيه بس جب لي الحين شماغ..
الولد:مدام المسأله كذا ولا يهمك اصنع لعيونك شماغ..
سليمان:مولله ..رح يله..
"طبعا الولد سحب شماغ واحد ودز وراح لعند سليمان وعطاه الشماغ"
سليمان رجع لعند ريم:خذي دبرته لك..
ريم وهي مبسوطه:يسلمووووووووووووو زين سويت.............يله؟..
سليمان :شنو بعد يله؟..
ريم:لف عني ابي البس الشماغ..
سليمان:صد عن ريم ........وريم لبست الشماغ وتلثمت..وسفطت عبايتها والمريول وخبتهم..
لف عليها سليمان:احلى احلى حركات..
ريم : ماتلاحظ اني عطيتك وجه..
سليمان:هذا جزاي الحين..
ريم وهو كاسر خاطرها:لاموقصدي كذا..يعني لاتمون بزياده..

"رن جرس نهاية الفسحه ..وريم بدت علامات الخوف عليها"

سليمان:وش بتسوين الحين؟..
ريم:بدخل معاك الفصل وش اقعد اسوي هنا..
سليمان:يله مشينا للفصل...والله يعيناا..
"مشو ودخلوا الفصل..وكان الفصل فاضي شوي ..
ريم: وين بجلس فيه؟..
سليمان:اكيد بتجلسين ورى..
ريم: طيب اسمع قول لأصحابك اللي تعرفهم زين اني هنا..
سليمان: ناويه تفضحين نفسك انتي..
ريم:عشان يقدرون يساعدوني ويغطون علي..
سليمان: اوكيه انا راح ادبر كل شي وانتي تعالي اجلسي هنا .....وقبل ماتجلس ريم ..
قال واحد من الطلاب : سليمان من هذا اللي معك كأنه جديد..
سليمان يصرف: لاجديد ولا شي هذا واحد من اصحابي وده يحضر معاي ..تكفى نم وانت ساكت وخل اللقافه عنك..
ريم كان قلبها واقف من الخوف وخافت من الفضيحه..

"نادى سليمان اصحابه ...تركي وسعود ونواف "
&&&&&&&&&&&&&&&&&&&&&&&&&&&&&
خلوني اعرفكم عليهم..

"تركي...جميل الابعد درجه ملامحه حاده ملامح خليجيه عيونه وساع وكحيله وخشمه طويل سلت سيف ..وسكسوكته سوداء غامقه محليته زياده وجسمه روعه كان معضل شوي وهو انسان جرئ ومغازلجي بس قلبه طيب وحبوب"

"سعود مملوح .اسمر وحبوب وطيوب وهادي"

" اما نواف ابيض البشره دبدوب وهادي وحيوي(يستحي) ومرره طيب ومسالم"

&&&&&&&&&&&&&&&&&&&&&&&&&&&&&

سليمان: تعالوا ابغاكم شوي.. ودخلوا الفصل وجلسوا ..

خليني اشرح لكم الوضع..
في الاخير جالس سليمان وجنبه ريم وقدامهم تركي وسعود ونواف ..
تركي: خيروش فيك؟..
سليمان:قربوا ....بعد قربوا ..قربوا بعد..بعد اكثر..
تركي : يوووووووه اخلص وش تبي؟..
سليمان : طيب لاتنافخ اسمعوني زين وحطوني على بالكم عدل الموضوع خطير..
نواف بخوف: بسرعه قول تلفت اعصابنا..
سليمان: سمعتوا بالبنت اللي دخلت المدرسه ..
سعود:انشاءلله هذا الموضوع اللي مزعجنا عليه..
سليمان: اقول انت اسكت ..............البنت هنا في الفصل..
تركي بشهقه : وش تقول انت البنت هنا..
سليمان: اقول قصر صوتك لأرفسك هنا..
تركي: طيب وينها وينها..
سليمان : اللي جنبي ..............................وعيون الثلاثه كلهم عليها
ريم: بسم الله الرحمن الرحيم خير وشتبون؟
سعود: والله صدق هذي البنت..
نواف: تركي انت قاعد تشوف اللي اشوفه
تركي: نواف انت مستوعب بنت معانا ووراي بالضبط في الفصل..
سليمان بعصبه: اقول انت وياه جعل عيونكم تنفقع انشاء لله ارحموا البنت شوي شوي عليها..........اقول ركزوا معاي الحين ابغاكم فزعه وابيكم تساعوني وتساعدون البنت..
"شرح لهم سليمان سالفة ريم من اولها لاخرها"
ونحاول انا نغطي عليها لحد ماتصفر الحصه الاخيره اوكيه..
تركي: اقول خلها تجلس جنبي..
سعود: لاجنبي انا احسن..
نواف: اقول لا انت ولا هو تجلس جنبي انا احسن لهاااا..
ريم بعصبيه: خير شايفيني لعبه عندك انت وياه .......اقول ترى انا بنت ناس واصل ومتربيه ولا يجي على بالكم اني من هالبنات ..
سليمان يضحك لانه حافظ الموال..
اقول اسمعوني بلا هبال..الحين علينا رياضيات وخبل ومايدري وين ربي حاطه فيه فاحاولوا تعدون الحصه على خير..

دخل المدرس: السلام عليكووووووووو.
الطلاب: وعليكم السلام..
ريم: مصري هههههههههههههههههههههههههههههههههههاي
سليمان يضحك : خير وش اللي يضحك؟..
ريم: انشاء لله هذا مدرسكم السبيكه (تنكه = خبل = مفهي = مايدري وين ربي حاطه فيه) ..
سليمان: من ناحية سبيكه سبيكه ..
ريم:لا احنا ما يدرسونا مصريات ..كلهم سعوديات وحلوات..
سليمان:ياحظكم ياهالبنات مدلعين..
ريم: وععععععع مادري وشلون متحملينه..
المدرس: فيه ايه ياسليمان انت واللي جنبك....شاغلك عن الدرس ايه..
سليمان: ولا شي استاذ ولا شي..
ريم هههههههههههههههههههههههههههههههههههههههههههههههههه هههااااااااي
سليمان:اقول اسكتي ترى بتفضحينا ..
ريم هههههههه وش اسوي ما اقدر مدرسكم صراحه حفله هههههههههههه
سليمان:خلاص ماودي اضحك ههههههههه ترى بيطلعني برا الفصل اسكتي ..
تركي كل شوي لاف وجهه وسعود كل ماجت فرصه لف عليها ونواف ياعمري عليه يستحي..ويااادوب خلصت الحصه اللي مابغت تخلص واول ماصفرت طلع المدرس على طول الثلاثي المرح لفوا وجيهم عليها..
ريم: اعوذ بالله من الشيطان الرجيم..
تركي: ليه شايفه جني..
سليمان: صادقه والله ماكذبت البنت ..
تركي يهمس لسليمان: اقول وش اسمها ؟
سليمان: ماقالت لي عشان اقولك..
تركي : اهاااا..
سليمان:اقول شباب وش علينا ذا الحصه ..
نواف: اتوقع دين .....وفجأه دخل طالب وبصوت عااالي شباااااااااب شباااااااااااب تفتيش تفتيش..
هنا طاح قلب ريم من الخوف ولفت على سليمان: وش اسوي والله بنفضح وبروح في ستين الف داهيه..
سليمان وهو يفكر ومحتار ومن جد خايف عليها,,:اهدي انتي الحين بسوي فكره دايم نسويها اذا كنا جايبين معانا شي خطير..
ريم: شنووو الفكره..
سليمان :اسمعي الحين هم يفتشون على اللي قدام اول وبعدين على اللي ورى اذا فتشوا على اللي قدام انا راح ابدلك مع واحد منهم ..اوكيه
ريم: طيب اخاف انكشف..
سليمان: لاتخافين لاني راح احوس الفصل حوس وراح اقول لاخوياي يساعدوني بس انتي هدي بالك شوي..
"راح سليمان قال لاصحابه عن الخطه اللي بيسويها "
تركي :اوكيه انا بتفق مع اللي قدام على اساس انو انا وانت توديها بدالي..
سليمان: اوكيه
"دخلوا لجنة التفتيش وبدوا يفتشون ...وتركي متفق مع طلاب الفصل انه جايب كاميرا فيديو وقايل لهم يحسون ترتيب الفصل ويصير الفصل زحمه"
بدا التفتيش في الصف الاول وبعدين الثاني ...وبعدها تركي اشر للطلاب يبدون يحسون الفصل ..
وسليمان بسرعه سحب ريم ووداها قدام ورجع الطالب بدالها ورى مر التفتيش على تركي وسعود ونواف وبعدين سليمان والطالب اللي معاهم ..
وتو اللجنه بتطلع..
"دخ ل المدير"



