March 13, 2011, 06:37 PM
|
|
أنا مصرى
يا مصرى الله يفاديك
ماشى والعين عليك
ده يعاندك
وده يحسد فيك
ويقولوا اشمعنى
حتى لو فاضية ايديك
مستكترين اللى ف ايدك دايما
وكأنه لازم ولابد وحتما
يشوفوا دمعك فى عنيك
قال يعنى شافوه قبل اليوم
راضى ولا عرفت اللوم
حر وان اخدك نوم
تطلع زى المارد
ترد الغربان والبوم
وتاخد بدراعك حق المظلوم
ولا تشكى فى مرة ولاتزوم
ولو ضلمة ومليانة غيوم
ولربك بس بترفع ايدك
سبحانه الحى القيوم
هو لوحده وبس يعينك
وغيره ماله لزوم
ناس ياما شرق وغرب
تشوفها ينقبض القلب
وريحة الغل ملياها
كأنها قبر ومردوم
نفسها موت تشوفك مكسور
وتملى اللعبة عليها تدور
لما تشوفك رافع راسك مسرور
يا مصرى روح الله يعنينك
صاين ارضك عرضك دينك
ولا عمرك قصرت ف يوم
ف ميهمكش فى يوم اللوم
ده هما لو طالوا يكونوا زيك
ماكانوش اتأخروا يوم
لكن هما على نعمة ربك حاسدينك
سايبين العالم كله بحاله وشايفنك
ماهو أصله بجد وبينى وبينك
انت الحضارة واصل النور
عزة نفسك راس مالك
وقلبك حامى وغيور
ماشى فى الدنيا ولايهمك
رضا ربك بس اللى يهمك
وتحس ان الدنيا ف ايدك
مادام بيتك مستور
مادام بيتك مستور
شعر / أحمد صلاح محمود
|