فكرت مرة .... بابتسامتك!

حسيت قبل مرة إنو قلبك وسع الدني وسع السما .. قادر تضحك لكل نسمة بتمر , لكل كلمة بتنهمس, لكل نظرة كانت إلك صدفة..
ما بتعرف السبب الحقيقي , بس فعلاً قلبك من جوا عم ينبض عم يحكي عم يضحك...
نفس القلب نفس الروح... بوقت تاني بزمن تاني , مش قدران تحكي مش قدران تشكي حتى البكي صار صعب , ما كنت بتتخيل إنو الدني صارت أصغر من إنو توسع لدمعة ...
الشي العجيب إنك بعدك قدران تبتسم !..
كيف؟ من وين القدرة على الابتسامة!
إذا الحروف اختنقت جواتك .. حتى الصور يلي انرسمت بخطوط خيالك يلي حمّلها أحلى الألوان ,أعذب موسيقى ..
ما عادت صور ,فجأة اختفت , كأنو العمر يلي جايي من حياتك مسح صور انكتبت من زمن ماضي وحفر دهاليز لخطواتك ... مهما مشيت .. مهما اركضت... بعدك بنفس المتاهة...بعدك عم تسأل ...ليش؟
بس قدران تبتسم.... رغم إنو قلبك ... صدقا أوقات كتيرة بتفكر .. يا ترى ... بعدو مطرحو...
يمكن أوقات الابتسامة مش أكتر من راية بيضا حملها وجّك ليعلن فيها الاستسلام...
يمكن أوقات بتبتسم لأن معجم كلماتك أفلس من أي حروف تحكي ...
يمكن أوقات الابتسامة أسهل ,لأن البكي صعب نتشارك فيه مع حدا كان ألأقرب ,كان.....
يمكن أوقات بنبتسم لنعبر عن دعوة رضا رغم الإنهيار يلي حاسس فيه كل ذرة فيك...
يمكن أوقات الابتسامة هي الدرع الأخير يلي بنتخبا وراه قبل لحظة اغتيال المشاعر, قبل لحظة الموت النهائي...
.....
كلماتي كتبتها ..مع.. ابتسامة..ما فارقتني ولا حرف ..

__________________