فيسبوك تويتر RSS



العودة   مجلة الإبتسامة > الروايات والقصص > شعر و نثر

شعر و نثر اكتب قصيده , من انشائك او من نِثار الانترنت , بالطبع , سيشاركك المتذوقين للشعر مشاعرك



إضافة رد
 
LinkBack أدوات الموضوع انواع عرض الموضوع
  #1  
قديم April 27, 2012, 04:07 AM
 
الشاعر عمرو سليم

ادي تارخك

ادي تاريخك وادي حضارتك
ليه زعلانه اننا حررتك
امه ذليله وشعبها نايم
والاغراب عملوكي غنايم
واسالي ناسك قبل حجرتك
ليه عيزاني اموت يا بلادي
من غير حتي ما اقول ولا انادي
ليه الظلم دهو العادي
لشباب صبرو وشربو مرارتك
ليه العسكري فرحان ببيادته
وبتدفعي اديه لسعادته
والاعدادي يدوب دي شهادته
واما اثور يتولي ادارتك
ادي تاريخك وادي حضارتك
ليه زعلانه اننا حررتك
بيان العسكر

من كبارة حكامكو العسكر

ناتي اليكم ببيان هام
يا ابناء الهرم الاكبر
لا تستمعو الي الاعلام
فقط اخرسو وبلاش تتظاهرو
وارضو وعيشو في هدوء تام
واللي يموت يا رعاع في مظاهره
هنخليه بلطجي شمام
واللي يعيش هنخرم عينه
ونقول ده حكم الاسلام
واللي هيفلت هنقول قابض
خيمه وخوذه وكيس برشام
ودغير اهل بولاق الشرفا
شوفو هيسحلو منكم كام
وهيتصدي الطرف التالت
وهيريكو بكسر رخام
دحنا يا شعب النيل علشانكم
مش عارفين نصحي ولا نام
دحنا هنقلب مصر رومانيا
يعني حالتكو هتبقي تمام
يعني الثورة خلاص انسوها
فوقو يا شعب بلاش اوهام
دالاخوان من بدري باعكو
حتي اسالو مرشدها العام
ودغير حزب النور السلفي
اللي كلامهم احلي كلام
بكره هيفتو اننتو خوارج
او كفار فكركو هدام
اما القضا مهو برده تباعنا
يعني هنحكم بالاعدام
هذا وقد اعذر من انذر
فوقو يا شعب بلاش احلام
ناس

ناس بتموت علشان افكارها

وناس بتبيع الدين في شعارها
وناس بتقول الشعب اختارها
وناس الجوع والخوف دمرها
ناس بتموت علشان انبوبه
وناس عاملين الدين سبوبه
وناس علي الثوره بقت محسوبه
وهي زمان كات بتكفرها
ناس مش لقيه كفن يسترها
وناس تتنعم وسط قصورها
وناس مالثورة ينتهي دورها
بعد متخسر ضي نظرها
ناس يخسرو في الثوره عيالهم
وناس يتحالفو مع اللي قاتلهم
وناس الجيش قدمنا سحالهم
وناس بتخون في شباب حررها
ناس تتحاكم فوق سريرها
وناس تتكرم بكفاح غيرها
وناس الجوع والفقر كسرها
وناس الموت في الضلمه قدرها
ناس تتنعم فوق كرسيها
وناس دلوقتي الكل نسيها
وناس مش لقيه امل يواسيها
وناس بتعلي في ناس تكسرها
لما الحب بيصبح سلعة

لما الحب بيصبح سلعه

فيها بايه اذاي وبكام
لما حياتك بتكون كدبه
ان بنتها من الاوهام
لما تكون عاطل ومفلس
ساكن بيت من غير حمام
لما حبيبتك تختار غيرك
علشان عنده وظيفه تمام
قولي اذاي هتحب بلادك
وله اذاي هتربي ولادك
وانت تاريخ اجداد اجداك
كله هزايم واستسلام
كل صنوف الناس حكموهم
المماليك حكمو وذلوهم
والاتراك بالسيف حكموهم
يعني تاريخهم كله يا صاحبي
نصه اونطه وشغل كلام
لما الحب بيصبح سلعه
فيها بايه واذاي وبكام
في الطابور

في الطابور

تتلغي كل العصور
الليالي والشهور
ذي سجره في ارض بور
وانته واقف في الطابور
ليه يا بلدي الذل عاده
خدتي ليه منا السعاده
ليه يا بلدي كل مادى
تبني للفاسدين قصور
والفقير ميلاقي الا
زفت طين مدهون بجله
والفساد بقي دين ومله
شرعنو فيكي الفجور
حتي لما ثرنا ليكي
قولنا يمكن هنلاقيكي
نلمسك نحضن ايديكي
او نخلي الضلمه نور
ضيعه ليه فيكي العداله
ليه تعملينا بنداله
ضيعه ليه فيكي العداله
ليه تعملينا بغرور
في الطابور
الفل الاعظم

نحن ميدان الفل الاعظم

روكسي زمان قبل التعديل
ننقل ليكم بث مباشر
عن احوالنا وبالتفصيل
اول شئ الثوره دي خدعه
قادها ماسوني وكلب عميل
ضد زعيمنا الفل الاعظم
المخلوع ابو دم تقيل
والاثبات علي ذلك يبدو
محتاج برده يومين تاجيل
اما فلوس مصر المنهوبه
مع ابرها وصديقه الفيل
اما مطالب دم الشهدا
فالمدعي العام سيحيل
كل ملف لفاسد اجرم
بس اصبرو دالصبر جميل
علشان كده قررنا عشانكم
محنا كمان شربين من النيل
هنقود ثوره مضاده عليكو
اصل الشعب يريد عنتيل
في البلطجه وفنون السرقه
بس اصبرو دالصبر جميل
شعب الكنانه

شعب الكنانه انتفض

من توشكي للسلوم
كفياك يا ظلم بقى
مليت حيتنا هموم
خلتنا نشرب طين
والعيش مليته سموم
يا ويل سواد اخرتك
من دعوة المظلوم
من ام مات ابنها
فارق عنيها النوم
واب باع كليته
برغيف وزيت وهدوم
متقولي فين حاشيتك
اقف يا حسني واقوم
دالدنيا كانت جنتك
والدنيا مش هتدوم
شعب الكنانه انتفض
من توشكي للسلوم
انا المصري

انا المصري ولو باعو

وتاج العزه ده تاجي
هواكي يا مصر جوايا
ولو ليه هتحتاجي
ابيع العمر وارجعلك
واضحي بدنيتي واجي
فقير والفقر مش عيبه
مدام الفقر وياكي
انا اللي ابويا عاش فيكي
وجد ابويا سماكي
انا اللي ابويا وجدودي
عراقهم يا ما علاكي
اتوه في الدنيا واتغرب
ولكن عمري منساكي
انا المصري وده اصلي
ولو شنقوني بهواكي
كبر عيش

كبر عيش في الكون وتداعي

ايه اللي بيحصل ده يا جماعه
كبر يا بني الثوره دي خدعه
والتغير والعدل اشاعة
عايز ايه وبلدنا دي عزبه
والحريه فضيحه وكذبه
والمساوه سبوبه وحسبه
والوطنيه بقت شماعه
نصبر ليه ولمين هنكافح
غير في خيال احلامنا الجامح
قولي اذاي هنعيش ونسامح
وسط ضماير ناس خداعه
اوع تقول علي مصر بلدنا
والاهرام ده تراث اجددنا
مش هيفدنا يا صحبي عندنا
مصر يا صحبي خلاص متباعه
عارف لما زهقنا وثورنا
علشان قولنا هناخد دورنا
الفاسدين ضلمو علي نورنا
وخلو الثورة بقت فزاعه
الفاسدين عايشين علي كيفهم
مش خايفين والكل عارفه
الفاسدين عايشين علي كيفهم
من دلوقتي ليوم الساعه
في مصر الغلابه

في مصر الغلابه

بتاعت الغلابه

ومصر الجديده
بتاعت الكبار
في مصر النهارده
ارامل ومرضى
فساد حكم عسكر
جشع واحتكار
في مصر اللي كانت
ولامره هانت
وحربت وهزمت
جيوش التتار
ومصر الفقيره
بناسها الكتيره
بتحلم بلقمه
كسيها المرار
في مصر اللي لينا
فقيره وحزينه
وحيده بتحلم
بضي النهار
في مصر اللي هانت
وباعت وخانت
ونسيت تاريخها
بكل افتخار
في مصر العروبه
مجاري ورطوبه
وفلاحه سارحة
بمعزه وحمار
ومصر الحداثة
طمع في الرياسه
واجرام وسرقه
وتهريب سولار
في مصر الغلابه
بتاعت الغلابه
ومصر الجديده
بتاعت الكبار
انا ممنون

انا ممنون انا ممنون

يلعن ام ابو الافيون
يلعن ام الكيف وزمانه
واللي موافق علي ادمانه
اما مغفل او مجنون
بطل نغمة انك عاطل
وان الحق داسوه بالباطل
ارم الخوف وتعالي نناضل
علشان مصر الصعب يهون
اصرخ واطلب كل حقوقك
حسني الظالم مبقاش فوقك
شيل الخوف من جوه عروقك
حسني الظالم بقي مسجون
شيل الخوف من جوه واريدك
حسني الظالم مبقاش سيدك
املك كل الدنيا بايدك
دانت جدودك ملكو الكون
العن زمن الخوف واتكلم
افرح عيش اصبر واتعلم
اوع في يوم ولا لحظه تسلم
للي يبيع وطنك وي
رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع


المواضيع المتشابهه
الموضوع كاتب الموضوع المنتدى مشاركات آخر مشاركة
ام سليم والقلب سليم عضوة جديدة هي ابي اشوف اقوى ترحيب ام سليم111 الترحيب بالاعضاء الجدد ومناسبات أصدقاء المجلة 6 July 2, 2008 03:05 PM


الساعة الآن 05:35 PM


Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO 3.6.0 PL2
المقالات والمواد المنشورة في مجلة الإبتسامة لاتُعبر بالضرورة عن رأي إدارة المجلة ويتحمل صاحب المشاركه كامل المسؤوليه عن اي مخالفه او انتهاك لحقوق الغير , حقوق النسخ مسموحة لـ محبي نشر العلم و المعرفة - بشرط ذكر المصدر