للشعر معنى قصيدة للرد على بعض البشر

ما جيت اشخص واطلب العانية



حضرت أشارك بالشعر واوزانه


ماني من اللي عندهم كم نية



يخفي بقلبه غير قول لسانه


ما قلت شي ابتغي به سيه



وإلا تجنّي فكر من هو خانه

وإلا حكي أو سالفة ملوية



صغته بحبك وقافيه مليانه


ما هو كلام قلت من مطوية



من حس مرهف واضح برهانه


شعري بيوت عذبه ومبنية



على أساس ثابت بأركانه


يصعب على مثلك تسوي زيّه



لو تنقله ما تفهم لعنوانه


تتعب ولو تاصل سنينك ميه



تبي تعرفه أو بعض تبيانه

تعجز وفكرك يعترف في عيه


طلاسم ما شفت غير ألوانه


بك عنجهية واهية وهمية



وبصيرتك عن صدقها عميانه

ميقن ولكنك خبيث النية



تجحد ونفسك بالكبر خسرانه


مثلك منافق ماضيٍ في غيه



عمكوس حي مزعجٍ سكانه


ما لك قدر حشيمتك منفية



أهون من إشعار يجيك إعلانه


يا كلّشَمه تحمل صفات الحية



يا كِلّع كلثب راكبه شيطانه


إن كان ما تدري ترى الرمزية



تطلق على اللي بالغين اعنانه


وكان الشعر ينسب إلى الشخصية



أبتركه وانسى جميع ألحانه

إذا أبطلب حاجة مخفية



بقولها للي عظيم شانه


وارضى بما يختاره الله ليه



واقنع بما يقسم لي من إحسانه


الحمد لله حاجتي مقضيّه



والحمد لله ماليه ميزانه

للقول حكمه ما تجي عفوية


وللشعر معنى تفهمه فرسانه