مجلة الإبتسامة

مجلة الإبتسامة (https://www.ibtesamah.com/)
-   شعر و نثر (https://www.ibtesamah.com/forumdisplay-f_132.html)
-   -   على باب الله (https://www.ibtesamah.com/showthread-t_256164.html)

احمد صلاح محمود January 22, 2011 05:10 PM

على باب الله
 
على باب الله

https://https://www.youtube.com/watch?v=eQij2sQ619E

خارجة على باب الله

تسعى ف دروب الحياة

جواها ألم وف لسانها أه

عاوزة تبكى ومش فاضية

عاوزة تبكى ومش راضية

ورامية توكلها على الله

يجعلها صبحية خضرة ونادية

تسمع دعى الراديو

تأمن وتدعى وراه

يارب

ارزقنى برزق الواد

واللى وراه

اللى خلقك قادر يعطيك

اللى خلق حد ما ينساه

ماشية بعيلها

وعيلها رغيفه معاه

يبص ع الرايح والجاى

ويشاور لكل الخارجين

يحايلوا فى الدنيا وفى الرزق

فرحان ولا حزين واحدة

وشوش الخلق

نفس التوهة

ومفيش فرق

ماهى دنيا وخدانا وخدانها

زق ف زق

وهى واحدة م الماشيين

ايه يعنى جواها أنين

وغنوة قديمة محبوسة

وقهر سنين

خارجة تجرى بالمشوار

والعيل ماشى ف ديلها

مرضيش يقعد ف الدار

والعيل برغيفه فرحان

أمه قالت له فى العيد

مصروفه هيكتر ويزيد

ويصبح قد ما يصبح

هنقاطع ليه

الواد شبط ف الكلمة

ومن يومها وهو سعيد

بالذمة ده يزعل ليه

ورغيفه يوماتى فى ايده

وحتة جبنة عليه

يزعل

طب يزعل ليه

وهو خمس اعوام

وشايفها حلوة الأيام

وأحلى ما فيها القطر أما يعدى

معبى خلق واحلام

ساعتها يجرى يشاور

ويعمل باى باى

يلاقى أمه تشده

وتزقه لجل يمد

ماحدش فاضى للعب

يجرى وراها ويقطم لقمة

ويودع قطره بنفس الكلمة

باى باى

باى باى

أمه تشخط فيه ف يمد

تحرمه من لذة باى باى


شعر / أحمد صلاح محمود






الساعة الآن 03:53 AM

Powered by vBulletin® Copyright ©2000 - 2020, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر