علمي بها بأيام سن الطفوله

عهد البرائه والغلا بين الاطفال

نلعب ونمرح وانتلاقا بسهوله

نتبادل الضحكه على كل الأشكال

لو اتأخر يوم جتني ذهوله

يسوقها لي الغلا دون مرسال

حتى منامي بعض الأحيان حوله

متعودٍ معها على الضحك وجدال

بالليل اخوّفها ولاهي زعوله

تقول ماني خايفه وانت حيال

لاقلت جاك الذيب جتني جفوله

وليا اشبكتني قلت ياعمري ظلال

وكم مرةٍ قلت ادرسي ياكسوله

تضحك وتعفشني تقول انت محتال

ماني سواتك وتحسبني مهبوله

شطّوره ولابي مثل غيري هبال

وكم مرّةٍ مثّلت دور البطوله

افزعلها واسوّي سوات الأبطال

كل ماأشتكت من طفل زوّد فضوله

ابهدله واعطيه كفٍ لياعال

كبرت وصارت نور عيني خجوله

واصبح وجودي حولها يسبب اشكال

قالت تضل النفس يمّك ميوله

واشفق لشوفك يابعد كل الأزوال

والله ماني من وجودك ملوله

لكن بلاي بعينهم صرت رجال

زولك طويل وصعب حولي قبوله

ومرات اشوفك تلبس شماغ وعقال

ترى الأهل راحو لبوك وشكوله

وادري المفارق بيننا فيه غربال

والله مهما حاولو أو حكوله

تبقى الحبيب اللي له القلب ميّال

ياما منعني والدي عن وصوله

وياما على ضهري عطاني من عقال

قال الغلا له حد واعرف اصوله

واللي مثل سنّك يصيرون عقّال

مايدري ان العقل صعبٍ حلوله

واجسامنا تنبض بها قلوب جهّال

وشفيك يادنيا مشيتي عجوله

كم ضاع بأسبابك أماني وآمال

من بعد ماكنت انتظر شوف زوله

قامت تبكيني صورها والأطلال

الروح صارت بالفراق معلوله

وصار الغلا لصويحبي حب بهبال

ياحظ منهو في حياته ينوله

ملاك بعيوني على الأرض تختال

جاها حظيظٍ غيري ووافقوله

وتحطمت بقلوبنا كل الآمال

راحت بعيد وصارت بغير دوله

لكن غلاها بالحشا حي لازل

ماطاع قلبي في غلاها عذوله

ولايمكن انساها ولا أطيع عذال

ليت الزمن يرجع بنا للطفوله

وابقى طفل . ماودّي اصير رجّال