مجلة الإبتسامة

مجلة الإبتسامة (https://www.ibtesamah.com/)
-   كلام من القلب للقلب (https://www.ibtesamah.com/forumdisplay-f_159.html)
-   -   بحبك يا مصر (https://www.ibtesamah.com/showthread-t_258489.html)

bright star 2000 February 6, 2011 07:11 AM

بحبك يا مصر
 



بَحِبِّكْ يا مصرْ ..

وبعشقْ ترابكْ .

وألِفْ المداينْ ..

وأرْجعْ لبابِكْ .

وأحِسْ بكيانى ..

وكرامتى فْ رحابِكْ .

يقولوا فقيره ..

يقولوا أسيره ..

بشوفِكْ أميره ..

وأحبِّكْ يا مصرْ .



بحبِّكْ ملايه .. ومنديلْ بِقُويا .

مقالبْ من أختى .. وغتَاته مْنْ أخويا .

ودعوه مِنْ أمى .. تنسينى همِّى ..

وحِكْمَه مْنْ أبويا.

وأحبِّكْ صبيِّه .. على البحرْ جايَّه ..

فى ساعةْ عصَارى .

ونسمه قُبَالْها .. تطيَّرْ فى شالْها ..

تبَيِّنْ جمالها .. وتِرجعْ تدارى .

وأحبِّكْ مراكبْ .. تعدِّى إللِّى راكبْ ..

لبرْ الأمانْ .

يدوبْ جوَّا نيلكْ .. ويعطشْ يجيلكْ ..

يقوللِّكْ كمانْ .



وأقابلِكْ ببُوسه .. فى زفِّةْ عروسه ..

ولَمَّه فى بيتنا ..

مع ولادْ حارتْنا ..

تدُقْ المزاهرْ .. ترُدْ المزامرْ ..

تزَغْردْ جارتْنا .

نهلِّلْ .. نغنى ..

وحلمْ التمنِّى ..

ينورْ ليليتنا .

وأحبِّك زياره لبيتْ عمْ سيدْ ..

ده أصله فقير مِشْ حيقْدرْ يعَيِّدْ ..

نعَيِّدْ عليه .. نفرَّحْ عنِيهْ ..

ويدعيلْنا دعوه بمليونْ جنيه .



فى أرضِكْ يحِسْ الغريبْ إنُّه مصرى ..

وإحنا الأجانبْ .

ويلْقَى الرعايهْ .. ويلْقَى الحمايهْ ..

على كلْ جانبْ .

ويمشى ف ربوعِكْ .. ويشبعْ بجوعِكْ ..

ويعملْ مصايبْ .

ويرحلْ وينسى .. جِميلِكْ ويقْسَى ..

ويطْلَعْ يعايبْ .

ويرْجعْ تسامْحى .. يا ساكنه فْ ملامحى ..

يا سِتْ الحبايبْ .



ولادِكْ بَنُوكى .. بروحْهُمْ فَدُوكى ..

ويِشْهدْ عليهمْ ترابكْ فى سينا .

ومنهُمْ با عوكى .. عشانْ الشِيروكِى ..

وفيللَّا فْ مارينا .

يعيشوا فى خيرِكْ .. ويدُّوهْ لغيركْ ..

ولادْ اللَّذِينا .

ولوْ جارْ زمانْهمْ .. يعودُوا لْمكانهمْ ..

يلاقوا السَكينَهْ .

وتِنْسِى جحودْهمْ .. وتبكى عليهمْ ..

عنيكى الحزينهْ .



فى أرضكْ سرَحْتْ .. فشَلْتْ ونَجَحْتْ ..

وعشْتْ بْبساطَهْ .

صاحِبتْ الحمَامْ .. ونِمْتْ فْ سلامْ ..

ولوَْ عَ البلاطهْ .

تِغَيَّرْ فى شَكلى ..همومى ومشَاكْلى ..

لكِنْ روحى لأْ .

أعَبَّرْ بغنْوهْ .. وأقولْ نُكتهْ حلوهْ ..

لكِنْ يأسْ لأْ .

ما طيقْشْ الغَتاتهْ ..

وقلبى المسالمْ ما يعرفْ شّماتهْ ..

وأقولْ بالتلاتهْ ..


منقول
لك من قلوب كل المصريين

برهافة حس February 6, 2011 06:26 PM

رد: بحبك يا مصر
 
بحبك يا مصر ..،
اقتباس:


ف يوم النصر
ف أكتوبر
ف شهر الصوم
على الجبهه
عشان خطرك ..
دفع مهرك
وسال دمى
على ترابك
وشوفته أبويه
ف منامى
يا مصر..
ف حضني
بتنامي
و غنيلك..
تغنى له
وبفرح جوه أحضنانك
فحبك مصر..
ضحينا
حدود الصعب ..
عدينا
وبسم الله وكبرنا
رفعنا الرايا بادينا
ف حبك مصر
بحور الشعر
ننساها
و بكتبلك على الأشواق
أنا المشتاق تضميني ..
أنا الشاعر ..
بحالة عشق فياضة
أنا نفسي أكون نيلك
و قنديلك
و انور لك أنا ليلك
أكون لحنك
و أغني لك
عن الأشواق
وعن عمرك
وعن شمسك
وعن قمرك
وع الأغصان
يا غصن زتون
حمام ابيض
تاريخ وحضاره جواكى
ياست الحسن
يا شيله الحزن من قلبي
و زراعه الحب جوانا
وحشتيني وأنا معاكى
أنادي لك
أنا جيلك
أنادي لك ..
تضميني
وتخدينى
تلاقيني ..
أنا في نيلك
وعديلك من الأهوال
وان طالت ..
هموم الدنيا
لو مالت على كتفك
اشيلها لك ..
وعديلك صعاب وصعاب
بحبك مصر وبقوه
يا نبض القلب من جوه
يا دم بيجري
في عروقي
كتبت لك
ومن شوقي
بحب في شعبك الطيبه
وروح النصر
بحبك مصر .


bright star

بوركت يمينك

فـ مصر تحتاجنا الآن أكثر من أي وقتٍ مضى ..،

عافاكَ ..}


نوجا النور February 6, 2011 08:39 PM

رد: بحبك يا مصر
 
و الله اجمل ما قرات في حب مصر


الساعة الآن 09:30 AM

Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر