|
|||||||
| روايات و قصص منشورة ومنقولة تحميل روايات و قصص منوعة لمجموعة مميزة من الكتاب و الكاتبات المنشورة إلكترونيا |
 |
|
|
LinkBack | أدوات الموضوع | انواع عرض الموضوع |
|
#10
April 9, 2015, 01:59 PM
|
||
|
|
||
|
رد: رواية موعد مع السعادة للكاتبه العيناويه
نهاية الجزء الجزء الثامن.. ------------------------------------------------ اليوم: الخميس... المكان: في بيت بو راشد.. الوقت: الخامسة والنصف مساءا.. ------------------------------------------------ (شيخة)... مسكت امي من ايدها عدل ودخلت بها البيت...كان فهوودي يركض جدامنا مستانس بانه امي رجعت للبيت..وامي تضحك عليه... ام راشد: ههههههههههه فديتك ياولديه يعلني ماخلى من ظحكتك هذي.. فاطمه: فهووود قووم عن امايه خلها تمشي.... تجدمتنا فاطمه اختي لغرفة امي.. اعتقد عشان تعدل لها الفراش...اما امي سئلتني بهدوء.. ام راشد: امرتي البشكاره تحط الفواله في الميلس لعبدالله.؟!!... شيخة: قتلها امايه بس مادريبها جان سوت اللي قلتلها عليه او لا..بشوفها عقب شوي..انتي لا تحاتين البيت خليه عليه... ام راشد: بارك الله فيج يابنتي.. دخلت مع امي غرفتها ويلسناها عالشبرية...وعقت شيلتها وعباتها والبرقع.... وغصبناها انها تنسدح... ام راشد: انا بخير الا بغير ثيابي وبتسبح وبييكن الصاله... فاطمه: لا امايه..وغلاتي عندج انسدحي ورقديلج ساعتين ثلاث عقب قومي...ريحي عمرج شويه..البيت مابيطير ... استسلمت امايه وانسدحت بتعب..اما نحن..بندنا الليت وشغلنا لها المكيف وطلعنا.... يت البشكاره وشلت شنطة فاطمه وودتها غرفتها الجديمه... ولحقتها فاطمه هي وولدها فهوود عشان تغير ملابسها وتلبس لبس مريح..وانا نفس الشي... بعدها بدقايق رجعنا نتلاقى في الصالة... شيخة: انزيييييييييييييييين اختااااه...شو حالج انتي وكرشتج.؟!!.. فاطمه: اوووف..والله تعبانه تبين الصدق... شيخة: كم بتيلسين عندنا..!! ابتسمت لي فاطمه... فاطمه: لين ما اربي.. استانست الصراحه...يعني مابقعد بروحي في البيت...ياسلااام... شيخة: اللـــــــــــــه...ومتى بتربين..!! حطت فاطمه ايدها على بطنها بمحبة واضحه.. فاطمة: خلال هالاسبوعين..ان شاء الله... شيخة: ان شاااااء الله ربي يسهل عليج.... اطالعت فهوود يعابل التلفزيون ويهوس عالفصوص ويخرب... شيخه: فهوودي شووو تسوي..!!!! اطالعني فهد بنظرة تشبه نظرة ابوه الخقاقه... الشي اللي ظحكني كالعاده... فهد: اتيلي ثبيث توون... (حطيلي سبيس تون).. شيخة: ووووووووه الله لا بليتنا وين ظروسك..؟!! تعمدت اقول حق فهد هالسؤال... يموووت قهر يوم حد يساله عن ظرووسه... وبغيت اموووت من الظحك يوم شفته يدور نعاله عند الباب وياني طاااااير يظربني بها.... فاطمه: فهــــــــــــد....عيــــــــــب... هذي خاالوووه... شيخة: هي انا خالووووه...والا الاحترام الا حق عمامك وعماتك..!! نشيت وشغلت له السبيس تووون...ورديت ايلس عدال فاطمه..وشفت على ويهها ابتسامه خبيثه وهي اطالع الخواتم في صبوعها الطوال... خقاقه مثل ريلها..!!!!.. شيخة: شفــــــــــــــــيج..؟!!.. التفتت لي وفعيوونها نظرة لعوووب... فاطمه: شويخ..على طاري العمام والعمات... صديت الصوب الثاني عنها بنفوووور... شيخة: اووووووه لا...لا تبدين فاطمه... فاطمه: لييييييييييش..؟ حرام عليج والله.... شيخة: لا مب حراااام...انا ما اسامح بهالسهوولة.... ظحكت فاطمه علي.... فاطمه: خمس سنين زعل؟ والله انه حرام عليج... اول امس سائلني مره ثانيه اذا غيرتي رايج.. شيخة: قوليله مابغير رايي... فاطمه: بتغيرينه ان شاء الله...عنبووو كم مره يطرش لك اعتذارات حتى اني احيانا انسى انقلهن لج.... كانت فاطمه تقصد عمر... اخو عبدالله واصغر منه بثلاث سنوات...يعني عمره حاليا 26 سنه... عمر هذا بس عرفت بوجوده في هالعالم في عرس اختي فاطمه قبل خمس سنين تقريبا.. كان عمري ساعتها 17 سنه ..ثاني ثانوي ورايحه ثالث ثانوي.. اما هووو...كان عمره واحد وعشرين سنه... انسان فوظوي..وخريش لابعد حد... وخراشه هذا هو اللي خلاني احقد عليه... مب بدون سبب....اكيد فيه سبب... بخبركم السالفه... الله يسلمكم انا شعري اغلى ماعندي...كان طول شعري في عرس اختي فاطمه واصل لين الركب... وكان مصدر فخري..فقررت اني افتحه في عرس اختي... بالصدفة..اخت عبدالله ليلى اللي عمرها حاليا 24 سنه ..وكان عمرها في العرس 19 سنه.. كان لها نفس الشعر..وتقريبا جي نفس الطول..لكن الفرق ان شعرها ماكان ناعم وايد..لكن تدرون السيشوار يسوي العجب...بالتالي في العرس طلع شعري وشعرها نفس الشي.. المهم... الاخ عمر.. اللي هواكبر من اخته بسنتين... ويحبها وايد وايد...كان خايف انها تنحسد...واصرر عليها انها ماتفتح شعرها ..لكن هي مثلي ..شعرها مصدر فخرها واصرت انها تفتحه في العرس...وحلف عليها قالها بحط المقص فمخباي..وان شفتج في العرس فاجه شعرج ..بقصة لج...!!! وفعلا اخته خافت ..وسوت شعرها تسريحه....لانها باختصار..تعرف اخووها...وتعرف انه بيسويها بدون تردد...!! تصوروا انتوا الباقي.. دخل الاخ اخر العرس..وانا كنت واقفه عدال واحد من الاعمدة ادور امي...كنت لابسة شيله..لكن شعري طبعا طالع ومبين... وبسبب الربشة ماحسيت ان حد وراي....يقوم بعملية جزز.... ماسمعت الا صوت يقولي... عمر: ادري انج بتصيحين...لكن هذا عشان تتعلمين تسمعين كلامي وماتتحديني...!! سرت فظهري قشعريرة تمشي على طول عمودي الفقري.. شو هالصوت الغريب اللي قاعد يكلمني..!! لالا اكيد غلطان..احسن لي ما التفت...وفعلا تميت واقفه مكاني...لكن فجاه شي ادلّـــى جدام ويهي... شي ناعم..ولونه بلون القهوة...انصدمت...هذا شعري..!!!..شهقت والتفت لوراي بحـــدّه... وشفت ويه اسمر...جذاب... وساعتها شفت مثل القرون فوق راسه... ودهشة ماتتصدق فعيونه اللي كانت تتفرس فويهي...وانا صدمه غاضبة كانت على ويهي وانا اتفحص ويهه..واتفحص بعد محتويات ايديه... ماصدقت..مديت ايدي ومسكت شعري..وشفته مقصوص بشكل غير مرتب...رجعت ارفع عيوني للويه الغريب اللي مد ايده وغطى بها شفايفه منصدم..ورجعت عقبها اطالع شعري في ايده...كان بطول الشبر تقريبا.. تعرفون الشبر كم..؟؟ افردوا ايدكم كامله... المسافه بين الابهام والخنصر..هذا هو الشبر...ويمكن اكثر شوي... يعني شعري انقص وقصر وااايد على ايد هالمجرم... ماتتصورون شو كان شعوري... شعري... اللي كان لين الركب..صار اقصر بوايد... واحتفظت اخت عمر ليلى بشعرها الطويل...اما انا....آآآخ كنت على وشك اني اذبحه ساعتها..لكنه مد ايده ومسك ايدي..وحط فيها شعري... بصراحه هو كان مرتبك وخايف حدّه... عمر: انا اسف...تحسبتج اختي ليلى...آسف والله... ومشى بعدها صوب الباب بسرعه بدون مايلتفت وراه... باختصار... شـــــــــــــرد....!!.. اكيد شاف موته بعيووني... ليلتها صابتني هستيريا...راشد كان ميت من الظحك...وامي باختصار قالت لي .. " اكيد عين صابت شعرج في العرس وخلاه ينقص على ايد عمر.. لا تخافين بيطول"... اضطريت اني اخلي امي تقص لي اياه بشكل متساوي لاني ما اثق بالصوالين...لانهن يموتن عالتقصيص..تقولهن قصن سانتي متر يقصن لك شبر... وبس.. من يومها وانا احقد عليه... وهو ياما طرش لي اعتذارات عند اختي فاطمه...لكن انا ماقدرت اسامحه.. يعني ماقدر يتاكد قبل مايقوم بعملية الجززز هذي..!!.. حتى انه اجرأ لدرجه انه يفكر بخطبتي..لكنه ماتقدم رسميا ووكل فاطمه تاخذ موافقتي... لكن بالحلم يحصل الموافقه مني...عشان جي هو لين الحين مايا يخطب...يتريا موافقتي لكن انا طبعا مابوافق مب خبله... اخاف انش صباحية عرسي احصل شعري لين اذني...!!!.. ------------------------------------- اليوم: الخميس.. المكان: في غرفة الغسيل فبيت خلفان.. الوقت: السابعه مساءا.. ------------------------------------ (مهرة).... جلبت كندورة سهيل على طاولة الكواي عشان اكويها من ورا.... كنت احس باكتئاب..وفوق هذا..احس بشعور غريب..بالفراغ... والا بالله عليكم حياتي شو لها من المعاني..؟؟؟ مالها معنى ابدا... يمكن يوم تبدا الجامعه انشغل شوي..!!.. كملت كواي وانا افكر باللي مر علي على طول اليوم...وغصبن عني..فكرت بولد خالتي راشد...لاني وايد تلاقيت معاه اليوم...بالعاده ما ايي بيتنا ولا نتلاقى الا نادر جدا ...واليووم..!!..اووففف..شو اقول بس.. مايعرفني وفوق هذا يغلس علي...شو يبغي فيني هذا بعد...!!.. رفعت راسي وانا اشوف عفرا حرمه اخوي حمد تدخل غرفة الغسيل... عفرا: انتي هنيي...ادورج... مهرة: خير عفرا..!! عفرا: خيير..ماشي بس زهقت..عمتج تطبخ ولا خلتني اساعد...تبيني اكوي عنج..!! مهرة: لالا...انا مسيطرة عالوضع تمام... عفرا: ههههههههه...على راحتج... كملت انا كواي... مهرة: شخبارهم اهلج..!! ابتسمت عفرا بفرح.. عفرا: بخيييييير..بلغتهم سلامج..ويردون السلام عليج... ابتسمت انا بعد.. مهرة: الله يسلمج وياهم من الشر... يلست عفرا عالكرسي الموجوود في غرفة الغسيل... عفرا: مهرووه...همم..متى بتتشرين اغراض للجامعه..!! رفعت نظري لها باستغراب.. مهرة: شو اغراضه بعد..؟؟ آآه قصدج دفاتر وجي.؟ اول بداوم بشوف شو يطلبون عقب بسير المكتبه... عفرا: لاااااااا..ماقصد الدفاتر..بس انتي بحاجه اكيد لملابس وجواتي...وشيل وعباة يديده...وشنط.. مهرة: الله يهديج ياعفرا انا مب سايره اعرض ازياء... عفرا: هههههههه ادري ..بس الجامعه غير عن المدرسه...تلبسين كل يوم شي مختلف...خلج مثل البنات انتي مب اقل عنهن... فكرت بكلامها....ولو اني مب راعية مظاهر ذاك الزود...لكن ما ارضى اكون اقل من البنات..!!! مهرة: منوو بيفتكر يوديني اتشرى..!!!..عمووه مستحيييييييل توديني.. عفرا: خذي الاذن من عمي بو حمد..وانا بوديج السوق وبناخذ كل اللي يلزم... فرحت...شو فرحت...الا مت من الوناااسه... مهرة: والله عفرا بتوديني..!!.. ترا انا اطول يوم اشتري شي بتتلعوزين وياي... عفرا: ولا يهمج..بوديج اماكن فيها اشياء تعجبج وما بتترددين في المشترا... لازم اجهزين نفسج لانه اختي مريوم اشترت وخلصت... مهرة: والله اختج بتروح الجامعه بعد..!!! عفرا: هي وعلى فكره نفس كليتج يمكن تتلاقين معاها ... مهرة: ياريت والله...ماعندي ربع...اخاف اظيع في الجامعه... عفرا: ماعليج انتي..في ظرف يوووم بتسوين لج شلة في الجامعه... ظحكت.. مادري شو فاكرتني حرمة اخوي..مغناطيس اجذب البنات..!!!!... بس ان شاء الله يطلع كلامها صحيح... وعلى هالاساس...قررت افاتح ابوي بالموضوع اليوم...وهو مابيبخل علي...بس تذكرت شي..!!! مهرة: تعااااااالي..اذا سرنا..منو بيسوقبنا..!!!.. عفرا: هي والله صدق....هممم..حمد دووم مشغوول..يمكن سهيل.. هزيت راسي باصرار.. مهرة: غسلي ايديج من سهيل...!! عفرا: انزين سيف... مهرة: تووه ماخذ الليسن هذا ماريد انفد عمري انا... عفرا: هههههههه حرام عليج عطيه ثقة شوي فالنفس... مهرة: لالا والله اتروع...مشكله ماعندنا دريول...شكلي بسجل في الباص في الجامعه بعد... كانت تلوع جبدي من الباص..ما احبه... واستانس يوم ايي بسياره...هممم ..يمكن اقنع سيف او سهيل يودوني واييبوني من الجامعه...لاني ماريد اروح وارجع بالباص خلاص عفته.... عفرا: انزين رمسي ابوج اييب لكم دريولية حرمه لمشاويركم... انتي دخلتي الجامعه احين بتحتاجين مشاوير وايده المكتبات وغيره...وغير جي بيكون دوامج غير ثابت بعد في الجامعه... مهرة: والله يمكن اكلمه...بشووف... عفرا: متى بيي سيف..؟؟ مهرة: قايل بيرد بالجمعه...مادريبه والله.. عفرا: ومنوو العرب اللي يووكم اليوم..!! مهرة: آآه...ثنينه بس.. تقول عمووه عيال حد من معارف ابويه ياييين يشلون اوراق..اما الباقين كانوا ابويه وحمد وسهيل وراشد ولد خالتي.. عفرا: راشد ولد خالتج..؟؟ ..هذا ما اييكم دووم صح.. مهرة: لااااااااا مول ما ايينا بس امس حلف عليه ابويه على حسب ماسمعت...يعني..زياراته نادره... عفرا: كم عمره.؟! رفعت انا عيني بتفكير... مهرة: اظني كبر سهيل او اكبر بسنه..او اصغر...مادري.. عفرا: ههههههههه انتي شو تعرفين في البيت هذا خبريني.. مهرة: ههههههههههه ماشي... عفرا: ههههههههه الله يعينج والله على حياتج... مهرة: قسم بالله انج صادقة... وانا اعنيها.... فعلا صادقة حرمة اخوي...الله يعيني على حياتي... ------------------------------ اليوم: الجمعة... المكان: صالة بيت سلطان الوقت: التاسعه صباحا.. --------------------------------------- (ناصر).... حبيت امي على راسها ويلست عدالها...وانا اطالع بنظري منى اللي منسدحه على كرسي بعيد اطالع الرسوم..!!!.. ناصر: شو اصبحتي امي...؟! ام محمد: بخير فديتك...وانته اشوو حالك؟ رقدت وايد امس..!..شي يعورك؟!.. انقهرت يوم تذكرت امس.... رقدت من 3 الظهر لين 9 في الليل ولا حد وعاااني..!!!..وطبعا العصر والمغرب فاتني..لكني صليتهن مع العشا ولو اني مازلت غير راضي عن هالشي..لكن اضطريت شو اسوي بعد.. بس لازم ابدا بداية صح اذا كنت بتدين...مب ارقد عن صلواتي..!!! ناصر: مايعورني شي امايه..الا كسل...ليش ماوعيتوني انتوا.!!.. ام محمد: قالولي ناش من الفجر قلت اكيد تعبان خليتك ترقد.. صبيت لي حليب وقعدت اتريق...وانا كل شوي ارفع عيني لمنى....هذا بنت عمرها 20 سنه؟ حاطه الرسوم ومندمجه فيه..!!.. ناصر: وانتي اخت منى شحقه ماوعيتيني..!! التفتت منى لي مستغربه... منى: هااااه..!!.. ناصر: اقولج ليش ماوعيتيني امس يوم رقدت وايد..!! منى: ماقلت لي... ناصر: لازم اقولج..؟!!.. منى: احيدك يوم ترقد ماتحب حد يدق عليك... ناصر: ذاك اول.. بس احين يوم تشوفيني راقد والاذان ياذن وعيني لا تخليني ارقد... منى: ههههه ان شا ءالله... سكت عنها وكملت ريوقي...بعدها حسيت بايد امي على ركبتي... ووصلني صوتها بهداوة.. ام محمد: ياولدي..الله يهديك ياربي...متى بتعزم وبتفرحني..!!! التفت الصوب الثاني متظايج...امي ماتودر هالموضوع.... ناصر: امايه ماكملنا يومين من رمسنا في هالموضوع اخر مره... ام محمد: انزين عطني سبب مقنع يخليك ترفض العرس.. ناصر: انا فبالي مية شغلة وشغلة احين امايه مب فاظي للعرس...انا ماقايلج قريب.؟!..بس خلاص صبري علي فتره... ام محمد: ياناصر العمر يخلص والشغل مايخلص لين متى يعني بتم جذي عزابي...عمرك 25 سنه...متى بتعرس متى بتيب عيااال..!!.. ظحكت انا...ورفعت نظري لمنى...وقلت لامي بسخرية... ناصر: لا تخافين كل سنه بييب ولد والا بنت... مثل ماتوقعت...نقعت منى من الظحك...وظحكت انا وياها...وظحكت امي بعد... وكملت كلامي وانا اضحك.. ناصر: ماشي فترات راحه....هههههههههههه.... نشت امي من مكانها وظربتني على جتفي بخفة... ام محمد: ماتيوز انته عن الرمسات الطفسه...الله يهديك ان شاء الله..انا بقوم اسير السوق.... نطت منى من مكانها.... منى: اماااااااايه..شو اتفقنا نحن..!! بسير وياج... ام محمد: لالا..ماشي سيره...انا بسير العزبه وبييب ذبيحه..اليوم الجمعه وابوج يبغي لحم...وبسير الجبره بييب ذبـّــاح..وبشتري شوية اغراض....يوم ثاني بوديج ان شاء الله.... راحت امي لغرفتها وتميت انا ومنى في الصالة.. ناصر: شو تبين منى من السوق..!!! يت منى ويلست عدالي عالارض...وصبت لعمرها حليب... منى: ابا ملابس للجامعه..كل اللي عندي ملبوسات...لازم اشتري شي يديد... ناصر: محتاية فلوس..!!! ابتسمت منى... منى: لالالا..ابويه وامي مب مقصرين..ماعندهم غيري انا يصرفون عليه... بس ابا حد يوديني السوق ناصر: وين تبين تسيرين؟ العين مول..!! رفعت منى عيونها لي ...شكلها متلهفة للسيره... منى: هيي..ياريت... ناصر: خلاص انا بأخر سيرتي لبوظبي وبوديج بعد الغدا ان شاء الله... ابتسمت منى بفرح كبير...الشي اللي خلاني افرح انا بعد... اول مره افتكر باختي واسوي عشانها شي.. شي يفرحها مهما كان تافه...!!..وشوفيها اذا تفرغت لاختي ووديتها السوق تقضي كم شغله..!!..مافيها شي ابدا بالعكس هذا شي حلوو مني... منى: والله..!!!..بتوديني..!!.. ابتسمت.. ناصر: هي بوديج ..شحقه ما اوديج...عشان بعد ما اطفربج امايه في السوق... ماتحب المراكز تحيدينها.. منى: هي والله انا كنت احاتي هالشي.... بس مابا اعطل اشغالك..!! ناصر: لا..ماعندي اشغال ... صفقت منى مستانسه...والابتسامه شاقة الحلج.... منى: اللـــــــه وناسه...!! ..مشكوور والله ماتقصر... ناصر: العفوو... منـّـــوه شو قلتيلي تخصصج في الجامعه..!! برطمت منى... منى: كلية ادارة واقتصاد..يمكن بتخصص ادارة ...يعني لوووعه... ناصر: انزين دامه مب عايبنج شحقه تدرسينه..!! منى: ثرها امك رضت تخليني ادخل التقنية...ماطاعت حشرتني.. ناصر: انتي تبين التقنية..!!..شوفيها يعني غير عن الجامعه..!! منى: التقنية غيير... انا ميولي مثل يوسف جي..تقنية..كمبيوتر وهالسوالف...احب العملي ماحب النظري... ناصر: اهااا.... انزين...بشلج بوظبي وسجلي في تقنية بوظبي وسكني عندي في الشقة...وانا بوديج وبييبج وبتكفل فيج... منى: هههههههههههههه ينيت والله.... امس ابويه متحلفلي اون ريلج بنسكنه في غرفة الدريول وانتي ماتطلعين من البيت...تبا يوافق اني اطلع بسبب دراسه..!!..مستحيل يوافقون... ناصر: كيفج..لا تقولين اني ماعرضت عليج المساعده.... منى: ههههه خلها على الله..... بصراحه..كنت اعني كلامي...لاني فكرت مستقبلا... دام اني بلتزم..يعني هالربع اللي ميمعنهم يا انهم يلتزمون معاي..او اني اودرهم واتم بلا ربع... والارجح ان الخيار الثاني هو اللي بيصير...لانه هذيلا ماظن مستعدين يتخلون عن كل اللهو اللي هم فيه,, وبما اني بتم بروحي...ابالي حد يسليني واهتم فيه ..واشغل وقتي معاه....لكن فعلا اهلي مابيطيعون ان منى تطلع من البيت وتدرس فبوظبي اربع او ثلاث سنين...لاني اكيد اخرتها اني بعرس.. واكيد منى بتحس باحراج انها تسكن وياي انا وحرمتي في شقة وحده..!!!..ساعتها شو بيصير؟ بتودر الدراسه.!!... لالا..كان اقتراح غير مناسب... ----------------------------------------- اليوم: الجمعة.. المكان: في البدع... الوقت: العاشرة والنصف صباحا... ---------------------------------------------- (سيف).... نزلت من الدراجه وانا ميت مت من الحر... ثيابي كلها خايسه عرق...جابلني جمال شال شنطته السبورت وهو معقد حياته... جمال: جهزت اغراضك..؟!!.. عقدت حياتي انا بعد... سيف: لا...من الحين..؟!!.. جمال: جهزهن سواف بنرد العين.. سيف: شحقه مستعيل..!!.. بنرد المسا... جمال: لا الحين ...بسك من اليلسه حرر شو بتسوي يعني من احين لين الظهر..؟ الجوو حار مايساعد... سيف: اوكي على راحتك... رحت للخيمه وبدلت كندورتي بكندوره نظيفه وشليت شنطتي وسلمت عالشباب من بعيد وركبت مع جمال في السياره...وتحركنا... مرت نص ساعه...وجمال مارمس فيها... سيف: شفيك مبوز جي..!!!.. جمال: ماشي... سيف: بلى فيك شي...شو صار.. جمال: اوكي..تبا الصراحه..انته قاهرني... تفاجئت...انااا.؟!!!... سيف: انااا...شو سويت بك..!!! جمال: سواااف... امس تراك دخت اربع مرات..ولا اتحسبني ماشفتك...بعد هذيلا اللي شفتهن مايندرا كم دوخه ماشفتها.... سيف: انزين وشووو عليك انته... جمال: شووو شو عليه..!!.. خليت سلووم يلعب بعقلك بكم كلمه.... سيف: جي ياهل شايفني جدامك عشان حد يلعب بعقلي..!!!... جمال: سواف...ودر الزقاره... شوفيها هي الزقاره انا ذايقنها مره ولاعت جبدي منها...انا ريحتها ما اتحملها كيف تحطها فحلجك مادري... سيف: لا تكبر المسائل جمال.... جمال: انته اللي تبا تصغرها وتشوفها ماشي..والا بالله عليك خبرني...شو بتزيد فيك يعني الزقاره..!!..بتزيدك رجوله مثلا...!!...الا قيس ريحة خايسه..ومرض..تخسر عليها فلوسك وهي ماتعطيك شي واذا عطتك بتعطيك مرض ويمكن تموت والسبب هالزقاره.... كان جمال فعلا معصب ومتنرفز..واذا خذت وعطيت بالكلام وياه عاطي يكفخني...عشان جي سكت..ولا ناقشت الموضوع.... ادري.. كلام جمال كله صحيح...المشكله اني عارف هالامور كلها من قبل... بس ماقدرت اقاومها...عيبتني الراحه اللي احس فيها يوم ادوخها...وبعدين... وايد ناس ما ماتوا من الزقاره...بتي علي انا يعني تظرني..!! ترا وايد ناس ما ظرتهم...شمعنى انا....!!!... وبعد نص ساعه ثانيه...سالته.. سيف: جمال.. انته تخرجت من الثانوية العامه...بتكمل دراستك.؟! قالي جمال من دون نفس... جمال: ان شاء الله.. سيف: انا اختي بتسير الجامعه...انته وين بتسير..!!! جمال: التقنية... سيف: شو احسن..!!! جمال: حسب ميوولك...ورايك الشخصي..وشو تبا تدرس اصلا... شفته يكلمني من دون نفس...حشى..لهالدرجه معصب عسب دخت كم صلب..!!!!.. سكت عنه ومارمسته عشان مايفلعني باي شي.... --------------------------------------- اليوم: الجمعه... المكان: غرفة يوسف... الوقت:.. الحادية عشرة صباحا.. ----------------------------------------- (يوسف)..... سكرت جهاز الكمبيوتر... وحطيت راسي عالمكتب ... دموعي نزلن بحرارة لدرجة اني خجلت..من اني امسحها عن ويهي واعترف بوجوودها..!!..خليتها تشق طريقها على خدي لين ما اطيح ببساطه على كندورتي وتختفي..!!.. آآآخ ياوضحه... ماتصورت ان فراقج صعب لهالدرجه....!!!.. تذكرت رسالتها العتبانه لي من شوي..اللي طرشتها من بعد ما استلمت هديتها من المحل..... " ليش طريت البطاقة اللي كتبت عليها اغلى حروف كتبتها فيوم...واللي من بعد ماكتبتها...حمدت ربي اني تعلمت الكتابه..!!!"... ماقدرت اتحمل...!!..ليش انا مب انسان..!..كم الواحد بيتحمل...؟.. احبها... احبها وشكلي بتم احبها طول ما انا آخذ النفس ... توني بس استوعبت فكره فراقها..واني مابشوفها مره ثانيه...ولا بسمع عنها...ما بكون اول من يدري بامورها الصغيره بعد اليوم....مابعرف متى تظحك...متى تطلع...متى تنجح..متى تصيح.... متى تمرض...متى تفكر فيني وتحلم بي..!!!... بياخذها واحد ثاني غيري...ومابعرف عنها شي من بعدها...بتكون زوجه ريال غيري...بتيب عياله...وبتحبه اكيد.... بموت...ماقدر استحمل... استحملت امس واللي قبله لاني كنت بحالة صدمه...بس اليوم دخلت فكرة الخساره فبالي واستوعبتها...وكانت مررره بشكل...ماقدر ابلعها... ماقدر... فجاه سمعت انفتاح الباب... رفعت راسي...نسيت دموعي... ناصر..؟!!!... صديت بسرعه عنه ومشيت ويهي بايدي... لكن مب بالسرعه الكافية.... جزمت ان ناصر شافني.... عقد حياته مستغرب... ناصر: ثرك واعي..!! انا ياي اوعيك عشان تجهز لصلاة الجمعه... والظاهر ان ناصر ادرك ان الموضوع كبير...فسكر الباب وراه...وتقرب مني بعيون متفحصه لويهي... يوسف: لا انا واعي من فتره بس ماطلعت... تقرب ناصر مني.... ناصر: يوسف شفيك..!!!.. ابتسمت...ابتسامه جافه.. يوسف: ماشي... سكت ناصر فتره ....يراقبني بفضول... ناصر: مب عليه انا هالحركات....شفيك..؟؟ قمت انا من الكرسي وفصخت كندورتي وعقيتها... يوسف: قلت لك ماشي ناصر... علقت كندورتي ودخلت الحمام وقعدت اتمسح...واستغليت الفرصه وغسلت ويهي زين عن دموعي الغادره... ولاحظت سكوت ناصر في الغرفه...فقلت يمكن طلع.. لكن يوم خلصت وضوء وطلعت وفوطتي بين ايدي حصلته يالس عالشبريه يفكر بعمق.... مشيت ويهي بالفوطه وعقيتها عالكرسي وتوجهت للكبت وطلعت لي كندورة نظيفه... يوسف: شو بلاك ناصر.؟؟؟ رفع ناصر راسه وسكت... وهو يطالعني بطريقه غريبه وحايس بوزه على صوب... عقمت كندورتي ورحت للتواليت وشليت مشط وقعدت اسحي شعري... ناصر: تعال يوسف برمسك... تاففت في داخلي... ماريد حد يرمسني احين..انا اروحي يالله اتحمل نفسي ....مب محتاج محاضرات...وخصوصا من ناصر..!! لكن بما انه اخوي الاكبر مني ...واحتراما له..سمعت كلامه...فريت المشط ويلست على كرسي التواليت بعد ماسحبته عدال ناصر... يوسف: آمرني... ناصر: مايامر عليك عدو....ابا اقولك...اعرف اني ماكنت ابين لكم اهتمامي فيكم من فتره طويله...وكان مبين علي اني مب مفتكر فيكم ...وما اعرف شي عنكم.... لكن الصدق اني اهتم...وتهمني مصلحتكم...ويزعلني بشكل كبير اني اشوف اخوي مب قادر يثق فيني ويخبرني باللي فيه.... انحرجت انا...لهالدرجه كنت شفاف وبينت مشاعري..!!.. لكن من جهة..ثبت ظني بان هالظربه اللي على راس ناصر فعلا اثرت عليه للاحسن...يعني يادوووب طلع في هالاجازه من البيت...يادوب..كله قاعد في البيت...مع اهله..اللي الظاهر بدا يتعرف عليهم الحين بس...!!!!... وتميت ساكت وانا افكر بكل هالامور...اما ناصر كمل كلامه بنبرة حزن... ناصر: يوسف...شو مستوي..؟؟.. امس كنت بخير حتى كنت على وشك اني احسدك على ثقتك بنفسك وروحك العالية...واليوم...يوسف صدق لاول مره اشوف دموعك هو اليوم...!!!.. غمضت عيوني بالم... لا...لا تذكرني...دخيل والديك...!! ناصر: شفيك يوسف... اوعدك ماقول لحد بس يمكن اقدر اساعد... قلت بانفعال... يوسف: ماتقدر تساعد ناصر...محد يقدر... ناصر: عالاقل خفف الحمل اللي على ظهرك وعطني شوي منه....شو صاير..؟!!!... مادري كيف اشرح لكم....بس كنت مستعد اخبر أي حد عشان اخفف اللي بنفسي لاني كنت بنفجر في أي وقت...يكفي ان اليوم نزلن دموعي عليها...انا..يوسف...اللي ماتنزل دمووعي لو اشووو...!!!.. قلت لاخوي بهدوء... يوسف: ناصر... كد حبيت فعمرك...؟!!.. رفع ناصر حواجبه...وبانت الدهشة على ويهه.... ناصر: حبيت..!! همممم...لا....كنت معجب ببنت عمي نورة من سنين لكن طبعا هالشي ماله وجود حاليا... ابتسمت بسخرية...تذكرت الظرايب الدايمه بين ناصر ونوره بنت عمي ايام زمان....جان هذا اعجاب..عيل كيف هذا يوم يحب..!!!..الله يعين... يوسف: شو رايك في واحد..يحب بنت...يعرف عنها كل صغيره وكبيره...يكلمها يوميا ثلاث ساعات...عالنت...وكمل معاها ثلاث سنين وهو يحبها..وهي تحبه...لكن عمره ماشاف شكلها..ولا سمع صوتها...ولا فكر انه يطلب منها هالشي... لانه يخاف عليها ويحترمها اكثر مما هي تخاف وتحترم نفسها... في النهاية تنخطب غصبن عنها...وينتهي كل شي ..برسااله...!!. سكت انا...وسكت ناصر...مستغرب...الا قولوا مندهش... فعلا..ثلاث سنين وماحسوا علي..!!!.. ماعرفوا سبب ادماني عالكمبيوتر..!!...ماعرفوا شو سر الفرح واللمعه فعيوني... وسر حرف w المعلق فسيارتي..!!!!!.. اخيرا تكلم ناصر... ناصر: بصراحه كنت اتوقع كل شي..الا هذا... ابتسمت انا بسخرية... ناصر: يوسف... انا اعرف اني مب الشخص المناسب اللي يسديك نصيحه..لانك بصراحه اعقل مني...لكن...مب نصيبك...صدقني كل شي مكتوب على جبينك ومقدر سلف... انا ماقولك لا تزعل...اكيد صعب الموضوع عليك بس...يعني ..شو بقولك.... مب نصيبك....وان شاء الله ربي بيعوضك بانسانه ثانيه تحبها وتحترمها وتكون من نصيبك هالمره... هزيت راسي وانا احس باختناق... يوسف: ماتعودت على فراقها ياناصر...احبها....مابتعرف اللي اعانيه انا الا يوم تحب بنفسك وتشوف...بس ان شاء الله ماتنحرم منها انته بعد... ناصر: ان شاء الله... اطالعت ناصر باستغراب.... يوسف: ناصر...عندك حد انته بعد..؟!!.. ارتبك... ناصر:هاا...لا...لا ماعندي حد ...بس اكيد بيكوون عندي فيوم...وان شاء الله ما اخسرها... سكت عن ناصر وقمت من الكرسي....ورجعت اسحي شعري... يوسف: مثل ماقلت..كل شي نصيب.... دقني ناصر بايده على ظهري... ناصر: جي اباك...قوي قلبك.... ابتسمت بسخرية.. يوسف: شوو دعايا "ماونتن ديو.."....؟!. ناصر: ههههههههههههههه....خبل.. خلاني ناصر وطلع من الغرفه... وخلاني بروحي...وبشكل غريب حسيت بان الالم خف شوي...ماتصورت فيوم ان الكلام مع ناصر بيريحني...!!!... -------------------------------------------- اليوم: الجمعه.. المكان: في غرفة طعام بيت خلفان.. الوقت: الواحده والنصف ظهرا... ------------------------------------------- (مهرة)... يلست عدال عفرا حرمة اخوي كالعاده على صينية الغدا.... وجدامي يالسه عمووه... قامت عمتي بحماس مدموج مع وحده طفرانه.. آمنه: اليوم المسا بسير اييب الخدامه... فرحت انا...واخيرا بفتك من الكراف...!!!. عفرا: والله..؟؟ شو من الشي..!!! آمنه: فلبينية... عمرها 35 سنه...مابغيتها صغيره تقوم تشرد مثل اللي قبلها... مابغيتها بعد عيوز ماتروم تشتغل في البيت... مهرة: لالا زينه عمرها مناسب... عفرا: اقولج مهرة... مهرة: لبيه... عفرا: لبيتي حايه... انا رمست حمد عشانج...ووافق انه يفرنا في العين مول وايينا عقب يوم بنخلص.. مهرة: والله..؟!!!..زيييييييين الحمد لله.... ادخلت عمتي في هاللحظة... آمنه: حق شوو العين مووول..!!!.. عفرا: مهره ما اشترت ثياب واغراض للجامعه.. وتدرين الجامعه تحتاج شوية اغراض..قلت بوديها انا تاخذ اللي تباه... حسيت ان عمتي ماعيبها الموضوع...لكن الحمد لله سكتت ولا ادخلت بالموضوع...لانها في النهاية...مب امي..عشان تدخل في كل صغيره وكبيره تخصني...!!!... مهرة: ماتقصرين والله ياعفرا...ولو اني بتعبج وياي... عفرا: ولا يهمج انتي نظرب عصفورين بحجر...انا بعد محتاجه شوية اغراض من هناك...ويوم بنخلص شغلنا بنتصل بحمد او سهيل او أي حد بيي وبيشلنا... آمنه: ماحيدج محتايه شي مهره...ماقلتيلي من قبل انه شي قاصرنج للجامعه.... مهرة: عمووه مب لاني ما اتكلم عن هالشي معناته مب موجود...!!..انا بنفسي ما انتبهت...لكن عفرا نبهتني لهالشي..يزاها الله الف خير... تعمدت انغز عمتي بالرمسه....يعني عفرا اللي ماصارلها اربع شهور داخله بيتنا عرفت حتى قبلي انا شو محتاجه... وعمتي ما عرفت..!!!..المفروض تعرف وتهتم لكن لا حياة لمن تنادي... بعد ما تغدينا سرت عند اخواني..حمد وسهيل ..شربت لي كوب جاهي حمر..وماكملته لانه حمد قالي اروح اتلبس عشان يودينا العين مول... حتى الجاهي ما تهنيت فيه...بس يالله لاحقين عليه... نهاية الجزء
الجزء التاسع.. ------------------------------------------- اليوم: الجمعة.. المكان: في صالة بيت خلفان.. الوقت: الواحدة والخامسة والاربعين دقيقة.. -------------------------------------------- (سهيل)... بعد ماراحت مهرة تتلبس...التفت انا لحمد مستغرب.... سهيل: ليش توديها العين مول..!! حمد: بتسير هي وعفرا.. مهرة ناقصنها اغراض للجامعه.. سهيل: هههههههه غريبه من وين طالعه الشمس...قبل ماتفتكر فيها... حمد: حرام سهيل...هذي يتيمه ام.... وعمتي مب زود مسوتلها سالفه... نحن رياييل ماعلينا لكن هي الوحيده بنت بينا.. انا لو ماخبرتني عفرا مابفتكر اسالها..وهي ماظني تقولي..تخاف.. ابتسمت انا بسخرية مستغرب من المصادفة... كل جمعه الظهر نروح انا وراشد نلعب بليارد في العين مول..!!..وطبعا مابعزم على حمد اني اوديهن لاني مافيني عالصدعه..وانا راشد بيمر علي لانه ماعندي سياره... وعلى طاري راشد.. ولد حلال...يتصل تيلفوون.. سهيل:آآلووو.. راشد: مرحبا سهيل..شحالك؟ سهيل: بخير وسهاله شحالك انته..؟ وشحال خالتي..؟ عساها بخير الحين.. راشد: لا اطمن الحمد لله اليوم احسن بوايد عن امس.. سهيل: ياحيها... راشد: تغديت؟ سهيل: هي نعم تغدينا...بتخطف عليه..؟ راشد: طالع...انا اترياك انته تخطف... سهيل: وين اخطف ماعندي سياره..!! راشد: اووووووه صح والله نسيت...خلاص عيل بتلبس وبمرك الحين.. سهيل: اترياك... راشد: فمان الله.. سهيل: فمان الكريم.. سكرت تيلفوني وقمت ركبت فوق عشان اتلبس... وبعد ماتلبست..وقفت جدام المنظرة اتسفر...ومسحت على لحيتي اللي طولت شوي..وتلعوزت..يبالها تحليق...وترتيب.. اما شعري بخليه يطول شوي..مسكت بوكي وحطيته فمخباي..وشليت مفاتيحي...ويلست اطالع الميدالية..وابتسمت... حليلج ياشيخه... اهدتني هالميدالية من ست سنين يوم كانت بعدها في المدرسه..وكانت الوالده بعدها عايشه ...وشيخه مودينها رحلة لمعرض مع المدرسه...كانت مسويه لابوها..وراشد..وانا..ميداليات.. وفرحت يوم اعتبرتني واحد من العايله مثل اخوها وابوها...اهدتني اياها بطيبة نفس...والظحه على ويهها... رغم ان الميدالية بسيطه ...وقديمه نوعا ما....بس احتفظت فيها...باختصار..شيخه هي اول انسانه اهدتني شي بطيبة قلب وبدون مقابل...وعنالي الشي الكبير انها تذكرتني في لحظات كانت مستانسه فيها... صح كانت صغيره ساعتها..كان عمرها 17 سنه..بس حتى لو..فرحت بها وايد... سمعت هرنات راشد عند الباب..وخشيت مفاتيحي في مخباي وشليت تيلفوني وطلعت بسرعه... يوم نزلت تحت شفت عفرا حرمه اخوي يالسه عالكرسي..ومهرة واقفة عند الدريشه... وكلهن بعباياهن... سهيل: لمنوو توايجين..؟؟ انتفظت مهرة واطالعتني باستغراب... مهرة: اتريا حمد يخلص سلاماته... عقدت حياتي انا..ويييت وقفت عدالها...شفت راشد بنظاراته الشمسية واقف يسلم على حمد ويسولف معاه..... انقهرت..وعصبت...اطالعت مهرة بنص عين.. سهيل: البنت ماتوايج عالرياييل...عيب.. اطالعتني هي باستنكار واضح... مهرة: مالت عليه ولد خالتك شو ابابه...؟؟ انا اطالع حمد.. سهيل: جب يالله... سيري قعدي ويوم بيخلص اخوج رمسته بيزقركم...المول مابيطير... حاست لي مهرة بوزها زعلانه وسارت ويلست عدال عفرا الي منزله راسها وشكلها منحرجه انها شافت نزاعي لمهرة... خليتهن وطلعت...سلمت على راشد.. ويوم خلصنا صد صوبي حمد..معقد حياته.. حمد: صدق بتسيرون العين مول..؟؟ سهيل: هي.. حمد: شحقه ماتقول...تدري انته انه وراي اشغال..ولا تعزم عنبوو توديهن عني..؟؟ راشد: يودي منوووه..؟؟ حمد: مهرووه تبا تسير تتشرا للجامعه... سهيل: حمد نحن بنسير نلعب بليارد وانا مافيني اتبعهن من مكان لمكان... راشد: فاطمه من شوي تقولي تبا تسير العين مول هي وشيخه وماطعت اييبهن وياي.... اطالعت راشد معصب... انا مافيني اشلهن... سهيل: لا تشجعه انته بعد... حمد: عيل خلاص..شلووا مهرووه وردوا على خوات راشد وخلوها تشتري وياهن..ماعليها يوم وياهن حرمه كبيره.. سهيل: يوووووووووه الله يخسك ياراشد... زين جذي..!!!.. ابتسم راشد..وابتسم حمد ورد داخل البيت عشان يزف الخبر للحريم... ------------------------------------------ اليوم: الجمعه.. المكان: صالة بيت خلفان.. الوقت: الثانية والربع ظهرا... ----------------------------------------- (مهرة).... لا تخافون..تعودت عالتهزيء وماحطيت فبالي هزبة سهيل لي...من قال اني بسمع كلامه..؟؟..خله يثبت وجوده واحترامه كاخو اول عشان يفرض رايه علي.... كلام بنات صح..؟؟؟ شوورانا نحن غير الررمسه..!!! المهم... اول ماطلع سهيل رديت اوقف وعفرا تظحك علي وهي تراقبني امشي للدريشه وارجع اراقب... كنت متحمسه للسيره...نادر ما اطلع...وما اطلب اني اطلع...مالي ويه...احس محد بيسويلي سالفه وبينفذ طلباتي... اطالعت حمد وسهيل...وراشد...شوبلاه سهيل معصب..!!! اكيد هذا طايح من الشبرية اليوم الصبح... وبعد دقيقه شفت حمد يرجع يدخل البيت...ابتعدت عن الدريشه ويلست عدال عفرا... دخل حمد يبتسم... حمد: راشد وسهيل بيودونج مهرووه..انتي ويا بنات خالتج... شهقت انا...وشهقت عفرا... مهرة: لييييييييييش.؟؟ حمد: والله مافيني اوديج وراي اشغال..قلت دامهم هم بيسيرون اصلا ..خلهم يودوونج شحقه نسوي المشوار مشوارين..!! عفرا: حمــــــــد...!!!..وانا..؟؟ يا حمد ويلس عدال حرمته على نفس الكرسي... حسيت باحراج..مادري ليش يوم اشوفهم مع بعض انحرج...!!!!.. حمد: انتي شووو ياحرمي المصووون...؟ قالت له بدلع.. عفرا: حرمك المصون تبا تتشرى بعد اغراض من هوم سنتر... ابتسم لها حمد بحب واضح...ياااااااااااااااااااه قمة الاحراج اني اراقبهم جي... من وين طلعت الحنية على اخوي؟؟ والا بس عند حرمته هالحنان..!!! صدق اني فقيرة على باب الله...ماحصلت من "الجنس الآخر" غير اخواني وابوي شي غير تحـــ...لا...ليش اتذكر وانكد بعمري... هذاك انسان بايع اخرته..والحمد لله ماصابني شي منه...ليش اهويس به عيل..!!!..اوففف... حمد: بوديج يوم ثاني مخصوص...لا تزعلين... عفرا: انزين بس انا واعده مهرة عاد...يمكن تستحي تتشرا مع بنات خالتها.. قلت انا بعصبية... مهرة: هي استحي... حمد: وابوي عليج تستحين من بنات خالتج..!!.. شيخه الا كبرج... شهقت انا بصدمه.... مهرة: شيخه عمرها 22 وانا 19... حمد: ماشي فرق كبير...بنت شراتج... مهرة: بعدين انا استحي اركب ويا راشد... دخل في هاللحظة سهيل المتنرفز... واطالعني بعصبية.. سهيل: خلصي جان تبين تروحين والا والله ياروح عنج...موقفين الريال في الشمس..!!!... تاففت انا...الظاهر لازم اسير وياهم ادري انه محد بيوديني عقب... تقربت من حمد ومديت ايدي.. مهرة: نسيت اطلب ابويه فلوس...عطني... ماقصر حمد...عطاني اللي يكفي وزياده بعد....حطيتهن في شنطتي وتغشيت وطلعت... جابلت راشد اللي كان معقد حياته ويطالع سهيل... راشد: سمعتك تنازع...ليش تنازع..!!! انا شو قايلك في دبي..!!! سهيل: قسم بالله تستاهل تقعد في الشمس...عالخيانه هذي... مافهمت عن اي خيانه يقصد سهيل...لكن راشد ابتسم... راشد: شحالج مهرة... مهرة: بخير... راشد: اعق نظارتي..!!! انقهرت...افصخ نعالي واعطيه على ويهه ياناس والا شو..!! مهرة: اوهوووووووووووووووه علينا.... ظحك راشد..وسهيل عصب زياده.. سهيل: شو بعد افصخ نظارتي هاي...يالله يالله خلصنا... مشى راشد وهو يضحك لسيارته وركب سهيل عداله... وانا ركبت ورا سهيل... اول مره فحياتي اركب مع ريال غريب...صح مب غريب لكن اول مره....كان خاطري اركب في الدبه..لكن بيستنكرون هالشي طبعا...من كثر ماكنت منحرجه ومتوتره... شفت راشد من طرف عيني يتصل ويكلم فاطمه اخته...ويقولها تجهز هي وشيخه لانه يايبني اتسوق معاهم... حسيت اني رزززززززه.... ------------------------------------- اليوم: الجمعه.. المكان: في غرفة ناصر... الوقت: الثانية والنصف ظهرا.. ---------------------------------- (ناصر).... كلت وايد اليوم...انسدحت على شبريتي عشان اريح شوي احس بطني متروس... توني بريح ظهري الا اسمع حد يدق الباب ويدخل... منى: نااااااصر...ليش ماتلبست...!! اطالعت منى باستغراب ... كملت هي كلامها بعد مابرطمت... منى: عرفت انك كنت تطنزبي...وانا اقول من وين طالعه الشمس.... لفت عني وكانت بتطلع معصبه والصيحه فعيونها....نقعت انا من الضحك..صدق اني نسيت مووول سالفه السوق.. ركظت وراها ومسكتها... ناصر: اييه....مــنّــــووه...والله والله اني نسيت...بوديج لا تزعلين...دقايق بتلبس وبنزل.. نسيت والله.. كان كلامي كله مدموج بضحك....صدق ظحكني شكلها وهي شوي بتصيح وتتحرطم علي...حليلها...ماصدقت على الله تحصل حد يوديها.... راقبت ملامحها وهي تبعد الظيجه عن ويهها تحط مكانها ابتسامه فرح... منى: بترياك تحت... نزلت منى ورديت انا داخل الحجره... غسلت ويهي عن الكسل..ولبست كندورتي الكركمية....والسفره اللي نفس اللون... وتسبحت بغرشة العطر... وبعد ماخلصت انعفس ويهي.. تذكرت اني تعودت اتكشخ يوم اروح مراكز واسواق..للغراشيب مثل ماكنت اسميهن... بس الحين لمنوه اتكشخ..؟؟ مب قايلين بنلتزم..!!.. اووهووو يالله ماعليه الواحد يتكشخ لعمره...وانا ارتاح جي... ماحب اطلع من دون ماكون متكشخ وهذا شي مب عيب ابدا ولا حرام..بالعكس شي محموود .... خذت اغراضي الشخصية وطلعت... مريت على غرفة يوسف...ماتغدى اليوم...تذكرت كلامنا الصبح... وتظايقت عشانه...واستغربت فنفس الوقت...والا منوو كان يتصور ان يوسف منعفس فوق تحت بحب عن طريق النت..!!!... دخلت الحجرة بهدوء وحصلته راقد... يالله..احسن له...الرقاد بيريح اعصابه شوي...رجعت اسكر الباب ونزلت تحت...حصلت منى تترياني في الصاله... ناصر: يالله نسير...يالله كيف مبسووطه عالسيره..مايسوى عليج الا سوق... منى: شي مميز في هالسيره مب مثل كل سيره.. ناصر: شو المميز يعني..!! وراقبت باندهااااش كبير منى وهي تتقرب وتلوي على ايدي اليمين...مثل الياهل.. منى: اخووي بيتعبل مني وبيوديني هالمره السوق... ابتسمت...بس تبون الصدق بغيت اصيح.... ماكنت ادري ان اهتمام الاخو يعني هالشي الكبير عند البنات..!!.. يالله كم كنت مقصر..!!.. ناصر: ههههههههههههه ويا ويهج... صبري بسير اييب سويج الستيشن من عند ابوويه... مشيت عنها وسرت عند ابويه فغرفته حصلته راقد..لكن امي واعية...خذت من عندها سويج ابويه ورديت اطلع لمنى...وركبنا السياره ومشينا.... طول الدرب ونحن نتظارب عالاشرطه... هي تبا عيضه وانا ابا ميحد... ناصر: يالسباااااله محد يعطيج ويه انتي...بردج البيت ترا... منى: ماريييد ميحد اييبلي الضغط والسكري... ناصر: عيل عييضه..!!..ماعندج سالفه خلي ميحد انا اللي اسوق... منى: مب سيارتك سيارة ابويه... ناصر: عيل ادب لج ماشي اغاني...يالله الاغاني حرام... وبدلت الاذاعه وحطيت ابوظبي القرآنية... وسكتنا لفتره....بعدها سالتني منى بصوت هادي.. منى: ناصر..بسالك سؤال... ناصر: ليش الفضول.. منى: عنبوو ماعرفت السؤال تقولي فضول.. ناصر: ادري انه يخصني وهذا فضول... منى: اخووويه كيفي استوي فضولية ... ابتسمت... ناصر: سالي.. منى: همممممم.... احسك هالمره متغير علينا....للاحسن...يعني مادري ..شو صار في هالاسبوعين اللي غبت فيهن عنا وغيرك جذي..!!! ماتوقعت هالسؤال...تحسبتها بتسالني ليش رافض العرس لهالدرجه ومظيج خاطر امايه بسببه..!!... ماعرفت شو اقولها.... بس الفت اسباب ثانوية... ناصر: غبت عنكم فتره طويله من اشتغلت فبوظبي..وعرفت قيمة الاهل...واني مقصر فيكم كلكم....يوم فكرت من كم يوم باخواني اكتشفت اني ما اعرفكم عدل..وانصدمت...خواني وما اعرفهم؟ وربعي اعرف ادق التفاصيل عنهم..!!... هذا سبب..والسبب الثاني... من يومين صارلي حادث بسيط...وخفت اني امووت وانا مب مسوي فحياتي شي عليه قيمه ...وخفت انه محد بيذكرني بالخير منكم لاني ماكنت زين فيكم.... وصلني صوتها بتاثر واضح والعبره خانقتنها... منى: حرااام عليك انته اخوونا مهما يكون..كيف مابنذكرك بالخير..وبعدين لا تفاول على عمرك الله يعطيك طولة العمر... التفت لها بابتسامه على ويهي...وشفت عيونها تلمع...بلاها هذي جاهزة للصياح اليوم..!!!.. ناصر: لا تسويلي فلم هندي الحين...!! ابتسمت...وبعد شوي ردت تلتفت لي.. منى: دامك متظايق في بوظبي لين ماتحول شغلك العين..!!!.. ناصر: ياريت..شغلي انا مايصير الا فبوظبي... منى: الله يعينك... سكت منى... وسكت انا بعد... ماشي باقي وبنوصل العين مول... -------------------------------------- اليوم: الجمعه. المكان: في سيارة راشد... الوقت: الثالثه الا ربع ظهرا.. ---------------------------------------- ( راشد),,,, مادري شو اللي خلاني اعزم نودي مهرة... من شوي كنت رافض اني اودي قوم فطيم وشويخ وياي رفضا باتا على قولتهم...بس يوم يت مهرة في الموضوع مادري... هالبنت تكسر خاطري احسها دوم ظايعه في الطوشه....وقهرني بان خوانها يتعازمون عشان يودونها مكان...من الخاطر مب مهتمين فيها حليلها...عشان جي عرضت انا عمري..لانه يسعدني اني اوديها مكان اذا بغت...وعشان مايتمون خوانها يتمننون عليها بهالسيره ...!!..لو اشلها اسكنها فبيتنا وايد احسن....مسكينه يتيمه ام.... كان سهيل متنرفز صدق لاني شليتها.... مع انه مابينقص عمره لو يت ويانا خصوصا انها ما بتاذيه ولا بيطالع عليها لانها بتكون مع خواتي.... بس هو مادري كيف يفكر...!!! وقفت جدام بيتنا وظربت هرنات....طلعت فاطمه بكرشتها متنقبه...وشويخ وراها متغشيه... دخلت شوي السياره ..وفاطمه وراها.. شيخه: السلام عليكم....وااااي الله مهرة بتي ويانا...(وباستها) شحالج حبيبتي..؟!! مهرة: بخير شيخه شحالج انتي.؟!! شيخه: مستااااااااانسه... دخلت فاطمه بعدها وقعدت وراي... فاطمه: السلام عليكم... هلا والله مهرة شحاااااالج.. حركت انا سيارتي وريوست وانا اشوف فاطمه تبوس مهرة وتسلم عليها... فاطمه: فديتج والله من زمان ماشفتج... مهرة: شو نسوي انا ماطلع من البيت...وانتي تراج في دبي...شحالج فاطمه؟ فاطمه: بخير الغاليه... تقربت شيخه مني انا وسهيل (سنفور غضبان)... وقالت بحماس.. شيخه: شحااااااالكم شباب...بتروحون تلعبون بليارد هاااا..؟؟ راشد: هيي عندج ماانع..؟؟ شيخه: بلعب وياكم... تنرفزت انا...صرنا اثنين سنفور غضبان....هالبنت بتذبحني فيوم...بتيبلي الجلطه...بتذبحني قاصر عمر..ماتيووز... راشد: بععععععطيج بكس على خشمج وبكسره لج الحين ...ردي على ورا ويلسي مثل البنات عنبووووووووووج زااد.... زاعجت شيخه.. شيخة: لييييييييييش تسب ماي فاذر..؟؟؟..والله بخبر... راشد: وانا بعد بخبر عشان يحرمج من السيرة مولية...ماينلام والله يوم رافض يشغلج...بدال ماتشتغلين فقسم حريم بتشلين مكتبج وبتحطينه عند الشباب.... ظحك سهيل...وظحكت فاطمه...مهرة باختصار ساكته... بس حسيت انها تبتسم.. شيخه: ظحكوا ظحكوا...قسم بالله انا مظلومه في هالعايله... مدت ايدها تبا تبدل الشريط اللي انا حاطنه...وظربتها على ايدها... شيخه: آآآآآآي... راشد: ترانا قراب من البيت ان مايزتي ورديتي على وراج بردج البيت.... شيخه: بسم الله منك خلاص انزين... تراجعت شيخه على وراها وقعدت باحترام...سمعت فاطمه وهي تقول لمهرة.. فاطمه: مهرة عقي غشوتج.. مهرة: ليش.؟؟ فاطمه: ابا اشووفج تغيرتي او لا... استحيت التفت واشوفها اذا عقت غشوتها او لا..بس بعد شوي وصلني صوت فاطمه تقول بحنان.. فاطمه: فديييييييييييت هالويه...تشبهين خالوووه الله يرحمها.... مهرة: تسلميين... شيخه: ماشاء الله مهاري بتشترين للجامعه...بساعدج انا.... راشد: قصدها بتخبلبج وبتفرر لج راسج...تمي ويا فاطمه احسن... شيخه: اخويه فديت روحك لا تدخل فسوالف البنات ممكن..!!!.. سكت عنها وتمت شيخه تقرقر على راس مهرة....بصراحه مهرة في موقف لا تحسد عليه... توقعات 