نهاية الفصل الاول انتظرو الفصل الثاني....
الجزء الأول

"الفصل الثاني"
وتو اللجنه بتطلع دخل المدير..
المدير: السلام عليكم..
الطلاب: وعليكم السلام..
المدير فتشتوا زين
اللجنه: اكيد..
المدير: واللي قدام..
"هنا ريم كانت لافه وجهها عالجدار وميته خوف وعيونها غرقانه دموع"
اللجنه: كل شي تمام...
المدير بوجه العبوس: ايه .. زين..
وطلعوا....
تركي وسليمان ونواف وسعود بصوت واحد: اووووووووووه
وقامو كلهم عند ريم..عشان يرجعونها مكانها..سليمان صار قدامها ونواف على جنبها اليمين وسعود على اليسار وتركي وراها..
ورجعت مكانها وهي بتصيح....
ريم: واااااااااااي .. بغى يغمى علي من الخوف...
تركي: شفتو وجه المدير ههههههههههه ..
سعود: ههههههههههه أي والله شفته..
سليمان: كان ودي اقوم واتفل في وجهه ... قهرني..ههههههههه..
وبعد شوي دخل مدرس الدين..
المدرس: السلام عليكم..
الطلاب: وعليكم السلام..
ريم: لااااه الحمدلله سعودي...
سليمان: عاد هذا فله..
ريم: كيف فله..
وقعد سليمان يسولف عليها..
المدرس: سليمان.. شنو عندك اليوم مو من عوايدك تسولف بالحصه..
سليمان: لاسلامتك يا استاذ قاعد ادور دفتري<<<يقطع ام الترقيع..
المدرس: كل هالحوسه والازعاج عشان دفتر..
وكمل المدرس شرح..
ريم: صدق ما تعرف ترقع.
سليمان: اسكتي تراني مو متعود..
ريم: ههههههه شكلك دفره..
سليمان: علمي .. وش تبين بعد..
ريم: خلاص لا يطردك وبعدين ابتلش انا..
تركي لف عليهم: ورى ما تسكتون الحين<<<<<غاير..
سليمان: وش عليك انت لف وجهك بس..
رن الجرس والحمدلله عدت الحصه على خير...
ريم: والحين وش عليكم..
تركي:الحين علينا فراغ يا قلبي.
ريم: قلبت عليك دنياك ان شا الله ..اسمعني زين وحطني على بالك عدل تراني بنت ناس ومتربيه وبنت حمايل لا تحسبني من هالبنات...<<<<معلقه على هالموال خخخخخخخ .
سليمان ميت ضحك..
تركي: وش قلنا عاد..
ريم: قالت قوايلك ان شا الله .. انت وش فيك ما تعقل عني مو نا قصتك والله حاله..
تركي: اعصابك ما تسوى علينا..
سليمان: ايووووه .. زين تسوين فيه يستاهل..
سعود ونواف: كلى تهزيئه محترمه...
كلهم ميتين ضحك الا تركي..
ريم: اقول ما علينا منه .. ان شا الله انتو كذا كل يوم والله طفش..رياضيات ..فيزياء.. كيمياء..احياء..ووووووع مدري وشلون متحملين...؟؟
سليمان: شفتي عاد هذا حظنا كذا عيال العلمي مو مثل الادبي..
سعود: والله ما حد فلها الا الادبي.. تصدقين عاد وهم ثالث ثانوي ما يحضرون حصص وما يهمهم شي..
نواف: اقول اسكت ياللي مسوي نفسه دفره ما تحضر في الاسبوع الا يومين..
والكل يضحك..
تركي: اقول انتي بأي صف..
ريم: انا بثالث متوسط.
تركي: واختك.. بأي صف..
ريم: وش دراك عن اختي..
سليمان: انا اللي قايل له..
ريم: اختي بثالث ثانوي.. وزين ذكرتني فيها بأتصل عليها .. اكيد قلقانه..
تركي: حلو تناسبني....
ريم: ناسبك ابليس..قول امين .. لاتجيب طاري اختي على لسانك كفايه انا ويالله متحملتك..
تركي: واضح متحملتني...ما بقى شي ما قلتيه .. الكل ضحك....ههههههههههههههه...
ريم: سليمان .. ممكن استخدم موبايلك شوي... اتصل على اختي واطمنها اكيد قلقانه علي ..
سليمان: ابشري..دقيقه بس افتحه . وعطاها الموبايل واتصلت على اختها..
جوال رغد يهز بجنبها: وهي حاطه السماعات بأذنها ومنخشه..
