فيسبوك تويتر RSS



العودة   مجلة الإبتسامة > الروايات والقصص > روايات و قصص منشورة ومنقولة

روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا



إضافة رد
 
LinkBack أدوات الموضوع انواع عرض الموضوع
  #1  
قديم August 28, 2009, 10:10 AM
 
حظي المنسدح رواية للي يحبون يضحكون ضحك خبال وصرقعة ...شوق والاشقر المزيون ..2

الجزء (2)

على الباب
هند : أي دستي على رجلي نوره وخري عني
نوره .. مو انتي ماخذه كل المكان
انا .. تسمعون شي
البندري. ليش ما طفيتي المكيف ما نسمع شي
هند : اوووووووووووووووف خلاص بروح ومصير امي تعلمناا
رحنا كلنا جلسنا قدام التلفزيون وطالعنا مسلسلنا اللي نتابعه

هند .. شوفو شحلات مكايجها
نوره.. ولا بدلتها شلون مربطه عليها الفيونكات قمت الذرابه
انا.. ووووووع موحلو ماعجبني
هند.. شعرفك انتي بالذوق انتي حدك ملابس سوري على دينار
انا: وشفيها ساتراتنا..هالملابس اللي مو عاجبتك

وقطع علينا حوارنا الشيق حول الملابس والمكياج وقلت لهم مقرره انزل مكياج
بأسمي مو احسن مني خبراء التجميل

امي : وهي ماسكه التلفون
كلنا : هااه يما شيبي
امي: شقول لكم بعد
كلنا.. يما شسالفه
امي.. ابوكم مريض من 6 شهور ويبي يشوفكم قبل ما تتدهور حالته ومايشوفكم
كلنا .. قمنا نطالع بعض مستغربين وشعور ماله وصوف هو خوف هو حزن هو فرح
شعور ما ينوصف
هند.. خلاص بنات قوموا نلبس نروح لبونا
امي. لا لا ابوك مو بالكويت ابوك بلندن يعالج
نوره.. وشلون نشوفه
امي.. ولد عمكم بياخذكم هناك عند ابوكم والسفره بعد خمس ايام
انا : نقزت على طول لغرفتي وقمت اطلع ملابسي
امي.. صبر صبر شفيك بيمرنا ولد عمكم اليوم ويسوي جواز لهيونه ويجدد جواز شوق
انا .. لا هذا وقته ينتهي جوازي
امي. ماتبين تصورين
انا.. واااو اصور ..

ورحت احط مكياج واطلع احسن ملفع عندنا عشان تطلع الصوره جنان

امي.. بس شرطي ماتحطين مكياج بس كحل وخفيف بعد
انا. لا ليش هالتحكم
امي.. هذا شرطي
انا.. يؤؤؤؤ ورحت لبست أي شي حتى كحل ما حطيت

ورحنا صورنا انا وهيونه طبعا صار فلم عند المصور تهاوشت انا وهيونه من يصور قبل
لولا تدارك المصوره للامر وحل النزاع بعمل قرعه
كان تلاقينها متشرده بالشارع لانا بنكسر المحل

طبعا صورنا صور مستعجله صورتي انا حدث ولا حرج تقول
هنديه منحاشه من معزبتها ولاعنين خيرها المكتب من الطق
عقب ما شفت صورتي ايقنت ان الجمال جمال الروح لا الوجهه

.................................................

البيت استنفار اللي تكتب شنو ناقصها من ملابس
واللي ترتب ملابسها واللي تغسل ملابسها واللي تجمع ألعابها واللي تتصل بريفجاتها وتحرهم
انها بتسافر في الصيف لندن
واما امي فكانت محتاسه لانه ولد عمي بيجي
وهي مستحيه منه
ماهي عارفه شنو تسوي

وصل ولد عمي اخذ الاوراق وسوى جوازاتنا وحنا انحلت ازمتنا خلصت كل وحده فينا
جنطتها وحطتها عند الباب طبعا هالكلام قبل السفره بيوم
امي تبكي اول مره بحياتها بتودعناا

حنا طبعا ضحك وفرفشه وناسه بنروح لندن يعني اخر استهبال ناس اجانب
مايفهمن لغتك يعني بالعربي ... مصخره...


من بكره


اول وحده قايمه انا الساعه 7 الصبح رحت تسبحت ولبست ملابسي ولبست مانتو بيج
مع نقابي ولفه بيج
وخواتي طبعا مثلي عدا البندري اللي مو منقبه وهيونه

انا : شنو اروح لندن لابسه نقابي
امي.. وصيه ما تقط نقابها هالبنت لاني اعرفها بتسوي بلاوي بلندن
هند. لا توصين حريص انا لهاا
نوره. شواقه حبيبتي ياقلبي حنابنروح مع ولد عمي يعني فشله تقطين نقابك
اصلن احمدي ربك مخلينك لابسه مانتو ولا مخلينك على عباة الراس
انا.. عشان اول ما اوصل مطارهم الا انا بالسجن على طول حاطين مع قايمة المطلوبين
الكل.هههههههههههههههههههههههه

سمعنا صوت دقات هرن .. دييد دييييييد
امي.. هذا ولد عمكم يالله نزلو تحت

نزلنا سلمنا على جدتي وطبعا وداعنا كان طويل حيل
وعقبها ركبا مع ولد عمي

اول ماشفناه كلنا شهقنا ..

هند.. يهبل شحلاته انا حاجزته
نوره.. يالله عاد انا شفته قبلك
هند.. بس انا اكبر
انا.. والله مصخره هلحين رايحين حنا لندن عند جورج وتوم وتطالعون سليطين
صج بنات فقر
البنات استحوا على وجيههم وركبا السياره ..كانت جيب رنج روفر لونها سماوي

الكل.. سلام عليكم
سلطان.. وعليكم السلام هاه كاملين نمشي
هند.. ايه

ومشى سلطان فينا طبعا قام يسأل اسأله انتي منو وكم عمرك وش تدرسين
اسألت مليغ

انا.. سلطان ناقص مقاس جوتيي ووزني ماعرفتهم
الكل.. هههههههههههههههههههههههههه
سلطان.. هااه اجل انتي شوق قالو لي والله عنك انك مو صاحيه
وامك اكثر وحده تحذر منها انتي
انا.. لا حووووول وش بسوي انا يختك ذلونا انتي بتسوين بلاوي ينخاف منك
يعني شنو بشرب خمر ياربي
الكل.. ههههههههههههههههههههههههههههه

وصلنا المطار

صح نسيت اقولكم ان ولد عمي سلطان طيار وهو اللي بيقود طيارتنا
بيقود شفتوا شلون جبتها الشاطر اللي يقول وين محلها من الاعراب..
نرجع لقصتنا


هيونه.. يعني انت سواق الطياره يعني سايق
سلطان.. احد يفهم هالبنت اني طيار
هند.. هيا حبيبتي تعالي ومسكتها اختنا هند << اخيرا سوت حاجه فيها خير

وعقب اجراءات السفر والتذاكر
وقعدنا في استراحة قعدنا نضحك
ونعلق طبعا ولد عمي بعد عنا شوي وراح يكلم طاقم الطياره ويوصيهم علينا

وانا والبندري كنا نعلق على الناس ونشكك الواحد بنفسه

نادوا على الطياره وركبا طبعا كلنا درجه اولى وااو كان شي جميل

هند وهيونه جنب بعض قدامي انا والبندري
اما نوره فكانت جنب حرمة كبيره
كنت انا صوب الممر وكان في الطرف الاخر في نفس مكان مقعدي شاب بالعشرين من عمره
كان غايه في الشياكه والجمال ..
يطالعنا ويضحك على تعليقاتنا انا والبنات
وعلى هيونه يوم قامت تصفق وتغني درويلنا عاش عاش دريولنا طيط طيط
كان الموقف تحفه
اما العقيديه اللي جنبي البندري فكانت مبحلقه بالدريشه وتتكلم بصوت عالي كأن الطياره
باسم ابوهاا

مثال..

شوووووووق شوفي السحااب لونه ابيض
انا.. بالله علبالي اخضر
هي.. شووووووووووق شوفي اشوف الناس صغار
انا.. فضحتينا الناس كلها عرفت اسمي

اما هيونه فكانت تصيح علي بصوت عالي ..
شووق متى بيجبون الاكل متى امي تقول بيعطونكم ملفوف
انا.. حشى كبد ملفوف بالهصبح توك ماكله مسرع ما جعتي
هيونه.. بطني ولا بطنك كيفي

نوره تهمس للحرمه اللي جنبها .. كيف اشغل التلفاز
الحرمه بكل كبر .. تسويه لنوره
نوره.. مشكوره
طالعتها بنظره غريبه وحطت السماعات بأذنهاا


نوره.. تأشر لي .. شواقه شواقه <<<<(كلامنا كان بهمس )
انا : نعم شعندك
نوره.. تبادلين اماكن هالحرمه مليغه حدها تصدقين مغروره
انا.. يابنت انثبري مكانك ان غيرنا اماكنا بتصير صيحه وهواش تعرفين خواتك
المفضحاات حطي على الراديو واسمعي لك شي وانطمي
نوره.. تشكورات اختي كم الحساب
انا.. خمسطعشرين فلس
نوره.. أي لغه هذي

الشاب اللي جنبنا ميت ضحك على خبالنا ..؟.؟..

وصلت المضيفه وقامت توزع اكل

هيونه: هياا اكل اكل
هند: شفيك انتي تقولين مجوعينك بس انطمي فضحتينا
هيونه: كيفي دافعين فلوس
انا: ياعوب هالبنت جيبيها لي اطرمها لك
هند: لا فكينا من شرك

اختي نوره نايمه وقام يصدر من خشمها وانفها سمفونيات
لم اسمع مثلها من قبل ولا مقسمه عدل

اللي جنبها منقرفه ومنزعجه ..

انا : نوره نوره نوره
نوره: طسي عن يور فيس
انا: بدايتها بدليات بالانقلش هذا وانتي احسن وحده فينا
نوره: وصلنا
انا: لا ريضين بس قومي صوت شخيرك واصل للطياره اللي جنبنا
نوره: انزين قمت قمت ياهم بلشه هالخوات
اسمعي طلع معي بيت شعر
انا: قولي وش عندك
نوره: البطن فاضي والخوات قشرات..... والنوم محروم منا وألينا
انا: كم مره اقول لك لاعاد تكتبن قصيد كملي نومتك

بعد ساعه اركدوا خواتي لانهم جميعهم طخوا وناموا مو بس خواتي كل اللي معانا
في الدرجه الاولى

اما انا فمن الفرحه مانمت قعد اقرى مجله واسمع للراديو كان حاطين اغنية جميله
حيل
(( شكواي للي يفتهم شكواي))

لاعت كبدي من هالوضع لاني ما احب اقعد كذا فاقمت استهبل على اختي البندري
ادخل الكلينكس في خشمهاا واضحك عليهاا

واستمر هالحال لين قامت وقمنا نسولف ونقول نكت مليييغه حيييل
مثال:
البندري: في واحد تغدى وعقبها راح للحمام ليش :
انا: ليش << قلت شكلها داهيه
البندري: بيغسل ايدينه .. هههههههههههههههه
انا.. من ملاغتها قمت اضحك..هههههههههههه
انا.. اجل بقول لك نكته في عنز مثلك وشرواك منسدحه على البحر ليش
البندري.. اممممممممممممم تتشمس
انا.. لا ميته..هههههههههههههههه.. اعلمك شلون الملاغه

وقضينا وقتنا هذا سوالف ونكت مليغه وجانا ولد عمي يتطمن علينا اخذ هيونه
وسوا لها جوله حول الطايرة
وهي مصره انه سواق لين اقنعته انه سوااق..؟..

وصلنا لندن ونزلنا من الطياره طبعا قعدنا اخر الناس نزلوا الركاب و حنا قعدنا لين جانا ولد
عمي واخذنا معااه

سوينا اجراءات الوصول و...إلخ ومشينا ..

وحنا نمشي ما درينا ولا نشوف واحد جاي عند سلطان ويحظنه ويسلم عليه
وقاموا يضحكون ويسولفون وبعدها عرفنه عليه طلع ولد عمنا اخووه متعب

ركبنا سيارته وودانه للفندق اللي ساكنينه كان الفندق قريب من مستشفى ابوي يعني نروح ونجي له
مشي على الاقدام عادي ويبعد عنه بشارع سوق مع هايدبارك
اول ما وصلنا الفندق اقصد الشارع بعد ما استوحشنا المكان لان كل اللي نشوفهم
عرب وياكثرهم العرب فيه مطاعم محلات كافيهاات والخ ..

وصلنا الفندق راح متعب قدامنا اخذ مفاتيح السويت اللي حنا ساكنينه وامر القرسون انه
ياخذ شناطنا منا

كان شعور حلو وكأنك ملكه الله يا حظهم الاغنياء مستانسن بحياتهم

المهم

وصلنا للسويت حقنا كان عباره عن غرفه كبيره مره مع كنبتين وقدامهم تلفزيون بلازما
وحمام << الله على حمامهم
ومطبخ تحظير صغير مره ..؟.؟.؟...

متعب.. بنات انا بالروم اللي جنبكم أي شي تبونه تعالوا لي وانا طبعا بجيكم كل شوي اتطمن عليكم
هند.. انزين متى بنشوف ابونا
متعب.. هو اللحين عنده فحوصات ماتخلص الا الساعه 5 العصر وطبعا راح يكون تعبان تشوفونه باجر احسن انتوا ارتاحوا وانشالله تشوفونه ...

راح متعب وخلانا وعطانا بعض التوضيحات ارقام مطاعم عربيه ورقم طوارئ ورقم الرسبشن
ورقمه هو ورقم مستشفى ابوي..

وجلسنا حنا نضحك ونسولف ونعلق وكنا جالسين بالبلكونه نشوف العالم ونضحك
وكان اخر فله

وعقبها تفرقنا اللي راحت تنام واللي تطالع التلفاز والي تلعب بعرايسها
واما انا والبندري فلم يعجبنا الوضع فقررنا اننا نقول لمتعب بنتمشى شوي ونجي

رحنا لمتعب وطلع لنا ..
متعب: خير صاير شي
انا: لا والله بس ودنا نتمشى شوي بالحديقه ونرجع
متعب: هااه حديقه .. وقام يفكر .. بس اخاف يصير لك شي
انا: لا تخاف حنا سبااع ناكل الضباع ومحنا مبعدين كاهي الحديقه مو بعيد وراجعين
ان صار لنا شي اتصلنا فيك معانا تلفون ومعانا فلوس ومعانا ديو
متعب: ديو شنو
انا. بيبسي اوي ألبك
متعب: هههههههههه اوكي لكم ساعه ساعه وحده وبس وان مارجعتوا بدوركم الحديقه وبس انزين
اانا: انزين


يتبع






__________________
عذرا,,التوقيع مخالف لقوانين المنتدى
رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
رواية الحظ المنسدح ............ رواية فكاهية ورومانسية قمر الرافدين روايات و قصص منشورة ومنقولة 33 January 22, 2011 04:50 AM
للي يحبون الغمازات زمـاآن الصمت مجلة العناية بالبشرة 13 October 16, 2009 04:44 PM
حظي المنسدح رواية للي يحبون يضحكون ضحك خبال وصرقعة ...شوق والاشقر المزيون توولينا روايات و قصص منشورة ومنقولة 0 August 28, 2009 10:09 AM
كانوا من الذين آمنوا يضحكون sakka النصح و التوعيه 5 March 12, 2008 11:44 PM


الساعة الآن 02:30 PM


Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر