اغراضي للعناية بالبشرة والجسم من الصين وحصريا هنا وبس

اميرة نور · #1 October 31, 2009, 12:57 AM

السلام عليكم ورحمة الله وبركاته
عزيزاتي البنوتات وعضوات المنتدي الكرام ازيكم وحشيني موت معلش من زمان مانزلت مواضيع مشغولة شوي ا لمهم ياعسلات
موضوعي النهاردة غير موضوعي فيه مستحضراتي للعناية بالجسم والشعر وكمان اجهزتي الشخصية ويعني تقريبا حاجات كتيرة قوي من حاجاتي
وزي ما معظمكم عارف انا عايشة في الصين(يعني ام البدع والمنتجات الجديدة) فقلت لازم اشارك صحباتي واخواتي واوريهم اغراضي
ويارب تعجبكم ويارب يكون موضوعي حلو وخفيف علي قلبكم
بس الاول قبل ما تتفرجوا اللي اوله شرط اخره نور
اسمح بالنقل بس مع ذكر المصدر
وكمان اسمح انك تدخلي وما ترديش علي موضوعي بس مش هسامحك لو انك تدخلي وتتفرجي علي مجهودي من غير ماتدعي لي بان ربنا يكرمنا ويرجعني بلدي الحبيبة الغالية احلي حتة في الدنيا كلها مصر
معلش طولتها بس اللي اوله شرط اخره ايه............... نور ان شاء الله تعالي
يالا تعالوا اتفرجوا ياعسلات
يالا بينا علي اول صورة

[اول صورة فيها جهازين
الجهاز الاول اللي لونه وردي (الكبير
ده ماكينة لحلق شعر الجسم من فيلبس بتشتغل بالبطاريات حلوة قوي بصراحة ومريحة من عناء السويت والكريمات والغلب دهوسريعة جدا وكمان نضيفه جدا للجلد خاصة لو استعملت قبلها ماسك زيت الزيتون علي الجسم كله
بصراحة بتنعم جدا جدا وبتغيب الشعر فترة علي ما يطلع تاني وبيجي معاها راس فيها جزء من الدهب عشان التنعيم بعد الحلاقة ونفس الراس الدهب ديه تستعمل لحلاقة المناطق الحساسة من الجسم عشان تبقي من غير الم وكمان ما تسمرش الجلد والا تسبب له ترهل بصراحة تحفة من يوم ما اشتريتها ماغيرتهاش ابدا ابدا والحمد لله
ومعاها راس تانية لباقي الجسم رجلين وايدين وكده يعني راس للمناطق غير الحساسة
والجهاز التاني الوردي الصغير
ده اله بالبطارية من باناسونيك لتنظيف الوجه من الشعر يعني ازالة شعر الوجه لاننا طبعا انتم عارفين مغتربين فلازم تتصرفي في البيت بنفسك لان هنا في الصين بيعملوا فتلة برضه للوجه في مراكز التجميل بتاعتهم بس مين بقي ينزل ويروح ويجي والكلام ده كله فاخترت اساعد نفسي بنفسي help your self
هي بتشيل شعر الوجه بحنيه جدا ومعاها فرشاة وعدتين للازالة واحدة طويلة وواحدة قصيرة
وكمان معاها راسين لعمل الحواجب ونتفهم (بس احنا كلنا طبعا عارفين تعليمات سيد الخلق اجمعين سيدنا محمد صلي الله عليه وسلم ولعنه للنامصة والمتنمصة) فالحواجب ما بنجيش ناحيتهم ابدا والحمد لله ما بنشيل منهم شعرة واحدة فالجزء بتاع الحواجب ده ملوش لزوم بس انا بستعمله من غير ما اشغله اني بسرح بيه كفرشاة لحواجبي لما اجي اتزوق لجوزي حبيبي لانه كفرشاة بصراحة من دون تشغيل بيكون كويس وبيرتب الحواجب وينسقهم زي فرشاة الشعر كده تقريبا بدون نمص والحمد لله

الصورة الثانية

فيها سيشوار بفرشاة (اللي لونه اسمر) حلو وسريع للزنقات او لو عاوزة تعملي شعرك بف او تهيشيه علي السريع ماركته سانيو الياباني بستعمله ساعات ساعات مش كتير قوي
والسيشوار التاني الوردي في ابيض من فيلبس معاه راس عادية وراس مخصصة لعمل الكيرلي(المركبة عليه في الصورة) بس بتعملها رهيبة والا احلي كوافيرة بصراحة
وكله تمام بس انا دايما استعمل التاني الوردي لانه جديد والجديد له فرحة زي ما بيقولوا
ومن فترة جبت مكواه السيراميك للشعر كانت حلوة برضه في انها تصفف الشعر وتغنيكي عن الكوافيرات والكلام ده بس جففت شعري وهيشيته زيادة عن الازم قوي فبطلت استعملها ورميتها في علبتها والحمد لله واهه خليها لبنتي الصغننة لما تكبر يمكن تعجبها وهي حرة بقي خليها تنشف شعرها

تعالوا بقي اتفرجوا علي منتجاتي لعناية البشرة

انا كنت اول ماجيت بروح مركز للتجميل كله سيدات بس العاملات طبعا صينيات وكنت بعمل تنضيف بشرة وتقشير وماسكات وعناية كاملة هناك في مراكز الاسبا ديه بس بصراحة كانت مكلفة شوي وانا بقيت اكسل وانشغلت فزوجي قالي هاتي كل اللي يلزمك وخليكي بالبيت احسن كتير اعملي اللي انتي عاوزاه براحتك من دون مشورة وتعب ورايح جاي
فرحت لخبيرة تجميل في المركز وفهمتها اللي انا عاوزاه وهي عرفتني بشرتي نوعها ايه وازاي اعتني بيها وفادتني كتير بصراحة وادتني كل الحاجات اللازمة اشتريها وعليها من يومها المنزل وبس والحمد لله وبس كل شهرين بروح اعمل تقشير كريستالي لبشرتي لو لقيت نفسي فاضية وخلاص.
ويوم في الاسبوع الخبيرة نصحتني اني لازم اسيب بشرتي علي طبيعتها واغسلها بس بميه من غير اي غسولات واستعمل ماسكات وحاجات طبيعية خالص عشان اريحها من الكيماويات والغسولات والكلام ده واعمل طبعا حمام بخار بالبابونج
وديه المستحضرات اللي اشترتها عشان اعتني بنفسي في البيت

الصورة الثالثة

فيها اربع انواع لماسكات للبشرة
علي فكرة معظم الماسكات هنا في الصين مش بتتعجن وتتفرد علي الوجه وكده لا هي بتيجي زي القناع تلبسيها علي وشك وخلاص تشيليها بعد نص ساعة او اكتر حسب النوع
الماسك اللي عليه رقم 1 (الاعلي من اليسار) ده وطيفته التخلص من الدهون الزايدة بالوجه والتحكم فيها خاصة للي بشرتهم مركبة زي انا ده بيستعمل مرة كل اسبوع
الماسك رقم 2 للترطيب والتنعيم ومحاولة ازالة الحبوب اذا في بس الحمد لله معنديش بيستعمل مرة في الاسبوع
الماسك رقم 3 ده ماسك بالرمان لصفاء الوجه وازالة الاجهاد من عليه وده مهم قوي بالنسبة لي وخاصة بعد التقشير للبشرة وبصراحةمفعوله حلو وسريع وفي منه بالكيوي بس مكنش حلو زي الرمان وده بيستعمل مرة في الاسبوع برضه.
الماسك رقم 4 ده ماسك كولاجين ممتاز جدا بينفخ الخدود شوي بشوي بس محتاج مداومة ويوحد لون البشرة مرة في الاسبوع برضه ومفعوله حلو نوعا ما بس طبعا بطيء بس يعني ملحوظ

الصورة الرابعة

هي كولكيشن ماسكات برضه بس معظمها جاي قطع مقسمة مش للوجه كله لاني بشرتي مركبة فكنت حابة اجيب كل جزء لحتة في بشرتي
الاول (الاعلي من اليسار) ماسك للعين لازالة الهالات طبعا ده مرتين في الاسبوع علي الاقل
والثاني ماسك باملاح البحر لتخليص البشرة من السموم والاتربة اللي بتكون مدارية ومانعة تنفس البشرة بشكل صحي وده مرتين في الشهر
الثالث للجزء السفلي من البشرة لترطيبه طبعا وده مرة اسبوعيا
الجزء الرابع مخصص ل T-Zone عشان الدهون بالبشرة المركبة وده مرتين اسبوعيا
والخامس كان قناع بالخيار منظف للبشرة بيعمل تاثير حمام البخار لو اخدتي القناع وحطتيه بكيسه في ميه سخنة بيخلص الوجه من الاتربة وكل حاجة بس بصراحة تاثيره مش ملحوظ قوي ولاغني عن حمام البخار
وده كنت بستعمله مرتين اسبوعيا

الصورة الخامسة

رقم 1(الاعلي من اليسار) ده لزقة لازالة البثور السوداء من الانف هي ظريفة وسهلة الاستعمال بس المفعول مش قوي
رقم 2 بصراحة جنان لازالة البثور السوداء لزقات سوداء معاها بخاخ الاول احط من البخاخ وبعدين استعمل اللزقة بتشيل كل الرووس السوداء وتستمر مفعولها فتره وديه تقريبا بستعملها تلات مرات في الاسبوع
ومعاها الجزء رقم 4 في الصورة بيكون زي تونر بستعمله بعد ازالة اللزقة من علي الانف
رقم 5 ماسك للتجاعيد بزهرة الكامونيل من ماركة فرنسية بس خرافة حلو وتاثيره سريع وده تلات مرات كل اسبوعين

الصورة السادسة

]
دول بقي مجموعة الاستحمام والتلييف والنضافة
رقم ( من اليسار)1سائل الاستحمام من ديتول ريحته مش قوي بس كفاية انه مقعم للجسم ضد الجراثيم لاغني عنه ابدا
رقم 2 زيت للاستحمام او برضه زي شاور جل كده بريحة الورد بس جنان بصراحة ريحته تستمر في الجسم من اول اليوم لاخره ماركة صينيه بس ماركة عالية قوي هنا ومشهورة بمنتجاتها التحفة هتلاقوها في معظم حاجاتي لاني فعلا بفضلها
رقم 3 شاور جل من لوكس وكان معاه رقم 5 هدية بس ريحته حلوة ساعة الاستحمام بس لما تطلعي مبيبقاش لا اثر خالص فعشان كده سبته لجوزي حبيبي قلت له خليه لك(وانا اخدت اللي ريحته حلوة طبعا)ماهي الريحة متفرقش الا معاي انا صح والا لا؟
رقم 4 ملح للاستحمام بخلاصة اللبن بدعك وافرك بيه جسمي بليفة الحمام المغربي بصراحة بيدي نعومة وطراوة وبياض محصلتش ابدا وكمان كل مرة بستعمله بلاقيه ينزل سواد لحد ما بقيت اعمل بيه كل يوم وبرضه ينزل سواد فسالت قالوا لي ده علشان بيشيل خلايا الجلد الميت ومش ضروري الاستعمال كل يوم كفاية مرتين في الاسبوع وهو مريح جدا للجسم وبالذات لكعب الرجل هنا الصينين بيعملوا بيه كعب رجلهم بس بيقولوا عشان يدي نشاط للجسم واسترخاء

الصورة السابعة

دول غسولاتي للوجه
الاول اللي هو رقم 1 (الاسمر اللي في اعلي اليسار) ده طين او طمي لغسيل الوجه وده مرة في اخر اليوم قبل ما اجي انام عشان يخلص البشره من كل الاجهادات عليها واي اوساخ عالقة بيها من اليوم بطوله.
رقم 2 غسول بوندز (الثاني في المنتصف) لتنعيم البثور بس انا كنت جايباه للرووس السوداء هو ماعملش مفعول حلو معاي زي الماسك اللي قلت لكم عليه فوق(اوعوا تكونوا ناسيين هه)
رقم 3 غسول نيفيا المرطب(الثالث علي اليمين في الصف الاول) تحفة ويجنن بجد مقدرش استغني عنه ابدا
رقم 4ملح حليب للوجه(الاسفل في اليسار) عشان عملية التقشير بيستعمل مرة كل يوم برضه بس نتيجته حلوة وفورية بصراحة من بياض وصفاء للبشرة.
رقم 5منظف عميق للوجه (المتوسط في الصف الاسفل) بستعمله بعد ما ارجع من الشغل كل يوم لان الجو هنا ايوه نضيف بس للاسف اختلاف درجات الحرارة عن عندنا في مصر بيتعب بشرتي قوي ويخليها حساسة زيادة عن الازم فلازم اهتم بالنضافة جدا.
رقم 6 منظف للوجه (اليمين في الصف الاسفل) مع التحكم في الزيوت الموجودة في الوجه وده بستعمله مرة كل يومين مش كل يوم عشان ما يسببش جفاف للبشرة
الصورة الثامنة

شامبوهات بقي من ماركة اسمها هازليلن مش عارفة يمكن هي صانسيلك عندنا في العرب لانها نفس العبوة تقريبا بس هي تجنن قوي قوي وتنعم الشعر قوي وتقويه منها نوع للشعر المصبوغ ونوع للتنعيم والتطويل
والانبوبة البيضاء هي زي مرطب للشعر بعد الغسيل وبيتشطف بالماء وجبت من كم يوم نوع مرطب تاني بالفواكه زي هيربل كده بس ماركة صيني بس معلش نسيت اصوره هبقي اصوره وانزله بعدين

الصورة التاسعة:

رقم 1 ده حمام كريم ماسك للشعر بزيت الزيتون بس بيطول الشعر قوي ماشاء الله تبارك الله وبيمنع سقوطه من يوم ماجيت الصين عمري ما غيرته ابدا وهو يستاهل بصراحة ماركته ماركة صيي مشهورة اسمها /in snow هتلاقوها موجودة في حاجات كتير من منتجاتي بس ماركة محترمة قوي وواخدة سوق وطلب هنا في الصين.
رقم 2 زي جل او مرطب وكمان معطر بريحة الفاكهة بستعمله لما باجي اعمل شعري سيشوار عشان يطريه ويخليه يحتفظ بشكل البف او الكيرلي وهو من ماركة فرنساوية اسمها obeis] بس طبعا تصنيع صيني
رقم 3 صبغة ماركة صيني بس هي التوب هنا لان جوزي كان نفسه اصبغ شعري زهق من الاسود عاوز يغير (ويمكن يغيرني انا كمان) عملت مرة صبغة بس ماطلعش اللون اللي هو عاوزه فاشتري لي ده وقالي هو ده اللي انا عاوزه(واعدم انا شعري مش مهم )بس يارب اعملها تطلع حلوة وتعجبه ومايجيب لون تالت
[الصورة العاشرة:

دول بقي مستحضراتي للعناية بالمنطقة الحساسة وغسولاتي
رقم1 (الاعلي علي اليسار) ده مناديل معقمة بريحة الفراولة مخصصة لوقت الدورة الشهرية عند النساء عشان تنضف المنطقة وتمنع الالتهابات من الفوط الصحية وكمان ترفع من معنوياتهم بريحتها المنعشة لما يمسحوا بيها المنطقة ديه وريحتها تبقي فراولة (محدش يضحك هي في الاعلانات بيقولوا كده وانا حاسة بصراحة مفعولها وريحتها حلوة جدا جدا )
رقم 2 (المتوسط في اليسار) نوع غسول من شركة والش عجبني قلت اشتريه واجربه بس لحد الان مافتحتوش
رقم 3 غسول بالنعناع(اسفل اليسار) انما تحفة انتعاش ونضافة جنان وبيدي برودة جنان وريحته بتلزق في الملابس الداخليه فترة وانتعاشه بيستمر اليوم بطوله مش عارفة ماركة جولي بتاعته ديه موجوده في العرب عندنا والا لا؟
رقم 4 (الاول في الصف اليمين) بخاخ معطر للمنطقة وفيه ملطف من البابونج مهم طبعا وعارفين فوايده بستعمله مرة كل يوم تقريبا.
رقم 5(متوسط الصف اليمين) ديه مناديل معقمة فيها دواء وخلطات صينية لحاجات كده بس بتكون كويسة للمتزوجات(وكفاية كده عشان البنات ميزعلوش مني) وبتستعمل مرة واحدة.
رقم 6 (اسفل الصف اليمين) مناديل معقمة مرطبة للمنطقة بستعملها بعد كل مرة بروح فيها للتواليت وخاصة لو كنت خارج المنزل عشان انتقال العدوي والامراض والحاجات ديه.

الصورة الحادية عشرة:

دول مستحضراتي للعناية بعد الحمام وهما بالترتيب كالاتي:
رقم 1 ده زيت بيبي جونسون وقت النوم ريحته خرافة وتجديد عن الزيت الوردي التاني اللي زهقت من ريحته وعلي فكرة انا جربت ماركات تانية صينية كتير بس الزيت ماعجبنيش الا جونسون لان هنا في الصين بيحبوا زيوت الاطفال من غير ريحة خالص هي ممكن تنعم الجلد بس انا مهم عندي الريحة فملقتش الا جونسون بصراحة وطبعا تصنيع صيني
رقم 2 (اللي بجوار الزيت من علي اليسار)ده لوشن بعد الحمام(خلصان بقي معلش)بزيت الزيتون بس جنان منعم للجلد بدرجة خرافية وملهوش ريحة لانه من نفس ماركة الشاور اللي بالورد اللي قلت لكم عليه فوق فبيتعمد ان الريحة تيجي من الشاور مش اللوشن
رقم 3 (اسفل اليسار) لوشن بالورد وخلاصة اللبن لسه جايباه جديد بدل اللي بزيت الزيتون اللي قرب يخلص ده بس بصراحة مجربتوش ماركته كورية بس منتجاتها جربتها في حاجات كتير كانت كويسة جدا وانا بصراحة مش بحب استعمل منتجات شركة واحدة بحب اغير دايما بس الاول اتاكد من سمعة الشركة واسال عنها وبعدين اقرر اشتري منتجاتها والا لا؟
بس عامة فيه شركات هنا عالية وفيه متوسطة وفيه منخفضه فانا بحب منتجات الشركات العالية لانها صحة وبشرة وجسم مش لعبة
رقم 4 (اعلي اليمين)ده طبعا الجلسرين محدش يقدر يستغني عنه
رقم 5(متوسط اليمين) ديه بودرة للجسم من ماركة المانية مشهورة بس طبعا تصنيع صيني بخلاصة الذره هي بصراحة بتاعتة البنوتة بتاعتي بس انا قلت اجربها فعجبتني فقلت وماله انا وهي واحد هي منعشة قوي للجسم وبتدي احساس وغز للجلد كده حلو قوي وريحتها بتدوم فترة وبالذات في الصيف بتمنع الحكة تماما وتخفي اي حبوب مياه بسبب حرارة الجو هنا
رقم 6 (اسفل اليمين) ده لوشن جسم بالفراولة من ماركة الشاور الجديد اللي انا مفتحتوش(ركزوا معاي) الماركة الكورية ديه
بس ريحتها حلوة وكمان ليها طعم لذيذ جوزي بيحبني استعمل اللوشن ده ساعات هو ومزاجه

الصورة الثانية عشرة

فيها منتجات ضرورية لي بصراحة
رقم 1 ده ماكينات حلاقة نسائية حلوة وتنفع وقت الزنقات كنت جايباها اجربها واشوف هي افضل والا الماكينة اللي قلت لكم عليها فوق لقيت الماكينة اللي فوق وبس
رقم 2 كريم سريع للازالة الشعر بياخد بس 8 دقايق وبيقعد حوالي اسبوعين من دون الشعر الجديد ما يطلع حلو برضه للزنقات
رقم 3 ورقم 4
دول كريمات مهمة جدا جدا وانصح اي واحدة لازم تستعملهم دول كريمات الشطة الحمراء لازالة السليوليت من المناطق المختلفة في الجسم عشان ما تسمحيش للسليوليت يدي لجسمك منظر البرتقالة فلازم كل اسبوع مرتين علي الاقل تدهني من الكريم بتاع الشطة الحمراء للتنحيف ده ولو عندي حمام ساونا تقعدي فيه عشرة دقايق بالكريم صدقيني هيشيل كل السليوليت ويمنعه من التراكم بس اهم شيء الاستمرار عليه
انا بدهنه مرتين اسبوعيا وفي خيمة الساونا وعلي طول وبصراحة لو استنيت علي نفسي وماعملته بحس بتراكم دهون مش عارفة يمكن قابلة جسمي كده او كل النساء كده مش عارفة في الحقيقة.

[الصورة الثالثةعشرة

دول باقي ماسكات الوجه والجسم
الاول اللي هو من اليسار ده ماسك كولاجين للوجه بيجي مع الماسك اللي في اول صورة كمرحلة اولي مفعوله حلو قوي للوجه بس عاوز استمرار
رقم 2 ده طبعا غني عن التعريف ماسك اللولوة لتبييض الجسم وتوحيد لونه وده بستعمله تلات مرات في الاسبوع لكل الجسم ونتايجه جنان
رقم 3 ده ماسك زيت زيتون وزيت جنين قمح للوجه والشفايف عشان لو فيه شحوب والا حاجة يورده وممكن للجسم بالذات المناطق الغامقة فيه هو من ماركة فرنسية بس طبعا تصنيع صيني بستعمله ساعات بالتبادل مع نوع ماسك تاني يعني كنوع من التغيير بس نتايجه روعة بصراحة وسريعة

الصورة الرابعة عشرة

دول كريماتي للبشرة
رقم 1 ده ماسك من شركة اصالة المصرية بالطمي المغربي مفيد لنضارة الوجه بستعمله مرتين شهريا.
رقم 2 (بجوار كريم اصاله من اليمين)ده كريم ليلي لمنطقه حرف التي بيستعمل قبل النوم بغرض ازالة الدهون الزايدة من المنطقة ديه وماركته المانية بس انتم عارفين تصنيع صيني.
[رقم 3(الثالث من اليسار) ده تونر ومنظف ومزيل مكياج بس جنان وخرافة عمري ما غيرته بصراحة من ماركة obeisالفرنسية بس بيجنن ماشاء الله
رقم 4( الرابع من اليسار) تونر منعم للجلد كنت واخده هديه مع واحد من الغسولات مش فاكرة انهي واحد بالظبط بس عادي شوي تاثيره مش مميز قوي.
رقم 5(العبوة البيضاء تحت عبوة اصاله) ده كريم للنهار من ماركة زينسافا الفرنسية حلو جدا ضد اشعة الشمس ودهون البشرة
رقم 6 (الخضراء تحت العبوة البيضاء) ده كريم ليلي لباقي البشرة بينشط الدم في الوجه وكمان يمنع التجاعيد ويخلي البشرة مرطبة ماركتة ماركة شركة ادويه صينية معروفة اسمها صانشين بس هو تحفة وجربت كتير غيره بس ده الوحيد اللي حسيته مفيد وجاب تاثير
رقم7 (العبوة جنب نيفيا من اليسار) كريم مرطب للبشرة بس خطير من ماركة اسمها دكتور لي ماركة صينية مشهورة جدا جدا ومن الماركات العاليه والمحترمة برضه.
[رقم 8 طبعا نفيا بس ده كان من مصر وغني عن التعريف.
رقم9 (فوق نفيا بغطاء برتقالي)حامي من الشمس ماركة صينية مشهورة في المجال ده بس يجنن بجد حتي كنت بستعمله لبنتي علي جسمها لما كانت تخرج معانا لان الشمس هنا بالصين شديدة قوي ولازم حماية مكثفة
رقم10 (اقصي اليمين) زيت الزيتون النقي للبشرة مين يستغني عنه؟؟؟

الصورة الخامسة عشرة

رقم 1 (الاعلي من جهة اليسار)ديه مناديل منظفة للوجه ومزيلة لمكياج بس انا بستعملها بالذات لما بكون خارج البيت في الدوام مثلا او كده عشان الاتربة ما تسدش مسام الوجه عندي وتلوث بشرتي.
[رقم 2 جل للعينين بالبايايا مبيض وكمان مرطب بيستعمل مرة واحدة كل يوم قبل النوم بس فعلا بيشيل الهالات السوداء و في الواقع هو فعلا بيقلل التجاعيد شوي خاصة للصغيرات في العمر زي بس طبعا مش بيخفيها خالص.
رقم 3 ده كان عينة كريم للبشرة للتفتيح والتغذية بس انا ما استعملتهاش لاني والحمد لله مش بحب حاجات التفتيح ديه خالص بس اهه خليه يمكن ينفع حد والا حاجة.
رقم 4 كان عينة برضه(اصلي بحب اخد العينات اجربها الاول واعرف واسال عن شركتها وسمعتها واشوف ايه اللي يناسبني قبل ما اشتري المنتج نفسه) بس ده كان عينة لغسول ضد التجاعيد وتبييض للوجه وهو ما استعملتهوش برضه لاني والحمد لله رب العالمين معنديش تجاعيد بس خليه هينفع برضه.
رقم 5 كريم ايدين بس يجنن نعومة وبياض بالذات بعد شغل البيت بيجنن فعلا ماشاء الله.
رقم 6 كريم للايدين برضه بس من فازلين والكريم اللي قبله كفاية للايدين فده بستعمله للقدمين خاصة في فصل الشتاء انتم عارفين بقي التشققات بتعمل ايه وخاصة مع برودة الجو الشديدة هنا.
رقم 7 الوردي من الاسفل في اليمين ده بادز للازالة المانكير مبللة بالزيت بس بصراحة حلوة وسريعة ومش بتسيب اي اثر خالص وكمان الزيت اللي فيها بيغذي الاظافر اعتقد العلبة الصغننة ديه كان فيها حوالي 200 باد بس فعلا حلوة وجديدة.
رقم 8 ده كريم مغذي لجلد العين من ماركة فرنسية اسمها جارسيه تقريبا بدهنه كل يوم مرتين او تلاتة.
رقم 9 ده معجون الحنة كنت جايباه فاكراه بتاع الاظافر اللي بدال المانكير بس يعني اهه شغال لحد ما انزل مصر ان شاء الله تعالي واجيب بتاع الاظافر

الصورة السادسة عشرة

]
[صورة مجمعة للضحايا واتمني انهم يكونوا نالوا اعجابكم
[واي استفسار انا في الخدمة
وزي ماقلت لكم اسمح بالنقل ولكن مع ذكر المصدر ولن اسامح ولن احلل اللي تنقل من دون ذكر المصدر او تدخل وتتفرج علي اغراضي من دون ماتدعي لي انا وزوجي بهدوء السر وصلاح الحال والتوفيق في الدنيا والاخرة وانهاء الدراسة علي خير والستر في الغربة والعودة لمصر بلدنا سالمين غانمين باذن الله تعالي
ويالا فرجوني الردود

موضوع اعجبني واحببتو ان انقله لكم للفاءدة
ولاتنسو الدعاء لصاحبة الموضوع
تحياتي اتمنى ان يعجبكم

رارا رونا · #2 August 5, 2010, 06:53 PM

ميرسي وربنا يباركلك ويرجعك لبلدك

روعه الشوق · #3 August 11, 2010, 01:48 AM

يسلموووو

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
$ ملف متكامل للعناية بالبشرة $ بنصح كل وحده تفووت تشوف الي ينااسبها..	سمرا	مجلة العناية بالبشرة	48	April 1, 2018 08:31 PM
ملف للعناية بالبشرة	AHD Ashour	مجلة العناية بالبشرة	5	December 20, 2009 03:07 AM
وصفات طبيعية للعناية بالبشرة والشعر والاظافر	susio_7	مجلة العناية بالبشرة	2	August 25, 2009 02:36 PM
تكمله قصه جوال الميته والجزء المفقود والجزء الاخير	عسل وسكر	روايات و قصص منشورة ومنقولة	2	July 17, 2009 10:00 AM
لك ادم ملف كامل للعناية بالبشرة......	براءة الشوق	مجلة الرجل	2	November 25, 2008 09:48 PM

اغراضي للعناية بالبشرة والجسم من الصين وحصريا هنا وبس

مجلة العناية بالبشرة