مجلة الإبتسامة

انكسر في جواي كتير
خاطر الكتابة
و حكاية الزول الجميل
براءات الطفولة
وقتين تشق المستحيل
تساسق للفرح الاصيل
تفتش في وشي الأمات
كان تلقى أم
تحضن تشيل
أو
حتى بسمة للتايهين دليل
تضوي ظلمة حالكة
ظلمة ما شقاها نور الصباح
يدخل نسمة في الجسم النحيل
أو
حتى حتة حنية تداوي
قلب كسير
ما ظلاه ليل
لا شاف نوم
لا عرف لراحة الضمير سبيل
و لا
يد تتبتب
أو حضن يضم يشيل
و لا في نص الليالي
زولا يسأل يا حليل
يا وليد رأسك مالو
الوجع هداهو حيل
يمكن تكون حمى التعب
من الجري و شليل
أو
اخوك داك يكون دفرك
وقع بلحيل
أو
استاذ جلدك شان نسيت
للواجب تشيل
يا جنا الحبوبة
بطل دلع و اقعد عديل
و لا سمع أما تنادي
يا مشيت وين من قبيل
ما سامعني بندهك
التقول بعيط لي سخيل
خلي العند داك
و الحق ابوك
نسي كيس الملاح
و تاني اليجيب معاهو
لبن كم رطيل
يا أمي
يا ست الحسان
ياني ولدك القبيل
برضي عديلك
و ياني جمل الشيل
و ياني جمل الشيل