ايام وايام

مش كل الايام زى بعض
فى ايام خيرها كتير
وفى ايام خيرها ع القد
فى ايام كلها هنا وهزار
وايام متعرفش غير الجد
ايام بتسلم فيها على كل الناس بسعادة
وايام مفقود فيها الود
ايام تقول لحبيبتك كل ثانية بحبك
وايام تقضيها عند فى عند
ايام تحب فيها ليل ونهار
وتكتب احلى الاشعار
وايام تحس انها ماشية بالعكس
وانك عايم ضد التيار
ما تعرف فيها فرق بين حزن الليل
وحزن النهار
اه لو تعرف بكره فيه ايه
كنت ضحكت من قلبك
كنت ما شلت هم عمرك
ولا شلت فى صدرك اسرار
افرح ياصاحبى وعيش
الايام كده او كده ح تمر
بفرحة كانت ولا ب مر
يبقى افرح وعيش
واسهر كمان كمان للفجر


شعر / احمد صلاح محمود