|
|
#11
April 9, 2015, 02:00 PM
|
||
|
|
||
|
رد: رواية موعد مع السعادة للكاتبه العيناويه
الجزء العاشر... ----------------------------------------------- اليوم: الجمعه... المكان: في غرفة يوسف.. الوقت: الخامسة والنصف مساءا... ---------------------------------------------- (يوسف).... ازعجني صياح التيلفون...وقمت من رقادي منقهر.. بعدني ماشبعت رقاد عشان انش.. افففف..... مديت ايدي بسرعه ومسكت التيلفون... خالد...اكيد...منوو غيره بيزعجني... رديت عليه..بصوت كله رقااد... يوسف: آآآلووووه...! خالد: تفوووو عليك... ابتسمت.... وبعدها ضحكت...مادري من وين ياني المزاج للضحك بس هالانسان مادري كيف.. يوسف: هههههه شو سويتلك..!! خالد: مالت عليك من ربيع... والله انك خااام انزين.... عرفت ليش هو متظايق... امس كانت خطبته...وانا ما اتصلت به ولا خاويته ولا سالت عنه... كان امس يوم مهم بالنسبه له... يوسف: انا ما ارابع مرتبطين.... خالد: طالع..!!!.. عنبوو ذاك الشكل لك... وين انته..؟؟؟ يوسف: والله الا في البيت... مبرووك خالد... الله يوفقك ان شاء الله. خالد: الحين عاده.!!...الله يبارك فيك وعقباالك... يوسف: لا انا ماريد... خالد: مب على كيفك...وين انته..؟؟ يوسف: راقد...وانته.. خالد: شو مرقدنك..!!..انا احين ياينك البيت قم ابا اشوفك عند بابكم... يوسف: لا لا تي الحين ابا ارقد ياخي... خالد: والله يا ايي... وانته تخسي ترقد مره ثانيه...قممم يالله....باي وسكر فويهي.. اطالعت التيلفون...وظحكت...اسميك ياخالد..!! قمت دخلت الحمام وتسبحت في خمس دقايق...تلبست ثيابي وصليت...وبعدها خذت اغراضي الشخصية والسفره اللي حطيتها على جتفي بشكل مهمل..ونزلت تحت... شفت امي ويالسه عندها يارتنا ام حميد اللي دوم تينا...ما استحيت لاني متعود عليها ..وتقريبا هي مربتنا مع امي.. وولدها حميد اللي حاليا مسافر من سنتين ونص يكمل دراسته في الخارج دكتوراه.. يوسف: السلام عليج ام حميد... ام حميد: مرحبا مرحبا...هلا والله بالغالي شحالك ابويه..؟!! يوسف: بخير الله يسلمج شحالج انتي وشحال العيال..!! ام حميد: بخير وسهاله يسلموون عليك.. يوسف: وشحال حمييد..؟ شو مسوي فدراسته ومتى بيخلص..!! ام حميد: والله ياولدي مايشكي باس..ويقول باقيله سنه مادري سنه ونص..مادريبه..متى ماخلص بيي ان شاء الله. ابتسمت.. يوسف: تحملي خالتي عن اييج ساحبله شقرا وياه..ان ماحشرتيه تراه بيعرس هناك .. ظحكت امي وظحكت ام حميد.. ام حميد: لا عاد انته تعرفه انه مايسوي هالحركات... الله يحفظه ياربي... يوسف: آمين... امايه خالد بييني الميلس بعد شوي..طرشولنا الدلال واذا عندكم فواله زين... ام محمد: ان شاء الله احين بامر البشكاره.. خليت العيايز وطلعت من البيت...توني بدخل الميلس الا وخالد واصل... ابتسمت..وتوايهت وياه...شكله كان معتفس... اطالعني بمعاتب... خالد: والله انك سبال.. ودخل عني الميلس وانا رديت الا اضحك عليه... يوسف: مايسوى عليك ياخي قلت لك مابحظر وياك ..خطبة اهلية انا وين ارز بالويه..!!! يلس خالد عالكرسي.. خالد: انا ما ارمس عن سيرتك للخطبه...انا زعلان لانك لا اتصلت بي ولا طرشت لي مسج ولا باركت لي... يييت انا وعلى ويهي ابتسامه..ويلست عداله... يوسف: حقك عليه..والله ماحصلت وقت.. خبرني شو صار امس.. اطالعني خالد بنص عين..بعده متظيج... خالد:..... ماشي... كل حد عطى رمسته... وصارت رسمية...بس قهرني ابويه يوم قال مستعيلين عالعرس...!! يوسف: ههههههههههههاي بيورطك... خالد: منو قالك خليته..قتلهم لا...انا بعدني ادرس باقلي هالكورس واخلص..وبعدها ابا اشتغل..وابا املج.. وعقب العرس.. يوسف: وافقوا عالملجه...؟!!.. خالد: والله مادري شفتهم مترددين...قالوا عقب بنتشاور في الملجه هذي...شكلهم مايبونها اطول... يوسف: هممم وايد ناس جي.. خالد: زين بس انا ماعرف البنت...ولا اعرف كيف تفكر وماريد انصدم بعد العرس...واعتقد هذا من حقي.. يوسف: ماعليك ماعليك بيوافقون... يتغلون عليكم الحين....بس اهم شي تكون انته مرتاح ومستعد للالتزام..مب تاخذ لك حرمه وعقب اطنشها وماتعطيها حقوقها... شفت خالد شوي يفكر... خالد: وشو ناقصني انا ما اعرس...وشو اتريا اصلا..!! يوسف: مثلا تتريا لين ماتحس انك صدق صدق تبغي تعرس... خالد: ابا اعرس..بس مب الحين...خلاص الحين ماتنفع الرمسة... يوسف: ترمس احين احسن عن ترمس بعد الملجه... هذي الا خطبه بس هذاك يعتبر زواج... خالد: انته ليش متشائم..!!.. كلهم مدحووها لي...خلاص خلاص انا مرتاح من هالخطبه...يابوي اذتني والله امي عالعرس ابا افتك من صدعتها.. يوسف: هههههه احين بتاذيك على ترتيبات العرس... خالد: ههههه والله انها من اليوم الصبح بدت بهالصدعه اليديده... يوسف: الله يعينك...ويوفقك.. خالد: آآمين... اخوك ناصر رد بوظبي.؟!! عقدت انا حياتي... يوسف: مادري...ستيشن ابويه محد يمكن شلها وسار بوظبي... تمينا انا وخالد نسوولف عن اشياء مختلفه...واهمها كان رجعتنا للجامعه بعد اسبوع..وعن المساقات اللي سجلناها رباعه والمشروع اللي بنسويه للتخرج... وايد كنا نحاتي هالكورس الاخير...!!. ------------------------------------- اليوم: الجمعة.. المكان: في سيارة ناصر.. الوقت: السادسة الا ربع مساءا.. -------------------------------------- (ناصر).... حسيت براحه يوم طلعت من المول... لاني تعبت من مشتريات منى..لكني مابينتلها هالشي.. وشي ثاني كنت متنرفز وابا اطلع عشان ما اشوف لا سهيل ولا راشد... يذكروني بيوم اسود ... كنت فيه شيطان مب ناصر.... مسكينه...اظن انها عايشه اسوأ فتره فحياتها بسببي.. كنت متنكد ومزاجي مثل ماتقولون اسود...سمعت منى تقولي.. منى: انته بتاخذ سيارة ابويه هالاسبوع..!! ناصر: هي..سيارتي مابتخلص لين الاسبوع الياي.... من طرف عيني شفت منى اطلع شي من كيس صغير..كانت سلسله.. مدت ايدها وعلقتها في مراية السيارة الامامية وانا اراقبها بفضول.. بعد ما خلصت شفت السلسلة...مكتوب عليها" عين الله ترعاك"... تاثرت...ابتسمت..انا شفتها يوم اشترت السلسلة بس ماتوقعت انها لي...!! ناصر: حقي.؟!! منى: هي... عشان ماتسوي حوادث ثاني مره ... ابتسمت اكثر... حليلها منى... بطريقة عجيبه خوزت كل المزاج الاسود اللي كان مسيطر علي من طلعنا من المول.. ناصر: بس هذي مب سيارتي.. منى: بس بتستخدمها هالاسبوع..ولا تنسى تاخذها يوم تخلص سيارتك وتعلقها... ناصر: مشكووره... قالت منى بفرح ملحوظ.. منى: العفوو... وصلنا البيت...ولاحظت وجود سيارة غريبه علي... سالت نفسي بس بصوت عالي. ناصر: سيارة منو هذي..؟!!.. منى: آآه..احم..هذي سيارة خالد ربيع يوسف... استغربت..والتفت لها بسرعه.. ناصر: شدراج انتي..!! منى: تراه دوم اييينا....هذي سيارته اظن.. كانت تتكلم بارتباك....جني زيغتها..!!.. دخلنا البيت ووقفت الستيشن جدام الباب في الحوش.. نزلت انا ومنى...شللت هي اكياسها وانا مشيت صوب الميلس عشان اشوف منو هناك.. فعلا ..كان خالد...حافظ على منى الظاهر حافظه الساير والراد... ناصر: السلام عليكم... نش خالد ويوسف يوم دخلت انا..سلمت على خالد...وخذت علومه وعطيت يوسف نظرة تفحصية...ابتسمت لي عشان يطمني بانه بخير وحالة الاكتئاب اللي كانت فيه الصبح ماعاادت موجوده... ناصر: مبرووووك ياخالد...الله يوفقك ان شاء الله... خالد: الله يبارك فيك... ناصر: غلبتني ماشاء الله عليك... انا هالعيوز من تشوفني حشرتني عالعرس... خالد: وشحقه ماتعرس.. يوسف: لا ترد عليه...ذبحنا...خلاص خطب يبا العالم كلها تعرس الحين عشان مايفتقد العزوبية.. ظحكت انا ...لكني خذت سؤال خالد على محمل الجد في نفسي... وانا شو قاصرني ماعرس..؟!!!... تميت اسولف وياهم لين ما اذن المغرب...وبعد الصلاة في المسيد رجعت البيت ولميت اغراضي.. سلمت على اهلي..وشليت الستيشن وتوكلت صوب بوظبي... ------------------------------------ اليوم: الجمعة... المكان: العين مول... الوقت: السادسة والنصف مساءا.. ------------------------------------ (سهيل)... تلاقينا بعد الصلاة عند الدري في العين مول...فاطمه كانت شاله كيستين كبار اغراض للبيبي..وشيخه شاله بعد اكياس مهرة...لانها رفضت تخلي مهرة تشل شي بايد مكسووره... حشى مهرة هالكثر متشرية اغراض للجامعه..!!!.. راشد: ترانا تاخرنا وايد..يالله نسير...محتاييين شي غير.. شيخه: لا خلصنا...انا ريولي بعد عورتني.. مهرة: شيخه هاتي عنج...هاتي انزين عالاقل كيس واحد.. لزت شيخه عن مهرة بعيد... شيخه: لالالا والله ماتشلين عنبووو....ماعليه انا عادي... مهرة: الله يهديج... شيخه من دون قصد يوم لزت بعيد عن مهرة...كانت متجهة صوبي...ويوم شفتهن يظاربن منو تشل الاكياس قلت فخاطري مابنخلص اليوم...!! مديت ايدي وسحبت الاكياس من شيخه.. سهيل: هاتيهن عنج... فاطمه: اوهووو ياسلام جنتل مااان... ظحكت انا على فاطمه...وشيخه ... شيخه: لالا برايهن خفاف... سهيل: هاتيهن اقووولج... سحبتهن عن شيخه وشليتهن عشان نفتك من الصدعه.. فاطمه: وانا ..حد يشل عني ... راشد: هههههههههه سوري ما انتبهت... شل راشد الاكياس عن فاطمه واتجهنا للباركنات ..وركبنا السياره ... طلعنا في شوارع العين وراشد يسوقبنا... السياره كانت الازعاج بعينه... شيخه وفاطمه ومهرة يقرقرن رباعه ولو ان مهرة كلامها قليل... وانا اسولف ويا راشد عن امور مختلفه... والمسجل يرمس ارووحه... ما انتبهنا الا وراشد داخل بيتهم وموقف سيارته... التفت له انا مستغرب منه.... سهيل: شحقه ييت هني..؟؟ بادلني الاستغراب هو بعد... راشد: ليش.؟!. سهيل: وابوي..!!...ليش ماخطفتنا البيت عشان انزل مهرة..!! راشد: اووووووووووووووه والله نسيت..الله يحشركن من حريم صدعتن لي راسي ونسيت... شيخه: الا قول متعايز... راشد: لا والله اني نسيت... فاطمه: وابوي عليكم هي شعليها بيت خالتها....نزلي حبيبتي بتعشين ويانا وبنسولف وياج شوي.. مهرة:آآه..لا مره ثانيه ان شاء الله.. شيخه: لاااااا شو مره ثانيه دامنا في البيت...يالله يالله انزلي ويلسي ويانا شوي وبيوصلج راشد بعدين... انا ماكان عندي مانع...عشان جي سكت...وترييت يتفقون على شي... شفت راشد يصد صوب مهرة اللي كانت يالسه وراي وقالها.. راشد: هااه مهرة..!!. بتنزلين وبتطيعين الشور وبوصلج عقب والا اوصلج احين..؟!!..يالله خلج عاقل ونزلي امي اكيد بتفرحبج...دومها تهاذيبج... مهرة:......او..اوكي... نزلناكلنا من السياره وخلينا الاكياس في السياره ماعدى اكياس فاطمه نزلناهن... توجهت انا صوب الميلس على بالي راشد بيي وياي لكنه زقرني واشرلي عشان ندخل كلنا البيت...مع البنات.. سهيل: تعاااااااااااااال وين نبا نتفيزر ويا الحريم... راشد: الحريم هذيلا خواتك وخواتي وامي محد غريب...تعال تعال.. رجعت للبيت ودخلت بعد راشد ...خالتي كانت يالسه في الصالة...ييت وسلمت عليها ومن بعدي يت مهرة تسلم على خالتها... يوم يلست عالكرسي..لصقت مهرة فيني...وراشد عدالي من الصوب الثاني... صاصرت مهرة وانا اقول.. سهيل: شحقه لاصقه فيني جي سيري عند شيخه يلسي... هزت مهرة راسها باصرار...تفضل انها تقعد عدالي عن تسير تقعد عند البنات...شو هالحاله..!!.. خالتي كانت مستانسه وايد بمهرة...ولابسه الكل وطايحه الا تسولف معاها.... مهرة فعلا تشبه الوالده الله يرحمها... والظاهر خالتي تشوف فيها امي... تذكرت كيف ان خالتي بعد وفاة امي اقترحت انها تربي مهرة بنفسها..وتيبها معاها البيت...بس ابوي وحمد رفضوا... بحجة ان مهرة صارت حرمه ولا عليها...ومابتقعد مهرة متحجبه طول الوقت بسبب بو راشد...مابترتاح... بالاضافه الى وجود راشد..!!.. وخالتي ما اصرت على رايها... دخل بو راشد علينا في الصالة...حسيت بمهرة بانها منحرجة ومرتبكه وودها تشرد.. بوراشد: ماشااااااااااااااء الله الكل متيمع هني اليوم...مرحبا مرحبا الساااع بعيال خلفان... سلمت على بوراشد ..وسلم هو على مهرة اللي ردت عليه سلامه وهي تحاول تندس ورا ظهري... غريبه اختي.. موول ما اجارب الناس..!!!.. هذي كيف بتروح الجامعه وبتدرس فيها..؟!!.. تقربت شيخه من مهرة..ومني.. راقبت انا ملامح شيخه الحلوه...وعيونها السوود..ورموشها الطوال..!!.. شيخه: مهاااري تعالي نسير فوق...براويج حجرتي انتي ماشفتي فبيتنا غير الصالة والحوش... مسكت شيخه مهرة من ايدها وسحبتها وراها للطابق الفوقي...وانا اتبعهن بعيوني.. وطولت على هالحال لين ما اختفت شيخه ومهرة عن نظري... وفجاة تصادمت نظرتي مع نظرة راشد وهو يطالعني بنص عين...وابتسامه ساخره على شفايفه... سهيل: شفيك.؟ قالي بمكر.. راشد: سلامت راسك.. ظحكت انا...السبال انتبه لي وانا اطالع شيخه ومهرة...وهواصلا منتبه علي من زمان بس ساكت عني.. رغم ربعتي الطويلة براشد الا اني اعجز احيانا افهم اللي يدور فباله..وليش يتصرف مثل مايتصرف..!!.. هو يدري اني اهتم بشيخه...بطريقه انا بنفسي ما افهمها...وهو يدري...لكنه ساكت... ---------------------------------------------- اليوم: الجمعه... المكان: غرفة شيخه... الوقت: السابعه والنصف مساءا... -------------------------------------------- (مهرة).... المكان الوحيد اللي كنت ابغي اكون فيه هو غرفتي....لكن الظروف جرجرتني معاها لغرفة شيخه... وارتحت مبدئيا لهالشي...لاني ببتعد عن الصدعه..ولو انه نص الصدعه كانت صادره من عند شيخه... دخلت غرفتها اللي كان لونها بطيخي والوانها هادية وحلوه... تجاهلت الكرسي ويلست عالشبرية ويلست هي معاي.. مهرة: مااشاء الله حجرتج وايد حلوه... شيخه: تسلمييين عيونج الحلوه.. قوليلي مهرة...متحمسه لحياة الجامعه..!! مهرة: هممممم... تقريبا هي..متحمسه..ولو اني ماعرف شي فيها لكن حالي من حال هالبنات... شيخه: ليتني كنت ادرس جان علمتج كل شي...عالعموم أي شي تحتاجينه انا حاضره... مهرة: تسلمييين..اكيد اني كل يوم بحشرج بسالج عن شي... شيخه: افاا عليج والله...خبريني متى بتمتحنين تحديد مستوى..!! مهرة: باجر ارشاد.... بنستلم بطايقنا الجامعية اظن..وبنشوف بعدها شو بيصير.. كنت متوتره ومتحمسه بنفس الوقت بسبب قرب بداية الدوام في الجامعه...ادري اني بتلعوز وبتمشكل بسبب جهلي لكل امور الجامعه... لكن بمشي حالي ان شاء الله... شيخه: همممممم مهرة...قوليلي.. ليش طلعتي من المحل بهالطريقه..!!!... نقز قلبي بسبب الذكرى....وتوترت..وعين شيخه تراقبني مثل الصقر... مهرة: قتلج...شفت بنت مادانيها... شيخه: بس اللي اذكره انا..ماكانت في المحل الي كنا فيه بنت كاشفه ويهها...ماكانت غير بنت وريال وياها وكانت متغشيه...كيف شفتيها..!! توترت اكثر.... ماشاء الله ياشيخه هب عين عليج... مهرة: اعرفها حتى لو متغشيه... ابتسمت شيخه بطريقه غريبه... شيخه: عنبووو يامهرة...وين بتعرفينها وهي متغشيه ..!!..وبعدين مايستاهل كل هذا انج تشردين من المحل بهالطريقه حتى عالكاونتر ماوقفتي...!!! قمت من الشبرية وانا متظايقه...ليش هالتحقيق..شو يهمج فحياتي عشان تساليني..!!!..وقفت عند الدريشه وانا احظن ايدي المكسوره ...وسكت... بعد لحظات حسيت بايد شيخه على كتفي... اطالعتني بحنية.. شيخه: انتي ماعندج خوات...وانا بعد وحيده في البيت وما احصل حد اتكلم معاه...خبريني...وكل كلامنا واسرارنا بتكون فبير..صدقيني... رفعت لشيخه عيون مليانه دموع...وابتسمت..رغم دموعي... شيخه طاحت عالعوق فعلا...انا وحيده وماعندي حد اكلمه ويخفف عني... شيخه: فديت هالويه والله...لا تصيحين حبيبتي...تعالي.. وسحبتني ويلستني عالشبرية مثل ماكنا قبل... شيخه: خبريني...ليش شردتي من المحل بهالطريقه..!!! ماقدر اقولها...شو بتفكر فيني..!!!...اخافها تخبر حد...كيف اقدر اثق فيها..!!.. سكت..وما اتكلمت... شيخه: سكوتج هذا وتوترج ياكدلي بان السالفه جايده..وما اقدر افكر غير ان مب البنت..الريال اللي معاها كان هو السبب... شهقت...ورفعت نظري لها بصدمه....كيف عرفت..!!!!!!.. شيخه: صح..؟!!.. نزلت عيني لحظني مره ثانيه.... مهرة: لا تكملين شيخه بليز... شيخه: كنتي خايفه من وجوده...اناماعرف هالريال..يقرب لج..؟؟ وبعدين ليش كنتي خايفه منه جي...خبريني مهرة يمكن ترتاحين...!! ماتتصورون الصراع اللي كان في نفسي...كنت اتمنى اخبر حد حيادي وارتاح...بنفس الوقت خايفه تخون فيني وتخبر حد... انا ما عرفها عدل عشان اجزم انها توفي بوعدها....بس كيف بعرف اذا ماجربت..!! لكن اجرب بشي خطير مثل هذا...!!! رفعت نظري لها وشفت عيونها هادية..وابتسامتها مطمئنه... لا...اكيد مابتقول لحد... مهرة: ماعرف هالريال...ولا يقرب لي...وماشفته غير مره فبيتنا..وهذي المره الثانيه... عقدت شيخه حياتها باستغراب.. شيخه: عيل ليش خفتي منه جي..!! نزلت عيوني مره ثانيه خايفه اني انطق... مهرة: هممم....الريال هذا...تـــ...تــحـــ...همم...تحرش فيني..!!.. شهقت شيخه بقو يدل على صدمه... شيخه: شو تقوولين..؟؟ كيف يعني تحرش فيج..!! فجاه اندفعت الكلمات مني بدون ما اقدر اوقفها.. مهرة: مسك ايدي...وكشف عن ويهي يوم كنت متغشيه... شهقت شيخه مره ثانيه... شيخه: خيبه..!!..هممم..وطي صوتج...صبري بشغل المسجل عشان محد يسمعنا... التدبير هذا اللي سوته شيخه اثبت لي انها ماتبا حد يدري غيرها..راحت وشغلت المسجل وطولت عليه وقفلت الباب عشان نتكلم براحه...ردت تقعد جدامي وقالت بلهفة.. شيخه: خبريني كل شي بالتفصيل...شو سوا هالسبال..؟!!.. مهرة: همم...تدرين بشكارتنا شردت...وصتني عمتي بان أي حد يدق الباب سواء ريال او او حرمه..باني اقرب بهم واجدم لهم الفواله... شيخه: وبعدين.؟؟ مهرة: اول امس.. صادف ان الكل غايب عن البيت..وعمتي طلعت للسوق...ومحد غيري انا في البيت... دق هذا الباب وانا فتحت له وقربت به في الميلس... شيخه: خبله انتي...؟!!!!!!!!!!!.. مهرة: شو اسوي عمتي قالت لي ياويلج ان مانفذتي... شيخه: عمتج مادري كيف تفكر..!!!!..وبعدييييين..؟!! مهرة: يوم يبت له الفواله مسكني...وكشف عن ويهي وشعري...والله شيخه مت من الخوف...تم كل شوي يتقرب مني ويمسكني بقو اكثر وانا اظارب لكن ماشي فايده..اضطريت استخدم ايدي المكسوره وتمت تعورني....ترجيته يتركني..وبعدين...وبعدين... بس.. صرخت شيخه وهي تمسك راسها.. شيخه: لاااااااااااااا ...لا تقولين..ياويلي ياويلي... على طول فهمت شو فهمت شيخه...وطمنتها... مهرة: لاااا لاا شيخه...ماصار شي...يوم ترجيته فجني..وشردت انا لبيتنا وقفلت على نفسي... شيخه: آآآآآه خوفتيني يامهرووه..حسبي الله عليه...ييعله مايتوفق وين مايسير ليش يسوي فيج جذي...؟!!.. يزاج انج اكرمتيه وظيفتيه..!! نزلت عيوني بحزن عاللي صابني... مهرة: والله ماتتصورين الرعب اللي عايشه فيه من ذيج الساعه...يوم شفته اليوم مت من الخووووف..زين ما اغمى علي... هزت شيخه راسها باسف.. شيخه: ماخبرتي حد..!! مهرة: لا..ولا بخبر...دخيلج شيخه لا تقولين لحد ابدا ابدا...والله بتدمر حياتي ... شيخه: بس لازم ياخذ عقابه... مهرة: الله بيتكفل فيه وبيعاقبه...واذا مب في الدنيا في الآخره... بليز شيخه لا تخبرين حد ابدا.. شيخه: ولا يهمج.... بس والله ماتوقعت السالفه تطلع جذي خطيرة...فديتج يابنت خالتي..الله يعينج عاللي صابج.. بس الحمد لله ماصار شي جايد ياثر على حياتج... رفعت نظري لشيخه بعصبية.. مهرة: لكنه اثر علي ياشيخه...انا صرت اكره الرياييل...ماداني اشوفهم ولا اني احتك فيهم... شيخه: مالوومج..لكن مب كل الرياييل واحد ياشيخه... مهرة: لا كلهم واحد...ماشفتيهم اليوم في المول..!!.. شيخة: هي والله صدقج...الناس استوت تافهه...الرياييل من يشوفون عباة سودا لو كانت اللي لابستنها كبر امهم بعد يربعون وراها..صاروا مايحشمون اعراض الناس...والبنات صارن اتفه بعد من يشوفن كنادير بيض بلقن بعيونهن يبصبصن لو من تحت الغشوة....ويسون يميع الحركات عشان يلفتن انتباه الشباب ... مهرة: مادري هذيلا وين اهلهن عنهن....الشباب بنقول غير عن طبيعة البنات..لكن البنات جي كاشفات في الاسواق . وبروحهن.. شيخه: لا تجمعين...مثلا نحن صح اليوم سايرين ويا خوانا...لكنا انا وانتي اعتزلنا وروحنا رواحنا...واللي يشوفنا بيقول هذيلا بنات يايات ارووحهن..!!!.. مهرة: صدقج...الواحد لازم مايجمع....والظاهر ان الزين والشين فكل مكان حتى في العين ...!! شيخه: هي بس الفتره الاخيره صاروا الشين اكثر من الزين.... ارتحت للكلام مع شيخه... صحيح ان اربع سنين فرق بيني وبينها لكن افكارنا متقاربه...باختصار تمينا يالسين في غرفتها لين مازقرونا للعشا... وبعد العشا ركبنا سيارة راشد اللي وصلنا للبيت...!! اليوم: الجمعه... المكان: في شقة ناصر.. الوقت: الثامنة والنصف مساءا.. -------------------------------------------------- ( ناصر).... فتحت باب شقتي بالمفتاح...وسكرت الباب وراي...شغلت الليتات والمكيف المركزي ...سرت صوب حجرتي وحطيت شنطتي هناك...الحمد لله اني صليت العشا في الطريج..عشان ماقعد احاتي الصلاة واأجلها لين اخر شي انساها... طلعت من غرفتي ورحت للمطبخ.. فتحت الكبت اللي كانت فيه غرشة الخمر..مازالت مكانها...وقبل ما اضعف جدامها..مسكتها وجبيتها كلها في المغسل..ومن بعدها عقيتها في الزباله... ارتحت نفسيا بانه ماعندي مصدر ثاني للخمر في شقتي وفي متناول ايدي..كله تخلصت منه.. مسكت الجبريت مال الغاز وشليت طاسه معدينة .ورجعت لغرفتي وفتحت الكبت..وطلعت الصندوق المربع وجبيت محتوياته كلها عالشبرية... صور بنات..تذكارات...واوراق ارقام...واسامي...وهدايا رمزية....حطيتهم في الطاسه وشليتهم معاي وطلعت للبلكونه.. حطيت الطاسه عالارض...وولعت فيهم وحرقتهم... راقبت الصور وهي تذبل وتتعفس وتحترق...حسيت برعشة تسري فجسمي...هالبنات ان ماتابن..بتاكلهن نار جهنم مثل ماتاكل الظو صورهن الحين... ياويلي من ربي..ابا اغسل ذنوبي باي طريقه... بعد ما احترقن كل الذكريات السودا...شليت الطاسه ورجعت للمطبخ.. وجبيت الرماد في الزباله وغسلت الطاسه ورجعتها مكانها في الكبت.. خلاص..حسب ما اذكر ما تم شي ماتخلصت منه...طلعت من الشقة وقفلتها.. ورحت للجميعة... واشتريت كل شي ناقص في المطبخ...مب كل شي..اللي قدرت اتذكره ...لايغركم اغلب اللي اشتريته معلبات سهلة التحضير وكيك وكافي وجبس وعصاير ..ونقانق وهمبرغر ...مثل ماقلت..جميع انواع المعلبات والكراتين..رن تيلفوني يوم كنت عند الكاونتر... اوففففففف....امررره توقيت..قلت لها دقي الجمعه المسا ودقت... سكرت فويهها... وحاسبت عن اغراضي وشليت الاكياس وطلعت للسياره ...اتصلت مره ثانيه... يوم دخلت سيارتي وركبت وامنت بانه محد بيسمعني اكلمها..رديت... ناصر: مرحباا.. سومه: اهلييييييييييين حبيبي...فديت هالصوت واللي اني تولهت عليك... حست بوزي انا... ناصر: شحالج سومه..!! سومه: بخيير بس زعلانه...شياك سكرت فويهي..!! ناصر: كنت في السوبرماركت والرياييل وايد... سومه: اهااااااااا..متى وصلت بوظبي عيوني.. ناصر: قبل شوي والله...اقول سومه.. سومه: ياعيون سوومه... ناصر: انا خطبت... ابد..ماشي ردت فعل...سكتت سومه منصدمه... سومه: شوووووووووووه..؟؟؟ ناصر: مثل ماسمعتي... ودام نحن متفقين بان اللي مبينا فتره وخلاص...احين اقولج ان هالفتره انتهت... سومه: نصوووري..شو تقول انته..؟ خطبت منووه..؟ ناصر: مايخصج... خلينا نتفارق على خير.. سومه: حرااام عليك نصوور...حبيبي ماقدر اعيش بدوونك لا تتركني جي حراااام... ناصر: الحرام اني اكلمج...بليز لا ادقين لي مره ثانيه عشان تحافظين على ماي ويهج...والسموحه اذا غلطنا عليج...فمان الله.. وسكرت فويهها قبل ماتقولي أي كلمه..واغلقت التيلفون بعدها... اعرف سومه...واعرف صدعتها...ماعندها كبرياء او شخصية... وبتم تترجاني وبتاذيني...وانا ماقدر على صدعتها عندي امور اهم اهتم فيها... شغلت السياره وطلعت رايح صوب الشقة... وقضيت بقية الليل وانا ارتب الاغراض اللي اشتريتهن في الكبت...ومب بس جي... سويت لي سندويش همبرغر وتفننت فيه...وظحكت اخر شي عالنتيجه...لكنه لاباس فيه يترس بطن... صبيتلي عصير وشليت السندويش ورحت للصالة ..شغلت التلفزيوون.... وجابلتني القنوات المشفره...اوهووووووووو هذا شي نسيت اسويه...!! القنوات المشفره هذي لازم امسحها..واركب لي دش عاادي .. وبما اني ماقدر احين... حطيت لي مسرحية عالفيديو ويلست اطالعها .. لين ماياني الرقاد وسرت ارقد... هذا نموذج عن حياتي المستقبلية..؟!!!... لازم احصل لي شي يشغلني عن هالفراغ والا بظيع مره ثانيه... ---------------------------------------------------------- اليوم: السبت.. المكان: غرفة الطعام فبيت خلفان... الوقت: السادسة والخامسة واالاربعون دقيقة.. --------------------------------------------------- (سيف)..... فيني رقاد...رغم الرقاد الطويل اللي رقدته لكني مازلت احس بكسل..بس شو نسوي اليوم اول يوم مدارس ولازم اقوم... تسفرت وشليت اغراضي..ونزلت اتريق... حصلت ابويه وعمتي وسهيل يالسين يتريقون... سيف: السلام عليكم... ردوا علي السلام ...سلمت على ابويه وعمتي ويلست...صبت لي عمتي جاهي.. سهيل: ياااااااااااااالله يالعيوون كيف ميفن...ماجنك امس معبر الرقاد كله... سيف: سكت عني سهيل والله فيني صداع... سهيل: ههههههههههههه بدت عوارض المدارس... مااييكم المرض الا يوم تبدا المدرسه... سيف: ما تهنيت في الاجازه مسرع ماخلصت حشىىىىى.... آمنه: يااالله ياسيف جاانك ماخليت مكان ماسرت له وبعد ماتهنيت..!!..الا ماتشبعووون.. سكت عن عمتي ويلست اتريق... شوي وداخله علينا مهرة..ببجامه نوم طويلة... مهرة: السلام عليكم... الكل: وعليكم السلام... سهيل: انتي شو موعنج من الصبح مب عوايدج..؟!!.. مهرة: مادري من الحماس مارمت ارقد... بوحمد: حماااس لشوووووو.؟!!. مهرة: ابويه اليوم عندي ارشاد...اول يوم في الجامعه... بوحمد: شو تبين بالدرااسه انتي...يلسي في البيت اخير لج.. شفت في عيون مهرة الرعب... مهرة: لالالا ابويه دخيلك ابا ادرس ...لا تحرموني من الدراسه احين... سهيل: يسولف وياج درسي برايج.. بس منوو بيوصلج... سيف: يعني ماسالت منو بيوصلني انا... سهيل: انته حتى لو تسير مشي عاااادي... انقهرت... سيف: لا والله ماسرت مشي ..عشان تظربني الشمس فراسي.. مهرة: هههههه قصده عشان ماتصيبه ظربة شمس... سيف: لا تقعدين تتفلسفين..مب عشان بتدخلين الجامعه تبدين بالفلسفات.. مهرة: ليش ؟ من حقي..الوحيده اللي بستوي جامعية فيكم... سيف: خليناها لج الجامعه واللي فيها... مهرة: المهم صدق منو بيوصلني...؟؟؟ آمنه: انا سيارتي بياخذها سهيل...ماعندي سيارة اوصلج.. سهيل: انا بوصل سيف لانه جاهز ومتلبس انتي بعدج بكشتج ولا بوصلج.... مهرة: حرام عليكم... مب من الحين اسير ..بيقولون هذي ماصدقت على الله تفتح الجامعه...الساعه ثمان بسير.. بوحمد: خلاص جان بتسيرين ثمان انا بوصلج.. استانست مهرة ...ويلست تتريق هي بعد..بعد دقايق... سهيل: يالله يالله بسك...لاتزط وايد.... سيف: خلني اتريق لا تيني الصفرا واطيح عليهم... كنت امزح...قالي سهيل بتطنيز.. سهيل: ههههههههه ياااااااااااااارج الله انتي...هي فديتج تريقي تريقي عن اطيحين عليهم في المدرسه... سيف: ههههههههههههههههههههه جب... مهرة: ههههههههههههههههههههههههههههههههاي..تستاهل...يبتيه ا لعمرج..اقصد يبتها لعمرك...هههههاي.. سيف: بلمج عثمج احين سكتي لا اسويلج درايش امامية في اول يوم جامعي.... سهيل: صدقها...عيل مره فيني صداع...ومره منو بيوصلني....ومره بتظربني الشمس....ومره بتيني الصفرا...قم لا اسير عنك وراي دوام والا نسيت..!! خليت ريوقي اللي ماكملته ونشيت .. سيف: انزين انزين...بتغسل لحظة بس.. سرت الحمام وتغسلت...ورجعت لسهيل ورحت معاه لسيارة عمتي الاودي وركبنا فيها وسرنا.... للنكد...ولوعه الجبد.... للثانوية العامه....وعدت نفسي بانها اخر سنه ادرسها طول حياتي.. بعد الثانوية خلااااااااااااااص ماشي دراسه ..بشتغل سيده وبفتك من الكراف... --------------------------------------------------
|
|
#12
April 9, 2015, 02:01 PM
|
||
|
|
||
|
رد: رواية موعد مع السعادة للكاتبه العيناويه
