|
|||||||
| ديوان الاُدباء العرب مقتطفات من قصائد الادب العربي الفصيح, و دوواوين الشعراء في الجزيره العربيه,والمغرب العربي, العصر الاسلامي, الجاهلي , العباسي, الاندلسي, مصر, الشام, السودان,العراق |
|
|
LinkBack | أدوات الموضوع | انواع عرض الموضوع |
|
#1
April 24, 2010, 05:08 AM
|
||
|
|
||
أفلآطون الشعر .. ||~
بسم الله الرحمن الرحيم .. أفلآطون الشعر .. شآعر .. وما توفيه حقه .. هو سعد بن جابر بن علوش الهاجري ( المرعب ) صاحب المشاعر والاحاسيس الجميلة والصادقة الذي يعد من اهم شعراء جيله, والذي يتميز بشاعريته وبكتابة قصائده باختياره للكلمه وانتقاؤه لها وبقوة التعبير وصدق المشاعر خاصة فأن كل ما يدور في ذهنه ويكمنه قلبه تفيض به حنجرته وارى ان ذلك هو سبب نجاحه, فنجاحه في تميزه وابداعه، لذلك يصعب علينا مقارنة سعد بغيره فسعد هو ذاته سعد.ومهما قمنا بوصفه فلن نفي بحقه ولو اردنا قول..ابداع..ثقة..عاطفة ..صدق ..تجدد ..فكر ..تميز.. فكل ذلك سيذكرنا بسعد بن علوش, أعني بذلك انه شاعر متنوع ومتمكن وله مكانته في ساحة الشعر حتى ولو كان هناك من يحاول التقليل من مستواه او ( تهميشه ) على الساحة فبالرغم من ذلك ستبقى مكانته كما هي في نظر عشاقه ومحبيه. وإن كان سعد قد اخطأ بشيئا ما واصبح ممسكا عليه فقد أتذكر إنه قال : إن كنت أنا أخطي شي طبيعي لأن أنا ماني نبي محد عصمه الله من الاخطاء يكون الانبيا فعلا انا اخطي بس ضوي ماتشب إلا إحطبي اطمح و لولا الليل محد شاف فايدة الضيا وها هو يتعجب من حساده قائلا : كل ما اتعثر قلت في نفسي وانا أمس إشنبي : يا كم على الدنيا فقير ويحسدونه اثريا !! ورغم ما يوجه له اعداءه من شتم وسب .. يقول لنا : لأن عندي درايه بالزمن و معروف السوي اللي يسبه شخص ما هو سوي تدري ليه اتبسم لا شتموني ضعوف لأن شتم الضعوف يدلل اني قوي وان كانت هذه الزمرة مخلوقه للعداوات فسعد يقول : حنا خلقنا للرذيله .. فضيله نصلح اغلاط الزمن بابتسامات اما الشطر الوحيد الذي لم اقتنع به نهائيا :من اول تنبح كلاب او قافلة الاحمل تسير و اليوم لا تنبح كلاب او لا تسير القافله لأنه يسير و ..! وهنا يذكر من اساء اليه : جيت للدنيا كبير و ابا افارقها كبير ولا بناشد من مدحني ولا من ذمني عموما .. لا مجال لمن يسميهم ب ( البقحين )بمصارحته : قسم بالله لو ما لي مع اهل الطيبة مبدا لا انزل نفسي لبقحين خلق الله واصارحها وان كان ما يحصل له ابتلاء : لكن مع الله كل بلوى بخيره انا ذكاي من التجارب رصيدي ويش اسوي والحظوظ السود تامر ..تنهي حتى حظه الأسود غائبا عنه : اخذيني الشاعر اللي ماصدق حظه لاقلت: ياحظ وينك ؟ قال: يا ويني ؟ فعلا هو شاعر مبدع .. : لالا .. أنا مخلوق مبدع ما يحب وما يبي إلا يقول : الاذكيا سبة رسوب الاغبيا ومما قال بالفصحى : هل علمت عن جنوني يا آنف اني لمجنون النشاز المجيدي لبيك يا سلكا حملت الفضائل أوعز لصاحبك بتحرير قيدي ويكتشف من اسباب تولد الحرارة سبب غفل عنه العلماء : شبيت في قلبي وانا بطبع البرود مطبعه وكذاب من قال الحرارة من نتاج الاحتكاك هذا انت في لوس انجلوس متقبع لك بقبعة وانا على عرق وخفوقي يابعد عمري معاك ومن حكمه : من الذكاء انك تسوي نفسك أحيانا غبي بس الغباء إنك تذيكالك على ناس أذكيا يرى انه لايوجد داعي للتفاخر بكثرة الاصدقاء : ماهو فخر في سنة تعرف لك مية صديق الفخر ؟ تتعرف بصديق .. لمية سنة نوعا ما هو مرهق والسبب : تعبت لأني من اهل الطولات صعبين المراس اللي يحبون الوفا ولا يحبون الغدر سعد والأغبيا : انا افكر كيف ازيل المنحدر من الاساس والاغبيا لاهين في لذة صعود المنحدر !! ويصف الدنيا .. : إيه .. والدنيا مساكن ورحلة واغتراب والغلا بالوقت هذا مميز بالعيوب مقتطفات غزلية : لا ارى لا اسمع لا اتكلم : اغليه .. يعني اعشقه .. اعشقه .. يعني اموت فيه يعني انا ميت مع عشقه ومرتبة الشرف امشي معه من غير لا أين .. ولا كيف وليه من حيث ما يجرفني .. اغمض عيوني و انجرف إن قال: لا .أقول:لا ..إن قال:إيه ..أقول :إيه ماعرف ماسمع ما أرى .. ما أرى ماسمع ماعرف يتنافس هو وابنه : لو كرات الدم ترث غلا ولا اشتياق كان ابتنافس على حبك انا و ولدي لا فض فوه : لا بث رقمه شاشة الجوال .. أتوه و اقول : يا ربي تبارك ساعته جوالي ليامنه دق وقال: الوه تذوب اذانيي على سماعته لبيه يا كلماته .. ولا فض فوه أموت في ضحكته و استمتاعته من كثر ما احبه .. احب امه وابوه بالمختصر .. احبهم جماعته احبه كثر .. : احبه كثر ما شفت الخيانة في عيون اصحاب واحبه كثر ما عقول الدواهي تحسب حسابي واحبه كثر ما قفى عن عيوني بدون اسباب و كثر ما املى له اكواب الغلا و ينثر اكوابي لحظة البكاء : فإن غبت يانفر العقل واشتياقه ماني براغب بعد خوتك خوه ببكي على زول عشقته عشاقه وترى البكا للاقويا .. زود قوة فإن شفت ابن علوش يبكي فراقه ترى محادير الجبل من علوه |
|
#2
April 24, 2010, 05:16 AM
|
||
|
|
||
|
رد: أفلآطون الشعر .. ||~
أظنكم عرفتوآ الابدآع من الابيآت المنتقآه بالاعلى ..
صحيح سعد شآعر |> لبى إسمك ..^ وهذي قصيده فخر له .. اتركم معها واعتذر عن طول القصيده لكن رآح تندمجون معهآ ^^ في الكبد ليعّاتها وفي النفس حاجات حاجات ماهيب رغبات وشهوات ندم على حزن.. على مدري شسّمه إللي يكلمك.. وتكلمه بسكات ياودي أصرخ من إللي داخلي حيل ويا ودي ماتنبس من الليعّه شفات مزحوم تفكير ومشوش وبردان وياخوفي من الغضب و الإنفعالات تعارك الشر مع الخير فيني يأثر على إتخاذي.. للقرارات ثاقب وألاحظ تفاصيل التفاصيل كن البشر عٌري وعيوني مرايات أفضال ربي علي واجد وأفضل أفضال ربي.. الفقر وإنكاره الذات يامجمل الفقر وأشياءه وروحه تموت منّه تعب وتعيشه أزمات يعلمك ضعفك وبأن عقلك هو إللي يميّزك عن الحشرات وتعرف بأن هذا لك وذا لغيرك ولاتفكّر ولاتكسّر حسابات الفقر مفيد ..وأشياءه مفيده مليء قناعه وقوه وغايات يمكن لو إنك غني تطغا وتنسى وأتطيش وتطوّف الخمس صلوات لذلك الحمد لله والثنى له على الفقر والمصايب والمسرات يمكن أني فقير بس مانيب تبعّي أجلس ولا أنقاد خلف الإتجاهات وإن ما أعجبتني قناعات الزمن هذا أنا.. أألف لتفكيري قناعات شاعر ويسكن ف مخي الف شاعر ماهم بشعّار هالوقت التروفات اللي يقولون مافي الشعر نادر وإن الشعراء نفس المستويات لو أنهم واحد وبتفكير واحد ماشفت ناقد ولا معجب وشمات الله على هالكلام ومن يقوله والله يقطع سياسة هالمجلات يعني اللي شعره ملى الدنيا جماهير مثل اللي يطلق قصيده سردة أبيات لامني سمعت القصيده قلت هذي؟ سمعتها قبل هذي عشر مرات!! يشل.. آخر كلام الشطر الأول ويحطه بآخر الثاني .. وخذ هات قاف متكرر.. ولافكره ولاشي يبني القصيده.. على تفكير بنات وبه نوع ساذج علشان أيتميّز يصرخ ويعمل بيدّينه حركات والمرء عود مايجهل.. لذلك هالشعراء يكرهوني -انا- بالذات الله يخليني لشعري وأصونه وأحرق به كبود شعّار المسجات أجذبّ به.. أذواق حكّام الجزيرة وأزرعه.. فعقول فتيان وفتيات اركبّه جن.. وامارسه بجنون وأشبعه فلسفات وأبتكارات وآعلم الجيل هذا وإللي بعده جودة الإطاله.. وفن الإختصارات و وشلون أحرث صخر فكري وأخلّي بيني وبين أقرب منافس مسافات الشعر في نظرة اغلبهم مصالح فلوس وشيوخ وبنات ولقاءات وفي نظرتي الشعر روحٍ و روح حرّه ماتخضع لشف.. وأشخاص.. وقياسات الشعرٌ ماتقشعرُ له أبدانٌ ومَا يسَرقُ من الكلمات.. الكلمَات تقراه ف عيون شاعره وتحسه يفتح له فَجلد يدّينك مسامات ردد قصيدي ياجمهوري وصفق وعلمّهم إن الغلا مابَه خيارات وتعال نسرح سوّى في شي عندي وأخاف لا أبكي؟ وتبكيني العبارات حزين جداً ومتعومس وخايف أحس كنّي على مهوّي نهايات حبيبتي .. إللي أغليها وأبيها؟ راحت.. وقالت بجّي وللحين ماجات ما أذكر أني.. مسوي شي لكن الشوق لا زاد.. يسبب حزازات والصبر صبر القلوب البيض وأدري يامصعب الصبر لا قدّبه محاتات دمّرني الشوق وإستنرفني شعور وتعبت أثبت وجودي داخل شتات تمر كل الوجيه.. بدرب عيني نفس الملامح؟.. ونفس الابتسامات حبيبتي طاغيه وبشكل طاغي صديقة الليل واجناب البنايات من وين ما أفتر لاهذا وجهها على الطرقات وأضواء السيارات يابرّي حالي عليها برّي حالي عليها يابرّي حالي عشر بريات لأني أحبها.. فعلاً وجداً ماهي محبة.. رفث.. ولا إتصالات وإللي سواتي.. يحب وخايف الله يعرف.. معنى معاناة المعانات الحزن في بعض الأحيّان إزدواجي وجميل.. لاصار من تجنيب غلطات من خّلا حاجه لربي عاضه أخيّر منها واحسن دبلات الدبلات وانا مابي .. غيرها .. ولا ألتفت له السيده .. لا رجعنا للسيادات جعل امها إتوافق إن جيت أخطبها تكفون دعواتكم ي أهل الدعوات
__________________
|
|
#3
April 24, 2010, 05:34 AM
|
||
|
|
||
|
رد: أفلآطون الشعر .. ||~
قصيدة التوبه الجميع ظن انهآ توبه من الشعر ..
لكن افلآطون الشعر صرح بنفسه إنه مستحيل يعتزل الشعر .. لكن القصيده جاءت بعد ادآءه مناسك العمره .. من كل حرف , وكل شهوة صبابه ... استغفر الله وأتعوذ من ابليس ... أعوذ باللي آوى عبد وسرا به ... لاجي نهار الحشر خلف امرئ القيس ... يارب , يارب الكرم والمهابه ... يالي لك أعلام الأوادم مناكيس ... جردني من النابيه والسبابه ... ولبسني من دروع هديك متاريس ... تعبت من مسك القلم والكتابه ... والشعر وفتن النسا والأباليس ... والمدح في عزوة وشيخ قرابه ... واللاء, لدعوات الرضيين والليس ... والحب, وماحوله,وماله , وهابه ... والدمع لاهبت علي النسانيس ... والشوق وغفال العقل وانغلابه ... والليل وخطط الدها ... والجواسيس ... والشهرة وحكي العرب واللبابه ... وزملوق شف ماتعسه عواسيس ... وحصر اسمي فشاعر فسحاة غرابه ... شعارها فيهم رخوم وملاحيس ... وانا لعطاش الأودام سحابه ... ومن خلقتي ماقد وطيت الدنافيس ... تاكي على ارث الاسم بالنيابه ... واقطف خلاصة ماغرسوه الغواريس ... احسبني فايز بالرضا والذرابه ... واثري مثل من يحصر النور في كيس ... اقفي من الله والأمل والرضا به ... واروح أدور من ورا ابليس أحسايس ... قلبي لعزاف الاوادم ربابه ... وراسي لخطوات الشطانه دواعيس ... تقودني نفسي والا اشعر ولا آبه ... مالت عليها عاصيات الهواجيس ... من عنده ان كل الشعور يتشابه ... روس مع اللي في الدحادر مراويس ... الاثم ما حاكه خفوق وخفا به ... والخير ماشاعته روس النواميس ... كم شي صار وصار مايندرا به ... وكم نومة ماكدرتها كوابيس ... ترى ما أحد له في رقبتي طلابه ... بس الصراحه من شيم الفواعيس ... والرجل اذا مايعتبر في شبابه ... يعيب قبل يشيب ويشيب ويخيس ... ياراجي ارجي اللي ماينصك بابه ... لاترجي الوهبات ومن هيس ابن هيس ... استغفر الله واتتقى عذابه ... اللي فرقني عن حياة المتاعيس ... من قبل لا اعرف الهدى واعنا به ... أنا وهمي والحزن Face to Face ... والحين لله .. الفضل والانابه ... متعافي .. ويمشي على زندي التيس ... هادي .. يشوشني طزيز الذبابه ... لاعد لايام الغبيه ولا اقيس ... شريت عقلي في سؤال واجابه ... أنا أعبد الله ... والا أعبد الوساويس ؟ ... لذة خفوقي وانجلاية ضبابه ... سجدات ليل ظالمينه مناعيس ... ف اجواء مكه والحرم والرحابه ... لايابعد روما ولندن وباريس ... هذي ديار المصطفى والصحابه ... وهذيك دار ابليس وعويل ابليس .
__________________
|
| مواقع النشر (المفضلة) |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| وصفة عجيييبة..خياااال..تطول الشعر،تكثف الشعر،تنعم الشعر،وتزيل القشرة..للكبار الفتى الحزين | ♥ الوفا طبعے ♥ | مجلة العناية بالشعر والتسريحات | 82 | July 3, 2012 10:01 PM |
| الطريقه الصحيحه لصبغ الشعر،خطوات صبغ الشعر،طريقة صبغ الشعر | AHD Ashour | مجلة العناية بالشعر والتسريحات | 3 | July 3, 2012 09:58 PM |
| تطويل الشعر,خلطة تطويل الشعر لبنات,طريقة تطويل الشعر للبنات,خلطات لتطويل الشعر | مغرور كيفي | مجلة العناية بالشعر والتسريحات | 8 | May 25, 2012 12:18 PM |
| فرد الشعر,فرد شعر,طريقة فرد الشعر,طرق فرد الشعر للبنات,فرد الشعر بالاعشاب | AHD Ashour | مجلة العناية بالشعر والتسريحات | 4 | May 29, 2011 04:06 PM |
العرض العادي
