مجلة الإبتسامة - قصة طبيب اتخدر .. .. كلمات د. أديب بازهير

قصة طبيب اتخدر .... كلمات د. أديب بازهير

ياناس شفت القمر و القمر من وصفها يفخر وطلّة القمر تزرع الفرحه وتجني حصاده

بحاول أوصف لكم وأعبر بس ماراح أقدر أصلاً ما يزيد فيها المديح ولا الاشاده

بحكي لكم قصةٍ غريبه عن طبيب اتخدر طبيب شاطر بس عيبه ثقته بنفسه زياده

لين طاح و الكل صار يتشمّت فيه ويسخر واذا طاح العزيز ظهروا نقاده و حساده

التقى فيها وكان أول لقا قبل ثلاث أشهر في الدور الثاني على باب ذيك العياده

ضِحكت له و ضحكتها ياناس تبهر و تسحر واتقربت منه تبي تكسب رضاه ووداده

و هو واقف وكأنه واحد واقف في معسكر وقفة ذاك العسكري بين الضباط و القاده

يهلّل ويكبّر و يحاول يستوعب المنظر يتأمّل فيها و التأمّل في خلقه عباده

سبحانه الخالق سبحانه اللي فطر و صوّر رزانه وهيبه مثل هيبة الملوك والساده

سألته و من سؤالها ضاع جوابه وتبعثر كأنّه طالب كسول خايف من عصا أستاذه

صوتها كأنّه مخدّر أوكاس منه يسكر رد عليها بس ما استفادت منه أي استفاده

وقتها كان كلامه غريب وملخبط ومكسر وكأن لسانه سهم منهار وطيّح اقتصاده

ارتبك من لمسة يدّها وحتى حاله تغير وضاع بين السؤال وبين عطرها ورذاذه

صار هو المريض وصارت تقولّه عسى ماشر وقالت له تعال و ارتاح على هذي الوساده

وراحت و قالت عن اذنك يا دكتور يا أسمر وتركته لظلام الليل هايم في سواده

مدري شصار في كيانه ليه تغير وتأثر وين العزيمه اللي فيه وين قوة الاراده

وين الجبل اللي مايهزه ريح و مايدمر وين الثقيل اللي مايميل من قوّة عناده

وين اللي وعد قلبه من التعذيب يتحرر وين اللي أعلن على الحب سكوته وحداده

كل شي فيه تبخّر مثل المطر لما يتبخر حتى وعده مع قلبه نسى وقته وميعاده

ياناس جميله وجمالها فوق مانتصور حتى لون عينها وسحره مختلف عن العاده

لو قالت هلا ينقال فيها شعر ويتسطر وينسمع صداها على مر الزمان ومداده

لو زعلت يذبل الزهر و تضمر أوراق الشجر وبدمعها المجروح تبيد كل البشر اباده

لو مرت في مكان بعطرها المكان يتعطر ومن شافها ينسى اسمه وتاريخ ميلاده

ياناس ماينلام هذي ملاك في صورة بشر فيها شي يهز الكيان ويلبّى للقلب مراده

أتمنى تجيه مره ثانيه و تسأله و تؤمر أكيد انه مجهز لهالمعركه كامل عتاده

ولو تبي يعلّمها جراحه ماراح يقصر حتى لو تبي يشرح لها عن النسا والولاده

لكنها راحت و ايش حيلة المضطر لو ينطر حتى قلبه يشتعل نار لين بيّن رماده

وهذا أول لقا وشكله الأخير الله يستر كأنه حلم عاشه في منامه بكل أبعاده

وحسبي الخالق عليها و على الحظ الأغبر ولكل جواد كبوةٍ وحده مالها اعاده

وهذي هي قصتي أنا اللي تخدر وتعثر وهذا هو عيبي أضيع في الجمال وبلاده