رغد: الووو..
ريم: الووو هلا والله وغلا,..
رغد: مين...ريم: انا ريم ما عرفتيني..
رغد: ريم... وش هالرقم..
ريم: بلاك ما تدرين وش صار فيني...
رغد: خير وش صاير ..وش فيك خرعتيني..؟؟
ريم: مصيبه يا رغد . مصيبه..
رغد: يلا قولي خوفتيني...مسكوك المدرسه..
ريم: ياليته على كذا كان انا بخير..
رغد: ترى اذا ما تكلمتي .. بأذبحك قولي يلا..
ريم: رغد.. انا ...... انا......... في ... مدرسة.....
رغد: اقول كلمات متقاطعه...قولي بسرعه..
ريم: خلاص بقول انا في مدرسة عيال دخلتها بالغلط حسبالي مدرستك..
رغد: ايش.. وش قاعده تقولين.. لاتكذبين علي...
ريم: والله يا رغد ما اكذب عليك.. هذا اللي صار..
رغد: طيب انتي وينك وش تسوين طلعتي ولا لحد الان بالمدرسه وما فيك شي..؟؟؟
ريم: ههههههههههههههههههههه خلاص وجع كل هلاسئله؟؟ شوفي انا الحمد لله بخير .. وما فيني شي .... وللحين بالمدرسه وعندي سليمان ومعاه ان شا الله راح اكون بخير وبأيدي امينه...
رغد: وش سليمان هذا.. مجنونه انتي..؟؟؟
ريم: لو عرفتي السالفه عذرتينيى .. وبعدين هذا جواله ولا اقدر اطول وبدز لك مسج اطمنك اوكيه ..
رغد: اوكيه ... مع انو قلبي كان ناغزني..
ريم: يلا باي...
رغد: باي..
وبعد ما سكرت
ريم: مشكور سليمان.. تفضل موبايلك...
سليمان بأبتسامه: العفو...
وصارت ريم تسولف عن مغامراتها وهبالها في المدرسه<<<< انبسطت البنت..
وصار كل واحد فيهم يقول مغامراته وهباله.. ونهاية الحصه السادسه..
سليمان: اقول نواف وش علينا الحين؟؟
نواف يتذكر: اتوقع علينا فيزياء...
سليمان وهو مرتاع: فيزياء.. انت متاكد..؟؟؟
حست ريم انو فيهم شي...
ريم: ليه مرتاع.. مدرس الفيزياء وش فيه؟؟!!
سليمان: هذا المدرس عصبي هره ودقيق بالمره وكان حاقد على الطالب اللي جالسه مكانه وغير كذا انه يطلع الفصل كله يحلون تمارين على السبوره...ومستحيل احد يفكر انه يتلثم في حصته...
ريم بخوف وارتباك: يا ربييييييييه .. وش اسوي الحين خلاص انا راح افك اللثمه ...سليمان ابيك تشوف شكلي يصلح ولد ولا لأ....
سليمان بلهفه: ايه ... ايه
.. اشوف عادي..
ريم تنزل اللثمه وهي متوتره ومرتبكه ومستحيه....هاه وش رايك اصلح ولد ولالأ؟؟؟!!
سليمان يطالعا بتفحص وهو منبهر من جمالها :آآآآآآآآآآآآآآآآآآآآآآآ................
ريم استحت: اخلص علي...
سليمان: والله............وبصراحه.......................... ..ما ادري..
ريم: شنو ما تدري اخلص عطني رايك... ولا اقولك اسأل نواف...
سليمان: اوكيه............نواف ممكن شوي..
نواف: خير....
سليمان: ابغاك بخدمه..
نواف: آمر...
سليمان: ابيك تشوف البنت.. تبي تاخذ رايك بشي..
نواف: ايه وشو؟؟؟
سليمان: البنت بتفك اللثمه تبي رايك فيها تصلح ولد ولالأ؟؟!!
نواف بحماس: ايه ايه اعطيها راي وابو راي اذا بغت..
سليمان: لا ابغى رايك بس .. ما ابغى ابوه..
نواف: يلا وريني...
ريم: هيه بشويش علي تراني استحي...
نواف: يله اخلصي بسرعه...قالت ايش.. قالت استحي..
ريم تضغط على اسنانها من القهر .... بس ما ردت عليه.. وشالت اللثمه..
نواف قعد يطالعها وهو ساكت ما نطق ولا كلمه<<<<مفهي..
ريم: هيه هيه انت بسرعه عطنا رايك..من زين رايك..
نواف: ايه.. ايه.. رايي صح تبين رايي .....آآآآآآآآآآآ ما دري...
ريم: اقول انت الثاني بعد.. شنو مدري .. عطني رايك واخلص..
نواف: اقدر اقول من رايي الشخصي<<<مسوي فاهم.........انك.... ولد....خيكيري....
ريم: الحين هذا اللي طلع معك رايي ورايي الشخصي ومسوي فيها....بس مدام اني ولد يالله..
تركي لنواف: وش تبي منك..
نواف ببرود: لابس كانت بتفك اللثمه وتشوف رايي فيها...
تركي: شنو بتفك اللثمه...!!!
نواف: ايه.... فكتها لف عليها شفها.
لف عليها تركي بقووووه ..... وطير عيونه...
ريم: اعوذ بالله .. ما صدق خبر...
تركي: يطالعها وما رد عليها<<< خاق الولد..
ريم: هيه هيه... انت وين رحت ضايع لك شي بوجهي...؟؟
تركي بغرور: من زينك ومن زين وجهك...
ريم: ما اقول الا مالت عليك بس..
سليمان: اقول ما عليك منه ولا تضايقين عمرك بس..
ريم: الا وش اسوي على مكاني .. انا حاسه انو بيصير لي شي..
سليمان: ولا يهمك معك سبع<<<< واثق..
ريم: وكل شوي يزيد اعجابها فيه اكثر واكثر... رجولته واخلاقه وطريقة كلامه واسلوبه...
تركي: وش بتسوي يا سبع..
سليمان: الحين اقولك وش بأسوي ... شوف نخلي ريم تجلس بينكم..
تكي بحماس: خلاص انحلت تجلس جنبي .. واظمن لكم انو ما يصير لها شي وانا موجود.
سعود: ا احلف يا شيخ .. ولا واخلف بقوووه بعد.. وشو اللي تجلس جنبك وانا وش نا قصني..
نواف وهو مطير عيونه فيهم...: لالا... اقول ما تلاحظون انكم فالينها انت وياه ... اسمعوا البنت ما تجلس الا جنبي...
سليمان: يا حليلكم والله قررتوا.. وخططتوا على كيفكم.. اسمعوا القرار يرجع للبنت فاهمين..
لف على ريم: يله اختاري ... من تبغين تجلسين بين مين ومين؟؟؟
ريم وهي تفكر تناظرهم : ابي اجلس جنب .....آآآآآآ.... جنب وقاعده تنا ظرهم واحد واحد.. وعيونهم عليها...وسكتت من الخوف.
سليمان::يله بسرعه اختاري...
ريم: والله يخرعون وين اروح كل واحد يخرع اكثر من الثاني..
سليمان وهو يطالعهم: صادقه......بس اختاري بسرعه عشان اقولك باقي الخطه...
ريم: اختار اجلس بين..آآآآآآآنواف وآآآآ سعود..
تركي باعتراض : لا والله على كيفها هي... ما يصلح ..
سليمان: شنو اللي ما يصلح .. اقول انثبر بس.
ريم: ايوه سليمان كمل الخطه" وطنشت تركي تطنيشه محترمه"
سليمان: انا بحاول اني احل كل مسأله او تمرين يكتبه على السبوره ولو نص الاجابه على اقل..وانتي ركزي معه زين عسى تفهمين..
ريم: ليه شايفني بقره ما افهم.. صح اني داجه في الرياضيات والعلوم... بس هذا ماله دخل في السالفه ..
سليمان: انا ما قلت انك غبيه انتي اللي قلتي .. وبعدين احنا ما فهمنا عشان تجين انتي فهمين..
ونفذوا اللي قاله سليمان بسرعه قبل لايجي المدرس.........وبعد دقايق....
الدرس : السلام عليكم...
الطلاب: وعليكم السلام..
"ريم في هذي اللحظه بتموت من الخوف إلا ماتت من الخوف"
وبدا يفتش على الواجب.......... ووصل لحد طاولة نواف وفتش على دفتره..وعدى ووصل لدفتر ريم كان سليمان حال لها الواجب وخذاه..ريم واللي جنبها قلوبهم بهالوقت طاحت..
المدرس: مين هذا دفتره..
نواف : هذا دفتري..
المدرس: لاااا نواف هذاك دفترك ... انا اقول من هذا دفتره ؟؟؟
سعود: هذا دفتري...
المدرس سعود دفترك قدامك ... وتركي دفتره عنده..
"ريم طبعا ما تقدر تتكلم لان صوتها مرره نعوم وخافت تنفضح"
المدرس حط الدفتر بقوه على الطاوله وراح يكمل تفتيش ..
نواف بلقافه: استاذ ليش تسأل ...
المدرس: لا بس كنت ابي اتأكد من الطالب لان حله صح ... وفتش على واجب سليمان وراح عند السبوره..
المدرس: مين يحل الواجب....
الطلاب كلهم يشاركون معاه..
المدرس قعد يطالع فيهم .... بعدين طالع تركي وبعده سعود وبعده نواف وطالع ريم ... ريم نزلت عيونها وعرفت ان فضيحتها قربت ..... وفي النهايه اختار ...............................: سليمان يلا اطلع حل الواجب...
كلهم بصوت واحد: اووووووووووووه الحمدلله...
طلع سليمان يحل المسأله على السبوره ونسى نص الحل من الخوف مسكين ...
المدرس: شفيك سليمان مو من عوايدك ..
سليمان: سلامتك استاذ.. بس راسي يعورني شوي..
المدرس: ما تشوف شر ارجع مكانك.... وطلع طالب غير يكمل المسأله .....وعدت نصف الحصه وهم حاطين ايديهم على قلوبهم....
المدرس: يلا مبن يطلع يحل هالتمرين.... جلس يناظر الطلاب وطاح اختياره على :انت يا اللي هنا ذكرني بأسمك.... واطلع حل التمرين..
وقفت ريم وما عاد تحركت ولا تكلمت وتحس انه لراح يغمى عليها ......ساكته ما تكلمت والمدرس يستنى منها اجابه..
نواف وهو مغطي فمه بيده ومغير صوته: اسمي بندر..
المدرس: يلا بندر اطلع حل التمرين....
سليمان حاول يحل المسأله وما بقى الا الاجابه .. لفت عليه ريم وعطاها الورقه وخبتها وراحت لعند السبوره بخطوات متثاقله وكأنها بتطيح ورجولها ما تقدر تشيلها .... ووصلت واخيرا لعند السبوره .. واخذت القلم بأيد ترتجف وغطت ايديها بطرف الثوب عشان ما تبان وبدت تحل المسأله ..... وكتبت (ق)على (ح) ... ووقفت..
المدرس: يا بندر ركز هي (ق)على (ح)؟؟
ريم بون ما تتكلم مسحت وحطت(ح) على(ق) وكملت باقي المسأله وعيونها غرقانه دموع وايد تنتفض من الخوف......... ويوم الاجابه توهقت .. لفت على الطالب اللي قدام واشرت له انه يغششها ... وطلع الطالب طيوب وقالها الاجابه وكتبتها بسرعه وودها ترجع مكانها عسى تحس بالراحه ولامان ... ورجعت وهي تمشي عشان توصل لكرسيها كان الثوب طويل عليها فتعكرت .... بتطيح خلاص ريم خلاص عرفت انها انفضحت قام تركي من مكانه وبسرعه مسكها ووقفها عدل وقعدها مكانها ..
المدرس: خير بندر فيك شي ....
نواف مغير صوته: لا استاذ سلامتك ما في شي...
ريم طلعت شهقه ومن بينها دموع خوف ورهبه ووعدم الاحساس بالامان تلقاها من وين ولا وين ...من بين انها جالسه بين عيال ماتدري وش نظرتهم لها ولا على الكلام اللي ينقالها وعلى انها ما تدري بترجع بيتهم ولالأ ومن ايش ولا ايش....
حس الكل انو هالحصه كأنها عود مو راضي ينبلع ومو راضيه تخلص ساعه الا ربع كأنها سنه الاربع ..


<******>drawGradient()i btesama7
رد مع اقتباس
  #3  
قديم July 12, 2010, 09:21 PM
 
رد: روايه على كيف كيفك والله ما تتحسفون

مشكوورررره حبيبتي

الله يعطيك العافيه من جد ذوق

رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
روايه (والله لجيب راسك) طبيعه بنت روايات و قصص منشورة ومنقولة 7 June 5, 2010 12:03 AM
خبرمهم جداجدا... أرجوا التثبيت صدقوني ماراح تتحسفون *& ريم الفلا &* النصح و التوعيه 7 July 25, 2009 12:51 PM


الساعة الآن 01:26 PM


Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر