مجلة الإبتسامة - قالت أحبك.. قلت شفتي الطوابير ؟ / صفّي وراهم كلّهم ينطروني !

قالت أحبك.. قلت شفتي الطوابير؟؟
صفي وراهم كلّهم ينطروني

ما عاد لي ف دروب حبك مشاوير
ما عادت ظنونك تخيب ظنوني

كنتي جناحٍ به من همومي آطير
كنتي (سحا..) لا والله كنتي مزوني

كنتي الكتاب الممتلي بالتعابير
أقرأ عيونك وانتي تقري عيوني

غمضت عيني طحت وسط المقادير
ما قصروا أقل الوفا كفنوني

فتحت عيني ودي آشوفني غير
لقيتني عايش لوحدي بدوني

اللي رسموني يا شهد بالتباشير
مدوا يديهم يا شهد وامسحوني

مدوا يديهم للفؤوس المناشير
سموا على جذعي وبدوا يحطبوني

يوم ان مال الجذع واصطفت العير
ما طاح جذعي لين طاحت غصوني

طاحت غصوني قمت أسط العصافير
ما باقي إلا صوتها في أذوني

طحت ولقوا صوتي شرات الدنانير
قاموا مع الميراث يتقاسموني

اللي شكت من ريحهم نفخة الكير
اللي وأنا ميت عطش ما سقوني

اللي صوانيهم ذنوب ومعاذير
إذا لقوني في عشاهم كلوني

وأنا لو إني من عيال الهوامير
ما كانت دموعي تبلل ردوني

وأنا لو إني من عيال الهوامير
ما كان ريح الجوع تذبح صحوني

وأنا لو إني من عيال الهوامير
ما حطت هموم البشر في متوني

هاتي يديك شوي.. شوفيني بخير؟
أيوا بخير وهيبتي في حصوني

ساسي متين وهامتي تغري الطير
ريح المنايا ما تزعزع ركوني

وإذا لقيتي عزفين المزامير
قولي لهم خلف الضيا يلحقوني

والحين عذرا.. خلف ذيك الطوابير
حرام صار لهم عمر ينطروني