تخصص ريد
 

كنت فاكر
الزول البحبك بفتش عنك
مكان مكان
ما كنت قايل بغش
لكن صحيح
الايام عجايب
فيها ناس تغش
حتى في الحب
تشيل تقش
تكنس دوب الريد عديل
اتعودت الغش
تبيع من غير خجل
قلوب عشاق بلاش
لا دينار و لا فلس و لا قرش
اتعودت دايما تفتش
للعذاب
شان تجرح قلوب
تلذذ شديد
لمن تغش
ما هماها كان حرق القلب
أو
سهرت عيون
اصلو حرفة الريد بقت
زي السلع مفروشه في السوق فرش
عايز تحب
تعالنا جاي
نديك قلب نضيييييييف
ماهر في التعذيب من كل لون
من كل صنف
بيعرف وكتين خلاص يتمكنك الريد
بالاعذار يلف
يفتش غيرك
ما خلاص
انت بقيت قرف
ما بتعرف تريد
ما الريد عايز تكون تعرف تغش
تعرف تبيع
تعرف تفرش كم صنف
تعرف تزوغ
من غير تتعترف
تنتف قليب عاشقك نتف
تخليهو لا ميت و لا حي
و للدموع ينزف سرف
يملأ الوسائد و المناديل
يطفي شمعة
يوقد شمعة
حتى الشموع جفت فيها الدموع
و برضو بتقول بتريد
و عديل من غير صلف
تحلف حلف
كل الاعذار كملتها
و لسه بتكوس سبب للغياب
تهمس أنت بي عتاب
وين يا زول أمس
و انت الغبت من أول أمس
اتاري الريد عندك كده
وقعت يا قلبي و ما سميت
زولك ببيع الحب
لكل محب
جرب تكسب
حرفتنا نحب
كم يوم بس
بالكتير شهر
نغير الحبيب
زي شراب الحليب
ساهل نجيب
من غيرو
كم حبيب
ما صعب
كلمتين بالكتير
بنلقى كم قلب
عايز يحب
تعزل عزل
تشوف القلب الرهيف
المن غير تعب
يقع يحب
ينكبه فيك كب
زي موية المطر
ينصب صب
ينهل عليك
ما يخلي كلمة في الغزل
إلا يقول ليك
في خديك و المقل
وجنتيك يا احلى من العسل
لمن يدوب
و يستوي تب
تشوف غيرو
يكون مجروح
كم جرح
شان تزيدو جراح
تصيدو صيد
زي نافر الصيد
اصلو كان ميت عيون
كاتله الحسان
بنهيد و جيد
شاهره السلاح
ماده ليهو ايد
شان تنقذو
و انقاذه لي
تقيدو من جديد
بحبال ريد جديد
تمني بالحب الاكيد
تنسي الفات مضى
و بي طيبة قليب
يقع البليد
في احلى صيد