الجزء الحادي عشر... ------------------------------ اليوم: السبت.. المكان: في سيارة ناصر.. الوقت: السابعة صباحا... ------------------------------ (ناصر)... سقت سيارتي في شوارع بوظبي المزحومه...وانا احاول اني اركز في سواقتي...لكن غصبن عني كل شوي يشرد تفكيري لياري عبدالعزيز...اللي تلاقيت معاه في المسيد القريب وقت صلاة الفجر... ابتسمت... تذكرت نظرته الفخورة الهادية..وابتسامته الطيبه لي..لاول مره يبتسم لي جذي.. تذكرت...اني يوم دخلت المسيد اصلي وقفت عداله بدون قصد مني...يمكن اني كنت ادور حد اعرفه عشان ما احس اني وحيد او غريب...!!!...وبعد الصلاة...صد صوبي واطالعني بنظرة غريبه...وابتسمت لي بشكل يريح النفس...قالي بكل بساطه... عبدالعزيز:.. نـــوّر ويهك ياناصر...!! ساعتها سكت عنه... حسيت كاني ولد صغير وهذا الاستاذ..وقاعد يهنيني على نجاحي...حسيت بايده وهي "تربت" على جتفي بخفه...خلاني وقام عني وطلع من المسيد...تذكرت كلامه...نور ويهي..!!..والله..!!.. ويه عبدالعزيز حنطي البشره بطبيعته..لكن دايما يوم تشوفه تحس انه فيه نور..وراحة بال..معقوله انا الحين منور ويهي..!!!.. لا اكيد يبالغ...صح اني بديت التزم لكني ماوصلت لهالدرجه من الالتزام والتدين مثله... قعدت في المسيد وخذت مصحف من عند الزاوية وقعدت اقرا فيه... من زمان ماقريت قرآن...من زمان من زمان ...يعني من سنين... وقفت عند الاشاره ...ومسكت تيلفوني اللي مغلق من امس وفتحته...على طول انهلت عليه المسجات...اكيد من عند سومه..عوذ بالله...ماكنت واضح انا بكلامي والا شووو..؟!!!..قعدت اقرى وحده واخطف ثلاث..ومسحتهن كلهن...وكتبت لها مسج وحده..."انسي..خلاص.. وان دقيتي بخبر اهلج عليج...وتعرفين اني اسوي اي شي..".. اعتقد من بعد هالمسج مابتتصلبي وبتفكني..مسحت رقمها من تيلفوني...وفكرت اني اغير رقمي...لكني غيرت رايي...وايد ناس يعرفون هالرقم وانا مافيني اغيره... وصلت دوامي..ونزلت...واول ماوصلت المكتب طلبت من راجو اييبلي ريوق لاني ماتريقت ... وبعد نص ساعه..اتصل بي عبدالله ... ماعرفت شو اسوي..ارد عليه او لا...في النهاية رديت..مافي مجال للهرب.. ناصر: مرحبتييين... عبدالله: هلالا واللله بناصر...وينك يارياااال..؟!! ناصر: والله في الدوام...شحالك؟ عبدالله: بخير والله...شحالهم اهلك؟؟ ناصر: مايشكون باس بخير وسهاله..وانته ماسرت لاهلك هالاسبوع.. عبدالله: لاااااااه قلت لهم عندي زام...ولا سرت.. ناصر: والله انك مقصر... عبدالله: شو ابابهم هم وصدعتهم...مابغيت افوت الحفله..فاتتك بصراحه... ناصر: برايها تفوتني... سكت عبدالله عني فتره....وحسيت انه في نفسه يتسائل... عبدالله: ناصر شفيك..؟؟ زعلان من حد..!! ناصر:..زعلان من نفسي... عبدالله: افاا...شحقه..!!.. ناصر: بس...بصراحه عبوود انا قررت اودر كل هالسوالف ... عبدالله: اي سواالف..؟!! ناصر: انته عارف اللي بالي بالك... عبدالله: شوووووووه..؟؟ خبال هوو تودر مني والدرب..!!! ناصر: والله الخبال اني استمر عبود... عبدالله: انزين شوو يااك...انقلبت مره وحده جي...قول بعد بتودرنا نحن..!! ناصر: والله ان ما اصطلبتوا وودرتوا هالامور انتوا بعد...مافي مجال غير اني ابتعد واخليكم براحتكم.. عبدالله: ناصر..!!..ينيت انته...اســـ... قاطعته بسرعه.. ناصر: عبدالله برمسك بعدين...احين انا في الدوام.. فمان الله.. ماحصلت رد من عبدالله شكله عصب...خله يعصب..سكرت فويهه...انا قلت له فمان الله محد قاله مايرد علي... --------------------------------------- اليوم: السبت... المكان: غرفة مهرة... الوقت: الثامنه الا عشر دقائق صباحا.. -------------------------------------- (مهرة)... متوتره..آآآآآآخ حيسة فبطني....ياربي ماعرف شي في الجامعه وين بدق براسي...!!!... ماعرف غير مبنى واحد سرناله يوم سلمنا فحوصاتنا الطبية وخلصنا اوراق القبول.. لبست قميص سماوي مريح وتنوره بيظا..ولبست بووت..عشان امشي برااحه... معاقم القميص ماطاعن يتعقمن في ايدي اليسار بسبب الجبس...وشكله الكم متلعوز...يالله ماعليه العباة بتغطي... لبست عباتي والشيله...وحطيت اغراضي في وحده من الشنط اليديده..وكل شي خطر فبالي اني بحتاجه.. كنت متوتره ومتحمسه فنفس الوقت... اجحلت جحال بسيط..وماحطيت شادو او اي شي ثاني... البساطه احلى...وويهي انا ..ماينفع عليه الميك اب وايد...ماينفع غير بسيط.. تعطرت وخذت شنطتي ونزلت... ابوي كان مازال في غرفة الطعام يقرى الجريده... مهرة: احمم...ابويه..يالله جان بتوصلني... حط ابويه الجريده عالارض وقام...واطالعني بعين متفحصه...حسيت انه يقارن بيني وبين امي..شفته ينزل راسه ..وبعدها قال.. بوحمد: محتايه فلوس..!! مهرة: لا ابويه عندي بيزات... بوحمد: يالله عيل.. ركبت مع ابويه السياره وتغشيت... ويوم وصلني لباب الجامعه..قالي.. بوحمد: متى بتردين..؟!!. مهرة: ماعرف والله.. بوحمد: شقايل ماتعرفين...انزين اتصليبي تيلفون يوم بتخلصين ..شي تيلفونات داخل الجامعه..!! مهرة: ابوويه مادري والله..وماعندي بطاقه اتصل بعد.. ماسويت حسابي ولا شريت.. شفت ابويه متوتر مب عارف كيف الحل.. مهرة: خلاص ماعليك بدبر عمري..باخذ بطاقه من عند حد وبتصلبك يوم بخلص.. بوحمد: زين.. مهرة: فمان الله.. نزلت من سيارة ابوي وراقبته برعب وهو يمشي ويخليني بروحي...دخلت من البوابه.. اوففف...بطني يعورني...زحمه بناااات... وايد زحمه.. سمعت حد يزقر... المشرفة: لو سمحتي...لو سمحتي... التفت لها وقلت.. مهرة: اناا..؟!! المشرفه: هي انتي..تعالي استلمي بطاقتج.. تقربت منها بابتسامه شاحبة.. المشرفة: شو اسمج الكامل...؟! قلت لها اسمي...وبدت هي بعملية بحث... وانابعد بديت بعملية استطلاع... نقلت نظري عالبنات كلهن... وايد منهن مسويات تجمعات مع ربعهن يظحكن ويسولفن.. وفي مجموعه من البنات كل وحده يالسه ارووحها تتريا.. هذيلا الوحيدات مثلي.. الله يعدي هاليوم على خير... لاحظت كذا بنت من جهات مختلفه من الرسبشن يالسات يطالعني بفضول..!! ولاحظت بعد كذا بنت اذكرها من ايام المدارس...زميلاتي في الصفوف..ياحليلهن.. خلصت المشرفه بحث وسلمتني بطاقتي..وحطيتها فشنطتي...وسالتها.. مهرة: لو سمحتي...همم ليش البنات متيمعات هني..؟ احين وين نسير وشو نسوي..؟ ابتسمت لي المشرفه بصبر...الظاهر انها هاذي المره المليون اللي تجاوب عن هالسؤال اليوم.. المشرفه: تريي مع البنات وعقب بتيكم مشرفه ثانيه تاخذكم لمكان الارشاد...وهناك بيعلمونكم كل شي.. ابتسمت لها انا بشكر... مهرة: شكرا... خليتها ودخلت القاعه اكثر..ادور كرسي فاظي.. لكن ماحصلت...اغلب البنات واقفات ... دورت لي زاويه عدال الدريشه ووقفت هناك اتريا مثل البنات.. كانت عدالي بنت.. اطالعني بفضول...كل شوي تصد صوبي...بس انا تجاهلتها.....لكنها بعد مرور دقايق سالتني.. البنت: لو سمحتي... مهرة: هلا... البنت: انتي كنتي فمدرسه (.....) الاعدادية..؟!! استغربت..هالبنت من وين تعرفني...!! مهرة: هي نعم... ابتسمت البنت... البنت: اسمج مهرة..؟!! رفعت حواجبي وظحكت..وادركت البنت ان جوابي هو هي اسمي مهرة... وقالت لي تشرح لي وهي تبتسم ... البنت: انا كنت معاج في ثالث اعدادي في الصف... بس في الثانوية رحت مدرسة (....)... غير عنكم... مهرة: اهاااااااااا...ماشاء الله عليج تذكرين...انا ذاكرتي ظعيفه لاني مااحتك وايد بالبنات... البنت: هي كنت الاحظ عليج....انا اسمي عليا...عليا سيف الـ(.....)... ابتسمت انا للبنت... مهرة: عاااشت الاسامي ياعليا... وانا مهرة مثل ماتعرفين...من متى انتي هني.؟!! عليا: انا من نص ساعه هني اوني بايي اول العرب لقيت الدنيا زحمه وكل ما يتجدم الوقت تزيد الزحمه... متى بيفجون هالباب..!!! ..سلامات شوفيها ايديج.؟!! مهرة: الله يسلمج ياربي..ماشي الا طحت من الدري... عندج حد انتي في الجامعه؟....كد ييتيها..؟!! عليا: من زمااااااااااااااان اختي كانت تدرس فيها...بس مادري جان غيرووها..اكيد غيروا شي فيها...بس ماعرف عنها ذاك الزود ولو انهم يايبينا رحلة في ثالث ثانوي.. مهرة: حظظظكم نحن ودووونا التقنية...!!.. ليتهم يابونا الجامعه عالاقل بتخف الزييغه اللي فيني.. عليا: لا اتروعين عادي,,هي اول ما تدخلين بتزيغين من كثر المباني لكن بتتعودين عقب عليها.....شفتي بطاقتج..!! ظحكت وانا اتذكر صورتي الزياغ اللي حاطينها لي بالبطاقه... مهرة: يوووه الله لا يراويج الصورة... عليا: ههههههه والله حتى انا صورتي كاني مخلوق فضائي... ظحكت انا على كلامها.... بصراحه هالعليا حبوبه...وان شاء الله تكون سند لي في الجامعه... مهرة: وين ربعج عنج..؟!! عليا: ربيعتي حمده مايت لين الحين...والباقيات سارن التقنية.. مهرة: اهاااااااا...اي كلية داخله عليا..!! عليا: هندسة...وانتي... مهرة: انا علوم انسانية... وقعدت اسوولف مع عليا بسوالف عادية حالنا حال اي بنات في اول يوم جامعي لهن... الساعه تسع الا ربع فتحوا الباب... ودخلن 3 مشرفات وطلبن منا اننا نتبعهن للصالة الرياضية...المكان اللي بيكون فيه الارشاد... مسكت عليا ايدي عشان مانظيع عن بعض...بما انه تعارفنا..ماحبينا ان نفترق بقية هذا اليوم.. ------------------------------------ اليوم: السبت.. المكان: صالة بيت بو راشد... الوقت: العاشره صباحا.. ------------------------------ (شيخة)..... نشيت من رقادي مدوخه...رقدت امس متاخر...كله افكر بمهرة ..احاول اتخيل الموقف البايخ اللي انحطت فيه...ماقدرت... ماقدر اتخيل نفسي مكانها...بموت من الزياغ.... مهرة رغم ضعفها الخارجي...الا انها قوية وايد من داخل وقدرت تتحمل...لو انا بتيني حالة نفسية والكل بيدري عني...اما هي..احتفظت بهالشي لنفسها... قمت من الشبرية ودخلت الحمام اتسبح... فكرت في هوو...اي نوع من الناس بيتهجم على بنت فبيتهم..؟؟..ماخاف..؟؟ ماقال فخاطره اهلها بيدخلون في اي لحظة وانا بروح فيها... طلعت باستنتاج...في الوقت اللي طلعت فيه من الحمام.... الريال ذاك ماكان صاحي...ابدا ماكان صاحي..اكيد شي كان فيه..يمكن مينون...او..شي ثاني...بس الاكيد انه عقله ماكان فراسه.. يلست جدام التواليت وخوزت الفوطه عن شعري..وقعدت انشف فيه...وانا اطالعه في المرايه... ابتسمت...لو اني ابتسم على هالسالفه الجديمه في خاطري..الا اني جدامهم مستحيل اسامح عمر هذا... عيل يروح يقص لي شعري..!!!!!... ابتسمت اكثر يوم تذكرت ردة فعل سهيل ولد خالتي يوم خبره راشد وهو ميت من الظحك... سهيل ماظحك...لكنه عصب وايد عالموضوع..ياني ببرود وقالي.. سهيل: بروح انتف له شعره جان تبين... قلت انا بحماس.. شيخه: هيي...ابا... سهيل: صدق والله..؟!! وقاطعه راشد في هذيج اللحظة... راشد: لا يابوووي لا تفظحوونا في نسايبنا...عن لخباال... سهيل: العين بالعين والسن بالسن..والبادي اظلم.. راشد: سهيل عيب...لا تكبر راسها...شعرها هي بسرعه يطول.. شيخه: الله واكبر ..تف تف تف تف من عينك... راشد: خيستيينا تفال... شيخه: سهيل قص له شعره اذا كان عنده شعر بليز..انتقم لي.. ابتسمت لي سهيل وقال.. سهيل: فالج طيب... ابتسمت للذكرى... وتذكرت كيف ياني سهيل بعد اسبوع من العرس..يوم كانت فاطمه يايه زواره واهل ريلها كلهم معزومين... ياني سهيل وفي ايده خصلة شعر...وقالي وهو يظحك بانه عمر تفهم الموضوع وقال اذا بتخوز ظيجتها بقص لها من شعري وتنحل المشكله... لكني مارضيت...صح استانست ساعتها...لكن خسارته هو مب مثل خسارتي انا....لكني شكرت سهيل لانه دافع عني مب مثل راشد ميت من الظحك علي... سحيت شعري وانا ابتسم بخبث واذكر كيف اني حرقت خصلة الشعر ذيج...وتمنيت احرق له راسه بعد...عشان يتوووب من الخاطر... لميت شعري وغيرت ملابسي وطلعت من الغرفة..مريت على غرفة فاطمه اللي عدال غرفتي ..كان الباب مفتوح..بطلت الباب وحصلتها راقده لكن فهوود محد... شيخه: قوووومي يام كرشه...!! لا جواب... كسرت خاطري..قلت اخليها ترقد يمكن ماترقد وايد فبيتهم....!! سكرت الباب ونزلت تحت...حصلت امي يالسه ترمس في التيلفون..وفهوود يالس يلعب بلاي ستيشن... حبيت امي على راسها ومابغيت اقاطعها برمستها في التيلفون...ورحت عند فهود.. شيخه: فهوودي شو تلعب.. فهد: العب تييكن...تلعبين وياي..!!! شيخه: هي بلعب يالله... سكر فهد اللعبه وحطها من اول لشخصين... ويلس اتبارى وياه اخليه كل شوي يغلبني...ويوم يغلبني اقعد اظاربه اوني معصبه ويقعد هو يتكركر... خلصت امي تيلفونها .. شيخه: هااا امايه شو تانسين اليوم؟ اهون..!! ام راشد: انا بخير بنتي لا تحاتين...اختج راقده..!! شيخه: هي مريت عليها حصلتها راقده.. ام راشد: حليلها..ترا هالولد ناش من الفجر لا طاع يتريق ولاطاع يتسبح..بس يبا يلعب هاللعبه..زقرت البشكاره تي تركبله وايراتها انا ماعرفلها.. اطالعت فهد انا اوني عاد معصبة... شيخه: فهوود..صدق اللي تقوله امايه..؟ سكت عني فهوود... جان اقوم اشل عنه الايد وافرها وابند اللعبه..وشليته هو فوق.. شيخه: يالله سبووح... شليته معاي فوق وهو يظاربني عشان اسبحه والبسه..مسكينه فاطمه ماتقدر تعبانه... ------------------------------------------- اليوم: السبت.. المكان: في الجامعه... الوقت: الحادية عشرة الا ربع صباحا... ------------------------------------------- (مهرة).... طلعت من الصالة الرياضية ادور عليا...واخيرا خلص الارشاد اللي مافهمت غير نصه بس.. من كثر الزحمه ظيعتها..والا نحن ناشين من كراسينا رباعه... وقفت عدال الرصيف اتلفت... فجاه حسيت حد يمسكني من جتفي.. عليا: زخيييييييييتج..مسرع ما تظيعين... ظحكت انا براحه.. مهرة: والله اني يالسه ادورج... عليا: ههههه انتي ادورين برا وانا ادور داخل القاعه... مهرة: احين وين نسير..!! اشوف البنات كل حد سار صوب.. عليا: لان الارشاد خلص.. اللي يبا يسير البيت يسير واللي يبا يتحوط يتحوط... ونحن بنتحوط...يالله.. ظحكت على حماسها ومشيت معاها...وكل ماسرنا مكان ارجع التفت عشان احفظ مكان البوابه ومااظيعها.. بصراحه الجامعه كبيرة لدرجة المبالغه...يمكن بسبب البنات وعددهن الكبير... عليا: شووفي...هذا المبنى اسمه القبول والتسجيل هذا اللي سلمنا فيه فحوصاتنا..وهذي القاعه هممم..اسمها متعددة الاغراض..وهذااااا الكافتيريا اهم مكااااااااااان....يالله ندخله..مفتووح... مشيت معاها للكافتيريا اللي تطريه...اول مادخلنا سمعنا وشفنا بعد صدعة البنات..تراجعت على ورا.. مهرة: لالالا عليا زحمه وايد.. مسكت ايدي وسحبتني علىداخل.. عليا: حتى لو زحمه حالنا حال البنات بندخل وبنتريق بعد... دخلت معاها وانا احس بالغربة...صدق فرق..بين مقصف المدرسه ..وكافتيريا الجامعه اللي قالت لي علياانه مب الوحيد في الجامعه وفي اكثر من واحد... دخلنا... عليا تكفلت بانها تدور طاولة بعيونها..اما انا...درت بعيوني اطالع باستغراب البنات...وحشرتهن..شو هذيلااا...صدعه وصريخ وظحك باعلى الحسوس...هذي كلها وناسه حق الجامعه..!!.. مسكتني عليا وسحبتني معاها ويلسنا على طاولة صغيره ... مهرة: اووووف يالصدعه... عليا: صدقج والله..نحن بعد ماقصرنا يلسنا عدال شله كلها زعيج... مهرة: في الارشاد..احس زادن البنات عن اللي كانن في الرسبشن ويانا...!! مالاحظتي.. عليا: هذيلا بنات السكن... مهرة: اهااااااااا اتحسب لهن ارشاد بروحهن..!!.. عليا: لالا ويانا حطوهن عشان مره وحده... قعدنا انا وعليا نتصفح البروشورات والاوراق اللي عطونا اياهن ونتناقش فيهن...فجاه طبت علينا بنت...طويله..جميلة...لها احلى حيات مقرونات شفتهن فحياتي.... حمده: انتي هنيييييييي مسودة الويه وانا ادورج...!! ابتسمت انا...وعليا قامت وسلمت على ربيعتها ولوت عليها بعد... عليا: فديتج والله اني تميت اترياج في الرسبشن لكنج ماييتي.. حمده: تاخرت شوي ماحصلت حد اييبني...شحالج ويا هالراس والله اشتقت لج... عليا: وانا اكثر والله...حمده اعرفج على مهرة..كانت معاي في ثالث اعدادي...مهرة هذي حمده ربيعتي في ثلاث سنوات الاخيره في الثانوي... ابتسمت لي حمده...وسلمت علي... حمده: تشرفت الغاليه شحالج؟ مهرة: الحمد لله بخير ..شحالج انتي..؟؟ حمده: بخير وعافيه... يلست حمده معانا في الطاولة بعد ماسحبت لها كرسي... حمده: تريقتن؟ تراني على لحم بطني وامس ماتعشيت ميته من اليوع.. عليا: لا ماتريقنا...قبل شوي واصلين هني نحن...نسير نشتري.. حمده: بسير انا وياج البنت ايدها مكسوره حليلها ماتروم عالدعسه...مهرة شو نيبلج..؟؟ مهرة: لا انا متريقة في البيت... عليا: لازم تاكلين ويانا... مهرة: خلاص على ذوقكن..وعصير منغا اذا فيه.. حمده: تمااام... قامت حمده مع عليا وراحن يشترن ريوق ..وانا تميت بروحي احس بالغربة...الله رحمني بهالبنات الحشام اليوم والا مادري شو كنت بسوي..!!.. يلست على ذيج الطاولة والازعاج حوالي يتصاعد..ويزيد...وانا اتسائل... بلاهن ياناس البنات تخبلن..!! وقعدت اجلب البروشورات في ايدي... مرت عشر دقايق.... عليا وربيعتها حمده تاخرن وايد...ماصار ريوق..يوم رفعت نظري حصلت ان مكان البيع زحمه من الخاطر... وبعد شوي.. حسيت ببنت توقف عدال طاولتي..رفعت نظري وشفت بنت غريبه عني..تبتسم...ابتسمت ماعرف شو تبا...لكني مارمست...حطت البنت ورقة صغيره على الطاولة وراحت قعدت مكانها بعيد شوي عني... استغربت من هالحركه...شو هذا بعد..!! مديت ايدي وفتحت الورقه.... كان مكتوب فيها.."انعم ويه شفته لين الحين في الجامعه...ماشاء الله عليج..وسلامات بخصوص ايدج".... ابتسمت غصبن عني...شو سالفة هالبنت خبله..!!...رجعت الورقه عالطاولة مثل ماكانت وطنشت السالفه.. لاني ماعرفت كيف اتصرف ..او شو ممكن اقول للبنت اللي خلت هالورقة وراحت...شو تتوقع اكتب لها مشكوره وعيونج الحلوه واروح اعطيها الورقه..!!..لا والله ماطرالي... بعد دقايق رجعن عليا وحمده مع صينية الريوق.. حمده: اووووووووووووف..حشى يالزحمه.... مهرة: يعطيكن العافية.. عليا: الله يعافيج... حطت جدامي عليا عصير وسندويش...والبطاطس كان بينا ... حمده: شو هذي..؟؟ مسكت حمده الورقه وقرتها...وابتسمت..بعدها ظحكت... حمده: اوهووووووووو من قدج من اول يوم طيحت بنات... ظحكت انا...وعليا ابتسمت ولو هي مب عارفه السالفه.. عليا: شو هذا..اشوف.. وسحبت الورقه من حمده...وظحكت هي بعد... عليا: صدقها بصراحه مهرة ناعمه وحلوه وايد... انحرجت.. مهرة: عاد مب وايد لا تبالغين... حمده: لا والله صدقها...ماشاء الله عليج... مهرة: عيونكن الحلوه تسلمن.... وقعدنا نتريق ونسولف عن اشياء مختلفه... مهرة: متى بتردن البيت.. حمده: انا قايلتلهم مابطول... عليا: ليش حمدوووه.. حمده: اهل ريلي بيتغدون فبيتنا اليوم.... انصدمت..وبطلت عيوني... مهرة: حمده معرسه..!! ابتسمت حمده بحياا.. حمده: ههههه لا فديتج مالجه قبل ثلاث اسابيع... مهرة: ماشاء الله..مبرووك... لكني بصراحه قلت فخاطري الله يعينها عالرياييل....!!...انا ابدا مابعرس...ابدا.... حمده: الله يبارك فيج وعقبالج... ابتسمت لكني ماقلت آمين.... مهرة: احين كيف بتصل لاهلي..!!... عليا: عندي انا بطاقه..بنستخدمها في الكابينه وبنتصل... وبعد ماخلصنا ريوقنا قمنا كلنا..وبدون حاسية مني..خذت الورقة الصغيرة وخشيتها فشنطتي...ولميت اوراقي ورحت مع عليا وحمده واتصلنا تيلفون...عشان كل وحده ترد بيتها... --------------------------------------- اليوم: السبت... المكان: صالة بيت خلفان.. الوقت: الثانية الا ربع..ظهرا.. -------------------------------------- ( سيف)... يالله ياللووووعه...!!... حطوني في صف فيه اثنينه ما اطيقهم ولا هم يطيقوني وكم مره متظاربين...ويوم طلبت من الادارة ينقلوني مدولي لسان... كانهم يعاندون فيني ويتريووني اتمشكل عشان يسوولي صدعة... دخلت البيت وانا شال كتبي ... شفت مهرة يالسه في الصالة تسولف مع عفرا..وابويه يالس جدام التلفزيون يطالعه... سيف: السلام عليكم... مهرة وعفرا: وعليكم السلام والرحمه.. سرت عند ابويه ووايهته... بوحمد: هااااااااه...شو المدرسه.. قلت فخاطري زفت.... سيف: الحمد لله ابويه كل شي زين... سرت صوب مهرة وعقيت كتبي عالطاولة اللي جدامها.... سيف: شوفي شغلج... مهرة: لا الغالي هالسنه انا ايدي مكسووره ما اروم اجلد لك... سيف: شقايل يعني اخليهن يطرطرن يعني...انا ماعرف اجلد... عفرا: احين مهرة كل سنه اجلد لك كتبك..؟؟؟ سيف: هي..كانت اجلد كتبها وكتبي...وقبل...قبل الوالده اللي يرحمها اجلد لي... حسيت بحزن يوم ذكرت امي...رغم ان الذكرى بالنسبه لي ضبابية...لكن حبها موجود اكيد... مهرة: والله لو اييدي صاحية بجلد لك..حاول اجلد اروحك هالسنه.. مهما كان تجليدك زفت بيطلع احسن عن تجليدي بايد مكسووره..!! عفرا: خلاص ولا يهمك سيف انا بجلدهن لك... سيف: لالالا عفرا خلاص بحاول اجلدهن ارووحي... عفرا: خل عنك المستحى خلهن وانا بجلدهن لك ان شاء الله... استحيت بصراحه... مافيني اعبل على حرمه اخوي...لكن فعلاانا ماعرف اجلد....يعني ابركلي اخلي كتبي بلا تجليد عن اجلدهن واخربهن اروحي... سيف: مشكووره ياعفرا ماتقصرين.... خليت كتبي عندهم ورحت لغرفتي... دخلت اتسبح..وصليت الظهر.. وانسدحت شوي اريح ظهري...اتذكر منصور وفارس..الثنينه اللي ماطيقهم..كيف نقعوا من الظحك يوم شافوني فصفهم...مستانسين بيحصلون حد يتمشكلون معاه...وانا مافيني عالمشاكل هذي اخر سنه لي مافيني انطرد والا ارسب والا يسوولي مشاكل فيها... اوففف الله يعدي هالسنه على خير.... سمعت دق عالباب... مهرة: سييييييييف...تعال تغدى ويا ابويه .. سيف: سهيل وحمد يووا..!!! مهرة: سهيل بيتغدى فبيت خالوووه وحمد وابويه تحت...يالله بسرعه.. سيف: انزييين... قمت من الشبرية وانا افكر بسهيل..ليش مايشل ثيابه ويسكن فبيت خالووه احسن..!!!..والله...عيل ساير راد عليهم...عنبوو الواحد يطلع من دوامه يبا يرد بيته يرتاح وهو ينط هناك...!!..امره غريب هالانسان... بطلت باب حجرتي ونزلت يوم دخلت غرفة الطعام شفت وجه جديد علي..غريب...مكرفخ... سيف: عمووه منو هذي..؟؟ آمنه: هذي بشكارتنا اليديده امس يايه... لا اطفروبها عاد... ظحكت انا.. سيف: شو نبابها نطفربها...هذي المهمة لج انتي عمتي... آمنه: شو قصدك ولد خلفان..!!! سيف: اقصد عمتي البشكاره تخصصج انتي نحن مالنا خص فيها... آمنه:هيي..على بالي بعد تطري شي ثاني...شو اخبار المدرسه.. سيف: لووعه... آمنه: دوم هالرمسه...ايلس ايلس تغدى.. ابوك سار يغسل ايده وحمد توه ياي من الدوام سار يبدل ثيابه.. يلست انا جدام صحن السلطه آكل خيار...لين ما ايوون الباقين... ------------------------------------------ اليوم: السبت.. المكان: في صالة بيت بو راشد... الوقت: الثالثه والربع ظهرا.. ---------------------------------------- (سهيل).... اليوم ماكنت مخطط اني اتغدى فبيت خالتي..لكن راشد اتصل واصر عليه ايي واتغدى وياه لانه ابوه محد اليوم...فبوظبي..وماحب انه يتغدى بروحه ويا الحريم...وانا ماعارضت وايد...لانه عادي عندي متعود... بعد ماطلعت من حمام الميلس وانا امش ايدي بالفوطه..كنا مخلصين غدا... اطالعت راشد ببسمه على حلجي.. سهيل: روح بدلها انزين... اطالع راشد كندورته اللي انجبت عليها الصالونه وغادية حمراااا بعصبية واضحه وقرف... راشد: ابدلها...!!..الا بتسبح مره وحده...ريحتي كلها صالوونه... سهيل: سير انزين بترياك... نش راشد ودخل حمام الميلس وغسل ايده...ويوم طلع قال.. راشد: نسير البيت لا اتم هني اروحك... سهيل: اخاف اثقل عليهن... اطالعني راشد بنظرة.. راشد: عن هالخريط..متعودات عليك في البيت اكثر عني...يالله.. ابتسمت ومشيت معاه للبيت...يوم دخلنا..شفته يقول حق اللي في الصالة اني ياي...دخلت انا الصاله..شفت فاطمه يالسه على كرسي وحاطه الجريده عالطاولة جدامها وتتصفح...اما شويخ..مجابله التلفزيون تلعب بلاي ستيشن هي وولد اختها فهود... سهيل: السلااام عليكم... فاطمه: وعليكم السلام مرحبا الساع...شحالك سهيل.. شيخه: وعليكم السلام... سهيل: بخير الله يسلمج فاطمه شحالج انتي..؟ فاطمه: والله مانشكي باااس بخير وعافيه..شحالهم اهلك؟ سهيل: كلهم بخير وعافيه.. راشد: انا بسير اتسبح وبرد... طلع راشد من الصاله...اما انا مشيت صوب شويخ ويلست عدال فهوود اللي كان بيني وبين شويخ.. سهيل: وابووي عليك فهود تخلي حرمه تغلبك.. فهود: انا من الصبح اغلبها..تغش والله تغش...غشااااشه... صرخ على شويخ بقهر...وانا ظحكت عليه... وشويخ تبتسم بخبث.. سهيل: شوييييييخ...خليه يغلبج شوي... شيخه: طول الصبح وانا مخلتنه يغلبني عاد صدق نفسه... مسكت انا فهود وشليته وحطيته فحظني...وشليت الايد عنه وكملت لعب بداله... سهيل: شوف شوف الحين كيف بنتفها لك تنتييييف... ظحك فهود ببراءة..وصاصرني.. فهد: مثل الديااايه هههههههه... صاصرته في اذنه عشان شيخه ماتسمع... سهيل: هي مثل الديايه..ترا خالتك ديايه ماتدري.. فهد: هههههههههههههه... شيخه: وييييييييين اطالع الخط مالك شويه ويخلص وبتموت وين تروم لي انا مترووس... سهيل: حتى وهو جي بغلبج ..راقبي بس انتي... شوي شوي...انغلبت شويخ...ماتت قهر...شوي وتفر الايد بويهي... وفهوود يصفق مستانس..وانا ابتسم بمغايظ... شيخه: هذي لعبة مب عادلة.... سهيل: ولج عين بعد..؟!!..لعبة مب عادلة لي انا...مع ذلك غلبتج... شيخه: انته شحقه يييت انا كنت مستانسه باللعب ويا فهود...!! سهيل: عيل اخليج تحطمين ثقة الولد بنفسه من هو صغير...شقايل بيكبر وبيستوي ريال وهو يذكر بانه حرمه غالبتنه..!!!. مايستوي... شيخه: اهاااااااااا ماشاء الله بتريا بشوف كيف بتربي عيالك...افكارك نـيّرة ماشاء الله... سهيل: ههههههههههههه بتشوفين كيف بربيهم...بيطلعون رياييل... شيخه: بعيد اللعبه من اول بنشوف... عادت شيخه اللعبه وبدينا نلعب....غلبتها بدون ماتظربني ظربه وحده....من الخاطر بغت تموت من الغصه... واللي قاهرنها اكثر اني العب وانا اظحك واسولف ويا فهود يعني مش مركز ابدا مع ذلك مارامتلي... فرّت الايد معصبه... شيخه: شوو هذا ياخي...انتوا محترفين بلايستيشن وانا مالعب دوم...انتوا كنتوا تشربون هذي بدال الحليب... سهيل: بعطيج مهلة يومين تدربين عليها بشكل مكثف وعقب بنرد نتبارى... شيخه:...مـــــــــــااااابـــــــــــــا.... سهيل: شحقه زعلانه انزين... شيخه: مب زعلانه بس ماحب حد يتخقق علي... سهيل: وانتي اتخققين عادي..!! شيخه: هي... سهيل: عدال بيتكم درام...روحي نقعي فيه... سمعت صوت فاطمه.. فاطمه: حوووه ..حوووه.... شويخ بعد شو رايج تمطين شعره...وانته سهيل شرايك ادوس فبطنها... صدعتولي راسي... سهيل: اختج خقاقه... شيخه: متعلمه الخقة منك... سهيل: يعني تعترفين اني استاذ في كل شي..وانتي مجرد تلميذه...شحقه تين تتحدين عيل... شيخه: آآخ ياربي يقهر.. شفت شيخه وهي تتلفت حواليها شكلها ادور شي تكفخني به...وظحكت عليها من خاطري... سهيل: شويخ.. شيخه: شوووووووه..!! سهيل: قومي صبيلي جاهي حمر... شيخه: ماباا.. فاطمه: شويخ..عيـــب وابوي عليج انا... سهيل: قوووووووومي... نشت شيخه غصبن عنها عشان ماتحصل هزبه من عند اختها... وصبت لي جاهي وترست لي الكوب عمدا عشان ما ارووم اشله...لكني عاندت فيها وشليته وشربت منه بعد...وابتسمت لها ابتسامه وسيعه.. سهيل: تسسسسلم ايدج...نخدمج بعرسج ان شاء الله.. شيخه: مابعزمك انا على عرسي.. رفعت حواجبي..مادري مستغرب مادري منقهر...مادري اعتبرته تحدي لي...ماعرف... سهيل: غصبن عنج بحظر العرس بدوني مايسوى اصلا..مايستوي عرس... شيخه: بنشوف.. سهيل: بشتووفين يا شيخه بنت بو راشد..... دخل راشد في هاللحظه ..والسفره على جتفه..وكان يعقم معاقم كندورته...وهو يطالعنا انا وشيخه بطريقه غريبه..لكنه سكت وماعلق..وبعد ماخلص معاقمه صد صوب المنظرة المعلقه عالايدار ويلس يتسفر.. سهيل: نعيماا بو سنيده... راشد: الله ينعم عليك... خلص شاهيك لانه بنظهر.... سهيل: مابكمله..الشاهي هذا مررر وفيه طعم خايس مع اني متاكد ان الدله فيها شاهي حلو و عدل...يمكن لو قلت لفاطمه تصبلي بيطلع احلى ... نطت لي شويخ... شيخه: طالع..!!..قسم بالله مب منك من اللي يصب لك شاهي... راشد: يووووووووووه هم بدووا اثرهم من وراي... راشد كان يكلم فاطمه.. ابتسمت فاطمه وردت على راشد. فاطمه: هي يابوك شوي ويتناتفون.... ظحك فهوود فجاه وقال بصوت عالي.. فهد: هههههههههههههههههههه خالي سهيل بعد ديايه..!!! شيخه: ليش منو قالك انته اني ديايه بعد..!! اشر فهوود علي بشكل مجرم...وشفت شيخه ترصص عيونها وهي اطالعني ... راشد: يالله يالله نسير... سهيل: يالله... حطيت الجاهي جدام شيخه وقلت لها بصوت واطي.. سهيل: شربيه انتي.. وقمت وطلعت مع راشد... وانا داخل ميت من الظحك على شويخ وحركاتها.... ---------------------------------------------------- نهاية الجزء.. الجزء الثاني عشر.. ----------------------------------- اليوم: السبت... المكان: في بيت بو محمد.. الوقت: الرابعه والنصف مساءا.. -------------------------------------- (يوسف)... بطلت باب حجرتي وطلعت... توجهت لحجرة منى ودقيت الباب... يوسف: منّـوووووووووووه...!! بطلي الباب... منى: لحظااااااااااااه....!! ترييت عند الباب...وزهقت.. يوسف: شووو تسووييين..!! انفتح الباب ووقفت عنده منى وهي رافعه حواجبها بخقه...!!! منى: اجرب قمصاني اليديده... حست بوزي انا ودخلت الغرفه...شبريتها كانت متروسه قمصان منعفله وتنانيير... يوسف: بطلي الطابعه عن كمبيوترج ... منى: يوووووه مافيني اركبها مره ثانيه عقب... يوسف: بطلييها ابا اطبع جدولي... منى: انا بعد ماطبعت جدولي... اطبع جدولك هني انزين.. يوسف: اوهوووووووو انا عندي خط انترنيت في حجرتي انتي ماعندج الا جان بتسحبين واير التيلفون.... بطلي الطابعه وانتي تعالي طبعي جدولج هناك.... سكتت منى عني وراحت تبطل الطابعه عن الكمبيوتر... يوسف: هاتيها حجرتي وركبيها انا بنزل شوي تحت وبرد... طلعت عن منى ونزلت تحت .. امي ومحمد وحرمته ميثا كانوا يالسين... ميثا كانت حاطه فثبانها بنتها الصغيره ثريا ..