نسيت انى صاحبك

بتقولى انك مش حزين
بتكدب بس على مين
ما انا زيك يا صاحبى مجروح
وشايل فى قلبى م السنين
من كام سنة نفسى افرح
من كام سنة وكل شئ اقابله بيجرح
ومش قادر امل حاجة
قول وبوح
مش احنا اصحاب
وعايشين نفس الألم
وشاربين نفس العذاب
من كام يوم وانت ساكت
مفيش ولا كلمة
حتى بسمة الصبح الوحيدة
من عينيك غابت
قولى بس فى ايه جديد
حاولت اتصل بيك امبارح
لقيتك سايب رسالة بتقول
الشخص المطلوب بايت مهزوم مغلوب
وحالف ما يكلم حد
هيكلم مين وليه
والدنيا كل ما فيها قاسى
ولا له فيها صاحب ولا محبوب
ونسيت انى صاحبك
انى الوحيد اللى زيك
وانى فاهمك وشايل همك
براحتك يا صاحبى
بكرة تطيب
وترجع تانى لينا
وساعتها عمرى ما أعاتبك
مفيش حبيب بيعاتب حبيب

شعر/ احمد صلاح محمود