اما سلطون الصغيروون ولد محمد كان يلعب في الحوش عدال الباب اللي كان مفتوح ... يوسف: السلام عليكم.... سلمت على محمد اخوي اللي ماشفته من ثلاث ايام بسبب الحمجه اللي فيه واللي خازت الحين ماعدى اثار بسيطه... يوسف: سلامااات ...هااا شو تانس احين اهون..؟؟ محمد: الله يسلمك..بخير انا....والله فظيحه ريال شكبري تيني الحمجه ويا عيالي..!!!... واطالع امي وكلمها... محمد: شحقه ما طعمتوووني عنها واناصغير..!! ام محمد: هههههههههههههههه الله يهديك ياولدي احين عاد تحاسبني عالتطعيم..!! مادري ماذكر.... يلست انا عندهم شوي مجامله لاخوي... كلمت ميثا حرمه محمد امي.. ميثا:.. عموووه..ماخبرج محمد..؟!! التفت محمد لها مستغرب.. محمد: اخبرها عن شووو...؟ ميثا: يعني ماخبرتها..!!..عمووه..اخويه مايد رد من السفر تراه امس... استغربت انا واستانست في نفس الوقت... ميثا تصير بنت عمي..واخوها مايد طبعا بعد ولد عمي...اللي مسافر صارله خمس سنين للدراسه بالخارج... عمره 25 سنه... كبر ناصر اخوي.... محمد: اوووه صح نسيت السالفه والله.. ام محمد: ماشااااااااااء الله ياحيه يابنتي تستاهلين سلامته عيل...خلص دراسته..؟ ميثا: هيي ماشاء الله عليه عمووه عنده ماجستير احين تدرين هو ساير صغير ودراسته مكثفه كانت... يوسف: عاد احين بتزخه يدووه وامج زخه..شغل وعرس ماشي لعب خلاص... ميثا: ههههههههههههه والله مادريبهم عاد جان تشاوروا في هالسالفه هو الا امس واصل... ام محمد: والله يبالي انا اسوي بناصر جذي اخطب له من وراه واغصبه عالعرس.. محمد: هههههههههه لو بعدج ماتعرفينه ناصر...بيقولج انتي خذيها دامج خطبتيها من وراي... ابتسمت وانا افكر بمايد.... مايد الشاب الوحيد بين خمس خوات...اكبرهن ميثا حرمه اخوي... وبعدها يا هو...ومن بعده نوره الخقاقه اللي هي كبري بس انا اكبر عنها بشهرين..اذكر انه كنا نتجاكر منو بييب نسبه اعلى في الثانويه العامه... واللي اعرفه انها دخلت التقنية وتخرجت دبلوم عالي..انا تاخرت بدراستي الجامعية بسبب الدورة اللي دخلتها في الجيش بعد الثانوية العامه... وبعد نوره كنّه المينونه .. اللي اظن عمرها 20 سنه كبر منى اختي... ومن بعد كنه عايشه وهي بعدها في المدرسه..اظن انها في ثاني ثانوي او ثالث الله اعلم... وعندهم بنت مراهقة صغيره اسمها لطيفة.. اظن انها في الاعدادية... عمي توفى من عشر سنين... عشان جي العيال هذيلا تربوا على ايد امهم عفرا ويدتي موزه...في بيت يدووه العوود... ولهالسبب ابويه طلع من البيت..لانه نحن شباب وصعب نتربا فبيت واحد مع بنات عمي الخمس... قبل مايسافر مايد مع خاله سعيد للدراسه..كنا نروح بيت يدووه بحرية..لكن من سافر مايد ونحن مانسير الا نادر.. وبصراحه وبما يخصني انا..صرت استحي..البنات كبرن...ويمشن في بيت يدوه بحرية واغلب الوقت بدون شيل..وكذا مره صارلي موقف محرج معاهن... اما بما يخص مايد وخطوبته على بنت خاله اللي ماعرف اسمها...كل اللي اعرفه ان الخطبه صارت في غيابه لكن بموافقته.. واعتقد البنت اللي خاطبنها كبري في السن... نبهتني امي من سرحاني وهي تصك ركبتي.. ام محمد: وااابووي...يوسف..!!! يوسف: هااااه....!!..شوو.؟.ها امي شو تبين.!! ام محمد: في شووو سرحان..؟!! يوسف: اتذكر مايد الله يذكره بالخير... ام محمد: عاد قوموا بالواجب...ترا يدتكم من متى اتحظى عليكم ماشافتكم... محمد: سايرلها انا الاسبوع اللي طاف.. ام محمد: انته ياولدي ادريبك ماتقصر...لكن هذيلا اخوانك مايستحووون... كانت تقصدني انا وناصر... يوسف: امي... البيت متروس بنات ماشاء الله استحي اسير... ام محمد: سيرلها الصبح وقت مايكونن البنات مداومات.. يوسف: السنه اللي طافت ساير حصلت كنووووه غايبة عن جامعتها ومنسدحه في الصالة... ظحكت امي وهي تتذكر كنه الخبله... وظحكت ميثاعلى اختها.. ميثا: صدقه عموووه خواتي طفسات مايلبسن شيل في البيت...بعدني برمس امايه انا خلها تنازعهن... ام محمد: انزين مب دوم هي بتغيب... يوسف: عاد هذا حظي ويا بنات عمي شو اسوي يعني..!!! خلي يدووه تي تسكن عندنا.. ام محمد: يوووووووه العيوز لو تقطعها ماتطلع من بيتها... يوسف: عاد انا مالي خص...مابسير ارووحي.. بتريا ناصر اخر الاسبوع وبسير وياه وبندخل ميلسهم هاللي مسكر اربع وعشرين ساعه...اما عن مايد بتصلبه تيلفون وبسلم عليه .. ساعتها خذت رقم مايد من عند ميثاا.وسجلته في تيلفوني...وصبيت لي شاهي ورحت فوق وانا اسمع امي تقول... ام محمد: بعدني بشل منى وبسير عليها العيوز من زمان ماييناها حليلها... ابتسمت...وكملت طريقي للطابق الفوقي...دخلت حجرتي حصلت منى تتكركر واطالع الشاشه... يوسف: شو تسوييين..؟!!... منى: هههههههههههههههههههههه تعال شوف ربيعك قاعد يتقحطن... يييت انا بسرعه اشووف شو تقصد... كان الماسنجر مفتووح وواحد من الشباب اللي اعرفهم بالنت سعودي الجنسية قاعد يتحرطم لاني ماسلمت عليه وفوق هذا يرمسني ولا ارد عليه.. ولاني من يومين مواعدنه ولا ييته اون...هالانسان بالذات خفيف دم بشكل فظيع... يوم اقعد وياه ماروم امسك عمري من الظحك...كيف عاد منى الكركووره على كل شي بتظحك..!! يوسف: ليش فتحتي الماسنجر..؟؟ منى: برووحه فتح يوم شبكت النت... يوسف: وليش ماسكرتييه..؟؟ منى: خفت ربعك يحسوون بالاهانه... اطالعتها بنظرة...دايما جوابها جاهز لكل سؤال ماشاء الله....!! يوسف: قومي قومي... قامت منى وخذت ورقه من الطابعه ... يوسف: طبعتي جدولج.!! منى: هي انته تاخرت... يوسف: يلست اسولف وياهم شوي تحت...ماسمعتي بالخبر..!! منى: أي خبر؟ يوسف: ولد عمج مايد رد من السفر... قالت منى من دون اهتمام يذكر... منى: والله.؟!!..تصدق نسيت ان عندي ولد عم ومسافر.. يوسف: هههههههههه مالت عليج... وتوني بعد سامع امايه تقول بتسير صوب بيت يدوه وبتشلج وياها... شقت منى ويهها بالظحكه...وحظنت جدولها وقامت تنطط.. منى: الله الله احلف..؟؟ اللــــــــــــه بسير عند قوم كنووووه... اطالعتها انا باستنكار... يوسف: بدال ماتقولين بسلم على يدوووه تصيحين بنت عمج..؟؟ صدق ماتستحين... لكن منى طنشت كلامي ووقفت تنطيط وقالت.. منى: الله ونااااااااااسه بسير اتاكد من امايه.. وطارت براا الحجره ونزلت تحت.... حست انا بوزي...حتى ماسكرت الباب...!! مالت عليج انتي وبنت عمج الخبله...!!! ------------------------------------ اليوم: السبت.. المكان: صالة بيت خلفان.. الوقت: الخامسة والنصف مساءا.. ------------------------------------- ( مهرة).... كنت يالسه مع عفرا اللي يالسه اجلد كتب سيف... كنت اساعدها باني اقصص لها قطع الجلاد واحط الطوابع عالكتب...وبعد ماتجلد..كنت اشطب عالتجليد واقص الزوائد وارتب الكتاب ... رن التيلفون..! قمت ورديت عليه... مهرة: آلوووه... شيخه: مرحباااااااااا بنت خالتي... ابتسمت...واستانست بعد... مهرة: هلا والله شيخه... شيخه: شحااااااااااالج مهااري..؟ مهرة: بخير الحمد لله شحالج انتي..؟؟ وشحال خالووه..؟؟ شيخه: كلنا بخير وسهاااله... سرتي الجامعه اليووم..؟؟ مهرة: هيي سرت..رديت حوالي الـ12 جي.. شيخه: شوو سويتي..!! مهرة: والله..ماشي.. حضرنا الارشاااد... وتريقنا في الكافتيريا... وردينا البيت... شيخه: انتي ومنوووه..ماقلتيلي ان عندج ربع.. مهرة: ماعندي...بس تعرفت على بنتين طيبات جي وحشام كلهن من كلية الهندسة.. ماقصرن وياي يعني.. شيخه: والله زييين...انتبهي عالبنات اللي ترابعينهن يامهرة... مهرة: ان شاء الله..بصراحه الجامعه مول مب مثل ماتوقعت... شيخه: ليش؟ مهرة: مادري.. قلت فخاطري البنات يعقلن يوم يكبرن ويدخلن الجامعه..والمسؤولية تكبر.. لكن بصراحه اللي شفتهن مستخفات من الخاطر.. شيخه: هههههههههه ماشفتي شي... مهرة: وزححمه... شيخه: بعد ماشفتي شي....هذيلا بنات التاسيسي ..الدفعات الجديمه ماداومن بعدهن اظن الاسبوع الياي... مهرة: الله يعييينا... وتعالي بعد يغازلن شرا الشباب.... شيخه: هههههههههههههههههههههههههههههههههههههههههههه... ظحكت انا على ظحك شيخه.... مهرة: والله صدق... شيخه: ههههههههههههاي ليييييش..؟؟ مهرة: وحده عطتني ورقة اليوم... شيخه: وووووووووووه بدينا بالحركات...شو كاتبه لج..؟؟ بيت شعر؟ مهرة: ههههههههه لا...كاتبه اون انعم ويه شفته في الجامعه وسلامات بخصوص ايدج..ومادري اشو بعد.. شيخه: ياحافظ عليها...بتشوفين بعد اشد من هالحركات... مهرة: ههههههههه والله ولا علي منهن... شيخه: باجر بعدج بتسيرين..؟؟ مهرة: هي عطونا جدول.. باجر علي امتحانين..واللي وراه امتحانين...ويوم الثلاثاء على حسب نتايجنا نستلم الجداول..والسبت الدوام...بس شيخه: اهااا حلوو..غير عن نظامنا نحن يوم دخلنا الجامعه... مهرة: لا باس فيه...بس شويخ حاطيلي ارقام اماكن ومباني ماعرف وين هالاماكن انا ... شيخه: على كل مبنى بتحصلين رقمه...وسالي..اللي يسال مايتوه... مهرة: الله ييستر بس ما اطوف لي الامتحانات... شيخه: تعالي عمتج قايله بتووونا متى بتون..؟ مهرة: والله مادري بعموووه مشغوله ويا البشكاره اليديده تعلمها القواعد والقوانين والطبخ... شيخه: هممم...خلاص عيل بخليج احيينه بغيت بس اطمن شو سويتي في الجامعه...باجر دقيلي عشان تقوليلي شو سويتي بالامتحانات.. مهرة: ان شاءالله بتصل..مشكووره الغاليه عالاتصال.. شيخه: العفوووو عيوني...فمان الله مهرة: فمان الكريم.. سكرت عن شيخه وانا مستانسه من اهتمامها فيني...الكل سئل سيف شو اخبار المدرسه وشو اخبار اول يوم...لكن محد سئلني انا شو اخبار اول يوم جامعي..ماعدا عفرا... والا اهلي..عمتي ..ابوي..سيف وحمد... محد سالني... ----------------------------------- اليوم: السبت.. المكان: شقة ناصر... الوقت: الثامنه والنصف مساءا.. ---------------------------------- ( ناصر)... حاسبت مهندس القنوات وعطيته حقه ووصلته لباب الشقه... سكرت الباب ورجعت للصالة... افتكيت من قنوات التشفير والافلام اللي مالها داعي وحطيت لي عربسات ونايلسات...مسكت الرموت وبدلت القنوات وحطيت قناة 2 التابعه للام بي سي... اوكي... من قنوات افلام لقنوات افلام ثانيه..!!! همممم..يالله عالاقل( تو) ارحم من القنوات اللي كانن عندي والافلام اللي يعرضونها...المشكله اني تعودت اشوف قنوات الاجانب... رن جرس الباب...قلت فخاطري اكيد المهندس رد نسى شي من اغراضه..سرت وفتحت الباب.... ماكان المهندس... كان عبدالله... وياي من دون مايتصل...ماسوى هالحركه من قبل... ناصر: هلا والله عبدالله... عبدالله: السلام عليكم... توايهت مع عبدالله ودخلته البيت وسكرت الباب... ناصر: وعليكم السلام والرحمه..اقرب...ياحيالله عبدالله.. دخل عبدالله صالتي...ويلس عالكرسي.. عبدالله: الله يحيييك... شحالك ناصر.؟ ناصر: بخير وسهااله...شحالك انته..؟ وشحال ربعك..؟ رفع عبدالله حواجبه... عبدالله: بخير...ربعك؟؟؟..جي مب ربعك بعد..؟؟ ابتسمت... شكله عبدالله ياي يشن علي حرب اقناااع... رفعت كفوفي باشاره... ناصر: بس...لا تبدا عبدالله...دقيقه اسمحلي شوي.. نشيت عنه وطلعت من الصالة ودخلت المطبخ... ماعندي شي اظيف الريال... لا قهوة ولا شاهي... يبت كوبين وصبيت فيهم عصير وشليتهم معاي... وعطيت عبدالله كوب... ناصر: تفضل... عبدالله: دام فضلك... يلست انا في كرسي مجابل لعبدالله... عبدالله: شف انا ياينك ولو اني زعلان..جي تسكر فويهي اليوم..!! ابتسمت.. ناصر: قلت لك فمان الله... عبدالله: وانا مارديت عليك... ناصر: مشكلتك.. عبدالله: يالله ياناصر..مووول بايعنا ثرك... حطيت العصير عالطاوله وقلت له بجدية.. ناصر: عبدالله...اسمك عبدالله...ماعنالك شي..؟؟ حرام ادنسه بالافعال اللي كنا نسويها... عبدالله انا ماريد اخسر ربعتكم لكن ماريد ارابعكم دامكم جي...ليش ماترجع للدرب الصحيح مثلي..انتبه لنفسك مثل ما انا انتبهت لنفسي.. والله بتحس بلذه الهداية...!! عبدالله كان مطنش كلامي ويحيس بووزه... وقالي بكل وقاحه... عبدالله: انا جذي عايش بلذه... ناصر: استغفر الله... رفع حواجبة باستهزاء... عبدالله: عدااااااااال... ناصر: عبدالله... حق شوو تباني ارجع مثل ماكنت قبل...حق شو ارجع للشرب والصياعه وحياة الليل ويا الينانوه...!!! تدري.. انا بغيت اظيع حياتي مرتين اخر هالاسبوع... اول مره بغيت ادمر حياتي مع حياة شخص ثاني لكني انتبهت لنفسي... وبعدها على طول سويت حادث زين مارحت فيها ومت وانا بكبري محمل معاصي...ساعتها قلت خلاص... بتوب...هذا غضب من ربي اذا ما اصطلحت الحين بروح فيها .... عبدالله: الخلاصه...؟ ناصر: الخلاصه الله يسلمك يا انكم تهتدوون معاي.. يا خلاص انا مب وياكم في المشوار اللي قاعدين تمشوونه هذا... ومابينا غير معرفه وسلام... عبدالله: ناصر... ناصر: لا تحاول عبدالله خلاص...خلاص انا مصر على رايي ومابغيره....انا مرتاح جذي..بالي مرتاح...نفسيا مرتاح...واذا مت ..بموت وانا مرتاح... حط عبدالله العصير عالطاولة ونش معصب...وطلع من شقتي بطريقة همجية... زعلت... فعلا زعلت.... ماكنت اتمنى هاللقاء ينتهي بهالطريقه...كان خاطري انه يهتدي معاي خصوصا عبدالله بما انه الاقرب لي بينهم كلهم...لكن راسه يابس...ومع الوقت بيفهم..وبيرجع عن هالطريق...انا متاكد من هالشي... قمت وسكرت باب الشقة ورجعت للصالة اجلب القنوات... الظاهر اني وحيد فبوظبي من اليوم ورايح...!! كيف بقضي وقتي الله اعلم... حسيت باليووع... ليش ما اسير اطبخلي شي..!!.. مسكت الروموت وبدلت عن قناة تو وحطيت قناة روتانا للاغاني وطولت عليه شوي عشان الصوت يوصلني للمطبخ... شليت كواب العصير وانا ادندن مع الاغاني...
|
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| حصريا .. رواية نصف شمس صفراء للكاتبه فاطمة ناعوت | محمود المحامي | الروايات والقصص العربية | 9 | November 14, 2015 01:33 AM |
| رواية اغنيس غراي للكاتبه ان برونتي | ماكبث | أرشيف طلبات الكتب | 0 | February 3, 2013 01:16 PM |
| رواية ( ذاكرة الجسد ) .رواية رائعة للكاتبه أحلام مستغانمي ...كاملة !! | قلب حائر | روايات و قصص منشورة ومنقولة | 101 | August 13, 2010 04:31 PM |
| رواية انسيه للكاتبه اماني السليمي | منبع الحنان | روايات و قصص منشورة ومنقولة | 3 | August 4, 2009 12:54 AM |
| عاجل (مطلوب رواية الاخرون للكاتبه صبا الحرز) ابغاها على الوورد | الاسبانيه | أرشيف طلبات الكتب | 4 | October 9, 2008 04:38 AM |
العرض العادي
